Ma video a ku Kikongeno kyetu kya 2020 akyamba’shi “Ikalayi na muloo nguba ooso”!

Ma video a ku bikongeno byetu bya mafuku asatu aakumu mashimba etu na kwitukwasha bwa kupusha malongyesha e mu Bible. Kikongeno kya mafuku asatu kya 2020 kina mutwe wa mwanda awamba’shi “Ikalayi na muloo nguba ooso”! Ki na ma video 114, mpana miisambo 43 yabadi bakite kwi bakwetu ba mu Kasaka ka Bakunkushi-Bakulu na bakwetu abebakwashaa. Ouku bukata bwa mudimo na bungi bwa makuta aatunganga bwa kutusha ano ma video oso su?

Bakwetu balume na bakashi pepi na 900 ba mu nsenga ishima mbakwashe na nsaa yabo mpa na mayele bwa kukwasha mu kutusha kwa uno programe. Mu byoso, mbakishe nsaa 100 000 nsaa ikile ya bipwa bibidi ku uno mudimo. Mwanka mwi nsaa 70 000 yabadi bakishe mu kupudisha kwa kukita drame a mu Bible ena minite 76 amba’shi: Nehemiya: “Muloo wa Yehowa ngi bwenu bukome.”

Eyendo’shi mbyate makuta ebungi bwa kukwasha bano bakwetu boso na kwibalongyesha byabadya kufubisha byamo abitungu bwa kupudisha wawa mudimo.

Jared Gossman, afubaa mu departema a Audio/Video amba’shi: “Komite a malongyesha a Kasaka ka Bakunkushi-Bakulu akumina kutwesha bantu ba bipikwa na mbalo ilekene mu ano ma video. Kukita bino akulesha binyibinyi’shi twi kifuko kimune kya mu nsenga ishima. Bwa kwibikita, bisaka 24 bya bakwetu ba mu maumbo 11 mbifube pamune. Uno mudimo wa mu nsenga ishima ngwate makuta ebungi, nsaa ya kwibilumbuula na kukunkusha uno mudimo.”

Bwa kukita ma video etu, twi na lukalo lwa byamo na bintu bibuwa ngofu. Kileshesho, bintu bya kukita nabyo drame Nehemiya: “Muloo wa Yehowa ngi bwenu bukome” abekalanga bebikitshine mu stidio a ku Mt. Ebo pepi na Patterson, mu New York, U.S.A. Bwa kufuba kalolo na makuta aatungu bwa’shi atukye na bintu bya mu mafuku a kala nka bibaabidi, bakwetu abakitshine bintu bi mumune na bibaadi midimba ya ku Yeelusaleme. Mudimba oso ubadi na metre asamombo na mitshi mpa na bivare byabadi bakite bwashi bimwenekye bu mabwe. Ino “midimba” bibaadi bibofule bwa kwiyitentuula mu ma mbalo elekene bwashi epushene na ma mbalo abakitshina, abikwasha bwa kupela kukita bintu bibungi bya kufuba nabyo. Sunga mbyabya, bibaadi abitungu makuta e bungi bwa dolare pepi 100 000$ (U.S.) bwa penda kukita uno drame.a

Ino myanda yoso ayitukwasha bwa kusangeela programe a kikongeno kya kino kipwa bu byatuuku mushindo wabadi bekilumbuule. Atushinguula’shi mudimo ukitshikye bwa kutuusha uno programe mushima autakula bakwetu ba mu nsenga ishima bwa kutumbisha Yehowa. Tubenutumbulayi bwa bya buntu byenu byanudi batushe na kalolo kooso ku mudimo wa mu nsenga ishima kukidila ku mbalo ifunde’shi donate.jw.org na ku ingi mishindo.