Mwanda wa 13

Abrahame​—Kuuku a Efile Mukulu

INGI mbalo ibaadi bantu bende mu kushala kunyima kwa Mpeshi a kabutu ibaadi ayitaminwa bu Ure. Ibaadi ifikye bu lupata lukata lubaadi na mashibo ebuwa. Kadi bantu abaadi mwanka abaadi abalangwila b’efile ba madimi. Nyi bibabakitanga mu Babele. Nowa na mwana aaye Seme abaadi belekene na bantu ba mu Ure na ba mu Babele. Abo abatungunukile na kufubila Yehowa.

Akupu, bipwa 350 kunyima kwa mpeshi a kabutu, Nowa muntu sha kululama bafwile. Kubaadi kukile bipwa bibidi nabo kutanda uno muntu okwete kumona mu kifwatulo. Baadi muntu ebuwa ku meso kw’Efile Mukulu. Eshina dyaye Abrahame. Bashalele na kifuko kyaye mu lwalwa lupata lwa Ure.

Dingi efuku Yehowa balungwile Abrahame shi: ‘Katuka mu Ure na kifuko kyoobe na wende mutadiile kwiumbo dyankakulesha.’ Abrahame bakokyele Efile Mukulu na kuleka nshalelo ebuwa a mu Ure su? Oolo. Mwanda nsaa yooso Abrahame baadi akokyela Efile Mukulu nyi bwakinyi aukibwa bu kuuku a Efile Mukulu.

Bangi beena kifuko kya Abrahame abayiile naaye nsaa ibakatukile mu Ure. Nshaaye Tera na mwipu aaye Loota abayiile naaye. Na dingi, Sara mukashi a Abrahame bayiile nabo. Kunyima booso bwabo abafikile ku mbalo yabetamina bu Harane, kubafwile Tera. Abaadi kwibula na Ure.

Kunyima kwa mafuku, Abrahame na kifuko kyaaye abakatukile mu Harane benda kwiumbo dyabetamina bu Kanaana. Kwakwa, Yehowa bakwile shi: ‘Naapa beekulu boobe dino eumbo.’ Abrahame bashadile mu Kanaana aye nkushaala mu mashibo a mapema.

Efile Mukulu babangile kukwasha Abrahame aye nkupeta loombe lukata lwa mikooko na ingi nyema na nkama ya bafubi. Kadi aye na Sara tababaadi na mwana su ngumune.

Pabaadi Abrahame na bipwa 99, Yehowa bamulungwile shi: ‘Na kulaa shi okyebe kwikala nshaaye na miilo ibungi ya bantu.’ Kadi bibadya kukitshika mu mushindo kinyi, aku namu Abrahame na Sara abaadi bapwe kununupa bwa kutanda mwana?

Kibangilo 11:27-32; 12:1-7; 17:1-8, 15-17; 18:9-19.