Midimo ya Bufumu​—Kwibaka mashibo a lulangwilo na kutuusha bukwashi

OKWETE kutambuka mu Nshibo yenu ya Bufumu, kadi t’otundula dingi ino mbalo nya. Ino nshibo ayikusangasha ngofu. Pangi otentekyesha shi, boodi okwasha nsaa ibaabadi abeyibaka mu bipwa bishaale. Binobino we na ungi muloo, mwanda abatumika na Nshibo ya Bufumu ano mafuku bwa kwabila bukwashi. Kunyima kwa mpeshi a kipapi kikata mulwishe mbalo yanudi, Komite a filiale mususa umune balumbuula mushindo ulombeene baaba bapete masaku kupeeta bya kudya, bya kufwala, mema ebuwa, bilamba na bungi bukwashi. Bya buntu byabekeele batushe bwa kukwasha bantu bapete masaku mbebilongye kalolo. Bakwetu balume na bakashi mbaule mwanka bakwete kwata bintu byabadi nabyo lukalo na, mu nsaa ibungi bakwete kunosha mpolo ya muloo.

Yesu bambile shi balongi baaye abebatundwila ku kifulo kyabadi nakyo umune na mukwabo. (Yo. 13:34, 35) Mu kino kipindji, atukyebe kutaluula mushindo wi kifulo kya bwina Kidishitu kikwete kumwenekyela ku mudimo wa kwibaka na ku bintu byabatusha bwa kusamba bantu bapete masaku byabakwete kutuusha kwi Batemwe ba Yehowa. Kino kifulo nkitundwilo kikata akilesha shi, tukwete kukunkushibwa na Bufumu bwa Yesu.