Mmalongyesha kinyi aakuminaa Batemwe ba Yehowa?

Batemwe ba Yehowa abakumiinaa’shi “Kifundwe kioso nkiyokyelwe kwi Efile Mukulu na nkipwandjikile.” (2 Timotee 3:16, Kilombeno kipya 2014) Atufubaa na Bible bwa kupeta bukunkushi na kulonga myanda itale Mupangi na bwa kwikala na nshaleelo ebuwa.

Bible akula’shi: “Bawukye’shi eshina dyoobe mbu Yehowa, obe bupenka, Sha-kwiyilu kula, pa nsenga ishima.” (Misambo 83:19) Byabya, atulangwilaa nka penda Yehowa Efile Mukulu, na bu byatudi tumonyi twaaye, atwitatshishaa bwa kuukisha eshina dyaaye.​—Yeeshaya 43:10-12.

Bu byatudi bena Kidishitu, atukuminaa’shi Yesu, nyi “Mwan’Efile Mukulu,”a bafikile pa nsenga aye nkufika Mesiya. (Yowano 1:34, 41; 4:25, 26) Kunyima kwa’ye kufwa, Yesu baadi musangulwe bwa kwenda mwiyilu. (1 Beena-Kodinto 15:3, 4) Kunyima kwa mafuku bafikile Nfumu a Bufumu bw’Efile Mukulu. (Bifumbulwe 11:15) Buno Bufumu nyi mbulamatadi a binyibinyi akaaluula nsenga Mpaladiiso. (Danyele 2:44) Bible akula’shi: “Beeyishe abapyana nsenga, abasangeela mu butaale bw’eyendo.”​—Misambo 37:11, 29.

Batemwe ba Yehowa abakuminaa’shi mayi a kulonda a mu Bible ngalombeene kukwasha bantu mpa na lelo uno. (Yeeshaya 48:17, 18) Byabya, atutumikilaa kalolo ano mayi a kulonda. Kileshesho, bu abitudimusha Bible bwa kupela bintu abilwisha binangu na mbidi yeetu, atupelaa kutoma nfwanka sunga kutoma bintu abikolwanaa mu mushindo wibubi. (2 Beena-Kodinto 7:1) Atupelaa dingi kukita myanda ikandjikye Bible bu kukolwa maalwa, kutambuka lusandji, na kwiiba.​—1 Beena-Kodinto 6:9-11.