“Okeekala naami mu Mpaladiiso”

1. Kapindi kapeela kumpala kuashi Yesu afue, nkinyi kibalunguile ntomboshi baadi ku lupese luaye? (Luka 23:39-43)

YESU na bano bantomboshi babidi babaadi ku lupese luaye, babaadi bakiengie ngofu nsaa ibabapushishe’shi tabadi peepi na kufua. (Luk. 23:32, 33) Bano bantomboshi booso babidi bababangile na ngakuilo a kukaa Yesu, abimueka kalolo’shi ta babaadi balongi baye nya. (Mat. 27:44; Mak. 15:32) Umune a kuabadi baadi mushintuule eshimba diaye, aye nkuamba’shi: ‘Ontentekyeshe naamu p’okekala mu Bufumu boobe.’ Yesu bamualuluile’shi: “Eyondo naakulungula’shi, leelo uno, okeekala naami mu Mpaladiiso.” (Badika Luka 23:39-43.) Takui kintu su nkimune akilesha’shi uno ntomboshi baadi mukumine mukandu awamba’shi ‘Bufumu bua mwiyilu’ ubabadi balungule kui Yesu pabaadi pano pa nsenga. Na Yesu namu tamuakule mbalo su ngimune’shi yawa muntu bayile mu Bufumu bu’Efile Mukulu muiyilu nya. (Mat. 4:17) Yesu baadi muakuile pabitale Mpaladiiso pa nsenga mu mafuku aafiki. Buakinyi tuibalombene kuamba biabia?

2. Nkinyi akilesha’shi yawa ntomboshi baadi muilangie kuishimba baadi muina Yuda?

² Uno ntomboshi baadi muilangie kuishimba abimueka’shi baadi muina Yuda. Yawa ntomboshi balunguile mukuabo’shi: ‘Twe na moo w’Efile Mukulu obe bapete naaye kiimu kii mumune?’ (Luk. 23:40) Bena Yuda babaadi abalanguila Efile Mukulu umune, anka bantu ba ingi miilo, babaadi abalanguila b’efile bebungi. (Efi. 20:2, 3; 1 Kod. 8:5, 6) Su bano bantomboshi boso babidi tababaadi bena Yuda, lukonko lubadia kuikala luedibue’shi, buakinyi “t’otshinyi b’efile?” Yesu babamutumine kadi, kushi kui bantu ba ingi miilo, anka kui “mikooko ishimine ya mu nshibo ya Isaleele.” (Mat. 15:24, Kilombeeno Kipya 2014) Na Efile Mukulu baadi mufumbuile bena Isaleele’shi, Yesu akasanguka. Uno ntomboshi baadi muilangie kuishimba baadi mulombene kuka uno muanda. Na ngakuilo aye baadi muleshe’shi baadi auku’shi Yehowa mmulombene kusangula Yesu buashi akekale mukunkushi mu Bufumu bu’Efile Mukulu. Uno ntomboshi pangi baadi mukulupile’shi Efile Mukulu mmulombene nkamusangula naye.

3. Nkinyi pangi kibadi kifikile uno ntomboshi baadi muilangie kuishimba mu binangu nsaa ibaadi yakule Yesu pabitale Mpaladiiso? Patuula. (Kibangilo 2:15)

³ Bu bibaadi muina Yuda, uno ntomboshi baadi mmulombene kuuka pabitale Adame na Eeva, na Mpaladiiso mu babaadi batuule Adame na Eeva kui Yehowa. Biabia yawa ntomboshi badi mulombene kushinkamisha’shi Mpaladiiso ababadi bakule kui Yesu mulombene kuikala efuba dibuwa pano pa nsenga.​—Badika Kibangilo 2:15.

4. Mayi a Yesu kui uno ntomboshi aetutakula mu kunangushena pabitale muanda kinyi?

⁴ Mayi a Yesu kui uno ntomboshi ngalombene kuitutakula mu kunangushena pabitale abikekala nshalelo etu mu Mpaladiiso. Biabia tuibalombene kulongiela kintu kampanda pabitale Mpaladiiso kukiila ku butaale bubaadi mu bukunkushi bua Solomonyi. Bible akula’shi Yesu mmuikale Solomonyi mukata akafubu pamune na bakunkushi naye, akafuisha nshalelo e buwa pa nsenga. (Mat. 12:42) Bua kuakula kalolo, abitungu “ingi mikooko” ipaane mu kufuba ngofu bua kulombasha ngikashi itekibue buayidia kuikala na muwa wa ikalaika mu Mpaladiiso.​—Yo. 10:16.

NSHALELO A KEKALA NAMINYI MU MPALADIISO?

5. Onangushena kinyi pabitale abikekadika nshalelo mu Mpaladiiso?

⁵ Nkinyi akikufikila mu binangu nsaa yonangushena pabitale abikekala muwa mu Mpaladiiso? Pangi onangushena lupango lui buwa, lui bu efuba dia Edene. (Kib. 2:7-9) Anutetekiesha pangi butemuki bua Mika abulesha pabitale muilo w’Efile Mukulu’shi “muntu ooso akashala muushi mua mutshi waye wa mfinyo na muushi mua mutshi waye wa Fingiye.” (Mik. 4:3, 4, NWT) Pangi we mulombene kutentekiesha ingi verse ya mu Bible ayakula’shi akukekadika biakudia bibungi. (Mis. 72:16; Yesh. 65:21, 22) We mulombene kunangushena obe nabene we mu lupango lui buwa, we mushale ku mesa kui bidibua bibungi bibuwa. We kunangushena kapapi ke mapembue ebuwa a mitshi na a bilongo. We mulombene kunangushena bena kifuko nobe, na bakuuku boobe mpa na bangi abasanguka abasepe pamune na abakisha nsaa pamune. Bino bioso ta mbilotua bisumanga nya. Kushi mpaka, mianda bu ino ayikakitshika pa nsenga. Na dingi mu nshalelo etu a mu Mpaladiiso atukasangeela bioso bi’atukakitshi.

6. Nkinyi kiatukakitshi mu Mpaladiiso? (Tala kifuatulo.)

⁶ Yehowa betupangile buashi tupete muloo mu mudimo wetu. (Mul. 2:24) Mu bipua kinunu bia kumunana kua Kidishitu, atukekadika na bibungi bia kukita. Booso abakapanda ku mpombo ikata, na midiyo na midiyo ya bantu abakasanguka abakekala na lukalo lua bilamba, bidibua, mpa na mbalo ya kushala. Bua kulombasha ino nkalo yoso, atukekala na mudimo wi bungi awitusangasha. Anka bibaadi Adame na Eeva abadimi muifuba dia Edene mubabadi bashale, n’atue namu atukekala na kinemo kia kudima mu Mpaladiiso pa nsenga. Banda kunangushena dingi mushindo watukekala na muloo wa kulongiesha midiyo ya bantu basangukie, abauku mianda ipeela pabitale Yehowa na mpango yaye na kukuasha bantu basha lulamamto babaadi bashale bipua bibungi kumpala kua Yesu buabadia kuka mianda ibungi.

7. Nkinyi kiatudi balombene kushinkamisha na buakinyi?

⁷ Abitungu tukulupile’shi, nshalelo mu Mpaladiiso e mu mafuku aafiki, akekala a butaale, atukapete kintu kioso kiatudi nakio lukalo, na amukekala mianda ilumbule kalolo. Buakinyi? Muanda Yehowa mmupue kuitupa bileshesho abishinkamisha mushindo aukekala nshalelo mu bukunkushi bua Muana aaye. Mianda ibaadi ikitshikie mu bukunkushi bua Mfumu Solomonyi nkileshesho kikata kuatudi.

BUKUNKUSHI BUA MFUMU SOLOMONYI ABUITULESHA, ABIKEKALA NSHALELO MU MPALADIISO

8. Mmushindo kinyi ubaadi ulombane mayi atupete mu Misambo 37:10, 11, 29, kunyima kua Mfumu Davide kuiafunda? (Tala “Nkonko ya bantu ababadikaa” i mu kino Kitenta kia Mulami.)

⁸ Mfumu Davide baadi muyokielue bafundile pabitale abikekala nshalelo buwa mu mafuku aafiki nsaa ayikashaala Mfumu sha lulamato ku lupuna-nsulu. (Badika Misambo 37:10, 11, 29.) Atukambaa kubadikila bantu Misambo 37:11, nsaa yatuisambila pabitale kufika kua Mpaladiiso. Tui na kabingilo ke buwa muanda Yesu bateemuine kino kifundue mu muisambo waye wende nkumo wa pa muengie, bua kulesha’shi uno mulayilo aukalombana mu mafuku aafiki. (Mat. 5:5) Mayi a Davide abaadi aleshe dingi mushindo aukekala nshalelo mu bufumu bua Solomonyi. Nsaa ibaadi Solomonyi akunkusha mu Isaleele, muilo w’Efile Mukulu ubaadi ausankila bikishekishe butaale na kupeta kintu kioso kibabadi nakio lukalo mu nsenga, “bu mabeele, na buuki.” Efile Mukulu bakuile’shi: “Su nuatungunuka na kulonda miiya yande, . . . Natuesha butaale muiumbo, anulala kushii kintu akifiki mu kuinutshinyisha.” (Lv. 20:24; 26:3, 6, NWT) Ino milayilo yooso ibalombene mu bukunkushi bua Solomonyi. (1 Mya. 22:9; 29:26-28) Na Yehowa baadi mulee’shi: Bantu babi abalanguila bangi b’efile “tabekala kuanka dimo.” (Mis. 37:10) Biabia mayi atupete mu Misambo 37:10, 11, 29. Abaadi alombane mu mafuku a kala, na dingi aakalombana mu mafuku aafiki.

9. Mfumu mukashi Sheba bakuile kinyi pabitale bukunkushi bua Mfumu Solomonyi?

⁹ Mfumu mukashi Sheba baadi mupushe abakula pabitale butaale na bintu bungi bibabaadi abasankila kui muilo wa Isaleele nsaa ibaadi Solomonyi bu Mfumu. Uno mfumu mukashi baadi mukatukie ku nsenga i kula, baadi mukite luendo lui bula enda ku Yelusalema bua nkemuena mianda ibaadi ikitshikie aye nabene. (1 Bf. 10:1) Kunyima kuaye kuimuena mianda ibaadi mu bufumu bua Solomonyi, bakuile’shi: “Dingi byabandungulanga, . . . tabi sunga nkibidi, bafubi bobe na bena ebalasa bobe mbasha mulo muanda be n’obe nsaa yooso abapusha mianda ya binangu byobe.” (1 Bf. 10:6-8, EEM) Anka buwa bubaadi nshalelo mu bukunkushi bua Solomonyi, nyi nkilelshesho kia mianda yabakitshina bantu kui Yehowa mu bukunkushi bua Muanaye Yesu.

10. Yesu mmukile Solomonyi bukata mu mishindo kinyi?

¹⁰ Yesu mmukata kukila Solomonyi mu mishindo ibungi. Solomonyi baadi muntu shi mupuidikie, baadi akitshi bilubilo bibungi nsaa ibaadi atshibi biimu. Bino bibaadi bifuishe mpa na lukalakashi munkatshi mua muilo w’Efile Mukulu. Ku lungi lupese, Yesu Mukunkushi mupuidikie, shakitaa bilubilo. (Luk. 1:32; Eb. 4:14, 15) Yesu baadi mushale na lulamato kui Efile Mukulu, sunga bibaadi mupete kitompuanga kibukopo akifiki kui Satana. Yesu baadi muleshe’shi t’anakite muluisho efuku su ndimune. Sunga kukita kingi kintu biadi mulombene kuluishisha bantu baye basha lulamato. Tui na muabi ukata wa kuikala naye bu Mfumuetu.

11. Mbananyi abakakuasha Yesu bua kukunkusha?

¹¹ Yesu akekala na bantu 144000, bakamunana nabo pamune bua kukaluila bantu, na bua kulombasha mpango ya Yehowa pa nsenga. (Kibaf. 14:1-3) Bano bakuetu balume na bakashi, babaadi bapete bitompuanga bibungi na babaadi bakiengie ngofu pababadi pa nsenga. Biabia abakekala bakunkushi abaketuulu pa mbalo ya bantu. Bano bakunkushi abakekala na mudimo kinyi?

BEDIBUE MUIMU ABAKEKALA NA MUDIMO KINYI?

12. Yehowa mmupe bantu 144000, mudimo kinyi?

¹² Mudimo wabakakitshi kui Yesu na bano bantu bakakunkusha nabo, wi bukata kukila mudimo ubabadi bape Solomonyi. Mfumu Solomonyi baadi akaluila bantu midiyo, penda mu kipindi kipeela kia nsenga. Anka bano bakunkushi, ba Bufumu bw’Efile Mukulu abakakuasha bua kukaluila bantu miliare abakashala mu nsenga ishima. Mu binyibinyi Yehowa mmupe bantu 144000 kinemo kikata.

13. Bano abakakunkusha pamune na Yesu abakekala na bushito kinyi bui pa buabo?

¹³ Nka bu Yesu, bantu 144000, abakafubu bu ba mfumu na bu batshite-muakuidi. (Kibaf. 5:10) Nsaa ibaadi bena Isaleele abakokiela muiya wa Moyise, kia kumpala, batshite muakuidi babaadi abebakuasha buabadia kuashala na mbidi bukome, na kushala mu kipuano kibuwa na Yehowa. Muiya ubaadi bu ‘muesheshe wa bintu bibuwa abikafiki.’ Abipushika kalolo’shi, baaba abakamunana pamune na Yesu abakekala na mudimo wi pabuao wa kukaluila bantu kumbidi na ku nkalo ya mu kikudi ya muilo w’Efile Mukulu. (Eb. 10:1) Atutengiela bua kumona mushindo aukekala ba mfumu na batshite muakuidi abepushena na bena Bufumu bw’Efile Mukulu be pa nsenga. Biabia muyile mpango ya Yehowa, tui balombene kushinkamisha’shi mu Mpaladiiso aafiki, boso be pa Nsenga abakapete bukunkushi buabadi nabo lukalo. ​—Kibaf. 21:3, 4.

ABITUNGU “INGI MIKOOKO” IKITE KINYI BUA KULOMBASHA NGIKASHI ITEKIBUE BUA KUTUELA MU MPALADIISO?

14. Nkipuano kinyi ki pankatshi pa bakuabo na Kidishitu na “ingi mikooko?”

¹⁴ Yesu baadi muitanyine bano boso bakamunana nabo bu “lombe lupeela.” (Luk. 12:32) Bakuile dingi bua kisaka kia kabidi kibaadi muitanyine bu “ingi mikooko.” Bino bisaka bioso bibidi muibikashe mu kisaka kimune. (Yo. 10:16) Bino bisaka bioso bibidi mbipue kubanga kutumika bioso pamune, na abikatungunuka na kufuba pamune nsaa yabakatuulu Mpaladiiso pa nsenga. Ngi buakinyi booso be mu “lombe lupeela” abakende muiyilu na bano booso be mu “ingi mikooko” abakekala na lukulupilo lua kusankila muwa pa nsenga bua losoo. Anka kui ingi mianda ayitungu’shi “ingi mikooko” ikite kubanga binobino buayidia kulombasha mianda itekibue bua nkashaala mu Mpaladiiso.

15. (a) “Ingi mikooko” ikuete kufuba na bakuabo na Kidishitu mushindo kinyi? (b) Mmushindo kinyi oodi mulombene kuambula mukuetu e mu makashinyi? (Tala kifuatulo.)

¹⁵ Yawa ntomboshi baadi muilangie kuishimba bafuile kumpala kuaye kupeta mushindo wadia kulesha lutumbu luaye bua bibaadi bimukitshine Kidishitu. Mu kuilekena na yawa buana, atue ba mu “ingi mikooko”, tui na mishindo ibungi binobino ya kulesha biatupusha pabitale Kidishitu. Bu kileshesho, atulesha’shi tuibamufule, mu mushindo watukitshina bakuabo bedibue muimu mianda. Yesu bakuile’shi akatshibila mukooko ooso kiimu mu mushindo waukitshina bakuabo mianda. (Mat. 25:31-40) Tui balombene kukuatshishena bakuabo na Kidishitu na kisumi pa kukita mudimo wa bulungudi na wa kuikasha bantu bu balongi. (Mat. 28:18-20) Ngi buakinyi atukumina kufubisha Bible a kuilongiela kalolo abadi betupe, na mukanda bu We kuikala na muloo bua loso! Su tolongiele na muntu Bible, we kuiatshila kepatshila ka kulonga na bantu bebungi Bible muyile ngobesha yobe.

16. Tui kukita kinyi kubanga binobino buatudia kuilumbuula bua nkatuela mu Bufumu bw’Efile Mukulu?

¹⁶ T’abitungu’shi tutengiele nka na pa tukashala mu Mpaladiiso buatudia kuikala bantu be na muikeelo w’abakumiina kui Yehowa bua kuikala muanka nya. Kubanga binobino tui balombene kukita muetu moso buatudia kuikala na nshalelo e na nkatshinkatshi mu ngakuilo etu na mu bikitshino bietu bioso. Na dingi abitungu tuikale na lulamato kui Yehowa, kui muina dibaka netu, na kui bena Kidishitu netu. Su tubakokiela Yehowa binobino mu uno ndumbuluilo e bubi, abikekala bibofule bua kumukokiela mu Mpaladiiso. Abitungu dingi tutamishe mayele etu na ngikashi yetu ayilesha’shi tukuete kuilumbula bua nkemushaala. Tala muisambo wi mu kino Kitenta kia Mulami awamba’shi: “We muilumbuule bua ‘kushaala pa nsenga su’?”

17. Tui kupusha kutshoboloka pa muanda wa miluisho yetu ya kala su? Patuula.

¹⁷ Abitungu tuikitshishe buatudia kuleka kuinyongola pamuanda wa miluisho ikata ibatudi bakite mu mafuku a kala. Biabia t’abitungu’shi tumone nkuulo ya mulambu wa Kidishitu bu mushindo watudia “kukita miluisho na nkomanga.” (Eb. 10:26-31, Kilombeeno Kipya 2014) Biabia abitungu tushinkamishe’shi su tubaadi belangie kuishimba mu binyibinyi pamuanda wa miluisho yetu ibatudi bakite na tuateka bukuashi bua Yehowa na kushintula muikeelo wetu, mmupue kitufuila lusa bua losoo. (Yesh. 55:7; Bik. 3:19) Tutentekiesheyi mayi a Yesu kui bafadiseo aamba’shi: “Muanda ntshimufikie mu kuitanyina balulame’mi, anka baluishi.” (Mat. 9:13) Mulambu wa nkuulo ya Yesu wi bukome bua kubuikiila miluisho yetu yoso.

WE KUIKALA NA MUWA WA LOSOO MU MPALADIISO

18. Nkinyi kiodi mulombene kuakula pabitale uno ntomboshi badi mufue ku lupese lua Yesu?

¹⁸ Banda kupuandikisha obe nabene’shi we mu Mpaladiiso, na okuete kuakula na yawa ntomboshi baadi muakule na Yesu. Kushi mpaka, anue boso babidi nui balombene kulesha lutumbu luenu bua mulambu wa nkuulo wa Yesu. We kumuipusha buadia nkulungula bibungi pabitale kibaadi kikitshikie kunyima kua nsaa ipeela ya muwa wa Yesu pa nsenga na mushindo ubaadi mupushe paye kupeta lualulo lua Yesu ku lukonko luaye. Ku lungi lupese namu e nkuipusha bibaadi nshalelo mu mafuku a ku nfudiilo mu ndumbuluilo a Satana. Abikekala kinemo kikata kia kulonga na bantu be bu uno muntu Eyi di’Efile Mukulu!​—Ef. 4:22-24.

19. Buakinyi nshalelo mu Mpaladiiso t’akekala a tuinyongoshi? (Tala kifuatulo ki ku kipusu.)

¹⁹ Mu Mpaladiiso nshalelo tekala dingi atuinyongoshi nya. Atukekala efuku dioso atufumankana na bantu bebuwa na kukita midimo i buwa. Anka kintu kibuwa kukila bioso, efuku dioso atuikala na mushindo wa kuuka Nshetu e muiyilu kalolo, na kusankila kioso ki’etupa. Atukekala na bibungi bia kukita pa kulonga pabimutale, na bibungi bia kukita bua kulonga pabitale bipangua biaye. Apende mafuku na kukila, kifulo bua Efile Mukulu etu akinyisha kutama. Tui na lutumbu lukata lua kuikala na Yehowa na Yesu, paabo kuitupa mulayilo watudia nkashala bua losoo mu Mpaladiiso.