Piki-deewei-liba

Un wini u sa feni u di wooko di dee gaanwomi ta du? Wë u sa djeesi de a di fasi fa de ta biibi, söseei u sa ta du dee soni di de ta piki u di kumutu a Bëibel (Heb. 13:7, 17). Dee gaanwomi lobi u, nöö de kë fuu ku Gadu ko dë möön gaan mati. Ee de si taa wa ko nango a dee komakandi sö möön, nasö taa wa ko ta dini Gadu kumafa u bi ta dini ën fosu möön, nöö wantewante de ta mbei möiti u heepi u. De o haika u te u ta konda da de andi du u, nöö de o da u degihati, söseei de o da u köni lai di kumutu a di Bëibel. I ta si di heepi di de ta heepi i kuma wan fasi fa Jehovah ta lei taa a lobi i ö? Hoi a pakisei taa so juu a sa ta taanga da dee gaanwomi u de da u wan lai. Ma andi i sa du fu an ta taanga da dee gaanwomi u de ko da i wan lai? Wë i musu abi sakafasi, i musu ta tei dee wooko di de ta du u bigi, söseei ja musu mbei a ta taanga da de u de ko fan ku i. I musu ta si di heepi di de ta heepi i kuma wan fasi fa Gadu ta lei taa a lobi i. Joo feni wini fëën, söseei dee gaanwomi seei o du di wooko u de ku piizii. w18.03 bld. 31 pal. 15, 16

Na hii mii dë di wan. Na hii mii ta ko abi fusutan a soni a di wan seei jaa. So u dee mii ta fusutan dee lei u Bëibel, de ta du soni a wan köni fasi, nöö de ta tei dopu hii fa de njönku. Ma te wotowan ko möön bigi ufö de ta tei dopu. Mama ku tata di köni an ta duwengi dee mii u de u de tei dopu. Ma de ta heepi hiniwan u dee mii u de u de go a fesi a di biibi söndö u de duwengi de. Mama ku tata ta wai te di mii u de ta du dee soni dee sikifi a di tëkisi u tide. Ma de musu hoi a pakisei taa de ta lei dee mii u de soni, u di de kë heepi de u de ko dë bakama u Keesitu. De musu hakisi deseei di soni aki: ’Di mii u mi sa’ soni tjika faa sa buta hën libi a Gadu maun, nöö a tei dopu ö?’ w18.03 bld. 10 pal. 6

Ee wan sëmbë kai u fuu ko nëën pisi, hën u piki taa woo ko, nöö u musu go, solanga na wan gaan soni hën mbei taa wa sa go möön. Kandë di sëmbë bi seeka soni a fesi kaa u di u bi o ko nëën, nöö ee wa go möön, nöö a o ko dë taa u sösö di sëmbë bi seeka soni da u (Mat. 5:37). So sëmbë an nango möön, u di wan woto sëmbë kai de, nöö de nango a di de ta si kuma de o möön lobi. I si kuma di soni aki ta lei taa u lobi wotowan u, nasö taa u abi lesipeki da wotowan u? U musu dë tifeedi ku di soni di wan sëmbë seeka da u di a kai u ko nëën pisi (Luk. 10:7). Ee a bi o dë taa wa sa go möön, nöö a bi o bunu fuu piki di sëmbë a fesi. A dë fanöudu tu fuu ta hoi dee guwenti u wan köndë a pakisei. A so köndë wan sëmbë sa go a wan wotowan pisi, aluwasi de an bi kai ën. Ma a woto köndë, a ta möön bunu fii mbei buka ku de ufö i go a de pisi. A so köndë te sëmbë kai i dee tu fosu pasi fii ko a de pisi, nöö an ta bunu fii piki taa joo go, ma a woto köndë te de kai i di fosu pasi, hën i piki taa ja o go, nöö a ta dë kuma ja abi lesipeki. Hii juu u musu ta mbei möiti u mbei dee sëmbë dee kai u ko a de pisi, dë waiwai. w18.03 bld. 20 pal. 20, 21

Di sabi di u ko sabi soni u Bëibel an tjika u mbei u ko dë wan sëmbë di ta si soni kumafa Gadu ta si soni (1 Kön. 4:29, 30; 11:4-6). Wë nöö andi u abi fanöudu, boiti di sabi di u ko sabi soni u di Bëibel? U musu ta mbei möiti nöömö u di biibi fuu ko möön taanga (Kol. 2:6, 7). Wan fanöudu soni di u musu du, hën da u musu lei soni a di buku Meki Gado tan lobi yu. Di soni aki o heepi i fii ko sabi unfa i musu ta libi ku dee mama wëti u Bëibel. Ee i bi lei soni a di buku aki kaa, nöö i sa lei soni a so u dee woto buku dee u abi, dee sa heepi i fii ko abi wan taanga biibi (Kol. 1:23). U musu ta pakisei fundu u dee soni dee u ta lei tu, söseei u musu ta hakisi Jehovah faa heepi u fuu ko sabi unfa u sa ta du dee soni dee u ta lei. Te u ta lei soni u Bëibel, söseei te u ta pakisei fundu u dee soni dee u lei, nöö u musu ta du ën u di u kë u Jehovah wai ku u, söseei u di u kë piki hën buka (Ps. 40:8; 119:97). U musu mbei möiti tu fuu ta koti pasi da hiniwan soni di sa mbei wa ko ta si soni kumafa Gadu ta si soni möön.​—Tit. 2:11, 12. w18.02 bld. 24, 25 pal. 7-9

Wë u musu ta lei soni a di Wöutu u Gadu finifini, u musu lobi dee soni dee u ta lei, söseei u musu ta du dee soni dee u ta lei, sö taa u sa ta du soni a wan fasi di ta kai ku Gadu (1 Pet. 1:13-15). Te u ko abi biibi, söseei te u ko abi di köni di Gadu ta da sëmbë, nöö dee soni aki o heepi u u Saatan an feni u ganjan, söseei fu wa ko ta libi kumafa dee sëmbë u di goonliba aki ta libi (2 Kol. 2:11). Sömëni sëmbë u di goonliba aki lobi hogidu ku fanafiti libi, nöö de lo’ u du dee soni di hati u de ta manda de (1 Joh. 2:15, 16). Dee sëmbë aki an ta kë biibi taa abiti möön di hogi goonliba aki o poi kaba a sösö. Ee wa abi wan taanga biibi, nöö useei sa bigi ko ta pakisei sö tu. Hoi a pakisei taa di Jesosi bi tei di ten u Noa maaka ku di ten fuu aki, nöö an bi taki u di hogi di sëmbë bi o ta du ku di libi di sëmbë bi o ta libi fanafiti, ma a bi taki u di hogi di bi o sa miti u ee u ta mbei soni puu u pakisei a di dini di u ta dini Gadu (Mat. 24:36-39). I sa hakisi iseei dee soni aki: ’Di fasi fa mi ta libi ta lei taa mi sabi Jehovah tuutuu ö? Di biibi di mi abi ta mbei mi ta du soni a wan fasi di ta kai ku Jehovah u? Söseei a ta mbei mi lei wotowan andi Gadu kë taa de musu du ö?’ Di fasi fa joo piki dee hakisi aki o heepi i fii ko sabi ee iseei ta waka ku di tuutuu Gadu, leti kumafa Noa bi ta du ën.​—Ken. 6:9. w18.02 bld. 11, 12 pal. 8-10

Wë a dë sö tuu taa wa o sa dë nöö wa ta nama ku dee lö sëmbë aki seepiseepi. Kandë u ku de ta wooko a di wan kamian, nasö kandë u ku de nango a di wan siköö, nasö kandë u ta libi ku de a wan wosu. Ma tökuseei wa musu u ko ta pakisei kumafa de ta pakisei, söseei wa musu u ko ta tja useei kuma de. Wë nöö andi sa heepi u fu wa ko dë kuma de? U musu ta lei soni u Bëibel, söseei u musu ta tei dee sëmbë dee lobi Jehovah ko dë mati fuu, nöö dee soni aki o heepi u fuu ku Jehovah ko dë möön gaan mati. U kë heepi woto sëmbë u de ko sabi Jehovah. Fëën mbei i musu mbei möiti fii peleiki da hii sëmbë, nöö hakisi Jehovah faa heepi i fii sa taki soni di fiti, a di soifi ten. U musu mbei sëmbë ko sabi taa u da Jehovah Kotoigi. Te u piki de taa u da Jehovah Kotoigi, hën de ko si taa u ta tja useei a wan bunu fasi, nöö na u de o gafa, ma de o gafa Jehovah Gadu. Jehovah ta lei u taa „u musu kaba ku dee soni dee sëmbë u di goonliba aki ta hangi u de feni. U musu ta hoi u seei fu wa du soni di an fiti. U musu libi lesipeki fasi kumafa Masa Gadu kë fuu libi, hii fa u ta libi a di hogi ten u dë aki” (Tit. 2:11-14). Ee u ta djeesi Jehovah, söseei ee u ta du dee soni dee a kë taa u musu du, nöö woto sëmbë o si ën. Kandë so u de o taki taa: „U kë go ku unu, biga u jei taa Gadu dë ku unu.”​—Sak. 8:23. w18.01 bld. 32 pal. 17, 18

A dë wan hogi soni ee wan sëmbë lobi hënseei ö? Wë nönö. An dë wan hogi soni ee u lobi useei, biga sö Jehovah mbei u. Jesosi bi taki taa: „I musu lobi oto sëmbë leti kumafa i lobi i seei” (Maik. 12:31). Awa, wa sa lobi woto sëmbë ee wa lobi useei. Di Bëibel ta piki u söseei taa: „Dee womi musu ta lobi dee mujëë u de kuma deseei sinkii. Biga fa i si manu ku mujëë sai dë kaa, nöö de dë di wan sinkii e. Nöö hën mbei te wan womi ta lobi ën mujëë, nöö hën da a ta lobi ën seei. Biga . . . na wan sëmbë ta buuse hënseei sinkii ma a ta lobi ën ta dëën njanjan ta tjubi ën faa musu dë bumbuu” (Ef. 5:28, 29). Fëën mbei an föutu fuu lobi useei, solanga wa ta lobi useei pasa maaka. Di Bëibel ta taki a 2 Timoteo 3:2 u di lobi di wan sëmbë ta lobi hënseei. Di lö lobi aki ta mbei wan sëmbë ta pakisei hënseei nöö. Ee wan sëmbë lobi hënseei tumisi, nöö a ta si hënseei hei möön fa a dë (Lom. 12:3). An ta booko hën hedi ku soni u wotowan, ma a ta booko hën hedi ku soni fu hënseei wanwan nöö. Te wan soni an waka bunu, nöö a ta butëën a wotowan hedi. Dee lö sëmbë aki an ta dë waiwai. w18.01 bld. 22 pal. 4, 5

Te u ta lei soni u Bëibel, nöö u ta haika Jehovah, ma te u ta begi, nöö u ta fan ku ën. Wa musu ta si begi kuma wan soni di u musu u du nöö, nasö kuma wan soni di ta tja bunu ko da u nöö a kaba. Ma u musu hoi a pakisei taa te u ta begi, hën da u ta fan ku di Gadu di mbei u. Pakisei di soni aki: Jehovah kë haika andi i kë taki dëën! (Fil. 4:6) Fëën mbei aluwasi un bookohedi i abi, tökuseei di Bëibel ta piki i fii „tuwë di fuka fii da Jehovah” (Ps. 55:22). Milionmilion baaa ku sisa sa piki i taa di soni aki bi heepi de tuutuu. Wë a sa heepi i tu! Na te u kë u Jehovah heepi u ufö u musu ta begi. So juu u ta booko u hedi ku dee fuka fuu tee taa wa ta si dee bunu soni dee u abi möön. Pooba di soni aki luku: Hiniwan daka, i sa kai dii soni di i ta tei u bigi, nöö i da Jehovah tangi u dee soni dë. w17.12 bld. 24 pal. 10, 11

Dusudusu sëmbë di ta lei soni u Bëibel, ta buta de libi a Jehovah maun, nöö de ta tei dopu. Sömëni u de da njönkunjönku sëmbë di de kiija a di tuutuu lei, nöö de buta da deseei taa de o ta libi kumafa Gadu kë, u di di fasi dë da di möön bunu fasi u libi (Ps. 1:1-3). Ee i da wan Keesitu sëmbë di abi miii, nöö kandë i ta wakiti di daka ka di mii fii o tei dopu. (Luku 3 Johanisi 4.) U di i abi miii, mbei i kë u dee mii fii ko sabi dee soni dee sikifi a Gadu Buku. Hën da i kë u de ko sabi soni u dee Hebelejën Buku u Bëibel ku dee Giiki Buku u Bëibel. Piki mii seei sa lei soni u dee sëmbë fu awooten ku dee soni dee bi pasa na awooten. Di ölganisaasi u Jehovah da u sömëni buku, brochure, ku fëlön di mama ku tata sa tei u lei dee mii u de soni u Bëibel. Di mii fii musu ko sabi dee soni dee sikifi a di Bëibel, fëën ku Jehovah sa ko dë gaan mati. w17.12 bld. 15, 16 pal. 1, 4

Kandë i dë wan sisa, ma di manu fii an ta dini Jehovah. Andi joo du ee i ta si taa an ta libi bunu ku i? Kandë hati fii o boonu, nöö joo bigi buja ku ën. Ma i si kuma di soni dë hën o mbei soni ko möön bunu ö? Aluwasi i buja ku ën u lei ën taa an ta libi bunu, i si kuma di soni dë o mbei a o kë ko dini Jehovah u? Wë kandë ja o heepi ën a di lö fasi dë. Ma ee i ta lei taa i ta lesipeki ën u di a dë hedima u di wosudendu, nöö woon sa ta möön libi fiifii a di wosudendu, söseei joo tja gafa ko da Jehovah. Ee i ta tja iseei a wan bunu fasi, nöö di soni dë sa mbei di manu fii kë ko dini Jehovah. Te u kaba fëën, nöö i ku ën tuu o sa feni di gaan bunu di Gadu kë da u (1 Pet. 3:1, 2). Kandë i dë wan baaa, ma di mujëë fii an ta dini Jehovah. Andi i sa du ee i ta si kuma an ta lesipeki i? I si kuma di mujëë fii o kë lesipeki i ee i ta suku u gandji dëën u lei ën taa i da basi a di wosu ö? Wë nönö, an o ta lesipeki i! Gadu kë fii djeesi Jesosi, fii sa ko dë wan womi di lobi di mujëë fii. Jesosi da di hedima u di kemeente, nöö hii juu a ta abi pasensi ku u, söseei hii juu a ta lei taa a lobi u (Luk. 9:46-48). Ee i ta djeesi Jesosi, nöö te u kaba fëën di mujëë fii sa kë ko dini Jehovah tu. w17.11 bld. 31 pal. 13, 14

Sëmbë di ta pakisei kumafa dee sëmbë u di goonliba aki ta pakisei, an ta kë hoi dee wëti u Jehovah, nöö ee wa luku bunu, nöö di fasi fa dee sëmbë aki ta pakisei sa mbei taa pikipiki wa ko ta futoou Gadu möön. Hiniwan daka u ta jei di fasi fa dee sëmbë u di goonliba aki ta taki unfa de ta pakisei, te u ta luku teefei, te u nango a Internet, te u dë a wooko, söseei te u dë a siköö. Andi u sa du fu wa ko ta pakisei kuma dee sëmbë aki? A sömëni köndë sëmbë ta dë di ta taki taa de an ta biibi a Gadu. Kandë dee sëmbë dee ta taki di soni aki an go sindo pakisei ee Gadu dë tuutuu, u di de kë ta du andi de kë (Ps. 10:4). So sëmbë ta taki taa: „Mi sa abi bunu manii hii fa ma ta biibi a Gadu.” I si kuma wan sëmbë sa taki taa Gadu an dë u? Te so sëmbë ta luku dee soni di dee könima u di goonliba aki ta öndösuku u de ko sabi ee wan Gadu dë tuutuu, nöö a ta buuja de. Ma an taanga u ko sabi ee Gadu dë tuutuu. I si kuma wan wosu sa ko fu hënseei ö? Wë nönö! A musu u dë sö taa wan sëmbë hën mbei ën. Ma libilibi soni möön kofaliki u mbei möön wosu. w17.11 bld. 22 pal. 2-4

Faandi mbei a dë fanöudu fuu go mëni di dëdë u Jesosi? Wan u dee soni di mbei a dë fanöudu, hën da te u nango a dee komakandi, nöö a dë wan fasi fa u ta dini Jehovah. U sa dë seiki taa Jehovah ku Jesosi ta si hiniwan sëmbë di ta mbei möiti u go a di apaiti komakandi aki. U kë u Jehovah ku Jesosi si taa woo dë a di komakandi aki, boiti ee wan gaan soni hën du u. Ee u ta du soni di ta lei taa dee komakandi dë wan gaan soni da u, nöö Jehovah an o puu di në fuu a di „buku” fëën. De ta kai di buku aki di „Buku u Libi” tu. Dee në u dee sëmbë dee Jehovah kë da di libi u teego dë sikifisikifi a di buku aki (Ako. 20:15). A dee wiki ufö u mëni di dëdë u Jesosi, nöö u sa ta begi möön gaanfa, söseei u sa ta möön buta pakisei a di fasi fa u ku Jehovah dë mati tjika.​—2 Kol. 13:5. w18.01 bld. 10 pal. 4, 5

Te wan sëmbë bi kii wan wotowan fëën, hën a kule go a wan lowema foto, nöö sëmbë an bi o sa feni ën kii. Jehovah bi piki dee sëmbë fëën taa: „Te wan sëmbë kii wan sëmbë, ma an du di soni dë ku hënseei kë, nöö a sa kule go tjubi a wan u dee foto aki” (Jos. 20:2, 3). Jehovah an bi taki taa te di sëmbë bi dë a di foto kaa, nöö de bi musu toona kuutu ën. Boiti di dë, di sëmbë di bi abi di leti u kii ën an bi sa denda go a di foto faa go kii ën. Ee a bi dë a di foto kaa, nöö Jehovah bi ta tjubi ën. An bi ta dë kuma a dë a dunguwosu. A bi sa ta wooko fëën ta heepi wotowan, söseei a bi sa ta dini Jehovah bööböö. Boo taa a bi sa abi wan suti libi! So u dee dinima u Gadu di bi du wan gaan zöndu ta kuutu deseei jeti hii fa de bi lei taa de tjali u di soni di de bi du. So u de ta fii kuma nöiti Jehovah o sa da de paadon u di soni di de du. Ee sö iseei ta fii tu, nöö gaantangi, hoi a pakisei taa te Jehovah da wan sëmbë paadon nöö a ta dëën paadon ku hii hën hati. Fëën mbei an dë fii ta kuutu iseei möön. w17.11 bld. 11-13 pal. 6, 13, 14

Andi da wan soni di u sa du fuu sa ta libi fiifii makandi ku useei? Hën da te u ta pakisei fundu andi di bëëë ku di win kë taki. U musu du di soni aki ufö di daka dou ka woo mëni di dëdë u Jesosi, ma u musu möön du ën a di ndeti dë seei (1 Kol. 11:23-25). Di bëëë söndö sooda kë taki di sinkii u Jesosi di an abi zöndu, di a bi tei u paka puu u a zöndu basu. Di bë win kë taki di buuu u Jesosi. U musu hoi a pakisei taa di paka di Jesosi ko paka zöndu da u, ta lei taa sëmbë an lobi u kumafa Jehovah ku Jesosi lobi u. Jehovah da u di Womi Mii fëën, nöö di Womi Mii fëën seei bi dë kabakaba u ko dëdë da u. Te u ta pakisei fa de lobi u tjika, nöö a o mbei u lobi de tu. Wë u di hii u tuu lobi Jehovah, mbei woo sa ta libi fiifii makandi ku useei. w18.01 bld. 13 pal. 11

Jehovah lobi libisëmbë gaanfa seei. A lobi u sö gaanfa taa a manda di Womi Mii fëën ko dëdë da u fuu sa feni teego libi (Joh. 3:16). Ee Jehovah an bi o hoi hënseei a di soni di a paamusi u da di ten di ta ko, nöö Saatan ku dee sëmbë fëën bi o abi leti. Saatan taki taa Jehovah ta mindi soni, nöö an ta kë da libisëmbë bunu soni, söseei taa an ta tii de a wan bunu fasi. Dee sëmbë dee dë ku Saatan a wan së ta mbei Jehovah fa ku dee soni dee a paamusi u, nöö de ta taki taa: „Wë di Jesosi bi paamusi taa a o toona ko a di goonliba aki, nöö naasë a dë? Dee gaan sëmbë fuu bi dëdë gaanduwe kaa ma soni an tooka möönsö. Biga sensi Gadu mbei goonliba tee kisi di ten aki, nöö hii soni dë di wan seei fasi eti” (2 Pet. 3:3, 4). Ma Jehovah o hoi hënseei a dee soni dee a paamusi u. A seti soni sö taa te a o du soni u lei taa hën abi di leti u tii, nöö a o mbei dee sëmbë dee ta piki ën buka feni libi (Jes. 55:10, 11). Di leti di Jehovah abi u tii nama ku lobi. Fëën mbei u sa dë seiki taa hii juu a o lobi dee dinima fëën dee ta hoi deseei nëën.​—Ëki. 34:6. w17.06 bld. 16 pal. 7

Sensi di Jehovah paamusi taa a o seti wan lusupaima, kumafa a sikifi a Kenesesi 3:15, nöö a bi dë kuma a paka di paima dë kaa. Baka 4000 jaa, hën Jehovah manda di wan kodo Womi Mii fëën ko dëdë da libisëmbë (Joh. 3:16). U dë ku tangi a hati seei u di fasi fa Jehovah lei taa a lobi u! U sa lei taa u lobi wotowan tuutuu, hii fa u da zöndu libisëmbë u? Wë aai. Jehovah mbei u kumafa hënseei dë, nöö fëën mbei u sa djeesi ën. Abeli bi lei taa a lobi Gadu di a bi tja di möön bunu soni di a bi abi go tjuma da Gadu, nöö an bi pakisei hënseei nöö (Ken. 4:3, 4). Noa seei bi lei taa a lobi Gadu di a bi ta paaja di bosikopu fëën nöömö sömëni jaa longi, hii fa dee sëmbë an bi ta haikëën (2 Pet. 2:5). Abahamu bi lei tu taa soni an dë di a lobi kumafa a lobi Gadu. Fëën mbei a bi dë kabakaba u tja di womi mii fëën de kai Isaki, di a bi lobi gaanfa seei, go paka paima da Gadu (Jak. 2:21). Leti kumafa dee womi aki bi lei taa de lobi Gadu, sö nöö useei kë lei taa u lobi ën tu, aluwasi a ta taanga da u. w17.10 bld. 4 pal. 3, 4

Di wooko di di gaan mindima fuu, Jesosi, ta du, ta mbei u dë seiki taa Gadu sa da u paadon u dee zöndu fuu, söseei taa „a o abi tjali fuu, nöö a o ta heepi u a soni ku ën bunuhati te u dë a wan fuka” (Heb. 4:16). Fëën mbei u musu abi biibi a di lusupaima u Jesosi. I musu ta biibi taa iseei sa feni wini u di lusupaima tu (Gal. 2:20, 21). I musu biibi taa Jehovah sa da i paadon u dee zöndu fii, u di Jesosi paka di lusupaima. I musu biibi taa di lusupaima hën o mbei i feni di libi u teego. Di lusupaima u Jesosi da wan kado di Jehovah da i! Te Jehovah da u paadon u dee zöndu fuu kaa, nöö an dë fuu ta fëëë möön taa a o tei dee zöndu dë faa toona kuutu u u de hedi (Ps. 103:8-12). Wë u sa dë seiki taa Jehovah o da u paadon tuutuu. w17.11 bld. 13, 14 pal. 14-17

Di ndeti di Jesosi hoi di fosu Ndeti Njanjan u Masa, hën a begi wan apaiti begi. A bi taki u di fasi fa hën ku hën Tata bi ta libi makandi tjika. Jesosi bi begi u dee bakama fëën bi sa libi makandi sö tu. Jehovah bi haika di begi u di Womi Mii fëën. U hii dee komakandi dee u ta hoi, di komakandi di u ta hoi u mëni di dëdë u Jesosi, ta lei möön gaanfa unfa dee Jehovah Kotoigi ta libi fiifii makandi tjika. A so kamian, sëmbë u peipei nasiön an guwenti u ko makandi u hoi soni di nama ku keiki soni. Nasö so juu ee de du ën seei, nöö wotowan ta si kuma an fiti. Ma na sö Jehovah ku Jesosi ta si ën. Te u ta ko makandi u mëni di dëdë u Jesosi, nöö de ta lobi ën seei. An ta bigi da u dee sëmbë u Jehovah taa u ta libi fiifii makandi a sö wan fasi. Jehovah bi taki di soni aki a fesi.​—Eze. 37:15-17; Sak. 8:23. w18.01 bld. 11 pal. 7-9

„Dee tëmbëma” dee an bi kë biibi a di Mësiasi, da dee hedima u dee Dju. Na kë nöö de an bi kë tei taa Jesosi da di Keesitu, ma sömëni u dee Dju bi hakisi Pilati faa kii ën (Luk. 23:18-23). Awa, hën da deseei bi dë a dendu kii Jesosi. Ee dee Dju an bi kë tei taa Jesosi da di Mësiasi, nöö unfa Jesosi bi o du ko dë „di mama posu ta hoi di wosu”? Wë di wan kodo fasi fa di soni aki bi o sa pasa, hën da Jesosi bi musu weki ko a libi baka. Apösutu Petuisi bi taki taa: ’Jesosi Keesitu u Nazalëti di un bi peka a di pau naandë kii, Masa Gaangadu weki ën baka’ (Tjab. 3:15; 4:5-11; 1 Pet. 2:5-7). Di Jesosi dëdë weki, nöö boiti di në fëën, na wan „oto në an dë a goonliba aki möönsö di u libisëmbë sa kai fuu feni di heepi u Gadu”.​—Tjab. 4:12; Ef. 1:20. w17.12 bld. 10, 11 pal. 6-9

Di Jesosi bi taki soni u di gaan fuka di bi o ko, hën a bi taki taa: „De o si mi ta koti faja ta ko a dee bundji dendu ala ku gaan kaakiti. Nöö fa mi o ta ko dë, nöö wan tutu o piki taanga. Nöö dee basia fu Masa Gaangadu köndë o ta waka ta pii hii dee sëmbë u Gadu tuu hai tja ko buta a wan kamian” (Mat. 24:29-31). Jesosi o „pii hii dee sëmbë u Gadu”, te a o tja hii dee salufuwan dee dë a goonliba aki jeti, go a liba ala. Di soni aki o pasa baka te di gaan fuka bigi, ma a o dë ufö di feti u Amagedon bigi. A di gaan feti dë, Jesosi ku dee 144.000 sëmbë o feti ku dee könu u di goonliba aki, nöö de o wini de (Ako. 17:12-14). Di lasiti pasi di woo mëni di dëdë u Jesosi ufö a „ko” pii dee salufuwan a goonliba aki, hën o dë di lasiti pasi di woo mëni di dëdë u Jesosi. w18.01 bld. 14 pal. 15

Nöunöu Jesosi ta libi a Gadu Köndë ala u ’teego’ (Ako. 1:5, 18; Lom. 6:9; Kol. 1:18; 1 Pet. 3:18). A bi paamusi dee apösutu fëën taa de bi o go tii ku ën a liba ala (Lukasi 22:28-30). Paulosu bi sikifi taa: „Ma an dë sö e, dee sëmbë. Keesitu weki baka a dëdë tuu. U hii dee sëmbë dee bi dëdë kaa, nöö hën da di fosu wan di weki baka.” Baka di dë, hën Paulosu toona taki taa sëmbë bi o weki baka u de go libi a liba ala. A taa: „Hiniwan sëmbë abi ën leti juu faa weki baka e. Nöö di fosu wan, hën da [Jesosi] Keesitu, nöö baka fëën te a o toona ko . . . nöö dee sëmbë fëën” (1 Kol. 15:20, 23). Sensi di jaa 1914 u ta libi a di pisiten di Jesosi „toona ko”. Nöö di kaba u di hogi goonliba aki zuntu seei. w17.12 bld. 12, 13 pal. 11, 14-16

Di lobihati Tata fuu seei bi abi sëmbë di a bi lobi, di bi ko dëdë. So u dee sëmbë aki da Abahamu, Isaki, Jakopu, Mosesi, ku Könu Dafiti. De tuu bi dë dinima fëën (Nöb. 12:6-8; Mat. 22:31, 32; Tjab. 13:22). Di Bëibel ta lei u taa Jehovah ta wakiti di daka ka a o weki dee womi aki ko a libi baka (Jöpu 14:14, 15). A di ten dë, de o dë waiwai, söseei de o abi wan bunu gösöntu. Di fosu Womi Mii u Jehovah seei bi dëdë tu. Di Bëibel ta taki taa Jesosi bi dë wan sëmbë di bi ta mbei Gadu „piizii seei” (Nöng. 8:22, 30). Wa o sa kaba fusutan unfa a bi hati Jehovah tjika di a bi dë ta luku unfa de bi ta kii di Womi Mii fëën a wan hogihati fasi (Joh. 5:20; 10:17). U sa dë seiki taa Jehovah o heepi u. Fëën mbei hii juu u sa ta begi ën, nöö u konda dëën unfa u ta tjali tjika. A ta da u kötöhati seei u sabi taa Jehovah ta fusutan dee fii fuu, söseei taa a ta da u di kötöhati di u abi fanöudu!​—2 Kol. 1:3, 4. w17.07 bld. 10 pal. 3-5

A di ten aki, milionmilion sëmbë ta wai seei taa de sa dëën „dee gudu” di de abi, hën da di ten u de, di kaakiti u de, ku dee woto soni di de abi. A di lö fasi aki de ta heepi seeka soni a di pisi u di ölganisaasi u Jehovah di dë a goonliba aki, hën da di Wosu fëën (Nöng. 3:9). Nöiti Jehovah o fëëkëtë dee soni dee u du dëën, nöö an o fëëkëtë di fa u bi lobi ën. Dee sëmbë u Jehovah du wan gaan wooko a dee lasiti daka u di goonliba aki. De bi sa du di soni aki u di Jehovah bi heepi de, söseei u di Keesitu ta tii de. U ta wai seei taa u dë a wan bumbuu ölganisaasi di ta tjubi u, söseei di o dë u teego. U sabi taa dee soni di Jehovah taki u di tuutuu biibi o pasa tuutuu. Fëën mbei i musu tei ën u bigi taa i dë a di ölganisaasi u Jehovah, nöö i musu ’du dee soni di Jehovah di Gadu fuu ta piki u’ (Sak. 6:15). Te i du sö, nöö di sëmbë di dë Könu ku Gaan Mindima fuu, ku dee ëngëli, o tjubi i. Du hii soni di i sa du a di tuutuu biibi. Jehovah o tjubi i a di ten aki, söseei a o tjubi i u teego! w17.10 bld. 26 pal. 18, 19

Dee politiki soni u di goonliba aki, dee keiki, ku di bai di sëmbë ta bai soni ta sei, da wan pisi u di goonliba u Saatan, nöö abiti möön de an o dë möön. Di tjabukama Ezekiëli ku di tjabukama Sefanja bi taki taa goutu ku soofu, di dee sëmbë dee ta bai soni ta sei ta si kuma gaan fanöudu soni, o ko dë sösö soni (Eze. 7:19; Sef. 1:18). Unfa u bi o fii ee u dë a libi jeti te di kaba u di goonliba aki dou, hën u ko si taa u bi suku dee gudu u di goonliba aki, ka fuu bi suku dee gudu dee o dë u nöömö? Kandë woo fii kuma wan womi di bi wooko taanga hii hën libi longi faa mbei möni, hën te u kaba fëën a ko si taa di möni dë na tuutuu möni (Nöng. 18:11). Dee gudu u di goonliba u Saatan an o dë möön. Fëën mbei na lasi di okasi di i abi u wooko ku dee gudu dee i abi fii ko dë mati ku sëmbë a Gadu Köndë ala. Dee soni dee u ta du da Jehovah ku di Könuköndë fëën, o mbei taa u dë waiwai tuutuu. w17.07 bld. 7 pal. 16

So Keesitu sëmbë bi du wan gaan zöndu, nöö de bi pooba u tjubi di soni di de du. Kandë u di de ta sen, nasö u di de an kë u wotowan tjali, mbei de an bi piki sëmbë (Nöng. 28:13). Ma ee di sëmbë ta suku u tjubi di zöndu fëën, nöö a sa tja hogi ko dëën, söseei a sa tja hogi ko da woto sëmbë tu. Faandi mbei u taki sö? Wë kandë Jehovah an o da di kemeente di santa jeje fëën möön, nöö dee baaa ku dee sisa an o sa ta libi fiifii ku deseei a di kemeente möön tu (Ef. 4:30). Fëën mbei ee wan Keesitu sëmbë du wan gaan zöndu, nöö a o go suku heepi a dee gaanwomi ee a lobi wotowan ku hii hën hati (Jak. 5:14, 15). Lobi da di fasi di u musu ko abi möön gaanfa (1 Kol. 13:13). Di fasi aki ta heepi sëmbë u de ko sabi ambë da dee tuutuu bakama u Jesosi, söseei a ta heepi de u de si ambë ta djeesi Jehovah tuutuu, di Gadu ka lobi kumutu. Paulosu bi taki taa ee an abi lobi, nöö an dë na wan wojo soni (1 Kol. 13:2). Be hiniwan fuu ta lei nöömö taa u lobi wotowan. Na ku „buka wanwan”, ma a ’musu dë u si a u libi tuutuu’.​—1 Joh. 3:18. w17.10 bld. 8 pal. 17, 18

Josëfu bi lei taa a bi abi degihati di di mujëë u Potifali bi kë faa duumi ku ën. A bi musu u sabi taa a bi sa lasi hën libi ee a bi niinga. Ma tökuseei Josëfu bi lei taa a bi abi degihati, u di a piki di mujëë wantewante taa an o duumi ku ën (Ken. 39:10, 12). Lakabu da wan woto sëmbë di bi lei taa a bi abi degihati. Tu womi u Isaëli bi go fusi luku di köndë Jelikou, nöö de bi go nëën pisi. A bi tei degihati tjubi dee tu womi aki, nöö a bi heepi de u de fusi kumutu a di köndë (Jos. 2:4, 5, 9, 12-16). Di dee Saduseima bi kë tapa dee apösutu u de an konda soni u Jesosi möön, de an bi haika de. De bi si taa Jesosi bi abi degihati, nöö di soni dë bi heepi de u deseei ko abi degihati tu (Tjab. 5:17, 18, 27-29). Josëfu, Lakabu, Jesosi, ku dee apösutu fëën bi dë kabakaba u du soni a wan bunu fasi. De bi lei taa de bi abi degihati, u di de bi ta futoou Jehovah. Ma de an bi ta buta futoou a di u deseei köni. Te u abi degihati fanöudu, nöö wa musu buta futoou a useei, ma u musu buta futoou a Jehovah.​—2 Tim. 1:7. w17.09 bld. 28 pal. 6-9

Wa sa tooka dee awoo fasi dee u bi abi ku useei kaakiti. Sëmbë di bi kë du di soni dë, bi musu ta mbei taanga möiti u tooka di awoo fasi fa de bi ta libi. Ma di Wöutu u Gadu ku di santa jeje hën bi heepi de (Luk. 11:13; Heb. 4:12). Ee u kë feni di kaakiti dë tu, nöö u musu ta lesi di Bëibel hiniwan daka, u musu ta pakisei fundu fëën, söseei u musu ta hakisi Jehovah faa da u köni ku kaakiti fuu du dee soni dee u ta lei (Jos. 1:8; Ps. 119:97; 1 Tes. 5:17). U ta feni wini a di Wöutu u Gadu ku di santa jeje fëën tu te u ta seeka useei da dee komakandi, söseei te u nango a de (Heb. 10:24, 25). Nöö u musu ta wooko ku dee woto soni di di ölganisaasi u Jehovah ta da u. Hën da dee buku fuu, JW Broadcasting, JW Library ku jw.org (Luk. 12:42). Hii fa u dee Keesitu sëmbë musu kaba ku dee fasi di an bunu di u abi, tökuseei u musu du wan woto soni jeti, sö taa libi fuu sa kai ku Jehovah. U musu ko abi njunjun fasi tu.​—Kol. 3:10. w17.08 bld. 20 pal. 16, 17

Könu Dafiti bi tja sömëni sitaafu tu. Jehovah bi salufu Dafiti faa ko dë könu u Isaëli di a bi njönku. Ma Dafiti bi wakiti 15 jaa longi ufö a ko toon könu u di lö ka a bi kumutu (2 Sam. 2:3, 4). A di pisiten dë, Dafiti bi musu ta kule ta tjubi da Könu Saulosu fu an feni ën kii. Nöö di soni dë bi mbei taa Dafiti an bi abi fu hënseei wosu. A bi musu ta libi a wan woto köndë nasö a sitonu baaku dendu a wan sabana. Te u kaba fëën, de bi kii Saulosu a wan gaan feti. Ma tökuseei Dafiti bi musu wakiti söwan seibi jaa longi jeti ufö a bi sa toon könu u hii di köndë Isaëli (2 Sam. 5:4, 5). Ma faandi mbei Dafiti bi dë kabakaba u wakiti ku pasensi? A bi sabi taa Jehovah lobi ën, söseei taa a bi o dë ku ën hii juu. A bi ta mëni dee sömëni pasi di Jehovah bi heepi ën a di ten di pasa, nöö a bi ta buta pakisei a di heepi di Jehovah bi o heepi ën a di ten di ta ko (Ps. 13:6). Dafiti bi sabi taa an bi o hati ën ee a bi wakiti Jehovah ku pasensi faa du dee soni dee a bi paamusi ën. w17.08 bld. 7 pal. 14, 15

Möön di ten ta pasa, möönmöön dee töngö ta tooka. Kandë so wöutu nasö so soni di sëmbë bi ta taki fosu, kë taki wan hii woto soni a di ten aki. Di soni aki dë sö ku dee töngö di sëmbë bi ta fan na awooten tu. Di Hebelejëntöngö ku di Giikitöngö di sëmbë ta fan a di ten aki, tooka ku di Hebelejëntöngö ku di Giikitöngö di sëmbë bi ta fan a di pisiten di de sikifi di Bëibel. Gaansë u sëmbë an ta fusutan di Hebelejëntöngö ku di Giikitöngö di de bi sikifi di Bëibel, nöö fëën mbei de bi musu puu di Bëibel ko a woto töngö da de. So sëmbë bi ta pakisei taa ee de lei di Hebelejëntöngö ku di Giikitöngö di sëmbë bi ta fan na awooten, nöö de o sa fusutan dee soni dee sikifi a di Bëibel möön bunu. Ma di soni dë an dë kumafa de mëni. U ta wai seei taa de puu di Bëibel, nasö wanlö pisi fëën ko a söwan 3000 töngö. Jehovah hën kë taa „hii pei nasiön sëmbë, ku hii pei lö, ku hii pei föluku dee ta fan hii dee peipei töngö u goonliba” tuu musu feni wini u di Wöutu fëën (Ako. 14:6). Di soni aki ta mbei u ku Gadu ko dë möön gaan mati. A dë wan Gadu di lobi hii sëmbë. w17.09 bld. 16 pal. 4

Kandë i abi famii di de puu a di kemeente. Ee sö a dë, nöö i musu hoi iseei fu ja nama ku dee lö sëmbë dë ee an dë fanöudu. Ma an o ta taanga da i sö ee i ta hoi a pakisei taa te i ta du sö, nöö i ta djeesi Jehovah, söseei i ta du andi a piki i. U ta lei soni a di woto u Könu Dafiti tu. Di Saulosu ku Simei, bi suku Dafiti a toobi, nöö hati fëën an bi boonu, söseei an bi wooko ku di makiti fëën u du hogi ku de (1 Sam. 26:9-11; 2 Sam. 16:5-10). Ma na hii juu Dafiti bi ta duwengi hënseei. U sabi di soni aki u di u ta lesi a Bëibel taa a bi du zöndu, di a bi duumi ku Batiseiba, söseei di a bi hopo faa go ligei ku Nabali (1 Sam. 25:10-13; 2 Sam. 11:2-4). U sa lei sömëni soni a di woto u Dafiti. Di fosu soni, hën da dee sëmbë dee ta tei fesi a dee sëmbë u Gadu mindi musu ta duwengi deseei, sö taa de an wooko ku di makiti u de a wan föutu fasi. Di u tu soni, hën da na wan sëmbë musu si kuma a taanpu gingin, tee taa na wan soni o sa poobëën faa du wan soni di an bunu.​—1 Kol. 10:12. w17.09 bld. 6 pal. 12, 13