Bakajailiba

Jesosi bi ta fii da sëmbë. Dee sëmbë bi ta fii taa a lobi de, nöö de bi ta haika di Könuköndë bosikopu di a bi ta paaja. Möön u ko ta fii da sëmbë, möön sëmbë o ta kë ta haika u te u ta peleiki da de. Andi sa heepi u fuu lei taa u ta fii da dee sëmbë dee u ta peleiki da? Wë u musu ta buta useei a de kamian, nöö u libi ku de kumafa u bi o kë u sëmbë libi ku u (Mat. 7:12). U musu kai pakisei luku fuu ko sabi andi di sëmbë abi fanöudu. Wa musu ta suku u peleiki da hii dee sëmbë dee u ta miti a di wan seei fasi. Ma u musu ta luku unfa soni dë a di libi u hiniwan u de, söseei u musu ta mbei möiti fuu ko fusutan unfa de ta si soni. Hakisi di sëmbë soni a wan köni fasi fii sa ko sabi di sëmbë möön bunu, söseei fii sa ko sabi andi a ta biibi (Nöng. 20:5). Te u du ën sö, nöö de o piki u soni di o heepi u fuu sa konda da de faandi mbei de abi di bunu buka fanöudu. Te u ko sabi andi de abi fanöudu kaa, nöö woo sa lei de taa u ta fii da de, söseei taa u kë heepi de, kumafa Jesosi bi ta heepi sëmbë.​—Luku 1 Kol. 9:19-23. w19.03 bld. 20 pal. 2; bld. 22 pal. 8-9

Adam ku Eva bi lei taa de an bi tei dee soni dee Jehovah bi du da de u bigi. Hiniwan fuu sa lei taa wa dë kuma de, ma taa u ta tei hii soni di Gadu ta du da u u bigi. Te u ta tei dopu, nöö u ta lei Jehovah taa u ta biibi taa hën musu piki u andi da bunu ku andi da hogi. A sö wan fasi u ta lei tu taa u lobi di Tata fuu, söseei taa u ta futoou ën. Di soni di u musu du baka te u tei dopu, hën da u musu ta hoi dee wëti u Jehovah hiniwan daka, nöö wa musu ta du andi useei kë. Milionmilion sëmbë ta du di soni aki hiniwan daka. I sa ko dë kuma dee sëmbë aki ee i ta mbei möiti fii ko fusutan di Wöutu u Gadu möön bunu, ee i ta dë makandi ku dee baaa ku dee sisa fii hii juu, söseei ee i ta konda soni u di lobihati Tata fii da wotowan (Heb. 10:24, 25). Te joo du wan soni, nöö haika andi Jehovah ta taki da i a di Wöutu fëën, söseei haika andi di ölganisaasi fëën ta piki i (Jes. 30:21). Te i ta du sö, nöö soni o waka bunu da i.​—Nöng. 16:20. w19.03 bld. 7 pal. 17-18

Jehovah da u sömëni soni di nama ku di biibi fuu. A ta lei u sömëni soni a dee komakandi fuu, a dee buku fuu, söseei a dee website fuu. A bi pasa kaa taa i bi haika wan taki, taa i bi lesi wan woto, nasö taa i bi luku wan broadcasting, hën i fii taa dee soni dee i lesi, nasö taa dee soni dee i jei da soni di i bi abi fanöudu ö? Unfa u sa lei Jehovah taa u ta tei dee soni aki u bigi? (Kol. 3:15) Wan fasi fa u sa ta du di soni aki, da te u ta dëën tangi te woo begi ën. Wan woto fasi fa u sa lei Jehovah taa u ta tei dee soni dee a ta du da u u bigi, da te u ta seeka di kamian ka u nango dini ën faa dë limbolimbo. Hii juu u ta heepi te de ta seeka dee Könuköndë zali fuu. Söseei dee sëmbë dee ta seeka dee poku soni u di zali ta köni taa de an booko dee soni aki. Te u ta seeka di zali, nöö soni an o ta booko hesihesi, nöö an o dë taa hii juu u musu toona mbei wan zali. A sö wan fasi u sa ta mbei njunjun Könuköndë zali a woto kamian, nasö u sa ta seeka woto zali di booko. w19.02 bld. 18 pal. 17-18

Jöpu bi ta tei ten u luku dee waiti soni dee Jehovah mbei (Jöpu 26:7, 8). A bi foondo seei di a bi ko sabi soni u di goonliba, di fa liba ala mbei, dee bundji, ku di fasi fa gaangadu ta bai. Ma tökuseei a bi ko fusutan taa an bi sabi hii dee soni dee Gadu mbei. A bi lobi dee soni di Jehovah bi taki. Jöpu bi taki taa: „Mi du möön fa a bi hakisi mi u mi du” (Jöpu 23:12). Jöpu bi ta tei dee soni di Jehovah bi ta du u bigi seei, nöö a bi ta lesipeki ën tu. A bi lobi di Tata fëën, nöö a bi kë du soni di ta kai ku ën. Di soni aki mbei Jöpu bi kë ta hoi hënseei a Gadu möön gaanfa. Useei musu du kumafa Jöpu bi du tu. A di ten aki u sabi möön soni u dee soni di Gadu mbei, möön leki fa dee sëmbë u di ten u Jöpu bi sabi soni u de. Söseei u abi hii di Bëibel u heepi u fuu ko sabi ambë Jehovah dë tuutuu. Hii dee soni dee u ta lei sa heepi u fuu ko ta tei dee soni di Gadu du u bigi. Di tei di woo ta tei dee soni Jehovah ta du da u u bigi, söseei di lesipeki di woo ta lesipeki ën, o mbei woo lobi ën, woo ta piki hën buka, söseei woo kë du möön soni u lei taa u ta hoi useei nëën.​—Jöpu 28:28. w19.02 bld. 5 pal. 12

Sensi na awooten, hën dee tiima u di goonliba aki ta du ku dee sëmbë u Jehovah. So juu de sa ta kuutu u taa u du soni di an bunu, ma di soni di mbei hati u de ta boonu ku u tuutuu, hën da u di u ta piki Jehovah buka, ka fuu piki de buka (Tjab. 5:29). So juu de sa ta mbei u fa, de sa ta söötö u a dunguwosu, nasö de sa ta fon u seei. Ma Jehovah ta heepi u fu wa hopo ligei ku de, ma u ta dë fuu piii. Luku di woto u dee dii Hebelejën womi mii di de bi tja go a katibo a Babilon. Dee womi mii aki da Hanania, Misaëli, ku Asalia. A wan saapi fasi de konda da di könu taa de an o sa dini di pindi di a mbei. De bi dë kabakaba u tei andi Jehovah da pasi u miti de (Dan. 3:1, 8-28). Unfa u sa lei taa u ta hoi useei a Jehovah kuma dee dii Hebelejën womi mii, te fuka ta miti u? Wë u musu abi sakafasi, nöö u musu biibi taa Jehovah o heepi u (Ps. 118:7). U musu ta piki dee sëmbë dee ta du ku u a wan saapi fasi, söseei u musu ta lesipeki de (1 Pet. 3:15). Söseei wa musu ta du soni di sa mbei u ku di lobihati Tata fuu an dë mati möön. w19.02 bld. 10-11 pal. 11-13

U sa mbei möiti fuu ko abi möön degihati ku di kai di woo ta kai pakisei a dee bunu dee woo feni, u di Jesosi ko dëdë da u (Joh. 3:16; Ef. 1:7). Te di ten ta zuntu fuu mëni di dëdë u Jesosi, nöö u sa tei di ten dë fuu lei taa u ta tei di lusupaima u bigi. Mbei möiti a di pisiten dë fii ta lesi dee pisi u Bëibel dee ta taki soni u di dëdë u Jesosi, söseei i musu ta pakisei fundu u dee soni dee bi pasa ufö Jesosi dëdë. Nöö te u ko makandi u hoi di Ndeti Njanjan u Masa, nöö woo ko fusutan möön bunu andi di bëëë ku di win kë taki, söseei woo ko fusutan andi da di gaan soni di Jesosi du da u. Te u ta tei di soni di Jehovah ku Jesosi du da u u bigi, söseei te u ko fusutan un bunu di soni dë o tja ko da u ku dee sëmbë fuu, nöö di biibi fuu ta ko möön taanga. Boiti di dë, di soni dë ta da u taanga fuu hoi dou (Heb. 12:3). Di soni aki ta mbei u dë ku tangi a hati seei, u di u sabi taa Jesosi abi dee fasi aki jeti, nöö a dë kuma di Gaan Mindima fuu a liba ala, ta fan ku Gadu da u! (Heb. 7:24, 25) Ee u kë lei taa u ta tei di soni aki u bigi, nöö u musu ta mëni di dëdë u Jesosi, leti kumafa Jesosi bi taki taa u musu ta du ën.​—Luk. 22:19, 20. w19.01 bld. 22 pal. 8; bld. 23-24 pal. 10-11

Jehovah da hii u tuu di gaandi fuu sa ta gafëën. Dee piki dee u ta da a dee komakandi dë kuma wan „peesenti” di u ta tja go da Gadu, nöö na wan sëmbë sa du ën da u (Heb. 13:15). A dë sö taa Jehovah kë taa hii u tuu musu tja di wan seei peesenti go dëën u, nasö taa hii u tuu musu ta da piki a di wan seei fasi ö? Wë nönö! I musu ta si dee komakandi kuma wan njanjan di i ta njan makandi ku wanlö mati fii. Pakisei taa wanlö baaa ku sisa u di kemeente fii kai i fii ko njan wan soni makandi ku de, nöö de bi hakisi i fii tja wan piki soni ko tu. Andi i bi o du? Kandë i bi o ta booko i hedi pikisö, ma i bi o mbei möiti u seeka wan soni di hii sëmbë o lobi. Jehovah dë kuma wan sëmbë di ta kai u fuu ko njan makandi ku ën. Dee komakandi dë kuma njanjan di Jehovah buta a tafa da u fuu njan (Ps. 23:5; Mat. 24:45). Nöö Jehovah ta wai te useei ta tja wan piki soni ko tu, ma a musu dë di möön bunu soni di u sa dëën. Fëën mbei a bunu fii seeka iseei bunu da dee komakandi, nöö da hia piki kumafa i sa. Te i ta du sö, nöö na njan nöö joo ta njan a di tafa di Jehovah seeka da i, ma joo sa tja wan soni ko tu u paati da di kemeente. w19.01 bld. 8 pal. 3; bld. 13 pal. 20

Na awooten, sëmbë bi lo’ u du fanafiti soni a di së u manu ku mujëë soni te de bi ta dini dee poipoi gadu u de (Hos. 4:13, 14). Sömëni sëmbë bi lobi poipoi biibi, u di de bi lobi fanafiti libi a di së u manu ku mujëë soni. Ma di soni aki bi ta mbei de dë waiwai tuutuu ö? Wë nönö, na seei! Dafiti bi taki taa dee sëmbë dee ta dini poipoi gadu, ta abi „te a hia bookohedi”. Dee sëmbë aki bi ta tja dee mii u de seei go tjuma paka poipoi gadu (Jes. 57:5). Jehovah bi buuse di hogihati fasi fa de bi ta du soni (Jel. 7:31). A di ten aki, sömëni poipoi keiki aan toobi ee dee sëmbë u di keiki u de ta libi fanafiti a di së u manu ku mujëë soni, aluwasi ee a dë taa womi ku womi ta duumi ku deseei nasö ee mujëë ku mujëë ta duumi ku deseei. Di soni aki sa mbei sëmbë pakisei taa de fii tuutuu, ma te i luku unfa soni dë tuutuu, nöö de ta abi „te a hia bookohedi” (1 Kol. 6:18, 19). I bi buta pakisei a di soni aki ö? Fëën mbei un dee njönkuwan, un haika di Tata fuunu di dë a liba ala. Un mbei möiti sö taa unuseei sa ko sabi taa a bunu te un ta piki Gadu buka. Un pakisei dee soni dee sa miti unu te un ta libi fanafiti a di së u manu ku mujëë soni. Woon ko si taa di piizii di un sa feni o dë u wan pisiten nöö, nöö sömëni fuka o dë u tja bakaten.​—Gal. 6:8. w18.12 bld. 25 pal. 16-18

Ee wan Keesitu sëmbë waka da di sëmbë di hën ku ën tööu, nöö di wotowan fëën sa luku andi a o du. Jesosi bi taki taa di sëmbë di de waka da, abi leti u booko di tööu, nöö a toona tööu baka (Mat. 19:9). Ma hii fa a dë sö, an bi o dë wan föutu soni ee di sëmbë di de waka da, kë da di wotowan fëën paadon. Hosea bi ko dë ku Gomeli baka. Di Gomeli bi ko dë ku Hosea baka, hën Hosea bi piki ën taa an bi musu duumi ku na wan woto womi möön. Hosea an bi duumi ku Gomeli wan hii pisiten (Hos. 3:1-3). Ma a bi musu u dë sö taa Hosea bi duumi ku hën mujëë baka. Di soni dë bi lei fa Gadu bi dë kabakaba u tei dee Isaëli sëmbë baka, u de ku ën bi sa toona ko dë mati (Hos. 1:11; 3:4-5). Andi di soni aki ta lei u u di tööu libi a di ten aki? Wë a ta lei u taa ee wan Keesitu sëmbë bigi duumi ku hën manu nasö hën mujëë baka, hii fa a bi waka dëën, nöö di soni dë o lei taa a dëën paadon (1 Kol. 7:3, 5). Hën da sö wan sëmbë an o abi leti u booko di tööu möön. Baka di dë, nöö di womi ku di mujëë musu heepi deseei u de ta si di tööu libi kumafa Gadu ta si ën. w18.12 bld. 12 pal. 13

Te u ta lei soni u Bëibel, nöö u musu buta pakisei a di fasi fa Jehovah ta si soni, u di di soni aki sa heepi u fuu du soni a wan köni fasi. Nöö ee wan daka wan soni ko pasa ka u musu taki andi woo du, nöö an o dë wan gaan soni da u poi. Josëfu bi du wan soni wantewante di di mujëë u Potifali bi kë faa duumi ku ën. An dë u taki taa Josëfu bi pakisei fundu u di fasi fa Jehovah ta si di tööu libi (Ken. 39:8, 9). Josëfu bi piki di mujëë u Potifali taa: „Unfa mi sa du sö wan gaan hogi faa ko dë taa mi du zöndu a Gadu wojo?” Di soni di Josëfu bi taki ta lei taa a bi ko ta pakisei kumafa Gadu ta pakisei. Unfa a dë ku u? Andi i bi o du ee wan sëmbë di i ku ën ta wooko a di wan kamian ta pidi i? Ee nasö andi i bi o du ee wan sëmbë manda wan fanafiti soni ko a di tëlëfön fii? An o taanga da u fuu hoi useei a Jehovah ee u bi ko sabi kaa unfa a ta si soni, ee u bi ko si taa di fasi fa a ta si soni bunu, söseei ee u sabi kaa andi woo du. w18.11 bld. 30 pal. 13-14

So sëmbë di ta öndösuku soni u Bëibel ta biibi taa di soni di sikifi a di tëkisi aki kë taki: „Mi o ta djombo ta piizii u Masa hedi. Mi o baja u di mi lobi Gadu.” Wan fanöudu soni seei u ta lei a di soni aki! Na paamusi nöö Jehovah paamusi u taa a o mbei soni waka bunu da u a di ten di ta ko, ma a ta piki u tu taa abiti möön a o mbei dee soni dee a taki, pasa tuutuu. U ta lei wan gaan fanöudu soni a di buku Habaki. U ta lei nëën taa u musu ta futoou Jehovah (Hab. 2:4). Ee u kë ta futoou Jehovah, nöö u musu mbei möiti fuu ko dë möön gaan mati fëën. U musu ta du dee soni aki: (1) U musu ta begi Jehovah, ta konda hii dee fuka fuu dëën. (2) U musu ta buta hii u pakisei a dee soni dee a ta piki u a di Wöutu fëën, söseei u musu ta du dee soni di di ölganisaasi fëën ta piki u fuu du. (3) U musu ta futoou ën, nöö u musu ta wakiti ku pasensi u te Jehovah du dee soni dee a paamusi u. Di soni aki Habaki bi du. Hii fa a bi dë ku sömëni bookohedi di a bi ta fan ku Jehovah, tökuseei te u kaba fëën, a bi feni taanga, nöö a bi ko dë waiwai baka! Ee u ta djeesi Habaki, nöö useei o fii taa Jehovah di Tata fuu di dë a liba ala, dë ku u. A o dë kuma u ta fii fa a ta baasa u duuu sö. Soni an dë a di goonliba aki di sa da u kötöhati kuma di soni aki. w18.11 bld. 20 pal. 18-19

Luku wan woto soni di di Bëibel ta taki, di ta lei u taa Jehovah lobi u. A ta taki taa: „Wë biga Masa Gadu lobi libisëmbë sö tee a da de di wan kodo Womi Mii fëën di a abi. Nöö ee wan sëmbë i ta biibi a di Mii fëën aki liba, nöö ja o lasi go kaba a sösö möönsö, ma i abi di libi u teego kaa” (Joh. 3:16). Di dëdë di Jesosi ko dëdë paka zöndu da u ta lei u taa hënseei lobi u tu, nöö di soni aki ta da u taanga. Di Bëibel ta taki taa ’toobi ku fuka’ seei an „sa paati u ku [Masa Jesosi] Keesitu, puu u a di gaan lobi di u dë aki” (Lom. 8:35, 38, 39). So juu soni ta miti u di ta mbei u ko abi wan pei suwaki, nasö so juu soni ta miti u di ta mbei u fii bookosaka. Ma te u ta pakisei fa Keesitu lobi u tjika, nöö di soni dë sa da u taanga fuu hoi dou (2 Kol. 5:14). Di lobi di Jesosi lobi u, ta da u taanga fuu kë dë a libi fuu sa dini Jehovah. A sa heepi u tu fuu kë dë a libi go dou, aluwasi soni ta miti u, aluwasi sëmbë ta du ku u, aluwasi soni an ta waka kumafa u kë, nasö aluwasi u ta dë ku bookohedi. w18.09 bld. 10-11 pal. 8-9

Ee u kë ta waka a di leti pasi, nöö u musu ta tei hii dee soni dee Jehovah ta piki u, söseei u musu ta libi ku de tu. Di tuutuu lei ku di libi di u musu ta libi ku dee mama wëti u Bëibel musu dë di möön fanöudu soni da u. Dafiti bi buta taa a bi o mbei hii möiti faa waka a di leti pasi. Nöö sö useei musu du tu. Ee wa du di soni aki, nöö a sa pasa taa u bigi ta pakisei dee soni dee u bi disa fuu bi sa ko a di tuutuu lei, nöö kandë woo kë go du so u dee soni dë baka. Ma wa sa taki taa woo tei so u dee lei u Bëibel, nöö u disa so u de. Ee wa kë faa dë taa u ta kumutu a di tuutuu lei pikipiki, nöö u musu ta wooko ku di ten fuu a wan köni fasi go dou. Ee wa ta wooko ku di ten fuu a wan köni fasi, nöö a sa pasa taa u lasi ten a soni di u ta du u mbei piizii. Dee soni dë sa dë soni kuma di go di u nango a Internet nasö di luku di u ta luku teefei. Hii fa an musu u hogi ee u ta du dee soni aki, tökuseei a sa pasa taa u tei di ten di u bi ta tei u lei soni u Bëibel, nasö di u bi nango a di peleikiwooko, u go du dee soni aki. w18.11 bld. 11 pal. 7-8

Wë so juu soni o ta tooka a u libi a wan ten di wa bi mëni, nöö di soni aki sa mbei u fii bookosaka seei, nöö u sa ta booko u hedi gaanfa tu (Nöng. 12:25). Te soni ko tooka a u libi, hën a ta taanga da u fuu tooka di fasi fa u ta pakisei, nöö andi sa heepi u fu wa ta booko u hedi poi? (Ps. 131:1-3) Aluwasi unfa soni ta taanga da u tjika, tökuseei u sa feni ’di kötöhati di Gadu ta da sëmbë’, di o sa tjubi u „fusutan” sö taa u sa ta fii bunu (Fil. 4:6, 7). Te u ta booko u hedi gaanfa, nöö ’di kötöhati di Gadu ta da sëmbë’, sa heepi u fuu dini ën go dou. Di santa jeje u Gadu sa heepi u fu wa ta dë pantapanta, söseei a sa heepi u fuu mëni Bëibel tëkisi di o heepi u fuu fusutan andi da dee möön fanöudu soni a di libi.​—Joh. 14:26, 27. w18.10 bld. 22 pal. 2; bld. 23 pal. 5, 8

Andi da di soni di mbei di libi ko möön taanga da libisëmbë? Di soni dë da di mindi di sëmbë ta mindi soni! Te wan sëmbë ta mindi soni, hën da a ta taki wan soni di a sabi taa an dë sö tuutuu u di a kë ganjan wan sëmbë. Ambë bi dë di fosu sëmbë di bi mindi soni? Wë di sëmbë dë da Saatan Didibi! Jesosi Keesitu bi taki taa „nëën mindi soni ku lëgëdë kumutu” (Joh. 8:44). Na un ten Saatan bi mindi soni u di fosu pasi? A bi du di soni aki dusudusu jaa pasa, a di djai u Eden. Adam ku Eva bi dë u de waiwai a di Paladëisi di Jehovah bi seeka da de. Jehovah bi piki de taa ee de bi njan di njanjan u di pau de kai „Sabi bunu ku hogi”, nöö de bi o dëdë. Hii fa Saatan bi sabi di soni aki, tökuseei a bi tei wan sindeki fan ku Eva, hën a piki ën taa: „Wan o dëdë seei.” Di pasi aki bi dë di fosu pasi di wan sëmbë bi mindi soni. Saatan bi taki tu taa: „Gadu sabi taa di daka di woon njan di pau njanjan dë, di daka dë seei wojo fuunu o limbo, nöö woon dë kuma Gadu seei, woon sabi andi da bunu ku hogi.”​—Ken. 2:15-17; 3:1-5. w18.10 bld. 3 pal. 1-2

Ee u kë u hati fuu ta dë limbolimbo a Gadu wojo, nöö u musu ta pakisei soni di fiti, söseei u musu ta kë du soni di fiti tu. A dë taanga fanöudu u du dee soni aki ee u kë u Jehovah wai ku di dini di u ta dini ën (2 Kol. 4:2; 1 Tim. 1:5). Jehovah bi taki taa: „Na wan sëmbë sa si mi ku wojo, nöö a fika a libi” (Ëki. 33:20). Wë nöö unfa dee sëmbë dee hati u de dë limbolimbo sa ’si Gadu’? Di Giiki wöutu di de puu ko „si” sa kë taki pakisei, fusutan nasö sabi. Hën da wan sëmbë di ta ’si Gadu’ da wan sëmbë di ta fusutan un pei sëmbë Gadu dë, nöö a sa lobi dee fasi dee a abi tu (Ef. 1:18). Boiti di dë, u ta ’si Gadu’ te u ta si fa a ta heepi u a di libi (Jöpu 42:5). Wan woto soni di u sa „si” nasö di u sa buta pakisei nëën, da dee waiti soni di Jehovah paamusi u taa a o du da dee sëmbë dee dë limbolimbo nëën wojo, söseei dee ta dini ën ku hii de hati. w18.09 bld. 18 pal. 13; bld. 19 pal. 15-16

Te u ta du di soni di u sabi taa bunu, nöö woo ko köni, nöö Jehovah seei o mbei u feni gaan bunu. Hii fa wan sëmbë musu sabi soni ufö a sa du soni ku köni, ma tökuseei na fusutan nöö u musu ta fusutan soni. Te wan sëmbë ta du soni ku köni, nöö a ta dë u si a dee soni dee a ta du. Dee hansi seei ta du soni ku köni, u di de ta buta njanjan a wan së u de sa feni bakaten (Nöng. 30:24, 25). Di Bëibel ta taki taa a Keesitu u „ta si fa Gadu . . . köni tjika”. Hii juu Keesitu ta du soni di ta kai ku hën Tata (1 Kol. 1:24; Joh. 8:29). Gadu o paka u te u ta du soni di ta kai ku ën, söseei te u ta lei taa u abi sakafasi (Mat. 7:21-23). Fëën mbei i musu ta mbei taanga möiti sö taa di kemeente sa dë wan kamian ka sëmbë sa ta dini Jehovah ku sakafasi. A ta tei ten fuu sa du soni di ta kai ku Gadu, söseei u musu abi pasensi tu. Ma te u ta du di soni aki, nöö u ta lei taa u abi sakafasi, nöö te u ko abi sakafasi, nöö woo ta dë waiwai u teego. w18.09 bld. 7 pal. 18

Di Jehovah mbei libisëmbë te a kaba, hën a bi kë u de wooko makandi ku ën. Hii fa hii u tuu ko dë zöndu libisëmbë, tökuseei u sa ta wooko makandi ku Jehovah hii daka. U „ta wooko makandi” ku Gadu te u ta paaja di bunu buka u di Könuköndë, söseei te u ta heepi sëmbë u de ko dë bakama u Keesitu (1 Kol. 3:5-9). U ta tei ën u bigi seei taa di makiti Gadu di mbei hii soni, tei u fuu du sö wan gaan wooko dëën! Ma boiti di peleiki di u ta peleiki, u ta wooko makandi ku Jehovah a woto fasi tu. Wantu woto fasi fa u sa wooko makandi ku Jehovah da te u ta heepi dee famii fuu ku dee sëmbë a di kemeente, te u ta tei wotowan ku wai a wosu, te u nango heepi te di ölganisaasi ta du wan wooko a wan kamian, söseei te u ta mbei möiti u du möön soni a di dini di u ta dini Jehovah (Kol. 3:23). Ma u musu hoi a pakisei taa sëmbë ku sëmbë ta tooka. Wa abi di wan jaa, wa abi di wan seei köni u du soni, soni an dë di wan seei fasi da hii u tuu, söseei so fuu ta dë ku suwaki. Fëën mbei ja musu ta tei dee soni dee wotowan ta du da Jehovah, maaka ku dee i ta du dëën. w18.08 bld. 21 pal. 1-2

Jehovah bi piki Habaki taa a o du wan soni. An bi o tei longi möön ufö Habaki kumutu a di fuka di a bi dë basu. A bi dë kuma Jehovah bi ta piki di tjabukama taa: „Hoi pasensi, nöö buta futoou a mi. Mi o piki di begi fii aluwasi a sa djei kuma a ta tei longi.” Jehovah bi toona mëni Habaki taa a bi buta kaa na un ten a bi o du dee soni dee a bi paamusi ën. Fëën mbei a bi da Habaki taanga faa wakiti ën ku pasensi, u di te u kaba fëën, Habaki bi o ta wai. Useei musu ta wakiti Jehovah faa du wan soni. U musu ta piki hën buka tu. Te u ta du di soni aki, nöö woo ta futoou ën, söseei woo feni kötöhati aluwasi un pei fuka ta miti u. Jesosi bi taki taa wa musu ta booko u hedi poi fuu ko sabi „di daka ku di juu” di Jehovah o du dee soni dee a paamusi u (Tjab. 1:7). U musu abi di futoou taa Jehovah sabi andi da di möön bunu ten u du wan soni. Fëën mbei u musu hoi dou, u musu abi sakafasi, u musu abi pasensi, söseei u musu buta futoou a Gadu. Hii fa u ta wakiti Jehovah, u musu wooko ku di ten fuu a wan köni fasi, söseei u musu dini Jehovah ku hii u hati.​—Maik. 13:35-37; Gal. 6:9. w18.11 bld. 18-19 pal. 13-14

Sensi di Petuisi bi dë miii, hën de ta lei ën taa woto köndë sëmbë an dë limbolimbo a Gadu wojo. Ma wantu soni bi pasa di bi mbei a ko ta pakisei woto fasi (Tjab. 10:9-16). Leti kuma Petuisi, u musu ta öndösuku useei, nöö u musu mbei sëmbë heepi u fuu si ee wa ta kuutu sëmbë ku dee soni dee u ta si. Andi u sa du jeti? Ee u ta „jabi hati fuu” da wotowan, nöö wa o ta kuutu de a dee soni dee u ta si, ma woo lei taa u lobi de (2 Kol. 6:11-13). Sëmbë di i ku de dë u di wan föluku, nasö u di wan köndë, nasö di i ku de ta fan di wan töngö, nöö i ta kë hulu ö? Ee sö a dë, nöö mbei möiti fii ta hulu woto sëmbë tu. I sa hakisi baaa ku sisa u peipei föluku u wooko makandi ku i a di peleikiwooko. Nasö i sa kai de ko a i pisi fuun njan wan soni makandi, nasö fuun du wan soni makandi (Tjab. 16:14, 15). Te fii kë mëni, nöö joo ko lobi dee baaa ku dee sisa fii sö tee taa ja o ta kuutu de möön. w18.08 bld. 10 pal. 3; bld. 11 pal. 6-7

So Kotoigi ta du soni, di ta mbei sëmbë an sa ta si möön taa de tooka ku dee sëmbë u di goonliba aki. A bi pasa taa so Kotoigi an bi baja a wan fasi di fiti di de bi go a wan piizii, söseei de an bi tja deseei a wan fasi di fiti. Wotowan bi buta footoo u de a Internet, söseei de bi sikifi soni di bi ta lei taa de ta si soni kuma dee sëmbë u di goonliba aki. Di soni aki sa mbei a taanga da dee baaa ku dee sisa u de u de hoi deseei a Gadu, hii fa de ta mbei möiti u de an du soni kuma dee sëmbë u di goonliba aki (1 Pet. 2:11, 12). Dee soni u di goonliba aki mbei a sö wan fasi taa de ta mbei sëmbë ta buta pakisei a „dee taku kë u libisëmbë hati”, de ta mbei sëmbë ko abi „langawojo”, söseei de ta mbei sëmbë ko abi ’gaanfasi’ u di de abi gudu (1 Joh. 2:16). Wa dë kuma dee sëmbë aki, u di u dë sëmbë u Jehovah. U musu ’kaba ku dee libi Gadu an lobi’, söseei u musu „kaba ku dee soni dee sëmbë u di goonliba aki ta hangi u de feni”. Boiti di dë, u musu „ta hoi u seei fu wa du soni di an fiti. U musu libi lesipeki fasi kumafa Masa Gadu kë fuu libi, hii fa u ta libi a di hogi ten u dë aki” (Tit. 2:12). Di fasi fa u ta libi musu ta lei gbelingbelin taa u da sëmbë u Jehovah. Hën da sëmbë musu ta si a di fasi fa u ta fan, a di fasi fa u ta njan ta bebe, ta bisi soni, söseei a di fasi fa u ta wooko, taa u da sëmbë u Jehovah tuutuu. w18.07 bld. 23-24 pal. 2

Ee u ta buta pakisei fuu a Jehovah, nöö soni an o mbei u ku ën poi, söseei hati fuu an o ta boonu ku dee soni dee wotowan ta du. Di soni aki dë fanöudu seei, möönmöön ee u abi faantiwöutu a di ölganisaasi u Gadu, leti kuma Mosesi. A dë sö tuu taa hiniwan fuu musu mbei taanga möiti fuu piki Jehovah buka, sö taa u sa fika a libi (Fil. 2:12). Ma tökuseei möön u abi faantiwöutu a di ölganisaasi u Jehovah, möön Jehovah o kë fuu du soni a wan bunu fasi (Luk. 12:48). Ma ee u lobi Jehovah tuutuu, nöö na wan soni o mbei u du soni u Jehovah an lobi u möön (Ps. 119:165; Lom. 8:37-39). U ta libi a wan ten ka soni taanga gaanfa seei. Fëën mbei u musu ta buta pakisei fuu a Jehovah hii juu, sö taa u sa ko fusutan andi a kë fuu du (Ps. 123:1). Nöiti u musu mbei dee soni dee wotowan ta du mbei u ku Jehovah poi. w18.07 bld. 14 pal. 19-20

U ta wai seei te u ta jei fa dee dinima u Gadu ta mbei libi u de dë seei gbegedee kuma wan faja limbo! A di jaa 2017, dee sëmbë u Jehovah bi lei möön leki 10.000.000 sëmbë soni u Bëibel. Milionmilion sëmbë di kë sabi möön soni u Bëibel bi ko mëni di dëdë u Jesosi ku u, nöö de bi lei soni u di lusupaima di Jehovah seeka da libisëmbë (1 Joh. 4:9). Jehovah Kotoigi dë a hii së u goonliba, nöö de ta fan peipei töngö. Ma tökuseei u ta libi makandi kuma wan famii (Ako. 7:9). Aluwasi ka u ta dë, nasö aluwasi un pei töngö u ta fan, tökuseei u sa mbei libi fuu dë „leti kuma dee teeja a liba dee ta sëndë faja ta tuwë limbo a mundu” (Fil. 2:15). Di peleikiwooko di u ta du, di libi di u ta libi makandi, ku di mbei di u ta mbei möiti fuu ta dë kabakaba hiniwan ten u wooko da Jehovah, ta tja gafa ko dëën. w18.06 bld. 21 pal. 1-3

Di fasi fa Jesosi piki dee bakama fëën ta lei taa a bi dë ta fan ku di Samalia mujëë tee taa an bi kë go njan. Gadu bi kë taa Jesosi bi musu ta du di peleikiwooko, söseei taa a bi musu ta du di kë fëën. Fëën mbei di peleiki di Jesosi bi ta peleiki da di Samalia mujëë bi dë kuma njanjan dëën (Joh. 4:31-34). Jakobosi ku Johanisi an bi fusutan di soni di Jesosi bi taki. Di Jesosi ku dee bakama fëën bi ta waka pasa a Samalia, hën de suku kamian a wan u dee pisiwata u Samalia u de duumi. Ma dee Samalia sëmbë an bi kë u de duumi dë. Jakobosi ku Johanisi hati bi boonu tee taa de bi hakisi Jesosi ee de an sa mbei faja kumutu a liba ala ko tjuma hii di köndë. Ma Jesosi bi bai de a di soni dë (Luk. 9:51-56). Kandë Jakobosi ku Johanisi hati an bi o boonu sö ee di soni aki bi pasa a di pisiwata u Galilea, ka de bi ta dë. Kandë hati u de bi boonu u di de bi ta si dee sëmbë u Samalia kuma lagilagi sëmbë. A kan taa bakaten, di Johanisi bi peleiki da dee Samalia sëmbë, nöö sen bi kisi ën, u di sömëni sëmbë bi haika di bosikopu fëën.​—Tjab. 8:14, 25. w18.06 bld. 12 pal. 12-13

U di u ta si dee soni dee sikifi a di Wöutu u Gadu kuma fanöudu soni, mbei hii juu u ta du dee soni dee sikifi a di Bëibel, nöö hii juu u ta taki soni kumafa a dë tuutuu. Saatan ta wooko ku mindimindi woto, u ganjan sëmbë. Te wan sëmbë ta mindi soni, nasö te wan sëmbë ta haika mindimindi woto, nöö di soni dë ta tja hogi ko dëën (Joh. 8:44). Fëën mbei hii fa u da zöndu libisëmbë, tökuseei u musu ta mbei möiti fuu ta taki soni kumafa a dë tuutuu (Ef. 4:25). Di soni aki sa dë wan taanga soni seei. Wan sisa di abi 18 jaa de ta kai Abigail, bi taki taa: „So juu a sa djei kuma te i ta taki soni kumafa a dë, nöö an ta tja wini ko da i, möönmöön te i sabi taa ee i mindi soni, nöö de an o sitaafu i.” Faandi mbei u musu mbei möiti u taki soni kumafa a dë tuutuu? Wan sisa de kai Victoria, di abi 23 jaa ta taki taa: „Te i ta taki soni kumafa a dë tuutuu, söseei te i ta hopo taki da di biibi fii, nöö sëmbë sa ta du ku i. Ma hii juu i ta feni wini fëën. I ta ko abi degihati, i ta fii taa i ku Jehovah ko dë möön gaan mati, söseei dee sëmbë dee lobi i o ta lesipeki i.” I ta si faandi mbei hii juu u musu ta bisi di „banti” di Gadu ta da u fuu tai a u mindi ö? w18.05 bld. 22 pal. 3, 5

Daka fu daka soni ta ko möön hogi a di goonliba aki. Ma u sabi taa di kaba o dou a di juu di Jehovah buta (Mat. 24:42-44). Ma u di di ten dë an dou jeti, mbei u musu ta hoi pasensi ta wakiti ën, söseei u musu ta buta pakisei a di ten di ta ko. I musu ta lesi di Bëibel hiniwan daka, söseei ja musu disa u begi Jehovah (1 Pet. 4:7). I sa ta lei soni a dee baaa ku dee sisa dee ta dini Jehovah sömëni jaa kaa. Hii juu i musu ta abi soni ta du a di dini di u ta dini Jehovah. Du soni da dee baaa ku dee sisa fii u lei de taa i lobi de, söseei i musu ta tei ten fii ta dë ku de. Te i ta du sö, nöö joo ta dë waiwai, söseei joo ta si kuma di ten ta pasa hesihesi seei (Ef. 5:16). Hii fa u ta mbei sömëni föutu, tökuseei Jehovah ta da u pasi fuu ta dini ën jeti. A buta gaanwomi a dee kemeente u de sa heepi u (Ef. 4:8, 11, 12). Fëën mbei te dee gaanwomi ko luku i, nöö tei di ten dë fii sa lei wan soni a di köni di de abi, söseei a dee lai di de ta da i. w18.06 bld. 24-26 pal. 15-18

Jesosi bi piki dee bakama fëën taa de musu ’fika namanama ku ën nöö de o ta si di lobi fëën nöömö’. Faandi mbei Jesosi bi taki di soni aki? Wë a bi sabi taa a bi o dë fanöudu u dee bakama fëën hoi dou ee de bi kë ta libi kuma tuutuu bakama fëën. Te u lesi Johanisi 15:4-10, nöö u ta si taa Jesosi bi piki dee bakama fëën sömëni pasi taa de bi musu „fika namanama” ku ën, u di a bi kë heepi de u de ko fusutan taa a bi o dë fanöudu u de hoi dou. Unfa u sa lei taa u kë u Keesitu ta lobi u nöömö, söseei taa u kë faa feni u bunu? Wë u sa du di soni aki te u ta piki hën buka a soni. Jesosi kë fuu djeesi ën. A bi taki taa: „Mi ta si di lobi u mi Tata, fu di mi ta piki hën buka a dee soni a ta manda mi.” Jesosi bi lei u unfa u sa ta djeesi ën (Joh. 13:15). Te u ta du di peleikiwooko kumafa Jesosi manda u, nöö u ta lei tu taa u lobi Jehovah (Mat. 17:5; Joh. 8:28). Nöö te u ta lei Jehovah ku Jesosi taa u lobi de, nöö de o ta lobi u nöömö. w18.05 bld. 10-11 pal. 5-7

Te i njönku, nöö sömëni soni ta dë ka i musu taki andi joo du. I musu taki ee na un pei siköö joo go, un wooko joo du, ku sömëni woto soni jeti. Dee soni aki dë kuma dee peipei pasi dee i ta miti te i nango a wan kamian. Ee i sabi naasë i nango, nöö joo sabi un pasi i musu tei. Sö nöö a dë tu taa ee i sabi un maaka i kë dou, nöö an o taanga da i fii sabi andi ku andi i musu du. Ee fuukufuuku kaa i buta bumbuu maaka da iseei, nöö joo feni wini fëën möön hesi tu. Dusudusu njönkuwan dë a hii së u goonliba di ta dini Gadu ku hii de hati, nöö de fiti u kisi gafa. Di dë di de ku Jehovah musu dë mati, ku dee maaka di de kë dou a di dini di de ta dini Jehovah, da dee möön fanöudu soni da de. Dee njönkuwan aki ta wai seei, nöö a di wan seei ten de ta lei u du hii soni di Jehovah kë taa de musu du aluwasi ee a nama ku di wosudendu libi. Salumon bi taki taa: „Buta futoou a Jehovah ku hii i hati.” Hën a taki go dou taa: „A hii dee pasi dee i ta waka i musu ta mëni ën, nöö hënseei o leti i buta a pasi” (Nöng. 3:5, 6). Un dee njönkuwan, Jehovah lobi unu gaanfa seei! Un dë kuma gaan dii soni dëën, nöö a o tjubi unu, a o tii unu, söseei a o mbei un feni gaan bunu. w18.04 bld. 28 pal. 7; bld. 29 pal. 9

Apösutu Johanisi bi dë wan u dee baaa di bi ta tei fesi a di kemeente u dee fesiten Keesitu sëmbë. A bi sikifi soni di ta taki u di libi u Jesosi di a bi dë a goonliba aki. Di Bëibel buku Johanisi bi da Keesitu sëmbë taanga höndöhöndö jaa longi, nöö a ta da u taanga a di ten aki jeti. A di buku Johanisi nöö u ta lesi taa Jesosi bi taki taa sëmbë bi o sabi dee tuutuu bakama fëën, a di lobi di de bi o ta lobi de na de (Joh. 13:35). U ta lei sömëni soni a dee dii biifi di Johanisi bi sikifi. Te u ta fii bookosaka u di u bi mbei wan föutu, nöö u ta fii bunu te u ta lesi taa di lusupaima u Jesosi ta „puu dee hogilibi fuu tuu a u hati fuu ta dë limbolimbo” (1 Joh. 1:7). Ma ee háti fuu ta fon u jeti, nöö u sa feni kötöhati te u ta lesi taa „Gadu hei möön libisëmbë hati. A sabi hii soni” (1 Joh. 3:20). Johanisi da di wan kodo sëmbë di sikifi a Bëibel taa „Gadu, hën hatiböö da lobi” (1 Joh. 4:8, 16). Di u tu ku di u dii biifi di Johanisi bi sikifi bi gafa dee Keesitu sëmbë dee ta „piki di lei u Masa Gadu”.​—2 Joh. 4; 3 Joh. 3, 4. w18.04 bld. 18-19 pal. 14-15