Bakajailiba

Te di Bëibel ta taki u „letilibi”, nöö möön gaanfa a kë taki taa u musu du di soni di Gadu taki taa bunu, söseei u musu ta libi a wan leti fasi ku hii sëmbë. Pakisei unfa dee soni dee Jesosi bi ta du, bi ta lei taa a ta libi a wan leti fasi. Di Jesosi bi dë a goonliba aki, nöö dee hedima u dee Dju keiki bi ta buuse sëmbë di an bi dë Dju, de bi ta buuse dee Dju dee an bi go a dee siköö u dee Dju, söseei de an bi ta lesipeki mujëë sëmbë. Ma Jesosi hën a bi ta libi a wan leti fasi ku hii sëmbë. A bi mbei sëmbë ko dë bakama fëën, hii fa de an bi dë Dju (Mat. 8:5-10, 13). A bi ta peleiki da hii sëmbë, aluwasi wan sëmbë bi gudu, nasö aluwasi a bi pooti (Mat. 11:5; Luk. 19:2, 9). Jesosi an bi ta fan goofu ku mujëë sëmbë, söseei an bi ta libi hogi ku de. Ma a bi ta lesipeki hii mujëë sëmbë, te ku dee mujëë dee sëmbë bi ta si kuma sösö sëmbë (Luk. 7:37-39, 44-50). U sa djeesi Jesosi te u ta libi a wan leti fasi ku wotowan, söseei te u ta peleiki da hii sëmbë di kë haika, aluwasi de gudu, aluwasi de pooti, nasö aluwasi na un keiki de nango. Te dee womi sëmbë dee dë Keesitu sëmbë ta lesipeki mujëë sëmbë, hën da de ta djeesi Jesosi. w19.05 bld. 2 pal. 1; bld. 5 pal. 15-17

Wë sö nöö dee gaanwomi a di ten aki seei sa fan a wan sutifasi te de o wooko ku di Bëibel u da wan sëmbë kötöhati. Dee gaanwomi wanwan nöö sa da dee sëmbë di wotowan bi du hogihogi ku de, kötöhati ö? Wë, nönö. Hii u tuu abi di faantiwöutu u ’da useei taanga’ (1 Tes. 4:18). Wan sisa di taanga a di biibi sa möön heepi dee sisa dee abi kötöhati fanöudu. Wë u ta fusutan faandi mbei Jehovah bi tei hënseei maaka ku wan mama di ta kötö di womi mii fëën hati (Jes. 66:13). Di Bëibel ta taki soni u mujëë sëmbë di bi ta da wotowan kötöhati te de bi dë ku fuka (Jöpu 42:11). Jehovah ta wai seei te a ta si unfa dee sisa a di ten aki ta da woto sisa kötöhati te de dë ku fuka! So juu wan nasö tu gaanwomi sa hakisi wan sisa di taanga a di biibi faa heepi wan woto sisa di sëmbë bi du hogihogi ku ën a piki mii ten fëën. Wë te u ta mbei möiti u heepi wan baaa nasö wan sisa, nöö u musu köni be wa duwengi ën faa piki u soni di an kë piki u.​—1 Tes. 4:11. w19.05 bld. 16-17 pal. 10-12

Faandi mbei dee gaanwomi musu jei a tu sëmbë, nasö a möön leki tu sëmbë ufö de sa taki taa wan sëmbë du wan gaan zöndu? Wë u di te sëmbë kuutu soni a di lö fasi aki, nëën ufö di Bëibel ta taki taa di soni kuutu a wan leti fasi. Te wan sëmbë du wan gaan zöndu, ma an piki taa sö a du tuutuu, nöö tu sëmbë musu piki taa a du ën tuutuu ufö dee gaanwomi o sa hoi wan kuutu komite u di taki dë (Deto. 19:15; 1 Tim. 5:19). Dee gaanwomi ta hakisi di sëmbë fosu, ee a du di zöndu tuutuu. Ee di sëmbë taki taa an du ën, nöö dee gaanwomi nango hakisi woto sëmbë di sa sabi soni u di woto. Ee tu sëmbë, nasö möön leki tu sëmbë taki taa wan sëmbë du hogihogi ku wan mii, nöö a tjika u dee baaa hoi wan kuutu komite u di taki dë. Aluwasi wan kodo sëmbë nöö taki taa wan sëmbë du hogihogi ku piki mii, tökuseei di soni dë an kë taki taa di sëmbë dë ta mindi soni. Ee tu sëmbë an dë u taki ee wan sëmbë du hogihogi ku wan mii, tökuseei dee gaanwomi ta fusutan taa a sa dë sö taa di sëmbë du wan hogi soni. Dee gaanwomi o ta da dee sëmbë di di soni aki hati, kötöhati, söseei de o ta heepi de. De o ta buta pakisei tu a di fasi fa de sa tjubi di kemeente u sëmbë an sa du hogihogi ku dee mii.​—Tjab. 20:28. w19.05 bld. 11 pal. 15-16

Ma tökuseei wan soni di dë fanöudu tu, hën da de musu lei dee mii u de u de ko sabi unfa deseei musu ta lei soni u Bëibel. Dee mii musu sa’ u seeka deseei da komakandi, söseei de musu sa öndösuku soni a dee buku fuu, u de sa piki te de hakisi de wan soni a siköö (Heb. 5:14). Ee dee mii ta lei soni u Bëibel te de dë a wosu, nöö de o sa möön fusutan dee soni di de ta jei a dee komakandi, dee keling-komakandi, ku dee könklësi. Ma dee mama ku dee tata musu luku un longi de o ta lei dee mii u de soni u Bëibel, u di de musu hoi di jaa u di mii u de a pakisei, söseei de musu luku unfa di mii dë tu. Dee sëmbë dee u ta lei soni u Bëibel seei musu ko sabi unfa de musu ta lei soni u Bëibel de wanwan tu. Te u bigi lei de soni u Bëibel, nöö u ta wai kaa te de ta maaka dee piki u di buku di u ku de ta lei soni u Bëibel, söseei u ta wai kaa te de ta maaka dee piki u dee soni dee woo luku a komakandi. Ma u musu lei de unfa de sa öndösuku soni deseei, söseei u musu lei de unfa de sa ta lei soni u Bëibel te de dë de wanwan. Te i lei de sö kaa, nöö te de abi wan bookohedi, de o ko sabi unfa de sa öndösuku soni a dee buku fuu, u de sa sabi andi de musu du. w19.05 bld. 26 pal. 2; bld. 28 pal. 10-11

Saatan ta mbei hii möiti faa tooka di fasi fa u ta pakisei. A ta wooko ku hii pei soni u mbei wa du dee soni dee sikifi a di Wöutu u Gadu. Saatan ta hakisi di wan seei soni di a bi hakisi Eva kaa, di a bi dë a di djai u Eden. A bi hakisi Eva taa: „Mujëë o, a dë sö tuutuu taa Gadu taa.  . .  ?” (Ken. 3:1) A di goonliba u Saatan aki, sëmbë lo’ u taki taa: ’A dë sö tuutuu taa Gadu an lobi te womi ku womi, nasö mujëë ku mujëë ta libi ku deseei ö? A dë sö tuutuu taa Gadu an kë fii ta hoi bëdaki, ku fujai daka u? A dë sö tuutuu taa Gadu an kë fii tei buuu ö? A dë sö tuutuu taa Gadu an kë fii hulu dee sëmbë di de puu a di kemeente u?’ U musu dë seiki u dee soni dee u ta biibi. Ee wa ta suku fuu feni di piki u soni di wa ta kaba fusutan, nöö a sa pasa taa u ko ta si kuma dee soni dë an dë sö tuutuu. Te u kaba fëën u sa ko ta si soni woto fasi, nöö a sa pasa taa wa ko ta biibi dee soni dee u ta lei möön. w19.06 bld. 12-13 pal. 15-17

Na piki lobi Jehovah lobi u (Joh 3:16). U kë djeesi di lobihati Tata fuu Jehovah fëën mbei u ta mbei möiti fuu ta fii ku dee wotowan fuu ta lobi useei kuma baaa ku baaa, ta abi tjalihati da u na u’, möön gaanfa ku dee sëmbë dee ta biibi Masa kuma useei (Gal. 6:10). Te fuka ta miti dee sëmbë u ku de dë a di famii u Jehovah, nöö u ta kë heepi. Unfa i sa da wan sëmbë kötöhati te hën manu nasö hën mujëë lasi libi? Di fosu soni di i sa du, hën da i sa fan ku di sëmbë, hii fa a sa dë taa ja kaba sabi andi i musu taki. Paula, di manu fëën dëdë vau sö, bi taki tu taa: „Sëmbë an ta sabi andi de musu du, te de jei taa wan sëmbë u wan sëmbë lasi libi. De ta fëëë taa te de o go a di sëmbë, nöö kandë de o taki wan soni di o sa hati di sëmbë. Ma a ta möön hogi te sëmbë an feni wan soni taki da di sëmbë seei.” Wan sëmbë di ta tjali, an ta suku fuu taki wan apaiti soni dëën. Paula bi taki taa: „Mi bi ta tei ën u bigi seei te dee mati u mi bi ta piki mi taa: ’A ta hati mi seei taa di sëmbë fii dëdë.’” w19.06 bld. 20 pal. 1; bld. 23 pal. 14

Ee de tapa di wooko fuu, nöö dee gaanwomi o seti soni fii sa nango a dee komakandi a wan fasi di an o mbei dee felantima fuu buta pakisei a u. Dee gaanwomi sa piki i fii ta ko makandi ku wotowan a wan piki kulupu, nöö kandë hii juu de o ta tooka di juu ku di kamian ka woo ta ko makandi. Na a hii köndë woo ta du di peleikiwooko a di wan fasi. Ma u di u lobi Jehovah, söseei u di u ta wai te u ta konda soni u di Könuköndë fëën da wotowan, mbei woo feni wan fasi fuu sa ta peleiki (Luk. 8:1). Wan sëmbë di bi ta sikifi soni fu awooten, de ta kai Emily B. Baran, bi taki wan soni u dee Jehovah Kotoigi a Sovyet-Unie. A bi taki taa: „Di lanti u di köndë bi piki dee Kotoigi taa de an musu ta peleiki möön, hën de bi ta peleiki da dee sëmbë dee bi ta libi a de bandja, dee sëmbë di de ku de bi ta wooko a di wan kamian, ku dee mati u de. Di lanti bi ko söötö de u di soni aki hedi, hën de bi bigi ta peleiki da dee sëmbë di de ku de bi dë a dunguwosu.” Hii fa de bi tapa di wooko fuu, tökuseei dee baaa ku dee sisa fuu, an bi disa di peleiki di de bi ta peleiki. Nöö i sa djeesi dee baaa ku dee sisa aki a di fasi fa de bi peleiki go dou! w19.07 bld. 11 pal. 12-13

Unfa u sa heepi dee sëmbë dee an nango a keiki u de ko lobi Gadu, söseei u de ko dë bakama u Keesitu? Wë u musu hoi a pakisei taa di kamian ka de kiija wan sëmbë sa mbei a kë haika di bosikopu di u ta tja nasö a sa mbei an haikëën. Sëmbë u Europa ku sëmbë u Asia an ta si di bosikopu di u ta tja a di wan seei fasi. Faandi mbei u taki sö? Wë u di sömëni sëmbë u Europa sabi wantu soni u Bëibel, nöö de sabi taa Gadu hën mbei hii soni. Ma gaansë sëmbë u Asia an sabi soni u Bëibel wan bëtë. So u de an sabi soni u Bëibel seei, nöö kandë de an ta pena biibi taa wan sëmbë dë di mbei hii soni. Fëën mbei i musu ta si taa di sëmbë o sa tooka. Hiniwan jaa sëmbë di an bi nango a keiki, ta ko toon Jehovah Kotoigi. Sömëni u dee sëmbë aki bi ta mbei möiti kaa u de libi bunu, nöö fëën mbei de bi ta buuse di bödjëë fasi fa so keiki ta du soni. Ma so u de bi ta libi u de nöö, söseei de bi abi guwenti di an bi bunu. U sa dë seiki taa Jehovah o heepi u fuu feni „dee sëmbë dee a kai da u de feni di libi u teego”.​—Tjab. 13:48; 1 Tim. 2:3, 4. w19.07 bld. 20-21 pal. 3-4

Aluwasi woo go libi u teego a liba ala, nasö aluwasi woo libi u teego a wan paladëisi a goonliba aki, tökuseei u musu hoi dou. Aluwasi andi ta miti u, wa musu toona ta pakisei dee soni dee u bi disa a di ten di pasa, söseei wa musu mbei soni puu u pakisei fu wa dini Jehovah möön (Fil. 3:16). Kandë a ta djei kuma u musu wakiti longi seei u Jehovah du dee soni dee a paamusi u, nasö kandë u ta ko gaandi, nasö u ta ko suwaki. Kandë sëmbë ta du ku u, nöö u ta hoi dou sömëni jaa longi kaa. Ma aluwasi andi ta pasa, ’wa musu booko u hedi ku na wan soni’. Ma u musu ta begi Gadu ta konda hii dee fuka fuu dëën, nöö a o da u di kötöhati di bigi pasa hii sëmbë fusutan (Fil. 4:6, 7). Leti kumafa wan sëmbë di ta kule wan fia kule ta biinga faa dou ka a musu dou, sö nöö useei musu ta buta pakisei fuu a di kule di u musu kule fuu feni libi. Boo ta du di soni aki ka u sa du ën dou. w19.08 bld. 7 pal. 16-17

Kandë wa ta sabi andi u musu taki da wan sëmbë di ta tjali gaanfa u di wan sëmbë fëën dëdë. Ma te di sëmbë si taa u ta këë, nöö a ta fii taa u ta booko u hedi ku ën. Di di mati u Jesosi de kai Lazalosi bi dëdë, hën Malia, Maita, ku wanlö woto sëmbë bi ta këë. Di Jesosi bi ko dou ko si fa dee sëmbë ta këë, hën ’wata pasa nëën wojo’ tu, hii fa a bi sabi taa a bi o weki Lazalosi ko a libi baka (Joh. 11:17, 33-35). Di këë di Jesosi bi këë bi ta lei unfa Jehovah bi fii di Lazalosi bi dëdë. Di soni dë bi mbei dee sëmbë u Lazalosi ko si taa Jesosi bi lobi de tuutuu, nöö di soni dë bi musu u da Malia ku Maita kötöhati seei. A di wan seei fasi, te dee baaa ku dee sisa fuu ta fii taa u lobi de, söseei taa u ta booko u hedi ku de, nöö de an ta fii kuma de dë de wanwan, ma de ta fii taa de abi mati di ta booko de hedi ku de. So juu haika nöö u musu ta haika bunu te a ta fan. U musu dëën pasi faa taki unfa a ta fii tuutuu, söseei wa musu tei ën u hogi ee a taki so soni di an kai ku u (Jöpu 6:2, 3). Kandë soni ta hebi dëën tuutuu u di dee famii fëën dee an ta dini Jehovah ta duwengi faa du so soni. Fëën mbei a bi o bunu fii begi ku ën. Hakisi „di Sëmbë di ta haika begi” faa dëën kaakiti, söseei faa dëën kötöhati.​—Ps. 65:2. w19.04 bld. 18-19 pal. 18-19

Te u ta du di peleikiwooko nasö te u ta wooko a Bëtëli, nöö u ta ko lobi dee sëmbë dee u ta peleiki da gaanfa seei, söseei u ta ko lobi di kamian ka u ta du di wooko fuu gaanfa tu. Fëën mbei ee a ko dë taa u musu disa di wooko di u ta du, nöö a ta hati u gaanfa seei. Wan soni di ta mbei a ta hati u tu, hën da u di u ta hangi dee baaa ku dee sisa u di kamian dë, nöö u ta booko u hedi ku de tu, möönmöön ee u bi musu foloisi kumutu dë, u di sëmbë bi ta du ku u a di köndë (Mat. 10:23; 2 Kol. 11:28, 29). A sa ta taanga da u fuu go libi a wan woto kamian, u di u musu ko guwenti soni u di kamian ka woo go dë. A sa ta taanga da u tu te u musu toona go a di köndë ka de kiija u. Te so baaa ku sisa an dë a di hii-ten diniwooko möön, nöö a sa pasa taa soni ko taanga da de a di së u möni soni. Di soni dë sa mbei de fii bookosaka. Andi sa heepi de? Mbei möiti fii ku Jehovah sa dë gaan mati go dou (Jak. 4:8). Unfa u sa du di soni aki? U sa du di soni aki, te u ta biibi taa hën da „di Sëmbë di ta haika begi” (Ps. 65:2). Jehovah sa du soni da u „gaanfa möön leki fa u ta begi ën. A sa du soni pasa ka pakisei fuu sa dou seei” (Ef. 3:20). Na dee soni dee u ta hakisi Jehovah nöö a ta da u. A sa heepi u ku wan fuka fuu a wan fasi di wa bi pena mëni seei. w19.08 bld. 21 pal. 5-6

So sëmbë taki kaa taa Amagedon da wan gaan feti ka sëmbë o feti ku wanlö kofaliki bömu, nasö taa a dë wan ten ka soni kuma gaan wata nasö gaan ventu o ko poi hii soni a goonliba. Wë di Bëibel ta taki taa Amagedon o tja wini ko da u! (Ako. 1:3) Di feti u Amagedon an o kii libisëmbë kaba, ma a o tjubi libisëmbë! Na un fasi? U di a o puu di tii di libisëmbë ta tii. Di feti dë o puu dee hogihati sëmbë, nöö a o mbei dee bunuhati sëmbë fika a libi. Söseei di feti dë o tjubi libisëmbë, u di a di feti dë Gadu o kii dee sëmbë dee ta poi di goonliba (Ako. 11:18). Wan pasi nöö di wöutu Amagedon dë sikifisikifi a di Bëibel, nöö de puu di wöutu aki a wan Hebelejën wöutu di kë taki „di kuun u Mëgido” (Ako. 16:16). Mëgido bi dë wan foto na awooten Isaëli (Jos. 17:11). Ma Amagedon an dë wan tuutuu kamian a goonliba aki. Ma a dë di pisiten di „dee könu” u goonliba o ko makandi u de hopo fia ku Jehovah.​—Ako. 16:14. w19.09 bld. 8 pal. 1-3

Di mujëë bi abi heepi fanöudu gaanfa seei. A bi go a sömëni data, u di a bi ta si kuma de bi o kulëën. Baka 12 jaa seei di mujëë aki an bi feni heepi möönsö. Di wëti di Jehovah bi da Mosesi bi ta lei taa sö wan mujëë an bi dë limbolimbo (Leif. 15:25). Di mujëë bi ko jei taa Jesosi sa kula sëmbë di bi dë ku suwaki. Fëën mbei a bi go suku Jesosi baka. Di a feni ën, hën a panjan dee jëkëjëkë u di koosu u Jesosi, nöö hën wantewante dë a ko bëtë! Ma na kula nöö Jesosi bi kula di mujëë, ma a bi hei ën tu, u di a bi lei ën taa a ta lesipeki ën, söseei taa a lobi ën. A bi lei taa a ta lesipeki ën u di a kai ën „mma o”. A musu u dë sö taa di mujëë aki bi feni taanga! (Luk. 8:44-48, NW). Buta pakisei a di soni aki. Di mujëë bi go a Jesosi. Hënseei bi mbei möiti faa go miti Jesosi. Wë sö nöö a dë a di ten fuu aki tu, taa u musu mbei möiti fuu go a Jesosi. Ma a di ten aki, Jesosi an o kula u a wan foombo fasi te u ko nëën. Ma tökuseei a ta piki u taa: ’Ko a mi, . . . nöö mi o mbei i ko dë bööböö.’​—Mat. 11:28. w19.09 bld. 20 pal. 2-3

Di tjabukama de kai Sakalia bi sikifi sö wan soni a fesi tu. A bi taki taa: „A di ten dë, nöö teni womi o kumutu a hii dee peipei nasiön, di ta fan peipei töngö, nöö de o kisi wan Dju panjan hoi nëën koosu, nöö de o taki taa: ’U kë go ku unu, biga u jei taa Gadu dë ku unu’” (Sak. 8:23). Dee Jehovah Kotoigi ta fusutan taa ee sëmbë musu ko makandi di ta fan peipei töngö, hën da de musu paaja di bunu buka a peipei töngö tu. Nöunöu u ta puu buku ko a höndöhöndö woto töngö, nöö sëmbë an bi du sö wan gaan wooko jeti. Wë u sa taki taa wan foombo soni Jehovah ta du a di ten aki u tja dee „gaan hia sëmbë” di kumutu a peipei nasiön ko a wan. U di di Bëibel ku dee woto buku dee ta taki soni u Bëibel bi puu ko a sömëni töngö, mbei dee „gaan hia sëmbë” sa ta dini Jehovah makandi kuma wan famii, hii fa de kumutu a peipei kamian u goonliba. Boiti di dë, sëmbë sabi dee sëmbë u Jehovah kuma sëmbë di ta peleiki fajafaja, söseei de sabi de kuma sëmbë di lobi wotowan. Di soni aki ta mbei di biibi fuu ko taanga!​—Mat. 24:14; Joh. 13:35. w19.09 bld. 30-31 pal. 16-17

A di pisiten u di gaan fuka, a o bigi da sëmbë te de o ta si unfa hii soni u di goonliba u Saatan aki ta poi kaba a sösö. De an o saandi u de du, u di de o ta fëëë taa de o dëdë a di ten dë (Sef. 1:14, 15). A di ten dë, di libi o ko möön taanga da hii sëmbë, te kisi dee sëmbë u Jehovah tu. U di wa dë ku dee sëmbë u di goonliba aki a wan së, mbei soni o sa taanga da u. Kandë wa o sa ta feni so soni di u abi fanöudu. „Di köni saafu di dë u futoou” ta seeka u fuu sa hoi useei a Jehovah a di pisiten u di gaan fuka (Mat. 24:45, NW). De ta du di soni aki a peipei fasi. Ma wan u dee fasi fa de bi du ën, hën da de bi lei u wanlö soni a dee könklësi u dee jaa 2016, 2017, ku 2018. Dee taki di de bi hoi a dee könklësi aki, bi heepi u fuu sa ko möön abi dee fasi dee u abi fanöudu, möönmöön fa di daka u Jehovah ta zuntu aki. w19.10 bld. 14 pal. 2; bld. 16 pal. 10; bld. 17 pal. 12

Ma te u guli di njanjan kaa, nöö wa sa taki möön unfa di njanjan musu du ku u a u sinkii dendu. Te u ta njan bumbuu soni, nöö di soni dë sa mbei u ko dë möön gösöntu. Ma te u ta njan soni di an bunu, nöö di soni dë o mbei u ko suwaki. Kandë wa o si di soni dë wantewante, ma baka wan pisiten, nöö woo si ën. Wë sö nöö a dë taa te woo mbei piizii, nöö u sa luku andi woo buta go a u hati. Ma te di soni go a u hati kaa, nöö di soni di u bi tei u mbei piizii o wooko a di fasi fa u ta pakisei ku di fasi fa u ta fii. Te dee soni dee u ta tei u mbei piizii dë bumbuu soni, nöö de o puu u bunu. Ma te dee soni dee u ta tei u mbei piizii an bunu, nöö de o tja hogi ko da u (Jak. 1:14, 15). Ee di soni di u ta tei u mbei piizii an bunu, nöö kandë wa o si wantewante dë taa di soni dë ta tja hogi ko da u. Ma baka wan pisiten, nöö woo ko si ën. Fëën mbei di Bëibel ta taki taa: „Di soni di i paandi, hën nöö joo koti. Di sëmbë di butëën seei ta du dee hogi soni dee hën hati ta mandëën, nöö a o poi kaba a sösö u teego” (Gal. 6:7, 8). A dë fanöudu seei fu wa ta piizii ku soni di Jehovah ta buuse!​—Ps. 97:10. w19.10 bld. 30 pal. 12-14

Jehovah lei taa a lobi u, u di a manda di Womi Mii fëën ko paka paima da u (Joh. 3:16). Unfa u sa djeesi Jehovah a di lobi di a lobi sëmbë? U sa du di soni aki te u ta kai dee baaa ku dee sisa fuu gaan soni, söseei te u ta wai ku wan sëmbë di toona ko ta dini Jehovah baka (Ps. 119:176; Luk. 15:7, 10). U ta lei taa u lobi dee baaa ku dee sisa fuu te u ta tei di ten ku di kaakiti fuu u heepi de, möönmöön te de dë a fuka (1 Joh. 3:17). Jesosi bi piki dee bakama fëën taa de bi musu ta lobi wotowan kumafa a bi lobi wotowan (Joh. 13:34, 35). Di soni di Jesosi bi taki aki bi dë wan njunjun soni, u di a ta taki u wan fasi fa u musu lei taa u lobi wotowan, di an bi dë a dee wëti di Gadu bi da dee Isaëli sëmbë. Di lö lobi aki da di lobi di u musu lobi wotowan kumafa Jesosi bi lei taa a lobi wotowan. Hën da u musu lobi dee baaa ku dee sisa fuu möön fa u lobi useei. Di soni aki kë taki taa u musu lobi de sö tee taa u dë kabakaba u dëdë da de kumafa Jesosi bi du ën. w19.05 bld. 4 pal. 11-13

Ee u kë u di santa jeje heepi u, nöö u musu ta begi Jehovah nöömö faa da u ën (Luk. 11:13). Di woto di Jesosi bi konda di sikifi a Lukasi 11:5-9, ta heepi u tu fuu fusutan faandi mbei Jehovah o da u di santa jeje fëën. Di womi di Jesosi bi ta taki soni fëën bi kë sölugu di sëmbë di bi ko nëën. A bi ta fii taa a bi musu seeka soni u njan da di sëmbë di bi ko luku ën a gaan ndeti, ma an bi abi na wan soni u dëën faa njan. Jesosi bi taki taa di mati u di womi bi dëën di bëëë, u di di womi bi ta hakisi ën di bëëë nöömö. Andi Jesosi bi kë lei u ku di soni aki? Wë ee wan zöndu libisëmbë seei ta dë kabakaba u heepi di wotowan fëën u di a ta hakisi ën nöömö faa heepi ën, nöö u sa dë seiki taa di bunuhati Tata fuu di dë a liba ala, o heepi dee sëmbë dee ta hakisi ën nöömö faa da de di santa jeje fëën! Wë fëën mbei, u sa dë seiki taa te u ta begi Jehovah ta hakisi ën faa da u di santa jeje fëën, nöö a o haika di begi fuu (Ps. 10:17; 66:19). U sa dë seiki taa u sa hoi dou, hii fa Saatan ta du ku u hii juu. w19.11 bld. 13 pal. 17-19

Jesosi bi sabi taa so juu hën ku dee apösutu fëën bi musu ta böö dendu. Ma sömëni sëmbë u di ten dë, te kisi sömëni sëmbë u di ten fuu aki, dë kuma di gudu womi di Jesosi bi taki soni fëën. Di womi aki bi ta pakisei taa: „An o dë u mi wooko möön. Mi o ta njan ta bebe ta mbei piizii ta libi suti kumafa mi kë” (Luk. 12:19; 2 Tim. 3:4). A bi ta mëni taa di möön fanöudu soni a di libi da böö dendu, ku mbei piizii. Ma Jesosi ku dee apösutu fëën an bi mbei di du di de bi musu ta du soni di ta da de piizii, ko dë di möön fanöudu soni a de libi. A di ten aki u ta djeesi Jesosi u di wa ta tei di ten di wa nango a wooko, fuu böö dendu nöö a kaba, ma u ta tei di ten dë fuu peleiki da wotowan tu, söseei fuu go a dee komakandi. U ta si di mbei di u musu mbei sëmbë ko dë bakama u Keesitu kuma wan fanöudu soni, söseei u ta si di go di u musu nango a dee komakandi kuma wan fanöudu soni tu. Fëën mbei u ta mbei hii möiti fuu sa ta du dee soni aki da Jehovah (Heb. 10:24, 25). Aluwasi u dë a fakansi, tökuseei u nango a dee komakandi, söseei u ta suku okasi fuu sa ta konda soni u Bëibel da dee sëmbë dee u ta miti.​—2 Tim. 4:2. w19.12 bld. 7 pal. 16-17

Jehovah ta da u pasi fuu taki da useei unfa u kë libi. A ta lei u unfa u sa du bunu soni, söseei a ta heepi u fuu du soni di ta kai ku ën (Ps. 119:173). Te u ta wooko ku di köni u Gadu di dë u feni a di Wöutu fëën, nöö a ta heepi u fuu du bunu soni (Heb. 5:14). Aluwasi u buta taa woo du wan bunu soni seei, tökuseei a sa ta taanga da u fuu kaba di soni di u bi bigi dë. Buta pakisei a dee woto aki: Wan njönku baaa buta taa a o lesi hii di Bëibel. A lesi ën wantu wiki, ma te u kaba fëën a disa u lesi. Wan sisa buta taa a o du di kowoonu pioniliwooko, ma hiniwan juu a ta buta daka ta puu. Dee gaanwomi u wan kemeente fiti buka taa de o nango ta luku dee baaa ku dee sisa u di kemeente a de pisi möön hia, ma baka wantu liba, de an bigi seei jeti. Dee sëmbë aki tuu buta taa de o du wan soni, ma de an kaba di soni di de bi bigi ku ën. w19.11 bld. 26 pal. 1-2

Jesosi bi taki taa di ten fuu aki dë kuma „di ten u Noa”, nöö an dë u taki taa u ta libi a „wan tumisi hogi ten” (Mat. 24:37; 2 Tim. 3:1). Di soni aki mbei so sëmbë di tööu buta taa de an o pai miii a di ten aki, nöö de sa feni möön ten u du soni a di dini di de ta dini Jehovah. Womi ku mujëë di tööu, di ta luku ee de o pai miii, nasö di ta luku un mëni mii de o pai, nango „sindo pakisei te de kaba” luku ee de o sa tja di faantiwöutu dë (Luk. 14:28, 29). Wanlö mama ku tata di kiija miii ko bigi kaa, ta taki taa möni ku kaakiti, ku ten dë fanöudu u kiija miii. Fëën mbei a dë fanöudu u wan womi ku wan mujëë di tööu, hakisi deseei dee soni aki: ’U tu sëmbë tuu musu wooko fuu sa ta bai dee soni di di wosudendu fuu abi fanöudu ö? U tu sëmbë tuu ta kai a wan te a nama ku dee soni dee u ta si taa dë fanöudu da di wosudendu fuu ö? Ee u tu sëmbë musu wooko, nöö ambë o ta luku dee mii? Ambë o lei de unfa de musu ta pakisei, söseei unfa de musu ta du soni?’ Te wan womi ku wan mujëë di tööu ta taki u dee soni aki a wan lesipeki fasi, nöö de ta lei taa de ta du di soni di sikifi a di tëkisi u tide. w19.12 bld. 23 pal. 6-7

Sömëni pasi apösutu Paulosu bi sa lasi hën libi tu (2 Kol. 11:23-28). Paulosu bi hoi dou hii fa wan soni bi ’ta tjökö ën leti kuma maka’. A kan taa di soni aki bi dë wan suwaki di a bi abi (2 Kol. 12:7). Söseei Paulosu bi lasi hati di Demasi bi go disëën, u di a bi „ko lobi dee soni u goonliba aki”, hii fa a bi dë wan baaa di bi lo’ u wooko makandi ku Paulosu (2 Tim. 4:10). Paulosu bi dë wan baaa di Gadu bi salufu ku di santa jeje fëën, nöö a bi ta heepi wotowan söndö faa pakisei hënseei nöö. Ma tökuseei a bi ta fii bookosaka so juu (Lom. 9:1, 2). Paulosu bi feni di kötöhati ku di taanga di a bi abi fanöudu. Na un fasi? U dë seiki taa Jehovah bi wooko ku di santa jeje fëën u dëën taanga (2 Kol. 4:7; Fil. 4:13). Jehovah bi tei woto Keesitu sëmbë u dëën taanga tu. Paulosu bi taki taa so u dee sëmbë aki bi dëën „kötöhati seei” (Kol. 4:11, NW). So u dee sëmbë di Paulosu taki taa bi heepi ën da Alisitakusi, Tikikusi, ku Maikusi. De bi da Paulosu taanga, söseei de bi heepi ën faa hoi dou. w20.01 bld. 8 pal. 2-3

Jesosi seei bi taki taa a taanga u konda da wan sëmbë di an dë wan salufuwan, unfa a dë te de „toona pai” wan sëmbë (Joh. 3:3-8). Andi ta pasa ku wan Keesitu sëmbë te Gadu salufu ën? Ufö Jehovah salufu wan Keesitu sëmbë, nöö a ta hangi di ten ka a o libi u teego a goonliba aki. Fosufosu dee sëmbë aki bi ta wakiti di ten seei ka Jehovah o puu hogidu, nöö a mbei di goonliba toon wan paladëisi. Kandë de bi ta si kaa unfa de o wai ku dee sëmbë u de, nasö ku dee mati u de, te de o weki ko a libi baka. Ma baka di Jehovah salufu de, hën de bigi ta si soni woto fasi. Faandi mbei? Wë na pakisei dee sëmbë aki bigi pakisei taa di libi u teego a goonliba aki an o bunu tjika da de. Na u di de ta tja fuka, nasö u di de feni taa di teego libi a goonliba aki an o suti, mbei de ko ta si soni woto fasi. Ma Jehovah wooko ku di santa jeje fëën u tooka di fasi fa de bi ta si soni. w20.01 bld. 22 pal. 9-11

Di Wëti di Gadu bi da dee Isaëli sëmbë bi ta da dee kuutuma ku dee gaanwomi pasi u de kuutu soni di nama ku di dini u Gadu, söseei u de kuutu soni di an bi nama ku di dini u Gadu. Ma di wëti u Keesitu ta taki taa dee gaanwomi musu kuutu soni di nama ku di dini u Jehovah wanwan (Gal. 6:2). De sabi taa Gadu da lanti pasi u de kuutu sëmbë di du hogi. Di soni aki kë taki taa lanti sa mbei wan sëmbë paka butu, nasö de sa söötö ën u wan soni di a du (Lom. 13:2-4). Andi dee gaanwomi ta du te wan sëmbë du wan gaan zöndu? De ta tei Bëibel tëkisi u wegi soni luku u de sa sabi andi de musu du. De ta hoi a pakisei taa lobi, hën da di goonsei u di wëti u Keesitu. U di dee gaanwomi lobi dee sëmbë u di kemeente, mbei de ta hakisi deseei di soni aki: Unfa u sa heepi sëmbë a di kemeente di wotowan bi du soni ku de? Ee di sëmbë di du soni ku di wotowan, da wan sëmbë u di kemeente, nöö di lobi di dee gaanwomi lobi sëmbë, o mbei de o hakisi deseei dee soni aki: Di sëmbë ta tjali u di soni di a du ö? U sa heepi ën fu hën ku Jehovah ko dë mati baka u? w19.05 bld. 7 pal. 23-24

Jesosi bi sabi taa hën tata hën dëën libi, söseei a bi sabi taa hën ta hoi hën a libi di a bi taki di soni di sikifi a di tëkisi u tide. Jesosi bi ta futoou hën Tata ku hii hën hati, nöö Jehovah bi ta dëën dee soni dee a bi abi fanöudu faa bi sa dë a libi. Möön gaanfa Jehovah bi heepi Jesosi faa bi sa ta hoi hënseei nëën (Mat. 4:4). Jehovah ta da u dee soni dee u abi fanöudu fuu ku ën sa dë gaan mati. Jehovah ta lei u soni ku di Wöutu fëën. A ta konda soni fu hënseei da u, a ta piki u andi a abi a pakisei faa du, söseei a ta lei u faandi mbei u dë a libi, ku andi o pasa a di ten di ta ko. Jehovah bi lei u taa a ta booko hën hedi ku u. Fëën mbei a bi mbei u mama ku u tata, nasö wan woto sëmbë, lei u soni fëën. Boiti di dë, a ta heepi u fuu ku ën sa dë mati go dou, u di a ta mbei dee gaanwomi u kemeente heepi u, söseei u di a ta mbei woto baaa ku sisa di taanga a di biibi heepi u. Boiti di dë, Jehovah ta lei u soni a dee kemeente komakandi fuu, ka u ta dë makandi ku dee baaa ku dee sisa fuu. A dee lö fasi aki, Jehovah ta lei u taa hën da u Tata, söseei taa a ta booko hën hedi ku hiniwan fuu.​—Ps. 32:8. w20.02 bld. 3 pal. 8; bld. 5 pal. 13

Ee u ta haun ku wotowan, nöö wa o sa ta libi fiifii ku useei. U musu hön di soni de kai haun puu a u hati, nöö u musu ta köni fu wa du soni di o sa mbei sëmbë haun ku u. Andi u sa du u heepi wotowan u de an ko ta haun ku u, söseei andi u sa du fuu sa ta libi fiifii ku useei? Di fasi fa u ta tja useei, ku dee soni dee u ta du, sa mbei wotowan fii wan fasi. Di goonliba aki kë buta u fuu ta mbei bigi ku dee soni dee u abi (1 Joh. 2:16). Ma di soni dë ta mbei sëmbë ta haun ku wotowan. U sa köni fu wa du soni di sa mbei wotowan ko ta haun ku u. U sa du di soni aki te wa ta taki hii juu u dee soni dee u abi, söseei te wa ta taki hii juu u dee soni dee woo bai. Wan woto fasi fa u sa köni fu wa mbei wotowan ko ta haun ku u, da te u ta buta pakisei a di fasi fa u ta tja useei te u abi faantiwöutu. Ee hii juu u ta taki soni u di gaandi di u abi, nöö u sa mbei wotowan ko ta haun ku u. Ma te u ta buta pakisei a wotowan, söseei te u ta lei de taa u ta si dee soni di de ta du, nöö u ta heepi de u de dë tifeedi. Boiti di dë, woo ta da useei taanga fuu libi fiifii ku useei. w20.02 bld. 18 pal. 15-16

I sa lei soni u Jehovah a dee soni dee a mbei (Ako. 4:11). Buta pakisei a dee folo ku dee mbeti dee Jehovah mbei, nöö luku unfa dee soni dë ta lei unfa a köni tjika. Buta pakisei tu a di apaiti fasi fa Jehovah mbei di sinkii fuu (Ps. 139:14). Pakisei di kaakiti di Jehovah buta a di sonu. Nöö na di sonu wanwan dë a liba ala, milionmilion woto soni dë di Gadu mbei buta a liba ala (Jes. 40:26). Ee i ta pakisei fundu u dee soni dee Jehovah mbei, nöö a o mbei i ko ta möön lesipeki Jehovah. Ma na di sabi di joo ko sabi unfa Jehovah köni tjika, ku unfa a abi kaakiti tjika wanwan o mbei i ku ën ko dë gaan mati. Ma ee i kë ko ta lobi Jehovah möön gaanfa, nöö i musu ko sabi möön soni fëën. I musu dë seiki taa Jehovah lobi i apaiti. Hoi a pakisei taa „ee i suku ën baka, nöö a o mbei i feni ën” (1 Klon. 28:9). Jehovah „hai i ko” nëën (Jel. 31:3). Möön i ta ko fusutan hii dee soni di Jehovah du da i, möön joo ko ta lobi ën. w20.03 bld. 4 pal. 6-7

Apösutu Paulosu seei u sa ta djeesi a di fasi fa a bi ta buta di diniwooko fëën a di fosu kamian nëën libi. Di a bi dë a Kolenti a di u tu pasi di a bi go du di sëndëlengiwooko fëën, hën möni fëën bi ko ta kaba. Fëën mbei a bi bigi mbei tenti. A bi ta du di wooko aki, faa bi sa ta paaja di bunu buka da dee sëmbë a Kolenti ’söndö u tei möni a de’ (2 Kol. 11:7). Hii fa Paulosu bi musu ta wooko faa sa sölugu hënseei, tökuseei a bi ta si di diniwooko fëën kuma di möön fanöudu soni nëën libi. Fëën mbei a bi ta peleiki hiniwan Saba daka. Ma di soni bi ko tooka, nöö a bi ta du „di wooko u Masa Gadu ku telu. A [bi] ta fan ku dee Dju sëmbë nöömö taa Masa Jesosi hën da di Paamusi Könu [di] de bi ta luku” (Tjab. 18:3-5; 2 Kol. 11:9). Di siköutu bi kisi Paulosu söötö buta a Paulosu pisi a Loomë tu jaa longi, hën a bi ta peleiki da dee sëmbë dee bi ta ko luku ën, söseei a bi ta manda biifi da sëmbë (Tjab. 28:16, 30, 31). Paulosu an bi kë u na wan soni puu hën pakisei a di diniwooko fëën. w19.04 bld. 4 pal. 9