Bakajailiba

Mbei möiti fii ko sabi dee baaa ku dee sisa fii möön bunu. Fan ku de ufö di komakandi bigi, söseei te di komakandi kaba. Peleiki makandi ku de. Nöö ee a sa, kai de u de ko a i pisi u de njan wan soni makandi ku i. Te i du dee soni aki, nöö kandë joo ko fusutan taa di sisa di i bi mëni taa an abi suti fasi, an dë sö tuutuu, ma u di a ta sen mbei a ta dë sö. Nasö kandë joo ko fusutan taa di gudu baaa an giii, ma a lo’ u da sëmbë soni. Nasö kandë joo ko fusutan taa na ku deseei kë wanlö sëmbë u wan wosudendu ta ko latilati a dee komakandi, ma u di sëmbë ta du ku de mbei (Jöpu 6:29). An dë u taki taa wa musu „ta tjökö buka a sëmbë soni” (1 Tim. 5:13). Ma a ta bunu te u sabi wantu soni u dee baaa ku dee sisa fuu. Di soni aki sa heepi u fuu ko ta fusutan de möön bunu. Te i ko sabi wan baaa nasö wan sisa bumbuu, di abi fasi di ta toobi i, nöö joo sa möön fii dëën. Tuu taa i musu mbei taanga möiti fii ko sabi dee baaa ku dee sisa fii. Ma te i ta jabi i hati da wotowan, nöö joo djeesi Jehovah, di Gadu di lobi „hii sëmbë u goonliba tuu”.​—1 Tim. 2:3, 4; 2 Kol. 6:11-13. w20.04 bld. 17 pal. 10-12

Di ndeti ufö Jesosi dëdë, a bi toona mëni dee bakama fëën taa de musu ta lobi de na de. Jesosi bi sabi taa te dee bakama fëën bi o lei taa de lobi de na de, nöö de bi o sa libi fiifii ku deseei, söseei de bi o sa hoi dou, hii fa dee sëmbë u di goonliba aki bi o buuse de. Luku di woto u dee baaa ku dee sisa u di kemeente u Tesalonika. Sensi di de hopo di kemeente dë, hën sëmbë ta du ku dee baaa ku dee sisa. Ma tökuseei de bi hoi dou, söseei de bi ta lobi de na de go dou (1 Tes. 1:3, 6, 7). Paulosu bi da de taanga u de ta lei möön gaanfa taa de lobi de na de (1 Tes. 4:9, 10). U di de bi lobi deseei, mbei de bi o sa da dee sëmbë dee ta fii bookosaka taanga (1 Tes. 5:14). Dee baaa ku dee sisa aki, bi du andi Paulosu bi piki de, u di a di u tu biifi di a bi sikifi wan jaa baka di dë, hën a bi sa piki de taa: „Di lobi di un ta lobi unu na unu ta göö möönmöön” (2 Tes. 1:3-5). Di lobi di de bi abi bi heepi de u de hoi dou hii fa soni bi ta taanga da de. w21.03 bld. 22 pal. 11

Ee u kë feni teego libi, nöö u musu dë a di pasi di Keesitu ta lei u, hën da u musu libi a di fasi fa a ta lei u taa u musu libi (Tjab. 20:24; 1 Pet. 2:21). Ma Saatan ku dee sëmbë dee ta waka nëën baka, an kë fuu libi kumafa Keesitu ta lei u fuu libi. De kë fuu ta „mökisi ku de” (1 Pet. 4:4). De ta mbei u fa u di fasi fa u ta libi, nöö de ta taki taa di fasi fa de ta libi möön bunu, söseei taa a ta mbei de ko fii. Ma di soni di de ta taki dë an dë sö seei (2 Pet. 2:19). A dë taanga fanöudu fuu ta kule a di soifi pasi! Saatan kë u hii u tuu kumutu a di piki pasi di ta „tja sëmbë go feni libi”, nöö u go waka a di baai pasi di gaansë u dee sëmbë u di goonliba aki ta waka. Di pasi dë da wan nëbai pasi, nöö an taanga u waka. Ma a ta „tja sëmbë go poi kaba a sösö” (Mat. 7:13,14). Ee u kë fika a di soifi pasi, söseei ee wa kë u soni puu u pakisei a di pasi, nöö u musu futoou Jehovah, söseei u musu ta haikëën. w20.04 bld. 26 pal. 1; bld. 27 pal. 5, 7

A di ten aki, Losiaköndë ku dee köndë dee dë ku ën a wan së bi denda go a „di Waiti Köndë” (Dan. 11:41). Na un fasi? A di jaa 2017, hën Losiaköndë tapa di wooko u dee sëmbë u Jehovah a di köndë, hën de söötö so u dee baaa ku dee sisa fuu a dunguwosu. Di könu aki taki taa sëmbë an musu abi dee buku fuu möön, te kisi di Bijbel​—Nyun-Grontapuvertaling. Boiti di dë, a tei di bëikantoo fuu a Losiaköndë, söseei a tei dee Könuköndë zali fuu ku dee kamian ka u ta hoi dee gaan komakandi. Baka di a du dee soni aki, hën di Tii Kulupu taki a di jaa 2018 taa Losiaköndë ku dee köndë dee dë ku ën a wan së da di könu u bausë. Ma dee sëmbë u Jehovah an ta fia ku lanti, söseei de an ta pooba u tooka soni a di köndë ka de ta libi, hii fa de ta du ku de. De ta begi da „könu ku gaama ku hii oto sëmbë dee dë a tii kaa”, kumafa di Bëibel ta taki taa de musu du ën, möönmöön te dee tiima aki musu luku ee de o da de pasi u de dini Gadu fiifii. w20.05 bld. 14 pal. 9.

Un dee mama ku dee tata ee dee mii fuunu an dë seiki taa dee soni dee sikifi a di Bëibel da tuutuu soni, nöö de musu ko dë gaan mati ku Jehovah, söseei de musu ko dë seiki taa dee soni dee dë a di Bëibel da tuutuu soni. Ee i kë lei dee mii fii soni u Gadu, nöö iseei musu ko dë sëmbë di ta lei soni u Bëibel. I musu tei ten u pakisei u dee soni di i ta lei. Dee soni aki o mbei joo sa lei dee mii fii u de du di wan seei soni tu. I musu lei dee mii fii unfa de sa wooko ku dee soni fuu dee u abi ta öndösuku soni, leti kumafa i ta lei woto sëmbë ën. Ee i ta du di soni aki, nöö joo heepi dee mii fii u de sa ko lobi Jehovah, söseei de o ta tei dee soni di „di köni saafu di dë u futoou” ta seeka da u, u bigi seei (Mat. 24:45-47). Na lei nöö i musu ta lei dee mii fii dee tuutuu lei u Bëibel. Ma i musu ta heepi de u de ko abi wan taanga biibi, u di joo ta lei de „dee tjubitjubi soni” u Gadu, hii fa joo ta hoi a pakisei andi de sa fusutan ku andi de an sa fusutan jeti.​—1 Kol. 2:10. w20.07 bld. 11 pal. 10, 12-13

Un mëni zöndu libisëmbë a di ten aki dë gaan mati u Jehovah? Wë milionmilion sëmbë ko dë mati u Jehovah a di ten aki. Dee sëmbë aki sa dë mati u Gadu u di de ta biibi a di lusupaima di Jesosi paka. Di lusupaima mbei u sa ko dë mati u Jehovah, söseei u sa buta u libi nëën maun, nöö u tei dopu. Te u du dee soni aki, nöö u ku milionmilion woto Keesitu sëmbë di tei dopu, ta ko dë gaan mati u di möön hei Sëmbë u hii di mundu! Unfa u sa lei taa u ta tei di dë di u ku Gadu dë mati, u bigi? Wë leti kumafa Abahamu ku Jöpu bi dini Jehovah pasa höndö jaa ku hii de hati, sö nöö u musu ta dini ën ku hii u hati go dou, aluwasi un longi u ta dini ën kaa. Leti kuma Daniëli, u musu tei di dë di u ku Gadu dë mati u bigi, möön di libi fuu seei (Dan. 6:7, 10, 16, 22). Jehovah sa heepi u fuu hoi dou aluwasi un fuka ta miti u, sö taa hii juu u ku ën sa dë mati.​—Fil. 4:13. w20.05 bld. 27 pal. 5-6

Könu Dafiti bi si wan mujëë ta wasi. Di mujëë aki bi abi manu kaa. A bi sabi di wëti u Jehovah di ta taki taa: „Wan musu kë di mujëë u wan woto sëmbë” (Ëki. 20:17). Ma tökuseei Dafiti an bi puu wojo. A bi ko kë Batiseiba, hii fa a bi kë du soni di ta kai ku Jehovah. Sömëni jaa longi Dafiti bi lei taa a lobi Jehovah, söseei sömëni jaa longi a bi ta abi gaan lesipeki dëën, ma tökuseei a bi du andi di zöndu sinkii fëën bi kë faa du. Di soni aki mbei Dafiti bi du soni di an bi bunu. An bi tja gafa ko da Jehovah. Söseei a bi mbei hogi miti woto sëmbë te kisi dee sëmbë fëën wosudendu (2 Sam. 11:1-5, 14-17; 12:7-12). Jehovah bi sitaafu Dafiti, ma bakaten hën ku Jehovah bi ko dë mati baka (2 Sam. 12:13; Ps. 51:2-4, 17). Dafiti an bi fëëkëtë di hogi di a bi tja ko u di a bi du andi di zöndu sinkii fëën bi kë faa du. Dafiti bi sa taki dee soni dee sikifi a Psalöm 86:11, a di fasi aki tu: „Da mi wan hati di an paati.” Jehovah bi heepi Dafiti faa ko abi sö wan hati ö? Wë aai. Biga di Wöutu u Jehovah bi taki bakaten taa Dafiti „bi ta dini Jehovah Gadu ku hii ën hati”.​—1 Kön. 11:4; 15: 3. w20.06 bld. 11 pal. 12-13

Di Bëibel ta taki taa di fasi fa Jehovah lobi dee sëmbë fëën dë kuma wan tatai. Na un fasi di lobi u Gadu dë kuma wan tatai? Wë buta pakisei a di woto aki: Boo taa i ta dëdë a di ze, hën wan sëmbë di dë a wan boto dendu vinde wan vest da i nasö wan soni di sa hoi i a liba wata. Wë an dë u taki taa i bi o tei ën u bigi seei, u di di soni dë sa heepi i fii fika a liba wata. Ma wan soni di sa hoi i a liba wata an tjika. Di wata kötö, nöö ja o libi ee ja sa dou a di boto. Hën da i abi wan sëmbë fanöudu u vinde wan tatai da i, nöö a hai i tja ko a di boto. Kumafa Jehovah bi taki a dee wöutu u tide, a bi ta hai dee Isaëli sëmbë dee an bi ta dini ën möön a wan lobihati fasi. Di wan seei fasi Jehovah ta fii da dee sëmbë dee an ta dini ën möön, di abi hia fuka ku bookohedi. A kë u dee lö sëmbë aki sabi taa a lobi de, söseei taa a kë u de ku ën ko dë mati baka. Wë Jehovah sa tei i fii lei dee sëmbë aki unfa a lobi de tjika. A dë fanöudu fuu lei dee sëmbë dee an ta peleiki möön, taa Jehovah lobi de, söseei taa u lobi de tu. w20.06 bld. 27 pal. 12-13

Di de kii Sitefani, hën sömëni Keesitu sëmbë kumutu a Jelusalën „kule paaja go a kamiankamian. So u de go a dee oto köndë u Judea, so u de go a Samalia”. So u de go te seei a Sipuusi ku Antiokia (Tjab. 7:58–8:1; 11:19). Sömëni fuka seei bi miti de Keesitu sëmbë aki. Ma tökuseei de bi ta paaja di bunu buka go dou a dee kamian ka de bi fusi go. Te u kaba fëën, sömëni sëmbë bi ko dë Keesitu sëmbë, nöö sömëni kemeente bi ko dë a dee pisiwata u Loomë (1 Pet. 1:1). Ma sömëni fuka bi dë a pasi ta ko jeti. A di pisiten u di jaa 50 Baka Keesitu, hën di Gaan Könu u Loomë de kai Kalaudio, bi taki taa hii dee Dju bi musu kumutu a Loomë. Fëën mbei dee Dju dee bi ko dë Keesitu sëmbë, bi musu foloisi go libi a woto kamian (Tjab. 18:1-3). A di pisiten u di jaa 61 Baka Keesitu, hën apösutu Paulosu bi taki taa sëmbë bi ta kosi dee baaa ku dee sisa fëën. De bi ta buta de a dunguwosu, nöö de bi ta fufuu soni u de (Heb. 10:32-34). Boiti di dë, so Keesitu sëmbë bi ta dë ku suwaki tu, nöö so u de bi dë pooti sëmbë.​—Lom. 15:26; Fil. 2:25-27. w21.02 bld. 26-27 pal. 2-4

Ee u ta mbei hii möiti u di biibi fuu ko möön taanga, nöö Saatan ku dee sëmbë dee tei hën së an o sa tapa u fu wa piki di lei u Masa Gadu möön (2 Joh. 8, 9). U musu ta hoi a pakisei taa dee sëmbë u di goonliba aki o buuse u (1 Joh. 3:13). Johanisi bi taki kaa taa „hii dee oto sëmbë u di goonliba aki tuu dë a didibi basu” (1 Joh. 5:19). Möönmöön di kaba u di goonliba aki ta ko zuntu, nöö möönmöön Saatan hati ta boonu. Na suku nöö a ta suku u ganjan u puu a Jehovah ku soni kuma fanafiti libi a manu ku mujëë soni, nasö ku dee mindimindi soni di dee sëmbë dee bia baka da di biibi ta taki. Ma a ta mbei sëmbë du ku u tu. Saatan sabi taa ten an fika hia dëën möön faa sa feni pasi tapa di peleikiwooko fuu nasö faa mbei taa di biibi fuu ko suwaki. Fëën mbei an ta bigi da u te u ta si taa de ta tapa wan pisi u di wooko fuu nasö hii di wooko fuu a so köndë. Ma ku ën sö seei dee baaa ku dee sisa fuu dee dë a dee köndë dë ta hoi dou. Di soni aki ta lei taa aluwasi andi Saatan ta du ku dee sëmbë u Gadu, tökuseei de o ta hoi dou! w20.07 bld. 24 pal. 12-13

Jehovah bi kë taa libisëmbë bi musu ta libi waiwai u nöömö a di waiti goonliba di a bi mbei. Ma di Adam ku Eva hopo fia ku di Tata u de di bi lobi de, hën zöndu ku dëdë ko dë a goonliba (Lom. 5:12). Andi Jehovah bi du? Wantewante dë, a bi taki andi a bi o du u heepi libisëmbë (Ken. 3:15). Jehovah bi seeka soni u di Womi Mii fëën de kai Jesosi bi sa ko paka wan paima, di bi o jabi pasi da dee bakamii u Adam ku Eva, u de kumutu a zöndu ku dëdë basu. A sö wan fasi, a bi o da hiniwan sëmbë pasi u de taki ee de kë dini ën. Nöö dee sëmbë dee bi o dini ën, bi o sa libi u teego (Joh. 3:16; 1 Kol. 15:21, 22). Jehovah o tei di Womi Mii fëën u weki milionmilion sëmbë. U sa ta dë ku di mëni taa na hii dee sëmbë dë tuu o weki ko a libi a di wan seei ten. Faandi mbei u sa taki sö? Wë ee gaan hia sëmbë ko dë a goonliba wan pasi vou, nöö soni sa waka fanjanfanjan. Ma nöiti Jehovah ta du soni fanjanfanjan. A sabi taa u libisëmbë sa libi fiifii, nöö soni musu seeka bunu.​—1 Kol. 14:33. w20.08 bld. 14 pal. 3; bld. 15 pal. 5

Di sëmbë di u ta lei soni u Bëibel musu ko fusutan taa di soni mbei u ta lei ën soni u Bëibel, hën da u di u kë heepi ën faa ko ta dini Jehovah kuma wan Kotoigi fëën. Ee wan sëmbë di ta lei soni u Bëibel kë dini Gadu tuutuu, nöö a o nango a fesi pikipiki u te a dopu! Di fosu soni di ta pasa, hën da a ta ko sabi Jehovah, nöö a ko lobi ën, nöö a biibi ën (Joh. 3:16; 17:3). Baka di dë, a ta ko dë wan mati u Jehovah, nöö a ta bigi ta nama ku dee sëmbë u di kemeente (Heb. 10:24, 25; Jak. 4:8). Te u kaba fëën, di sëmbë ta tjali u dee hogi soni dee a bi du, nöö a ta disa u du de (Tjab. 3:19). A di seei ten dë, di biibi fëën ta mbei a ta konda dee soni dee a ta biibi da sëmbë (2 Kol. 4:13). Bakaten, a ta buta hën libi a Jehovah maun, nöö a dopu u lei taa a buta hën libi a Jehovah maun (1 Pet. 3:21; 4:2). Di daka dë ta dë wan gaan daka da hii sëmbë! Te di sëmbë ta du dee soni dee a musu du faa sa dopu, nöö i musu ta gafëën, ta dëën taanga faa mbei möiti go dou. w20.10 bld. 17-18 pal. 12-13

Ee i ta tei iseei maaka ku dee woto baaa ku sisa a di kemeente, nöö a sa pasa taa i ko ta pakisei taa ja abi na wan du a di kemeente. Kandë so baaa nasö sisa sa’ u lei sëmbë soni a wan bunu fasi, kandë so u de sa’ u seeka soni bunu seei, nasö kandë wotowan sa’ u da wotowan taanga ku kötöhati. Kandë i ta si kuma ja o sa du dee soni aki kumafa de ta du ën. Ee sö i ta fii, nöö di dë ta lei taa i abi sakafasi (Fil. 2:3). Ma i musu ta köni ku di soni aki tu. Biga ee hii juu i ta tei iseei maaka ku dee sëmbë dee sa’ u du soni a wan bunu fasi, nöö i sa lasi hati. Kandë i sa bigi pakisei taa ja abi na wan du a di kemeente. Jehovah bi da so baaa ku sisa u fesiten di santa jeje fëën u de bi sa du gaangaan soni, ma na hii dee Keesitu sëmbë bi ta du di wan seei wooko ku di santa jeje (1 Kol. 12:4-11). Ma de bi abi hiniwan u dee Keesitu sëmbë aki fanöudu. A di ten aki, Jehovah an ta da u di santa jeje fëën möön fuu du foombofoombo soni. Ma u sa ta du peipei wooko a di dini di u ta dini ën. Hii fa a dë sö, tökuseei Jehovah ta kai hii u tuu gaan soni. w20.08 bld. 23 pal. 13-15

Te i begi Jehovah faa da i degihati, nöö ao piki dee begi fii, söseei an o disa i nöiti (Tjab. 4:29, 31). Hii juu a o ta dë ku i, ta heepi i, pakisei fa a bi heepi i di soni bi ta taanga da i a di ten di pasa. Söseei pakisei fa a bi heepi i fii bi sa bia libi. I sa dë seiki taa di Sëmbë di bi tja dee sëmbë fëën pasa di Bë Ze, sa heepi i fii sa dë wan bakama u Keesitu (Ëki. 14:13). Mbei möiti fii sa abi biibi a Jehovah go dou kuma di psalöm sikifima. „Luku di woto u wan sisa de kai Tomoyo. Di fosu pasi di a go peleiki da sëmbë a de pisi, hën a miti wan mujëë. Hën di mujëë bai ën taa: „Ma kë jei na wan soni u dee Jehovah Kotoigi!” Hën a tapa di döö gbilam. Tomoyo an bi fëëë, ma a bi piki di sisa di hën ku ën bi ta peleiki taa: „I jei andi a taki ö? An bi dë u mi taki na wan soni seei, hën a si taa mi da wan Jehovah Kotoigi. Mi ta wai seei!” Nöunöu Sisa Tomoyo ta du di kowoonu pioniliwooko. w20.09 bld. 6 pal. 13-14

Asa bi piki dee sëmbë taa Jehovah hën bi „mbei hii soni waka bunu da [de]” (2 Klon. 14:6, 7). Asa an bi ta si kuma u di soni bi ta waka bunu, mbei de bi musu tei di ten dë ta piizii u di libi nöö a kaba. Ma a bi bigi mbei foto, peni, hei wakitima wosu, ku gaandöö. A bi piki dee sëmbë u Juda taa: „U abi di köndë.” Andi Asa bi kë taki? A bi kë taki taa felantima an bi dë a di köndë di bi o sa tapa de u de waka fiifii, söseei di bi o sa tapa de u de mbei soni a di köndë. A bi da dee sëmbë taanga u de wooko ku di ten dë a wan bunu fasi. Asa bi tei di pisiten ka feti an bi dë, u heepi dee sodati fëën tu u de ko möön taanga (2 Klon. 14:8). Di soni dë kë taki taa an bi ta futoou Jehovah u? Wë nönö. Asa bi sabi taa u di hën bi dë di könu, mbei a bi musu seeka dee sëmbë da dee soni dee bi o sa miti de bakaten. Asa bi sabi taa soni an bi o dë sö a Juda u nöömö, nöö soni an bi dë sö u nöömö tu. w20.09 bld. 15 pal. 4-5

Wë u di wan gaanwomi ta booko hën hedi ku dee sëmbë u di kemeente, mbei a sa si kuma hënseei sa buta wëti da dee sëmbë u di kemeente u tjubi de. Ma di faantiwöutu u wan gaanwomi tooka gaanfa ku di faantiwöutu di wan hedima u wosudendu abi. Wë Jehovah da dee gaanwomi di faantiwöutu u de sa kuutu soni a di kemeente, söseei a da de di faantiwöutu u de sa puu wan sëmbë a di kemeente di an tjali u di zöndu di a du (1 Kol. 5:11-13). Ma Jehovah da hedima u wosudendu so faantiwöutu di an da dee gaanwomi u kemeente. A da dee hedima u dee wosudendu pasi u de sa buta wëti da dee sëmbë u de (Lom. 7:2). Wan hedima u wosudendu sa taki un lati dee mii fëën musu ko a wosu. Nöö a sa sitaafu de ee de an hoi deseei a di wëti dë (Ef. 6:1). An dë u taki taa wan hedima u wosudendu o taki ku hën mujëë ufö a buta wan wëti a di wosudendu fëën. A o du di soni aki, u di hën ku ën mujëë ko dë „wan”.​—Mat. 19:6. w21.02 bld. 16-18 pal. 10-13

Wan soni di mbei u sa taki taa dee lei dee dë a di wöutu u Gadu dë kuma gaan gudu, da u di Jehovah ta mbei dee sëmbë dee abi sakafasi, nasö „dee a kai da u de feni di libi u teego” wanwan ko sabi dee soni dë (Tjab. 13:48). Sëmbë di abi sakafasi ta tei taa di köni saafu di dë u futoou hën ta lei u soni u Bëibel a di ten aki (Mat. 11:25; 24:45). Wa bi o sa sabi dee soni aki ee na Gadu hën bi heepi u fuu ko sabi de. Nöö soni an dë di dii möön dee lei aki (Nöng. 3:13). Jehovah da u di gaandi tu fuu lei wotowan soni di nama ku ën ku dee soni dee a o du a di ten di ta ko (Mat. 24:14). Di buka di u ta paaja dë kuma gaan gudu seei, u di a ta heepi sëmbë u de ko a di wosudendu u Jehovah, söseei a ta jabi pasi da de u de libi u teego (1 Tim. 4:16). Aluwasi ee u sa du di wooko aki gaanfa, nasö ee wa sa du ën gaanfa sö, tökuseei a o dë taa u ta heepi du di möön gaan wooko di ta du a di ten aki (1 Tim. 2:3, 4). A dë wan gaandi fuu sa ta wooko makandi ku Gadu!​—1 Kol. 3:9. w20.09 bld. 26-27 pal. 4-5

Di apösutu Paulosu bi dë a boto nango a Loomë, nöö Jehovah bi tei dee baaa ku dee sisa fëën u heepi ën. Tu mati u Paulosu bi buta taa de bi o go ku Paulosu a Loomë. Dee mati fëën dë da Alisitakusi ku Lukasi. Dee womi aki bi dë kabakaba u go ku Paulosu, hii fa di Bëibel an ta piki u taa Jesosi bi paamusi de taa de bi o sa dou a Loomë, söndö u soni du de. Di di waka bi ko taanga, ufö de bi ko jei taa soni an bi o du de. Di de bi go tjökö a di foto Sidon, hën Julisi bi da Paulosu pasi „faa go a tela a dee mati fëën fu de sa sölugu ën” (Tjab. 27:1, 2). Bakaten, di Paulosu ku dee mati fëën bi go dou Puteoli, hën de ’ko si wanlö biibima u Masa Jesosi dë, hën de begi de u de tan ku de sëbën daka’. Di dee Keesitu sëmbë u dee kamian aki bi ta heepi Paulosu ku dee mati fëën ku dee soni di de bi abi fanöudu, nöö a musu u dë sö taa dee baaa ku dee sisa aki bi ta dë waiwai u di Paulosu bi ta konda soni da de u da de taanga.​—Luku Tjab. 15:2, 3. w20.11 bld. 15-16 pal. 15-17

Wë di möön gaan soni di un sa du, hën da u mbei dee mii fuunu si a dee soni dee un ta du ku dee soni dee un ta taki taa un lobi Jehovah gaanfa. Di möön gaan kado di un sa da dee mii fuunu, hën da di da di un ta da de di okasi u de ko lobi Jehovah. Nöö di möön gaan soni di un sa lei de da unfa de sa ta lei soni u Bëibel, ku unfa de sa ta begi. Un musu lei de tu taa de musu nango a dee komakandi, söseei taa de musu ta du di peleikiwooko (1 Tim. 6:6). An dë u taki taa un musu ta da de dee soni di de abi fanöudu u de sa libi (1 Tim. 5:8). Ma hoi a pakisei taa di dë di dee mii fuunu dë gaan mati ku Jehovah hën o heepi de u de pasa di hogi goonliba aki, denda go a di njunjun goonliba u Gadu (Eze. 7:19) U ta wai seei te u ta si taa sömëni mama ku tata di dë Keesitu sëmbë ta du soni di ta heepi dee mii u de, u de ku Jehovah sa ko dë möön gaan mati! A lo’ u pasa taa dee mii di de ta kiija a di lö fasi aki ta du dee bunu soni aki go dou te de ko gaan sëmbë. Nöö de ta wai seei taa dee gaansëmbë u de bi kiija de a sö wan fasi. An ta hati de bakaten!​—Nöng. 10:22. w20.10 bld. 28-29 pal. 10-11

So juu apösutu Petuisi bi ta taki soni nasö du soni söndö pakisei, nöö dee soni dë bi ta hati ën bakaten. Wan daka di Jesosi bi piki dee apösutu fëën taa a o tja sitaafu, söseei taa sëmbë bi o kii ën, hën Petuisi piki Jesosi di soni di sikifi a di tëkisi u tide (Mat. 16:21-23). Jesosi bi fan ku Petuisi u di soni dë. Di wanlö sëmbë bi ko u kisi Jesosi tja go, hën Petuisi du wan soni söndö u pakisei. A bi koti di jesi u wan saafu u di gaan mindima puu (Joh. 18:10, 11). Jesosi bi toona fan ku di apösutu fëën möön. Boiti di dë, Petuisi bi njan buka taa aluwasi ee hii dee woto apösutu bi o go disa Jesosi, hën an bi o du di soni dë nöiti! (Mat. 26:33) Ma Petuisi an bi taanga kumafa a bi mëni. A di ndeti dë, a bi fëëë sö tee taa dii pasi a taki taa an sabi Jesosi. Petuisi bi fii bookosaka sö gaanfa taa a „kule go a döö go këë te a bigi” (Mat. 26:69-75). Kandë a bi ta hakisi hënseei ee Jesosi bi o dëën paadon. Ma Petuisi an bi lasi hati sö tee taa a disa di dini di a bi ta dini Jehovah. Baka di a bi mbei di föutu dë, a bi dini Jehovah go dou makandi ku dee woto apösutu.​—Joh. 21:1-3; Tjab. 1:15, 16. w20.12 bld. 20 pal. 17-18

Wan hedima u wosudendu sa lei taa a abi sakafasi a peipei fasi. A sa du sö, te an ta hoi taa hën mujëë ku dee mii fëën an o ta mbei föutu. Söseei a sa du sö, te a ta haika unfa hën mujëë ku dee mii fëën ta si wan soni, söseei a ta du soni kumafa de taki aluwasi ee de an ta si di soni kumafa hën a ta si ën. Boiti dee soni aki, wan womi di abi sakafasi ta dë kabakaba u du wooko a wosu, aluwasi ee dee sëmbë u di pisiwata ka a ta libi, ta si kuma mujëë sëmbë hën musu ta du dee lö wooko dë. Wë di soni dë sa dë wan taanga soni. Faandi mbei u taki sö? Wë wan sisa de kai Rachel bi taki taa: „A di kamian ka de kiija mi, ee wan womi ta heepi hën mujëë ta wasi paabi lai, nasö ee a ta heepi ën ta seeka wosu, nöö dee sëmbë u di pisiwata fëën, ku dee famii fëën an o ta si kuma a dë wan ’tuutuu womi nëngë’. De o ta si kuma an sa tii di mujëë fëën”. Ee sö sömëni sëmbë u di pisiwata ka i ta libi ta si soni, nöö hoi a pakisei taa Jesosi bi wasi dee bakama fëën futu, hii fa sëmbë bi ta si kuma wan saafu hën bi musu du di lö wooko dë. Wan bunu hedima u wosudendu, an o ta buta pakisei a di kë di a kë taa sëmbë musu si ën taa a dë wan bumbuu sëmbë, ma a o ta buta pakisei a di dë di hën mujëë ku dee mii fëën musu ta dë waiwai. w21.02 bld. 2 pal. 3; bld. 4 pal. 11

Sëmbë sa du soni di o hati u, ma te u da de paadon, woo sa ta buta pakisei fuu a di dini di u ta dini Jehovah. Wa sa dini Jehovah waiwai, ee háti fuu ta fon u tumisi poi. Fëën mbei kuma apösutu Paulosu, u musu biibi taa Jehovah da u paadon (1 Tim. 1:12-15). U ta biibi taa woo libi u teego. Nöö te woo libi a di njunjun goonliba, wa o mëni soni di sa mbei u fii tjali. Di Bëibel ta taki u di ten dë taa: „Sëmbë an o mëni dee fesiten soni möön” (Jes. 65:17). Pakisei ën luku: So fuu di ta dini Jehovah ko gaandi, ma a di njunjun goonliba, woo ko njönku baka (Jöpu 33:25). Boo mbei taanga möiti fuu wa buta pakisei fuu a di ten di pasa. Ma u kë buta hii u pakisei a di njunjun goonliba, söseei nöunöu kaa u kë du hii soni di u sa du fuu sa dë ala! w20.11 bld. 24 pal. 4; bld. 29 pal. 18-19

Andi o pasa abiti möön? Jehovah o tjubi u a tu foombo fasi a di pisiten u di gaan fuka. Di fosu soni, hën da a o tjubi dee dinima fëën dee ta hoi deseei nëën, te a o mbei dee könu u di goonliba aki booko di Gaan Babilon kaba a sösö. Di Gaan Babilon dë, da hii dee poipoi keiki tuu (Ako. 17:16-18; 18:2, 4). Baka di dë, nöö a o tjubi dee sëmbë fëën na Amagedon, te a o booko dee woto pisi u di goonliba u Saatan kaba a sösö (Ako. 16:14, 16). Te u ta mbei möiti fuu ku Jehovah dë mati go dou, nöö Saatan an o sa du wan soni ku u di an o sa seeka möön. Fuu taki ën kumafa a dë, nöö Saatan de o kii, nöö an o sa ko a libi nöiti möön (Lom. 16:20). Fëën mbei i musu wooko ku hii dee fetilai dee Gadu da u.Hii juu i musu ta wooko ku de! Na suku u feti di feti aki i wanwan. Heepi dee baaa ku dee sisa fii, söseei du dee soni dee Jehovah ta piki i fii du. Ee i ta du dee soni aki, nöö i sa dë seiki taa di Tata fii di dë a liba ala o ta da i taanga, söseei a o ta tjubi i.​—Jes. 41:10. w21.03 bld. 30 pal. 16-17

Unfa u sa lei taa u ta futoou Jehovah? Wë te u ta du dee soni dee a ta piki u. Sömëni woto dë a Bëibel di ta lei u unfa a dë fanöudu tjika fuu ta dë piii ta wakiti Jehovah, te sëmbë ta du ku u. Te joo luku dee woto aki, nöö buta pakisei a di soni di bi heepi dee dinima u Gadu u de dë piii ta wakiti ën, te sëmbë bi ta du ku de. Di dee sëmbë u di kuutuwosu u dee Dju bi bai dee apösutu u de an peleiki möön, nöö di soni dë an bi mbei de fëëë. Ma de bi piki dee sëmbë u di kuutuwosu taa: „Masa Gadu buka hën u musu piki möön gaanfa möön libisëmbë buka e” (Tjab. 5:29). Bakaten de bi wipi dee apösutu, ma tökuseei di soni aki an bi mbei de fëëë. Faandi mbei an bi mbei de fëëë? Wë u di de bi sabi taa Jehovah dë ku de a wan së. Jehovah bi ta heepi de. Fëën mbei de bi paaja di bunu buka go dou? (Tjab. 5:40-42) Sö nöö di de bi kë kii Sitefani, nöö a bi dë u si seei taa an bi ta fëëë. Fesi fëën bi ko dë kuma wan „basia u Masa Gadu köndë” (Tjab. 6:12-15). Unfa a du waka taa fesi fëën bi ko dë sö? Wë u di a bi dë seiki taa Jehovah ta feni ën u bunu. w21.01 bld. 4 pal. 10-11

Di soni aki kë taki taa de dë limbolimbo a Jehovah wojo (Jes. 1:18). Dee sëmbë aki da sëmbë di buta de libi a Gadu maun, hën de dopu ko dë bakama u Keesitu. De ta biibi taa Jesosi paka paima da de, nöö de ku Jehovah dë mati tu (Joh. 3:36; 1 Pet. 3:21). Dee soni aki mbei de sa „taanpu a Gadu fesi ta dini ën ndeti ku didia” a goonliba aki (Ako. 7:15). A di ten aki, dee sëmbë aki ta buta di Könuköndë u Gadu a di fosu kamian a de libi, nöö de ta du di peleikiwooko möön gaanfa (Mat. 6:33; 24:14; 28:19, 20). Dee gaan hia sëmbë dee o pasa di gaan fuka libilibi, dë seiki taa soni o ta waka bunu da de hii juu, u di „di sëmbë di sindo a di könubangi o tjubi de, u soni an musu du de möön”. Nöö di soni di Gadu bi paamusi dee sëmbë aki, o pasa tuutuu. Di Bëibel bi taki taa: „[Gadu] o feki hiniwan u de wojowata puu a de.”​—Ako. 21:3, 4. w21.01 bld. 16 pal. 9-10

U ta wai seei taa u dë a di wosudendu u Jehovah, söseei da di seti di Jehovah seti soni sö taa sëmbë sa ta abi taki a wotowan liba. Di Bëibel ta lei u taa Jehovah ta kai womi ku mujëë tuu gaan soni. A di pisiten u dee fesiten Keesitu sëmbë, Jehovah bi da womi ku mujëë tuu di santa jeje fëën u de sa du foombo wooko. Wan u dee soni di de bi sa du, hën da de bi sa fan peipei töngö (Tjab. 2:1-4, 15-18). Womi ku mujëë tuu Jehovah ta salufu ku di santa jeje fëën, u de sa go tii ku Keesitu a liba ala (Gal. 3:26-29). Womi ku mujëë tuu seei abi di gaandi u libi u teego a goonliba aki (Ako. 7:9, 10, 13-15). Söseei womi ku mujëë tuu abi di gaandi u ta paaja di bunu buka, ta lei sëmbë soni u Bëibel (Mat. 28:19, 20). Di buku Tjabukama ta konda soni u wan sisa de kai Pesila. Hën ku ën manu Akila, bi konda soni u di tuutuu lei möön fini da wan womi de kai Apolo.​—Tjab. 18:24-26. w21.02 bld. 14 pal. 1; bld. 15 pal. 4

Un dee gaanwomi, un abi di faantiwöutu u heepi dee peleikima u de ko sa’ u du di peleikiwooko a wan möön bunu fasi, söseei u de ko sa’ u lei sëmbë soni u Bëibel a wan möön bunu fasi. Ee wan peleikima ta sen u lei wan sëmbë soni u Bëibel te i ku ën dë makandi, nöö hakisi ën ee a kë fii lei di sëmbë soni u Bëibel di daka dë. Wë dee gaanwomi sa du sömëni soni u heepi dee peleikima (1 Tes. 5:11). Aluwasi ee wa abi wan sëmbë di u ta lei soni u Bëibel, tökuseei u sa heepi wan sëmbë faa go a fesi u te a dopu. U sa taki wanlö soni te u ku wan peleikima go makandi te a o lei wan sëmbë soni u Bëibel, ma wa musu fan hia poi. U sa ko dë mati u dee sëmbë dee ta lei soni u Bëibel, te de bigi ko a dee komakandi. Nöö u musu du soni a wan fasi di sa mbei de ta djeesi u. Dee gaanwomi sa ta da dee sëmbë dee ta lei soni u Bëibel taanga, te de ta seeka soni u de sa dë makandi ku de. De sa ta da dee peleikima taanga tu, te de ta heepi de u de ko dë wan möön bunu peleikima, söseei te de ta gafa de. U ta wai seei u heepi wan sëmbë faa ko lobi Jehovah, söseei faa ko ta dini ën, aluwasi ee wan piki soni seei u bi du u heepi ën. w21.03 bld. 13 pal. 18-19

Dafiti bi ta lei taa a bi sa tja faantiwöutu, söseei taa a bi dë u futoou. Di a bi dë wan njönku kijoo, nöö a bi ta luku dee sikapu fëën tata. Di wooko di a bi ta du dë bi dë wan wooko ka a bi sa lasi hën libi. Bakaten Dafiti bi piki Könu Saulosu taa: „Mi Masa o, wan daka di mi bi ta luku dee sikapu u mi tata, hën wan lëun ko dou. Wan woto daka möön, hën wan hogi mbeti ko dou. Hii dee tu pasi aki dee mbeti aki tei wan sikapu tja go. Mi bi kule a di lëun baka, hën mi naki ën kii, hën mi puu di sikapu nëën buka” (1 Sam. 17:34, 35). Dafiti bi sabi taa a bi musu luku dee sikapu bunu. Dee njönku baaa sa djeesi Dafiti, te de ta du hiniwan wooko di de da de, a wan bunu fasi. Dafiti ku Jehovah bi ko dë gaan mati. Di dë di Jehovah ku Dafiti bi dë gaan mati, bi dë fanöudu möön di degihati di a bi abi, nasö di sa’ di a bi sa’ u pëë poku. Jehovah bi dë di Gadu u Dafiti, ma hën ku Dafiti bi dë gaan mati tu. Wë di möön fanöudu soni di un dee njönku baaa sa du, hën da un sa mbei möiti fuunu ku Jehovah ko dë möön gaan mati. w21.03 bld. 3 pal. 4-5