Piki-deewei-liba

I abi wan fuka ta tja u? Kandë wan sëmbë a di kemeente du wan soni di hati i (Jak. 3:2). Nasö kandë wan sëmbë di i ku ën ta wooko a di wan kamian, nasö di i ku ën ta sindo a di wan kalasi, ta mbei i fa, u di i ta dini Jehovah (1 Pet. 4:3, 4). Nasö kandë dee famii fii ta suku u tapa i fu ja go a komakandi, nasö fu ja taki soni u di biibi fii möön (Mat. 10:35, 36). Wë te wan fuka ta hebi da i fii tja, nöö kandë ja o kë dini Jehovah möön. Ma i sa dë seiki taa aluwasi un fuka ta miti i, Jehovah o da i di köni ku di kaakiti di i abi fanöudu fii sa hoi dou. Jehovah bi mbei sëmbë sikifi a di Wöutu fëën unfa zöndu libisëmbë bi ta hoi dou, hii fa fuka bi ta miti de. Faandi mbei a bi du di soni aki? Wë a bi du ën sö taa u sa lei wan soni a de. Fëën mbei Jehovah bi mbei apösutu Paulosu sikifi di soni di dë a di tëkisi u tide.Te u ta lesi dee lö woto aki, nöö de ta da u kötöhati, söseei de ta mbei u dë ku di mëni taa soni o waka bunu da u a di ten di ta ko. Ma ee u kë ta feni wini u dee woto aki, nöö na lesi nöö u musu ta lesi di Bëibel. Ma u musu dëën pasi faa tooka di fasi fa u ta pakisei, ku di fasi fa u ta fii. w21.03 bld. 14 pal. 1-2

I ta si dee sëmbë dee i ta peleiki da kuma njanjan di lepi tjika u koti ö? Ee sö a dë, nöö dee dii soni aki o pasa. Di fosu soni, hën da joo peleiki fajafaja möön fa i bi naa. Di ten ka sëmbë nango koti njanjan a wan goon da wan sati pisiten. Fëën mbei wa musu lasi ten. Di u tu soni, hën da joo ta dë waiwai te i ta si unfa dee sëmbë ta haika di bunu buka. Di Bëibel ta taki taa: ’Sëmbë ta piizii seei te njanjan lepi u de koti’ (Jes. 9:3). Di u dii soni, hën da joo ta si hiniwan sëmbë di i ta miti kuma wan sëmbë di sa ko toon wan bakama u Keesitu. Di soni dë o mbei joo ta suku hii pei fasi u peleiki da de u de sa kë haika i. So u dee bakama u Jesosi bi sa ta pakisei taa nöiti dee Samalia sëmbë bi o ko toon bakama u Keesitu, ma Jesosi an bi ta pakisei sö. Jesosi bi ta si taa dee sëmbë aki bi sa ko dë bakama fëën. Useei musu ta si dee sëmbë u di pisiwata ka u ta peleiki kuma sëmbë di sa ko toon bakama u Keesitu. Apösutu Paulosu bi lei u di soni aki a wan bunu fasi. Paulosu bi ko sabi andi dee sëmbë dee a bi ta peleiki da bi ta biibi, a bi ta si andi ku andi de lobi, söseei, a bi ta si taa dee sëmbë dee a bi ta peleiki da, bi sa ko dë bakama u Jesosi. w20.04 bld. 8-9 pal. 3-4

Na kuutu wan sëmbë u dee soni dee a ta du, ma mbei möiti fii ko fusutan unfa a ta fii. Jehovah da di wan kodo sëmbë di ta fusutan u te dou. Fëën mbei i sa hakisi ën faa heepi i fii sa si di soni di a ta si a wotowan. Söseei i sa hakisi ën faa heepi i fii fusutan unfa i sa lei wotowan taa i ta fii da de. Ja sa taki un baaa ku un sisa i kë fii da nasö un baaa ku un sisa ja kë fii da. Dee lö pei soni dee bi ta miti Jona, Elia, Hagali, ku Lotu ta miti de tu. So juu deseei bi suku dee soni aki. Fuu taki ën kumafa a dë, nöö so juu useei ta du soni di ta mbei hogi miti u tu. U di soni aki mbei u sa taki taa Jehovah abi leti u hakisi u fuu abi tjalihati da wotowan (1 Pet. 3:8). Te u ta piki Jehovah buka, nöö u sa ta möön libi fiifii ku dee baaa ku dee sisa fuu a hii së u goonliba. Boo dë kabakaba u haika dee baaa ku dee sisa fuu te de ta fan. Boo mbei möiti fuu ko sabi unfa soni dë da de tuutuu, söseei boo lei taa u abi tjalihati u de. w20.04 bld. 18-19 pal. 15-17

Jesosi bi piki Gadu buka a hii soni. Fëën mbei ee u kë piki Gadu buka a soni, nöö u musu ta djeesi Jesosi a hii futu (Joh. 8:29). Fuu sa ta piki di lei u Masa Gadu go dou, nöö u musu ta biibi tuutuu taa Jehovah hën da di Gadu di ta taki tuutuu soni, söseei u musu ta biibi tuutuu taa hii dee soni dee a ta piki u a di Wöutu fëën da tuutuu soni. Boiti di dë, u musu ta biibi tuutuu taa Jesosi da di Mësiasi di Gadu bi paamusi taa bi o ko. Sömëni sëmbë u di ten aki an ta kaba biibi taa Gadu buta Jesosi ko Könu u di Könuköndë fëën. Johanisi bi taki taa sömëni ganjansëmbëma bi o ko, nöö de bi o sa ganjan dee sëmbë dee an bi o ta biibi tuutuu taa dee soni di di Bëibel ta taki u Jehovah ku Jesosi, da tuutuu soni (2 Joh. 7-11). Johanisi bi taki taa: „Di sëmbë di o ko ta fia taa Masa Jesosi nëën da di Paamusi Könu Masa Gadu manda ko da u aki fuu ta biibi ën, nöö di sëmbë di ko taki sö, hën da wan ganjansëmbëma” (1 Joh. 2:22). Di wan kodo fasi fa u sa köni u sëmbë an feni u ganjan, hën da te u ta lei soni a di Wöutu u Gadu. Di fasi dë, da di wan kodo fasi fa u sa ko sabi Jehovah ku Jesosi (Joh. 17:3). Nöö te u du di soni dë, ufö woo sa ko dë seiki taa u dë a di tuutuu lei. w20.07 bld. 21 pal. 4-5

Wan fasi fa u sa köni fu wa ko dë kuma ’wan sitonu a pasi’ sö taa dee baaa ku dee sisa fuu an naki futu kai’, da te u ta da de pasi so juu u de du soni kumafa de bi o kë du ën. Wa musu ta kë taa soni musu pasa kumafa u kë (Lom. 14:19-21; 1 Kol. 8:9, 13). A di lö fasi aki wa dë kuma dee sëmbë dee ta kule a wan tuutuu fia kule. Hiniwan u dee sëmbë dee ta kule ta mbei möiti u de wini di paka. De ta möön buta pakisei a di soni di sa heepi de u de wini di fia kule. Fëën mbei de ta mbei möiti u tötö wotowan go a wan së, sö taa de sa dë a fesi. Wa dë kuma dee sëmbë aki. Wa ta fia ku useei (Gal. 5:26; 6:4). U kë heepi sömëni sëmbë u de feni libi a di njunjun goonliba, söseei u de libi u teego. Di soni aki mbei u kë du di soni di sikifi taa ’wa musu ta mëni fuu wanwan soni nöö a kaba, ma hibiwan fuu musu ta mëni soni u di otowan fëën tu’ (Fil. 2:4). Dee dinima u Jehovah dë a wan fia kule. Nöö Jehovah ta piki dee dinima fëën taa ee de kule di fia kule aki te dou di kaba, nöö de o feni wan paka. Di paka dë da di libi di de o sa libi u teego a liba ala, nasö a wan paladëisi a goonliba aki. w20.04 bld. 28 pal. 10; bld. 29 pal. 12

Milionmilion womi ku mujëë di dë Keesitu sëmbë o libi a di njunjun goonliba. Dee sëmbë aki o si unfa milionmilion sëmbë di bi dëdë o weki ko a libi baka. Pakisei unfa woo piizii te dee soni aki o pasa! (Tjab. 24:15) Te u kaba fëën, dee sëmbë dee hoi deseei a Jehovah an o dëdë nöiti möön. De o sa libi u teego a goonliba aki. Hiniwan Keesitu sëmbë a di ten aki musu dë ku tangi a hati da dee soni di Paulosu bi piki dee sëmbë u Kolenti, di nama ku di weki di sëmbë o weki ko a libi baka. Wa abi lasi ee u du di soni di Paulosu bi taki, di a bi taki taa u musu abi hia soni ta du „a di wooko u Masa” (1 Kol. 15:58). Ee u ta du di wooko u Masa fajafaja, nöö woo dë möön waiwai a di ten di ta ko. Na piki suti di ten dë o suti. A o ko dë gbelingbelin u si taa di wooko di u bi ta du da Masa, an bi dë u sösö. w20.12 bld. 13 pal. 16-17

A kan taa di tjabukama woto u Ezekiëli 38:10-23, di u Daniëli 2:43-45, 11:44–12:1, söseei di u Akoalimbo 16:13-16, 21, ta taki u soni di o pasa a di wan seei ten. Ee sö a dë tuutuu, nöö kandë soni o waka kumafa woo luku nöunöu. Wan pisiten baka te di gaan fuka bigi, nöö ’dee könu u goonliba tuu’ o fiti buka u de wooko makandi (Ako. 16:13, 14). Dee könu u di goonliba o toon dee sëmbë di di Bëibel ta kai „Gögi u Magögi” (Eze. 38:2). Dee sëmbë aki o go feti ku dee sëmbë u Gadu, nöö de o kë poi de kaba a sösö. Apösutu Johanisi bi konda wan tjabukama woto di nama ku di ten dë. A bi taki taa a bi si ëisi ta kumutu a liba ala dombodombo ta kai a dee felantima u Gadu liba. Dee ëisi aki sa dë di kuutu bosikopu di dee sëmbë u Jehovah o paaja. A o mbei Gögi u Magögi hopo go feti ku dee sëmbë u Gadu, nöö a o kë kii hii de tuu.​—Ako. 16:21. w20.05 bld. 14 pal. 13-14

Di santa jeje u Gadu da wan gudu di a da di u musu tei u bigi seei. U sa ko ta möön tei ën u bigi taa u abi di santa jeje, te u ta pakisei andi ku andi Jehovah du ku di santa jeje fëën a di ten fuu aki. Ufö Jesosi bi go a Gadu köndë ala, hën a piki dee bakama fëën taa: „Di [santa jeje] o ko a unu liba dë, nöö a o da unu kaakiti fuun sa tei dee soni u mi dee un sabi konda da lanti be de jei. A Jelusalen aki woon seti konda di buka, nöö woon ta . . . kondëën be a paaja a hii dee köndëköndë u goonliba tuu ka sëmbë dë” (Tjab. 1:8). Di santa jeje u Jehovah mbei taa söwan aiti milion ku hafu dinima u Jehovah dë a hii së u goonliba. Söseei u ta libi kuma baaa ku sisa u di di santa jeje u Gadu ta heepi u fuu ko abi bunu fasi. Dee fasi kuma lobi, piizii, kötöhati, pasensi, tjalihati u sëmbë, bunuhati, biibi, saapifasi, ku di duwengi di u ta duwengi useei (Gal. 5:22, 23). Di santa jeje da wan gaan gudu seei di u feni! w20.05 bld. 28 pal. 10; bld. 29 pal. 13

Sömëni soni dë di ta mbei u biibi taa woo sa si dee famii ku dee mati fuu sabi, te Gadu weki de ko a libi baka. Te u luku di fasi fa Jehovah bi weki sëmbë ko a libi a di ten di pasa, nöö u ta si taa u sa dë ku di mëni taa te Jehovah o weki sëmbë ko a libi, nöö a o da de wan sinkii di dë kumafa de bi dë ufö de dëdë. Di soni dë ta mbei u dë ku di mëni tu taa Jehovah o mbei de ta fan, ta pakisei a di wan seei fasi, kumafa de bi ta du ën kölö sö ufö de dëdë. Hoi a pakisei taa Jesosi bi tei dëdë maaka ku duumi. Söseei a bi tei di weki di sëmbë o weki ko a libi, maaka ku di weki di sëmbë ta weki a duumi (Mat. 9:18, 24; Joh. 11:11-13). Te wan sëmbë weki a duumi, nöö a ta fan di wan seei fasi, a ta pakisei di wan seei fasi, söseei a ta mëni dee soni dee a bi sabi jeti ufö a go kandi. Luku di woto u Lazalosi. A bi dëdë fö daka longi kaa, nöö sinkii fëën bi bigi pondi. Ma di Jesosi bi weki ën ko a libi baka, dee sisa fëën bi si ën sabi wantewante, nöö Lazalosi seei bi sabi bumbuu taa dee sisa fëën di dë.​—Joh. 11:38-44; 12:1, 2. w20.08 bld. 14 pal. 3; bld. 16 pal. 8

So soni tooka a dee salufu Keesitu sëmbë ku dee woto sikapu. Ma Jehovah an lobi wan kulupu möön di wotowan. Wë u sa taki sö, u di a manda di Womi Mii fëën di a lobi, ko dëdë da dee salufuwan, ku dee woto sikapu tuu. Di soni di tooka a dee tu kulupu aki, hën da wan u de o go libi a liba ala, nöö di wotowan o libi a goonliba aki. De tuu musu hoi deseei a Gadu ku Keesitu (Ps. 31:23). A bunu fuu hoi a pakisei tu taa Gadu ta da hiniwan sëmbë di santa jeje fëën kumafa di sëmbë dë abi ën fanöudu, aluwasi ee di sëmbë dë wan salufuwan nasö wan woto sikapu. Jehovah ta paamusi hiniwan u dee dinima fëën taa de o feni gaan bunu a di ten di ta ko (Jel. 29:11). Te dee salufuwan ku dee woto sikapu ta ko makandi u mëni di dëdë u Jesosi, nöö de ta feni di okasi u gafa Gadu ku Jesosi u dee soni di de du da de, u di de seeka soni da de u de sa libi u teego. Di mëni di u ta mëni di dëdë u Keesitu, da di möön fanöudu komakandi di u dee Keesitu sëmbë ta hoi hiniwan jaa. w21.01 bld. 18 pal. 16; bld. 19 pal. 19

Gaansë u dee kemeente an ta abi sëmbë di ta njan di bëëë ta bebe di win. Di soni aki ta lei taa gaansë u dee sëmbë dee nango mëni di dëdë u Jesosi, o libi a goonliba aki. Wë nöö faandi mbei dee sëmbë aki nango mëni di dëdë u Jesosi? Wë di seei soni di ta mbei sëmbë nango te wan mati u de ta tööu, hën nöö ta mbei dee sëmbë aki nango mëni di dëdë u Jesosi tu. Te tu sëmbë ta tööu, nöö dee mati u de nango a di tööu u de, u di de kë lei de taa de lobi de, söseei u di de kë heepi de a soni. Wë sö nöö dee woto sikapu nango mëni di dëdë u Jesosi, u di de kë lei Jesosi ku dee salufuwan taa de lobi de, söseei taa de kë heepi de. De nango tu u di de kë lei taa de ta tei ën u bigi taa Jesosi ko dëdë da de, sö taa de sa libi u teego a goonliba aki. Wan woto fanöudu soni di mbei dee woto sikapu nango mëni di dëdë u Jesosi, hën da u di de kë piki Jesosi buka. Di Jesosi bi hoi di Ndeti Njanjan u Masa ku dee apösutu fëën, hën a bi piki de taa: „Un musu ta mëni di dëdë di mi o dëdë da unu” (1 Kol. 11:23-26). Di soni dë mbei dee woto sikapu ta mëni di dëdë u Jesosi, nöö de o ta du di soni aki u te na wan salufuwan dë a goonliba aki möön. w21.01 bld. 17 pal. 13-14

Ee u kë lei wan sëmbë taa u lobi ën tuutuu, nöö u musu ta du soni di ta lei taa u lobi ën. (Luku Jak. 2:17, 26.) Wë Jehovah lobi u (1 Joh 4:19). Nöö dee soni dee a sikifi a di Bëibel ta lei taa a lobi u tuutuu (Ps. 25:10; Lom. 8:38, 39). Ma na dee soni dee a ta piki u a di Wöutu fëën wanwan nöö ta mbei u dë seiki taa a lobi u. A ta du soni tu u lei taa a lobi u Jehovah bi da pasi u di Womi Mii fëën tja sitaafu fuu hedi, söseei a bi da pasi faa dëdë fuu hedi tu (Joh 3:16). Dee soni aki ta lei u gbelingbelin unfa Jehovah lobi u tjika. U ta lei taa u lobi Jehovah ku Jesosi, te u ta piki de buka a soni (Joh. 14:15; 1 Joh. 5:3). Jesosi bi piki u gbelingbelin taa u musu ta lobi u na u (Joh. 13:34, 35). U musu ta piki dee baaa ku dee sisa fuu taa u lobi de, ma u musu ta lei de tu unfa u lobi de tjika.​—1 Joh. 3:18 w21.01 bld. 9 pal. 6; bld. 10 pal. 8

Dee sëmbë dee Gadu salufu ku santa jeje, abi di biibi u de go libi ku Jesosi a liba ala u teego, nöö de ku Jesosi o tii di Könuköndë u Gadu. De o dë makandi ku Jesosi, de o ta si ën, de o ta fan ku ën, söseei de o ta du soni makandi ku ën (Joh. 14:2, 3). Dee sëmbë dee abi di biibi u libi a goonliba aki, seei o fii taa Jesosi lobi de, nöö a o buta pakisei a de tu. Hii fa dee sëmbë dë an o si Jesosi, tökuseei de ku ën o ko dë möön gaan mati, nöö de o piizii ku di libi di Jehovah ku Jesosi mbei taa de sa feni (Jes. 9:6, 7). Te u ta mbei möiti fuu ku Jesosi ko dë gaan mati, nöö u ta feni sömëni gaan bunu. U ta feni wini u di lei di a ta lei taa a lobi u, söseei u di heepi di a ta heepi u nöunöu kaa. U abi di gaandi fuu sa libi u teego. Ma di möön fanöudu soni, hën da di dë di u ku Jesosi dë mati, o mbei u ku hën Tata ko dë gaan mati tu. A dë wan gaandi seei taa u ku Jesosi sa dë mati! w20.04 bld. 25 pal. 15-16

Apösutu Paulosu bi ta sikifi di soni aki da dee salufu Keesitu sëmbë dee bi ta libi a Kolenti, dee bi o weki ko a libi baka u de sa libi a liba ala. Dee Keesitu sëmbë aki bi dë ’dee sëmbë dee Masa Gadu bi kai u de ko dë sëmbë fëën a wan apaiti fasi, u di de ku Masa Jesosi ko dë di wan’. Paulosu bi taki tu u „dee sëmbë dee nama ku Keesitu ma de dëdë kaa” (1 Kol. 1:2; 15:18; 2 Kol. 5:17). A wan woto buku u Bëibel, Paulosu bi sikifi taa: „Biga ee u ku ën bi dëdë makandi tuu, nöö na u ku ën [o] toona weki makandi tu nö?” (Lom. 6:3-5) Jesosi bi weki ko a libi baka kuma wan jeje, nöö a bi hopo go a liba ala. Dee soni aki seei o pasa ku hii dee salufuwan. Hën da de o pasa ku dee sëmbë „dee nama” ku Keesitu. Paulosu bi sikifi taa Keesitu bi dë „di fosu wan di weki baka” (1 Kol. 15:20). Jesosi bi dë di fosuwan di weki ko a libi baka kuma wan jeje di o libi u teego. w20.12 bld. 5-6 pal. 15-16

Dee salufu Keesitu sëmbë dee ta dëdë a di ten aki, nango wantewante a liba ala. Di soni aki apösutu Paulosu bi taki a 1 Kolenti 15:51, 52. Te dee baaa u Keesitu o weki ko a libi baka u de sa libi a liba ala, nöö de o dë waiwai seei. Di Bëibel ta piki u un wooko dee salufuwan aki o du te de o go a liba ala. Jesosi bi piki dee salufuwan taa: „Ee wan sëmbë wini dee soni dee ta tapa pasi dëën nöö a ta hoi go dou ku dee soni dee mi ta mandëën faa du, nöö di sëmbë naandë hën mi o da taki a dee nasiönnasiön u goonliba palalaa te dou. Nöö leti kumafa mi Tata da mi taki, nöö söseei mi o toona da di sëmbë dë taki tu.”​—Ako. 2:26, 27. w20.12 bld. 12 pal. 14-15

Di taki di apösutu Paulosu bi taki taa Jesosi da di fosuwan, ta lei taa woto sëmbë bi o weki ko a libi baka u de sa libi a liba ala tu. Dee apösutu ku dee woto sëmbë dee „nama ku Keesitu”, bi o waka a Jesosi baka tu (1 Kol. 15:18). Te di ten dou, nöö deseei bi o weki ko a libi baka a di wan seei fasi fa Jesosi bi weki ko a libi baka. Di weki di dee sëmbë dee „nama ku Keesitu” bi o weki ko a libi baka u de sa libi a liba ala, an bi bigi jeti a di pisiten di Paulosu bi ta sikifi di biifi da dee sëmbë u Kolenti. Paulosu bi taki taa di soni aki bi o pasa a di ten di ta ko. A bi taki taa: „Hiniwan sëmbë abi ën leti juu faa weki baka e. Nöö di fosu wan, hën da Keesitu, nöö baka fëën te a o toona ko a goonliba, nöö dee sëmbë fëën” (1 Kol. 15:23; 1 Tes. 4:15, 16). Nöunöu u ta libi a di ten di Jesosi „toona ko”, di Paulosu bi taki fëën. Dee apösutu ku woto salufu Keesitu sëmbë bi musu wakiti di ten aki, u de sa feni di paka u de u de go libi a liba ala. A sö wan fasi ’de ku Jesosi o dë makandi tu’.​—Lom. 6:5. w20.12 bld. 5 pal. 12; bld. 6 pal. 16-17

Apösutu Paulosu bi ta taki soni u sëmbë di bi o weki ko a libi ku wan sinkii u de sa libi a liba ala (1 Kol. 15:43, 44). Di Jesosi bi dë a goonliba aki, a bi abi libisëmbë sinkii. Ma di Gadu weki ën ko a libi baka, hën a ko dë wan jeje di ta da sëmbë libi. Wë sö nöö dee Keesitu sëmbë dee Gadu salufu, o weki ko a libi baka ku wan sinkii u de sa libi a liba ala. Paulosu bi taki taa: „Leti kumafa u dë aki u abi di wan sinkii kumafa di fosu sëmbë u goonliba bi abi, nöö söseei wan daka woo ko abi di wan sinkii kumafa di fosu sëmbë u Gadu Köndë abi” (1 Kol. 15:45-49). Hoi a pakisei taa Jesosi an bi weki ko a libi baka ku libisëmbë sinkii. Paulosu bi taki taa: „Dee sinkii fuu dee dë ku buuu u go dëdë poi aki, de an o sa go a Gadu Köndë söndö tooka e” (1 Kol. 15:50). Dee apösutu ku dee woto salufu Keesitu sëmbë an bi o weki go a liba ala ku wan sinkii di sa poi kaba a sösö. w20.12 bld. 11 pal. 10-12

Gadu bi mbei so u dee bakama u Keesitu sikifi soni, di ta taki u di weki di a o weki sëmbë u de sa libi a liba ala. Apösutu Johanisi bi taki taa: „Fa u dë aki u da miii u Masa Gadu tuu. Nöö wa sabi fa woo dë eti e. Ma u sabi nöö taa te a o ko nöö u seei wojo o si ën kumafa a dë, nöö woo tooka ko kuma hën seei” (1 Joh. 3:2). Di soni aki kë taki taa dee salufu Keesitu sëmbë an sabi unfa de o dë te Gadu o weki de u de sa libi a liba ala. Ma de o si Jehovah tuutuu te de go ala. Di Bëibel ta taki wantu soni di nama ku di soni dë. Dee Keesitu sëmbë dee Gadu salufu o dë ku Keesitu te a o puu „hii dee takima ku dee hedima, ku dee soni abi makiti a goonliba aki ku mundu ala tuu fiaa”. A o puu dëdë tu. Te u kaba fëën, Jesosi ku dee sëmbë dee o tii makandi ku ën o buta hii soni a Gadu basu, nöö de o saka deseei da Gadu tu (1 Kol. 15:24-28). Di ten dë o dë wan apaiti ten seei! w20.12 bld. 8 pal. 2

Dee Keesitu sëmbë dee hoi deseei a Jehovah, dee an abi di biibi u de go libi a liba ala makandi ku Keesitu o weki ko a libi baka ee a ko dë taa de lasi de libi. Di Bëibel ta taki taa apösutu Paulosu ku dee woto Keesitu sëmbë dee o go libi a liba ala o dë „dee fosu” sëmbë dee o weki ko a libi baka (Ako. 20:6). Di soni aki ta lei taa wan woto kulupu sëmbë o weki ko a libi baka, baka di weki di dee salufu Keesitu sëmbë o weki ko a libi. Di soni aki ta kai ku di soni di Jöpu bi ta biibi taa bi o pasa ku ën a di ten di ta ko (Jöpu 14:15). Dee sëmbë dee dë „sëmbë [u Keesitu]” a di pisiten di a toona ko baka, o dë makandi ku ën a liba ala, te a o poi hii dee tii u di goonliba aki kaba a sösö. „Di kaba lasiti felantima” fuu de kai „dëdë” seei, an o dë möön. Wë an dë u taki taa dee sëmbë dee o weki ko a libi baka u de sa libi a liba ala, an o dëdë nöiti möön (1 Kol 15:23-26). Dee sëmbë dee abi di biibi u de libi a goonliba sa biibi di soni di Paulosu bi taki di sikifi a di tëkisi u tide. Wë an dë u taki taa sëmbë di an ta libi a wan leti fasi an o sa go libi a liba ala. Hën da Paulosu bi ta taki u sëmbë dee o weki ko a libi baka u de libi a goonliba aki. w20.12 bld. 6-7 pal. 18-19

Ma kandë u sa ta hakisi useei taa: ’Unfa mi sa sabi ee Jehovah dë kabakaba u da mi paadon tuutuu?’ Wë ee i ta hakisi iseei di soni aki, nöö a ta lei kaa taa Jehovah sa da i paadon. Wantu jaa pasa Di Hei Wakitimawosu bi taki taa: „U sa ta mbei dee seei föutu sömëni pasi. A sa ta taanga da u fuu disa wan suwaki fasi di u abi sensi di wa bi ta dini Gadu jeti. . . . Ma na si kuma i du wan gaan zöndu di nöiti Jehovah o sa da i paadon fëën. Di soni dë Saatan bi o kë fii pakisei. Di hati di di soni di i du ta hati i, ta lei taa ja dë wan hogihati sëmbë, söseei a ta lei taa Jehovah sa da i paadon. Abi sakafasi go dou, nöö i begi Gadu faa da i paadon, faa heepi i fii ko abi wan limbolimbo háti, fii ko ta fii möön bunu, söseei begi ën faa heepi i fu ja mbei di seei föutu dë möön. Apösutu Paulosu bi du sömëni zöndu ufö a bi ko toon wan Keesitu sëmbë. Paulosu an bi fëëkëtë andi ku andi a bi du (1 Tim. 1:12-15). Ma a bi ta si di lusupaima kuma wan kado di Gadu bi dëën. Paulosu an bi mbei háti fëën fon mën tumisi poi. Ma a bi ta buta pakisei a di du di a bi musu du hii soni di a bi sa, da Jehovah. w20.11 bld. 27 pal. 14; bld. 28 pal. 17

Saatan ta wooko ku sömëni soni u mbei u du zöndu. Ma andi u ta du te a dë sö? Wë a sa pasa taa u si dee soni aki kuma soni di an hogi sö. Kandë u sa pakisei taa: ’Di soni aki an hogi sö, biga ee mi du ën seei de an o puu mi a di kemeente.’ Wa musu pakisei sö. Ma a bunu fuu hakisi useei dee soni aki: ’Saatan ta wooko ku di soni aki u mbei ma abi gaan lesipeki da Jehovah möön u? Ee mi du soni di mi hati kë, mi o mbei taa Jehovah an kisi gafa u? Di soni aki o mbei mi ku Gadu ko dë möön gaan mati ö, naa a o mbei taa mi ku ën poi?’ Pakisei fundu u dee hakisi aki. Begi Jehovah hakisi ën faa da i köni fii sa piki dee hakisi aki söndö fii ganjan iseei. Di soni aki sa tjubi i. A sa heepi i fu ja du zöndu, kumafa Jesosi seei an bi du zöndu, ma a bi taki taa: „Hetji pasa kumutu a mi fesi aki, ju didibi Saatan!” (Mat. 4:10). Hoi a pakisei taa, ee wa ta du soni ku hii u hati nöö woto soni o ta puu u pakisei. w20.06 bld. 12-13 pal. 16-17

U ta saka useei a Jehovah basu, u di u sabi taa hii juu a ta sabi andi möön bunu da u (Ef. 4:22-24). Ee u abi sakafasi, nöö woo ta tei taa dee soni di Jehovah kë, dë fanöudu möön dee useei kë, söseei woo ta si wotowan hei möön u. Di soni aki o mbei u ku Jehovah dë gaan mati, söseei u ku dee baaa ku dee sisa u di kemeente o dë gaan mati tu (Fil. 2:3). Ee wa ta köni, nöö u sa ko dë kuma dee sëmbë u di goonliba aki dee abi gaanfasi, söseei dee ta pakisei deseei nöö. A kan taa di soni aki bi ta miti dee fesiten Keesitu sëmbë, möönmöön te u luku di soni di apösutu Paulosu bi sikifi da dee Keesitu sëmbë u Loomë. A bi taki taa: „Mi ta fan ku hiniwan fuunu taa ja musu luku i seei hei möön fa i dë e. Ma i musu ta wegi i seei ku bumbuu pakisei”. Paulosu an bi kë taki taa wa musu ta lesipeki useei. Ma sakafasi o heepi u fu wa si useei möön fa a dë fanöudu. w20.07 bld. 2 pal. 1-2

A di ten di pasa, Könu Asa ku dee woto sëmbë an bi feni di okasi u de dini Jehovah fiifii u nöömö. Wan gaan kulupu sodati bi kumutu a di köndë Etiopia ta ko a de. De bi pasa wan milion sëmbë. Di hedima u dee sodati dë de bi ta kai Zelaki, nöö Zelaki bi dë seiki taa dee sodati fëën bi o sa feti wini Juda. Könu Asa an bi luku ee dee sodati fëën bi hia nasö ee de an bi hia, ma a bi buta futoou a Jehovah di Gadu fëën. Asa bi begi Jehovah, hën a hakisi ën taa: „Jehovah, ju di Gadu fuu, mi ta begi i, heepi u baa. Biga a ju wë u buta futoou, a i në u hopo ko feti ku di gaan kulupu sodati aki (2 Klon. 14:11). Dee sodati u Etiopia bi hia bëina tu toon möön dee sodati u Asa. Ma Asa bi sabi taa Jehovah taanga, söseei a bi sabi taa Jehovah bi o heepi dee sëmbë fëën. Nöö Jehovah an bi dëën sen. Dee sodati u Etiopia bi lasi di feti (2 Klon. 14:8-13). Wa sabi finifini andi o pasa ku hiniwan fuu a di ten di ta ko. Ma u sabi taa di dini di dee dinima u Jehovah ta dini ën fiifii a di ten aki an o dë u nöömö. Hoi a pakisei taa Jesosi bi taki taa a dee lasiti daka, „hii sëmbë [bi] o ta buuse” dee bakama fëën.​—Mat. 24:9. w20.09 bld. 17-18 pal. 14-16

Na wan fuu lobi te sëmbë ta kosi u. Ma ee a ko dë taa dee felantima fuu kosi u, hën u ta booko u hedi tumisi ku dee soni di de taki, nöö di soni dë sa mbei u lasi hati (Nöng. 24:10). Wë nöö unfa u musu si di kosi di dee felantima fuu ta kosi u? Wë leti kuma apösutu Paulosu, useei sa ’ta wai te sëmbë ta kosi u’ tu. Faandi mbei? Biga te sëmbë ta kosi u, ta du ku u, nöö di soni dë ta lei taa u dë tuutuu bakama u Jesosi (1 Pet. 4:14). Jesosi bi taki taa sëmbë bi o du ku dee bakama fëën (Joh. 15:18-20). Di soni dë hën bi pasa ku dee fesiten Keesitu sëmbë. A di ten dë, dee sëmbë dee bi ko ta si soni kuma dee Giiki sëmbë, bi ta si dee Keesitu sëmbë kuma don sëmbë, söseei kuma sëmbë di suwaki a soni. A dee Dju sëmbë dendu seei, sëmbë bi ta si dee Keesitu sëmbë kuma sëmbë di „an go a siköö wan bëtë”. Sö de bi ta si apösutu Petuisi ku apösutu Johanisi (Tjab. 4:13). A bi ta djei kuma dee Keesitu sëmbë an bi sa du na wan soni. De an bi ta nama ku politiki soni. Fëën mbei de an bi sa abi taki a di fa soni bi ta waka a di köndë. De an bi nango a sodati, nöö a bi djei kuma de an bi sa’ u feti, söseei a bi djei kuma de an bi sa heepi deseei u sëmbë an du hogi ku de. Sëmbë an bi ta lesipeki de tu. Dee fesiten Keesitu sëmbë bi mbei di fasi fa sëmbë bi ta si de tapa de u de an dini Gadu go dou ö? Nö. w20.07 bld. 14-15 pal. 3-4

Apösutu Johanisi bi lobi dee baaa ku dee sisa fëën, nöö a bi kë u de abi wan taanga biibi. Te u ta lesi dee dii biifi dee a bi sikifi da de, nöö u ta si unfa a bi lobi de tjika, söseei unfa a bi ta booko hën hedi ku de tjika. U ta wai seei u di u sabi taa dee womi ku dee mujëë dee o go tii makandi ku Jesosi a liba ala, da sëmbë di lobi wotowan, söseei di ta booko de hedi ku wotowan, kuma Johanisi (1 Joh. 2:27). Be wa fëëkëtë dee soni dee di a piki u. Boo mbei hii möiti fuu ta piki Jehovah buka a hii futu. Lei soni a di Wöutu fëën, nöö buta futoou nëën. Mbei möiti fii ko ta möön biibi Jesosi. Koti pasi da dee lei u libisëmbë ku dee soni di dee sëmbë dee bia baka da di biibi, ta lei sëmbë. Köni be ja ta du kuma i ta dini Gadu, nöö i ta du hogi tjubitjubi. Hoi dee wëti u Jehovah dee a da u fuu hoi. Söseei boo ta heepi dee baaa ku dee sisa fuu, ta da de paadon, u de sa abi wan taanga biibi go dou. Te u ta du sö, nöö woo sa piki di lei u Masa Gadu go dou, aluwasi andi ta pasa. w20.07 bld. 24-25 pal. 15-17

Jehovah da hiniwan u dee dinima fëën wan wooko a di ölganisaasi fëën. Hii fa u abi tookatooka wooko ta du a di ölganisaasi u Jehovah, tökuseei u abi useei fanöudu. Apösutu Paulosu bi kë taki taa na wan fuu sa luku wan woto dinima u Jehovah, nöö u piki ën taa: „Ma abi i fanöudu” (1 Kol. 12:21). Ee u kë libi fiifii ku useei a di kemeente, nöö u musu ta lesipeki u na u, söseei u musu ta wooko makandi (Ef. 4:16). Te u ta wooko makandi, nöö hii sëmbë o ta fii bunu, söseei hii sëmbë a di kemeente o abi wan taanga biibi. Jehovah bi wooko ku di santa jeje fëën u buta hii dee gaanwomi a wooko. Ma tökuseei hiniwan u de abi soni di de sa’ u du bunu (1 Kol. 12:17). Kandë so u de an dë gaanwomi longi poi, nöö kandë de an abi öndöfeni sö kuma dee wotowan. Kandë wotowan an sa du hia soni, u di de ko gaandi kaa, nasö u di de dë ku suwaki. Ma aluwasi ee sö a dë, tökuseei na wan gaanwomi musu si kuma an abi di wotowan fanöudu. Ka faa dë sö, de sa wooko ku di soni di Paulosu bi taki a Loomë 12:10. w20.08 bld. 26 pal. 1-2; bld. 27 pal. 4

Jehovah ta wooko ku di pisi u di ölganisaasi fëën di dë a goonliba aki, u heepi u fuu sa ta waka a di pasi di ta tja sëmbë go feni libi. Te di ölganisaasi u Gadu heepi u fuu ko ta fusutan wan lei u Bëibel a wan njunjun fasi, söseei te a heepi u fuu ko fusutan unfa u musu libi, nöö u ta dë kabakaba u du soni a di fasi dë. Ma andi u ta du te di ölganisaasi tooka so soni di nama ku u? Boo taa dee baaa taa de o sei di Könuköndë zali ka u nango a komakandi. Woo ta dë waiwai go dou ee u hoi a pakisei taa u ta wooko da Jehovah, söseei taa hën ta tii di ölganisaasi fëën (Kol. 3:23, 24). Könu Dafiti da wan sëmbë di u sa djeesi a di fasi fa a bi du soni, di a bi ta buta möni u de mbei di Wosu u Gadu. A bi taki taa: „Ambë da mi, nöö ambë da dee sëmbë u mi, sö taa u sa da i dee lö soni aki? Biga i da u hii soni u abi, nöö dee soni i da u, de u ta toona da i baka” (1 Klon. 29:14). Te u ta da möni, nöö useei ta toona da Jehovah dee soni dee a bi da u. Ma tökuseei Jehovah ta wai seei te u ta tei di ten fuu, di kaakiti fuu, ku di möni fuu, u du di wooko fëën.​—2 Kol. 9:7. w20.11 bld. 22-23 pal. 14-16

Na te u dee Kotoigi u Jehovah ta heepi hia sëmbë u de ko a di ölganisaasi fëën ufö a ta dë taa di wooko fuu ta waka bunu (Luk. 8:11-15). Solanga u ta peleiki go dou, ta lei sëmbë soni u Bëibel, nöö Jehovah o si taa di wooko fuu ta waka bunu. Faandi mbei? Wë u di a di lö fasi dë, u ta lei taa u ta du di soni di hën ku di Womi Mii fëën manda u fuu du (Maik. 13:10; Tjab. 5:28, 29). Di soni di woo taki aki musu da u taanga fuu peleiki nöunöu. Di soni di u kë taki, hën da di kaba u di goonliba aki ta ko seei zaa sö! Ten an fika hia möön fuu paaja di bunu buka da sëmbë, u de sa feni libi. Ja musu naanaa, söseei na si kuma i musu u wakiti u hii soni ko ta waka bunu a i libi, ufö i sa du di gaan fanöudu wooko aki. Mbei möiti nöunöu fii sa ko dë kabakaba u peleiki. Mbei möiti nöunöu fii ko abi degihati, fii ko sa’ u duwengi iseei, söseei fii ko sabi möön soni u Bëibel. Wooko makandi ku dee möön leki aiti milion sëmbë dee ta du di peleikiwooko a hii së u goonliba, nöö joo feni di piizii di Jehovah ta da sëmbë (Neh. 8:10; Luk. 5:10). Mbei hii möiti fii sa du di wooko aki ka i sa du ën dou, söseei i musu ta du ën u te Jehovah taki taa di wooko kaba. w20.09 bld. 7 pal. 18-20

Wan musu mbei di kë di u kë möön gudu puu u pakisei a di diniwooko fuu. ’Dee gudu u di goonliba aki sa ganjan u’, nöö de sa mbei wa ko lobi Jehovah sö möön. De sa mbei tu taa wa tei di Wöutu u Gadu u bigi möön, söseei taa wa ko abi peesa u konda soni fëën da wotowan möön (Mat. 13:22). Ee u kë tjubi dee gudu dee Jehovah da u, nöö u musu hopo du soni wantewante te u si taa hogi ta ko.U sa seeka soni a fesi fuu sabi andi woo du ee wan soni di an bunu ko a teefei, nasö a Internet. Dee soni aki sa dë fanafiti libi a di së u manu ku mujëë soni, hogidu, ku poipoi lei u sëmbë di kumutu a di tuutuu lei. Ee u seeka useei a fesi da soni di sa miti u, nöö woo sa du wan soni wantewante sö taa u ku Jehovah sa dë mati go dou (Ps. 101:3; 1 Tim. 4:12). U musu tjubi dee gaan gudu dee Jehovah da u. Dee soni aki da dee lei u Bëibel ku di gaandi di u abi u heepi wotowan u deseei sa ko sabi soni u Bëibel. Te u du dee soni aki, nöö háti fuu an o ta fon u, libi fuu o ta waka bunu, söseei woo dë waiwai u di u ta heepi wotowan u de ko sabi soni u Jehovah. w20.09 bld. 29-30 pal. 16-19

I dopu kaa u? Ee sö, hën da i lei sëmbë taa i ta biibi a Jehovah, söseei taa i kë dini ën a di ölganisaasi fëën. A di ten aki, Jehovah ta tii di ölganisaasi fëën a wan fasi di ta lei u un pei sëmbë a dë, dee soni dee a kë du, ku dee wëti fëën. Luku dii u dee fasi di Jehovah abi, dee dë u si a di ölganisaasi fëën. Di fosu soni, hën da „Gadu an ta luku fesi” (Tjab. 10:34). U di Jehovah lobi u, mbei a da u di Womi Mii fëën ’kuma wan paima u paka puu u a hogi basu’ (1 Tim. 2:6; Joh. 3:16). Jehovah ta mbei dee sëmbë fëën konda di bunu buka da sëmbë di kë haikëën. A sö wan fasi a sa heepi sömëni sëmbë u de feni wini u di lusupaima. Di u tu soni da, Jehovah Gadu an dë wan Gadu di ta du soni fanjanfanjan (1 Kol. 14:33, 40). Fëën mbei u sa dë ku di mëni taa dee dinima u Jehovah an o ta du soni fanjanfanjan te de ta dini ën. Di u dii soni da, Jehovah da di „Gaan Leima” fuu (Jes. 30:21). Fëën mbei di ölganisaasi fëën ta möön buta pakisei a di lei di a musu ta lei sëmbë soni u Bëibel. De ta lei sëmbë soni u Bëibel a di kemeente, söseei te de dë a di peleikiwooko. w20.10 bld. 20 pal. 1-3