Höndima-liba

Jöpu ku Jehovah bi dë gaan mati. A bi pai hia mii, a bi abi wan suti wosudendu libi, nöö a bi gudu seei (Jöpu 1:1-5). Ma a wan kodo daka dendu, hën a lasi bëina hii soni di a bi abi. Dee mbeti fëën da dee fosu soni di a lasi (Jöpu 1:13-17). Hën baka di dë, hën hii dee mii fëën tuu dëdë. Pakisei unfa a ta hati wan mama ku wan tata gaanfa seei te wan mii u de lasi libi. Nöö i sa fusutan unfa di soni aki bi hati Jöpu ku hën mujëë tjika, di hii dee teni mii u de tuu lasi libi a wan kodo daka. Fëën mbei Jöpu tënë di koosu di bi dë nëën sinkii, hën a tjökö kini a goon ta bai ta këë! (Jöpu 1:18-20) Baka di dë, Saatan bi mbei Jöpu kisi wan gaan taku siki di mbei sëmbë bi ko ta si ën kuma sösö sëmbë (Jöpu 2:6-8). Ufö di soni aki bi miti Jöpu, nöö Jöpu bi dë wan sëmbë di hii sëmbë bi ta lesipeki. Sëmbë bi lo’ u go suku köni lai nëën (Jöpu 31:18). Ma nöunöu sëmbë an bi ta kë ko zuntu ku ën möön. Dee baaa fëën an bi dë nëën du möön, söseei dee mati fëën ku dee futuboi fëën seei an bi dë nëën du möön!​—Jöpu 19:13, 14, 16. w22.06 bld. 21 pal. 5-6

Baka te u dopu, nöö a dë fanöudu taa hii u tuu du di soni di apösutu Paulosu bi piki dee Keesitu sëmbë u Efeise. A bi da de taanga u de „go a fesi a di biibi” (Ef. 4:13). U dë seiki taa i lobi Jehovah. Ma i sa ko lobi ën möön gaanfa. Unfa u sa du di soni aki? Wë apösutu Paulosu bi lei u wan fasi fa u sa du di soni aki a Filipi 1:9. Paulosu bi begi Gadu da dee sëmbë u Filipi sö taa di lobi u de sa ta „göö nango nöömö”. Di soni aki kë taki taa di lobi di u abi da Jehovah sa göö. Unfa u sa du di soni aki? Wë u sa du ën te u ta ’ko sabi dee tuutuu woto u Masa Gadu finifini, söseei te u ta ko fusutan limbolimbo andi da di kë u Gadu’. Möön u ta ko sabi Jehovah, möön woo ko lobi ën, söseei möön woo ko lobi dee fasi fëën ku di fasi fa a ta du soni. Woo ta kë du soni di ta mbei a ta wai ku u, söseei nöiti woo kë du soni u mbei a tjali. Woo ta mbei hii möiti u ko fusutan andi a kë fuu du, söseei unfa u sa du ën. w22.08 bld. 2-3 pal. 3-4

Dee soni dee dë sikifisikifi a di buku Akoalimbo, an dë da hii sëmbë, ma a dë da u dee dinima Gadu. U di u da sëmbë u Gadu, mbei an musu bigi da u te u jei taa u ta heepi mbei dee tjabukama woto dee sikifi a di buku Akoalimbo pasa tuutuu. Apösutu Johanisi bi taki na un ten dee tjabukama woto dë bi o pasa tuutuu. A bi taki taa: „Di daka di mi si dee soni aki, nöö a bi dë di daka u Masa” (Ako. 1:10). Johanisi bi taki di soni aki a di jaa 96 baka Keesitu, nöö a di ten dë „di daka u Masa” an bi dou jeti seei (Mat. 25:14, 19; Luk. 19:12). Dee woto tjabukama woto u Bëibel, ta lei taa di daka dë bigi a di jaa 1914, di Jesosi toon Könu a liba ala. Sensi di jaa dë, hën dee tjabukama woto dee nama ku dee sëmbë u Gadu, dee dë a di buku Akoalimbo, bigi ta pasa tuutuu. Awa, u ta libi a „di daka u Masa”!​—Ako. 1:3. w22.05 bld. 2 pal. 2-3

Di ganjan tjabukama dë ku di mbeti seei tuu „de kisi ku libi vinde vioo tuwë go a di gaan faja kuma ze di ta kisi ku zuwalufu fu nöömö.” Di soni aki ta lei u taa Gadu o poi dee tiima kaba a sösö, hii fa de o dë ta tii jeti. Unfa u musu fusutan di soni aki? U di u da Keesitu sëmbë, mbei u musu ta hoi useei a Gadu, ku di Könuköndë fëën (Joh. 18:36). Wa musu nama ku politiki soni u di goonliba aki. Di soni aki sa dë wan taanga soni u du, u di dee tiima u di goonliba aki ta kë fuu taki soni, nasö fuu du soni di ta lei taa u ku de dë a wan së. Dee sëmbë dee ta du andi dee tiima aki kë, ta kisi di sitampu u di taku mbeti (Ako. 13:16, 17). Ma Jehovah an o wai ku dee sëmbë dee ta kisi di sitampu dë, söseei de an o feni di libi u teego (Ako. 14:9, 10; 20:4). A dë fanöudu fu wa nama ku politiki soni u di goonliba aki, aluwasi ee dee tiima ta duwengi u fuu tei di së u de! w22.05 bld. 10-11 pal. 12-13

Wan maaka di i sa buta da iseei, hën da fii lei wan wooko u heepi di ölganisaasi. Useei o sa du möön soni a di dini di u ta dini Jehovah, te u ta mbei möiti u du soni a wan möön bunu fasi. Pakisei dee sömëni baaa ku sisa di de abi fanöudu u heepi mbei Bëtëli, kamian ka u ta hoi gaan komakandi ku Könuköndë zali. Sömëni baaa ku sisa ko sa u du dee wooko aki, u di de ta wooko makandi ku wotowan di sa’ u du dee wooko aki kaa. A di ten aki, nöö baaa ku sisa tuu ta lei unfa de musu seeka dee kamian ka u ta dini Gadu. A dee lö fasi aki Jehovah „di kaba Tiima u mundu fu nöömö” ku Jesosi Keesitu „di kaba hei Könu a hii könu liba”, ta wooko ku dee baaa ku sisa u du gaan soni da de (1 Tim. 1:17; 6:15). U kë wooko ku di köni fuu u tja gafa ko da Jehovah, ma na u tja gafa ko da useei.​—Joh. 8:54. w22.04 bld. 24 pal. 7; bld. 25 pal. 11

Salumon bi gudu te na soni, nöö a bi ta dë a wan gaan waiti wosu (1 Kön. 10:7, 14, 15). Jesosi hën an bi abi soni wan bëtë, söseei an bi abi fu hënseei wosu (Mat. 8:20). Ma tökuseei hii dee tu womi aki tuu bi ta si gudu a di soifi fasi, u di Jehovah Gadu hën bi da de di köni di de bi abi. Salumon seei bi fusutan taa te u abi möni, nöö u sa feni dee soni dee u abi fanöudu a di libi, ku so u dee soni dee u ta kë. Ma hii fa Salumon bi gudu gaanfa seei, tökuseei a bi fusutan taa soni dë di dë fanöudu möön möni. A bi taki taa: „A möön bunu fuu abi wan bunu në, ka fuu abi hia gudu” (Nöng. 22:1). Salumon bi taki tu taa dee sëmbë dee lobi möni an lo’ u dë tifeedi ku dee soni di de abi (Peleik. 5:10, 12). Nöö a bi taki taa wa musu ta si kuma möni da di möön fanöudu soni, u di aluwasi ee u abi hia möni, tökuseei u sa lasi ën wan pasi vou sö.​—Nöng. 23:4, 5. w22.05 bld. 21 pal. 4-5

Te u ta kai pakisei a dee gaan bunu dee u ta feni a di ten aki, nöö u ku Jehovah ta ko dë möön gaan mati. Söseei te u ta kai pakisei a dee bunu dee Jehovah o mbei u feni a di ten di ta ko, nöö woo möön biibi taa woo sa ta dini ën u teego. Dee soni aki o heepi u nöunöu kaa fuu dini Jehovah waiwai go dou. Jehovah „o hopo” du wan soni da u te a o poi di hogi goonliba aki kaba a sösö (Jes. 30:18). U dë seiki taa Jehovah, di „Gadu di ta kuutu soni a wan leti fasi” o poi di goonliba u Saatan a di soifi ten (Jes. 25:9). U ku Jehovah ta wakiti ku pasensi u di daka dou ka a o puu u a fuka. Ma nöunöu u musu dë kabakaba u ta begi go dou, u ta lei soni u di Wöutu u Gadu, söseei u ta du dee soni dee u ta lei. Boiti di dë, u musu dë kabakaba u ta kai pakisei a dee gaan bunu dee Jehovah ta mbei u ta feni. Te u ta du dee soni aki, nöö Jehovah o heepi u fuu dini ën waiwai go dou. w22.11 bld. 13 pal. 18-19

Hii fa di Bëibel an ta taki soni u di dopu u Timoteo, tökuseei u sa pakisei unfa hën mama Euniki, bi sa ta fii di daka dë (Nöng. 23:25). Euniki bi lei di womi mii fëën soni faa ko lobi Jehovah ku di womi mii fëën, Jesosi Keesitu. Timoteo mama ku hën tata an bi ta dini di seei Gadu. Hën tata bi dë wan Giiki sëmbë, nöö hën mama ku hën avo bi dë Dju (Tjab. 16:1). A kan taa Timoteo bi ko bigi kaa di hën mama ku hën avo bi toon Keesitu sëmbë. Ma hën tata an bi ko toon wan Keesitu sëmbë. Undi u dee biibi Timoteo bi o tei? Kuma Euniki, dee mujëë dee dë Keesitu sëmbë, lobi dee sëmbë u de. Fëën mbei de kë heepi dee mii u de u de ko dë gaan mati u Jehovah. Nöö di Gadu fuu ta si dee möiti di de ta mbei u gaan soni (Nöng. 1:8, 9). Jehovah heepi sömëni mujëë u de heepi dee mii u de u de ko lobi ën, söseei u de dini ën. w22.04 bld. 16 pal. 1-3

Abiti möön Jehovah o mbei dee tiima u di goonliba aki du andi a abi a pakisei. Andi o pasa bakaten? Dee tiima, nasö dee „teni könu” o du ku hii dee poipoi keiki, nöö de o poi de kaba a sösö (Ako. 17:1, 2, 12, 16). Unfa u du sabi taa abiti möön de o booko di Gaan Babilon kaba a sösö? Fuu piki di hakisi aki, nöö a bunu fuu hoi a pakisei taa di gaan lio de kai Efaata bi ta tjubi wan pisi u di awooten foto Babilon. Di buku Akoalimbo ta tei dee milionmilion sëmbë dee ta wooko makandi ku di Gaan Babilon, maaka ku „dee wata” (Ako. 17:15). Ma a ta piki u tu taa dee wata aki o „dëë”. Di soni aki kë taki taa sömëni sëmbë o go disa dee poipoi keiki u goonliba (Ako. 16:12). Wë di soni aki ta pasa tuutuu a di ten aki, u di sömëni sëmbë an nango a keiki möön, nöö de ta suku heepi a woto kamian da dee fuka u de. w22.07 bld. 5-6 pal. 14-15

Te u ta da sëmbë paadon, nöö u ta lei taa u ta tei di tjalihati di Gadu abi da u u bigi. A wan woto di Jesosi bi konda, a bi tei Jehovah maaka ku wan womi di bi piki wan saafu fëën taa an abi fu paka di gaan paima di a bi musu pakëën möön. Ma di seei saafu aki an bi abi tjalihati u wan woto saafu, di bi musu pakëën wan möni di an bi hia kuma di a bi musu paka hën masa (Mat. 18:23-35). Andi Jesosi bi kë lei u ku di woto aki? Ee u ta tei di tjalihati di Jehovah abi da u u bigi tuutuu, nöö useei o ta da wotowan paadon (Ps. 103:9). Wan Hei Wakitimawosu bi taki taa: „Aluwasi un mëni pasi u da wotowan paadon, tökuseei an o dou di mëni pasi di Jehovah da u paadon”. Te u ta da wotowan paadon, nöö Jehovah o da u paadon tu. Jehovah abi tjalihati da dee sëmbë dee abi tjalihati u wotowan (Mat. 5:7). Jesosi bi tja di soni aki ko a limbo di a bi lei dee bakama fëën fa de musu begi.​—Mat. 6:14, 15. w22.06 bld. 10 pal. 8-9

Jesosi bi ko a goonliba aki kuma wan libisëmbë. Nöö a bi djeesi hën Tata bunu seei a dee fasi fëën (Joh. 14:9). Jesosi hën heepi u fuu ko sabi Jehovah, söseei fuu ko lobi ën. U ta feni wini u dee soni dee Jesosi ta lei u, ku di fasi fa a ta tei fesi a di kemeente a di ten aki. A lei u fa u musu libi, sö taa Jehovah sa feni u u bunu. Söseei hii u tuu sa feni wini u di dëdë u Jesosi. Wë baka di Jehovah weki Jesosi ko a libi baka, hën Jehovah lei taa a tei ën u bigi seei taa Jesosi paka di paima u „puu hii dee zöndu fuu tuu fuu ta dë limbolimbo” (1 Joh. 1:7). Nöö nöunöu a dë wan makiti Könu di an sa dëdë nöiti möön. Abitimöön, Jesosi o makisa di sindeki nëën hedi (Ken. 3:15). Dee dinima u Gadu o wai gaanfa seei te de kii Saatan puu a pasi. Ma u musu hoi dou solanga di ten dë an dou jeti. U sa futoou di Gadu fuu. A o mbei dee mii u di mujëë mbei „hii föluku u goonliba” feni gaan bunu. w22.07 bld. 18 pal. 13; bld. 19 pal. 19

Te u buta maaka, nöö u musu hoi a pakisei taa soni sa tooka. Faandi mbei u musu hoi di soni aki a pakisei? Wë u di wa sabi unfa soni o waka a di libi fuu. Boo luku wan woto u fusutan di soni aki. Apösutu Paulosu bi heepi seti wan njunjun kemeente a di foto Tesalonika. Ma u di sëmbë bi ta du ku de, mbei Paulosu bi musu kumutu a di foto (Tjab. 17:1-5, 10). Ee Paulosu bi fika a di foto, nöö a bi sa mbei taa hogi miti dee baaa ku sisa fëën. Ma tökuseei Paulosu bi mbei möiti u heepi de go dou. A bi fiti hënseei a di fasi fa soni bi tooka nëën libi. Bakaten hën a manda Timoteo u go heepi dee njunjun Keesitu sëmbë u Tesalonika, u de ko abi wan taanga biibi (1 Tes. 3:1, 2). Dee sëmbë u Tesalonika bi musu u ta wai. U sa lei wan soni u di soni di bi miti Paulosu a Tesalonika. So juu u sa buta taa u kë du wan soni a di dini di u ta dini Jehovah, ma tökuseei soni sa tooka di sa mbei taa wa sa dou di maaka fuu (Peleik. 9:11). Ee sö a dë da i, nöö dë kabakaba u buta wan woto maaka di i sa dou. w22.04 bld. 25-26 pal. 14-15

Dee soni dee Jehovah paamusi u da di ten di ta ko, ta da u kötöhati. Boo luku wantu soni di sikifi a Bëibel di sa da u taanga te tesi ta miti u. Di Bëibel ta piki u taa soni an dë di „sa paati u ku di lobi di Gadu lobi u” (Lom. 8:38, 39). Jehovah ta piki u tu taa a „dë zuntu ku hii dee sëmbë dee ta kai ën” te de ta begi (Ps. 145:18). Jehovah ta piki u taa te u ta suku heepi nëën, nöö woo sa hoi dou aluwasi un fuka miti u, söseei woo sa ta dë waiwai hii fa fuka ta miti u (1 Kol. 10:13; Jak. 1:2). Di Wöutu u Gadu ta mëni u taa dee fuka dee ta miti u a di ten aki dë u wan kölö pisiten nöö, te u tei ën maaka ku dee bunu dee woo feni a di ten di ta ko (2 Kol. 4:16-18). Jehovah ta paamusi u taa a o kii Saatan Didibi ku dee sëmbë dee ta djeesi ën, u di de ta mbei taa fuka ta miti u (Ps. 37:10). I sabi wantu Bëibel tëkisi a hedi di sa heepi i fii hoi dou te fuka o miti i ö? w22.08 bld. 11 pal. 11

I hakisi iseei wan daka ee joo sa ta libi ku dee wëti u Jehovah u nöömö u? Jehovah bi paamusi u taa di letilibi fuu sa „hia kuma seki wata a ze” (Jes. 48:18). Boo taa i dë taanputaanpu a wan ze bandja ta luku fa di wata ta seki nango ta ko nöömö. I bi o dë ta booko i hedi ta hakisi iseei ee wan daka o ko ka di wata an o ta seki möön u? Wë nönö! U di i sabi taa an o tapa möönsö. Di letilibi fii sa dë leti kuma dee seki wata a ze! Unfa sö? Wë te i kë du wan soni, nöö hoi a pakisei andi Jehovah bi o kë fii du, nöö i du ën. Hii juu di lobihati Tata fii o dë ku i u da i taanga, söseei u heepi i fii sa ta libi a wan leti fasi hiniwan daka, aluwasi unfa di soni di i buta taa i kë du taanga tjika.​—Jes. 40:29-31. w22.08 bld. 30 pal. 15-17

Te dee 1000 jaa dou, nöö dee o toona lusu Saatan baka. Nöö a o pooba u ganjan sëmbë, hii fa de an o abi zöndu möön. A di ten dë, hii sëmbë u goonliba o abi di okasi u lei gbelingbelin ee de ta lesipeki Gadu në, söseei ee de ta saka deseei a di tii fëën basu (Ako. 20:8-10). Dee soni di de o du a di ten dë, de o lei ee në u de o sikifi u nöömö a di Buku u Libi. Di Bëibel ta piki u taa so sëmbë o du soni kuma Adam ku Eva. De an o saka deseei a di tii u Jehovah basu. Andi o pasa ku dee sëmbë dë? Akoalimbo 20:15 ta piki u taa: „Hiniwan sëmbë di në [fëën] an dë sikifisikifi a di Buku u Libi, nöö de o hiti ën tuwë go a di gaan faja kuma ze dë dendu.” Awa, de o poi dee sëmbë aki kaba a sösö fiaa. Ma gaansë u dee sëmbë dee o dë a goonliba o pasa di lasiti tesi dë. w22.09 bld. 23-24 pal. 15-16

So sëmbë u di kemeente u dee fesiten Keesitu sëmbë, bi ta taki taa dee woto köndë sëmbë dee bi toon Keesitu sëmbë bi musu koti di maaka u dee Dju. Kandë de bi këën sö sö taa dee woto Dju an kuutu de (Gal. 6:12). Di soni aki an bi kai ku apösutu Paulosu. Ma an bi hoi ta soni musu pasa kumafa a kë. A bi suku heepi a dee apösutu ku dee gaanwomi a Jelusalen (Tjab. 15: 2). U di Paulosu bi du soni a di lö fasi dë, mbei a bi heepi dee baaa ku dee sisa fëën u de ta libi fiifii ku deseei go dou (Tjab. 15:30, 31). Ee wan gaan toobi hopo ko, nöö u musu suku heepi a dee sëmbë dee Jehovah buta u luku di kemeente. U sa ko sabi andi u musu du, te u ta öndösuku dee buku fuu dee ta konda soni u Bëibel, nasö dee buku fuu dee ta taki soni u di ölganisaasi fuu. Te u ta wooko ku dee soni aki, ka fuu du soni kumafa useei kë, nöö woo ta libi fiifii ku useei a di kemeente go dou. w22.08 bld. 22-23 pal. 8-9

So juu a sa pasa taa u ta fii u konda wan soni fuu da wan gaan mati fuu. Di soni aki sa ta taanga u du so juu, u di kandë wa guwenti u konda soni fuu da wotowan. Nöö a bi o hati u gaanfa seei ee bakaten u ko jei taa di mati fuu paaja di woto. Ma u ta tei ën u bigi seei te u abi mati di an ta paaja woto fuu! Gaanwomi di an ta paaja sëmbë woto, dë kuma wan „tjubi kamian te gaan ventu ta böö”, da dee baaa ku dee sisa (Jes. 32:2). U sa konda soni da dee gaanwomi, u di u ta biibi taa de an o paaja di woto fuu. Söseei wa ta duwengi de u de konda soni da u, di woto sëmbë an musu sabi. Boiti di dë, u lobi dee mujëë u de, u di de an ta hakisi de manu u konda soni u woto sëmbë da de. A ta dë wan gaan bunu soni seei te wan gaanwomi an ta piki hën mujëë soni u dee baaa ku dee sisa di hën mujëë an musu sabi. w22.09 bld. 11 pal. 10-11

U sa dë seiki taa Jehovah o heepi dee sëmbë fëën a di pisiten u di „gaan fuka” (Mat. 24:21; Dan. 12:1). A o heepi de te dee nasiönnasiön sëmbë u goonliba tuu o fiti buka u de ko feti ku de. Dee sëmbë aki di Bëibel ta kai „Gögi u Magögi”. Aluwasi sömëni u dee sëmbë aki o dë sëmbë u dee 193 köndë dee dë a di Verenigde Naties, tökuseei de an o sa feti ku di Kaba Hei Gadu ku dee ëngëli fëën! Jehovah paamusi u taa: „Mi o hei miseei, nöö mi o mbei miseei ko santa. Mi o mbei hia sëmbë ko sabi ambë da mi, nöö de musu sabi taa mi da Jehovah” (Eze. 38:14-16, 23). Di feti di Gögi o hopo ko feti ku dee sëmbë u Gadu, hën o tja di feti u Amagedon ko. A di feti dë Jehovah o kii „dee könu u goonliba” tuu (Ako. 16:14, 16; 19:19-21). Ma „dee sëmbë dee ta libi leti, o libi a goonliba. Dee sëmbë dee ta du bunu, de nöö o libi nëën u nöömö”.​—Nöng. 2:21. w22.10 bld. 16-17 pal. 16-17

Wa sa si go a wan sëmbë hati, „Jehovah hën ta öndösuku sëmbë hati” (Nöng. 16:2). Jehovah lobi hii pei sëmbë, sëmbë u tookatooka lö ku sëmbë di kiija a tookatooka fasi. Nöö a ta da u taanga fuu ’jabi u hati’ da wotowan (2 Kol. 6:13). Boo mbei möiti fuu lobi hii dee baaa ku dee sisa fuu, ma wa musu suku u kuutu de. Di soni aki kë taki tu taa, wa musu ta kuutu dee sëmbë dee an ta dini Jehovah. I bi o kuutu wan famii fii taa nöiti a o ko a di tuutuu lei ö? Wë di soni dë an bi o bunu seepiseepi. A bi o dë taa i ta fii kuma i bunu möön wotowan. Jehovah ta da „hii sëmbë a hii kamian” di okasi jeti, u de bia de libi (Tjab. 17:30). Hoi a pakisei taa Jehovah ta si dee sëmbë dee ta si kuma de bunu möön wotowan, kuma sëmbë di an ta libi a wan leti fasi. Di lobi di u lobi dee wëti u Jehovah o mbei u dë waiwai, söseei a o mbei wotowan kë waka a u baka. De o möön lobi u, söseei de o möön lobi Jehovah. w22.08 bld. 31 pal. 20-22

U sa dë ku di mëni taa sëmbë o du ku u te u ta du di peleikiwooko. Nöö a sa ko möön hogi a di ten di ta ko (Dan. 11:44; 2 Tim. 3:12; Ako. 16:21). Ma u sa dë seiki taa Jehovah o heepi u ka u abi heepi fanöudu. Faandi mbei u sa taki sö? Wë, u di hii juu Jehovah ta heepi dee dinima fëën u de du dee soni di a ta hakisi de u de du, aluwasi ee a dë wan taanga soni u du. Luku di tjabukama Ezekiëli, di bi ta peleiki da dee Dju dee bi dë a Babilon. Un pei sëmbë Ezekiëli bi musu peleiki da? Jehovah bi taki taa dee sëmbë dë bi abi „dëë wojo”, de bi abi „taanga jesi”, söseei de „an bi ta saka deseei” a Gadu basu. De bi hogi kuma maka, söseei kuma kukutulabu. Fëën mbei sömëni pasi Jehovah bi ta piki Ezekiëli taa: „Na fëëë”! (Eze. 2:3-6) Ezekiëli bi sa du di peleikiwooko u di Jehovah hën bi mandëën faa du di wooko dë, u di di jeje u Gadu bi ta dëën kaakiti, söseei u di di Wöutu u Gadu bi ta mbei di biibi fëën ko möön taanga. w22.11 bld. 2 pal. 1-2

Hii dee libilibi soni di Jehovah bi mbei a goonliba aki, bi o dëdë wan daka. Ma an bi mbei libisëmbë u de ta dëdë. Jehovah mbei u a sö wan fasi taa u ta abi di fii u libi u teego. Di Bëibel ta taki unfa Gadu mbei libisëmbë. A ta taki taa a „buta di fii u libi u nöömö a de hati dendu” (Peleik. 3:11). Di soni aki da wan u dee soni di mbei taa u ta si dëdë kuma wan felanti fuu (1 Kol. 15:26). Ee a ko pasa taa u ko dë ku suwaki, nöö wa ta sindo wakiti u dëdë ko kii u. Ma u nango a data, söseei u ta bebe deesi fuu ko bëtë. U ta du hii soni di u sa du sö taa wa ko lasi libi. Söseei te wan sëmbë fuu lasi libi, nöö a ta hati u seei, aluwasi ee di sëmbe bi gaandi nasö ee a bi njönku (Joh. 11:32, 33). A dë gbelingbelin u si taa di Sëmbë di mbei u, bi mbei u fuu libi u teego, u di a mbei u a sö wan fasi taa u abi di fii u libi u teego, söseei fuu sa ta lei soni u teego. w22.12 bld. 3 pal. 5; bld. 4 pal. 7

Hia dinama u Jehovah a di ten aki ta suwaki, ta fëëe, nasö ta fii kuma de dë de wanwan. Mbei möiti fii ta fan ku dee baaa ku dee sisa fii. Te wan taku siki ta paaja, nöö kandë a ta dë fanöudu fu wa ta ko zuntu ku dee wotowan fuu möön. Kandë a di pisiten dë woo ta fii kuma apösutu Johanisi. A bi kë miti hën mati Gajusi u de sa fan fesi ku fesi (3 Joh. 13, 14). Ma Johanisi bi fusutan taa hën ku Gajusi an bi o sa miti u wan pisiten. Fëën mbei Johanisi bi du andi a bi sa, hën a sikifi wan biifi manda da Gajusi. Ee ja sa go luku dee baaa ku dee sisa fii fuun sa fan fesi ku fesi, nöö i sa pooba wan woto fasi fii fan ku de. Te i ta mbei dee lö möiti aki, nöö ja o ta fii kuma i dë i wanwan, ma joo ta dë bööböö. I sa fan ku dee gaanwomi ee i ta booko i hedi poi, nöö i buta pakisei a dee soni di de o piki i.​—Jes. 32:1, 2. w22.12 bld. 17-18 pal. 6-7

Di Bëibel ta heepi u fuu fusutan taa Josëfu futu ku hën gangaa bi dë buibui u wan pisiten (Ps. 105:17, 18). Möönmöön soni bi ta ko hogi da Josëfu. A bi dë wan saafu di hën masa bi ta futoou, hën a bia ko dë wan sitaafuma di sëmbë an bi ta si u wan hojo soni. Wan soni bi miti i, hën a bi ko möön hogi hii fa i bi ta begi fajafaja u? Di soni aki sa pasa. Jehovah an ta puu u u fuka an miti u a di goonliba u Saatan aki (1 Joh. 5:19). Ma tökuseei i sa dë seiki taa Jehovah ta si andi ta miti i, söseei taa a ta booko hën hedi ku i (Mat. 10:29-31; 1 Pet. 5:6, 7). A ta paamusi u tu taa: „Ma o disa i seepi, kwetikweti. Na wan juu mi o disa i wanwan möönsö” (Heb. 13:5). Jehovah sa heepi i fii hoi dou, aluwasi i ta si kuma saanfa-u-du fii kaba. w23.01 bld. 16 pal. 7-8

Woto fasi dë jeti fa di Bëibel ta lei u taa Jehovah lobi u. Di Bëibel ta lei u taa u sa dë seiki taa di Gadu fuu an o go disa u te u mbei wan föutu. Dee Isaëli sëmbë bi du zöndu sömëni pasi a Jehovah wojo, ma tökuseei te de bi lei taa de bi ta tjali u dee zöndu u de, nöö a bi ta da de paadon. Dee fesiten Keesitu sëmbë seei bi sabi taa Jehovah bi lobi de gaanfa seei. Gadu bi mbei apösutu Paulosu piki dee baaa ku dee sisa taa de bi musu ’puu di womi a bëë’ di bi du wan gaan zöndu, nöö de fan ku ën be hati fëën kötö, u di a bi lei taa a ta tjali u di zöndu di a bi du (2 Kol. 2:6, 7; 1 Kol. 5:1-5). U ta tei ën u bigi seei taa Jehovah an ta bia baka da dee dinima fëën te de mbei wan föutu! Ma a wan lobihati fasi a ta heepi de, ta leti de buta a pasi, söseei a ta kai de u de ku ën ko dë mati baka. Nöö di seei soni aki a ta paamusi taa a o du da dee sëmbë dee ta lei taa de ta tjali u dee zöndu u de a di ten aki (Jak. 4:8-10). Di Bëibel ta lei unfa Gadu köni tjika, unfa a ta du soni a wan leti fasi tjika, söseei unfa a ta lei taa a lobi u tjika. Di buku aki ta lei u taa Jehovah kë fuu ko sabi ën. A kë fuu ku ën ko dë mati. w23.02 bld. 7 pal. 16-17

Soni dë di mbei u ta kë sabi unfa dee soni dee ta pasa a goonliba nöunöu aki, nama ku dee soni di di Bëibel bi taki taa bi o pasa. Jesosi bi piki u andi ku andi bi o pasa, sö taa u bi sa sabi te di kaba u di goonliba aki zuntu (Mat. 24:3-14). Apösutu Petuisi bi da u taanga fuu ta luku unfa dee tjabukama woto u Bëibel bi o ta pasa, sö taa u sa abi wan taanga biibi go dou (2 Pet. 1:20, 21). A ta heepi u fuu ko sabi unfa u musu ta si soni, te a nama ku dee tjabukama woto u Bëibel. A ta da u taanga fuu ta „hoi a pakisei taa di daka [u Jehovah] ta ko” (2 Petuisi 3:11-13). Faandi mbei? Wë na u di u kë ko sabi „di daka ku di juu” di Jehovah o mbei Amagedon ko, ma u di u kë wooko ku di ten di fika fuu ’ta tja useei a wan limbolimbo fasi, ta du soni di ta lei taa u ta dini Gadu fajafaja’ (Mat. 24:36; Luk. 12:40). U kë du soni a wan leti fasi, söseei u kë mbei hii möiti be a dë taa u ta du soni da Jehovah u di u lobi ën ku hii u hati. Fuu sa du di soni dë, nöö u musu ta buta mëni a useei. w23.02 bld. 16 pal. 4, 6

Soni dë di dee „woto sikafu” musu du sö taa de sa libi a di Paladëisi. U musu lei unfa u ta tei dee soni dee Jesosi du u bigi tjika. Di fasi fa u ta libi ku dee salufu baaa u Jesosi ta lei ee u lobi ën. Jesosi bi taki taa di soni dë a o luku te a o ko u kuutu dee sikapu (Mat. 25:31-40). U sa heepi te u ta du di peleikiwooko (Mat. 28:18-20). An dë fuu wakiti fuu dou a di Paladëisi ufö u ko dë sëmbë di Jehovah kë a di Paladëisi fëën. Nöunöu aki kaa u sa mbei möiti fu wa ta mindi soni, fuu ta libi a wan leti fasi, söseei fuu ta buta pakisei a di fasi fa u ta du soni. U sa ta mbei möiti tu fuu ta hoi useei a Jehovah, fuu ta hoi useei a di sëmbë di u ku ën tööu, söseei a dee baaa ku dee sisa fuu. Ee u ta mbei möiti u piki Jehovah buka nöunöu kaa, hii fa u dë a di hogi goonliba aki, nöö an o taanga da u möön fuu piki hën buka a di Paladëisi. U sa lei u du so soni möön bunu, söseei u sa mbei möiti fuu ko abi bunu fasi, u di dee soni dë o lei taa u ta seeka useei fuu libi a di Paladëisi. w22.12 bld. 11-12 pal. 14-16

U lobi Jesosi di Könu fuu, u di hën da di möön bunu Tiima. Jehovah seei hën seeka di Womi Mii fëën faa ko dë könu, söseei hën butëën faa tii u (Jes. 50:4, 5). Buta pakisei tu a di fasi fa Jesosi lei taa a lobi u tjika (Joh. 13:1). U di Jesosi da di Könu fii, mbei a fiti fii lobi ën. A bi taki taa dee sëmbë dee lobi ën tuutuu ta du andi a taki, nöö dee sëmbë dë da mati fëën (Joh. 14:15; 15:14, 15). U ta tei ën u bigi seei taa u dë mati u di Womi Mii u Jehovah! I sabi taa Jesosi abi sakafasi, söseei taa a ta djeesi hën Tata te dou, a hii dee fasi dee a abi. Boiti di dë, i sabi taa a bi sölugu dee sëmbë dee hangi bi ta kii, a bi da dee sëmbë dee bi ta fii bookosaka kötöhati, söseei a bi kula suwakima (Mat. 14:14-21). I ta si fa Jesosi ta tii di kemeente a di ten aki (Mat. 23:10). I sabi taa a di ten di ta ko, a o du möön gaan soni, u di a dë Könu u di Könuköndë u Gadu. Unfa i sa lei taa i lobi Jesosi? Wë i sa du sö, te i ta djeesi ën a di fasi fa a ta du soni. I sa bigi du di soni dë, te i buta i libi a Jehovah maun, nöö i dopu. w23.03 bld. 4 pal. 8, 10

Jehovah mbei te a hia waitiwaiti soni buta a liba ala, a goonliba aki, söseei a di ze, nöö u sa lei soni a dee soni dë (Ps. 104:24, 25). Buta pakisei a di fasi fa Gadu mbei u. A mbei u fuu sa lobi dee soni dee a mbei. A mbei u fuu sa ta si soni, ta jei soni, ta sumëë soni, ta tesi soni, söseei fuu sa ta panjan soni, sö taa u sa ta piizii ku hii dee soni dee a mbei. Di Bëibel ta piki u tu andi da wan woto soni di mbei a dë fanöudu fuu ta buta pakisei a dee soni dee Jehovah mbei. Dee soni dee Jehovah mbei ta heepi u fuu ko sabi un pei fasi Jehovah abi (Lom. 1:20). Te u luku dee soni dee Jehovah mbei, nöö u ta si taa a mbei de a wan gaan foombo fasi seei. Di soni aki ta lei u taa na piki köni Gadu köni. Pakisei dee peipei soni dee a mbei da u fuu sa njan. Di soni aki ta lei u taa a lobi libisëmbë gaanfa seei. Te u ta si dee fasi u Jehovah a dee soni dee a mbei, nöö u ta ko sabi ën möön bunu, söseei u ta kë ko dë mati fëën. w23.03 bld. 16 pal. 4-5

Daka fu daka soni o ta ko möön hogi a di goonliba aki. Fëën mbei u sa taki taa a o möön taanga da u fuu biibi dee soni dee sikifi a di Wöutu Gadu. Kandë sëmbë o du soni u mbei u hakisi useei ee dee lei u Bëibel bunu tuutuu, nasö ee Jehovah buta di köni saafu di dë u futoou u tii u tuutuu. Ma ee u dë seiki taa hii juu di Wöutu u Jehovah ta taki tuutuu soni, nöö wa o biibi dee sëmbë dë. Woo dë kabakaba u hoi dee wëti u Jehovah hii u libi longi, u te böö fuu koti (Ps. 119:112). Sen an o kisi u fuu konda soni u di tuutuu lei da sëmbë, söseei fuu da de taanga u de libi ku dee lei u Bëibel (Ps. 119:46). Boiti di dë, woo sa hoi dou ’ku pasensi, ku wai a hati’ te soni ta taanga da u, söseei te sëmbë ta du ku u (Kol. 1:11; Ps. 119:143, 157). Di tuutuu lei ta heepi u fu wa ta dë pantapanta, söseei a ta heepi u fuu ko sabi unfa u musu ta libi. Boiti di dë, a ta heepi u fuu wakiti di ten di di Könuköndë u Gadu o tii goonliba aki, sö taa soni sa waka möön bunu. w23.01 bld. 7 pal. 16-17

Jesosi bi begi wan longi begi da dee bakama fëën di ndeti ufö a bi dëdë. A bi hakisi hën Tata faa tjubi de u Didibi an wini de (Joh. 17:15). Di soni aki ta lei taa Jesosi bi lobi de gaanfa seei! Hii fa a bi sabi taa wan gaan soni bi o miti ën, tökuseei a bi ta booko hën hedi ku dee apösutu fëën. Te u ta djeesi Jesosi, nöö wa o ta buta pakisei a useei nöö. Ma woo ta begi da dee baaa ku dee sisa fuu. Te u ta du di soni aki, nöö u ta lei taa u ta du di soni di Jesosi bi piki u fuu du, di a bi taki taa u musu lobi u na u. Söseei u ta lei Jehovah fa u lobi dee baaa ku dee sisa fuu tjika. Na lasi u ta lasi u ten te u ta begi da dee baaa ku dee sisa fuu. Di Wöutu u Gadu ta piki u taa „te wan sëmbë ta libi bunu kumafa Gadu kë, nöö di begi fëën a ta begi Masa Gadu nöö a ta wooko gaan wooko e” (Jak. 5:16). U musu ta begi da dee baaa ku dee sisa fuu, u di sömëni fuka ta miti de. w22.07 bld. 23-24 pal. 13-15