Baimatu-liba

Di fan di u sa fan da wan kado di Gadu da u. Ma libisëmbë wooko ku di kado aki a wan föutu fasi. Saatan Didibi bi mindi soni, hën di soni aki mbei taa libisëmbë ko abi zöndu (Ken. 3:1-4). Adam an bi wooko ku di kado aki a wan bunu fasi. Di a pasa Jehovah buka, hën a bi taki taa Jehovah ku Eva de mbei (Ken. 3:12). Kain bi mindi soni di Jehovah bi fan ku ën baka di a kii hën baaa (Ken. 4:9). De ta kosi sëmbë a gaansë u dee fëlön u di ten aki. Dee mii ta jei soni di an fiti a siköö, nöö gaansëmbë ta jei dee lö soni aki a wookope tu. U di u sa ko guwenti di fasi fa sëmbë ta fan a di ten aki, mbei u musu köni taa wa ko ta fan sö tu. U di u da Keesitu sëmbë, söseei u di u kë mbei Jehovah wai ku u, mbei wa o ta taki soni di an fiti. Ma woo ta taki soni di o tja gafa ko da di Gadu fuu. Di soni dë o lei taa u ta wooko bunu ku di kado di a da u. w22.04 bld. 4-5 pal. 1-3

Jesosi bi ta si gudu a wan soifi fasi. A bi ta njan suti njanjan, söseei a bi ta bebe suti soni (Luk. 19:2, 6, 7). Wan daka, a bi mbei di möön suti win. Di soni dë da di fosu foombo wooko di a bi du (Joh. 2:10, 11). Nöö di daka di a bi o dëdë, a bi dë ku wan dii koosu nëën sinkii (Joh. 19:23, 24). Ma Jesosi an bi mbei gudu ko dë di möön fanöudu soni dëën. Jesosi bi ta taki taa ee u ta buta di Könuköndë a di fosu kamian, nöö Jehovah o da u dee soni dee u abi fanöudu (Mat. 6:31-33). Sömëni fuu bi feni gaan bunu, u di de bi libi ku dee soni di Jehovah ta taki u möni. Buta pakisei a wan baaa de kai Daniëli. Di baaa aki an tööu jeti, nöö a bi taki taa: „Di mi bi möön njönku, mi bi buta taa di dini di mi ta dini Jehovah, hën mi o ta kai möön gaan soni.” U di Daniëli an bi ta biinga a gudu baka, mbei a bi sa du sömëni soni da Jehovah. A bi taki taa: „Nöiti möni bi o sa mbei mi feni dee gaan bunu dee Jehovah mbei mi feni.” w22.05 bld. 21 pal. 6-7

U sa lei taa u lobi di tuutuu lei te u ta lei soni a Bëibel, söseei te u ta lei soni a dee buku fuu. An toobi un longi u dë a di tuutuu lei, tökuseei nöiti woo sabi hii soni. An dë wan kösökösö soni u lei soni u Bëibel, ma woo feni wini fëën te u ta mbei möiti u du ën. Na hii u tuu lo’ u lesi nasö u lei soni. Ma tökuseei Jehovah ta da u taanga fuu ’ta suku nöömö’, sö taa u sa ko fusutan soni u di tuutuu lei möön bunu (Nöng 2: 4-6). Te u ta mbei möiti a di lö fasi dë, nöö hii juu woo ta feni wini fëën. Wan baaa de kai Corey bi taki taa te a ta lesi Bëibel, nöö a ta buta pakisei a dee vers wanwan-fu-wan. A bi taki taa: „Mi ta lesi hii dee soni dee taki soni möön fini, ku dee tëkisi dee ta taki möön soni u di woto, söseei mi ta öndösuku soni u de möön fini. . . . Te mi ta lesi di Bëibel a di lö fasi aki, nöö a ta heepi mi u mi lei möön soni.” Aan toobi ee a di fasi aki u ta lei soni u Bëibel nasö ee u ta du ën a wan woto fasi. Ma woo lei taa u ta tei di tuutuu lei u bigi te u ta tei ten u lei soni fëën.​—Ps. 1:1-3. w22.08 bld. 17 pal. 13; bld. 18-19 pal. 15-16

Di Jesosi bi ko a goonliba, hën a bi tei dee soni dee Gadu mbei u lei dee bakama fëën soni u Gadu. Buta pakisei a wantu u dee soni dee a bi lei de. Jehovah lobi hii sëmbë. A di taki di Jesosi bi hoi a di kuun liba, a bi mbei dee bakama fëën buta pakisei a tu soni di Gadu mbei, di sömëni sëmbë an ta kai gaan soni. Dee tu soni aki da di sonu ku di tjuba. U abi dee tu soni aki tuu fanöudu fuu sa dë a libi. Jehovah bi sa tapa dee sëmbë dee an ta dini ën u de an feni dee soni aki. Ma an du sö. A ta mbei di sonu ta jabi da hii sëmbë, söseei a ta tuwë tjuba da hii sëmbë (Mat. 5:43-45). Jesosi bi tei di soni aki u lei dee bakama fëën taa Jehovah kë fuu lobi hii sëmbë. Te u ta luku di sonu go, nasö te u ta luku fa di tjuba ta kai, nöö u sa ta hoi a pakisei taa Jehovah lobi hii sëmbë. Di fasi fa Jehovah ta du soni, sa da u taanga fuu ta peleiki da hii pei sëmbë. w23.03 bld. 17 pal. 9-10

Andi apösutu Johanisi bi si di bi bigi dëën seei? A bi si wan mujëë sindosindo a wan mbeti liba di sinkii fëën dë bë hëii sö Di mujëë dë ta djei wan „gaan jajo mujëë”, nöö de ta kai ën „di Gaan Babilon”. A ta libi fanafiti a di së u manu ku mujëë soni ku „dee könu u goonliba” (Ako 17:1-5). Ambë da „di Gaan Babilon”? Di mujëë aki an sa dë wan politiki ölganisaasi, u di di Bëibel ta taki taa a ta libi fanafiti a di së u manu ku mujëë soni ku dee politikima u di goonliba aki (Ako. 18:9). Di dë di a dë a di taku mbeti liba, ta lei taa a ta pooba u tii dee tiima aki. Boiti di dë, an sa dë dee langahati seisonima u di goonliba u Saatan aki. Dee seisonima aki, di buku Akoalimbo ta kai „dee sëmbë dee bi ta bai soni a dee kamiankamian u goonliba ta tja go ta sei” (Ako. 18:11, 15, 16). Di foto Babilon fu awooten, bi dë wan u dee kamian ka sëmbë bi ta möön dini poipoi gadu. Fëën mbei u sa taki taa di Gaan Babilon da hii dee poipoi biibi. Fuu taki ën kumafa a dë, hën da hii dee poipoi keiki u goonliba tuu.​—Ako. 17:5, 18. w22.05 bld. 11 pal. 14-16

So juu wan mujëë di abi miii sa ta hakisi hënseei ee dee mii fëën o dini Jehovah. Dee mama ku dee tata sabi unfa di goonliba u Saatan ta mbei soni ta taanga da dee mii u de tjika. Boiti di dë, so mujëë musu kiija dee mii u de de wanwan, nöö wotowan musu kiija dee mii u de ku wan manu di an ta dini Jehovah. Na dee mujëë dee ta kiija dee mii u de ku wan manu di an ta dini Jehovah nöö a ta taanga da u lei dee mii u de soni u de ko lobi Jehovah. Aluwasi di mama ku di tata tuu ta dini Jehovah, tökuseei a sa ta taanga da de u de heepi dee mii u de u de ko ta lobi Jehovah. Aluwasi fa soni dë da i, nöö na booko i hedi poi. Jehovah o heepi i. I sa hakisi woto mama ku tata unfa de ta wooko ku dee soni di di ölganisaasi seeka u heepi dee mii u de (Nöng. 11:14). Jehovah sa da i köni fii sa fan ku dee mii fii, a sa heepi i fii sabi unfa de ta pakisei, söseei fii sabi unfa de ta fii.​—Nöng. 20:5. w22.04 bld. 17 pal. 4, 7; bld. 18 pal. 9

Jesosi bi ta djeesi hën Tata gaanfa a dee fasi fëën. Fëën mbei u sa taki taa möön u ta ko sabi Jesosi, möön woo ko lobi Jehovah (Heb. 1:3). Di möön bunu fasi fa u sa ko sabi Jesosi, hën da te u ta lei soni a dee fö buku u Bëibel dee ta taki soni u di libi fëën. Ee ja abi di guwenti u lesi di Bëibel hiniwan daka, nöö i sa bigi lesi dee woto dee ta taki u di libi u Jesosi. Te i ta lesi dee woto aki, nöö buta pakisei a dee fasi dee Jesosi bi abi. Sëmbë an bi ta fëëë u go fan ku ën. Söseei a bi lo’ u fan ku piki mii (Maik. 10:13-16). Jesosi bi ta libi bunu ku dee bakama fëën, nöö de an bi ta fëëë u konda dëën unfa de ta si soni (Mat. 16:22). Jesosi bi ta djeesi hën Tata a di lö fasi aki. Biga Jehovah ta da sëmbë pasi u de ko fan ku ën. U sa ta fan ku Jehovah te u ta begi. Te u ta begi, nöö u sa konda hii soni di dë a u hati da Jehovah. U dë seiki taa an o kuutu u. A lobi u, söseei a ta booko hën hedi ku u.​—1 Pet. 5:7. w22.08 bld. 3 pal. 4-5

U di Jehovah da di Sëmbë di mbei u, mbei a sabi u bumbuu. A ta bigi da u seei te u ta pakisei unfa Jehovah sabi hii sëmbë a goonliba aki bunu tjika (Ps. 139:15-17). Jehovah ta si hii dee fasi fuu dee an bunu, dee u feni a dee gaansëmbë fuu. Boiti di dë, a sabi dee soni dee miti u, di mbei u ko dë kumafa u dë nöunöu. Andi di sabi di Jehovah sabi u sö bunu ta mbei a du? Wë a ta mbei a abi tjalihati fuu (Ps. 78:39; 103:13, 14). Jehovah bi lei sömëni pasi kaa taa a dë kabakaba u da sëmbë paadon. A sabi taa Adam hën mbei taa hii u tuu ko dë a zöndu ku dëdë basu (Lom. 5:12). Soni seei an dë di u bi sa du, u puu useei, nasö woto sëmbë a zöndu ku dëdë basu (Ps. 49:7-9). Ma di Gadu fuu di lobi u, bi lei taa a abi tjalihati fuu, hën a seeka soni fuu sa ko fii. Wë Johanisi 3:16 ta piki u taa Jehovah manda di wan kodo Womi Mii fëën ko a goonliba aki faa ko dëdë da u.​—Mat. 20:28; Lom. 5:19. w22.06 bld. 3 pal. 5-6

Jehovah bi lei Jöpu taa te u ta da wotowan paadon, nöö Jehovah seei o da u paadon tu. Elifasi, Bilidati, ku Sofali bi piki Jöpu soni di bi hati ën seei. Jehovah bi piki Jöpu taa a musu begi da dee womi aki. Di a du di soni aki, hën Jehovah mbei a feni gaan bunu (Jöpu 42:8-10). Ku useei u ta du te u ta hoi wotowan a bëë. Te u ta hoi wotowan a bëë, nöö a dë kuma u ta tja wan hebi lai. Ma Jehovah kë fuu saka di lai dë tuwë, sö taa u sa ta dë bööböö (Ef. 4:31, 32). A ta piki u taa ’hati fuu an musu boonu möön, söseei wa musu hopo du soni ku hati boonu’ (Ps. 37:8). A dë wan bunu soni u du di soni di di tëkisi aki ta taki, u di te u ta hoi sëmbë a bëë, nöö a ta poi di gösöntu fuu, söseei a ta da u bookohedi (Nöng. 14:30). Te wan sëmbë bebe soni, nöö ku hënseei a ta du. Wë sö nöö a dë taa te u ta hoi sëmbë a bëë, nöö ku useei u ta du. Ma te u ta da wotowan paadon, nöö a o dë taa u ta du useei wan bunu. Woo ta dë bööböö, söseei woo sa dini Jehovah go dou. w22.06 bld. 10 pal. 9-10

Di sabi di u sabi taa Gadu o mbei u feni bunu a di ten di ta ko, ta tjubi di pakisei fuu, sö taa wa ko ta buta mëni a useei nöö a kaba, u di di soni dë o mbei u ku Gadu poi (1 Kol. 15:33, 34). Di sabi di u sabi taa woo feni bunu a di ten di ta ko, sa heepi u tu fu wa si kuma wa o sa mbei Jehovah wai ku u. Hoi a pakisei taa wan u dee womi di bi ko u ko da Jöpu kötöhati, bi taki sö wan pei soni tu. Di womi dë de kai Elifasi, nöö a bi taki taa: „Na wan libisëmbë sa ko dë limbolimbo.” A bi taki tu taa: „Gadu an ta futoou dee santa wan fëën, nöö liba ala seei an dë limbolimbo nëën wojo” (Jöpu 15:14, 15). Soni seei Elifasi bi mindi dë! Hoi a pakisei taa Saatan hën kë fii ta si soni a sö wan fasi. A sabi taa ee i ta pakisei sö, nöö te u kaba fëën, ja o ko ta biibi dee soni dee Gadu paamusi u möön. Fëën mbei ja musu pena biibi dee mindimindi soni dë. Nöiti i musu fëëkëtë taa Jehovah kë fii libi u teego, söseei taa a o heepi i fii sa dou di maaka dë.​—1 Tim. 2:3, 4. w22.10 bld. 25-26 pal. 8-10

Saatan bi kë u Jöpu biibi taa soni bi ta miti ën, u di Jehovah an bi ta feni ën u bunu möön. Saatan bi mbei wan gaan ventu ko booko di wosu ka hii dee teni mii u Jöpu bi dë ta njan makandi (Jöpu 1:18, 19). A bi mbei faja kumutu a liba ala tu ko kii dee mbeti u Jöpu ku dee futuboi fëën dee bi ta luku dee mbeti tuu (Jöpu 1:16). U di di ventu ku di faja bi kumutu a liba ala, mbei Jöpu bi si kuma Jehovah hën bi ta du dee soni aki ku ën. Di soni aki bi mbei Jöpu ko ta si kuma a bi du wan soni di bi mbei Jehovah hati boonu ku ën. Hii fa Jöpu bi ta pakisei sö, an bi kë siba di Tata fëën di dë a liba ala. Jöpu bi sabi taa Jehovah bi mbei a feni sömëni gaan bunu a dee jaa dee bi pasa. Nöö fëën mbei a bi pakisei taa ee a bi tei dee bunu dee Jehovah bi dëën, nöö a bi musu dë kabakaba u tei dee hogi soni tu. A bi taki taa: „Be sëmbë gafa di në u Jehovah u nöömö”.​—Jöpu 1:20, 21; 2:10. w22.06 bld. 21 pal. 7

Bakaten Jesosi bi piki dee bakama fëën di seei soni a Johanisi 17:14. Useei ta si fa di tjabukama woto aki ta pasa tuutuu, möönmöön a dee 100 jaa dee pasa aki. Unfa sö? Kölö sö baka di Jesosi toon Könu a di jaa 1914, hën de vinde Saatan puu a liba ala. Nöunöu a dë a goonliba aki, nöö a sabi taa abiti möön de o kii ën puu a pasi (Ako. 12:9, 12). Ma sensi di ten dë, hën a ta ligei seei. U di saanfa-u-du u Saatan kaba, mbei a ta puu hatiboonu a dee sëmbë u Gadu liba (Ako. 12:13, 17). Fëën mbei möönmöön di goonliba u Saatan ta buuse u gaanfa seei. Soni an dë di musu mbei u fëëë Saatan ku dee bakama fëën. U sa abi di wan seei biibi kuma apösutu Paulosu. A bi taki taa: „Fa Gadu dë ku u a wan së tjika aki, nöö ambë seei o sa du soni ku u te a wini u?” (Lom. 8:31) U sa futoou Jehovah. w22.07 bld. 18 pal. 14-15.

Jesosi an bi ta booko hën hedi taa sëmbë an bi o dë tjika u du di wooko aki, a di pisiten u di kaba u di goonliba aki. A bi sabi taa di tjabukama woto u di psalöm sikifima bi o pasa tuutuu. A bi taki taa: „A di daka di joo tja dee sodati fii go a feti, dee sëmbë fii o dë kabakaba u go tu” (Ps. 110:3). Ee i ta paaja di bunu buka, nöö hën da i ta wooko makandi ku Jesosi ku di saafu di dë u futoou, söseei i ta heepi du soni u mbei di tjabukama woto aki pasa tuutuu. Hii fa di wooko aki nango a fesi, tökuseei an dë wan kösökösö soni. Wan u dee soni di ta mbei taa di peleikiwooko an dë wan kösökösö soni, hën da u di sëmbë ta du ku dee peleikima. Sëmbë di bia baka da di tuutuu lei, so keiki fesima, söseei so tiima ta mindi soni da u u di wooko di u ta du. Te dee famii fuu, nasö woto sëmbë di u sabi ko jei dee mindimindi woto aki, nöö de sa duwengi u fu wa dini Jehovah möön, söseei fuu tapa ku di peleikiwooko. A so köndë dee felantima fuu ta taki soni u mbei u fëëë, de ta du ku u, de ta buta u a dunguwosu seei tu. w22.07 bld. 8 pal. 1; bld. 9 pal. 5-6

Jehovah kë fuu buta ten a wan së fuu ta öndösuku di Bëibel, söseei fuu ta pakisei fundu u dee soni dee u lesi. Te u ta du dee soni dee u ta lei, nöö di biibi fuu ta ko möön taanga, söseei u ku di Tata fuu ta ko dë möön gaan mati. Di soni aki o mbei taa woo sa hoi dou te fuka miti u. Jehovah ta da u di santa jeje fëën tu, te u ta lesi di Wöutu fëën. Nöö di jeje aki sa da u „gaan kaakiti” fuu sa hoi dou aluwasi un fuka miti u (2 Kol. 4:7-10). Jehovah ta mbei „di köni saafu di dë u futoou” tja buku, ku fëlön ku poku ko a döö di sa heepi u fuu ko abi wan taanga biibi, söseei di sa heepi u fuu ku Jehovah dë mati go dou (Mat. 24:45). Jehovah ta lei dee sëmbë fëën unfa de musu ta lobi deseei, söseei unfa de musu ta da deseei kötöhati te di libi ta taanga (2 Kol. 1:3, 4; 1 Tes. 4:9). Dee baaa ku dee sisa fuu ta dë kabakaba u heepi u fuu sa abi wan taanga biibi go dou te soni ta taanga da u. w22.08 bld. 12 pal. 12-14

Buta pakisei a dee bunu fasi u dee baaa ku dee sisa fuu. Te u ta du sö, nöö woo mbei de ko möön lobi deseei. So juu a sa pasa taa Keesitu sëmbë di dë gaangaan sëmbë a di biibi ta kisi toobi ku deseei. Di soni aki bi pasa ku di apösutu Paulosu ku wan gaan mati fëën de kai Banabasi. Dee tu womi aki bi kisi toobi u Maikusi hedi. De bi ta taki ee a bi musu ko ku de a di sëndëlengi waka, nasö ee an bi musu ko. Di soni ko wan „gaan fia” da de te de paaja (Tjab. 15:37-39). Ma Paulosu, Banabasi ku Maikusi bi seeka di taki. Bakaten Paulosu bi taki soni di bi lei taa an bi hoi de a bëë (1 Kol. 9:6; Kol. 4:10). Useei musu mbei möiti u seeka toobi ku dee wotowan u di kemeente, nöö u buta pakisei a dee bunu fasi di de abi go dou. A sö wan fasi woo ta libi fiifii ku useei. w22.08 bld. 23 pal. 10-11

Te u ta mbei möiti fuu libi ku dee wëti u Jehovah, nöö wa musu kuutu wotowan, söseei wa musu si kuma u bunu möön de. U musu hoi a pakisei taa Jehovah hën da di „Sëmbë di ta kuutu hii goonliba” (Ken. 18:25). Jehovah an da u di wooko u kuutu sëmbë. Boo buta pakisei a di woto u di bunuhati womi de kai Josëfu. An bi ta kuutu wotowan, seei dee sëmbë dee bi ta libi hogi ku ën. Dee baaa fëën seei bi du hogi ku ën, de bi sei ën kuma saafu, söseei de bi piki de tata taa a dëdë. Baka wantu jaa, hën Josëfu bi toona miti dee sëmbë fëën baka. A di pisiten dë, Josëfu bi dë wan tiima di bi abi makiti seei, nöö a bi sa kuutu dee baaa fëën a wan hogihati fasi, nasö a bi sa suku u du hogi ku de baka. Dee baaa fëën bi ta si kuma a bi o du dee soni dë ku de, hii fa de bi lei taa de bi ta tjali u dee soni di de bi du. Ma Josëfu bi piki de taa: „Wan fëëë e. Mi na Gadu” (Ken. 37:18-20, 27, 28, 31-35; 50:15-21). Josëfu bi sabi taa Jehovah wanwan bi abi leti u kuutu dee baaa fëën. w22.08 bld. 30 pal. 18-19

I bi sabi taa Jehovah sa tei i fii heepi wan sëmbë di ta begi ën fajafaja faa heepi ën u? A sa tei i fii du ën aluwasi ee i dë wan gaanwomi, wan dinai, wan sëmbë di ta du di pioniliwooko, nasö wan peleikima a di kemeente. A sa tei i fii du ën tu aluwasi ee i njönku nasö i ko gaandi kaa, nasö aluwasi ee i dë wan baaa nasö wan sisa. Te wan sëmbë di lobi Jehovah ta begi ën faa heepi ën, nöö a lo’ u tei dee gaanwomi ku woto dinima fëën di ta hoi deseei nëën, u de da di sëmbë „degihati” (Kol. 4:11). U ta wai seei taa u sa du soni da Jehovah ku dee baaa ku dee sisa fuu a di lö fasi dë! U sa du sö te wan siki ko di ta paaja, te wan gaan ventu nasö wan gaan wata ko, nasö te sëmbë ta du ku dee baaa ku dee sisa fuu. Kandë u bi o kë heepi wotowan, ma a sa taanga da u ee dee sëmbë fuu seei abi heepi fanöudu tu. Hii fa a dë sö, tökuseei u kë heepi dee baaa ku dee sisa fuu, nöö Jehovah ta wai ku u te a si taa u ta du andi u sa du u heepi de.​—Nöng. 19:17. w22.12 bld. 22 pal. 1-2

Lobi hën ta mbei sëmbë ta futoou wotowan. Jesosi bi taki taa dee tu möön gaan wëti da di lobi di u musu lobi Jehovah, ku di lobi di u musu lobi woto sëmbë (Mat. 22:37-39). U di u lobi Jehovah, mbei u kë djeesi ën a di dë di a dë wan sëmbë di wotowan sa futoou. Boiti di dë, u di u lobi dee baaa ku dee sisa fuu, mbei wa kë paaja soni u de di wotowan an musu sabi. Nöiti u bi o kë du di soni aki, u di a sa hati de, a sa mbei de fii sen, nasö a sa tja hogi ko da de. Te u abi sakafasi tu, nöö a o heepi u fuu dë wan sëmbë di wotowan sa futoou. Wan Keesitu sëmbë di abi sakafasi an ta biinga u dë di fosu sëmbë u paaja wan woto (Fil. 2:3). An ta pooba u mbei sëmbë pakisei taa a sabi gaan soni di an sa konda da woto sëmbë. Te u abi sakafasi, nöö wa o ta paaja di fasi fa uu ta si soni da sëmbë, hii fa di Bëibel, nasö dee buku fuu an ta taki soni fëën. w22.09 bld. 12 pal. 12-13

Wan ëngëli bi piki Daniëli taa dee sëmbë u Gadu bi o ko ta fusutan dee tjabukama woto dee sikifi a di buku u Daniëli möön gaanfa, nöö „na wan hogihati sëmbë [bi] o sa fusutan dee woto aki” (Dan. 12:10). Nöunöu nëën u musu lei taa wa dë ku dee hogihati sëmbë a wan së (Mal. 3:16-18). Jehovah ta tja dee sëmbë dee a ta si kuma „wan apaiti gudu” fëën, ko a wan. An dë u taki taa u kë dë a dee sëmbë aki dendu tu. U ta libi tuutuu a wan apaiti pisiten. Ma möön gaan soni o pasa jeti. Abiti möön woo si fa Gadu o puu hii hogilibi a goonliba. Baka di dë, woo si fa di soni di Jehovah bi paamusi Daniëli o pasa tuutuu, di a bi taki taa: „Joo weki ko a libi baka u feni di paka fii a kaba u dee daka” (Dan. 12:13). I ta hangi u si di daka ka Daniëli ku dee sëmbë fii dee dëdë o „weki ko a libi baka” u? Wë ee i kë si ën, nöö mbei hii möiti fii hoi iseei a Gadu, nöö joo dë seiki taa në fii o fika sikifisikifi a di buku u Jehovah. w22.09 bld. 24 pal. 17; bld. 25 pal. 19-20

Di soni aki bi musu u da Ezekiëli taanga. Faandi mbei? U di a kan taa Ezekiëli bi ta mëni taa sö wan soni Jehovah bi piki Mosesi ku Jesaaja tu di a bi mbei de ko dë tjabukama fëën (Ëki. 3:10; Jes. 6:8). Ezekiëli bi sabi tu unfa Jehovah bi heepi dee tu tjabukama dë u de du gaangaan wooko. Fëën mbei di Jehovah bi piki ën tu pasi taa: „Mi ta manda i”, nöö Ezekiëli bi sa dë seiki taa Jehovah bi o heepi ën tuutuu. Boiti di dë, sömëni pasi Ezekiëli bi sikifi taa: „Jehovah bi fan ku mi” (Eze. 3:16). An dë u taki taa Ezekiëli bi dë seiki taa Jehovah hën bi mandëën a di wooko. Ezekiëli tata bi dë wan mindima, nöö a kan taa a bi lei ën taa hii juu Jehovah ta piki dee tjabukama fëën taa a o ta dë ku de. Jehovah bi piki Isaki, Jakopu, ku Jelemia taa: „Mi dë ku i.”​—Ken. 26:24; 28:15; Jel. 1:8. w22.11 bld. 2 pal. 3

U di Adam ku Eva bi du zöndu, mbei dee bakamii u de ta dëdë. Ma tökuseei Jehovah o du dee soni dee a abi a pakisei jeti (Jes. 55:11). A kë taa dee sëmbë dee ta hoi deseei nëën musu libi u teego. Luku dee soni dee a taki ku dee a du, u mbei soni waka kumafa a abi a pakisei. Jehovah paamusi u taa a o weki dee sëmbë dee dëdë ko a libi baka, söseei taa a o da de di okasi u de libi u teego (Tjab. 24:15; Tit. 1:1, 2). Jöpu bi dë seiki taa Jehovah ta hangi u weki dee sëmbë dee dëdë ko a libi baka (Jöpu 14:14, 15). Di tjabukama Daniëli bi sabi taa Gadu o weki sëmbë ko a libi baka, söseei taa de o feni di okasi u de libi u teego (Ps. 37:29; Dan. 12:2, 13). Dee Dju u di ten u Jesosi seei bi sabi taa Jehovah bi sa da dee dinima fëën „di libi u teego” (Luk. 10:25; 18:18). Sömëni pasi Jesosi bi konda soni u di paamusi aki. Boiti di dë, hën Tata bi weki ën ko a libi baka.​—Mat. 19:29; 22:31, 32; Luk. 18:30; Joh. 11:25. w22.12 bld. 4-5 pal. 8-9

Jehovah ta piki u fuu pusa go nëën (Jak. 4:8). A kë dë Gadu fuu, a kë dë Tata fuu, söseei a kë dë mati fuu. A ta piki dee begi fuu, söseei a ta heepi u te soni ta taanga da u. Boiti di dë, a ta tei di ölganisaasi fëën u lei u soni, söseei u tjubi u. U sa ko dë mati u Gadu te u ta begi ën, söseei te u ta lesi di Wöutu fëën, ta kai pakisei nëën. Te u ta du sö, nöö u ta ko lobi ën, söseei u ta tei dee soni dee a ta du da u u bigi. Di soni aki o mbei taa woo kë piki hën buka a soni, söseei woo kë gafëën, u di a fiti gafa (Ako. 4:11). Möön u ta ko sabi Jehovah, möön woo ta futoou hën ku di ölganisaasi fëën, di a buta u heepi u. Ma Didibi ta mbei möiti pikipiki fu wa ko ta futoou Jehovah ku di ölganisaasi fëën möön. Ma u sa köni be an kisi u. Te u abi wan taanga biibi, söseei te u ta futoou Jehovah ku hii u hati, nöö wa o disa di Gadu fuu ku di ölganisaasi fëën.​—Ps. 31:13, 14. w22.11 bld. 14 pal. 1-3

Sömëni tuutuu Keesitu sëmbë bi du soni u lei taa de bi tei Jehovah kuma di tiima u de, hii fa de bi sa lasi de libi seei. De da sëmbë di ta hoi deseei a Jehovah, leti kuma dee dii Hebelejën womi mii dee bi hoi deseei a di Kaba Hei Gadu, di bi puu de a di gaan kendikendi onfu dendu.Dafiti bi taki faandi mbei a dë fanöudu fuu hoi useei a Gadu. A bi taki taa: „Jehovah seei o lesi sitaafu da hii föluku. Jehovah o, te joo kuutu mi, nöö mëni fa mi bi tja miseei a wan leti fasi e, söseei mëni di fasi fa mi bi ta piki i buka a soni” (Ps. 7:8). Dafiti bi taki tu taa: „Be letilibi ku di hoi di mi ta hoi miseei a Gadu tjubi mi” (Ps. 25:21). Di möön bunu soni di u sa du a u libi, hën da fuu ta hoi useei a Jehovah! Te u ta du di soni aki, nöö woo fii kumafa di psalöm sikifima bi fii, di a bi taki taa: ’Dee sëmbë dee ta hoi deseei a Jehovah, . . . ta du andi di wëti fëën taki, ta dë waiwai.’​—Ps. 119:1. w22.10 bld. 17 pal. 18-19

Jöpu bi fan ku sömëni sëmbë nëën libi, ma di fan di a bi fan ku Jehovah Gadu an bi dë kuma dee wotowan. Jehovah bi kë mbei Jöpu ko dë seiki taa a köni tjika faa sa luku dee dinima fëën, nöö fëën mbei a bi taki soni u so u dee soni dee a mbei. Jehovah bi lei Jöpu taa a ta sölugu dee mbeti, nöö sö nöö a bi o sa sölugu ën tu (Jöpu 38:39-41; 39:1, 5, 13-16). Jöpu bi ko sabi un pei fasi Jehovah abi, di a bi buta pakisei a dee soni dee Jehovah mbei. Useei sa ko sabi Gadu möön bunu, te u ta luku dee soni dee a mbei. Ma so juu di soni aki an ta dë wan kösökösö soni u du. Ee u ta libi a wan foto, nöö kandë na hii daka woo ta si dee soni dee Jehovah mbei. Ma ee u ta libi a wan kamian ka u sa ta si dee soni dee Gadu mbei, tökuseei u sa ta si kuma wa abi ten tjika u buta pakisei a de, ma a dë fanöudu fuu ta tei ten u buta pakisei a dee soni dee Jehovah mbei. w23.03 bld. 15 pal. 1-2

Jesosi bi taki taa „goon o ta seki a sömëni kamian”, söseei taa woto hogi bi o ta pasa ufö di kaba u di goonliba aki (Luk. 21:11). A bi taki tu taa möönmöön sëmbë bi o ta „libi hogi ku deseei”. Di soni aki dë u si a di ten fuu aki, u di sëmbë ta kii wotowan, söseei de ta feti ku deseei (Mat. 24:12). Nöiti Jesosi bi taki taa dee sëmbë dee Jehovah bia baka da wanwan dee soni aki bi o ta miti. Sömëni hogi ta miti dee dinima u Jehovah (Jes. 57:1; 2 Kol. 11:25). Kandë Jehovah an o tjubi u a wan foombo fasi u hogi an miti u, ma a o da u di kötöhati di u abi fanöudu fuu sa ta dë bööböö. Wa o ta booko u hedi sö ee u bi seeka soni a fesi. Ma di seeka di u ta seeka soni a fesi kë taki taa di biibi fuu an taanga u? Na seei! Fuu taki ën kumafa a dë, nöö di seeka di u ta seeka soni a fesi ta lei taa u ta biibi taa Jehovah o heepi u. Unfa sö? Wë di wöutu u Gadu ta piki u fuu seeka soni a fesi da wan gaan hogi di sa miti u. w22.12 bld. 18 pal. 9-10

Di Josëfu bi dë a dunguwosu, hën Jehovah mbei Falao sunjan tu sunjan di bi ta toobi ën gaanfa seei. Di Falao bi ko jei taa Josëfu bi sa konda dëën andi dee sunjan bi kë taki, hën a manda kai ën. Jehovah bi heepi Josëfu faa bi sa puu dee sunjan u Falao dëën, söseei Josëfu bi piki Falao andi a bi musu du, nöö di soni dë bi bigi da Falao te na soni. Di Falao bi ko si taa Jehovah bi dë ku Josëfu, hën a butëën faa luku hii dee njanjan soni u Egepiti (Ken. 41:38, 41-44). Bakaten wan gaan hangi bi ko a Egepiti, söseei a di köndë Kaana ka dee sëmbë u Josëfu bi ta libi. Josëfu bi ko dë a fa u heepi dee sëmbë fëën, sö taa di böngö ka di Mësiasi bi o kumutu an kaba a sösö. Wë a dë gbelingbelin u si taa Jehovah hën bi mbei hii soni u Josëfu waka bunu. Hii fa dee baaa u Josëfu bi kë kii ën, tökuseei Jehovah bi mbei soni waka bunu da Josëfu, sö taa soni bi sa waka kumafa a bi abi a pakisei. w23.01 bld. 17 pal. 11-12

Wan sëmbë di ta buta mëni nëën seei da wan sëmbë di ta köni ku soni di sa mbei hën ku Jehovah poi. A di lö fasi dë, a ta du soni sö taa Jehovah sa lobi ën go dou (Nöng. 22:3; Jud. 20, 21). Apösutu Paulosu bi da dee Keesitu sëmbë taanga u de ta buta mëni a deseei. A bi piki dee Keesitu sëmbë u Efeise taa: ’Un musu mëni unuseei kumafa un ta tja un libi e. Wan musu libi kuma dee sëmbë söndö fusutan, ma un musu libi kuma sëmbë di a’ bumbuu pakisei’ (Ef. 5:15, 16). Hii juu Saatan ta mbei möiti u poi u ku Jehovah. Fëën mbei di Bëibel ta piki u fuu ta ’mbei möiti fuu sabi andi Gadu kë a u’, sö taa Saatan an wini u (Ef. 5:17). Fuu sa du soni a wan köni fasi, nöö u musu mbei möiti fuu sabi ’andi Gadu kë a u’. Woo ko sabi di soni dë, te u ta öndösuku Gadu Wöutu hiniwan juu, söseei te u ta kai pakisei a dee soni dee u ta lei. Möön u ko fusutan andi Gadu kë a u, söseei möön u ta pakisei kumafa Keesitu ta pakisei, nöö möön woo ta du soni „kuma sëmbë di a’ bumbuu pakisei”, aluwasi ee wëti an dë di ta piki u andi u musu.​—1 Kol. 2:14-16. w23.02 bld. 16-17 pal. 7-9

Un mëni pasi i ta seeka di wosu fii? Kandë i bi seekëën bumbuu ufö i foloisi go libi nëën. Ma andi bi o pasa ee baka di dë ja seekëën nöiti möön? Wë an dë u taki taa hesihesi seei a o sundju. Hii juu i musu ta seeka di wosu fii ee i kë faa ta dë limbolimbo.Wë sö nöö u musu ta tooka di fasi fa u ta pakisei ku di fasi fa u dë. Ufö u dopu u bi mbei taanga möiti u tooka so soni a di libi fuu, sö taa u bi sa „disa dee soni dee ta poi u hati ku dee ta poi u sinkii” (2 Kol. 7:1). Hii fa a dë sö, tökuseei u musu du di soni di Paulosu bi taki, di a bi taki taa u musu ’bia disa di awoo fasi u libi, tooka te u ko wan hii njunjun sëmbë’ (Ef. 4:23). Hesihesi seei di goonliba aki sa mbei wa dë limbolimbo a Jehovah wojo möön. Fuu sa ta libi a wan fasi di ta kai ku Jehovah, nöö u musu ta tei ten ta öndösuku luku ee di fasi fa u ta pakisei, di fasi fa u dë, ku dee soni dee u ta kë bunu tuutuu. w23.01 bld. 8 pal. 1-2

Pakisei unfa a bi o dë u haika Jesosi te a bi ta lei sëmbë soni. A bi lo’ u taki u dee soni dee bi sikifi a di Wöutu u Gadu. A bi ta hoi hii dee soni dë a hedi! Di Jesosi dopu, söseei di Gadu salufu ën ku di santa jeje, hën a bi sa toona mëni dee soni dee a bi sabi ufö a ko a goonliba aki. Dee fosu soni dee a bi taki baka di a dopu, ku so u dee lasiti soni dee a bi taki ufö a lasi libi, bi dë soni di bi sikifi a di Wöutu u Gadu (Deto. 8:3; Ps. 31:5; Luk. 4:4; 23:46). A dee dii jaa ku hafu di Jesosi bi du di diniwooko fëën, a bi lo’ u lesi di Wöutu u Gadu a lanti dendu, a bi lo’ u taki soni fëën, söseei a bi lo’ u konda da sëmbë andi dee soni dë bi kë taki (Mat. 5:17, 18, 21, 22, 27, 28; Luk. 4:16-20). Ufö Jesosi bigi du di diniwooko fëën, a bi lesi di Wöutu u Gadu sömëni pasi, söseei a bi ta jei te sëmbë bi ta lesi ën. A musu u dë sö taa a bi ta jei Malia ku Josëfu ta taki u dee soni dee sikifi nëën (Deto. 6:6, 7). Söseei Jesosi ku dee sëmbë fëën bi nango a di keikiwosu u dee Dju hiniwan Saba daka (Luk. 4:16). Te de bi go ala, nöö a musu u dë sö taa Jesosi bi ta haika bunu te sëmbë bi ta lesi di Wöutu u Gadu. w23.02 bld. 8 pal. 1-2

Sömëni soni dë di sa mbei u ko lobi Jehovah. I ko fusutan taa hën da „di sëmbë di ta da libi”, söseei taa hën da di Sëmbë di ta da u hii dee bumbuu soni ku dee soni dee bunu te dou (Ps. 36:9; Jak. 1:17). Hii dee bunu soni dee ta mbei i ta piizii, ta kumutu a di lobihati Gadu fuu di lo’ u da sëmbë soni. Di lusupaima da wan gaan apaiti kado di Jehovah da u. Faandi mbei u sa taki sö? Wë pakisei luku fa Jehovah ku di Womi Mii fëën dë gaan mati tjika. Jesosi bi taki taa: „Mi Tata lobi mi”, nöö „mi lobi mi Tata” (Joh. 10:17; 14:31). De bi ko möön lobi deseei, u di de bi dë makandi milionmilion jaa longi (Nöng. 8:22, 23, 30). Wë nöö pakisei luku fa a bi musu u hati Gadu tjika, di a da pasi u di Womi Mii fëën tja sitaafu u tefa a dëdë. Jehovah lobi libisëmbë sö tee taa a bi dë kabakaba u da pasi u di lobi Womi Mii fëën dëdë, sö taa ju ku dee woto sëmbë tuu sa libi u teego (Joh. 3:16; Gal. 2:20). Di soni aki da di möön gaan soni di mbei u lobi Jehovah. w23.03 bld. 4-5 pal. 11-13

U musu koti pasi da dee lei u dee sëmbë dee bia baka da di tuutuu lei. Jesosi bi musu fan ku so sëmbë u di kemeente u Peegamu, u di de bi ta paati sëmbë ku sëmbë (Ako. 2:14-16). A bi gafa dee sëmbë u Tiatila, u di de bi koti pasi da dee „köni u Saatan”, söseei a bi da de taanga u de „hoi” deseei a di tuutuu lei (Ako. 2:24-26). Dee Keesitu sëmbë dee bi bigi haika dee lei u Saatan bi musu bia du soni woto fasi. Unfa a dë da u a di ten aki? U musu koti pasi da hiniwan lei di an ta kai ku di fasi fa Jehovah ta si soni. Kandë bigibigi a o ta djei kuma dee sëmbë dee bia baka da di tuutuu lei ta booko de hedi ku andi di Bëibel ta taki, ma di fasi fa de ta du soni, ta lei taa na sö a dë tuutuu (2 Tim. 3:5). Te u abi di guwenti u lei soni u Bëibel, nöö an o ta taanga da u fuu si andi da poipoi lei, söseei fuu koti pasi da de (2 Tim. 3:14-17; Jud. 3, 4). A dë fanöudu taa u dini Jehovah a wan fasi di ta kai ku ën. Ee a dë taa u ta du soni di sa mbei taa Jehovah an feni di dini di u ta dini ën u bunu, nöö u musu tooka soni wantewante.​—Ako. 2:5, 16; 3:3, 16. w22.05 bld. 4 pal. 9; bld. 5 pal. 11