Unfa i sa dë wan tuutuu mati da wotowan?

I TA fii so juu kuma sëmbë an dë u heepi i ku dee bookohedi fii ö? U ta libi a „wan tumisi hogi ten” di taanga u pasa, nöö a sa mbei u lasi hati, söseei a sa mbei u fii kuma u dë u wanwan a mundu (2 Tim. 3:1). Ma hii fa a dë sö, tökuseei sëmbë dë di sa heepi u ku dee bookohedi fuu. Di Bëibel ta lei taa a dë wan gaan fanöudu soni fuu abi tuutuu mati u heepi u „te fuka dë”.​—Nöng. 17:17.

UNFA WAN TUUTUU MATI SA HEEPI U?

Dee mati u Apösutu Paulosu bi heepi ën seei, di de bi tei di sëndëlengi waka makandi ku ën (Kol. 4:7-11). Di Paulosu bi dë a dunguwosu a Loomë, nöö dee mati fëën bi heepi ën ku dee soni dee an bi sa du. Epafodisi bi heepi Paulosu, u di a bi tja dee soni go dëën, di dee baaa ku dee sisa u Filipi bi manda dëën (Fil. 4:18). Tikikusi bi tja dee biifi u Paulosu go da dee tookatooka kemeente (Kol. 4:7). Dee mati u Paulosu bi heepi ën faa go dou ku di diniwooko fëën hii fa a bi dë a dunguwosu, nasö hii fa de bi söötö ën nëën wosu. Unfa i sa dë wan tuutuu mati da wotowan a di ten aki?

Dee baaa ku dee sisa a di ten aki, ta lei unfa a dë fanöudu tjika u dë wan tuutuu mati da wotowan. Wan sisa de kai Elisabet di ta libi a Sipanjöluköndë, bi konda fa wan sisa bi heepi ën di soni bi ta taanga dëën. Di Elisabet mama bi ko sabi taa a o dëdë, u di a bi abi wan kankël di an sa kula, nöö di sisa bi ta manda sömëni Bëibel tëkisi da Elisabet u dëën taanga. Elisabet bi taki taa: „Dee tëkisi dee a bi ta manda da mi bi ta da mi kaakiti seei u mi pasa dee daka, söndö u mi fii taa mi dë mi wanwan.”​—Nöng. 18:24.

U ku dee baaa ku dee sisa u di kemeente sa ko dë möön gaan mati, te u ta heepi de u de go a di peleikiwooko, nasö te u ta heepi de ku woto soni a di kemeente. Kandë i sa hakisi wan baaa nasö wan sisa di ko gaandi kaa fii tjëën go a komakandi, nasö fii tjëën go a di peleikiwooko ku wagi. Ee i sa heepi de a di fasi aki, nöö i sa da de taanga, söseei de sa da i taanga tu (Lom. 1:12). So baaa ku sisa an sa ta kumutu a wosu. Unfa u sa dë wan tuutuu mati da dee baaa ku dee sisa aki?

DË WAN TUUTUU MATI DA DEE SËMBË DEE NA SA KUMUTU A WOSU

So baaa ku sisa an sa nango a dee komakandi a di Könuköndë zali u di de dë ku suwaki, nasö u di woto soni ta tapa de. Di soni aki bi pasa ku wan baaa de kai David di bi abi kankël. Möön leki sikisi liba longi data bi musu kula di siki aki dëën. Hii di pisiten dë David ku hën mujëë Lidia bi nango a komakandi a Internet.

Unfa dee baaa ku dee sisa u di kemeente bi da de taanga? Wë baka komakandi, nöö wantu u de bi ta mbei möiti u fan ku de a Zoom. Boiti di dë, te David ku Lidia bi da piki a komakandi, nöö de bi ta manda piki de a tëlëfön, baka komakandi, taa de bi lobi dee piki u de. Wë unfa di soni aki bi ta mbei David ku Lidia fii? Wë de bi ta fii taa dee baaa ku dee sisa u de lobi de.

U sa mbei möiti u peleiki makandi ku dee baaa ku dee sisa dee an sa kumutu a wosu. Ee u seeka soni sö taa u sa peleiki makandi ku de, nöö a sö wan fasi u ta lei de taa wa fëëkëtë de (Nöng. 3:27). Kandë u sa buta taa woo sikifi biifi makandi ku de, nasö taa woo peleiki ku tëlëfön makandi ku de. Dee gaanwomi u kemeente sa seeka soni sö taa di peleikiwooko komakandi sa ta hoi a Internet tu. David ku Lidia bi wai seei taa di kemeente ka de dë bi du di soni aki. David bi taki taa: „Te u bi dë makandi ku di peleikiwooko kulupu fuu, nöö di begi ku dee soni dee u bi taki a di peleikiwooko komakandi bi ta da u taanga seei.” Boiti di dë, i sa hakisi dee peleikima dee an sa kumutu a wosu, ee so juu i sa ta tja di sëmbë di i ku ën ta lei soni Bëibel ko a de pisi, fii ku de sa lei ën soni u Bëibel makandi.

Te u ta wooko makandi ku dee baaa ku dee sisa dee an sa kumutu a wosu, nöö u ta ko sabi de möön bunu, söseei u ta ko si dee waiti fasi u de, nöö a sö wan fasi u ku de ta ko dë möön gaan mati. Te i ta si fa de ta wooko ku di Wöutu u Gadu u lei sëmbë soni, söseei te i ta si fa de ta heepi sëmbë u ko zuntu ku Jehovah, nöö joo ko ta möön lesipeki de. Boiti di dë, i sa ko abi njunjun mati te i ta heepi baaa ku sisa u ko a dee komakandi ku di peleikiwooko.​—2 Kol. 6:13.

Paulosu bi fii bunu di di mati fëën de kai Titusi bi dë nëën bandja (2 Kol. 7:5-7). A bunu fuu ta taki soni u da wotowan taanga. Ma di woto u Titusi aki ta lei u taa u sa da wotowan taanga tu, te u dë a de bandja u heepi de ku dee soni di de abi fanöudu.​—1 Joh. 3:18.

HEEPI DEE MATI FII TE SËMBË TA DU KU DE

Te u luku fa dee baaa ku dee sisa u Losiaköndë ta heepi deseei, nöö u sa lei wan soni a de. Boo luku wan woto u wan baaa de kai Sergey ku hën mujëë Tatyana. Dee siköutu bi ko suku soni a di wosu u de, hën de tja de go u go hakisi de soni. De bi disa Tatyana fosu u go a wosu. Sergey bi taki taa: „Di Tatyana go dou a wosu, hën wantewante wan sisa di bi abi degihati ko luku ën. Baka di dë, möön hia baaa ku sisa bi ko heepi ën seeka di wosu fuu.”

Sergey bi taki tu taa: „Mi lobi di tëkisi di dë a Nöngö 17:17. A ta taki taa: ’Wan tuutuu mati ta lobi [hën mati] hii juu, nöö hën da wan baaa di de pai u te fuka dë.’ Mi bi ko fusutan dee wöutu u di tëkisi aki möön bunu a di pisiten dë, u di mi bi abi heepi u wotowan fanöudu. Jehovah da mi mati di an ta disa mi möönsö.”

U abi heepi u dee mati fuu fanöudu te soni ta taanga du gaanfa seei. A di pisiten u di gaan fuka, nöö woo abi de fanöudu möön gaanfa. Fëën mbei boo mbei möiti fuu sa dë wan tuutuu mati da wotowan nöunöu aki kaa!​—1 Pet. 4:7, 8.