Wan Openbaring gi Yohanes (SANI DI TYARI KON NA KRIN)

1 Wan boskopu di Yesus Krestes tyari kon na krin+ èn di Gado gi en+ fu sori den srafu fu Gado+ den sani di musu pasa dyonsro.+ Yesus seni en engel+ go na a srafu Yohanes, so taki na engel ben kan sori Yohanes+ marki+ di ben e tyari a boskopu kon na krin. 2 Yohanes fruteri sma den sani di Gado ben taki+ èn den sani di Yesus Krestes ben taki,+ iya, a fruteri sma ala den sani di a si. 3 Koloku+ fu a sma di e leisi den wortu fu a profeititori disi nanga wan tranga sten.+ Koloku fu den sma di e yere a profeititori+ disi èn di e du den sani di skrifi na ini,+ bika a reti ten de krosibei.+

4 Mi, Yohanes, e skrifi den seibi gemeente+ di de na ini a distrikt Asia:

Meki „a sma di ben de kaba, di de nownowde èn di o kon”,+ sosrefi den seibi yeye+ di de na fesi en kownusturu, sori unu bun-ati èn meki a freide fu den de nanga unu. 5 Meki Yesus Krestes di de „a kotoigi di de fu frutrow”,+ „A fosiwan di opo baka na dede”+ èn „A Tiriman fu den kownu fu grontapu”,+ sori unu bun-ati tu èn meki a freide fu en de nanga unu.

En na a sma di lobi wi.+ Di a frulusu wi fu wi sondu a du dati nanga en eigi brudu.+ 6 A meki wi tron kownu+ nanga priester+ gi en Gado èn Tata. Iya, meki a abi glori nanga makti fu têgo.+ Amen.

7 Luku, a o kon na tapu den wolku+ èn ala ai o si en,+ sosrefi den sma di dyuku en.+ Dan ala den lo fu grontapu o sori taki den e sari fu en ede.+ Iya, Amen.

8 „Mi na a Alfa nanga na Omega,”+ na so Yehovah Gado e taki, „a sma di ben de kaba, di de nownowde èn di o kon,+ na Almaktiwan.”+

9 Mi, Yohanes, na wan brada fu unu, di e nyan pina+ neleki unu, di o de na ini a Kownukondre+ makandra nanga unu èn di e horidoro+ leki wan dinari fu Yesus.+ Mi ben de na tapu na èilanti Patmos, fu di mi ben taki fu Gado èn fu di mi ben fruteri sma fu Yesus.+ 10 Ne santa yeye+ tyari mi go+ na a dei fu Masra+ èn mi yere wan tranga sten+ na mi baka di ben gersi a babari fu wan trompeti. 11 A sten ben taki: „Den sani di yu e si, yu musu skrifi+ na ini wan bukulolo èn yu musu seni en go na den seibi gemeente:+ na Efeise,+ na Smirna,+ na Pergamum,+ na Tiatira,+ na Sardes,+ na Filadelfia+ èn na Laodisea.”+

12 Di mi drai luku fu si suma ben e taki nanga mi, mi si seibi gowtu kandratiki.+ 13 Na mindri den kandratiki wan sma ben de di ben gersi wan manpikin fu libisma.+ A ben weri wan krosi di ben doro te na en futu èn a ben weri wan gowtu banti lontu en borsu. 14 Boiti dati, en ede-wiwiri ben weti,+ iya, den ben weti srefisrefi. Den ai fu en ben de leki faya.+ 15 En futu ben e brenki neleki soifri kopro+ di sma e faya na ini wan onfu. En sten+ ben de leki a babari fu wan bigi sula. 16 A ben hori seibi stari+ na ini en reti-anu. Wan langa feti-owru di srapu+ na ala tu sei ben e komopo na ini en mofo èn en fesi ben e brenki neleki te son e skèin krin na mindridei.+ 17 Di mi si en, mi fadon na en futusei èn mi didon drape leki wan dede sma.

Ne a poti en reti-anu na mi tapu èn a taki: „No frede.+ Mi na a Fosiwan+ nanga a Lastiwan.+ 18 Mi na a libiwan.+ Mi ben dede,+ ma now mi e libi fu têgo, iya, fu ala ten+ èn mi abi den sroto fu dede+ èn fu Grebi.*+ 19 Fu dati ede yu musu skrifi den sani di yu si, den sani di e pasa nownowde, nanga den sani di o pasa bakaten.+ 20 Disi na a santa kibritori di abi fu du nanga den seibi stari+ di yu ben si na ini mi reti-anu nanga den seibi gowtu kandratiki.+ Den seibi stari na den engel fu den seibi gemeente èn den seibi kandratiki na den seibi gemeente.+

2 Yu musu skrifi na engel+ fu a gemeente na Efeise,+ taki: A sma di e hori den seibi stari+ na ini en reti-anu èn di e waka na mindri den seibi gowtu kandratiki,+ e taki disi: 2 ’Mi sabi san yu e du+ èn mi sabi taki yu e wroko tranga, taki yu e horidoro, taki yu no lobi ogri sma èn taki yu e ondrosuku finifini+ fa den sma de di e taki dati den na apostel.+ Ma den a no apostel trutru èn yu kon si taki den na leiman. 3 Yu e horidoro+ sosrefi, yu hori deki-ati fu mi nen+ ede èn yu no kon weri.+ 4 Ma toku mi si wan sani na yu di mi no feni bun. Mi si taki yu lasi a lobi di yu ben abi biginbigin.+

5 Fu dati ede prakseri fu pe yu fadon komopo. Abi berow+ èn du den sani di yu ben du fosi. Efu yu no abi berow, dan mi o kon na yu+ èn mi o puru yu kandratiki+ na en presi. 6 Ma toku wan bun sani de ete di yu e du: Yu no lobi den sani kwetikweti+ di den sma fu a kerki fu Nikolas+ e du. Misrefi no lobi den sani dati kwetikweti. 7 A sma di abi yesi, meki a yere san a santa yeye+ e taigi den gemeente: Mi o gi a sma di wini a strei,+ primisi fu nyan den froktu fu a bon di e gi libi+ èn di de na ini a paradijs fu Gado.’

8 Yu musu skrifi na engel+ fu a gemeente na Smirna, taki: ’A Fosiwan nanga a Lastiwan’,+ a wan di ben dede èn di kon na libi baka,+ e taki disi: 9 ’Mi sabi taki yu e nyan pina èn taki yu pôti, ma toku yu gudu.+ Mi sabi sosrefi taki den sma di e kari densrefi Dyu, e taki ogri fu yu.+ Toku den a no trutru Dyu, ma den na sma di de fu a grupu fu Satan.+ 10 No frede a pina di o miti yu.+ Luku, Didibri+ o tan trowe sonwan fu unu na ini strafu-oso, so taki unu kan kisi tesi dorodoro+ èn so taki unu kan nyan pina+ tin dei langa. Tan gi yesi na Gado te na dede,+ dan mi o pai* yu nanga libi.+ 11 A sma di abi yesi, meki a yere+ san a santa yeye+ e taigi den gemeente: A di fu tu dede*+ no o man du noti nanga a sma di wini a strei.’+

12 Yu musu skrifi na engel fu a gemeente na Pergamum, taki: A sma nanga a langa feti-owru di srapu na ala tu sei,+ e taki disi: 13 ’Mi sabi pe yu e tan. Yu e tan pe a kownusturu fu Satan de. Ma toku yu e tai hori na mi fu mi nen ede+ èn yu no tapu fu bribi na ini mi,+ srefi na ini a ten di den kiri mi kotoigi+ Antipas, di ben e gi yesi na Gado ala ten. Den kiri+ en leti pe unu de, drape pe Satan e tan.

14 Ma toku mi si wan tu sani na yu di mi no feni bun: Son sma de na yu drape di e horibaka gi a leri fu Bileam.+ A ben leri Balak+ fa fu meki den Israelsma du sondu. A ben meki den Israelsma nyan sani di ben gi leki srakti-ofrandi na den kruktugado èn a ben meki den du hurudu.+ 15 Na so a de tu, taki sma de drape na yu di e horibaka gi a leri fu a kerki fu Nikolas.+ 16 Fu dati ede yu musu abi berow.+ Efu yu no abi berow, dan mi o kon na yu esi-esi èn nanga a langa feti-owru di e komopo na ini mi mofo,+ mi o feti nanga den.+

17 A sma di abi yesi, meki a yere san a santa yeye e taigi den gemeente:+ Mi o gi a sma di wini a strei,+ pikinso fu a mana di kibri+ èn mi o gi en wan weti ston. Na tapu a ston disi wan nyun nen+ skrifi di nowan sma sabi, boiti a sma di kisi a ston.’+

18 Yu musu skrifi na engel fu a gemeente na Tiatira,+ taki: A Manpikin+ fu Gado, a sma di abi ai di de leki faya+ èn di abi futu di e brenki leki soifri kopro,+ e taki disi: 19 ’Mi sabi san yu e du èn mi sabi taki yu abi lobi+ nanga bribi. Mi sabi fa yu e du a diniwroko fu yu. Mi sabi taki yu e horidoro èn taki den sani di yu e du+ now, bigi moro den sani di yu ben du fosi.+

20 Ma toku mi si wan sani na yu di mi no feni bun: Yu e gi pasi taki na uma Iseibel+ di e kari ensrefi wan profeiti, du san a wani. A e gi leri+ na den srafu fu mi,+ a e kori den fu du hurudu+ èn fu nyan sani di gi leki srakti-ofrandi na den kruktugado.+ 21 Mi gi en ten fu a kan abi berow,+ ma a no wani abi berow fu a hurudu fu en.+ 22 Luku, mi o naki en nanga wan hebi siki. Efu den sma di e du sutadu nanga en, no abi berow fu den sani di na uma disi e meki den du, dan mi o meki den pina hebi. 23 Mi o kiri den pikin fu en nanga wan takru siki, so taki ala den gemeente o sabi taki mi na a sma di e ondrosuku den moro dipi prakseri* nanga na ati fu sma. Mi o pai ibriwan fu unu fu den sani di unu du.+

24 Ma den trawan fu unu di de na Tiatira, ala den wan di no teki a leri disi èn di no ben kon sabi den sani di sma e kari „den dipi sani” fu Satan,+ mi e taigi disi: Mi no e poti nowan tra hebi na un tapu.+ 25 Ma awansi fa a no fa, un musu tan hori steifi na san unu abi,+ teleki mi kon. 26 A sma di e wini a strei èn di e du den wroko fu mi te na a kaba,+ mi o gi en a makti fu tiri den pipel fu grontapu.+ 27 A sma dati o de leki wan skapuman di o tiri a pipel nanga wan isri tiki.+ A o naki den broko pisipisi neleki te wan sma e broko prapi.+ A o kisi a srefi makti di mi kisi fu mi Tata. 28 Mi o gi en a mamanten stari.+ 29 A sma di abi yesi, meki a yere san a santa yeye+ e taigi den gemeente.’+

3 Yu musu skrifi na engel+ fu a gemeente na Sardes, taki: A sma di abi den seibi yeye+ fu Gado nanga den seibi stari,+ e taki disi: ’Mi sabi san yu e du. Yu e tyari a nen taki yu de na libi, ma yu dede.+ 2 De na ai.+ Tranga+ den sani di tan abra èn di ben de fu dede, bika mi no feni taki yu du ala san yu ben musu du na fesi a Gado fu mi.+ 3 Fu dati ede tan prakseri san na den sani di yu ben kisi+ èn di yu ben yere. Tan du den sani disi+ èn abi berow.+ Fu tru, efu yu no wiki,+ dan mi o kon leki wan fufuruman+ èn yu no o sabi kwetikweti sortu yuru mi o kon.+

4 Toku wan tu sma de na Sardes di no doti+ den krosi fu den. Den o waka nanga mi aladi den weri weti krosi,+ bika den warti+ fu du dati. 5 Sobun, a sma di wini a strei,+ o weri weti krosi.+ Mi no o figi en nen puru kwetikweti na ini a buku fu libi.+ Ma na fesi mi Tata+ èn na fesi den engel fu en,+ mi o taki dati mi sabi a nen fu a sma disi. 6 A sma di abi yesi, meki a yere san a santa yeye+ e taigi den gemeente.’

7 Yu musu skrifi na engel+ fu a gemeente na Filadelfia, taki: A sma di santa+ èn di tru,+ a wan di abi a sroto fu David,+ a wan di e opo wan doro, so taki nowan sma kan sroto en èn di e sroto wan doro, so taki nowan sma kan opo en, e taki disi: 8 ’Mi sabi san yu e du.+ We, luku, mi opo wan doro+ gi yu di nowan sma kan sroto. Mi sabi taki yu abi pikinso krakti èn taki ala ten yu ben du san mi taki. Yu no gi mi porinen.+ 9 Luku, den sma di de fu a grupu fu Satan, e taki dati den na Dyu.+ Toku den a no trutru Dyu. Den e lei.+ We, mi o meki den kon fu saka kindi na yu futusei fu gi yu grani+ èn mi o meki den kon sabi taki mi lobi yu. 10 Fu di yu horidoro+ soleki fa mi ben du dati, meki mi o kibri+ yu sosrefi te a yuru fu tesi kon. A yuru dati o kon na heri grontapu, fu tesi den sma di e libi na grontapu.+ 11 Mi o kon esi-esi.+ Tan hori steifi na san yu abi,+ so taki nowan sma o teki a pai*+ di yu musu kisi.

12 Mi o meki a sma di wini a strei, tron wan pilari+ fu a tempel+ fu mi Gado+ èn a no o gowe libi a tempel noiti moro. Mi o skrifi a nen fu mi Gado na en tapu, sosrefi a nen fu a foto fu mi Gado, a nyun Yerusalem+ di e saka komoto fu mi Gado na hemel. Mi o skrifi a nyun nen fu mi na en tapu sosrefi.+ 13 A sma di abi yesi, meki a yere san a santa yeye+ e taigi den gemeente.’

14 Yu musu skrifi na engel fu a gemeente na Laodisea:+ Disi na san na Amen,+ a kotoigi+ di de fu frutrow+ èn di e taki san tru,+ a fosi sani di Gado meki,+ e taki: 15 ’Mi sabi san yu e du, taki yu no kowru, ma yu no faya tu. Mi ben winsi taki yu ben kowru noso taki yu ben faya. 16 Sobun, fu di yu no faya+ èn yu no kowru+ tu, ma yu brokokowru, meki mi o spiti yu puru na ini mi mofo. 17 Yu e taki: „Mi na wan guduman,+ mi abi wan lo gudu kaba èn mi no abi notinoti fanowdu.” Ma yu no sabi taki yu na wan mofina sma, taki sma e firi sari gi yu, taki yu pôti, taki yu breni+ èn taki yu de nanga sososkin. 18 Dati meki mi e gi yu a rai fu kon na mi fu bai gowtu+ di meki kon soifri na ini faya, so taki yu kan kon gudu. Kon bai weti krosi na mi tu, so taki yu kan weri krosi fu no de nanga sososkin. Dan sma no o si a syen fu yu.+ Sosrefi, kon bai aisalfu na mi èn lobi dati gi yu ai,+ so taki yu kan si.

19 Mi e piri-ai gi ala den wan di mi lobi èn mi e strafu den,+ so taki den kan leri wan sani. Fu dati ede, de nanga faya èn abi berow.+ 20 Luku, mi e tanapu na a doro+ èn mi e naki na en tapu. Efu wan sma yere mi sten èn a opo a doro,+ dan mi o kon na ini en oso, mi o nyan nanga en èn en o nyan nanga mi. 21 Neleki fa mi ben wini a strei+ èn mi ben go sidon nanga mi Tata na tapu en kownusturu,+ na so mi o meki a sma di wini a strei, kon sidon+ nanga mi na tapu mi kownusturu.+ 22 A sma di abi yesi, meki a yere san a santa yeye+ e taigi den gemeente.’”+

4 We, baka dati mi si wan opo doro na ini hemel èn a sten di mi ben yere na fesi kaba, ben de leki a babari fu wan trompeti.+ A ben taigi mi: „Opo kon dyaso,+ dan mi o sori yu den sani di musu pasa.”+ 2 Baka dati santa yeye kon na mi tapu wantewante: ne mi si wan kownusturu+ di ben de na en presi na ini hemel+ èn wan sma ben e sidon na tapu a kownusturu.+ 3 A sma di ben sidon na en tapu ben gersi+ wan yaspis-ston+ nanga wan redi diriston. Lontu a kownusturu wan alenbo+ ben de di ben gersi smaragd-ston.+

4 Lontu a kownusturu, tutenti na fo kownusturu ben de èn mi ben si tutenti na fo+ owru man+ e sidon na tapu den kownusturu+ disi. Den ben weri weti krosi+ èn na tapu den ede den ben weri gowtu kownu-ati.+ 5 Faya ben e koti+ komoto fu a kownusturu, sten ben de fu yere èn dondru ben e bari.+ Seibi lampu+ ben leti nanga faya na fesi a kownusturu. Den na den seibi yeye+ fu Gado. 6 Na fesi a kownusturu wan sani ben de di ben gersi wan grasi se+ èn a ben gersi wan sortu dyamanti di sma e kari kristal.

Krosibei fu a kownusturu èn lontu a kownusturu, fo kerub-engel+ ben de di ben lai nanga ai, na fesisei èn na bakasei. 7 A fosi kerub-engel ben gersi wan lew,+ a di fu tu kerub-engel ben gersi wan yongu mankaw,+ a di fu dri kerub-engel+ ben abi wan fesi leki di fu wan libisma èn a di fu fo kerub-engel+ ben gersi wan aka di e frei.+ 8 Ibriwan fu den fo kerub-engel+ ben abi siksi frei.+ Den heri skin nanga na ondrosei fu den frei ben lai nanga ai.+ Doronomo, iya, dei nanga neti den e taki: „Yehovah Gado de santa, santa, santa.+ En na a Almaktiwan+ di ben de kaba, di de nownowde+ èn di o kon.”

9 Ibri leisi te den kerub-engel ben e gi glori, grani nanga tangi+ na a sma di ben e sidon na tapu a kownusturu,+ a sma di e libi fu têgo, iya, fu ala ten,+ 10 dan den tutenti na fo owru man+ ben e saka kindi na fesi a sma di ben e sidon na tapu a kownusturu. Den ben e anbegi+ a sma di e libi fu têgo, iya, fu ala ten. Den ben e trowe a kownu-ati fu den go na fesi a kownusturu èn den ben e taki: 11 „Na yu, Yehovah wi Gado, warti fu sma prèise yu gi a glori,+ a grani+ nanga a makti+ di yu abi, bika na yu meki ala sani.+ Na fu di yu ben wani,+ meki den sani disi kon de èn na yu meki den.”+

5 Na ini a reti-anu fu a sma di e sidon na tapu a kownusturu,+ mi si wan bukulolo. Sani ben skrifi na inisei èn na bakasei fu a bukulolo+ èn a ben tapu+ bun nanga seibi lakstampu. 2 Ne mi si wan tranga engel di ben bari nanga wan tranga sten, taki: „Suma warti fu opo a bukulolo èn fu puru den lakstampu fu en?” 3 Ma nowan enkri sma ben de na ini hemel, na grontapu, noso na ondro gron, di ben man opo a bukulolo èn luku san skrifi na ini. 4 Ne mi bari krei, bika den no ben man feni nowan sma di ben warti fu opo a bukulolo èn fu luku go na ini.+ 5 Ma wan fu den owru man taigi mi: „No krei moro. Luku, a Lew fu a lo fu Yuda,+ a rutu+ fu David,+ wini a strei.+ Dati meki a warti fu opo a bukulolo èn a warti fu puru den seibi lakstampu fu en.”

6 Ne mi si wan pikin skapu+ e tanapu krosibei fu a kownusturu+ èn na mindri den fo kerub-engel nanga den owru man.+ A ben gersi leki sma srakti+ a pikin skapu. A ben abi seibi tutu nanga seibi ai. Den ai na den seibi yeye+ fu Gado di a seni go na heri grontapu. 7 Dan a pikin skapu go èn wantewante a teki a bukulolo di ben de na ini a reti-anu fu a sma di e sidon na tapu a kownusturu.+ 8 Di a teki a bukulolo, dan den fo kerub-engel nanga den tutenti na fo owru man+ saka kindi na fesi a Pikin Skapu. Ibriwan fu den ben abi wan harpu+ nanga gowtu komki di ben furu nanga switismeri. (A switismeri+ na den begi+ fu den santawan.) 9 Den e singi wan nyun singi,+ taki: „Yu warti fu teki a bukulolo èn fu puru den lakstampu fu en, bika na yu den ben srakti èn nanga yu brudu+ yu bai+ sma gi Gado,+ komopo fu ibri lo, tongo, pipel, nanga kondre. 10 Na yu meki den tron wan Kownukondre+ èn yu meki den tron priester+ gi wi Gado+ èn den o tiri grontapu leki kownu.”+

11 Dan mi luku èn mi yere a sten fu bun furu engel di ben tanapu lontu a kownusturu èn lontu den kerub-engel nanga den owru man. Tin dusun tron tin dusun+ engel ben de nanga dusun tron dusun.+ 12 Den ben e taki nanga wan tranga sten: „A Pikin Skapu di den srakti,+ warti fu kisi makti, gudu, koni, krakti, grani, glori, nanga blesi.”+

13 Ne mi yere ala den libisani di de na hemel, na grontapu, na ondro gron,+ na tapu se èn sosrefi ala sani di de na ini den. Den ben e taki: „A sma di e sidon na tapu a kownusturu,+ nanga a Pikin Skapu+ musu kisi blesi, grani,+ glori,+ nanga makti fu têgo, iya, fu ala ten.” 14 Ne den fo kerub-engel taki: „Amen!” Ne den owru man+ saka kindi èn den anbegi+ Gado.

6 Mi si di a Pikin Skapu+ puru wan fu den seibi lakstampu+ èn mi yere wan fu den fo kerub-engel+ taki nanga wan sten di ben de leki a babari fu dondru. A taki: „Kon!”+ 2 Ne mi si wan weti asi.+ A sma di ben e sidon+ na en tapu ben abi wan bo.+ A kisi wan kownu-ati+ èn a hari go feti nanga den feanti fu en. A feti nanga a wan baka a trawan,+ teleki a wini den alamala.+

3 Di a Pikin Skapu puru a di fu tu lakstampu, dan mi yere a di fu tu kerub-engel+ taki: „Kon!” 4 Ne wan tra asi kon. A ben de wan asi di ben redi leki faya. A sma di ben e sidon na en tapu, ben kisi primisi fu meki feti kon na grontapu, so taki sma ben o kiri makandra. A ben kisi wan bigi feti-owru tu.+

5 Di a+ puru a di fu dri lakstampu, dan mi yere a di fu dri kerub-engel+ taki: „Kon!” Ne mi si wan blaka asi èn a sma di ben e sidon na en tapu ben abi wan wegi+ na ini en anu. 6 Dan mi yere wan sten. A ben gersi leki a ben komopo na mindri+ den fo kerub-engel.+ A taki: „Wán kilo aleisi gi wán dei moni,*+ nanga dri kilo groto* gi wán dei moni. No meki noti pasa nanga na olèif-oli èn nanga a win.”+

7 Di a puru a di fu fo lakstampu, dan mi yere a sten fu a di fu fo kerub-engel+ taki: „Kon!” 8 Ne mi si wan asi di abi wan sikisma kloru. A sma di ben e sidon na en tapu, ben nen Dede. Grebi*+ ben e kon leti na en baka. Den ben kisi makti fu tiri wan di fu fo pisi fu grontapu, so taki den ben kan kiri sma nanga wan langa feti-owru,+ nanga angriten+ èn nanga takru siki. Den ben kan meki den ogri meti+ fu grontapu kiri sma tu.

9 Di a puru a di fu feifi lakstampu, dan na a futu fu na altari+ mi si a brudu*+ fu den wan di sma kiri,+ fu di den ben e gi yesi na a wortu fu Gado èn fu di den ben e preiki+ a wortu gi sma. 10 Den ben taki nanga wan tranga sten: „Moro Hei+ Masra, yu di santa èn di tru,+ o langa yu o wakti fu krutu+ den sma na grontapu di kiri wi èn o langa yu o wakti fu strafu den?”+ 11 Ne ibriwan fu den kisi wan langa weti+ krosi fu weri. Den ben kisi fu yere tu taki den ben musu wakti pikinso ete, teleki ala den trawan di de srafu neleki den èn di de brada fu den, ben o dede, bika sma ben de fu kiri+ den trawan disi neleki fa sma ben kiri den.

12 Dan mi si taki a puru a di fu siksi lakstampu. Ne wan bigi gronseki kon, a son kon blaka leki blaka rowkrosi+ èn a heri mun ben kon redi leki brudu.+ 13 Neleki te wan bigi winti e seki wan figabon, trowe den grun froktu fu en na gron, na so den stari na hemel ben fadon kon na grontapu. 14 Dan hemel skoifi gowe na wan sei neleki te sma e lolo wan bukulolo tapu+ èn ibri bergi nanga ibri èilanti komopo na en presi.+ 15 Den kownu fu grontapu, den heihei man, den legre-edeman, den guduman, den tranga man èn ibri srafu nanga ibri fri sma go kibri na ini den bergi-olo èn na mindri den bigi bergiston.+ 16 Den ben e tan taigi den bergi nanga den bigi ston: „Fadon kon na wi tapu+ èn kibri wi, so taki a sma di e sidon na tapu a kownusturu+ no man si wi. Kibri wi tu gi a bigi atibron fu a Pikin Skapu,+ 17 bika a bigi dei+ fu a bigi atibron+ fu den doro. Suma o man tan na libi?”+

7 Baka dati mi si fo engel+ e tanapu na den fo uku fu grontapu èn den ben e hori den fo winti+ fu grontapu bun steifi, so taki nowan fu den winti ben kan wai kon na grontapu, na tapu a se, noso na tapu iniwan bon.+ 2 Dan mi si wan tra engel e opo kon fu a sei pe son e opo+ èn a ben hori wan stampu fu a libi Gado+ na ini en anu. Ne a bari nanga wan tranga sten gi den fo engel di ben kisi primisi fu du ogri nanga grontapu èn nanga a se. 3 A taki: „No du ogri nanga grontapu, nanga a se, noso nanga den bon, teleki wi poti wan marki na tapu+ a fesi-ede fu den srafu fu wi Gado.”+

4 Ne mi yere gi omeni sma den poti wan marki. Den poti en gi wán hondro fotenti na fo dusun+ sma di komopo fu ibri lo+ fu den manpikin fu Israel:+

9 Baka dati mi si wan bigi ipi+ sma di nowan sma ben man teri. Den ben komoto na ala kondre,+ lo, pipel,+ nanga tongo.+ Den ben e tanapu na fesi a kownusturu+ èn na fesi a Pikin Skapu. Den ben e weri langa weti krosi+ èn den ben e hori palmtaki+ na ini den anu. 10 Den ben e tan taki nanga wan tranga sten: „Tangi fu wi Gado di e sidon na tapu a kownusturu+ èn tangi fu a Pikin Skapu,+ meki wi kisi frulusu.”+

11 Ala den engel+ ben e tanapu lontu a kownusturu èn lontu den owru man+ nanga den fo kerub-engel.+ Ne den saka kindi na fesi a kownusturu èn den anbegi Gado.+ 12 Den ben taki: „Amen! Meki sma prèise a Gado fu wi èn meki den gi en glori, meki den gi en grani èn meki den taki en tangi fu têgo, iya, fu ala ten, fu di a abi koni, makti,+ nanga krakti. Amen.”+

13 Ne wan fu den owru man+ aksi mi: „Suma na den sma disi di weri den langa weti krosi+ èn fu pe den komoto?” 14 Wantewante mi taigi en: „Masra, na yu na a sma di sabi a piki.” Dan a taigi mi: „Den wan disi na den sma di komoto na ini a bigi banawtu.+ Den wasi den langa krosi fu den èn den meki den kon weti+ na ini a brudu+ fu a Pikin Skapu. 15 Dati meki den de na fesi+ a kownusturu fu Gado. Den e du santa wroko+ gi en dei nanga neti na ini a tempel fu en. A sma di e sidon na tapu a kownusturu+ o bradi en tenti+ abra den. 16 Den no o de nanga angribere moro èn watra no o kiri den moro. Son no o faya tumusi gi den èn nowan faya o bron den,+ 17 bika a Pikin Skapu+ di de krosibei fu a kownusturu o tiri+ den èn a o tyari den go na den peti di abi watra di e gi libi.+ Gado o figi ala watra puru na den ai.”+

8 Di a+ puru a di fu seibi lakstampu,+ dan ala sani kon tiri na ini hemel sowan afu yuru langa. 2 Ne mi si den seibi engel+ di e tanapu na fesi Gado èn ibriwan fu den ben kisi seibi trompeti.

3 Dan wan tra engel kon èn a go tanapu na a altari.+ Na ini en anu a ben e hori wan gowtu patu fu bron switismeri na ini. A kisi furu switismeri+ fu bron leki ofrandi na tapu a gowtu altari di ben de na fesi a kownusturu. A ben musu bron en te den santawan ben e begi. 4 A smoko fu a switismeri di ben de na ini na anu fu na engel, ben opo go te na fesi Gado, makandra nanga den begi+ fu den santawan. 5 Ne wantronso na engel teki a patu pe switismeri ben musu bron na ini, dan a furu a patu nanga pikinso fu a faya+ di ben de na tapu na altari èn a fringi a faya go na grontapu.+ Ne dondru bari,+ sten ben de fu yere, faya bigin koti na hemel+ èn wan gronseki+ ben de. 6 Dan den seibi engel di ben abi den seibi+ trompeti,+ sreka densrefi fu bro den trompeti.

7 A fosi engel bro a trompeti fu en. Ne pisipisi ijs nanga faya+ di ben moksi nanga brudu, fringi go na grontapu. Wan di fu dri pisi fu grontapu bron,+ wan di fu dri pisi fu ala den bon bron èn ala den grun wiwiri+ bron tu.

8 Baka dati a di fu tu engel bro a trompeti fu en. Ne wan sani di ben gersi wan bigi bergi+ di ben e bron nanga faya, fringi go na ini a se.+ Dan wan di fu dri pisi fu a se tron brudu.+ 9 Wan di fu dri pisi fu ala den sani di e libi* na ini a se, kon dede+ èn wan di fu dri pisi fu ala boto sungu.

10 Dan a di fu dri engel bro a trompeti fu en. Ne wan bigi stari di ben e brenki leki a leti fu wan lampu, fadon komoto fu hemel+ èn a fadon na tapu wan di fu dri pisi fu ala den liba èn na tapu den presi pe watra e komopo.+ 11 A nen fu a stari na Bita. Wan di fu dri pisi fu ala watra kon bita èn furu sma dede fu di den dringi a watra disi di ben kon bita.+

12 Dan a di fu fo engel bro a trompeti fu en. Ne den naki wan di fu dri pisi fu a son, wan di fu dri pisi fu a mun, nanga wan di fu dri pisi fu ala den stari, so taki wan di fu dri pisi fu den kon dungru+ èn leti no ben skèin wan di fu dri pisi+ fu a dei. Na so a ben de tu nanga a neti.

13 Ne mi si wan aka+ e frei na loktu+ èn mi yere a bari nanga wan tranga sten: „Helu, helu, helu+ fu den sma di e libi na grontapu, bika den o yere a babari fu den tra trompeti di den dri engel de fu bro!”+

9 Dan a di fu feifi engel bro a trompeti+ fu en. Ne mi si wan stari+ di ben fadon komoto fu hemel kon na grontapu èn a ben kisi a sroto+ fu a dipi peti di no abi gron.+ 2 A stari opo a dipi peti èn smoko+ opo komoto fu a peti neleki a smoko fu wan bigi onfu.+ A smoko fu a peti ben meki taki a son nanga a loktu kon dungru.+ 3 Sprenka+ komoto na ini a smoko, kon na grontapu. Den kisi makti. A ben de a srefi makti leki a di fu den kruktutere+ fu grontapu. 4 Den sprenka kisi fu yere taki den no ben musu du noti nanga den sani di e gro na grontapu, noso nanga den grun wiwiri, noso nanga iniwan bon, ma soso nanga den sma di no abi a marki fu Gado na tapu den fesi-ede.+

5 Den sprenka no kisi primisi fu kiri den sma dati, ma fu gi den skin-ati+ feifi mun langa. A skin-ati di den sma disi ben kisi ben de neleki a skin-ati di wan sma e kisi te wan kruktutere+ sutu en. 6 Na ini a ten dati den sma o suku wan fasi fu dede,+ ma den no o feni en. Den o wani dede, ma dede o lowe gi den.

7 Den sprenka ben gersi asi+ di de srekasreka fu go na feti. Na tapu den ede den ben abi sani di ben gersi gowtu kownu-ati èn den fesi ben gersi libisma fesi,+ 8 ma den ben abi wiwiri leki di fu umasma.+ Den tifi ben gersi lew tifi.+ 9 Den ben weri sani di ben gersi isri skelt fu tapu a borsu fu den.+ Den frei fu den ben e meki wan babari di ben de neleki te furu asi e hari asiwagi+ fu go feti.+ 10 Den abi tere tu di abi maka neleki di fu kruktutere.+ A tere fu den ben abi a makti fu gi den sma skin-ati feifi mun langa. 11 Wan kownu e tiri den èn dati na a engel fu a dipi peti.+ Na ini Hebrewtongo a kownu nen Abadon,* ma na ini Grikitongo en nen na Apolion.*+

12 Wán helu pasa kaba. Luku, baka den sani disi ete tu helu+ e kon.

13 Ne a di fu siksi engel+ bro a trompeti+ fu en. Dan mi yere wan sten+ e komopo fu den tutu fu a gowtu altari+ di de na fesi Gado. 14 A sten taigi a di fu siksi engel di ben abi a trompeti: „Lusu den fo engel+ di tai+ na a bigi Eufraat-liba.”+ 15 Dan a lusu den fo engel di ben de srekasreka gi a yuru, a dei, a mun, nanga a yari, fu go kiri wan di fu dri pisi fu ala den sma.

16 A legre fu den srudati di ben e rèi na tapu asi, ben abi tu hondro milyun srudati. Mi ben kisi fu yere nanga omeni den ben de. 17 Ne mi si den asi na ini a fisyun nanga den sma di ben e sidon na den tapu. Disi na san mi si: den ben weri isri empi fu tapu a borsu fu den. Den empi disi ben redi, blaw nanga geri. Na ede fu den asi ben gersi di fu wan lew+ èn faya, smoko, nanga wan dampu di man kiri sma,+ ben e komoto na ini a mofo fu den. 18 Disi na den dri rampu di ben kiri wan di fu dri pisi fu ala den sma: a faya, a smoko, nanga a dampu di ben e komoto na ini a mofo fu den. 19 A makti fu den asi de na ini a mofo fu den èn na ini a tere fu den, bika den tere de leki sneki.+ Den tere abi ede tu èn nanga dati den e du sma ogri.

20 Ma den tra sma di no dede di den rampu disi miti den, no ben abi berow fu den sani di den du.+ Den tan anbegi den ogri yeye+ nanga den falsi gado di meki fu gowtu, solfru,+ kopro, ston, nanga udu èn di no man si, yere, noso waka.+ 21 Den sma disi no ben abi berow taki den ben kiri sma,+ taki den ben du afkodrei,+ taki den ben du hurudu èn taki den ben fufuru.

10 Dan mi si ete wan tranga engel+ e saka komoto fu hemel. A krosi fu en ben de wan wolku+ èn wan alenbo ben de na tapu en ede. En fesi ben de leki a son+ èn en futu+ ben de leki pilari fu faya. 2 Na ini en anu a ben hori wan pikin bukulolo di ben opo. Dan a poti en retisei futu na tapu a se, ma en kruktusei futu a poti na tapu a syoro.+ 3 Ne a bari nanga wan tranga sten neleki te wan lew+ e bari. Di a bari, mi yere den sten fu den seibi dondru.+

4 Di den seibi dondru bigin taki, mi ben wani skrifi den sani di den ben taki. Ma mi yere wan sten komoto fu hemel+ e taki: „No skrifi den sani di den seibi dondru taki, ma kibri* den sani disi bun.”+ 5 Dan na engel di mi ben si e tanapu na tapu a se èn na tapu a syoro, opo en reti-anu go na hemel.+ 6 A sweri na a sma di e libi+ fu têgo, iya, fu ala ten,+ a wan di meki hemel nanga den sani di de na ini, sosrefi grontapu+ nanga den sani na tapu èn a se nanga den sani di de na ini.+ Na engel sweri taki: „A no o wakti+ moro. 7 Ma na a ten te a di fu seibi engel+ de fu bro a trompeti+ fu en, a santa kibritori+ di Gado fruteri leki bun nyunsu na en eigi srafu di de profeiti,+ o kon tru nomonomo.”

8 Ne mi yere a sten+ komoto fu hemel. A ben e taki ete wan leisi nanga mi. A taigi mi: „Go teki a bukulolo di opo. A de na ini na anu fu na engel di e tanapu na tapu a se èn na tapu a syoro.”+ 9 Ne mi go na a engel èn mi taigi en fu gi mi a pikin bukulolo. A taigi mi: „Teki en. Nyan en,+ dan a o meki yu bere kon bita, ma na ini yu mofo a o switi leki oni.” 10 Ne mi teki a pikin bukulolo puru na ini na anu fu na engel, dan mi nyan en+ èn na ini mi mofo a ben switi leki oni.+ Ma di mi nyan en kaba, a meki mi bere kon bita. 11 Dan den taigi mi: „Yu musu go doro fu taki profeititori di abi fu du nanga pipel, kondre, tongo èn nanga furu kownu.”+

11 Dan a gi mi wan warimbo di ben gersi wan markitiki+ èn a taki: „Opo go marki a santa presi na ini a tempel+ fu Gado. Marki na altari sosrefi nanga den sma di e anbegi Gado na ini a santa presi. 2 Ma yu musu libi a dyari di de lontu+ a santa presi fu a tempel. No marki en, bika mi gi den trakondre sma+ a pisi dati. Nanga den futu den o masi a santa foto+ fotenti na tu mun langa.+ 3 Mi o meki den tu+ kotoigi fu mi taki profeititori+ wán dusun tu hondro siksitenti dei langa. Den o weri krosi di e sori taki den e sari.”+ 4 Den tu kotoigi na den tu olèifbon+ nanga den tu kandratiki+ èn den e tanapu na fesi a Masra fu grontapu.+

5 Efu wan sma wani du den ogri, dan faya o komopo na ini den mofo èn a o bron den feanti fu den.+ Efu wan sma wani du den ogri, dan den musu kiri en na a srefi fasi disi. 6 Den tu kotoigi abi a makti fu tapu hemel,+ so taki alen no fadon+ na a ten te den e taki profeititori. Den abi a makti tu fu meki a watra kon tron brudu+ èn fu tyari ibri sortu rampu kon na grontapu, awansi omeni tron den wani du dati.

7 Te den kaba fu preiki gi sma, dan na ogri meti o opo komoto na ini a dipi peti di no abi gron+ èn a o kon feti nanga den. A o wini den èn a o kiri den.+ 8 Den dedeskin fu den o didon na tapu a bradi strati fu a bigi foto. Na wan agersi fasi den e kari a foto disi Sodom+ nanga Egepte. Na drape sma ben spikri a Masra fu den na wan postu sosrefi.+ 9 Dri nanga afu dei+ langa, sma fu ala pipel, lo, tongo, nanga kondre+ o si den dedeskin èn den no o wani meki sma poti den dedeskin na ini wan grebi. 10 Den sma di e libi na grontapu o breiti+ èn den o meki prisiri fu di den tu kotoigi dede. Den o seni kado gi makandra,+ bika den tu profeiti disi pina den sma di e libi na grontapu.

11 Baka den dri nanga afu dei,+ Gado gi den tu kotoigi libikrakti.*+ Ne den opo tanapu. Den sma di si den, ben kon frede srefisrefi. 12 Dan den kotoigi yere wan tranga sten+ na ini hemel di ben taigi den: „Opo kon dyaso.”+ Ne den opo go na hemel na ini wan wolku èn den feanti fu den si den. 13 Na a srefi yuru dati wan bigi gronseki ben de èn wan di fu tin pisi+ fu a foto broko fadon. A gronseki kiri seibi dusun sma. Ne den tra sma kon frede èn den gi a Gado fu hemel glori.+

14 A di fu tu helu+ pasa kaba. Luku, a di fu dri helu e kon esi-esi.

15 Dan a di fu seibi engel bro a trompeti fu en.+ Ne tranga sten ben de fu yere na ini hemel. Den taki: „A Kownukondre fu grontapu kon tron a Kownukondre fu wi Masra+ èn fu a Krestes+ fu en. A o tiri leki kownu fu têgo, iya, fu ala ten.”+

16 Den tutenti na fo owru man+ di ben sidon na fesi Gado na tapu den kownusturu fu den, saka kindi boigi go na gron+ èn den anbegi Gado.+ 17 Den taki: „Wi e taki yu tangi,+ Yehovah Gado, na Almaktiwan,+ a sma di de nownowde+ èn di ben de kaba, bika yu teki a bigi makti+ fu yu èn yu bigin tiri leki kownu.+ 18 Ma den kondre kisi bigi atibron èn yu srefi kisi atibron. A reti ten ben doro fu krutu den dede sma, fu pai den+ srafu fu yu di de profeiti,+ den santawan nanga den wan di e frede yu nen, den mofinawan nanga den heihei sma.+ A reti ten doro fu pori+ den wan di e pori grontapu.”+

19 Baka dati den opo a santa presi fu Gado en tempel di de na ini hemel+ èn a santa kisi+ fu en frubontu ben de fu si na ini a santa presi fu en tempel.+ Ne faya koti na hemel, sten ben de fu yere, dondru bari, wan gronseki kon èn pisipisi ijs fadon kon na grontapu leki wan bigi alen.

12 Baka dati wan bigi marki+ ben de fu si na ini hemel: wan uma+ ben weri a son leki krosi èn a mun ben de na ondro en futu èn a ben abi twarfu stari na tapu en ede leki wan kownu-ati. 2 Na uma ben de nanga bere. A ben e bari bika a ben abi furu pen+ èn a ben e pina srefisrefi fu di a ben de fu meki wan pikin.

3 Wan tra marki ben de fu si na ini hemel: wan bigi kaiman+ di ben redi leki faya. A ben abi seibi ede nanga tin tutu èn seibi kownu-ati ben de na tapu den ede fu en. 4 En tere+ ben srepi wan di fu dri pisi fu ala den stari+ puru na ini hemel èn a fringi den go na grontapu.+ A bigi kaiman ben tan tanapu na fesi na uma+ di ben de fu meki a pikin,+ so taki te na uma ben o meki a pikin, a ben kan swari+ en.

5 Dan na uma kisi wan boi, wan manpikin,+ di o tiri ala pipel nanga wan isri tiki.+ Ne den tyari a pikin esi-esi go na Gado èn na a kownusturu fu en.+ 6 Dan na uma lowe go na ini a sabana+ pe Gado sreka wan presi gi en èn wán dusun tu hondro siksitenti dei+ langa den ben o tyari nyanyan+ gi en drape.

7 Ne wan feti bigin na ini hemel: Mikael+ nanga den engel fu en ben feti nanga a bigi kaiman èn a bigi kaiman nanga den engel fu en ben feti nanga den, 8 ma a bigi kaiman no wini a feti èn presi no ben de moro gi den na ini hemel. 9 Fu dati ede den fringi a bigi kaiman+ go na grontapu. En na a fosi sneki,+ a wan di den e kari Didibri+ nanga Satan+ èn a e kori sma na heri grontapu.+ Den fringi en go na grontapu+ èn den fringi den engel fu en go na grontapu makandra nanga en. 10 Ne mi yere wan tranga sten na ini hemel e taki:

„Luku, a Gado fu wi frulusu+ sma, a sori a krakti+ fu en, a Kownukondre fu en+ seti kaba èn a Krestes+ fu en bigin tiri kaba, bika a sma di e taki ogri fu wi brada èn di e taki lei fu den na fesi wi Gado dei nanga neti,+ fringi go na ondro! 11 A krakti fu a brudu fu a Pikin Skapu+ èn a boskopu di den e fruteri sma,+ meki taki den wini a bigi kaiman.+ Den no ben frede fu lasi den libi,*+ awansi den ben kan dede. 12 Fu dati ede prisiri, un hemel èn unu di e libi drape!+ Ma helu+ fu grontapu èn fu a se,+ bika Didibri saka kon na unu èn a abi bigi atibron fu di a sabi taki en ten syatu.”+

13 We, di a bigi kaiman si taki den fringi en go na grontapu,+ dan a bigin frufolgu na uma+ di ben meki a manpikin. 14 Ma na uma kisi tu frei fu wan bigi aka,+ so taki a ben kan frei go na a sabana,+ na a presi di ben sreka gi en. Drape a kisi nyanyan+ wán pisi ten nanga tu pisi ten nanga wan afu pisi ten+ sondro taki a sneki+ ben kan si en.

15 Dan a sneki spiti watra puru na ini en mofo,+ go na a sei fu na uma, so taki na uma ben kan dede na ini a watra. A watra ben furu so te, taki a ben gersi wan liba.+ 16 Ma grontapu kon yepi na uma+ èn a gron priti opo, dan a swari a liba di a bigi kaiman ben spiti puru na ini en mofo. 17 Ne a bigi kaiman ati kon bron srefisrefi nanga na uma+ èn a gowe go feti nanga den pikin fu na uma di ben tan abra. Na den e hori den komando fu Gado èn den kisi a wroko fu kotoigi+ fu Yesus.

13 Ne a tan tanapu na tapu a syoro+ fu a se.

Dan mi si wan ogri meti+ e opo komoto na ini a se.+ A ben abi tin tutu+ nanga seibi ede+ èn na tapu den tutu fu en a ben abi tin kownu-ati, ma na tapu den ede fu en a ben abi nen di ben e sori taki a e wisiwasi Gado.+ 2 Na ogri meti di mi si, ben gersi wan penitigri,+ ma den futu fu en ben gersi den futu fu wan beer+ èn en mofo ben gersi wan lew+ mofo. A bigi kaiman+ ben gi a meti krakti nanga bigi makti èn a ben meki a meti tiri leki kownu.+

3 Ne mi si taki wan fu den ede fu a meti ben abi wan bigi koti èn pikinmoro a dede fu a koti disi. Ma a bigi koti+ kon betre èn heri grontapu ben fruwondru srefisrefi. Den go waka na baka na ogri meti. 4 Den anbegi a bigi kaiman, bika na en ben gi na ogri meti makti. Den anbegi na ogri meti tu. Den taki: „Suma de leki na ogri meti èn suma man feti nanga en?” 5 Dan a bigi kaiman gi na ogri meti wan mofo di ben e taki bigi sani+ èn di ben e taki sani fu wisiwasi Gado.+ A kisi a makti tu fu du sani fotenti na tu mun+ langa. 6 Ne a opo en mofo fu wisiwasi+ Gado. Na so fasi a wisiwasi Gado nen nanga a tanpresi fu Gado. Dati na den wan di e libi na ini hemel.+ 7 A kisi primisi+ fu feti nanga den santawan èn fu wini den.+ A kisi makti sosrefi fu tiri ibri lo, pipel, tongo, nanga kondre. 8 Ala den sma di e libi na grontapu o anbegi en. Sensi a ten di grontapu seti,+ nowan fu den sma disi nen skrifi na ini a buku+ fu libi. A buku disi na fu a Pikin Skapu di sma srakti.+

9 Efu wan sma abi yesi, meki a yere.+ 10 Efu wan sma musu go na strafu-oso, dan a o go na strafu-oso.+ Efu wan sma kiri trawan nanga a feti-owru, dan den musu kiri en nanga a feti-owru tu.+ Fu dati ede a de fanowdu taki den santawan+ horidoro+ èn taki den abi bribi.+

11 Dan mi si wan tra ogri meti+ e opo komoto na ini a gron.+ A ben abi tu tutu leki di fu wan pikin skapu, ma a ben bigin taki leki wan bigi kaiman.+ 12 Leti na fesi a fosi ogri meti,+ a tra meti ben e gebroiki ala a makti fu a fosi ogri meti. A ben e meki taki grontapu nanga den sma di e libi drape, anbegi a fosi ogri meti di pikinmoro dede fu a bigi koti di a kisi, ma di kon betre.+ 13 Na ogri meti ben e du bigi wondru+ èn a ben meki srefi taki faya fadon komoto na loktu, kon na grontapu leti na fesi ala sma.

14 A ben kisi primisi fu du wondru leti na fesi a fosi ogri meti. Nanga den wondru dati a kori den sma di e libi na grontapu. A ben taigi den taki den musu meki wan popki+ fu na ogri meti di ben kisi wan bigi koti nanga feti-owru,+ ma di ben kisi ensrefi baka. 15 A ben kisi primisi tu fu bro libikrakti na ini a popki di den meki fu na ogri meti, so taki a popki ben kan opo en mofo fu taki sani èn a ben kan meki sma kiri ala den wan di e weigri fu anbegi a popki+ di den meki fu na ogri meti.

16 A ben dwengi ala sma,+ mofinawan nanga heihei sma, guduman nanga pôti sma, friman nanga srafu, so taki sma ben o poti wan marki na tapu den reti-anu, noso na tapu den fesi-ede+ 17 èn taki nowan sma kan bai noso seri sani, boiti den sma di abi a marki. A marki na a nen+ fu na ogri meti, noso a nomru fu en nen.+ 18 Koni de fanowdu gi a sani disi: Meki a sma di abi frustan, luku san na a nomru fu na ogri meti, bika a de a nomru fu wan libisma.+ A nomru fu en na siksi hondro siksitenti na siksi.+

14 Baka dati mi si a Pikin Skapu+ e tanapu na tapu Sion-bergi,+ makandra nanga wán hondro fotenti na fo dusun+ sma. A nen fu en nanga a nen fu en Tata+ ben skrifi na tapu a fesi-ede fu den. 2 Ne mi yere wan babari e komoto fu hemel. A ben de leki a babari fu bigi sula+ èn leki a babari fu bigi dondru. A babari di mi ben yere, ben de leki a sten fu singiman di e singi, aladi den e prei poku na tapu a harpu+ fu den. 3 Na fesi a kownusturu èn na fesi den fo kerub-engel+ nanga den owru man,+ den ben e singi+ wan singi di ben gersi wan nyun singi.+ Nowan sma ben man leri a singi dati, boiti den wán hondro fotenti na fo dusun+ sma di bai+ puru fu grontapu. 4 Den sma disi no doti densrefi, fu di den no didon nanga uma.+ Fu taki en leti, den e libi wan krin libi.*+ Den e tan waka na baka a Pikin Skapu awansi pe a e go.+ Den na den fosiwan+ di bai+ puru na mindri libisma gi Gado èn gi a Pikin Skapu. 5 Nowan lei e komoto na ini den mofo.+ Den de sondro fowtu.+

6 Dan mi si wan tra engel e frei na loktu.+ A ben abi têgo bun nyunsu+ di a ben musu fruteri den sma di e libi na grontapu, iya, sma fu ala kondre, lo, tongo, nanga pipel.+ 7 Nanga wan tranga sten a ben e taki: „Un frede* Gado+ èn gi en glori,+ bika a yuru doro kaba taki a o krutu sma.+ Fu dati ede, anbegi a sma di meki+ hemel, grontapu, a se, nanga ala den presi pe watra e komopo.”+

8 Dan wan tra engel kon, iya, wan di fu tu. A taki: „A fadon! Babilon+ a Bigiwan fadon.+ Na en ben meki ala den pipel dringi a win+ fu en atibron, a win fu en hurudu!”+

9 Dan ete wan engel kon, iya, wan di fu dri. Nanga wan tranga sten a taki: „Efu wan sma e anbegi na ogri meti,+ nanga a popki+ di den meki fu en èn a sma e kisi wan marki na tapu en fesi-ede, noso na tapu en anu,+ 10 dan a sma dati o dringi a win fu na atibron fu Gado tu.+ A win disi kanti go na ini a kan fu en bigi atibron èn a no moksi nanga tra sani. Leti na fesi den santa engel nanga a Pikin Skapu, den o pina+ a sma dati nanga wan faya di e bron sani krinkrin.+ 11 A smoko fu a faya di e pina den, o opo go na loktu fu têgo, iya, fu ala ten.+ Den sma disi di e anbegi na ogri meti, nanga a popki di den meki fu en èn den wan di e kisi a marki+ fu en nen, no o man feni rostu na deiten noso na netiyuru. 12 Fu dati ede a de fanowdu taki den santawan horidoro.+ Disi na den wan di e hori den komando fu Gado+ èn di tan bribi+ na ini Yesus.”

13 Ne mi yere wan sten komoto fu hemel e taki: „Skrifi: Koloku fu den sma di, bigin fu now,+ o dede+ neleki fa Masra dede.+ Iya, a santa yeye e taki, meki den rostu fu a tranga wroko di den du, bika den sani di den du, o go makandra nanga den.”

14 Baka dati mi si wan weti wolku. Na tapu a wolku wan sma ben e sidon di gersi wan manpikin fu libisma.+ A ben abi wan gowtu kownu-ati+ na tapu en ede èn a ben hori wan srapu grasinefi na ini en anu.

15 Wan tra engel komoto na ini a santa presi fu a tempel. Nanga wan tranga sten a taigi a sma di ben e sidon na tapu a wolku, taki: „A nyanyan fu grontapu lepi kaba. Teki yu grasinefi èn go du a kotiwroko,+ bika a ten fu a kotiwroko+ doro kaba.”+ 16 Ne a sma di ben e sidon na tapu a wolku teki en grasinefi, dan a wai en abra grontapu èn a koti a nyanyan fu grontapu.

17 Dan ete wan engel komoto na ini a santa presi fu a tempel di de na hemel.+ A ben abi wan srapu grasinefi tu.

18 Dan ete wan tra engel komoto fu na altari èn a ben de basi fu a faya.+ Nanga wan tranga sten a bari gi a wan di ben abi a srapu grasinefi: „Teki yu srapu grasinefi, koti den bosu droifi puru na a droifibon fu grontapu,+ bika den droifi kon lepi kaba.” 19 Ne na engel+ teki en grasinefi, a wai en abra grontapu. Dan a koti den droifi puru na a droifibon+ fu grontapu èn a fringi den droifi nanga a droifibon go na ini a bigi baki pe den e masi droifi fu meki win. A baki disi na a atibron fu Gado.+ 20 Dan den masi den droifi na ini a baki dorosei fu a foto.+ Someni brudu komoto na ini a baki, taki a ben gersi wan liba di ben e doro te na den titei di tai na den asimofo+ èn a liba ben langa sowan dri hondro kilometer.*+

15 Dan mi si ete wan bigi marki+ na ini hemel. A marki disi ben fruwondru sma srefisrefi. Disi na san mi si: seibi engel+ di ben abi seibi rampu+ na den. Den rampu disi na den lastiwan, bika te den kaba, dan Gado no o de nanga atibron+ moro.+

2 Dan mi si wan sani di gersi wan grasi se.+ A sani di ben de na ini, ben moksi nanga faya. Den wan di wini+ na ogri meti, a popki+ di sma meki fu en, nanga a nomru+ fu en nen, ben e tanapu na a grasi se+ èn den ben abi den harpu+ fu Gado. 3 Den e singi a singi fu Moses+ di de a srafu fu Gado èn a singi fu a Pikin Skapu.+ A singi e taki:

„Yehovah Gado na Almaktiwan,+ den sani di yu e du bigi+ èn den e fruwondru sma srefisrefi. Yu na Kownu fu têgo.+ Den sani di yu e du, na sani di reti èn di sma kan frutrow.+ 4 Yehovah,+ suma no sa frede yu+ trutru èn suma no sa gi yu nen glori?+ Bika yu wawan e tan horibaka gi yu pipel!+ Iya, ala den pipel o kon na yu fesi fu anbegi yu,+ fu di den kon sabi den bun komando fu yu.”+

5 Baka dati mi si taki den opo a santa presi+ fu a tabernakel*+ na ini hemel.+ 6 Den seibi engel+ di ben abi den seibi rampu+ na den, komoto na ini a santa presi. Den ben weri krin linnen krosi+ di ben e brenki èn den ben weri gowtu banti lontu den borsu. 7 Dan wan fu den fo kerub-engel+ gi den seibi engel seibi gowtu komki di ben furu nanga na atibron fu Gado,+ a Gado di e libi fu têgo, iya, fu ala ten.+ 8 A glori nanga a krakti fu Gado ben meki a santa presi kon furu nanga smoko+ èn nowan sma ben man go na ini a santa presi, solanga den seibi rampu+ fu den seibi engel no ben kon na wan kaba.

16 Dan mi yere wan tranga sten+ na ini a santa presi èn a taigi den seibi engel, taki: „Go kanti den seibi komki fu na atibron+ fu Gado na tapu grontapu.”

2 Ne a fosi engel+ go èn a kanti en komki go na tapu grontapu.+ Dan den sma di ben abi a marki fu na ogri meti+ èn di ben e anbegi a popki di den meki fu en,+ bigin pina, fu di den ben kisi wan tumusi takru butsweri.+

3 Dan a di fu tu engel+ kanti en komki go na ini a se.+ Ne a se tron brudu+ neleki a brudu fu wan dede sma èn ibri libisani* dede, iya, ala den sani di de na ini a se.+

4 Dan a di fu dri engel+ kanti en komki go na ini den liba+ èn na ini den presi pe watra e komopo. Ne ala a watra tron brudu.+ 5 Baka dati mi yere na engel di ben de basi fu a watra, e taki: „Yu na a sma di de nownowde èn di ben de kaba.+ Yu na a sma di e tan horibaka gi yu pipel.+ Yu e du san reti, fu di yu koti krutu na a fasi disi.+ 6 Iya, yu krutu den sma di trowe a brudu fu den santawan èn fu den profeiti+ èn yu gi den brudu+ fu dringi. Den kisi den pai!”+ 7 Ne mi yere na altari taki: „Iya, Yehovah Gado na Almaktiwan,+ sma kan frutrow den wèt fu yu èn den reti.”+

8 Dan a di fu fo engel+ kanti en komki go na tapu a son. A son ben kisi primisi fu bron+ den sma nanga faya. 9 A son ben faya so te, taki a bron den sma. Ma toku den ben e taki sani fu wisiwasi a nen+ fu Gado, a sma di de basi+ fu den rampu disi. Ma den no ben abi berow èn dati meki den no ben gi en glori.+

10 Dan a di fu feifi engel kanti en komki go na tapu a kownusturu fu na ogri meti.+ Ne a kownukondre fu na ogri meti kon dungru+ èn den sma bigin beti den tongo, bika den ben abi skin-ati. 11 Ma den ben e taki sani fu wisiwasi+ a Gado fu hemel, fu di den ben abi skin-ati èn fu di den ben abi butsweri. Ma den no ben abi berow fu den sani di den du.

12 Dan a di fu siksi engel+ kanti en komki go na ini a bigi Eufraat-liba+ èn a liba kon drei,+ so taki a pasi ben kan sreka gi den kownu+ di e komopo na a sei pe son e opo.

13 Ne mi si dri tegu boskopu+ di yeye e taki, e komopo na ini a mofo fu a bigi kaiman,+ na ini a mofo fu na ogri meti+ èn na ini a mofo fu a falsi profeiti.+ Den boskopu ben gersi bigi todo.+ 14 Te yu luku en bun, dan na den ogri yeye e taki den boskopu+ disi di e du wondru.+ Den boskopu e doro ala den kownu+ na heri grontapu,+ so taki den kan kon na wán fu feti+ a feti na a bigi dei+ fu Gado na Almaktiwan.+

15 „Luku bun! Mi o kon leki wan fufuruman.+ Koloku fu a sma di tan na ai+ èn di sma no puru en krosi na en skin, so taki a no abi fu waka sososkin fu sma si a syen fu en.”+

16 Dan den tyari den kownu kon na wán na a presi di sma e kari Armagedon*+ na ini Hebrewtongo.

17 Now a di fu seibi engel kanti en komki go na tapu a loktu.+ Dan wan tranga sten+ komopo fu a santa presi pe a kownusturu de. A taki: „A kaba!” 18 Baka dati faya bigin koti na hemel, sten ben de fu yere, dondru bigin bari èn wan bigi gronseki+ ben de. Sensi di libisma de na grontapu,+ noiti ete so wan bigi gronseki+ ben de, iya, a ben hebi fu tru. 19 Dan a bigi foto+ prati na ini dri pisi èn den foto fu den trakondre sma ben kisi pori. Ne Gado memre taki a ben o gi Babilon a Bigiwan+ a kan di abi a win fu en bigi atibron na ini.+ 20 Ala den èilanti lowe sosrefi èn nowan bergi ben de fu feni.+ 21 Baka dati bigi pisi ijs+ fadon komoto fu hemel leki wan bigi alen èn den fadon kon na tapu den sma. Ibri pisi ijs ben hebi sowan tutenti kilo.* Dan den sma ben e taki sani fu wisiwasi+ Gado, fu di a rampu fu den pisipisi ijs+ ben kon na den tapu èn fu di a rampu disi ben hebi srefisrefi.

17 Wan fu den seibi engel di ben abi den seibi komki,+ kon taigi mi: „Kon, dan mi o sori yu sortu strafu a bigi huru-uma+ di e sidon na tapu furu liba,+ o kisi. 2 Den kownu fu grontapu du hurudu+ nanga en èn nanga a win fu a hurudu fu en den drungu den sma di e libi na grontapu.”+

3 Dan nanga a krakti fu a santa yeye, na engel tyari mi go+ na ini wan sabana. Ne mi si wan uma e sidon na tapu wan redi ogri meti+ di ben lai nanga nen di ben e sori taki a e wisiwasi Gado.+ A meti ben abi seibi ede+ nanga tin tutu. 4 Na uma ben weri diri paars krosi+ nanga redi krosi.+ A ben moi ensrefi nanga gowtu, diriston èn nanga peri.+ Na ini en anu a ben hori wan gowtu kan+ di ben furu nanga tegu sani+ èn nanga den fisti sani fu a hurudu fu en.+ 5 Na tapu en fesi-ede wan nen ben skrifi, wan kibritori:+ „Babilon a Bigiwan, a mama fu den huru-uma+ èn fu den tegu sani fu grontapu.”+ 6 Ne mi si taki na uma ben drungu fu di a dringi a brudu+ fu den santawan nanga a brudu fu den kotoigi fu Yesus.+

We, di mi si en, mi ben fruwondru srefisrefi.+ 7 Dati meki na engel aksi mi: „Fu san ede yu fruwondru so? Mi o taigi yu san na a kibritori fu na uma+ èn fu na ogri meti di e tyari na uma, iya, a meti di abi seibi ede nanga tin tutu.+ 8 Na ogri meti di yu si, ben de kaba,+ ma a no de moro èn toku a de fu opo komoto na ini a dipi peti di no abi gron.+ A o kisi pori. Te den sma di e libi na grontapu, si taki na ogri meti ben de kaba èn taki a no de moro, ma taki a o kon baka, dan den o fruwondru trutru. Sensi a ten di grontapu seti,+ a nen fu nowan fu den sma disi skrifi na ini a buku fu libi.+

9 Wan sma abi koni nanga frustan fanowdu gi a sani di e kon now:+ Den seibi ede+ na seibi bergi+ pe na uma e sidon na tapu. 10 Seibi kownu de: feifi fadon kaba,+ wán de nownow,+ a trawan no kon ete.+ Ma te a kon, dan a musu tan wan syatu pisi ten nomo.+ 11 Na ogri meti di ben de kaba, ma di no de moro,+ ensrefi na wan kownu tu. En na a di fu aiti kownu, ma a komopo fu den seibi kownu èn a o kisi pori.

12 Den tin tutu di yu si, na tin kownu+ di no kisi wan kownukondre ete, ma den o kisi makti fu tiri leki kownu makandra nanga na ogri meti, wán yuru nomo. 13 Den abi wán prakseri nomo èn dati meki den gi na ogri meti a krakti nanga a makti fu den.+ 14 Den o feti nanga a Pikin Skapu,+ ma fu di a Pikin Skapu na Masra fu den masra èn Kownu fu den kownu,+ meki a o wini den.+ Den sma di de nanga en, iya, den sma di Gado kari, den wan di a teki èn di e tai hori na en, o wini a strei tu.”+

15 Dan na engel taigi mi: „Den liba di yu si, den wan pe a huru-uma e sidon na tapu, na den pipel, den ipi-ipi sma èn den sma fu ala kondre nanga tongo.+ 16 Den tin tutu+ di yu si nanga na ogri meti,+ o abi bita-ati gi a huru-uma.+ Na wan ogri-ati fasi, den o teki ala san a abi èn den o libi en sososkin. Dan den o nyan a meti fu en skin èn den o bron en nanga faya. Noti no o tan abra fu en,+ 17 bika na Gado meki den du san en ben abi na prakseri.+ Iya, a meki den du a wán sani di den ben abi na prakseri èn dati na fu gi na ogri meti a kownukondre fu den,+ teleki den sani di Gado taki, kon tru.+ 18 Na uma+ di yu si, na a bigi foto di e tiri den kownu fu grontapu.”+

18 Baka dati mi si wan tra engel e saka komoto fu hemel. A ben abi furu makti+ èn a glori fu en ben skèin leki wan leti+ na heri grontapu. 2 Ne a bari nanga wan tranga sten:+ „A fadon! Babilon a Bigiwan fadon+ èn a tron wan presi pe ogri yeye e tan. Na drape ala sortu yeye e kibri di no krin nanga ala sortu fowru di no krin èn di sma no lobi kwetikweti,+ 3 bika ala den pipel kon drungu, fu di den dringi a win fu na atibron, a win fu en hurudu.+ Den kownu fu grontapu du hurudu+ nanga en èn a e libi wan gudu libi sondro fu syen. Fu dati ede den bisnisman+ fu grontapu, kon gudu.”+

4 Ne mi yere wan tra sten na ini hemel e taki: „Komoto drape, mi pipel,+ efu unu no wani abi prati nanga en na den sondu fu en+ èn efu unu no wani taki den rampu fu en kon na un tapu tu, 5 bika den sondu fu en kon so furu taki den doro te na hemel+ èn Gado memre den ogridu fu en.+ 6 Pai en baka gi san a ben du nanga trawan,+ iya, du nanga en tu tron moro leki san a ben du.+ Moksi tu tron+ moro gi en fu a sani di a moksi na ini a kan+ fu en.+ 7 Leki fa a gi ensrefi glori èn leki fa a libi wan gudu libi sondro fu syen, na so yu musu pina en èn na so yu musu meki a sari,+ bika na ini en ati a e tan taki: ’Mi e tiri leki umakownu+ èn mi masra no dede.+ Noiti mi o sari.’+ 8 Na fu dati ede den rampu+ fu en o miti en. Dede, sari, nanga angriten o kon na en tapu na ini wán dei. A o bron nanga faya+ èn noti no o tan abra fu en, fu di Yehovah Gado, a sma di krutu en, tranga.+

9 Dan den kownu+ fu grontapu di ben du hurudu nanga en èn di ben e nyan bun fu a gudu libi di a ben libi sondro fu syen, o krei èn den o sari trutru+ te den si a smoko+ fu a faya di e bron en. 10 Den o tanapu farawe, fu di den frede a pina di miti en èn den o taki:+ ’Babilon, yu ben de so wan bigi foto, so wan tranga foto.+ Na wan sari, na wan sari, bika na ini wán yuru nomo yu kisi krutu!’+

11 Den bisnisman+ fu grontapu, o krei èn den o sari tu fu en ede,+ fu di nowan sma o de moro di e bai ala den sani fu den, 12 iya, ala sani+ soleki gowtu, solfru, diriston, peri, fini linnen-krosi, diri paars krosi, zijde-krosi, nanga diri redi krosi, ala sortu sani di meki fu udu di e smeri switi, ala sortu sani di meki fu ivoor, ala sortu sani di meki fu a moro diri udu di de èn fu kopro, isri, nanga marmer-ston,+ 13 kaneri, spesrei fu India, switismeri, switismeri oli, wierook, win, olèif-oli, a moro bun sortu blon di de, aleisi, kaw, skapu, asi, asiwagi, srafu, iya, libisma.+ 14 Iya, yu no man feni den lepi froktu moro di yu ben lostu.+ Yu lasi ala den switi sani nanga den moimoi sani èn noiti moro sma o feni den.+

15 Den bisnisman+ di ben e seri den sani disi èn di ben kon gudu fu Babilon ede, o tanapu farawe, fu di den frede a pina di miti en. Den o krei èn den o sari,+ 16 aladi den o taki: ’Na wan sari, na wan sari, fu si san pasa nanga a bigi foto+ di ben e weri fini linnen-krosi, diri paars krosi nanga diri redi krosi èn di ben e moi ensrefi nanga furu gowtu, diriston, nanga peri,+ 17 bika a bigi gudu dati lasi gowe na ini wán yuru nomo!’+

Ala den kapten fu sipi, ala den sma di e teki waka nanga boto na se,+ ala den sipiman, nanga ala den sma di e wroko moni na se, ben e tanapu farawe.+ 18 Di den si a smoko fu a faya di ben e bron en, den bari: ’Sortu foto de leki a bigi foto disi?’+ 19 Ne den teki doti fu gron trowe na tapu den ede.+ Den ben e krei, den ben e sari èn den bari+ taki: ’Na wan sari, na wan sari. Ala den sma di ben abi boto na se,+ ben kon gudu+ fu di a ben abi furu gudu. Ma a kisi pori na ini wán yuru nomo!’+

20 Unu di de na hemel, un prisiri,+ fu di a sani disi pasa nanga en. Un santawan,+ prisiri sosrefi, makandra nanga den apostel+ èn den profeiti, bika Gado krutu en fu unu ede!”+

21 Dan wan tranga engel opo wan ston di ben gersi wan bigi miriston+ èn a fringi a ston go na ini a se.+ A taki: „Na so den o fringi Babilon a bigi foto trowe esi-esi èn noiti moro sma o feni en.+ 22 Noiti moro sma o yere singiman e singi èn e prei a harpu na ini yu, o Babilon. Noiti moro sma o yere pokuman nanga sma di e bro froiti noso sma di e bro trompeti na ini yu.+ Noiti moro wrokoman di abi a koni fu meki sani nanga anu, o de fu feni na ini yu èn noiti moro sma o yere fa wan miriston e mara na ini yu. 23 Noiti moro wan lampu o skèin na ini yu èn noiti moro sma o yere a sten fu wan trowmasra nanga a sten fu wan trowmisi na ini yu.+ Den sani disi pasa, fu di den bisnisman+ fu yu ben de heihei man+ fu grontapu èn fu di yu ben kori ala den pipel nanga na afkodrei+ fu yu. 24 Iya, na ini a foto disi den feni a brudu+ fu den profeiti,+ a brudu fu den santawan+ èn a brudu fu ala den wan di sma kiri na grontapu.”+

19 Baka dati mi yere wan sani na ini hemel di ben gersi a tranga sten fu wan heri ipi sma.+ Den ben e taki: „Un prèise Yah!+ Na wi Gado e frulusu+ wi, na en musu kisi glori èn na en abi ala krakti,+ 2 bika a e krutu sma na wan fasi di e sori taki sma kan frutrow en èn taki a e du san reti.+ A strafu a bigi huru-uma tu di pori grontapu nanga a hurudu fu en èn a meki a huru-uma pai, fu di a kiri den srafu fu En.”+ 3 Wantewante den taki ete wan tron: „Un prèise Yah!+ A smoko di e komoto fu na uma disi, e opo go na loktu fu têgo, iya, fu ala ten.”+

4 Dan den tutenti na fo owru man+ nanga den fo kerub-engel+ saka kindi èn den anbegi Gado di ben e sidon+ na tapu a kownusturu. Den taki: „Amen! Un prèise Yah!”+

5 Wan sten komopo sosrefi fu a kownusturu. A sten taki: „Prèise wi Gado, un alamala di de srafu fu en+ èn di e lespeki en, un mofinawan nanga un heihei sma.”+

6 Dan mi yere wan sani di ben gersi a sten fu wan heri ipi sma. A ben gersi a babari fu bigi sula èn a bigi babari fu dondru. Den ben e taki: „Un prèise Yah,+ bika Yehovah wi Gado, na Almaktiwan,+ bigin tiri leki kownu.+ 7 Meki wi breiti èn prisiri pasa marki. Meki wi gi en glori,+ bika a trowdei+ fu a Pikin Skapu doro+ èn a trowmisi fu en sreka ensrefi kaba.+ 8 Iya, a trowmisi kisi primisi fu weri krosi fu fini linnen di krin èn di e brenki, bika a krosi fu fini linnen e prenki den bun sani di den santawan du.”+

9 Dan na engel taigi mi: „Skrifi: Koloku fu den wan di kisi wan kari+ fu kon nyan na a trowfesa fu a Pikin Skapu.”+ A taigi mi tu: „Den sani disi di Gado taki, de tru.”+ 10 Ne mi saka kindi na en futusei fu anbegi en.+ Ma a taigi mi: „No du dati!+ Mi na wan srafu nomo neleki yu èn neleki den brada fu yu di kisi a wroko fu preiki fu Yesus.+ Anbegi Gado,+ bika a marki fu den profeititori na fu preiki fu Yesus.”+

11 Dan mi si hemel opo èn mi si wan weti asi.+ A sma di ben e sidon na tapu na asi, ben nen „a wan di de fu frutrow”+ èn „a wan di e taki san tru”.+ Te a e krutu sma èn te a e feti, dan a e du disi na wan reti fasi.+ 12 En ai na wan faya+ èn furu kownu-ati de na tapu en ede.+ Wan nen+ skrifi na en tapu di nowan sma sabi, boiti en wawan. 13 A weri wan krosi di abi brudu+ na tapu. En nen na: A Wortu+ fu Gado. 14 Boiti dati, den legre na hemel ben e kon na en baka na tapu weti asi. Den ben weri fini linnen krosi di ben weti èn krin. 15 Wan langa srapu feti-owru ben e komoto na ini en mofo,+ so taki a ben kan kiri den pipel nanga en. A o tiri den nanga wan isri tiki.+ Boiti dati, a o masi sma na ini a baki fu a bigi atibron fu Gado+ na Almaktiwan, neleki fa sma e masi droifi na ini wan baki fu meki win.+ 16 Wan nen skrifi na tapu en krosi, iya, na tapu en bowtu. A nen na: Kownu fu den kownu èn Masra fu den masra.+

17 Mi si wan engel tu di e tanapu leti na fesi a son. Nanga wan tranga sten a e bari taigi ala den fowru+ di e frei na loktu: „Un kon dya, un kon na a bigi nyanyan di Gado seti, 18 so taki unu kan nyan a skin+ fu den kownu, a skin fu den legre-edeman, a skin fu den tranga man,+ a skin fu den asi+ èn fu den wan di e sidon na tapu den asi, a skin fu ala tra sma, fu den friman nanga den srafu, fu den mofinawan nanga den heihei sma.”

19 Dan mi si na ogri meti,+ den kownu+ fu grontapu, nanga den legre fu den. Den ben kon makandra fu feti+ nanga a sma di ben e sidon na tapu na asi+ èn nanga a legre fu en. 20 Ne den grabu na ogri meti+ nanga a falsi profeiti+ di ben du wondru+ na fesi na ogri meti. Nanga den wondru disi a ben kori den sma di ben kisi a marki+ fu na ogri meti nanga den sma di ben anbegi a popki+ di den meki fu na ogri meti. Libilibi den fringi ala tu go na ini a se di e bron nanga faya di e pori sani krinkrin.+ 21 Ma a sma di ben e sidon na tapu na asi,+ kiri ala den trawan nanga a langa feti-owru di ben e komoto na ini en mofo.+ Ala den fowru+ nyan den bere furu+ nanga a meti fu den sma.+

20 Dan mi si wan engel e saka komoto fu hemel. Na ini en anu a ben e hori a sroto fu a dipi peti di no abi gron.+ A ben hori wan bigi keti na ini en anu tu. 2 Ne a grabu a bigi kaiman,+ a fosi sneki,+ dati na Didibri+ nanga Satan+ èn a tai en wán dusun yari langa. 3 A fringi en go na ini a dipi peti,+ dan a tapu en na ini. Ne a sroto a peti nanga wan lakstampu, so taki Didibri no ben man kori den pipel moro solanga den wán dusun yari no ben pasa. Bakaten, Didibri musu lusu fu wan syatu pisi ten.+

4 Mi si kownusturu+ tu èn sma ben e sidon na den tapu. Den ben kisi a makti fu krutu trawan.+ Iya, mi si den wan* di sma kiri fu di den wan dati ben kotoigi fu Yesus èn fu di den ben taki fu Gado. Den wan disi no ben anbegi na ogri meti,+ noso a popki+ di sma meki fu en èn den no ben kisi a marki na tapu den fesi-ede èn na tapu den anu.+ Den ben kon na libi èn wán dusun yari langa den ben tiri leki kownu+ makandra nanga Krestes. 5 (Den tra dede sma+ no ben kon na libi solanga den wán dusun yari no ben pasa.)+ Disi na a fosi+ opobaka. 6 Den sma di kisi a fosi opobaka, de koloku+ èn den de santa.+ A di fu tu dede*+ no abi makti tapu den sma disi,+ ma den o de priester+ fu Gado èn fu Krestes, èn na ini den wán dusun yari, den o tiri leki kownu makandra nanga en.+

7 Wantewante te den wán dusun yari pasa kaba, den o lusu Satan meki a komopo na ini a strafu-oso pe a ben de na ini. 8 Dan a o kori den pipel di de na den fo uku fu grontapu. Na den pipel disi den e kari Gok nanga Magok. A o tyari den kon makandra fu feti a feti. Den sma disi furu leki a santi fu a se.+ 9 Den ben go na ala sei fu grontapu èn den ben lontu a kampu fu den santawan+ nanga a foto di Gado lobi.+ Ma faya komoto fu hemel èn a bron den.+ 10 Dan Gado teki Didibri+ di ben e kori den sma èn a fringi en go na ini a se di e bron nanga faya di e pori sani krinkrin. Na ogri meti+ nanga a falsi profeiti ben de drape kaba.+ Den o pina dei nanga neti fu têgo, iya, fu ala ten.

11 Dan mi si wan bigi weti kownusturu nanga a sma di ben e sidon na en tapu.+ Grontapu nanga hemel lon gowe gi en+ èn presi no ben de moro gi den. 12 Dan mi si den dede sma, den heihei sma nanga den mofinawan,+ e tanapu na fesi a kownusturu èn bukulolo ben e opo. Ma wan tra bukulolo ben e opo tu. Disi na a buku fu libi.+ Den krutu den dede sma fu den sani di den du,+ soleki fa skrifi na ini den bukulolo. 13 Dan a se lusu den dede sma di ben de na ini en èn dede nanga Grebi* lusu den dede sma+ di ben de na ini den. Ne a krutu ibriwan fu den dede sma fu den sani di den du.+ 14 Ne a fringi dede+ nanga Grebi go na ini a se di e bron nanga faya. Disi na a di fu tu dede:+ a se di e bron nanga faya.+ 15 Sosrefi, ibri sma di a nen fu den no skrifi na ini a buku fu libi,+ a fringi go na ini a se di e bron nanga faya.+

21 Dan mi si wan nyun hemel+ nanga wan nyun grontapu,+ bika a fosi hemel+ nanga a fosi grontapu+ pasa gowe. A se+ no de moro. 2 Mi si a santa foto,+ a Nyun Yerusalem. A ben saka komopo fu Gado na ini hemel.+ Den ben sreka en leki wan trowmisi+ di ben meki ensrefi moi gi a man di ben o tron en masra.+ 3 Ne mi yere wan tranga sten e komoto fu a kownusturu. A taki: „Luku, a tenti+ fu Gado de na libisma. Gado o tan+ nanga den èn den o de en pipel.+ Gado srefi o de nanga den.+ 4 A o figi ala watra+ puru na den ai èn dede no o de moro.+ Nowan sari, noso krei, noso pen no o de moro.+ Den fositen sani pasa kaba.”+

5 Ne a sma di ben e sidon na tapu a kownusturu+ taki: „Luku, mi e meki ala sani kon nyun.”+ A taki sosrefi: „Skrifi, bika den wortu disi tru èn sma kan bribi den.” 6 Dan a taigi mi: „Den sani disi pasa kaba! Mi na a Alfa nanga na Omega, a bigin nanga a kaba.+ Te watra e kiri wan sma, dan mi o gi en watra fu a peti di abi watra di e gi libi. A watra disi de fu kisi fu soso.+ 7 Ibri sma di wini a strei, o kisi den sani disi. Mi o de en Gado+ èn en o de mi manpikin.+ 8 Ma den fredeman, den sma di no e bribi,+ den sma di no krin èn di e du soso morsu sani,+ den kiriman,+ den huruman,+ den sma di e du afkodrei, den sma di e anbegi kruktugado,+ nanga ala den leiman,+ o dede na ini a se di e bron nanga faya+ di e pori sani krinkrin.+ Disi na a di fu tu dede.”*+

9 Ne wan fu den seibi engel di ben abi den seibi komki di ben furu nanga den seibi lasti rampu,+ kon taigi mi: „Kon, dan mi o sori yu a trowmisi, a wefi fu a Pikin Skapu.”+ 10 Dan nanga a krakti fu a santa yeye, a tyari mi go na wan bigi bergi+ di ben hei srefisrefi èn a sori mi a santa foto+ Yerusalem di ben saka komoto fu Gado na ini hemel.+ 11 A foto ben abi a glori fu Gado.+ A ben e brenki leki wan diriston di ben warti trutru, leki wan yaspis-ston di ben krin leki dyamanti.+ 12 A foto ben abi wan bigi skotu+ di ben hei srefisrefi èn a ben abi twarfu portu. Twarfu engel ben de na den portu èn den nen fu den twarfu lo fu den manpikin fu Israel ben skrifi na tapu den portu.+ 13 Dri portu ben de na owstusei, dri portu na noordsei, dri portu na zuidsei èn dri portu na west-sei.+ 14 A skotu fu a foto ben abi sosrefi twarfu ston leki fondamenti.+ Den twarfu nen fu den twarfu apostel+ fu a Pikin Skapu ben skrifi na tapu den ston.

15 A sma di ben e taki nanga mi, ben abi wan gowtu markitiki na ini en anu.+ Nanga dati a ben kan marki a foto, sosrefi den portu nanga a skotu fu a foto.+ 16 A foto fokanti. A langa èn a bradi a srefi. Dan a sma marki a foto+ nanga a tiki. A foto de sowan tu dusun tu hondro kilometer.* A langa, a bradi èn a hei a srefi. 17 A marki a skotu fu a foto tu. A ben de wán hondro fotenti na fo èl.* Disi e kruderi nanga a marki di libisma e gebroiki èn di de a srefi leki di fu wan engel. 18 A skotu fu a foto ben meki fu yaspis-ston+ èn a foto ben meki fu soifri gowtu di ben de leki krin grasi. 19 Den fondamenti+ fu a skotu fu a foto, ben moi. Den ben meki nanga ala sortu diriston:+ a fosi fondamenti ben meki fu yaspis-ston,+ a di fu tu ben meki fu safir-ston,+ a di fu dri ben meki fu kalsedon-ston, a di fu fo ben meki fu smaragd-ston,+ 20 a di fu feifi ben meki fu sardoniks-ston, a di fu siksi ben meki fu sardiyus-ston, a di fu seibi ben meki fu krisolit-ston,+ a di fu aiti ben meki fu beril-ston, a di fu neigi ben meki fu topas-ston,+ a di fu tin ben meki fu krisopras-ston, a di fu erfu ben meki fu hiasent-ston, a di fu twarfu ben meki fu ametis-ston.+ 21 Boiti dati, den twarfu portu ben de twarfu peri. Ibriwan fu den portu ben meki nanga wán peri.+ A bradi strati fu a foto ben meki fu soifri gowtu èn a ben de leki grasi pe yu kan luku pasa na ini.

22 Mi no ben si wan tempel na ini a foto,+ bika Yehovah+ Gado na Almaktiwan+ nanga a Pikin Skapu, na a tempel+ fu a foto.+ 23 A son noso a mun no ben abi fu skèin leti na tapu a foto, bika a glori fu Gado ben de a leti di ben e skèin na en tapu+ èn a lampu fu a foto ben de a Pikin Skapu.+ 24 Den pipel o waka na ini a leti+ fu a foto èn den kownu fu grontapu o tyari a glori fu den go na ini a foto.+ 25 Na deiten den portu fu a foto no o tapu noiti+ èn neti no o de drape kwetikweti.+ 26 Den o tyari a glori nanga a grani fu den pipel go na ini a foto.+ 27 Ma nowan sani di no krin, nowan sma di e du wan tegu+ sani noso di e lei,+ o go na ini a foto.+ Den wan-enkri sma di o go na ini a foto, na den wan di a nen fu den skrifi na ini a buku fu libi di de fu a Pikin Skapu.+

22 Dan a sori mi wan liba di ben abi watra di e gi libi.+ A watra ben krin leki dyamanti. A liba ben e lon komoto fu a kownusturu fu Gado èn fu a Pikin Skapu.+ 2 A watra ben e lon leti na mindri a bradi strati fu a foto. Na ala tu sei fu a liba yu ben abi bon+ di e gi libi. Den bon disi ben e meki froktu twarfu tron wan yari, iya, den ben e gi froktu ibri mun.+ Den wiwiri fu den bon ben de fu dresi den pipel.+

3 Nowan fluku o de moro.+ Ma a kownusturu fu Gado+ èn fu a Pikin Skapu+ o de na ini a foto. Den srafu fu Gado o du santa wroko gi en.+ 4 Den o si en fesi+ èn a nen fu en o de na tapu den fesi-ede.+ 5 Sosrefi, neti no o de moro.+ Den no abi a leti fu lampu noso a leti fu a son fanowdu, fu di Yehovah Gado o skèin leti+ na den tapu èn den o tiri leki kownu fu têgo, iya, fu ala ten.+

6 Ne a taigi mi: „Den wortu disi tru èn sma kan bribi den.+ Iya, Yehovah, a Gado di e meki den profeiti+ taki gi en,+ ben seni en engel kon fu sori den srafu fu en den sani di musu pasa dyonsro.+ 7 Luku, mi o kon esi.+ Koloku fu a sma di e du san a profeititori na ini a bukulolo disi e taki.”+

8 We, mi Yohanes, na a sma di ben e yere èn si den sani disi. Di mi yere èn si den sani disi, dan mi ben wani anbegi+ na engel di ben sori mi den. Dati meki mi saka kindi na en futusei. 9 Ma dan a taigi mi: „No du dati! Mi na wan srafu nomo neleki yu, neleki den brada fu yu di de profeiti,+ èn neleki den sma di e du den sani di skrifi na ini a bukulolo disi. Anbegi Gado.”+

10 A taigi mi tu: „No kibri* den wortu fu a profeititori di skrifi na ini a bukulolo disi, bika a reti ten de krosibei.+ 11 Meki a sma di e du kruktudu, tan du kruktudu.+ Meki a morsu sma, tan du morsu sani.+ Ma meki a reti-ati sma+ tan du san reti èn meki a santa sma tan du santa sani.+

12 ’Luku, mi o kon esi+ èn mi de srekasreka fu pai+ ibriwan sma leki fa a fiti a wroko di a du.+ 13 Mi na a Alfa nanga na Omega,+ a fosiwan nanga a lastiwan,+ a bigin nanga a kaba. 14 Koloku fu den sma di wasi den langa krosi fu den,+ so taki den kan kisi a reti fu go nyan den froktu fu den bon di e gi libi+ èn so taki den kan kisi primisi fu pasa den portu+ fu a foto fu go na inisei. 15 Na dorosei yu abi den dagu,+ den sma di e du afkodrei,+ den huruman,+ den kiriman, den sma di e anbegi kruktugado, sosrefi ala den sma di lobi lei èn di e tan lei.’+

16 ’Mi, Yesus, ben seni mi engel kon fu fruteri unu den sani disi di de fu a bun fu den gemeente. Mi na a rutu+ nanga a pikin+ fu David èn mi na a mamanten stari di e brenki.’”+

17 A santa yeye+ nanga a trowmisi+ e tan taki: „Kon!”+ Ibri sma di e yere disi, meki a taki: „Kon!” Ibri sma di watra e kiri en, meki a kon.+ Meki ibri sma di wani, kon dringi fu a watra di e gi libi èn di de fu kisi fu soso.+

18 „Mi e taigi ibri sma di e yere den wortu fu a profeititori na ini a bukulolo disi, taki: Efu wan sma e skrifi ete wan sani,+ boiti san skrifi dya kaba, dan Gado o meki den rampu+ di skrifi na ini a bukulolo disi kon na en tapu tu. 19 Efu wan sma puru iniwan fu den wortu na ini a bukulolo di abi a profeititori disi, dan Gado o puru a reti di a sma disi ben kan abi fu kisi den sani di skrifi na ini a bukulolo disi. Dati wani taki dati a no o meki a sma nyan den froktu fu den bon di e gi libi+ èn a no o meki a sma go na ini a santa foto.+

20 A sma di e kotoigi fu den sani disi, e taki: ’Iya, mi o kon esi.’”+

„Amen! Kon, Masra Yesus.”

21 Meki Masra Yesus Krestes sori den santawan bun-ati.+