A moro bun yepi gi den wan di e sari

NA INI DEN LASTI YARI DI PASA, SMA DU FURU ONDROSUKU DI ABI FU DU NANGA A SARI DI SMA E SARI TE DEN LASI WAN LOBIWAN. Soleki fa wi ben si kaba na ini den artikel na fesi, dan furu fu den rai di datra e gi e kruderi nanga den bun rai di de fu feni na ini Bijbel. Disi e sori wi krin taki den rai di de na ini Bijbel e fiti gi a ten fu wi. Ma wi kan feni moro sani na ini Bijbel. Wi kan feni sani di wi no man feni na nowan tra presi èn di kan gi wi furu trowstu te wi e row.

• Wi kan de seiker taki den lobiwan fu wi no e pina

  Bijbel e taki na ini Preikiman 9:5: „Den dedewan no sabi notinoti.” ’Den prakseri fu den e lasi gowe’ (Psalm 146:4). Dati meki Bijbel e agersi dede nanga wan dipi sribi.​—Yohanes 11:11.

• Wi o kisi trowstu te wi e bribi ini wan lobi-ati Gado

  Bijbel e taki na ini Psalm 34:15: „Den ai fu Yehovaha e si den reti-ati sma èn den yesi fu en e yere te den e bari suku yepi na en.” Te wi e begi dan disi no e meki wi firi bun nomo. A e meki wi denki krin tu. Ma boiti dati, begi e yepi wi tu fu de wan mati fu Gado, di e gebroiki en krakti fu trowstu wi.

• Wan moi howpu gi a ten di e kon

  Bijbel e taki furu leisi fu wan ten pe den dedewan o kon na libi baka dyaso na grontapu. A e taki tu fa a libi o de na grontapu na a ten dati. A e taki dati Gado ’o figi ala watra puru na wi ai èn dede no o de moro. Nowan sari, noso krei, noso pen no o de moro.’ Yu e si kaba fa a libi o de na a ten dati?​—Openbaring 21:​3, 4.

Furu sma di e bribi na ini Yehovah, a Gado di Bijbel e taki fu en, abi a howpu taki den o si den lobiwan fu den baka. A sani disi e gi den a krakti fu no sari tumusi. Wan eksempre fu disi na Ann. En nanga en masra ben trow 65 yari di a kon dede. Ann e taki: „Bijbel yepi mi fu de seiker taki den lobiwan fu wi di dede no e pina èn taki Gado o wiki ala den sma baka di de na ini en prakseri. Den sani disi e yepi mi te mi e firi sari. Den e yepi mi fu pasa a moro hati sani di miti mi.”

Tina di wi ben taki fu en na fesi, e taki: „Mi si fa Gado yepi mi sensi a dei di Timo dede. A ben muilek gi mi, ma Yehovah no libi mi. Èn mi sabi taki a o wiki den dedewan baka. Dati e gi mi krakti fu go doro teleki mi nanga Timo miti baka.”

Milyunmilyun sma e bribi a srefi sani disi tu di skrifi na ini Bijbel. A kan taki yu no e bribi na ini Bijbel, noso a kan taki a howpu disi gersi wan anansitori gi yu. Ma toch a ben o bun fu ondrosuku gi yusrefi efu den sani di skrifi na ini tru. Yu o kon si taki den sani di skrifi na ini Bijbel na wan bigi trowstu gi den wan di e row.

KON SABI MORO FU A HOWPU DI DE GI DEN DEDEWAN

Luku felem fu a tori disi tapu www.pr418.com

SAN E PASA NANGA WAN SMA TE A DEDE?

San e pasa nanga wi te wi dede? Den krin piki fu Bijbel e trowstu wi èn den e gi wi krakti

Go na LIBRARY > FELEM (na a pisi Bijbel)

YU WANI YERE BUN NYUNSU?

Na ala sei wi e yere soso takru nyunsu. Ma pe wi kan feni bun nyunsu? A felem disi e poti prakseri na a brochure Gado abi bun nyunsu gi wi!

Go na PUBLIKÂSI > FELEM (Na a pisi: Wi konmakandra nanga a preikiwroko)