Kapitel 17
A konbaka foe Krestes — Fa a de foe si?
1. (a) San Krestes ben pramisi? (b) Foe san ede a konbaka foe Krestes de fanowdoe?
„MI E KON BAKA” (Johanes 14:3). Disi na san Jesus Krestes ben pramisi den apostel foe en di a ben de nanga den a neti bifo a dede foe en. Kande joe sa agri taki noiti ete a fanowdoe ben de so bigi foe abi a vrede, a gosontoe nanga a libi di a konbaka foe Krestes na ini Kownoekondre makti sa tjari kon gi a libisma famiri. Ma fa Jesus e kon baka? Soema e si en, èn na sortoe fasi?
2. (a) Pe Krestes e teki den salfoe bakaman nanga den apostel foe en go libi, te a e kon baka? (b) Sortoe skin den abi drape?
2 Te Krestes e kon baka, dan a no e kon foe libi na grontapoe. Na presi foe dati, a e teki den sma di moesoe tiri leki kownoe nanga en, foe go libi nanga en na hemel. Jesus ben taigi den apostel foe en: „Mi e kon baka èn sa teki oenoe go na mi oso, so taki oenoe kan de toe pe mi de” (Johanes 14:3). So boen, te Krestes e kon baka, dan den sma di a e teki go na hemel, e tron jejesma, èn den e si Krestes ini en glori jeje skin (1 Korentesma 15:44). Ma den tra sma foe a libisma famiri, di no e go na hemel, e si Krestes dan te a e kon baka?
FOE SAN EDE A NO BEN SA KAN KON BAKA LEKI WAN LIBISMA
3. Sortoe bijbel boeweisi e sori taki noiti moro libisma sa si Krestes baka?
3 A srefi neti dati, Jesus ben go moro fara foe taigi den apostel foe en: „Wan sjatoe ten ete, dan grontapoe no sa si mi moro” (Johanes 14:19). A wortoe „grontapoe” abi foe doe nanga a libisma famiri. So boen, Jesus ben taki krin djaso, taki den sma na grontapoe no ben sa si en moro, baka te a ben opo go na hemel. Na apostel Paulus ben skrifi: „Awinsi wi ben sabi Krestes na skinfasi, now seiker wi no sabi en so moro.” — 2 Korentesma 5:16.
4. San e sori taki Krestes e kon baka leki wan makti jejesma di wi no kan si?
4 Tokoe foeroe sma e bribi taki Krestes sa kon baka na ini a srefi libisma skin di den ben kiri en na ini, èn taki ala sma di libi na grontapoe sa si en. Ma bijbel e taki dati Krestes e kon baka ini glori nanga ala den engel, èn taki a e go sidon „na tapoe en glori kownoestoeroe” (Mateus 25:31). Efoe Jesus ben moesoe kon baka èn sidon leki wan libisma na tapoe wan kownoestoeroe na grontapoe, dan a ben sa de moro lagi ini posisi leki den engel. Ma a e kon leki a moro maktiwan èn a moro gloriwan foe ala den jeje manpikin disi foe Gado èn foe dati ede wi no kan si en, neleki fa wi no kan si den engel. — Filipisma 2:8-11.
5. Foe san ede Krestes no ben sa kan kon baka na ini wan libisma skin?
5 Na a tra sei, moro leki 1900 jari pasa, a ben de fanowdoe taki Jesus ben saka ensrefi èn ben tron wan libisma. A ben moesoe gi en volmaakti libisma libi leki wan loesoe-paiman foe wi ede. Wan leisi Jesus ben tjari disi kon na krin na a fasi disi: „A brede di mi sa gi, na mi skin foe a boen foe a libi foe grontapoe” (Johanes 6:51). So boen, Jesus ben gi en libisma skin abra leki wan ofrandi foe a libisma famiri. O langa na ofrandi dati ben sa abi waarde? Na apostel Paulus e piki: „Wi ben kon santa nanga jepi foe na ofrandi foe a skin foe Jesus Krestes, wán leisi èn foe ala ten” (Hebrewsma 10:10). Foe di Jesus ben gi en skin foe a libi foe grontapoe, dan a no ben kan teki dati noiti moro foe tron wan libisma baka. Foe a fondamenti sani dati, meki noiti a no ben kan kon baka ini a libisma skin di a ben gi leki wan ofrandi wán leisi èn foe ala ten.
A NO BEN TEKI EN LIBISMA SKIN GO NA HEMEL
6. Foe san ede foeroe sma e bribi taki Krestes ben teki en libisma skin go na hemel?
6 Ma foeroe sma e bribi taki Krestes ben teki en libisma skin go na hemel. Den e sori na tapoe taki, di Gado ben opo Jesus baka na dede, en libisma skin no ben de moro na ini a grebikamra (Markus 16:5-7). So srefi baka di Jesus dede, a ben sori ensrefi na den disipel foe en ini wan libisma skin, foe sori den taki a ben de na libi. Wan leisi a ben meki na apostel Tomas soetoe en anoe go na ini na olo na En seibere, so taki Tomas ben sa bribi taki A ben opo baka troetroe (Johanes 20:24-27). Disi no e boeweisi taki Krestes ben kisi wan opobaka ini a srefi skin di den ben kiri en na ini?
7. San e sori taki Krestes ben go na hemel leki wan jejesma?
7 Nôno, kwetikweti. Bijbel e taki krin: „Krestes dede wán leisi èn foe ala ten ini a tori foe sondoe . . . , en, di den ben kiri ini a skin, ma di Gado ben meki kon na libi ini a jeje” (1 Petrus 3:18). Libisma di abi skin foe meti nanga broedoe no kan libi na hemel. Bijbel e taki foe na opobaka foe kisi libi na hemel: „Den e sai en leki wan natoeroe skin, den e opo en baka leki wan jeje skin. . . . skin nanga broedoe no kan kisi a kownoekondre foe Gado” (1 Korentesma 15:44-50). Jejesma wawan di abi jeje skin kan libi na hemel.
8. San ben pasa nanga a libisma skin foe Krestes?
8 We, san ben pasa dan nanga Jesus en libisma skin? Den disipel no ben feni a grebikamra foe en leigi? Ija, bika Gado ben poeroe a skin foe Jesus. Foe san ede Gado ben doe dati? Foe di a sani disi ben meki taki san ben skrifi na ini bijbel, ben kon troe (Psalm 16:10; Tori foe den Apostel 2:31). Foe dati ede Jehovah ben feni en fanowdoe foe poeroe a skin foe Jesus, soleki fa a ben doe dati wan leisi nanga a skin foe Moses (Deuteronomium 34:5, 6). Èn efoe a ben libi a skin na ini a grebikamra, dan den disipel foe Jesus no ben sa kan froestan taki Jesus ben kisi wan opobaka na dede, foe di den no ben froestan jeje afersi krinkrin ete na a ten dati.
9. Fa Tomas ben kan soetoe en anoe go na ini wan soro foe a materialiseri skin foe a Jesus di ben opo baka na dede?
9 Ma foe di na apostel Tomas ben man soetoe en anoe go na ini na olo na a seibere foe Jesus, dan dati no e sori taki Jesus ben kisi wan opobaka na dede na ini a srefi skin di ben spikri na a postoe? Nôno, bika Jesus ben materialiseri ensrefi nomo noso ben teki wan libisma skin, soleki fa engel ben doe dati ini a ten di pasa. Foe kan overtoigi Tomas soema A ben de, Jesus ben gebroiki wan skin pe den olo foe den soro ben de na ini. A ben sori, noso ben gersi leki a ben de wan libisma dorodoro, di ben man njan èn dringi, neleki den engel di wan leisi Abraham ben sreka switi njanjan gi den foe njan. — Genesis 18:8; Hebrewsma 13:2.
10. San e sori taki Jesus ben teki difrenti natoeroe skin?
10 Ala di Jesus ben sori ensrefi na Tomas ini wan skin di ben gersi a wan di den ben kiri en na ini, tokoe Jesus ben teki difrenti skin toe te a ben sori ensrefi na den bakaman foe en. Biginbigin na so Maria Magdalena ben prakseri taki Jesus ben de wan man di e krin djari. Na tra okasi, biginbigin den disipel foe en no ben sabi soema na en. Na ini den sani disi di ben pasa, a no ben de a sori di a ben sori ensrefi san ben sorgoe taki den ben kon sabi soema na en, ma na son sani san a ben taki noso doe. — Johanes 20:14-16; 21:6, 7; Lukas 24:30, 31.
11, 12. (a) Na sortoe fasi Krestes ben gowe libi grontapoe? (b) So boen, na sortoe fasi wi moesoe froewakti a konbaka foe Krestes?
11 Jesus ben sori ensrefi na ini wan libisma skin na den disipel foe en na ini den 40 dei baka di a opo baka (Tori foe den Apostel 1:3). Dan a go na hemel. Ma kande son sma sa aksi: ’Den toe engel di ben de drape no ben taigi den apostel, taki Krestes „sa kon foe dati ede na a srefi fasi leki fa oenoe si en e go na loktoe”?’ (Tori foe den Apostel 1:11) Ija, dati de so. Ma loekoe taki den ben taki „na a srefi fasi”, no na ini a srefi skin. Èn na sortoe fasi Jesus ben gowe? Na wan tiri fasi, sondro opo-opo noso pranpran na poebliki foe hari sma prakseri. Soso den apostel foe en ben sabi foe dati. Grontapoe no ben sabi foe dati.
12 Loekoe fa bijbel e skrifi foe a fasi fa Jesus ben gowe libi den apostel foe en di a ben go na hemel: „Ala di den ben e loekoe, dan a ben opo go na loktoe èn wan wolkoe ben poeroe en na den ai” (Tori foe den Apostel 1:9). So boen, di Jesus ben bigin go na loktoe, dan wan wolkoe ben teki en poeroe na den troetroe ai foe den apostel. Dati meki Jesus no ben de foe si moro di a ben e gowe. Den no ben kan si en. Ne a ben opo go na hemel ini en jeje skin (1 Petrus 3:18). Na so wi no sa kan si nanga wi ai a konbaka foe en toe, ini wan jeje skin.
FA IBRI AI SA SI EN
13. Fa wi moesoe froestan den wortoe taki ’ibri ai sa si’ Krestes te a e kon nanga den wolkoe?
13 Fa wi moesoe froestan den wortoe foe Openbaring 1:7 dan? Drape na apostel Johanes e skrifi: „Loekoe! A e kon nanga den wolkoe, èn ibri ai sa si en, èn den wan di ben boro en; èn ala den lo foe grontapoe sa naki densrefi ini sari foe en ede.” Djaso bijbel no e taki foe si nanga troetroe ai, ma foe si nanga joe froestan. A de neleki te wan sma e froestan wan tori èn e taki: „Mi e si a tori.” Bijbel e taki srefi foe den „krin hai [foe] froestan” (Efeisesma 1:18, Njoe Testament Nanga dem Psalm). Dati meki den wortoe „ibri ai sa si en” wani taki, dati ibri sma sa froestan noso kon sabi taki Krestes de noja.
14. (a) Tapoe soema den wortoe „den wan di ben boro en” e sori? (b) Foe san ede wan bigi sari sa de te ibri sma te foe kaba e kon sabi taki Krestes de noja?
14 Den sma di ben „boro” Jesus troetroe, no de na libi moro na grontapoe. Dati meki den e prenki sma di, foe di den e doe ogri na den disiten bakaman foe Krestes, e waka baka a fasi fa den sma foe a fosi jarihondro ben tjari densrefi (Mateus 25:40, 45). A ten sa doro heri esi, taki Krestes sa kiri den sortoe ogri sma disi. Den kisi warskow na fesi kaba foe disi. Te a kiri disi e feni presi, dan den sa „si” noso kon sabi san e pasa. Èn a sari foe den sa bigi foe troe!
KRESTES E KON BAKA NA GRONTAPOE?
15. Fa sma e gebroiki den wortoe „kon baka” nofotron?
15 Foe kon baka no wani taki ala ten dati wan sma e go na wan troetroe presi. Na so wan sma kan taki foe wan djari di a lasi, dati ’a djari kon baka tapoe en nen’. Èn foe wan fositen tiriman den kan taki, dati ’a kon baka na makti’. Na a srefi fasi Gado ben taigi Abraham: „Mi sa kon baka na joe tra jari na a ten disi, èn Sara sa kisi wan manpikin” (Genesis 18:14; 21:1). A konbaka foe Jehovah no ben wani taki dati ensrefi ben kon baka troetroe, ma a ben poti en prakseri na tapoe Sara foe doe san a ben pramisi.
16. (a) Na sortoe fasi Krestes e kon baka na grontapoe? (b) O ten Krestes ben kon baka, èn san ben pasa na a ten dati?
16 Na a srefi fasi, a konbaka foe Krestes no wani taki, dati a e kon baka troetroe na a grontapoe disi. Na presi foe dati a wani taki, dati a e teki Kownoekondre makti di abi foe doe nanga a grontapoe disi èn e poti en prakseri na tapoe grontapoe. A no abi foe gowe libi en hemel kownoestoeroe èn saka kon troetroe na grontapoe foe doe disi. Soleki fa wi si na ini a kapitel na fesi, dan den boeweisi foe bijbel e sori, taki Krestes ben kon baka na ini a jari 1914 G.T. na a fasti ten di Gado ben poti, èn taki a ben bigin foe tiri. Dan den wortoe ben de foe jere na hemel: „Now a froeloesoe nanga a krakti nanga a kownoekondre foe wi Gado nanga a makti foe en Krestes kon.” — Openbaring 12:10.
17. Foe di wi no kan si a konbaka foe Krestes nanga wi ai, dan san a ben gi, so taki wi ben sa kan sabi taki a ben drai kon baka?
17 Foe di wi no kan si a konbaka foe Krestes nanga wi ai, wan fasi de dan foe sabi seiker taki a ben pasa troetroe? Ija, seiker. Krestes srefi ben gi wan „marki” di wi kan si èn di ben sa meki wi sabi taki en de noja, sondro foe wi kan si en nanga wi ai, èn taki a kaba foe grontapoe de krosibei. Meki wi go ondrosoekoe a „marki” dati.
[Prenki na tapoe bladzijde 142]
Krestes ben gi en skin abra leki wan ofrandi. Noiti a ben sa kan teki en baka èn tron wan libisma baka
[Prenki na tapoe bladzijde 144, 145]
Foe san ede, baka na opobaka foe Jesus, Maria Magdalena ben prakseri taki A ben de wan man di e krin djari?
Na ini sortoe libisma skin, Jesus, di ben opo baka na dede, ben aksi Tomas foe soetoe en anoe go na ini?
[Prenki na tapoe bladzijde 147]
Krestes ben moesoe kon baka na a srefi fasi leki fa a ben gowe libi grontapoe. Na sortoe fasi a ben gowe?