A de so taki Yesus ben gebore na ini december?

BIJBEL no e taigi wi o ten Yesus ben gebore. Ma na ini Bijbel wi kan feni nofo buweisi di e sori taki Yesus no ben gebore na ini december.

Prakseri fa a weer ben de na a pisi ten dati fu a yari na ini Betlehem, a presi pe Yesus gebore. Na tapu a Dyu kalender, a pisi ten fu a mun Kislev (di e fadon na ini november/december), ben de wan kowru pisi ten èn alen ben e fadon doronomo. Baka a mun Kislev, yu ben abi a mun Tebeth (december/yanuari). Disi ben de a moro kowru mun fu a yari, èn son leisi snew ben e fadon na den hei presi fu a kontren. Meki wi go luku san Bijbel e fruteri wi fu a weer fu a kontren dati.

A Bijbel skrifiman Esra e sori taki na ini a mun Kislev, a ben kowru trutru èn alen ben e fadon doronomo. Baka di Esra taki dati wan bigi ipi fu sma ben kon makandra na ini Yerusalem „na a di fu tutenti dei fu a di fu neigi mun [Kislev]”, dan a sori moro fara taki den sma ben e „kowru . . . fu di alen ben e fadon doronomo”. Den sma di ben kon makandra, ben taki srefi fa a weer ben de na a pisi ten dati fu a yari. Den ben taki: „Now na alenten, èn wi no man tanapu na dorosei” (Esra 10:9, 13; Yeremia 36:22). A no de fu fruwondru taki den skapuman di ben e libi na ini den kontren lontu Betlehem ben e sorgu taki den, nanga den skapu fu den no ben de na dorosei te neti na ini a pisi ten fu december!

Ma Bijbel e sori taki skapuman ben e luku den skapu na ini den weigron, na a neti di Yesus gebore. Fu taki en leti, a Bijbel skrifiman Lukas e sori taki na a ten dati, den skapuman krosibei fu Betlehem ben „e tan na ini den wei fu hori wakti gi den skapu fu den te neti” (Lukas 2:8-12). Luku taki den skapuman no ben e koiri nomo na dorosei na deiten, ma taki den ben e tan na dorosei. Den skapu fu den ben de na ini den wei te neti. Efu a de so taki na ini a mun december, a weer kowru èn alen e fadon doronomo na ini Betlehem, dan yu denki taki den skapuman ben o man tan na dorosei? Nôno, kwetikweti. Sobun, a fasi fa a situwâsi ben de na a ten di Yesus gebore, e sori taki a no gebore na ini december.a

Gado Wortu e sori wi soifri o ten Yesus dede, ma a no e sori wi soifri o ten Yesus gebore. Disi e memre wi na den wortu fu Kownu Salomo: „Wan nen bun moro leki bun oli, èn a dei fu dede bun moro leki a dei te wan sma e gebore” (Preikiman 7:1). Dati meki a no de fu fruwondru taki Bijbel e taki furu fu a diniwroko fu Yesus èn fu a dede fu en, ma taki Bijbel no e taki finifini fu a pisi ten di a gebore.