TYARI GOBAKA
LES 7
Tan go baka fu yepi sma
Bijbel e taki: ’Den ben e gi sma leri doronomo èn den ben e fruteri sma a bun nyunsu.’ —Tori 5:42.
San Paulus du
1. Luku a FELEM, noso leisi Tori fu den apostel 19:8-10. Baka dati luku den aksi disi:
Fa wi du sabi taki Paulus tan meki muiti fu yepi den sma di ben wani arki?
Omeni leisi Paulus tan go baka fu gi leri na den sma di ben wani arki, èn o langa a du dati?
San wi kan leri fu Paulus?
2. Wi musu meki ten èn tan du muiti fu go baka na sma èn bigin Bijbelstudie nanga den.
Du leki Paulus
3. De klarklari fu go baka na a yuru di a sma man. Aksi yusrefi: ’O ten mi ben o go baka na a sma? O ten èn pe a ben o moro bun gi a sma fu taki nanga mi?’ De klarklari fu go baka na a sma awinsi a no a ten di bun gi yu.
4. Meki mofo fu go baka na a sma. Na a kba fu ibri takmakandra, dan pruberi fu aksi a sma sortu dei èn o lati yu kan taki baka nanga en. Hori yusrefi na a mofo di yu meki.
5. No gi abra tumsi gaw. Kande yu go na a sma wan tu leisi ma a no ben de na oso, noso a ben abi en druk. No de gaw fu denki taki a sma no wani (1 Kor. 13:4, 7). Tan pruberi fu feni a sma, ma luku bun taki yu no lasi yu ten fu soso.—1 Kor. 9:26.