’Skoivi joe wroko poeroe tapoe Jehovah’
„SKOIVI joe wroko poeroe tapoe Jehovah hemsrefi en dem sani di joe seti foe doe tan vaste”. — Odo taki 16:3.
1. San dem apostel ben si leki wan foe dem moro bigi vanoodoe di kristen habi?
Wan foe dem sani di soema habi moro vanoodoe na ini wi tem, na dikhatti. Alasoema tem foe tem e firi brokosaka foe dem kwinsi foe na grontapoe disi en foe di hemsrefi no sabi fasi foe doe sani. Kristen no de aparti foe disi. Na apostel Paulus ben taki foe doel foe sainde a ben visiti wan gemeente di a taki: „Foe mi nanga oenoe feni dikhatti makandra nanga na bribi disi wi habi, oenoe nanga mi makandra” (Rom. 1:12). Di Kristen man foe na gemeente foe Jeruzalem ben meki reis go na tra foto, dem „ben e gi dem brada dikhati nanga foeroe leezing en tranga dem” (Tori foe dem Apostel 15:32; 20:1) Disi na wan mooi exempel gi ouroeman nanga opziener na ini wi tem — Ageersi nanga Filipenzen 2:1.
2. San na bijbel e gi wi leki rai foe doe te wi moesoe doe wan hebi wroko of wan problema?
2 Sontron kande joe habi wan problema noso wan wroko di geersi wan bergi of, kande wan omstandigheid kan kom na ini joe libi di no switi srefi srefi. San joe moesoe doe dan? Prefoe foe lasi hati of tapoe, joe moesoe go na a Tata foe safri sarihatti-fasi nanga na Gado foe ala troostoe (2 Kor. 1:3, 4). Ja, „skoivi joe wroko poeroe tapoe Jehovah hemsrefi en dem sani di joe seti foe doe sa tan vaste”. — Odo taki 16:3.
3. San a wani taki foe „skoivi joe wroko tapoe Jehovah”?
3 Ma san a wani foe taki ’foe skoivi joe wroko poeroe tapoe Jehovah’? A wan taki foe skoivi na hebi foe joe skouroe, tapoe Hem, foe taki hem so. A no de foe taki, dati dem plan of wiensi di joe habi moesoe de reti boen, akroederi nanga na woortoe foe Gado di de troe en dem no moesoe de foe gridi tevrede — fasi, revensi en so moro fara. Ma presi foe joe firi dati na hebi de tapoe joe, poti alasani na fesi foe Jehovah, poti na heri afersi na ini hem anoe. Dan, nanga begi en teki foe na rai foe na bijbel so boen leki joe kan, loekoe na Hem foe doe san joe e aksi. — Jak. 1:2, 5; Matth. 7:7, 8.
GRO NANGA GOEDOE E KOM FOE GADO
4. Foe sainde a de prenspari dati wan kristen hori na prakseri foe „skoivi hem wroko tapoe Jehovah”?
4 Disi na wan toemsi prinspari afeersi. Efoe wan kristen no e doe disi, dan a kan bigin foe vertrouw toemsi tapoe hemsrefi, kande sondro foe a sabi, ai prakseri foe hem egi prinspari-fasi nanga san a kan doe. Efoe a sori taki hem plan e kom troe, a kan teki na grani foe hemsrefi, soso foe kom si baka tem dati na „winni” ben de soso foe wan pisi tem en a no e go diepi. So wan winni no e tjari grani gi Gado en a no e jepi trawan troe troe. Bikasi „Efoe Jehovah srefi no e bow na oso, na foe soso dem bouwman wroko tranga tapoe. Efoe Jehovah no e hori wakti gi na foto, dan na foe soso dem waktiman tan na ai.” — Ps. 127:1.
5. (. . .)?
5 Na apostel Paulus ben poti krakti tapoe na gronprakseri disi di a ben skrivi na kristen gemeente di ben de na Korinthe. Foeroe na ini na gemeente disi ben e waka baka of gi grani na bigi memre man (2 Kor. 11:4, 5, 13). Kande toe, sowan ben gi Paulus nanga Apóllos wan prinspari fasi di no ben fiti (1 Kor. 1:12). Ma Paulus ben gebroiki hemsrefi, Apóllos nanga Céfas leki wan ageersi, foe sori fa a no boen foe gi joesrefi grani of foe vertrouwe tapoe joesrefi of tapoe wan tra soema of moro soema (1 Kor. 4:6). A taki: „Hoesoema na Paulus? Hoesoema na Apóllos? Dem de dienari, disi ben meki oen kom na bribi; ma soleki na Masra ben gi na tranga na ibriwan foe dem. Mi ben prani, Apóllos ben nati na gron, ma Gado ben meki sani gro. Foe dati hede, no wan soema de wan sani, no hem disi prani, no hem disi nati na gron, ma Gado wawan disi e meki sani gro”. — 1 Kor. 3:5-7.
6. San de na baka pisi gi wan christen di no e „skoivi hem wroko tapoe Jehovah”?
6 Paulus ben sori dati kande dem ben wroko tranga foe bow tapoe na joisti fundamenti di de Jezus Christus. Tokoe, efoe dem no ben e bow na a joisti fasi — no e skoivi dem wroko tapoe Jehovah en no e vertrouw tapoe hem foe tjari winni — dan dem bo ondrovinni, nanga sjem, dati dem ben bow sani di no ben habi waarde, sani di no ben sa pasa na tesi foe Gado. — 1 Kor. 3:10-15.
7. Foe sainde wan christen moesoe loekoe boen dati a no vertrouw tapoe hemsrefi of gi hemsrefi na grani?
7 A reden foe sainde christen moesoe de voorzichtig nanga demsrefi de dati a de wan libisoema gwenti foe vertrouw tapoe hemsrefi, foe teki na grani foe hemsrefi en foe handel onafhankelijk (srefidensi). Gado ben taki so wan sjatoe tem baka na vroedoe foe dem dee foe Noach. „Na luste gwenti foe libisoema ati takroe sensi hem jongoe jari” (Gen. 8:21). Na luste gwenti disi wi alamala kisi hem foe Adam, di teki hem egi pasi, foe doe sani tapoe hemsrefi, leki fa hemsrefi e stuur sani. Ma na troe de dati a kom na ondro na tiri foe didibri. — Gen. 3:5.
HEE NA NEM FOE GADO, NO DI FOE WISREFI
8. San moesoe de na moro prinspari reden na ini ala sani di wi e doe?
8 „Na nem foe Gado nanga di foe hem Manpikin moesoe de santa na ini ala sani di wan christen e doe. Disi wani foe taki dati wi marki moesoe de foe meki bekenti en hee na soevereiniteit foe Gado, na rechtvaardikifasi foe hem, na sari-ati foe hem en dem tra mooi egi fasi foe hem. Wan okasi, di Gado ben meki dem skrivi hem en di tjari na punt disi kom na krin, de na ini na situati di ben kom baka di Israël ben de kaba na ini a pramisi kondre.
9. Fa dem Israël soema ben ondrofeni dem bakapisi foe „skoivi dem wroko tapoe Jehovah”?
9 Na ini na tem dati Samuel na getrouw profeti ben e kroetoe Israël. Foe di na pipel ben e digi-digi na mindri foe tra Gado, dem ben kisi foeroe pina foe na anoe foe dem vijanti. A taigi dem foe trowe dem fasi gado di ben de na dem mindri. Dem ben gi jesi en dem ben bigin foe dini Jehovah wawan. Na so wan fasi dem ben e „skoivi dem wroko tapoe Jehovah” en dati meki dem ben winni wan troe winni tapoe dem bita vijanti. Dem Filistijn soema — 1 Sam. 7:3, 4, 10-14.
10, 11. Baka di Jehovah ben tjari dem so boen, fa dem Israël soema no hopo hem nem en vertrouw tapoe hem?
10 Tokoe, baka di demsrefi ben si fa dem no de bekwaam en dati foe blesi dem ben de helemaal afhankelijk foe Jehovah, tokoe baka tem, di Samuel ben kom owroe, dem aksi foe wan koning. Dem taki: „Poti wan koning tapoe wi foe kroetoe wi leki ala dem tra naatsi”. Di Samuel begi Gado foe na afeersi disi, na piki foe Jehovah ben de: „A no joe dem trowe ma na mi dem trowe foe de Koning tapoe dem”. — 1 Samuel 8:4-7.
11 Samuel waarskow dem dan foe na kwinsi di dem bo kisi na ondro na rigeeri foe wan libisoema koning, ma dem piki taki: „Nono, ma wan koning wi wani tapoe wi. En wi toe, moesoe tron leki ala dem tra naatsi en wi koning moesoe kroetoe wi, en moesoe go na wi fesi en feti wi oorlog gi wi”. — 1 Sam. 8:10-20.
12. Foe di dem no skoivi dem wroko tapoe Jehovah, soortoe baka pisi dem ondrofeni?
12 Na pipel foe Israël ben sori djaso san ben de troe troe na ini dem ati, dem ben e vertrouw tapoe libisoema foe tjari wini na ini dem plan. Dem no ben habi na bribi foe skoivi dem wroko tapoe Jehovah. Pikinso a baka dati Gado sori dati a no tevrede nanga dati, wan alen juist tapoe na dee di dem ben moesoe koti dem karoe (1 Sam. 12:17, 18). Baka dati dem Israël soema feni foeroe pina na ondro dem koning, boiti wan toe getrouw man soleki koning David, Josia nanga Hizkia. Disi ben de na baka pisi foe no si Jehovah leki dem troe Gado.
POTI ALASANI NA INI DEM HANOE FOE GADO
13. Fa wi moesoe handel leki dinari foe Gado na ini ala sani di wi wani doe?
13 Foe na exempel disi wi kan si dati na ini ala problema di e kom fesi wan diniman foe Gado nanga na ini alasani di dem wani foe doe, Jehovah de na ini. Na a fosi presi wi moesoe habi na wani nanga hem nem na ini prakseri. Dan wi kan poti na afeersi na hem fesi en sabi dati na meki fasi foe wi plan de na ini hem anoe. Efoe a kom boen, Gado e kisi na grani. Efoe a no kom soleki fa wi ben meki plan, dan toch wi sabi dati hem e doe en e meki pasa san moro boen gi wi. — Rom. 8:28.
14. San de verkeerti te wi leki kristen e teki na grani foe wan sani di wi doe foe di wi sabi doe sani of foe di wi koni?
14 Na ini grontapoe, na „winni” foe wan soema, habi te make nanga san a kan nanga na koni foe hem, sodati soema e teki na grani foe san dem doe gi dem srefi. Ma na ini na dini foe Gado disi no de so. Noso, fa wan soema sa de na Gado fesi ben sa hanga foe hem koni nanga hem persoon. Eingelijk, na soema di e vertrouw moro minder tapoe hem persoon of koni na a soema di Gado e blesi. Na apostel bin taki: „Ma wi e tjari na goedoe disi ini soso stonpatoe foe na toemoesi bigi tranga moesoe de foe Gado en no foe wisrefi” (2 Kor. 4:7; loekoe toe 2 Kor. 12:9). Kristen soema moesoe de na ai alatem foe no fadom na ini na gwenti foe wi sondoe skin, foe vergiti dati dem na soso dienari foe Gado di e prani en e gi watra na a tiri, ma dati Gado e meki a gro. — 1 Kor. 3:6, 7.
15. Fa san wi e doe na ini na dini foe Gado e sori tapoe na srefi gronprakseri leki na fasi fa wi skin e wroko?
15 Na pisi di Gado e doe te wi de dini hem wi kan ageersi nanga na fasi fa wi skin e wroko. Dem orgaan di Gado meki gi wi, e wroko sondro foe wi e prakseri dati dem wroko. Wi kan verklaar soso pikienso fa dem e wroko. So a de toe nanga na njanjam di wi e prani nanga, soso pikienso moeiti foe wi see, sontron srefi no wan moeiti srefi, ma tokoe a foeroe nanga ala sani di boen gi wi gosontoe. Son, alen, na gron nanga na siri e doe na moro bigi pisi foe na wroko. Dus, na troe foe na tori de dati, wi libi e hang helemaal foe dem sani di Gado e gi. Bijna na hem e doe ala wroko. Wi dini foe Gado habi na srefi gronprakseri leki fundamenti. Na apostel Petrus ben taki: „Efoe wan soema e dini meki a doe dati nanga na tranga di Gado gi hem. Sodati na ini ala sani Gado moesoe kisi bigi nem nanga jepi foe Jezus Kristus”. — 1 Petr. 4:11; loekoe toe Matth. 6:24-31.
NA MOOI EXEMPEL FOE ABRAHAM
16. Fa Abraham ben moesoe „skoivi hem wroko tapoe Jehovah” na ini na afeersi foe na pramisi siri?
16 Abraham ben de wan mooi exempel foe wan man di sondro foe hori wan sani na baka ben „skoivi hem wroko tapoe Jehovah”. A ben habi soso na pramisi woortoe foe Jehovah dati Gado ben sa meki wan bigi naatsi komoto foe hem en dati nanga jepi foe hem ala famiri foe grontapoe ben sa blesi demsrefi (Gen 12:2, 3). Na apostel Paulus e poti prakseri tapoe na bribi foe Abraham te a de taki:
„Hem (Abraham) de wi ala tata, soleki fa boekoe de taki: Mi ben leki potti joe leki wan tata foe foeroe pipel, na a Gado fesi, di a ben bribi na hem en di e meki dem dedesoema e kisi libi baka en di e kari san di de ete, meki a kom. So Abraham ben bribi nanga hopoe alwasi noti no ben de ete foe hopoe ete, taki hem sa kom wan tata foe foeroe pipel leki fa Gado ben taki: Na so joe siri sa de. En a di a no ben zwaki na ini bribi, foe dati hede a no ben koekoe hem skin, disi ben dede hafoe kaba; bika pikin moro a ben ouroe hondro jari, a no ben loekoe na a bere foe Sara, disi ben dede hafoe kaba. A no prakseri taki a no sa kisi na pramisi foe Gado, ma a bribi en a kom tranga na ini bribi a gi Gado glori. Bikasi a ben sabi troe troe taki na sani di Gado pramisi dati a habi tranga toe foe doe. Foe dati hede Gado ben loekoe dati toe leki hem geregtigheid”. — Rom. 4:16-22.
17. Fa (. . .)?
17 Abraham ben sabi dati Gado ben moesoe foe doe wan sani efoe wan manpikin ben moesoe komoto foe hem nanga hem wefi Sara. A ben sabi dati hem no ben habi no wan enkri makti. Ma disi no ben meki Abraham lasi-ati. Di wan manpikin ben gebore foe hem, Abraham ben sabi dati a ben de wan wonder foe Jehovah di ben wiki baka na makti foe hem nanga Sara foe meki pikin. Disi ben meki hem bribi kom moro tranga. Now a kom sabi dati nanga na jepi foe na manpikin disi na siri bo kom. San a doe di Gado aksi hem foe offer na manpikin dati? Disi ben moesoe foe verwondroe Abraham toemsi. A ben kan si na aksi disi leki „a toemsi”. Ma a gi hemsrefi helemaal abra ini na hanoe foe Jehovah leki fa na bijbelboekoe de taki ini Hebreën:
„Nanga bribi Abraham ben tjari Isaak kom foe wan ofrandi, di Gado ben proberi hem; na wan pikin foe hem a gi abra, ala di a ben kisi na pramisi. Bikasi Masra ben taki gi hem taki. Nanga Isaak joe famiri sa kisi nem. Abraham ben taki na ini hem ati taki Gado habi tranga nofo en a kan wiki na pikin na ini dede srefi en foe dape a kisi hem baka toe na geersifasi.” — Hebr. 11:17-19.
GADO KAN MEKI JOE HABI WINNI TAPOE JOE PASI
18, 19. Te wi e loekoe dem afeersi disi, foe sainde wi go tapoe hebi wroko nanga problema nanga dikhatti nanga vertrouw?
18 Baka te wi lesi so wan verslag fa wan foe wi kan prakseri foe wan momenti, dati wi moesoe foe vertrouw tapoe wi egi makti, positie of koni foe doe wan sani na ini na dini foe Gado? A de leki wan njoen dikhati foe sabi dati efoe wi poti ala wi vertrouw tapoe Jehovah en gi jesi na hem, net leki fa Abraham ben doe, dan wi no habi foe broko wi ede nanga na baka pisi alwasi o hebi na wroko of na problema na wi fesi de. A kan de foe sorgoe gi dem sani di de vanoodoe gi wi famiri. Of, wan oema di lasi hem man nanga jongoe pikin kan habi hem anoe foeroe te ai proberi foe kwiki den na ini na tranga leri en jeje — wet foe Jehovah (Ef. 6:4). Of, kande na problema de foe feni tem gi na preekiwroko. Trawan kan frede te dem moesoe go oso foe oso en foe leri soema foe na bijbel. Prakseri dati joe kan doe ala sani nanga jepi foe dem di e gi joe krakti (Fil. 4:13). Prakseri dati Jehovah Gado nanga Jezus Kristus de na joe see. Joe kan hori doro leki joe e si na wan di joe no kan si nanga ai net soleki Mozes ben doe di a ben habi na bigi wroko leki wan bergi foe tjari wan drie miljoen Israël soema, slavoe foe Egipti, pasa na woestijn. Wan wroko di ben pasa na makti foe libisoema krin krin (Hebr. 11:27-29). Mozes ben moesoe skoivi na heri lai foe hem tapoe Jehovah. Dan Jehovah doe na wroko. A de seker dati wi problema no bigi so leki di foe Mozes.
19 Dati meki na bijbel e gi wi na rai foe begi sondro foe tapoe en foe hori doro na ini begi.” Na a fasi disi wi kan skoivi wi wroko tapoe Jehovah en go doro foe loekoe na Hem foe meki dem plan foe wi kom tan vaste (1 Thess. 5:17; Rom. 12:12). Leki fa Jezus ben doe, dan wi sa santa na nem foe Jehovah en teki hem leki na wan di e tjari na baka pisi, wi o gi hem na grani en prijze foe san kom troe.