A smoko foe tra sma kan doe joe ogri?

A de doe miljoenmiljoen sma boen foeroe ogri èn foeroe tron den e kisi wan siki di e tjari dede kon, foe di wan tra sma ben bosroiti foe smoko. Te foe eksempre wan mama e smoko, dan disi abi wan takroe bakapisi gi en bébi di no gebore ete. A bébi ben sa kan dede kaba bifo a gebore.

„Fa dati kan?” joe ben sa kan aksi. „Fa na smoko ben kan doe a pikin ogri aladi a de ini na skin foe na mama pe a kibri boen drape?”

NA TAKROE BAKAPISI TAPOE PIKIN DI NO GEBORE ETE

Pikinmoro wantronwantron baka te na smoko ari go na ini, dan na nicotine foe na smoko e kon ini den broedoe-tité foe na mama. Na toemsi fergiftig sani disi e meki den broedoe-tité ini en moeroe-bere kon smara, sodati na bébi no e kisi na zuurstof nanga njanjan di a moe kisi. Na a srefi ten, koolmonoxide e pasa na koemba-tité makriki go na a bébi. A de kon afoe ini na presi foe na zuurstof di de ini na broedoe foe na bébi èn di a abi so tranga fanowdoe foe en normaal gro.

Wan ondrosoekoe di Ingrisi datra ben doe na a Oxford Éskoro, de prenspari ini disi. Den ben taki dati efoe na mama foe wan bébi e smoko, dan wan sma kan „si na bébi ini na moeroebere e soekoe loktoe, sodati pikinmoro séker a de pina foe wan pisi ten foe wan mankeri foe zuurstof”.

Den sari bakapisi abi boen bewijsi. „Smoko ini na ten te wan oema de nanga bere kan meki mankeri kon na a pikin dati efoe na foetus (a bébi di no gebore ete) e dede ofoe sjatoe baka na gebortoe a pikin e dede”, so na tijdschrift Family Health e taki. Na kans dati wan bébi sa dede sjatoe baka te a gebore, de dri tron so bigi te a abi wan mama di e smoko. Na so toe a de dati bébi foe mama di e smoko ini toe foe den dri geval e de moro pikin leki normaal te den gebore.

Boiti dati, a kans e kon moro foeroe foe „bedidede” (wantronwantron, onfroewakti dede foe wan pikin di gersi a de gosontoe) te mama e smoko - 52 procent moro, leki fa ondrosoekoeman taki. A de krin, dati bébi foe mama di e smoko de pikinso abnormaal ini na roetoe foe na ede-tonton, nanga na bakapisi dati na ari-bro kan de moeiliki èn a pikin kan dede wantronwantron.

Efoe wan bébi di no gebore ete, a de doe ogri te en mama de smoko, sortoe krakti tabaka-smoko abi dan tapoe wan pikin baka te a gebore kaba?

SAN A DE DOE TAPOE JONGOE PIKIN

Te mama nanga papa e smoko, dan den e dwengi den pikin foe den foe smoko toe indirect. „Jongoe pikin foe papa nanga mama di e smoko, e kisi na inisé foe den someni smoko leki di foe dri te féfi sigaret efoe den ben sa smoko” so wan longspecialist tjari kon na krin (Dr. Alfred Munzer). Èn dati de gi den long foe wan pikin di e firi sani fini, boen foeroe fergif! Joe no ben sa feni en switi leki wan papa ofo mama ofoe joe, ben sa sabi dati wan sma e meki joe pikin smoko ala dé féfi sigaret!

Ma pikinnengre e kisi ogri bakapisi foe na smoko di papa nanga mama e meki kon? Ini The Journal of the American Medical Association na ondrosoekoe foe datra tapoe a aksi disi, ben tjari a piki disi kon:

„Pikin a bobi foe mama di smoko, abi moro kans foe go na atoso nanga bronchitis ofoe longontsteking leki pikin na bobi foe mama di no e smoko. Wan tra ondrosoekoe ben sori, dati na kans dati wan pikin na bobi kan kisi bronchitis ofoe longontsteking, pikinmoro de toe tron so moro bigi te ala toe, mama nanga papa e smoko. Ete wan tra ondrosoekoe ben tjari kon na krin, dati moeilijkheid na pikin foe ari-bro de net so bigi leki na foeroe smoko foe tabaka ini na birti foe na pikin. Sosrefi toe pikin di de pe tabaka-smoko de, den ati o naki moro esi èn den broedoedruk e kon moro é soleki den sani disi de foe si na soema di e smoko.”

Wan soema di e smoko kan teki na bosroiti foe doe en égi gosontoe ogri, foe di a de denki foe njan switi foe smoko. Ma joe e feni en wan moreel joisti sani dati a doe ogri na a gosontoe foe en pikin?