Meki wan boen nen na Gado
„Wan boen nen de moro betre leki diri oli; èn na dé foe dede moro leki na dé foe gebortoe.” — Pred. 7:1, Authorized Version.
1. San ibri sma e meki gi ensrefi, èn san wi e meki trawan kisi son tron?
IBRI sma e meki wan sani na tapoe foe san a de doe, srefi wan sma di no e doe noti. Wan man leki meubelmaker, di e meki moi temre e meki wan nen leki wan boen vakman. Wan oema di e bori switi njanjan, soboen e meki wan nen leki wan boen boriman. Wan di foe dri sma no e doe noti èn e meki wan nen foe wan lesiman. Ibri sma e meki wan nen gi ensrefi. Èn sontron wi e gi nen na wan tra sma. Saul nanga en kompe meki David kisi wan takroe nen nanga na gongosa foe den. Nanga den psalm foe en, David ben sorgoe dati Gado kisi wan boen nen. Jehovah ben gi David na okasi foe bow gi ensrefi wan boen nen. Son sma di e taki dati den de takiman foe Gado e gi en wan takroe nen nanga den kerki lé èn oeroedoe foe den. Troe anbegiman e sorgoe nanga den wortoe nanga doe foe den dati Gado kisi wan boen nen, ala di nanga dati den e meki wan boen nen gi den srefi na Jehovah Gado. — Ps. 64:1-6; 1 Kron. 17:8; Ezech. 36:20-23.
2. Sortoe vreemde wortoe leki fa a gersi tanapoe ini Prediker èn sortoe rai e gi moro fara?
2 Wan vers ini na bijbelboekoe Prediker de, di kande gersi vreemde wortoe gi son lésiman: „Wan boen nen de moro betre leki diri oli; èn na dé foe dede moro leki na dé foe gebortoe.” Fa disi kan? Fa dede kan de moro betre leki libi? Efoe joe ben kan teki mindri den toe, joe no ben sa feni en moro switi foe joe libi bigin leki foe joe libi e kon na wan kaba? Meki wi lési na vers disi ete wan tron, makandra nanga den vers di e kon na en baka:
„Wan boen nen de moro betre leki diri oli; èn na dé foe dede moro leki na dé foe gebortoe. A moro betre foe go na wan oso foe low, leki foe go na wan oso foe fésti. Bikasi disi de na kaba foe ibri sma; èn den libi wan sa poti en na ini den ati. Sari moro boen leki lafoe; bikasi nanga na sari foe na fesi, na ati e kon moro boen. Na ati foe na koni sma de ini na oso foe low; ma na ati foe den lawman de ini na oso foe prisiri. A moro betre foe arki na piri-ai foe na koni sma leki foe jere na singi foe den lawsma. Bikasi leki na babari foe maka ondro wan patoe, na so na lafoe foe wan lawsma de; disi toe de wan soso sani.” — Pred. 7:1-6, „Authorized Version.”
3. (a) Foe sortoe owroeten gwenti ini Israël e taki dja, èn san de a moro trowstoe prakseri ini so wan momenti? (b) Fa wi sabi dati na nen di e kari dja de wan boen nen?
3 Disi e tjari kon na krin den vreemde wortoe, dati na dé foe joe dede de moro boen leki na dé foe joe gebortoe? Ja, foe troe, efoe joe sabi na okasi nanga na bakapisi foe den wortoe dati. Den abi foe doe nanga wan gwenti ini na Israël foe owroeten. Te ini wan oso wan lobi famiriman ben dede, dan na oso foe den ben tron wan oso foe low. A ben de na gwenti dati mati nanga birtisma ben kon condoleer. Na prakseri di ben sa gi moro trowstoe ben sa de, dati na dé foe dede foe na lobi man disi de moro boen leki na dé foe en gebortoe — efoe a ben meki wan boen nen na Gado. A de troe dati vers wan foe na pisi disi ini na fositen Hebrew tongo e taki moro foeroe foe wan „nen” leki wan „boen nen.” Ma, a de foe froestan dati na nen de wan boen wan. So wan srefi sani de toe ini Spreuken 22:1: „Wan nen de foe teki moro leki foeroe goedoe.” Son vertaling ben poti na bijvoegelijk naamwortoe „boen” foe sori sortoe nen di a wani taki. A de fanowdoe dati na nen de boen, ini Prediker 7:1 èn ini na odo, noso no wan foe den toe verklaring ben sa abi waarde.
4. San wi kan abi kande te wi dede, san wi no abi di wi ben gebore èn foe sanede?
4 Aladi wi e libi, dan wi e bow wan nen gi wisrefi — wan boen nen ofoe wan takroe nen. Efoe wi e handri nanga froestan ini na ai foe Gado, dan wi e bow wan boen nen gi wisrefi na Gado. Ma disi e kostoe ten. Tapoe a dé di wi e gebore, dan wi no ben libi langa nofo foe meki winsi sortoe nen toe. Boiti dati, wi ben gebore ondro na sondoe foe Adam, èn wi tanapoe ondro na kroetoe foe dede (Rom. 5:12). Te soboen, jari na baka, tapoe wi dé foe dede, kon na krin dati wi ben meki wan boen nen na Gado, dan wi abi wan sani di wi no ben abi di wi ben gebore. Wi abi wan nen di Gado sa memre te a sa wiki kon na libi den dedewan na ondro na kownoekondre foe Kristus. „Na prakseri foe wan regtvaardiki wan de leki wan blesi, ma na nen foe den ogri sma — dati sa pori gwe.” — Spr. 10:7.
DEN SMA DI E SARI E NJAN BOEN
5. San wan sma di e sari kan go prakseri te a de ini wan oso pe low de?
5 Te wan Israëlsma foe owroeten ben go na wan oso foe low foe trowstoe den sma di ben sari, dan disi toe ben de boen gi en. Ori disi pikinso ini prakseri, te wi e lési baka wan toe foe den vers. „A moro betre foe go na wan oso foe low, leki foe go na wan oso foe fésti. Bikasi disi de na kaba foe ibri sma; èn den libiwan sa poti en na ini den ati” (Pred. 7:2 AV). A no de sori wawan nanga en eri ati dati a de firi nanga den famiri di tan na baka, na presi dati a de feti baka en égi prisiri sondro firi, ma a de go prakseri dati ini na oso disi wan soema ben dede, dati disi no de wan ongewoon sani, dati ibri soema abi fow doe nanga na dede èn dati en toe sa kon tanapoe wan dé na fesi. Te na dé dati kon, dan en dé foe dede sa de moro boen leki na dé di a ben gebore? A sa handri ini en libiten nanga froestan, sodati na ten di en dé foe dede doro, a ben meki wan boen nen na Gado? Na libi wan moe teki dati na ati te ten de ete foe tjari kenki kon, bikasi ini den wantoe minuut foe wan dedebedi-bekering wan sma no kan meki wan boen nen gi ensrefi.
6. Foe sanede ini disi a de so dati sari de moro betre leki lafoe?
6 „Sari moro boen leki lafoe”, a tori e go moro fara, „Bikasi nanga na sari foe na fesi, na ati e kon moro boen” (Pred. 7:3, vertaling door prof. Obbink). Na presi dati joe ben sa lasi joe ten nanga werdri prisiri, a de moro boen foe ondrosoekoe joe libi, go prakseri foe fowtoe di joe ben meki ini na ten di pasa èn de nanga sari foe fowtoe sani di joe ben doe. Joe ati sa kon moro boen nanga dati èn disi sa tjari joe so fara foe kenki joe libifasi èn handri nanga froestan now na presi foe joe waka pasa a libi nanga lafoe èn kiki-kiki sondro wan firi foe frantwortoe. „Na ati foe na koni sma de ini na oso foe low; ma na ati foe den lawman de ini na oso foe prisiri”. — Pred. 7:5, AV.
7. (a) Ini sortoe jejefasi na soema di e sari kan kon na ini? (b) Foe sanede na lafoe foe den lawsma e teki gersi nanga na babari foe maka ondro wan patoe?
7 Moro fara „a moro betre foe arki na piri-ai foe na koni sma leki foe jere na singi foe den lawsma” (Pred. 7:5 AV). Na miti nanga wan dede, soleki na wan beri, de wan ondrofeni foe prakseri tranga èn a moe tjari wan sma so fara foe go denki en égi libifasi. Nanga dati a kan kon toe ini wan jejefasi foe go arki na raiman di tja ede. Na sori tapoe fowtoe, wansi a de doe nanga switi fasi, de moeilek foe teki, ma tokoe disi moro betre leki foe arki na singi ofoe „prijse foe den lawsma” (Willibrordvertaling). Te wi arki na den koni piri-ai di de foe feni tapoe den bladzijde foe na bijbel èn wi e poti prakseri na den tapoe, dan disi sa jepi wi foe meki wan boen nen na Gado. Te wi sa pori wi ten foe arki na law korkori, dan disi de wan soso sani: „Bikasi leki na babari foe maka ondro wan patoe, na so na lafoe foe wan lawsma de; disi toe de wan soso sani” (Pred. 7:6, AV). Te wan sma e gebroiki maka ondro wan patoe leki oedoe, dan noti e doe. Na fajatongo nanga foeroe babari sa kon bigi, ma sa dede esesi, aladi den maka e tron asisi. Den maka no abi nofo oedoe foe meki wan faja bron langa nofo, dati na meti kon gari. Na tranga babari no abi waarde leki fa na lafoe foe wan lawsma no abi waarde. Noti e doe di a waarde langa.
MORO VREEMDE WORTOE ETE
8. Sortoe leri wi e si now, nanga na moro dipi froestan disi?
8 Nanga na dipi si foe sani disi, meki wi go now na den wortoe dati „na dé foe dede de moro boen leki na dé foe gebortoe”. Wi e si dati den wortoe disi no de so vreemd moro gi wi, ma de wan krakti leri foe na fasi fa wi e tjari wi libi foe meki wan boen nen na Gado. Dan wi dé foe dede sa de moro boen leki na dé foe wi gebortoe. Wans fa no fa, efoe wi dé foe dede ben sa doro oiti. ’San wi e kisi now?’ son sma sa aksi. ’Efoe na dé foe wi dede ben sa doro oiti? Joe e bedoel kande dati disi no sa pasa? We, dati de moro vreemde wortoe leki den wortoe dati na dede moro boen leki na gebortoe!’
9. Sortoe toestand joe ai e si èn san den moe si troetroe?
9 Agen a de wan sani foe froestan na ten pe wi e libi na ini. Joe abi ai di e si, di troetroe e si? Séker joe e si dati den ten de takroe èn moeilek foe pasa, dati foeroe sma de prakseri densrefi nomo èn de nanga émemre, dati trowlibi e broko èn osofamiri e panja, dati lé èn bidrigi fasi èn ala sortoe ogridoe de alape, èn dati srefi foeroe sma di e taki dati den de kristensma, e sori dati den de falsi soema. Ma joe e si san den sani disi wani taki? Toe Timoteus 3:1-5, 13 e ferteri wi foe na betekenis foe disi:
„Ma sabi disi, dati ini den laatste dé takroe ten sa doro, di moeilek foe pasa. Bikasi den sma sa lobi densrefi nomo, sa lobi na moni, sa de asranti, nanga émemre, gongosaman, trangajesi papa nanga mama, no sabi tangi, no de loyaal, no abi wan reti lobi, no de klari foe no wan kroederi, e taki ogri foe trawan, sondro dwengi foe ensrefi, krasi, sondro lobi gi boen sani, toriman, no ke foe noti, abi bigimemre, nanga moro lobi gi prisiri leki lobi foe Gado, di abi wan fasi foe anbegi Gado, ma no abi na krakti foe en; Drai joesrefi poeroe foe den disi. Ma ogrisma nanga bidrigiman sa kon moro ogri dé foe dé, ala di den e kori sma, sma e kori den.”
10. San joe jesi e jere, èn san den moe froestan moro fara?
10 Joe abi jesi di e jere, di troetroe e jere? A no de foe taki, dati joe ben jere foe den feti, angriten, gronseki nanga pestsiki di ben miti grontapoe sensi 1914. Joe sabi na fadon panja foe na moraal, di abi krakti tapoe na eri grontapoe. Èn sosrefi toe joe ben jere foe na grontapoe préki foe na boen njoensoe foe Kristus kownoekondre foe Jehovah Kotoigi, èn foe den skwala foe ferfolgoe di ben wasi kon tapoe den, foe di den e meki bekenti dati a doesoen jari kownoekondre disi de krosibé. Ma den jesi foe joe e jere toe na betekenis foe den sani disi? Den e teki ini den na waarheid, dati Jezus ben taki den sani disi na fesi leki wan marki foe na kaba, di en discipel aksi en: „Taigi wi: oten den sani disi sa de èn san sa de na marki foe joe de-noja èn foe na bosroiti foe na seti foe sani?” — Matt. 24:3.
11. San spotoeman e taki, èn san den e gi nanga dati?
11 Joe ati e firi esi san ala den sani disi wani taki, ofoe a de tranga ofoe no e firi sani moro, sodati joe e taki: „Ala den sani disi ben pasa fosten kaba toe?” Den sma di e spotoe e gi ete wan pisi foe a marki dati wi de ini „den laatste dé”. Dati den bo de, ben taki na fesi ini 2 Petr. 3:3, 4: „Ini den laatste dé spotoeman (sa) kon nanga den spotoe foe den, di e doe sani akroederi den égi lostoe èn e taki: ’Pe na pramisi de-noja foe en de? We, foe sensi na dé di wi fosten papa ben go sribi, ala sani tan let so leki sensi na bigin foe den mekisani?’”.
WAN NJOEN SANI
12. San de now njoen ini na historia foe na grontapoe?
12 Ma séker joe ati sa firi esi, dati te joe loekoe na morsoe foe na eri grontapoe, joe sa si dati „ala sani NO e tan let so leki sensi na bigin foe den mekisani”. Noiti ete sma ben abi na makti foe ben pori grontapoe leki planeet pe sma e libi na tapoe. Den abi na makti dati now èn den e gebroiki en now foe doe noti moro leki dati! Den wetenschapsma ben gi den industriesma wan technologie di ben moe de wan blesi gi na eri libisma-famiri, ma na blesi dati kon tron wan floekoe, foedi a de morsoe na kontren, aladi siki di e tjari dede e waka lontoe na grontapoe. Na loktoe di wi e aribro fergiftig, na gron pe njanjan e prani gi wi doti nanga fergiftig sani. Foeroe liba tanga se di e gi wi watra foe dringi, e dede èn den bigi se e tron internationaal koemakoisi.
13. Foe sortoe pisi foe na marki spotoeman no kan taki: „Dati ben pasa toe kaba fosten”?
13 Joe ati e froestan dati na krakti foe na grontapoe foe ori libi, de ini gevaar, dati disi noiti ete ben pasa èn dati spotoeman no kan poti disi na wan sé foe taki dati na historia e herhaal ensrefi? Den ben sa wani doe disi sote, bikasi na pori disi foe na grontapoe ben de sosrefi toe wan pisi foe na marki foe „den laatste dé” di ben taki na fesi. Disi ben tjari kon na krin pikinmoro 1900 jari pasa kaba, ini kapitel 11, vers 18, foe na bijbelboekoe Openbaring. „Den naatsi ati ben kon bron èn joe atibron kon, èn na faste ten foe kroetoe den dedewan èn . . . na den di e frede joe nen . . . foe gi den den paiman, èn foe pori den di e pori grontapoe.
14. Foe sanede a moro bigi pisi foe den sma ini Jezus ten no ben poti prakseri tapoe na warskow, soleki disi de sosrefi toe nanga na moro bigi pisi sma ini wi ten?
14 Efoe joe ai troetroe e si èn joe jesi troetroe e jere èn joe ati no de sondro firi, dan joe sa froestan dati wi e libi ini „den laatste dé” èn dati na kaba foe na ogri seti foe sani kon krosibé. Na moro bigi pisi foe den soema no e froestan disi, soleki den moro bigi pisi foe den soema ini Jezus ten no ben froestan en warskow boskopoe. San a ben taki na a ten dati gi den èn a ben teki na profétitori foe Jesaja, de kon troe tapoe a libisma-famiri ini disi ten, namkoe dati:
„Den, ala di den e loekoe, foe soso den e loekoe, èn ala di den e jere, foe soso den e jere, èn no e kisi froestan, èn tapoe den na profétitori foe Jesaja e kon troe, di taki: ’Nanga jere, joe sa jere, ma no kisi froestan kwetkweti foe dati, èn nanga loekoe, joe sa loekoe, ma no si kwetkweti. Bikasi na ati foe na pipel disi kon deki èn nanga den jesi ben jere nanga ferferi, èn den ben tapoe den ai, sodati noiti den ben sa si nanga den ai, èn jere nanga den jesi èn kisi froestan nanga den ati foe dati èn drai kon baka, èn mi ben sa meki den gosontoe.’” — Matt. 13:13-15.
15. Soema kan prisiri ensrefi now, èn nanga sortoe owpoe na den fesi?
15 Ini na tra vers Jezus e taki dja gi den discipel foe en den tra wortoe: „Ma kolokoe den ai foe oen de, bika den e si, èn oen jesi, bika den e jere. Den soema ini disi ten, di nanga den ai, jesi nanga ati e si, èn jere èn froestan dati wi e libi ini „den laatste, dé”, kan prijse densrefi troetroe kolokoe. „Te den sani disi now e bigin foe pasa” so den e kisi foe jere, „opo tanapoe letopoe dan èn opo joe ede na loktoe, bikasi joe ferloesoe e kon krosibé” (Luk. 21:28). Gi boen foeroe sma di e libi ini „den laatste dé”, kande noiti wan dé foe dede kon. Jezus ben gersi den ten disi nanga den dé foe Noach. Soleki Noach nanga en oso-famiri ben tan na libi, di na froedoe pori na ogri grontapoe dati, na so srefi toe den sma di e handel nanga froestan èn di e meki wan boen nen na Gado, no sa si dede, te Jehovah Gado e pori na ogri seti foe sani ini na feti foe Armageddon. Wi no e taki soboen foe wan sani di no kan, te wi e taki dati boen foeroe sma kande noiti sa ondrofeni wan dededé. Moro foeroe, wi e tjari kon na fesi wan owpoe di komoto foe Gado.
16, 17. San libisma no wani foe froestan, èn san de now gi wi toemsi prenspari?
16 Ini Israël foe owroeten wan sma ben sa kan denki dati abi na tra pisi foe en libi ete na en fesi foe meki wan boen nen na Gado. Libisma breni dati tamara a kan dede. A sabi dati disi kan pasa nanga tra sma, ma no nanga en. Tra sma di de moro jongoe leki en sa dede, ma no en. Alaten baka a de denki dati a abi wan toe jari ete foe libi. Nanga na sortoe prakseri disi wan sma e meki wan libisma fowtoe, wan kefalek fowtoe. Disi ben sa de srefi so gi wan Israëlsma ini owroeten, ma gi wi ini disi ten disi de wan moro kefalek fowtoe. Wi no e libi ini wan normaal ten, pe wi ben sa kan froewakti foe prisiri wisrefi ini wan normaal libiten foe sébi-tenti ofoe srefi aiti-tenti jari. Wi e libi ini „den laatste dé”. Na kaba foe wan seti foe sani e kon krosibé. A de gi wi toemsi prenspari foe poti prakseri tapoe den wortoe ini Efese 5:15-17: „Loekoe boen fa oen e waka, no leki donsma, ma leki konisma, bai gi joesrefi na joisti ten, bikasi den dé de ogri. Foe datede no de moro langa onredelek, ma si san de na wani foe Jehovah.”
17 Ini disi ten, now di joe de na libi, bifo joe dede dé”, a de na ten foe meki wan boen nen na Gado.