Meki now na boen nen foe joe!
„Ala sani di joe anoe feni foe doe, doe dati nanga joe krakti, bikasi nowan wroko, no prakseri, no sabi, no koni de ini Sheool, na presi pe joe e go.” — Pred. 9:10.
1. Oten wi moe meki wan boen nen na Gado?
ÈN EFOE son sma e taki now: „Ma efoe na kaba no kon now ini mi libiten? Ini ala den ondro-ondro jari di pasa, libisma ben prakseri dati na kaba ben sa kon ini den libiten, ma disi no ben kon”? Wansi den froewakti foe den no ben kon troe, tokoe gi foeroe foe den a ben de na ten dati den de a libi, a ten ete pe den ben kan meki wan boen nen na Gado èn ben kan sori bribi ini na Manpikin foe Gado, sodati „tapoe na laatste dé” den ben sa kan wiki kon kisi tego libi (Joh. 6:40; 11:24). Langa ten bifo den disiten „laatste dé” na apostel Paulus ben kan taki: „Foe sensi a ten disi now ben poti gi mi na kroon foe regtvaardiki fasi.” Wansi ini sortoe ten wan sma e libi, dati de na ten foe en, pe a moe bow wan nen, ofoe na kaba foe na-grontapoe de krosibé now ofoe a didon ini na ten di e kon. — 2 Tim. 4:8; Hebr. 11:4-38.
2. (a) Wi kan tjari na skin fasi ofoe wan tra fasi wan sani gwe te wi dede? (b) Sortoe warskow foe datede de wan sani di fiti?
2 „Joisti leki fa wan sma ben komoto foe en mama bere, a so wan sma sa go baka nanga sososkin, joisti soleki wan sma ben kon; èn noti srefi wan soema kan tjari gwe foe en tranga wroko, di a kan teki gwe nanga en anoe” (Pred. 5:15). Na skin fasi wan dedesma no kan „teki noti gwe nanga en anoe”. Ma a kan teki wel a wan troetroe warti sani gwe di de boen gi na libi disi — wan boen nen na Gado. Gebroiki na ten dati! Bai na ten! „Ala sani di joe anoe feni foe doe, doe dati nanga joe krakti bika nowan wroko, no prakseri, no koni de ini Sheool, na presi pe joe e go.” Spesroetoe now, na a kaba foe na seti foe sani disi, now di foeroe sma di de ini libi, kande noiti sa si na dede, a de gi wi na ten foe doe den sani di wi anoe e feni foe doe ini kristen wroko, foe doe nanga wi makti. — Pred. 9:10.
3. Sortoe soifri sabi de prenspari, èn san a kan doe?
3 Efoe wi wani meki wan boen nen na Gado, dan wi moe broko wi ede nanga den toe kontren di e kon: san ogri èn san boen. Wi moe tapoe foe doe san de ogri ofoe fowtoe èn meki wan bigin foe doe boen. Fa wi e doe? Na froestan moe de ini na tori. „Oen no moe gersi den soema foe na seti foe sani disi”, Paulus ben taki, „ma meki oen frander, teki wan njoenfasi nanga memre” (Rom. 12:2). A de taki ete wantron na fundamenteel gronprakseri disi ini Efese 4:23: „Oen moe kon de njoen ini na krakti di e poesoe oen denki.” Èn na krakti wi e kon sabi ini Kolossenzen 3:9, 10: „Poeroe na owroe égifasi nanga en wroko èn weri na njoen égifasi, di e kon njoen nanga jepi foe soifri sabi na a prenki foe na Sma di ben meki en.” Na krakti di e poesoe joe denki, e meki wi teki wan njoen fasi nanga memre èn di e tjari joe go tapoe na pasi foe Gado boen-ati, de na soifri sabi foe en Wortoe na bijbel.
4. Foe sanede a no de nofo foe tapoe nanga ogri èn san moe doe moro ete?
4 Tai ati èn poti na joe fesi foe tapoe nanga sani di fowtoe, no abi alaten winimarki. Fa a de ofoe troetroe joe man foe tapoe wan pisiten nanga en? Dan joe no de boen ete. Jezus ben sori disi nanga jepi foe wan agersitori. Wan doti jeje ben gwe libi wan man, en „oso”, èn kon agen bakaten. Di a feni, na oso sondro dati sma e libi na ini, dan a ari go nanga sébi tra jeje na ini „èn den laatste omstandigheden foe na sma dati ben de moro takroe leki na fosiwan” (Matt. 12:43-45). A no ben de nofo dati na takroe jeje ben poeroe foe na oso; na oso ben moe foeroe nanga boen sani, sodati den ogri jeje no ben kan kon baka na ini. A no de nofo foe tapoe nanga ogri èn libi wan légi presi — wi moe bigin foe doe boen. Troesoe na fowtoe sani gwe, foe di joe e de bézig nanga boen sani. „Kakafoetoe gi Didibri”, Jakobus taki, „èn a sa lon komoto foe joe. Go a Gado èn a sa kon na joe” (Jak. 4:7, 8). De légi de wan kari gi Satan; foeroe na froestan nanga waarheid, de wan kibri. — Fil. 4:8, 9.
NA FANOWDOE FOE TIRI
5. Foe sanede a de moeilek gi foeroe sma foe lési na bijbel èn fa 1900 jari pasa kaba na problema disi ben loesoe gi wan sma?
5 Ini na grontapoe foe religie nanga filosofie a de now wan broeja foe prakseri di de kontra makandra foe san de boen nanga ogri. Son sma ini na soekoe di den e soekoe e lési na bijbel, ma den e feni na boekoe disi moeilek. Den no de den fosiwan di e miti disi. Tina-négi-ondro jari pasa kaba wan Etiopiaman ben lési ini na boekoe Jesaja, di a rij ini en wagi. Na evangelie-prékiman „Filippus waka esi sé na wagi èn jere en lési tranga na proféti Jesaja, èn a taki: ’Joe sabi san joe e lési?’ A taki: ’Fa mi ben sa man oiti, efoe wan sma no sori mi a pasi?’” Filippus go sdon ini na wagi èn jepi en ala di a de rij. — Tori foe den Apostel 8:26-35; 21:8.
6. Pe wi kan froewakti foe feni disi ten „Filippus” èn pe wi no kan feni den?
6 Pe, den „Filippus” de foe now di abi na koni foe sori tra sma na pasi, sodati tapoe a gron foe na bijbel den kan si sortoe libifasi e tjari wan boen nen na Gado? No ini den gevestigde, respeki, orthodoxe religie foe na kristenheid, soleki wan sma kande ben sa froewakti. Filippus no ben de wan prenspari méstri foe wet ofoe Fariséman, ma a ben de wan foe den veragti, ferfolgoe kristensma, di kisi spotoe. Den leri foe na historia e leri wi dati den gevestigde, kerki sistema di sma e teki, foeroe tron teki libisma filosofie èn meki a fowtoe foe kenki den wortoe foe Gado.
7. (a) Tapoe sortoe fasi na Israël foe owroeten ben kenki na Wortoe foe Gado? (b) O fara ini disi ten son kerki nanga kerkimemre ini na kristenheid e waka baka Israël, èn sortoe tekst e poti a wan sé nanga disi?
7 Na naatsi Israël ben abi Jehovah wet, ma den Israëlsma ben kenki na anbegi foe den, foedi den poti na ini en na oeroedoe afkodré foe Baäl-seks-anbegi, di ben doe ini pikin boesi nanga hé presi. Toe Kronieken 33:17 e sori tapoe na moksi disi nanga den wortoe: „Na pipel tan tjari srakti-ofrandi ete tapoe den é presi; soso a ben de gi Jehovah, den Gado.” Foe na moksi disi foe na troe nanga na falsi anbegi, meki Elia ben trowe na tjalansi disi na fesi foe Israël: „Olanga ete oen sa tan tinga tapoe toe difrenti prakseri? Efoe Jehovah de na troe Gado, waka na en baka; ma efoe a de Baäl, go waka na en baka” (1 Kon. 18:21). Foeroe kerki nanga kerki-memre e opo densrefi gi pornografie (fisti boekoe), films, pe seks e sori di no mag, seks bifo joe trow, soetadoe nanga homoseksualiteit — srefi na wan fasi dati den e loekoe pasa den sani disi di Gado no wani èn di densrefi e doe. — Rom. 1:26, 27, 32; 1 Kor. 6:9, 10; Openb. 21:8.
8. Fa na naatsi Juda ben kenki Gado Wortoe agen baka di den ben drai komoto foe katibo foe Babylon — aladi a ben de ini wan tra fasi?
8 Foe den sortoe oeroedoe ede, meki Juda ben go ini bo ini Babylon. Di na naatsi drai kon baka, agen a kenki a Wortoe foe Gado — a tron disi no nanga afkodré seks-anbegi, ma foe moksi na ini libisma gwenti nanga filosofie. Na foe disi meki Jezus kroetoe den kerki tiriman foe den, den méstri foe wet nanga Fariséman, nanga den wortoe: „Foe sanede joe e pasa toe na komando foe Gado foe joe overlevering ede? Oen falsi soema, Jesaja eri boen ben taki na fesi foe oenoe, di a taki: ’A pipel disi e gi mi grani nanga den mofoboeba ma na ati foe den de farawe foe mi. A foe soso den e tan dini mi, foedi den e leri libisma komando leki kerki-leri.’” — Matt. 15:3, 7-9.
9. A sortoe krakti fasi Paulus gersi nanga makandra kroeked win-seriman nanga ontrow religie-sma?
9 Paulus na publiki ben kroetoe na pori foe Gado Wortoe nanga den filosofie foe libisma di a taki: „Wi ben broko nanga den bakabaka sani di wan sma moe sjen foe den, foe di wi no e waka nanga triki ofoe foe kenki na wortoe foe Gado.” Ini na ten dati kroeked win-seri-man ben poti boenkopoe dringi ofoe srefi watra ini den win foe den foe meki a kon moro foeroe èn wroko moro moni. Na a srefi fasi boen foeroe kerkisma ben poti libisma gwenti nanga filosofie na a Wortoe foe Gado, sodati a ben sa de moro switi gi grontapoe sma. Ma Paulus no ben doe dati! „Wi no de seriman foe na wortoe foe Gado, soleki foeroe soema”, a ben taki, „ma leki ini opregti fasi, ja, leki Gado ben seni wi, ondro na ai foe Gado, ini matifasi nanga Kristus, wi e taki.” — 2 Kor. 4:2; 2:17.
10. Sortoe warskow na apostel Paulus ben gi, èn fa disi no de wan falsi alarm?
10 Paulus ben warskow dati na kristendom ben sa fadon komoto na bribi, èn ini na di foe fo eeuw G.T. nanga na doe foe na Romein keizer Constatijn, a ben kenki tapoe wan fasi di ben de krin foe si (Tori foe den Apostel 20:29, 30). Leki wan bakapisi foe disi wan smelter kon makandra ben kon foe na kristendom nanga demon leri di ben abi den bigin ini Egypte nanga Babylon — Dri-wan-gado, sili di no e dede noiti, hel-faja, vagevuur, begi gi dedesma, a gebroiki foe rowskransi, nanga so moro fara. Den leri disi no de ini na bijbel, ma den de ini den geloofsbelijdenis foe den sokari kristen kerki. Den de ini den te nanga na dé foe tide. Boiti dati, den kerki foe na kristenheid foe disi ten e kenki moro fara ete na Wortoe foe Gado: den poti na ini na é kritiek, di e soekoe foe brokosaka a troefasi foe bijbel, èn na wetenschappelek evolutietheorie, di e taki dati Gado no de na Mekiman foe hemel nanga grontapoe nanga na libi!
11. Sortoe difrenti fasi nanga overtoigi e marki den disiten „Filippus” leki boen tjariman?
11 Soema de foe datede den disiten „Filippus” di de boen tjariman? Den sma di e bribi dati na bijbel de na Wortoe foe Gado di santa jeje skrifi; di e si en leki wan lampoe gi den foetoe èn leki wan leti tapoe den pasi; di no e poti noti na ini èn no o poeroe wan sani na ini; di e meki Gado nanga en Wortoe de troe; wansi nanga dati „ibri sma e tron wan léman”; di e gi densrefi krinkrin „foe préki (na publiki) na boen njoensoe disi foe na kownoekondre tapoe a eri grontapoe leki wan kotoigi” (2 Tim. 3:16; Ps. 119:105; Deut. 4:2; Rom. 3:4; Matt. 24:14). Den e gebroiki na bijbel leki na autoriteit foe den èn gi den sma di ben arki en tranga foe loekoe san den e taki èn no foe foertrow tapoe a wortoe foe den, ma foe teki Gado Wortoe wawan leki na sani di abi makti (Tori foe den Apostel 17:11). Joe wani meki wan nen na Gado dan joe moe poti na prakseri foe de so wan getrow tjariman, „de alaten klari foe gi frantwortoe na ibri sma di e aksi foe joe wan reden foe na owpoe di de ini joe, ma doe disi nanga safrifasi èn dipi respeki”. Ofoe soleki Paulus taki: „Sabi fa foe gi ibri sma wan piki.” — 1 Petr. 3:15; Kol. 4:6.
DEN SMA DI WI MOE DE
12. San de moro prenspari gi joe leki soso foe préki Gado Wortoe èn préki disi gi trawan?
12 Efoe wi wani meki wan boen nen na Gado, dan a no nofo foe stoederi èn leri piki. Na a fosi presi wi moe tjari na sabi disi kon tapoe wisrefi. Foe njan boen wisrefi foe Gado Wortoe, dan wi moe „teki en na ati”, leki a man ini owroeten Israël ini na oso foe low (Pred. 7:2, AV). „Ma joe di e leri wan trawan, joe no e leri joesrefi? Joe di e taki: ’No foefoeroe’, joe e foefoeroe? Joe di e taki: ’No doe soetadoe’, joe e doe soetadoe? Srefi na apostel Paulus ben verklari: „Mi de dwengi mi skin èn mi e tjari en leki wan srafoe, foe no poti na wan sé tapoe wan ofoe tra fasi, baka te mi ben préki gi tra sma” (Rom. 2:21, 22; 1 Kor. 9:27). A de go foe wan moro fundamenteel sani leki san wi e doe wawan. Na aksi de: San wi de? Fa a de „nanga na inisé soema foe na ati”? „O sortoe soema wi moe de?” — 1 Petr. 3:4; 2 Petr. 3:11
13. Fa Jehovah ben poti na prakseri foe Samuël kon reti ini na kroetoe foe sma?
13 San wi de, no e bepaal nanga san wi de na dorosé. Na proféti Samuël ben seni go na Isaï foe salfoe wan foe en pikin foe tron kownoe foe Israël. Samuël ben froewondroe foe na ipsi fosi manpikin, ma Jehovah taigi Samuël: „No loekoe fa a tan èn en bigi skin, bikasi mi ben trowe en. Bikasi Gado no e si soleki na libisma e si, bikasi na libisoema e si san na ai e si; ma foe Jehovah sé, a de si fa na ati de.” — 1 Sam. 16:7.
14. Sortoe bewijsi e gi moro ete, di e sori dati ai kan kori èn san de moro prenspari?
14 Ai kan kori. Jezus taki dati méstri foe wet nanga Fariséman na dorosé ben loekoe regtvaardiki, ma na inisé den ben pori (Matt. 23:3, 27, 28). Den djoe ini Paulus ten prakseri dati na dorosé marki foe na besnijdenis ben sa ferloesoe den, ma Paulus taki: „No en na wan djoe di de dati na dorosé, na so besnijdenis no de san de na dorosé, na a skin. Ma en na wan djoe di de dati na inisé èn na besnijdenis foe en de di foe na ati” (Rom. 2:28, 29). Èn Paulus kari bigi sani di a ben sa kan doe èn a ben taki moro fara: „Ma efoe mi no abi lobi, dan a no de jepi mi kwetkweti”. Wans san wi e doe toe foe meki wan boen nen na Gado, a moe pasa nanga lobi. „Mi, Jehovah, e ondrosoekoe na ati.” — 1 Kor. 13:1-3; Jer. 17:10.
15. O sortoe foe soema wi moe de?
15 O sortoe soema wi moe de dan? Na apostel Paulus e gi moi bigi lijst foe komando èn sani di no moe doe:
„Joe lobi moe de sondro falsi fasi. Abi wan tegoe gi sani di ogri, anga san boen. Ini brada lobi abi safoe lobifasi gi makandra. Teki fesi ini a sori foe respeki gi makandra. No doe joe wroko loboso. De faja ini jeje. Dini Jehovah leki srafoe. Prisiri ini na owpoe di de na joe fesi. Ori doro ini benawtoe. Ori doro ini begi. Prati afoe nanga den santawan ini san den abi fanowdoe. Waka na pasi foe lobi teki sma na oso. Tan blesi den di e ferfolgoe joe. Blesi èn no floekoe. Prisiri nanga sma di e prisiri; kré nanga sma di e kré. De nanga tra sma a srefi leki nanga joesrefi; no prakseri é sani, ma meki lagi sani tjari joe. No de koni ini égi ai. No pai nowan sma ogri nanga ogri. Sorgoe foe toemsi boen sani na fesi foe ala sma. De, efoe a de anga foe joe, ini vréde nanga ala sma. No teki refrensi gi joesrefi, lobiwan, ma gi pasi na na atibron; bika a ben skrifi: ’Refrensi na foe mi; mi sa pai, Jehovah e taki.’ No meki ogri wini joe, ma tan wini na ogri nanga doe boen.” — Rom. 12:9-19, 21.
16. Foe san wi moe wai komoto na en pasi, èn san wi moe soekoe?
16 Den sortoe soema dati wi moe de! A ben sa de wan skreki sani efoe Gado sari-ati no ben sa de te ini wi swakifasi wi misi a marki. Djaso wan bigi fonten foe jepi de: de makandra nanga soema di abi densrefi marki na prakseri. „Na soema di e waka nanga konisma, sa kon koni, ma soema e bemoei nanga soema sondro froestan, a sa go takroe nanga en.” „No kori oensrefi. Takroe demakandra e pori boen gwenti.” Wai komoto foe na pasi foe na oeroedoe grontapoemakti, foe falsi religie, di e kenki Gado Wortoe. „Komoto na en mindri, mi pipel, efoe joe no wani abi wan pisi ini en sondoe.” Na konsensi foe en bron, sodati a no kan firi fowtoe moro, aladi na sondoe foe en é go te na hemel. A de tjari ensrefi leki wan letterlijk oeroe-oema: „Loekoe na pasi dja foe wan oeroe oema: a ben njan èn a ben figi en mofo èn a ben taki: ’Mi no ben doe no wan fowtoe sani.’” A de soboen toemsi prenspari foe kisi krakti nanga a de makandra nanga den soema di wani meki wan boen nen na Gado, „no libi den konmakandra foe wi, soleki son soema abi na gwenti”. — Spr. 13:20; 1 Kor. 15:33; Openb. 18:4; Spr. 30:20; Hebr. 10:25.
NOW NA TEN DORO DATI JOE KAN DOE WAN SANI
17, 18. Tapoe san wi moe poti wisrefi na en tapoe, èn foe sanede disi no moe poti na wan tra ten?
17 Te na kaba foe Satan ogri seti e kon krosibé, meki wi poti wisrefi a tapoe foe ’sortoe soema wi moe de’, fa wi moe kenki wi froestan, fa wi moe poeroe na owroe égifasi èn weri na njoenwan èn fa wi bow wan boen nen na Gado, ’sodati na dé foe wi dede, de moro boen leki na dé foe wi gebortoe’ (Pred. 7:1, AV). Ofoe dati na dé foe dede no sa doro kwetkweti, soleki disi de gi den di e owpoe foe kisi na paradijs.
18 Ma kande joe e prakseri dati na kaba, ben moe de kaba ini a ten disi. Joe e bribi taki Masra ben poti na kon-baka foe en na wan tra ten? Joe e bigin foe meki joe anoe saka, sodati joe no e teki prati moro na a toemsi prenspari préki foe Gado kownoekondre, ofoe srefi e drifi gwe foe di joe gi joesrefi abra na takroedoe? Wans oten na kaba e kon, now a de na ten pe joe anoe moe doe san a feni foe doe foe meki wan boen nen. Na wi alamala a kan de so dati tamara wi no de moro. Wi de leki wan bromki di e flaw, wan smoko di e gwe, wan skaduw di e waka gwe (Job 14:1, 2; Jak. 4:14). Prediker 9:12 e warskow: „Libisma no sabi ooktoe en ten. Ne leki fisi di e kisi ini wan takroe srepi, èn leki fowroe di e fanga ini wan krafana, na so libisoemapikin e fanga ini wan takroe ten, disi kon wantenwanten a den tapoe.”
19, 20. (a) San e aksi moro foe wi, boiti dati wi e libi now wan moreel krin libi? (b) Foe sanede a de now tranga fanowdoe foe handel?
19 Wi moe doe moro leki na jongoeman di ben kon na Jezus èn aksi fa a kan kisi tego libi. A de krin dati a ben libi wan krin moreel libi, ma dati no ben nofo. Moro fara, Jezus taigi en: „Kon, de mi foetoeboi.” Jezus de na eksempre (Matt. 19:16-22; 1 Petr. 2:21). En égi libi no ben de wawan akroederi nanga Gado wet tapoe na kontren foe libi nanga waka, ma a ben meki sosrefi toe bekenti „na boen njoensoe foe na kownoekondre”. „Abi berow”, a taki, bikasi „na kownoekondre foe hemel de krosibé.” A „bigin foe waka lontoe ala foto nanga dorpoe, aladi a leri sma ini den konmakandra-presi foe den èn préki na boen njoensoe foe na kownoekondre” (Matt. 4:17; 9:35). Ipi-sma wani foe a tan moro langa èn proberi foe ori en, a taki: „Mi moe meki na boen njoensoe foe na kownoekondre foe Gado bekenti gi tra foto, bika na foe dati mi ben seni kon.” Di a si den ipi-sma di na jeje fasi „ben pina èn panja”, a kisi sari foe den, foe di den ben de leki skapoe sondro herder. Èn a ben bigin foe leri den foeroe sani” (Luk. 4:43; Matt. 9:36; Mark. 6:34). A seni en discipel go foe préki èn a komanderi den: „Préki tapoe joe waka èn e taki: ’Na kownoekondre foe hemel kon krosibé.’” — Matt. 10:7, 8.
20 Wi e libi now ini den takroe ten foe den laatste dé foe na seti foe Satan. „Na ten di abra ete kon de sjatoe.” A de tranga fanowdoe dati wi meki „na boen njoensoe” bekenti (1 Kor. 7:29; 9:16). Now a de na ten di taki na fesi, pe na „boen njoensoe disi foe na kownoekondre e préki na a eri grontapoe bifo na kaba kon” (Matteus 24:14). Wansi sortoe ten toe na ten foe Jehovah foe na kaba foe na ogri seti disi mag doro, no frigiti noiti disi: NOW, ala di joe e libi, NOW, bifo na dede kande kon na joe tapoe onfroewakti, NOW a de gi joe na ten foe abi wan prati na a préki foe na „boen njoensoe” èn meki wan boen nen na Gado!