Kotoigi te na a moro farawe pisi foe grontapoe
1. San ben de wan foe den moro bigi momenti ini na historia foe na libisma-famiri?
A BEN de sondro degedege wan foe den moro bigi momenti ini na historia foe na libisma-famiri. Noiti ete sowan gi adjosi ben de nanga someni firi. Na Manpikin foe Gado ben de tapoe a punt foe libi en foetoeboi na grontapoe foe no de noiti moro na grontapoe foe en foetoeboi kan si en. Wàn aksi ben kan aksi ete, wan piki ben kan gi ete. Foe sortoe tori? Na laatste takimakandra ben sa abi krakti te go doro na a disiten seti foe sani tapoe Kristus foetoeboi!
2. San de na laatste aksi di ben aksi na Jezus bifo a ben gwe libi grontapoe foe alaten, èn foe sanede meki wi abi belangstelling gi na piki foe en?
2 Na laatste aksi di Jezus discipel ben aksi en, ben de: „Masra, joe e opo ini na ten disi na kownoekondre gi Israël?” Nanga sortoe bewégi foe ati, den ben doe disi precies, e tan wan afersi di wi kan lai soso. Sortoe froewakti den ben abi toe, wan sani de krin: den ben wani sabi oten Gado prakseri ben sa kon troe nanga na kownoekondre. Soema kan mandi den foe dati? Den no ben de den fosiwan èn sosrefi den no ben de den laatste wan di no ben sori pasensi tapoe na tori foe na kriboi kaba. Den wortoe foe Jezus, ja den allerlaatste wortoe bifo a libi grontapoe foe alaten, de foe datede toemsi prenspari gi wi ini disi ten.
KRISTUS ADJOSI-KOMANDO
3, 4. (a) Fa Jezus ben piki? (b) Sortoe toe leri Jezus ben gi en discipel?
3 Jezus ben piki: „A no de gi joe foe kisi sabi foe den ten ofoe pisiten, di na Tata ben poti ini en égi makti, ma joe sa kisi santa jeje, èn joe sa de kotoigi foe mi ini Jeruzalem èn ini eri Judéa èn Samaria èn te na den moro farawe pisi foe grontapoe. A tori e taki moro fara: „Èn baka di a ben taki den sani disi, a ben teki go na loktoe aladi den e loekoe èn wan wolkoe poeroe en foe den ai.” — Tori foe den Apostel 1:6-9.
4 Den adjosiwortoe foe Jezus ben wani taki toe sani. Tactvol a ben taigi en discipel na a fosi presi, ma ete nanga krakti, dati den no ben moe de broko-ede nanga na ten foe a meki kon troe na prakseri foe Jehovah. Na so fasi a ben poti krakti ete wantron tapoe san a ben taki kaba ini en profétitori foe na bosroiti foe na seti foe sani (Matt. 24:36; Mark. 13:32-37). Moro fara a ben sori den nanga san den ben moe broko den ede. Den ben moe de kristen kotoigi, fosi ini Jeruzalem, pe den ben moe tan wan pisi ten (Tori foe den Apostel 1:4), èn moro fara ini eri Judéa èn Samaria, èn te foe kaba „te na den moro farawe pisi foe grontapoe”. Nanga dati ini prakseri den ben sa kisi „krakti” nanga jepi foe santa jeje.
5. Oten Jezus discipel kisi „krakti” èn foe doe san na krakti disi poesoe den?
5 Den ben kisi na „krakti” dati wan nanga afoe wiki bakaten, nanga Pinksteren. Den apostel nanga tra discipel ben tan ini Jeruzalem, èn tapoe na féstidé „den alamala ben kon foeroe nanga santa jeje èn bigin foe taki ini difrenti tongo, soleki na jeje ben gi den foe taki”. Den no taki wan tongo di no wan sma no kan froestan, ma den ben taki „foe den bigi wroko foe Gado”. — Tori foe den Apostel 2:1, 4, 11.
„INI JERUZALEM”
6. Fa den salfoe kristen disi bigin foe doe na komando foe den, ma sortoe gens den ben ondrofeni?
6 Den salfoe kristen disi di ben kisi salfoe pas, bigin wantronwantron foe doe na komando, di den ben kisi foe na Kristus di ben wiki foe dede. Den préki fosi „ini Jeruzalem”, aladi disi no ben de sondro gens. Den kerki nanga borgroe tiriman foe den djoe ben span anoe makandra èn ben taki:
„San wi sa doe nanga den soema disi? Bikasi troetroe wan bigi marki ben doe (na dresi foe wan lanman), di de krin gi ala soema di e libi ini Jeruzalem, èn wi no kan taki dati a no de so. Foe na tori disi no panja go moro fara na mindri a pipel, meki wi taki nanga tranga nanga den taki den no moe taki nanga no wan sma moro tapoe na gron foe na nen disi.” — Tori foe den Apostel 4:16, 17.
7. (a) Fa Kristus discipel ben teki disi? (b) Fa wan kerki feanti gi na bewijsi taki den fosi kristen ben doe den wroko getrow?
7 Kristus ben taki: „Oen sa de mi kotoigi.” Na djoe Sanhedrin ben koemanderi den fosi kristen nanga tranga „foe no taki moro tapoe na gron foe na nen disi”. Soema den gi jesi? Nanga respeki den taigi den moro fara: „Wi no kan tapoe foe taki foe den sani di wi ben si èn jere” (Tori foe den Apostel 4:18-20). Den go doro foe gi kotoigi. Aladi den Apostel ben poti ini doengroe-oso, tokoe den go, baka na wondroe fri na neti, „na a bigin foe na dé inisé foe na tempel èn leri sma” (Tori foe den Apostel 5:21). Fa den ben abi faja! Agen den ben kisi den:
„Den go teki den èn poti den ini na Sanhedrin-zaal. Èn na épriester aksi den èn taki: ’Wi ben taigi oenoe nanga tranga foe no go doro nanga leri foe sma tapoe na gron foe na nen disi, èn loekoe! ete oenoe ben foeroe Jeruzalem nanga na leri foe oen’” (Tori foe den Apostel 5:27, 28).
Sondro foe sabi den kerki bigiman disi kotoigi taki den fositen kristen disi ben doe getrow na fosi pisi foe na komando foe Kristus. Den ben de faja kotoigi foe en „ini Jeruzalem”.
8. Na sortoe fasi den kristensma ben foeroe Jeruzalem nanga a leri foe den, èn sortoe winimarki den ben abi?
8 Baka di den kisi wipi nanga na komando „foe no préki moro tapoe na gron foe Jezus nen”, den kristen disi komoto gwe „foe na Sanhedrin, nanga prisiri taki den ben warti foe njan pina foe en nen ede”. Na presi taki den ben lasi ati, „den tan sondro foe tapoe ibri dé ini a tempel èn oso foe oso foe leri èn foe meki bekenti na boen njoensoe foe na Kristus, Jezus” (Tori foe den Apostel 5:40-42). Loekoe taki den „tan” go doro „oso foe oso” foe gi kotoigi. Na a fasi dati den ben man nanga na pikin nomroe sma foe den foe „foeroe Jeruzalem nanga den leri foe den”. Na fasi disi ben tjari toemsi moi froktoe kon. „A so na wortoe foe Gado tan gro, èn a nomroe foe discipel ini Jeruzalem tan gro tranga.” — Tori foe den Apostel 6:7.
MORO FARA NA SAMARIA ÈN JUDÉA
9. Ondro sortoe omstandigheden na kotoigiwroko doro Judéa nanga Samaria?
9 Den fosi kristen no ben kan tapoe nanga den wroko tapoe a punt disi. Sosrefi toe den moe de kotoigi foe Kristus „ini eri Judéa nanga Samaria”, foe troe, a faja foe den ini a doe foe na fosi pisi foe na wroko foe den, troesoe den foe doe na tweede pisi foe na kristen wroko foe den. Na gens foe na kotoigiwroko foe den ini Jeruzalem doro wan émarki nanga na kiri foe Stéfanus, èn nanga dati wan skwala foe ferfolgoe kon tapoe na gemeente foe kristen kotoigi ini Jeruzalem. A takroedoe gens disi ben abi leki marki foe stop den kotoigi disi foe Kristus. Na presi foe dati na kotoigiwroko ben kisi wan njoen poesoe èn panja ensrefi go joisti na den presi pe Kristus joisti wani a moe doe. „Alamala ben panja go na den kontren foe Judéa èn Samaria boiti den apostel.” Èn san den kristen dati di ben panja gwe nanga na ferfolgoe ben doe ini den kontren dati? „Den ben waka pasa na kondre èn meki a boen njoensoe bekenti foe na wortoe”. — Tori foe den Apostel kapitel 7; 8:1, 4.
10. San den apostel doe di den kon sabi taki „Samaria ben teki a wortoe foe Gado”, èn sortoe sroto Petrus ben gebroiki?
10 A no teki langa ofoe „den apostel ini Jeruzalem kon sabi taki Samaria ben teki na wortoe foe Gado”. Den apostel doe wan sani na a situwasi nanga na seni foe toe sma a den mindri go, Petrus nanga Johannes, foe meki na boen njoensoe kon stéfi foe gi ferfolgoe kristen di ben panja — soleki na evangelie-prékiman Filippus. Aladi Petrus gebroiki na reti di Kristus ben gi en, a opo gi den Samariasma na okasi foe tron salfoe kristen di kon gebore njoen nanga jeje, èn di ben kisi na kari foe abi makandra nanga Kristus wan prati na a „kownoekondre foe hemel” (Matt. 16:18, 19; Tori foe den Apostel 8:14-17). Na tori ini Tori foe den Apostel e go moro fara nanga den wortoe: „Di den ben gi kotoigi finifini èn den ben taki na wortoe foe Jehovah, dan (den ben meki) bekenti na boen njoensoe na foeroe dorpoe foe den Samariasma” (Tori foe den Apostel 8:25). Te so fara foe Samaria.
11. Sortoe bewijsi de, taki „eri Judéa” kisi wan toemsi moi kotoigi?
11 Foe taki foe Judéa, sondro degedege foeroe Judéasma ben de ini Jeruzalem na Pinksteren di ben kisi kotoigi foe den kristen di ben kisi pas salfoe èn spesroetoe foe Petrus (Tori foe den Apostel 2:9, 14-36). Wi sabi sosrefi toe dati bifo na skwala foe ferfolgoe ben broko loesoe tapoe den kristen ini Jeruzalem, na ipi foe sma „tan komoto foe den foto lontoe Jeruzalem, èn den tjari sikiman nanga den èn sma di ogri jeje ben trobi, èn alamala sondro foe poeroe wan ben kon gosontoe” (Tori foe den Apostel 5:16). Ala den sma disi foe Judéa kisi na kotoigi foe Jezus. Lukas skrifi foe a pisi ten baka na bekering foe Paulus: „Dan na gemeente ini eri Judéa nanga Galiléa nanga Samaria ben kisi wan pisi ten foe vréde èn den ben kisi tranga” (Tori foe den Apostel 9:31). So wan tina-féfi jari na baka, Paulus ben kan skrifi gi kristensma ini Thessalonika: „Bikasi brada, oen ben waka baka den gemeente foe Gado di de ini Judéa” (1 Thess. 2:14). Den fosi kristen séker ben doe na wroko di Kristus ben gi den foe gi kotoigi foe en „ini Jeruzalem nanga eri Judéa nanga Samaria”.
„TE NA A KABA FOE GRONTAPOE”
12. Fa siri ben prani tapoe na Pinksterdé foe moro soema kon ini na ten na fesi?
12 Ma Jezus adjosi-komando ben wani taki moro ete. „Oen sa de kotoigi foe mi ini Jeruzalem, nanga eri Judéa nanga Samaria, èn te na a kaba foe grontapoe” (Tori foe den Apostel 1:8; Petrus Canisiusvertaling). Bewijsi de taki na mindri den djoe foe na diàspora biten kaba kotoigi ben gi foe Kristus nen, srefi bifo 36 G.T. — na jari di Petrus ben gebroiki agen na reti di Kristus ben gi, na tron disi foe opo na kownoekondre gi den sma di no besnij (Matt. 16:18, 19; Tori foe den Apostel kapitel 10). Den 3000 djoe nanga proselietsma di ben tron tapoe na pinksterdé foe a jari 33 G.T. dopoe kristensma, no ben de tog soso sma foe Jeruzalem nanga Judéa. Foeroe foe den ben komoto foe den sortoe farawe presi leki Parthië, Medië, Elam nanga Mesopotamië (a disiten Iran nanga Irak), Pikin Azië, (na disiten Turkije), Noord-Afrika nanga Italië (Tori foe den Apostel 2:8-11). Di den kristen disi di ben bekeer pas drai go baka na den égi kondre ini den dri pisi foe grontapoe Azië, Afrika nanga Europa, den ben gi séker kotoigi foe Kristus nen, op zijn minst na tra djoe nanga proselietsma ini den difrenti kondre. Na so fasi nanga Pinksteren kaba siri ben prani foe sma kon moro foeroe ini na ten na fesi.
13. San e sori taki na kristen kotoigi ben gi biten na dorosé foe Judéa nanga Samria?
13 Boiti dati, wi e lési ini Tori foe den Apostel 11:19: „Den dan di ben panja leki wan bakapisi foe na benawtoe di ben kon foe Stéfanus ede (wan pisi ten baka Pinksteren, ma bifo na bekering foe Paulus ini 34 ofoe 35 G.T.) ben ari go moro fara na Fenicië nanga Cyprus nanga (Syrisch) Antiochië, ma no ben taki na wortoe na nowan soema leki gi djoe.” Disi e gi wan definitief bewijsi dati srefi bifo na préki ben opo gi den sma di no de djoe, farawe foe Judéa nanga Samaria kotoigi foe Kristus ben gi.
14. Pe na systematisch kotoigiwroko na mindri den sma di besnij ben bigin fa a sori krin? Verklari disi.
14 So esi leki Petrus ini 36 G.T. ben gebroiki ete wan foe den „sroto foe na Kownoekondre foe hemel” foe opo Kownoekondre-afersi gi den sma di no besnij, na pasi ben opo foe meki na kristen kotoigiwroko panja go na ala volkoe, ja te „na a kaba foe grontapoe”! (PC) Na systematisch kotoigiwroko na mindri den heiden bigin, èn dati de krin, ini Syrisch Antiochië, ini na ten dati, boiti toe tra foto, Rome èn Alexandrië ben de a moro bigi foto foe grontapoe. A ben go so: wan pisi ten baka 36 G.T., ma bifo 44 G.T. „wantoe man (kristensma) foe Cyprus nanga Cyrene (ini Noord-Afrika), di, na a ten di den ben kon na Antiochië, ben taki na den sma di e taki Griki tongo èn meki na boen njoensoe foe na Masra Jezus bekenti. Boiti dati, na anoe foe Jehovah ben de nanga den, èn wan bigi nomroe ben tron bribisma èn drai kon na Masra”. — Tori foe den Apostel 11:20, 21.
15. (a) San na gemeente ini Jeruzalem doe nanga na njoen situwasi disi, èn foe sainde a bosroiti foe den ben de wan boen wan? (b) San Paulus ben doe ini den jari di ben pasa? (c) Foe sainde na tori foe na fosten gemeente ini Antiochië de prenspari?
15 Na faja prékiwroko di den kristen disi foe Cyprus nanga Cyrene ben doe na mindri sma di no ben de djoe, Jehovah ben blesi. „Na gemeente di ben de ini Jeruzalem” ben seni wan spesroetoe vertegenwoordiger go na Syrië ini na noordsé foe seti na njoen situwasi disi tapoe joisti fasi. Den ben teki Barnabas, di srefi ben de wan djoe foe Cyprus di ben taki Griki tongo. Baka di Barnabas ben gi tranga na den njoen discipel disi foe Kristus, a go na Tarsus foe teki Paulus, di ben préki srefi difrenti jari baka makandra „na boen njoensoe foe na bribi” ini Syrië nanga Cicilië — now zuid-oost Turkije (Teki gersi Tori foe den Apostél 9:26-30 nanga Galaten 1:18-23). „So a ben pasa dati den (Barnabas nanga Paulus) ben konmakandra nanga den ini na gemeente (di ben abi djoe nanga heiden na ini) foe wan eri jari (kande so wan 45 G.T) èn ben gi na bigi ipi leri, èn a ben de foe na fosi tron ini Antiochië dati nanga na voorzienigheid foe Gado den ben kisi na nen kristensma.” — Tori foe den Apostel 11:22-26.
16, 17. (a) Fa na kotoigiwroko ben panja ensrefi komoto foe Syrisch Antiochië? (b) Sortoe profétitori Paulus nanga Barnabas gebroiki foe gi frantwortoe foe den activiteit èn tapoe soema na profétitori disi ben kon troe na a bigin? (c) Fa disi e tjari leti kon (. . .)?
16 So wan tin jari langa Syrisch Antiochië ben tron wan centrum, pe ondro na tiri foe santa jeje zendingwroko ben doe (Tori foe den Apostel 13:1-4; 14:26; 15:35, 36; 18:22, 23). Paulus, makandra nanga difrenti kompe-zendeling meki dri boen bigi prékiwaka, di panja na kristendom ini Pikin-Azië nanga Grikikondre. Na wan seker okasi Paulus nanga Barnabas frantwortoe a doe disi na fesi foe wan groepoe djoe di ben atibron, nanga den wortoe:
„A ben de fanowdoe dati na wortoe foe Gado ben taki fosi gi oenoe. Ma foedi oen e troesoe en poeroe foe oen èn oen no e feni a tego libi warti gi oensrefi, loekoe! wi e drai go na den naatsi. Te joe loekoe en boen, Jehovah ben poti na komando disi gi wi nanga den wortoe: ’Mi ben poti joe leki wan leti foe den naatsi, sodati te na a moro farawe oekoe foe grontapoe jepi ben sa de.’”
Lukas e taki moro foe disi: „Di den soema di ben de foe den naatsi jere disi, den prisiri èn gi na wortoe foe Jehovah grani, èn ala sma di abi na joisti fasi foe tego libi, ben tron bribiman.” — Tori foe den Apostel 13:46-48.
17 Foedi den gebroiki den profétitori foe na Messiaanse Knekti (Jes. 42:6; 49:6) èn tjari disi kon tapoe den égi activiteit, dan Paulus nanga Barnabas sori dati den nanga den kompe-kristen foe den foe troe „ben teki presi foe Kristus”, di ben kisi foe Jehovah na komando foe tjari „leti” nanga „ferloesoe” go „te na a moro farawe oekoe foe grontapoe”. Kristus foe en sé ben gi en foetoeboi na komando foe de kotoigi „te na a moro farawe pisi foe grontapoe”. — 2 Kor. 5:20; Tori foe den Apostel 1:8; teki gersi Jesaja 49:5-9 nanga Lukas 2:25-52.
WAN LANGA-TEN KOMANDO
18. San wi sabi foe den moeiti foe den fosi kristensma foe de kotoigi „te na a moro farawe pisi foe grontapoe”?
18 Soleki wi ben si, dan a boekoe Tori foe den Apostel e sori na faja di den apostel nanga fosi kristen ben doe na komando di Kristus ben gi den, foedi den gi kotoigi ini Jeruzalem, Judéa, Samaria èn so fara leki den ben kan go „te na a kaba foe grontapoe”. Foe eksempre, wi sabi dati na apostel Petrus ben de wan getrow kotoigi foe Kristus te fara ini na foto Babylon di didon ini ostoesé èn dati Paulus ben gi kotoigi te ini Italië ini westsé èn kande srefi ini Spanje. — 1 Petr. 5:13; Tori foe den Apostel kapitel 28; Rom. 15:23-28.
19. Ma san e sori dati Kristus adjosi-komando ben sa go doro te na disi ten èn sortoe aksi e kon?
19 Ma a de krin dati na komando foe Kristus adjosi foe de kotoigi „te na a moro farawe pisi foe grontapoe”, ben go moro fara. Akroederi nanga Jezus égi profétitori na komando disi ben go moro fara leki na ten foe den apostel, èn wel „te na a besroiti foe na seti foe sani” (Matt. 24:3, 14). Ma a de wan sani di e gi deki-ati èn di e tranga bribi foe loekoe na toemsi moi eksempre, di den fositen kristensma ben gi. Na aksi e kon now: Soema ini disi ten e go doro nanga na wroko, di den apostel ben bigin, èn sortoe wrokosani den ben gebroiki foe de kotoigi foe Kristus nanga en hemel Tata „te na a moro fara pisi foe grontapoe”? Disi wi sa si ini na tra artikel.