Den winimarki nanga okasi foe na fasi foe de joe wawan sondro foe trow
1. Fa foeroe sma e denki foe na fasi foe de en wawan sondro foe trow èn fa a doe kon dati den e denki so?
WAN 21-jari skoromisi ben kisi na aksi foe wan moro owroe mati foe en: „Joe no ben sa wani trow?” Na jongoe skoromisi di ben froestan den winimarki foe de en wawan sondro foe trow ben piki: „Mi denki dati noiti mi ben prakseri dipi foe na tori disi.” Froewondroe foe a piki foe en, na mati ben piki: „Ma efi djonsro joe kon moro owroe, dan seker joe ben sa wani dati joe ben prakseri foe en. Ala sma sa moesoe trow.” Efi joe hori ini prakseri dati foeroe dienstknekti foe Gado trow, dan joe sa kan froestan foe san ede foeroe sma, soleki na mati disi di ben mène en boen, e firi dati na fasi foe de en wawan sondro foe trow de wan fasi foe no wani èn di e meki wan sma misi wan sani ini en libi.
2. Foe san ede ala toe, den kristen di no trow èn den di trow moe abi belangstelling gi a tori di wi e taki dja?
2 Wan sma kan de en wawan èn no trow, foe di a jongoe toemsi ofoe na a tra sé no man foe teki na frantwortoe foe na trowlibi na en tapoe. Tra sma ben lasi den trowpatna leki wan bakapisi foe brokotrow ofoe na dede. Ini den Verenigde Staten foe Amerkankondre a de so now dati wan foe den 3 osofamiri de wan osofamiri nanga wan osofamiri. Ini soso wan pisi ten foe tin jari na nomroe foe sma di e libi den wawan kon moro foeroe nanga 64 procent. Soboen, na kans de bigi dati, wansi joe no de joe wawan sondro foe trow, wan sma krosbé ini joe birti . . . de disi wel. Fa joe leki wan kristen di trow, kan sori moro „firi” gi den sma di de den wawan èn no trow èn di de wan prenspari pisi foe na osofamiri foe Gado? Efoe joe de joe wawan èn no trow, dan a no de foe taki, dati joe sabi sortoe moeilijkheid a de tjari foe de kolokoe ini wan libimakandra pe na trowlibi de leki wan wet. Fa joe moe si na fasi foe de joe wawan sondro foe trow? — 1 Petr. 3:8.
3. (a) Fa den ben si na libi foe de en wawan sondro foe trow ini Jezus ten? (b) Fa Jezus ben si disi foe „na boen foe na kownoekondre”?
3 Jezus Kristus ben tjari kon na krin dati na fasi foe de en wawan sondro foe trow de „foe a boen foe na kownoekondre foe hemel” leki wan presenti foe Gado. Disi ben de wan heri njoen prakseri, bikasi na mindri den djoe foe en ten den sma ben si na trowlibi leki „wan universele verprekti” èn na fasi foe de en wawan sondro foe trow leki wan sjen. „A sma di no abi wan oema, no de wan troetroe man” , ben de wan foe den taki foe den djoe rabbi. Ma Jezus ben gi en discipel dekati foe „meki presi” gi na presenti foe na fasi foe de joe wawan sondro foe trow èn no firi joesrefi verprekti foe trow. — Matt. 19:10-12.
4. Sortoe libifasi foeroe kristen ben teki èn fa den e denki foe den omstandigheden foe den?
4 Na trowlibi nanga na libi pe joe de joe wawan sondro foe trow de ala toe soboen wan presenti foe Gado. Ini na bigin foe na kristendom, èn sosrefi toe ini wi ten, foeroe sma ben feti baka na libi foe de en wawan sondro foe trow „foe na boen foe na kownoekondre.” Na presi dati den e sari foe den omstandigheden foe den, dan foeroe foe den e denki na srefi foe a tori leki na 41 jari kristen oema di no ben trow noiti èn no langa ten pasa kaba ben taki: „Den jari di mi ben libi leki wan sma di de en wawan sondro foe trow, nanga noti foe grontapoe mi ben sa wani kenki den.” Foe san ede foeroe sma e denki so foe a tori?
Moro bigi okasi
5. Fa sma di no trow kan njan boen foe den okasi di den abi foe den omstandigheden foe den ede?
5 Foe den eksempre foe kristen di trow, soleki den apostel foe Jezus, èn sosrefi toe Aquila nanga Priskilla, e sori dati man nanga oema kan gi wan warti bijdrage na a wroko foe Gado (Tori foe den Apostel 18:26-28; 1 Kor. 9:5). Tokoe na apostel Paulus e sori dati wan sma di de en wawan de ini na okasi foe go ini wan moro bigi kontren foe dienst. „A man (ofoe oema) di no trow e broko en ede nanga den sani foe Masra, fa a kan kisi a boen-ati foe na Masra. Ma na man (ofoe oema) di trow e broko en ede nanga den sani foe na grontapoe, fa a kan kisi na boen-ati foe en oema (ofoe man), èn a de prati” (1 Kor. 7:32-34). Wan sma di de en wawan sondro foe trow no de „prati” leki wan baka-pisi foe na frantwortoe foe na trowlibi — di e tjari „benawtoe kon ini a skin” — sodati den e broko den ede nanga jejefasi afersi ofoe den kan gi densrefi krinkrin na disi. Loekoe pikinso o fara santa dienst ben foeroe na libi foe den sma di wi ben kari dja. Na okasi foe teki prati na a dienst foe Gado, ini a fosi presi a prékiwroko, „sondro tra sani kori joe poeroe”, de wan bigi goedoe. Sma di de den wawan sondro foe trow foeroetron abi moro ten foe studeri èn go prakseri dipi foe san joe ben leri. Disi kan meki na „jeje” ofoe na inisé bewégi foe ati kon moro boen, èn ala di a sma e poti ensrefi a tapoe foe de santa „ini skin nanga jeje”, a de kon moro krosbé foe Jehovah. Sondro wan trowpatna foeroe sma e leri foe froetrow hebi tapoe Gado, èn foe loekoe na a tiri èn rai foe en. Kristen di no trow, nofotron kan teki grani foe dienst di man nanga oema no man foe teki. A no wan froewondroe sani dati Jezus ben kari na grani foe tan wan kristen di de en wawan sondro foe trow wan „presenti”! — Matt. 28:19, 20; 1 Kor. 7:28, 35.
6, 7. (a) Na abi foe na presenti foe de en wawan sondro foe trow wani taki dati wan sma no e firi moro gi na tra sekse èn no sa trow noiti? (b) San a wani taki te wan sma „ben teki na besroiti ini en ati”? (c) Sortoe aksi kan de ini na froestan foe son sma di no trow?
6 Den sma di e „meki presi gi na presenti” dati no de noodzakelijkerwijs sma di te joe loekoe den firi foe den abi wan ofoe tra spesroetoe „presenti” di leki wan bakapisi foe dati no e firi moro gi sma foe na tra sekse. Den no meki celibaat-pramisi, leki den noiti sa trow ma ini den ati den ben teki na „besroiti” ofoe ben kon na a „besroiti”, dati den wani meki na fasi foe de den wawan sondro foe trow waka boen toemsi (1 Kor. 7:37). Den sma disi ben wegi ini den ati den winimarki foe na fasi foe de en wawan. Tapoe na gron foe na „bewijsmateriaal” disi na ati foe den e bigin „kroetoe” na fasi foe de en wawan leki wan „presenti” èn den e „meki presi gi en”. — 1 Kor. 7:38.
7 Ma efoe joe ben sa wani trow nanga ala prisiri now? Paulus no ben taki dati a moro betre foe trow leki foe bron foe lostoe? — 1 Kor. 7:9.
Foe san ede so wan krakti lostoe?
8. (a) Foe san ede son jongoe sma di de den wawan sondro foe trow kan abi wan krakti lostoe foe trow? (b) Sortoe winimarki a abi foe poti a trow a wan tra ten te leki wan sma „pasa a bromki foe den jongoe jari”?
8 A de soso wan natuurlijk sani foe wani foe trow. Gado ben meki wi nanga na lostoe dati (Gen. 2:18). Ma wan sma e abi na krakti lostoe disi foe di a de ini a „bromki foe den jongoe jari” te a sekslostoe bigin meki bromki? Paulus ben gi rai foe poti a trow na wan tra ten te leki wan sma ben pasa na pisi ten disi. So wan ten foe wakti kan gersi gi wan jongoe sma wan sani di no kan. Ini na fosi eeuw sosrefi toe son sma ben prakseri dati den ben moesoe foe trow. Ma ala di den ben „soekoe wan oema”, dan trawan, di ben trow, ben proberi foe „kon fri” foe na situwasi foe den! Wansi na trowlibi kan dini leki wan kibri gi hoeroedoe, tokoe a no e loesoe ala problema. Wan 35 jari kristen di no ben trow ben taki: „Te mi leki owroeman e si dati na libi foe sma e maskadreri nanga wan takroe trow, dan disi e meki mi ai krin. Mi no de tégen trow, ma foe mi sé a no de fanowdoe foe feti nanga trow.” Ondrosoekoe foe na wetenschap ben tjari kon na krin dati Amerkan oema di e trow bifo den de 18 jari, 3 tron moro foeroe kans de foe den kisi wan brokotrow leki den sma di e wakti te leki den de 24 jari! Na nomroe foe brokotrow na mindri tini papa de ini Amerkankondre 3 tron moro hé leki gi den sma ini na kondre in algemeen. Jongoe jari pe wan sma de en wawan sondro foe trow kan gebroiki tapoe wan koni fasi foe bow wan boen matifasi nanga Jehovah èn boiti dati foe kweki den égifasi nanga koni di de fanowdoe foe tron wan boen trowpatna. — 1 Kor. 7:27, 36.
9. (a) San son sma ben doe foe di den ben abi fanowdoe foe wan mati, èn foeroetron nanga sortoe bakapisi? (b) Sma di no trow e kon tanapoe na fesi sortoe aksi?
9 Foeroe kristen sma kon owroe sondro foe trow. Baka wan pisi ten, son wan foe den, foe na krakti lostoe ede foe abi wan mati, ben trowe densrefi go ini na trow nanga wan sma di no de ini bribi, foe di den ben abi na prakseri dati a de moro boen foe abi wan patna, soema a de toe, dan foe go ini na libi sondro patna. Tog kande joe sabi sma di ben doe disi èn di ben si soso dati te now ete den de den wawan nanga wan patna nanga soema den no kan abi jeje kontakti. Ma fa wan sma di de en wawan èn di no trow kan „tan faste ini en ati”? — 1 Kor. 7:28, 37, 39.
Njan boen foe wan gi makandra foe dekati
10. Sortoe lostoe na apostel Paulus ben abi akroederi Romeini 1:11, 12 èn fa a ben njan boen foe dati?
10 Kristen di no trow èn di sani e waka boen gi den abi foeroe belangstelling ini tra sma. Na apostel Paulus, wan man di ensrefi no ben trow, ben skrifi: „Mi de angri foe si oenoe foe kan prati nanga oenoe wantoe jejefasi presenti èn meki nanga dati oen kon stanfaste ofoe, moro betre, sodati wan gi makandra foe dekati mag de” (Rom. 1:11, 12). Paulus ben abi foeroe belangstelling gi sma èn a ben wani prati nanga kompe-bribiman „jejefasi presenti”. Leki wan bakapisi foe dati ensrefi ben kisi tranga. A srefi de troe ini disi ten.
11. Sortoe ondrofenitori e sori fa wan sma kan kisi dekati te a de prati „jejefasi presenti” nanga tra sma?
11 Wan 28-jari kristen oema di ben de en wawan èn di no ben trow ben kari wan bigi nomroe foe moro jongoe sisa ini na gemeente kon na en oso foe abi wan prisiri demakandra, nanga na prakseri foe prati nanga den wan „jejefasi presenti” nanga jepi foe gosontoe demakandra. Na dé a baka wán tini ben brasa na sisa disi èn a ben taki: „Joe no kan froestan omeni na prisiri konmakandra ben wani taki gi mi èn fa mi ben abi dekati fanowdoe. Mi ben prakseri dati mi no ben man moro langa foe kakafoetoe gi den problema na oso nanga mi kweki-mama. Now mi abi na firi dati mi man foe kakafoetoe gi den agen.” Di na sisa di no ben trow ben ferteri na ondrofenitori disi, a ben taki, nanga watra na en ai: „Mi no sa frigiti dati noiti. A ben doe mi wan troetroe boen te foe kaba, bikasi mi ben firi so boen foe san a ben taki.” Te wi kweki persoonlek belangstelling gi tra sma foe wi „jejefasi osofamiri” te a fiti, dan disi kan jepi wi foe wini na firi dati wi de wi wawan. Ma a de aksi moeiti foe kweki matifasi di wani taki wan sani. — Mark. 10:29, 30.
12. Sortoe okasi na wroko di de foe a meki foe discipel e gi?
12 Ma boiti den okasi di wan sma abi ini na kristen gemeente foe gi „jejefasi presenti” foeroe okasi sosrefi toe de ini na wroko di de ini na meki foe discipel. Na sma di e gi, foeroetron e kisi kowroe ati, te a de si na go na fesi foe na sma di a de leri èn e si sortoe trowstoe di e tan na bijbel waarheid kan gi. Te joe e teki fesi na a fasi disi ini a sori foe lobi gi sma di de inisé èn dorosé foe Gado osofamiri, dan joe égi libi sa de moro goedoe èn joe sa feni en moro makriki „foe tanapoe faste ini joe ati”. — Rom. 12:2; Pred. 11:1; Luk. 6:38.
Kisi krakti foe tapoesé
13. Fa 2 Timoteus 4:17 kan de spesroetoe gi kristen di no trow?
13 Di na apostel Paulus ben de ini strafoe-oso ini Rome, dan en wawan ben moe kakafoetoe gi wan moeiliki situwasi. A ben skrifi: „Ma na Masra ben tanapoe na mi sé èn ben gi mi krakti” (2 Tim. 4:17). Na krakti disi ben meki Paulus ben man foe tan getrow èn ben fri en, efi letterlek efi na agersi fasi foe „na mofo foe na lew”. Te ini na libi foe joe na agersi fasi „lew” e sori densrefi, joe e go dan na joe lobi Tata foe jepi? Joe e kanti joe ati na en fesi, nanga na sabi dati wansi no wan tra sma de di e froestan joe situwasi, en e froestan san joe abi fanowdoe èn a sa tanapoe na joe sé? — 1 Petr. 5:6-9.
14. (a) Wan sisa di no trow ben moe kakafoetoe gi sortoe druk, èn fa a ben kisi blesi? (b) Sortoe froetrow 1 Korinte 10:13 e gi wi?
14 Wan 53-jari sisa di de en wawan èn di no trow ben broko saka krinkrin di a ben lasi en wroko. „Mi ben begi Jehovah foe jepi mi foe feni wroko foe kan pasa soso na libi. Bifo a kaba foe a wiki ete mi ben abi wan njoen wroko! Foe sensi na dé dati mi ben teki na besroiti foe libi foe na dé èn foe froetrow tapoe a sorgoe foe Jehovah. Noiti a ben libi mi na wan sé.” Ini 1982, baka di a ben pionier 26 jari, Gado ben jere na begi foe en foe abi wan jejefasi trowpatna, foe di a ben tron na oema foe wan opziener di e waka lontoe go na den gemeente èn di en oema ben dede. A de troe dati Jehovah no e jere alaten wi begi tapoe precies den srefi fasi, ma a sa tranga wi, sodati wi kan kakafoetoe gi ala sortoe problema di kande ben tan. — 1 Kor. 10:13.
Dwengi joesrefi
15. (a) San wan sma moe froestan foe basi sekslostoe? (b) Fa Odo kapitel 7 e agersi disi?
15 „Mi abi na firi dati mi no kan tan moro mi wawan”, wan kristen oema ben skrifi. „Mi e feti nanga wan tranga sekslostoe èn omeni jari kaba mi no man foe feni wan boen kristen man. Mi e kisi foe jere dati mi moe go na oso èn moe dwengi misrefi. Ma fa?” A no makriki foe kakafoetoe gi den sortoe firi disi. Foe basi sekslostoe, wan sma di no trow moe froestan oten a moe bigin foe wini disi nanga jepi foe dwengi ensrefi. Ini Odo 7:6-23 wan jonkoeman foe eksempre e lasi ensrefi èn a de meki en sekslostoe basi en krinkrin sodati a „go baka” wan hoeroe-oema. Ma a no ben doro wantronso na marki disi. Sani di ben waka na fesi ben de: (1) a ben waka na neti ini a strati foe na hoeroe-oema, (2) a gi pasi dati a bosi en, (3) a ben arki na den hoeroedoe rai foe en. Ibri stap ben meki a de moro moeiliki gi en foe dwengi ensrefi, te leki wan draibaka no ben kan moro. Sodra a ben si dati a ben wani go doe stap wán, a ben moe stop! — Gal. 5:22, 23.
16. Sortoe fowtoe troe kristen kande kan kan meki wél, wansi a no ben sa waka noiti toe baka na libifasi foe na hoeroedoeman?
16 Nowan enkri troe kristen sa doe letterlek den stap disi foe na man disi, ma fa a de nanga a prakseri foe wan sma? Wan sma ben sa kan bigin ini en prakseri nanga en „foedi a de waka psa na strati go na en oso” bikasi a de tan langa tanapoe na hoeroedoe prakseri? Stop wantronwantron dja nanga na tori! Efoe joe no doe disi, dan disi ben sa kan abi leki bakapisi, dati ini joe ferstan joe e go doe moro stap, soleki masturbatie ofoe te foe kaba hoeroedoe.
17. (a) Foe san ede a de fanowdoe foe anga na skin nanga en lostoe na a postoe? (b) Fa wan kristen e doe disi?
17 Foe di fowtoe lostoe de wan switi sani gi wi onvolmaakti skin, meki dati wi no e libi den makriki. „Den di de foe Kristus, ben anga na skin nanga en lostoe èn gridi winsi na wan postoe” (Gal. 5:24). Na strafoe na wan paal ben de wan ogri-ati èn pina sani. Soboen, opo doe wan sani nanga joesrefi foe „kiri” den sortoe fowtoe lostoe disi — leti na a bigin, bifo den ankra krakti ini joe froestan. Efoe wan tv-programma e bigin foe wiki den sekslostoe, kiri na toestel wantronwantron ofoe teki wantron wan tra programma. De koni nanga film di joe e si ofoe boekoe di joe e lési. Poti prakseri tapoe den takimakandra foe joe èn fa joe e si soema foe na tra sekse. — Matt. 5:28-30; Kol. 3:5.
18. San son kristen ben doe foe kiri sekslostoe èn nanga sortoe bakapisi?
18 Te na ten doro foe persoonlek ofoe gemeente bijbelstudi, wi e kakafoetoe dan gi ibri firi foe no abi trobi nanga den studi disi? Wán kristen di ben doe moeiti foe „anga” no soifri lostoe na „a postoe”, ben dwengi ensrefi, te den firi disi ben de krakti, foe opo tanapoe na neti foe bedi foe lési tranga foe na bijbel èn taki sjatoe san de ini ibri paragraaf, te leki den sortoe firi disi ben kon moro pikinso. Kristen sontron ben dwengi densrefi foe begi Jehovah wantronwantron foe gi jepi. Solanga wan kristen e doe opregti moeiti foe „anga sekslostoe na wan paal”, dan kande seker a no sa fadon go ini hoeroedoe. — Hebr. 4:16.
A de warti gi na moeiti
19. Na matifasi foe wi nanga Gado e anga foe trow ofoe no trow?
19 Na fasi foe de en wawan sondro foe trow „foe na boen foe na kownoekondre” nanga na trowlibi de ala toe presenti foe Gado. Ma ini a tori foe ala toe wan kristen moe doe moeiti foe sani waka boen. Wansi fa wi status de wi kan bow wan krosbé matifasi nanga Gado èn feni kontroe ini na libi. Srefi te soso foe wan pisi ten joe „meki presi” wan sjatoe ten gi na presenti foe na fasi foe de en wawan èn no trow, dan san e teri na dati joe gebroiki na presenti tapoe wan koni fasi.
20. (a) Fa ala lepi kristen moe si na fasi foe de en wawan sondro foe trow? (b) Sortoe djaranti sma di no trow kan abi ini na ten di e kon?
20 Froestan boen dati Jezus ben poti na presenti foe nanga friwani tan en wawan sondro foe trow ini wan boen posisi. Ibri lepi kristen moe denki a srefi foe disi leki Jezus èn no moe si na toestand foe no trow leki wan toestand foe sari wan sma. Jehovah e warderi hé den ofrandi di sma di no trow e tjari di ben teki na besroiti foe doe den sani di a abi prisiri nanga den. (Teki gersi Jesaja 56:4, 5.) Jehovah no sa frigiti den. Foeroe foe den sma di e pasa Armageddon libilibi èn di e kisi na njoen seti, seker sa prisiri densrefi ini na grani foe na trow èn neleki den pikin foe Noach baka na grontapoe froedoe, de ini na okasi foe abi wan prati na a komando foe Gado „foe foeroe na grontapoe” (Gen. 9:1). Disi kan de wan blesi di e kon tapoe den blesi pe soema di no trow e prisiri densrefi now kaba na ini. Ini Gado njoen seti a sa „satisfai na lostoe foe ala san e libi” èn „gi ala sma na begi foe den ati.” Soboen, de seker dati ala sma sa feni troetroe kolokoe akroederi Gado wani ini a ten dati. — Ps. 37:3, 4; 45:16.
21. (a) Fa na skoromisi di wi ben kari a fesi ben gebroiki en libi? (b) Fa tra sma di no trow kan firi densrefi na a srefi fasi?
21 Na fosten skoromisi di wi ben kari ini na fosi paragraaf foe na artikel disi, de now 83 jari, èn te now ete sondro foe trow. 57 jari a ben spen ini a foeroe-ten-kownoekondredienst èn 56 jari foe den disi tapoe na edekantoro foe Jehovah Kotoigi. Fa a de prakseri foe en libi? „Mi de tevréde dorodoro nanga mi libi èn mi wroko. Now mi abi en moro druk leki iniwan ten oiti, ini wan wroko di mi e doe nanga prisiri”, na faja kristen oema disi ben taki. „A no de ati mi. Na srefi besroiti mi ben sa teki agen.” Ja, efoe joe de joe wawan sondro foe trow, dan joe toe kan abi na satisfaksi dati joe ben meki joe libi leki wan sma di no trow, waka boen, te joe gebroiki dorodoro den winimarki nanga okasi foe na fasi foe de en wawan sondro foe trow.
□ Fa wi moe si na fasi foe de en wawan sondro foe trow „foe na boen foe na Kownoekondre”?
□ Sortoe moro bigi okasi de gi kristen di de wawan sondro foe trow?
□ Foe san ede a de moro boen te wan sma no libi esesi a fasi foe de en wawan sondro foe trow?
□ Sortoe dri sani de prenspari gi wan sma di no trow di wani tan faste ini en ati?
[Faki na tapoe bladzijde 226]
WANTOE SMA INI NA BIJBEL DI DE DEN WAWAN SONDRO FOE TROW
Jezus: „Mi njanjan de, dati mi doe na wani foe en di ben seni mi kon èn foe tjari en wroko kon na wan kaba”. — Joh. 4:34
Paulus: „Mi ben dini na Masra leki srafoe èn ben gi kotoigi finifini. Mi no ben si mi sili leki wan diri sani.” — Tori foe den Apostel 20:19-24.
Jeremia: „O Jehovah, mi tranga èn mi fortresi, èn kibri-presi ini den dé foe benawtoe.” — Jer. 16:19.
Jefta oemapikin: „Noiti a ben didon nanga wan man. Ala jari den oema foe Israël ben go na en ini na santa presi foe prijse en.” — Kroetoeman 11:39, 40.
Anna: „A ben de now wan weduwe foe 84 jari, di noiti ben misi foe de ini na tempel, ala di neti nanga dé a ben doe santa dienst nanga faste èn begi.” — Luk. 2:37.
Dorkas: „A ben abi boen wroko pasa marki nanga presenti foe sari-ati.” — Tori foe den Apostel 9:36
[Prenki na tapoe bladzijde 222]
FA WAN SMA KAN TAN FASTE INI EN ATI
1. Span joesrefi tranga ini jeje fasi gi trawan
2. Kisi krakti foe tapoesé te problema e kon moro foeroe
3. Kakafoetoe gi takroe lostoe wantronwantron