’Na wan kibrifasi den sa tjari pori sekte kon!’
„Na mindri foe joe sosrefi toe falsi leriman . . . sa de. Den disi sa tjari na wan kibrifasi pori sekte kon.” — 2 PETRUS 2:1.
1, 2. (a) San ala kerki foe na kristenheid ben de ini na bigin? (b) Sortoe aksi e ferdini foe dat-ede wi prakseri?
ALA kerki foe na kristenheid na a bigin ben de sekte. Sonwan foe den — foe kari na nen na kerki foe Rome èn den nationaal orthodox èn anitiri kerki — e taki dati den de moro prenspari leki den tra so-kari kristelek denominatie, di den e kari na wan wisiwasifasi.
2 Ma son sma ben sa kan poti na aksi: ’Jezus Kristus nanga en getrow apostel ben taki troetroe wan fadon komoto foe na troe kristendom a fesi? Den ben warskow foe a waka na baka foe libisma di ben sa meki sekte? A ben de sowan tinanégi jarhondro psa kaba troetroe fanowdoe dati Jezus troe bakaman ben loekoe boen gi den sortoe firi disi di e tjari pratifasi kon? Èn na a srefi fasi disi foe de na ai de fanowdoe na ini disi ten?’
Fosten lostoe foe opo sekte
3, 4. (a) Sortoe warskow Jezus ben gi, èn san disi wani taki gi na troe kristendom? (b) Sortoe warskow di gersi a wan disi Petrus ben gi?
3 Jezus ben taki na ini en Bergipréki: „Go na ini na smara doro; bika bradi èn bigi [makriki, vertaling foe H. Ogilvie], na pasi de di e go na pori, èn foeroe sma de di e psa go na ini; ma smara na doro de èn nara na pasi di e go na libi, èn pikinso sma de di e feni en. Loekoe boen nanga den falsi proféti, di na ini skapoe boeba e kon na oenoe, ma na inisé den de krasi wolfoe. Na den froktoe oenoe sa kon sabi den” (Matt. 7:13-16). Nono, Jezus Kristus no ben taki dati na troe kristendom ben sa tron wan bradi, makriki, universele ofoe „katholiek religie” di „foeroe” sma ben sa feni boen. A ben sa de wan moeilek smara pasi, di soso „pikinso sma” ben sa feni en. Den „pikinso sma” disi ben kisi a warskow dati „falsi proféti”, di gersi dati den no de kefarlek, ben sa proeberi foe kori den foe go waka a ’makriki’ pasi „di e go na pori”.
4 Moro leki dritenti jari na baka na apostel Petrus ben skrifi: „Ma falsi proféti ben opo tanapoe a mindri na pipel [Israël] soleki na mindri oen toe [kristensma] falsi leriman sa de. Den disi sa tjari na wan kibrifasi pori sekte kon èn den sa taki dati den no sabi na éginari srefi, di ben bai den èn tjari wan esesi pori kon na tapoe densrefi. Boiti dati, foeroe sma sa waka na baka den doe foe den foe loesoe-fasi foe libi, èn foe den ede sma sa taki skempi foe na waarheid. Na bidrigifasi ede den sa soekoe wini na oenoe nanga falsi wortoe.” — 2 Petr. 2:1-3.
5. Oten „wolfoe” di komoto foe bribi ben bigin foe kon na fesi, èn fa den „ben tjari pori sekte kon na wan kibrifasi”?
5 „Na pasi foe waarheid”, na pasi „di e go na libi”, de na pasi foe na troe kristendom. Den „falsi proféti” ofoe „falsi leriman”, den wolfoe na ini skapoe-boeba, di fadon komoto na bribi, èn di ben kon sori densrefi kaba bifo na dede foe Jezus apostel na ondro den fosten kristen (1 Joh. 2:18, 19; 4:1-3). Ooktoe na apostel Paulus ben warskow gi den sortoe „wolfoe disi di e kwinsi sma”. A ben meki wi kon sabi den leki man di „ben sa opo tanapoe èn taki kronkron sani foe hari den discipel na den baka” (Tori. 20:29, 30). Foe sensi na di foe toe afoe foe na fosi jarhondro ’den falsi leriman disi na wan kibrifasi ben tjari pori sekte kon’ èn den ben soekoe wini na den fosi kristen nanga „falsi wortoe”. Foe den sma disi di fadon komoto na bribi meki sma ben e taki „skempi foe na pasi foe waarheid [na troe kristendom].”
Wan toe fosten sekte
6. Fa a boekoe Openbaring ben sori dati na a kaba foe na fosi jarhondro foeroe fadon sekte ben kon na fesi kaha. èn foe san-ede Jezus ben abi bita-ati gi den?
6 Na ini na Openbaring di na apostel Johannes ben kisi na a ten foe 96 G.T., a ben skrifi wan toe boskopoe di Gado ben gi nanga jepi foe en santa jeje èn pe den jeje toestand ben kon na fesi di ben de na a ten dati na ini den kristen gemeente èn di ben sa feni presi baka na ini na waka foe na historia. Toe foe den boskopoe disi e tjari kon na krin na de foe sekte di ben fadon komoto foe bribi, di Kristus, na edeman foe na troe kristen gemeente no ben wani si na ai. A de krin dati moro pikinso wan foe den sekte disi ben gi pasi foe afkodré nanga hoeroedoe. — Openb. 2:6, 14, 15.
7. Fa den brifi foe Paulus e sori dati na feti tegen a lostoe foe opo sekte ben de kaba na ini en ten?
7 Difrenti foe den brifi foe na apostel Paulus, di ben skrifi moro a fesi kaba, e sori dati a ben moe feti wan tranga feti tége na lostoe foe opo sekte. Na ini en fosi brifi gi den kristen na ini Korinte Paulus ben sari foe na lostoe foe waka baka libisma foedi disi ben abi leki bakapisi „trobi” èn „pratifasi” (1 Kor. 1:10-13; 3:1-4). A ben tjari sowan srefi broko-ede kon na fesi na ini en brifi gi den Galaciasma (1:6-9; 5:19-21), gi Titus (3:9, 10) èn gi Timotéus. — 1 Tim. 1:3-7; 4:1-3; 6:20, 21; 2 Tim. 4:3, 4.
8. San den gnostici ben bribi, èn foe san-ede den ben de frantwortoe taki sma ’ben taki skempi foe na pasi foe waarheid’?
8 Son bijbel sabiman abi na prakseri dati Paulus na ini en fosi brifi gi den Korintesma èn moro spesroetoe na ini en brifi gi den Efesesma èn gi den Kolossesma, foe espresi ben gebroiki bepaalde Griki wortoe (soleki gnoosis, sabi plèrooma, wan sani di foeroe) foe bewijsi taki na gnosticisme no boen. Fa a ben de ooktoe, Paulus ben feti séker tége prakseri di ben fadon komoto foe na troe bribi, prakseri, di bakaten den gnostise sekte ben meki gro. Den gnostici, di na ini na di foe toe jarhondro G.T. ben abi wan boen ten, ben de dualistsma di ben bribi dati ala materie de ogri ofoe takroe èn dati na froestan de boen. Den ben abi na prakseri dati ferloesoe e kon leki wan bakapisi foe mistieke sabi (gnoosis). Na bribi foe den dati na skin foe meti ogri ofoe takroe, ben tjari den go na wan foe den toe kriboi sé: ascetisme ofoe a gi foe joesrefi abra na a satisfai foe na skin. Na sokari kristelek gnosticisme ben sorgoe dati „sma taki skempi foe na pasi foe waarheid”.
9. Kari èn ferklari tra froekoe sekte foe na kristendom di ben fadon komoto na bribi.
9 Na mindri den „fosten sekte joe ben abi den Marcionietsma, den sma di ben waka na baka na manpikin foe wan kristelek „bisschop” di ben fadon komoto na bribi na ini Pikin-Azië. Marcion ben bribi na ini toe Gado, wan onvolmaakti „Owroe Testamentis gado” èn wan gado di ben kon na krin na ini na „Njoen Testament” ofoe moro foeroe na ini den pisi foe en di a ben teki (wan toe foe den boekoe foe Paulus nanga Lukas). Na montanisme ben de ete wan foe den sekte foe na di foe toe jarhondro. Montanus ben de wan „proféti” foe Pikin-Azië di den e préki na di foe toe kon baka foe Kristus èn di ben ferteri dati na Njoen Jeruzalem ben sa opo na ini Pepuza na ini a birti foe na santa foto Ankara (Turkije). A ben feni fowtoe ooktoe tapoe na makti di ben kon moro foeroe èn na moreel mi-no-kefasi foe a klasse foe den fesiman foe a kristendom di ben fadon komoto na bribi. Tertulianus ben tron wan montanist. Toe tra anitri boewégi tége morele mi-no-ke-fasi na mindri so kari kristensma èn tége wan fasi foe gi pasi na sma di fadon komoto na bribi, ben de den Novatiaansma foe na jarhondro di e meki dri èn den Donatistsma ini na jarhondro di e meki fo. Ma ala toe schismatis groepoe ben teki na moro prenspari kroektoe leri foe den moro owroe kerki di ben de kaba.
Na sma foe kroektoedoe” e orga ensrefi
10. Soema ben de toe ne ini den „falsi leriman” di ben tjari pori sekte kon ’na wan kibrifasi’?
10 Ala den sekte disi di wi kari èn trawan ete ben de ala sortoe difrenti fasi foe na kristendom di fadon komoto na bribi. Ma den man di ben opo den sekte disi, no ben de den wan enkri „falsi leriman” di ’na wan kibrifasi ben tjari pori sekte kon’ (2 Petr. 2:1-3). Petrus ben taki ooktoe na fesi ’foeroe sma ben sa waka baka den doe foe den foe loesoe fasi foe libi’. Djonsro wi ben si dati wantoe foe den fosten sekte disi ben opo meki wan protest ofoe oproeroefasi tége na loesoe-fasi foe libi foe na klasse foe kerkifesiman di ben e basi sani. Foe dat’ede meki ooktoe den kerki-fesiman disi moe teri na mindri den „falsi leriman” èn den kerki foe den wi moe si ooktoe leki „pori sekte”.
11. Sortoe njoen klasse ben bigin foe hé ensrefi, èn fa Paulus ben taki disi na fesi?
11 Soleki wi ben loekoe kaba, dan ala den sekte disi di fadon komoto na bribi ben feti nanga makandra foe na moro hé positsi. Ibri sekte ben poti leki marki foe sma si den leki na wan enkri „orthodoxe”, „apostolis’ èn „katholiek (universeel)” Kerki èn den foe den sé ben e behandel den trawan leki soso keterse sekte. Na a srefi ten wan klasse foe kerki fesiman ben proberi na ini den moro bigi, makti kerki foe poti densrefi na tapoe na tra pisi foe na ipi. Na apostel Paulus ben skrifi na ini a tori foe na fadon komoto foe bribi disi, èn na kon sori ensrefi foe wan klasse foe kerkifesiman di ben o basi sani: „No meki no wan sma kori joe tapoe wan ofoe tra fasi, bikasi [na dé foe Jehovah] no e kon foe na fadon komoto na bribi kon fosi èn na sma foe kroektoedoe ben sori ensrefi, na manpikin foe na pori. A e kakafoetoe èn e poti ensrefi na tapoe ibriwan di e kari ensrefi Gado „efoe wan sani foe anbegi, sodati a e go sidon na ini na tempel foe na Gado èn e sori ensrefi na publiki leki a de wan gado.” — 2 Thess 2:2-4.
12. (a) San de na „sma foe kroektoedoe”, èn oten na „sma” disi ben sori krin na publiki? (b) Sortoe stap e tjari go na a volledige gro foe na klasse foe den kerki-fesiman? (c) Taki fa na hiërarchieke sistema de.
12 Na fadon komoto na bribi disi ben de na ini a ten foe Paulus „e wroko kaba”. Ma pas baka na dede foe Jezus troe apostel, di na „skotoe” di ben de foe di den ben de drape, ben poeroe a pasi, na fadon komoto na bribi ben sori ensrefi krinkrin (2 Thess. 2:6, 7). Safrisafri wan klasse foe kerki fesiman ben poeroe en ede kon doro. Ini a bigin foe na di foe toe jarhondro foe G.T. Ignatius, ”bisschop” foe Antiochië, ben skrifi foe wan hiërarchie foe bisschop presbyter (priester) nanga diaken, di ben abi dri grade ofoe rang. „Na sma foe kroektoedoe” ben bigin foe kon na libi. Ma na „kerki tata” di ben orga na klasse foe den kerkifesiman na ini wan hiërarchie sistema ben de Cyprianus, „bisschop foe Carthago (Noordsé foe Afrika), di na ini 258 G,T. ben dede. Na ini na Dictionnaire de Théologie Catholique di abi foeroe makti e tjari kon na krin dati Cyprianus ben meki wan hiërarchie foe wan mornarch di ben abi sébi rang èn pe na bisschop ben teki na moro hé presi na ini. Na ondro en joe ben abi priester, diaken, sub-diaken, acoliet (altaardinari), lector (lésiman) nanga sma di e trowe ogri jeje a doro. Na ini a Westsé, Latijns ofoe Lomsoe Kerki wan rang di e meki di foe aiti ben poti a tapoe — doro waktiman — ala di na oostsé ofoe Griki kerki ben ori ensrefi na wan hiërarchie di abi féfi rang. Nanga wan pisiten foe na jarhondro di e meki dri G.T. dan na samengesteld „sma foe kroektoedoe, na klasse foe kristen fesiman di fadon komoto foe na bribi, ben „sori ensrefi krinkrin” foe dat-ede. Na „sma foe kroektoedoe” disi ben tan na libi na ini na lon foe den jarhondro na ini ala kerki nanga sekte foe na kristenheid di abi wan spesroetoe groepoe foe kerkifesiman ofoe klasse foe kerki fesiman.
„Pori sekte” na ini na ten foe na kaba
13. A sortoe toe fasi a de kon na krin fa den sekte foe na kristenheid de wan pori sani?
13 Na ini na fosfosi Griki tongo den wortoe foe Petrus „pori sekte” ben wani taki letterlek „sekte foe pori”. Den wortoe disi wani taki wan sani na toe fasi. Den sekte nanga kerki foe na kristenheid ben sori taki den pori na soifri kristendom, „na pasi foe na waarheid”. Den de ooktoe „sekte foe na pori” foe di den falsi leriman foe en e tjari wan es’esi pori kon abra densrefi” èn abra den sma di „e waka baka den loesoefasi foe libi”. Petrus ben taki moro fara ete: „Ma foe taki foe den [falsi leriman], a kroetoe foe fosten no e bewégi ensrefi safrisafri èn na pori foe den no e sribi” (2 Petr. 2:1-3). Na „es’esi pori” disi sa kon na abra den na ini na „bigi benawtoe” di e kon krosbé es’esi. — Matt. 24:21.
14. Oten na „sma foe kroektoedoe” sa kisi pori, èn san na pori disi sa sori?
14 Na apostel Paulus ben sori dati na samengestelde „sma foe na kroektoedoe” pas na ini na ten foe Kristus de-noja ben sa kisi pori foe di a skrifi: „Dan na kroektoedoe sma sa kon na krin, di na masra Jezus sa poeroe na pasi nanga na jeje foe en mofo èn den sa kon na wan kaba nanga a kon a krin foe en no-noja [parousias]” (2 Thess. 2:8). Ija, na pori foe na klerikale „sma foe kroektoedoe”-klasse makandra nanga na tra pisi foe na Babylon kerki makti foe Satan, sa kon leki wan toemsi aparti „sori ensrefi” foe Kristus „de-noja”, ofoe parousia, sodati mati nanga féjanti sa kisi krin foe si taki masra Jezus de noja sondro foe ai si en èn dati na „bigi benawtoe” di ben taki a fesi ben bigin.
Wan warskow gi troe kristensma
15. Sortoe warskow gi kristensma didon na ini Jezus agersitori foe na tarwe nanga takroe wiwiri?
15 Jezus agersitori foe na tarwe nanga na takroe wiwiri ben sori taki den kerki nanga sekte foe kristensma di fadon komoto na bribi — den „takroe wiwiri” — ben sa kisi pasi na ini na lon foe den jari hondro foe tan na libi. Pas na „a bosroiti foe na seti foe sani” wan krin difrenti ben sa kon na mindri den falsi kristen nanga den troe „manpikin foe na Kownoekondre”, na „tarwe” (Matt. 13:24-30, 37-40). Jezus agersi tori abi ooktoe wan warskow gi troe kristen ofoe den de now salfoe „manpikin foe na Kownoekondre” ofoe foe den kompe foe den. Jezus ben taki: „Na Manpikin foe libisma sa seni en engel go na doro èn den sa teki poeroe foe en kownoekondre ala sani di de wan réde foe stotoe foetoe fadon èn den sma di e doe kroektoedoe èn den sa trowe den go na ini na faja onfoe. Èn na drape den sa kré èn kaw tifi.” — Matt. 13:41, 42.
16. (a) Sortoe pratiwroko e go doro sensi 1919? (b) Sortoe tra warskow den apostel ben gi moro fara, èn sortoe kommentaar Judas ben gi moro fara?
16 Sensi 1919 wan prati e feni presi na ini na kerkigron na mindri „tarwe” èn „takroe wiwiri”. Ma disi no wani taki dati den engel foe na Manpikin foe libisma sensi a ten dati no ben go doro foe teki poeroe foe en kownoekondre ala sani di de wan réde foe stotoe foetoe fadon èn den sma di e doe kroektoedoe”. Judas e memre wi dati „den apostel foe wi masra Jezus Kristus” ben gi na warskow di e kon now. „Na ini na laatste ten spotoeman sa de, di akroederi den égi lostoe sa wroko nanga ogri sani.” Èn Judas e taki moro fara: „Den disi na den di e meki prati kon [e sai pratifasi, Bigi Njoensoe Bijbel].” — Jud. 17-19.
17. San Jezus ben taki foe na „ogri srafoe”?
17 San Jezus ben taki foe na sani di ben sa psa nanga den kroektoedoe sma, di „de wan réde foe stotoe foetoe naki fadon, e memre wi na a sani di a ben taki bakaten foe den sma di ben sa wégri foe èrken na aanstelling foe „na getrow èn koni srafoe”, na „tarwe”-klasse, foe salfoe kristen di Kristus ben sa poti „abra ala en goedoe”. Jezus ben gi na warskow di e kon now: „Ma efoe na ogri srafoe ben sa taki na ini en ati: ’Mi méstri e tan langa foe kon’, èn a ben sa bigin foe naki en kompe srafoe èn ben sa njan èn dringi nanga troetroe droengoeman dan na méstri foe na srafoe sa kon na tapoe wan dé di a no ben froewakti èn na tapoe wan joeroe di a no sabi, èn a sa strafoe en nanga tranga èn gi en porsi makandra nanga den hoigriman. Na drape a sa kré èn kaw tifi.” — Matt. 24:45-51.
18. (a) Fa son sma ini a ten disi e sori den marki foe na „ogri srafoe”? (b) Fa a sa waka nanga den te den e go doro foe ’sai pratifasi’?
18 Na ini a ten disi son deloyaal sma e sori den marki foe „na ogri srafoe dati” foe di den e taki na ini den ati: „Mi masra e tan foe kon.” Den e si densrefi leki den „spotoeman”, di e taki: „Pe na pramisi de-noja foe en de now?” (2 Petrus 3:1-7). Soleki Judas ben warskow, den e proberi ’foe sai pratifasi’ (Jud. 19, GNB). Foe di den e feni fowtoe na na „getrow èn koni srafoe”-klasse, foe soema na a bigin den ben kisi a sabi foe den foe „na pasi foe waarheid”, ’den e bigin foe naki den kompe srafoe foe den’. Ma efoe den tan go doro na ini na fasi foe den foe sai pratifasi, dan na a joisti ten den engel e tjari den kon makandra èn den e kisi a porsi foe den nanga den hoigriman foe na kristenheid. ’Na drape den e kré èn kaw tifi’, sontron foe di den ben ferteri foe den sani di den abi na den ati nanga jepi foe koranti, TV, boekoe nanga so moro fara.
19. (a) San Paulus ben taki foe „sekte” a mindri Gado pipel? (b) Fa wi kan meki kon na krin taki wi de sma di ’den feni boen’?
19 Disi e memre wi na san Paulus e skrifi gi den Korintesma: „Bika sekte moe de ooktoe na oen mindri, sodati den wan di Gado feni boen na mindri oenoe sa kon a krin toe.” (1 Kor. 11:1, 19). Ija, efoe wan toe na ini a ten disi e proeberi na wan kibrifasi foe opo na mindri Jehovah Kotoigi pori sekte”, disi e gi loyaal kristen wan moi okasi foe sori dati den de sma di Gado nè Kristus ben feni boen. Den kan èn moesoe foe sori dati den abi warderi gi troe kristen wánfasi. Na wánfasi disi wi sa taki foe en na ini na artikel di e kon.
Joe kan memre den sani disi ete
□ Oten èn fa na fadon komoto na bribi ben bigin di kon na krin na ini na vorm foe na kristenheid?
□ Soema ofoe san de „na sma foe kroektoedoe”?
□ Na sortoe fasi den kerki foe a kristenheid ’de wan pori sani’?
□ Sortoe warskow Jezus e gi na ini a tori foe na „ogri srafoe”?
[Prenki na tapoe bladzijde 2]
Jezus ben warskow taki falsi proféti de leki wolfoe ini skapoeboeba
[Prenki na tapoe bladzijde 3]
Falsi kristen de leki „takroe wiwiri” di boen nomo foe kisi pori