„Wán masra, wán bribi, wán dopoe”
„Wán Masra de, wán bribi, wán dopoe; wán Tata foe ala sma, di de tapoe ala sma. . .” — EFESESMA 4:4-6.
1, 2. (a) San Jehovah ben meki kon krin na fesi foe ensrefi nanga jepi foe Mozes? (b) Ini Israël foe dat-ede difrenti prakseri ben kan de na ini kerki sani?
„JEHOVAH, wi Gado, na wán Jehovah. Wi no moe waka na baka tra gado, sortoe gado toe foe den pipel di de lontoe oenoe, (bika Jehovah oen Gado di de na oen mindri de wan Gado di e aksi foe oen dini en wawan).” Mozes no ben libi no wan degedege na ini a punt disi na ini na ferstan foe den Israëlsma di sjatoe bifo den ben sa go na ini na Pramisi Kondre, ben kon makandra na tapoe den lagipresi foe Moab. A ben taki krin dati a Gado foe den Jehovah de wán Gado èn dati Jehovah e ferwakti dati den dini en wawan. Na ini wan taki a fesi Mozes ben taki: „Jehovah na wan troe Gado . . . na ini hemel na tapoe èn na grontapoe dja na ondro. No wan tra gado no de èn oenoe moe ondrow en wet nanga en komando, di a de gi oenoe tide, sodati a kan go oenoe boen. . ..” — Deut. 6, 4, 14, 15; 4:39, 40.
2 Leki fa den wortoe dati sori dan difrenti prakseri no ben kan de na ini kerki sani! Israël ben abi wán Gado. Èn Jehovah ben sori krin san ben de na wan enkri fasi di a ben teki èn di den ben kan anbegi en.
Djoe sekte ben opo kon
3. San ben psa te foe kaba bika a moro bigi pisi foe den djoe no ben tan getrow na Jehovah?
3 Ma na presi dati den Israëlsma ben anbegi a wan soifri fasi na troe Gado Jehovah, na moro bigi pisi foe den ben fadon komoto na bribi èn tron anbegiman foe kroektoe gado (Jer. 17:13; 19:5). Leki wan bakapisi foe dati a no ben go boen nanga den. Na ini 607 bifo G.T. den Babylonsma ben pori Jeruzalem èn foeroe djoe den ben teki tjari go na Babylon. Wan getrow fikapisi baka 70 jari ben drai go na Jeruzalem baka èn ben bigin foe bow wan tempel di e meki toe gi na anbegi foe Jehovah. Ma baka wan pisten dan a moro bigi pisi foe den djoe ben fadon komoto na bribi èn te foe kaba na heri religie foe den ben panja go na ini difrenti sekte.
4, 5. (a) Taki foe wantoe foe den djoe sekte di ben kon foe de na baka na Babylonis katibo. (b) Den sortoe sekte dati di ben sai pratifasi ben doe den djoe boen? Leg a sani disi uit.
4 Na ini na jarhondro di e meki fo ofoe di e meki di foe dri na sekte foe den Chassidim (froomsma) ben kon na libi. Den ben faja psa marki ini na hori foe na wet èn ini algemeen den ben si den leki sma di ben waka na fesi foe toe tra sekte di ben kon na libi na ini na jarhondro di e meki toe foe wi gewoon teri — den Esseensma èn den Farisésma. Den Esseensma nanga den Farisésma ben e teki na Griki leri foe na sili di no e dede. Den Farisésma ben kenki na ini disi nanga den foe di den no ben e bribi na ini wan libi baka dede. Na bijbel e taki foe na pratifasi di ben de ini a ten foe den apostel na mindri den Esseensma nanga den Farisésma (Tori. 23:7-10). Na ini The Concise Jewish Encyclopedia ben taki: „Na spanning di ben de na mindri den toe richting disi, tjari srefi fadon foe broedoe nanga feti na mindri borgroe kon.”
5 Den Zelootsma ben de ete wan djoe sekte di ben kon na libi na ini na fosi jarhondro foe wi gewoon teri. Den ben de nationalist di leki feti-kaka ben gi faja na wan oproeroe foe den djoe di ben waka boen tége den Romeinsma na ini 66 G.T. Baka dati den ben proberi foe basi tra sekte di ben abi fetisani ini Jeruzalem, san ben de wan réde foe wan feti na mindri borgroe nanga foeroe pina ben doe kon. Den sortoe trobi disi nanga fetisani na mindri djoe sekte di ben stré nanga makandra ben tan go doro te srefi na a ten di na Romein legre ben kon lontoe Jeruzalem, pori en na ini 70 G.T. A de krin dati pratifisi foe sekte èn no getrowfasi na a soifri anbegi di de na ini wánfasi foe na wan enkri troe Gado Jehovah no ben doe den djoe boen.
Den fosten kristen no ben de wan sekte
6. Foe san-ede den fosi kristensma ben hori densrefi aparti foe den djoe sekte?
6 A no de fanowdoe foe taki dati den fosten kristensma ben hori densrefi aparti foe den stré foe den djoe sekte. Den ben sabi dati den Farisésma nanga den Sadducésma ben de den moro bigi féjanti foe Jezus. Den bakaman foe Kristus no ben kan teki na bribi foe den Esseensma foe wan sili di no e dede èn ooktoe nanga na lobi di den ben abi gi wan libi leki wan asceet ini wan klooster. Èn leki sma di ben hori densrefi troetroe neutraal dan den no ben abi noti gemeen nanga den nationalist Zelootsma (Joh. 17:16; 18:36). Na presi foe dati den kristensma ben anbegi na wan soifri fasi èn na ini wánfasi na wán troe Gado, na ini akroederi nanga Jezus wortoe gi wan oema di no ben de wan djoe: „Na joeroe e kon, èn a de now kaba, pe den troe anbegiman sa anbegi na Tata nanga jeje èn waarheid.” — Joh. 4:23.
7. San Jezus nanga Paulus ben taki èn san den wortoe foe den abi na ini gi na troe kristen anbegi?
7 Na ini nen foe troe kristen na apostel Paulus ben taki: „Foe troe gi wi wán Gado nomo de, na Tata, foe soema ala sani de èn wi gi en, èn wán Masra de Jezus Kristus, nanga jepi foe soema ala sani de èn wi nanga jepi foe en” (1 Kor. 8:6). Na troe kristendom wani taki wánfasi anbegi foe na wán Gado, na Tata Jehovah via na wán Masra Jezus Kristus. Jezus ben taki gi en discipel: „Wan de oen Tiriman, na Kristus.” — Matt. 23:10.
8. Foe san-ede den fosi kristen nanga reti no ben kan kisi nen foe wan sekte?
8 A de troe taki den memre foe sekte di ben de langa ten kaba ben kari den fosten kristen na wan wisiwasi fasi wan sekte (Griki: hairesis, ofoe „wan groepoe sma di poti densrefi aparti foe tra sma èn e feti baka den égi marki”) (Tori. 24:5; 28:22). Ma ini en verdediging na fesi na tiriman Felix na apostel Paulus ben poti na fowtoe nen disi na wan sé foe di a taki: ’Akroederi na pasi di den (den kerki féjanti) e kari wan „sekte”, mi e doe na a fasi disi santa dienst gi na Gado foe mi fosten tata’ (Tori. 24:14). Na no wan fasi den ben kan kari den kristen wan sekte, bikasi den ben e waka na baka Jezus Kristus, èn no baka wan libisma. Boiti foe dati, den séker no ben de wan pisi foe wan foe den djoe sekte di ben de na ini na fosi jarhondro G.T.
No wan sektaris monki
9, 10. (a) Foe san-ede a no ben de a bedoeling dati na kristendom ben moe fadon panja na ini aparti kerki nanga sekte? (b) Sortoe theorie foe na bigin foe na kristendom no de troe srefsrefi?
9 Na fositen kristendom no ben de wan sekte. Ooktoe a no ben de na prakseri foe a ben broko panja na ini aparti sekte. Na ini begi na en tata Kristus ben aksi ofoe en ’discipel alamala kan de wán’ (Joh. 17:21). En discipel ben moe abi ’lobi gi makandra’ (Joh. 13:35). Disi ben poti ibri sekte di ben sa opo ede kon foe tjari pratifasi na dorosé.
10 Na troe tori disi e bewijsi taki den theorie di foeroe historiaskrifiman nanga theoloog e leri foe difrenti sortoe foe kristendom no de troe. Den e taki foe na „djoe kristendom” (di Jakobus, Petrus nanga Johannes ben verdedig) leki wan sani di ben de kontrari na „heiden kristendom” (di leki fa den taki Paulus ben verdedig). Den e sori na tapoe na „Johanneïse theologie [ofoe theologie foe Johannes]” èn na „Paulinise theologie [ofoe na theologie foe Paulus] èn e taki dati na kristendom no ben sa panja ensrefi noiti abra na heri grontapoe efoe Paulus no ben kenki en krinkrin. Den sortoe theorie disi e meki bekenti nanga mofo foe sma di ofoe no abi bribi na ini na kristendom ofoe e feni en wan normaal sani dati a kristendom prati ini hondrohondro kerki nanga sekte.
11. (a) Sortoe bijbeltekst e sori taki na prakseri foe meki na kristendom panja go na den no-djoe no ben bigin na Paulus? (b) Paulus ben feni sekte di ben tjari prati kon boen? (c) Sortoe okasi e sori na wánfasi di ben de mindri Paulus nanga en kompe wrokoman?
11 Den troe tori de heri tra fasi. Bifo Paulus srefi ben tron wan kristen, Jezus Kristus ben gi en discipel kaba na komando foe de en kotoigi na ini ala naatsi (Matt. 28:19, 20; Tori. 1:8). Paulus srefi ben stré kontrari ibri firi foe waka na baka libisma èn a ben taki foe dat’ede toe taki pratifasi no moe de na mindri” kristensma (1 Kor. 1:10-15; 3:3-5). Soboen na wan soso sani foe taki dati Paulus ben abi wan tra prakseri foe na kristendom leki Jakobus, Petrus nanga Johannes. Den ben wroko alamala na wan fasi makandra foe panja na boen njoensoe. Na wan séker okasi, kande na a ten foe wan concilie di den ben hori na ini Jeruzalem na ini 49 G.T foe na besnijdenis, den ala fo ben wroko dorodoro) nanga makandra na ini a tori foe na prati a mindri makandra na prékiwroko veld. — Gal. 2:7-9.
Warskow kontrari pratifasi
12. Wan fèjantifasi di e tan ben de a mindri Paulus nanga Petrus?
12 Foe di den fosten kristen ben de onvolmaakti sma, meki difrenti foe prakseri ben kon na mindri den — srefi na ondro den sma di e tjari hebi gemeente frantwortoe. Na ini Syris Antiochië Paulus ben moesoe poti Petrus let’opoe tapoe wan bepaalde punt (Gal. 2:11-14). Ma Petrus ben gwe foe opo wan aparti sekte, neleki a no ben agri nanga na sokari Paulinise kristendom? Kwetkweti, bikasi jari na baka, na ini a pisiten foe 64 G.T., a ben taki na ini lobifasi foe Paulus. — 2 Petr. 3:15, 16.
13, 14. (a) Na ondro sortoe rij foe sani Paulus ben poti „pratifasi” nanga „sekte”? (b) San moesoe psa nanga den sma di e meki wan sekte kon na fesi soleki san Paulus ben taki?
13 Na ondro na santa jeje krakti foe Gado Paulus ben poti „pratifasi” èn „sekte” na mindri den „wroko foe na skin”. A ben skrifi: „Den wroko foe na skin now de krin foe si, di de hoeroedoe, doti libi, wan loesoe fasi foe libi, afkodré, na doe foe spiritisme, féjantifasi, trobi, djaroesoe, a kisi foe atibron, trobi, pratifasi, sekte . . . den sma di e doe den sortoe sani disi no sa kisi Gado Kownoekondre.” — Gal. 5:19-21.
14 Foe di den sma di e meki „pratifasi” nanga „sekte” kon na fesi, „no sa kisi Gado Kownoekondre, den no kan de sma di den e ferdrage na ini na troe kristen-dom. Foe dat-ede Paulus ben skrifi gi Titus: „Tan farawe foe don aksi di e tjari trobi kon nanga geslakti register, trobi èn stré foe na wet, bika den no abi winimarki èn den de sondro waarde. Foe taki foe wan sma di e meki wan sekte kon na fesi, trowe en baka wan fosi èn wan di foe toe warskow, sabi dati sowan sma komoto foe na pasi n e sondoe, ala di a e kroetoe ensrefi.” — Titus 3:9-11.
Wánfasi foe bribi
15, 16. (a) Foe san-ede ini na kristen gemeente difrenti fasi foe prakseri no kan de, èn san Paulus e taki foe dati? (b) Disi wani taki taki wan kristen no mag gebroiki en powa foe denki? (b) San Petrus, Judas nanga Paulus e taki foe kefar di de te wan sma e degedege èn den e hari en komoto foe na waarheid nanga kori?
15 Foe ala den sani di wi ben taki na fesi e kon na krin taki na troe kristendom no kan prati na ini difrenti bribi richting nanga sekte. Na ini na kristen gemeente joe no kan abi tiri ofoe denki richting di e de sé makandra. Paulus e skrifi gi den Korintesma: „Now wi e fermane oenoe brada, na ini nen foe wi Masra Jezus Kristus, dati ala oen taki moe akroederi nanga makandra èn dati pratifasi no moesoe de na mindri makandra, ma dati oenoe moe de wán na ini jeje èn ini na srefi fasi foe denki.” — 1 Kor. 1:10.
16 Disi no wani taki dati wan troe kristen kotoigi foe Jehovah no kan gebroiki en powa foe denki. Na apostel Paulus ben wiki wi foe gebroiki „na powa foe denki krin” foe kaka foetoe gi „spotoeman” di „na ini den laatste dé” ben sa sori densrefi èn di ben sa poti na de-noja foe Kristus na wan sé (2 Petr. 3:1-4). Judas e taki ini en brifi foe „sowan di e degedege” (Judas 22.) Ma no Petrus no Judas e taki dati wan kristen kan tan foe de wan spotoeman ofoe wan sma di e degedege. Petrus e taki foe wi dati wi moe „loekoe boen” gi sma di „no de stanfaste” di e ’drai den Boekoe’ (2 Petr. 3:16, 17). Èn Judas e taki dati den sma di e degedege de na ini kefar èn moe ’hari poeroe foe na faja’ (Jud. 23). Den sma di ben komoto na ini na waarheid foe kori ede, moe kisi jepi „nanga safoe-atifasi”, na ini na howpoe dati „den sa kon baka na den froestan komoto foe na trapoe foe Didibri” (2 Tim. 2:23-26.
17. Fa wan troe kristen sa gebroiki en powa foe denki, èn foe kisi san a sa meki foeroe moeiti?
17 Wan troe kristen e gebroiki na wan sakafasi en „powa foe denki krin”. Paulus e skrifi: [Mi e a aksi] oenoe tranga foe waka so dati oen sori dati oenoe de warti na kari di den e kari oenoe nanga, sakafasi foe jeje èn safoe-atifasi nanga langa pasensi, ferdrage makandra na ini lobi, e feti serjoesoe foe kibiri na wánfasi na jeje na ini na wánfasi banti foe vréde. wán skin de èn wán jeje, soleki oen toe ben kisi kari na ini na wán howpoe di den ben kari oenoe; wán Masra, wán bribi, wán dopoe; wán Gado èn Tata foe alamala, di de a tapoe ala sma èn nanga jepi foe alasma èn ini ala sma. — Ef. 4:1-6.
Fa wánfasi e kon èn e tan
18. San e bedoel nanga den wortoe (a) „wán Gado”? (b) „wán Masra”? (c) „wán jeje”? (d) San de na wan enkri tjariman di de a boekoe gi na troe kristendom?
18 Paulus ben taki foe „wán Gado . . . di de tape ala sma”. Ofoe soleki fa Mozes ben taki en: „Jehovah, wi Gado, de wán Jehovah” (Deut. 6:4). Na fundamenti waarheid dati no ben kenki noiti. A de na srotofactor foe kristen wánfasi. Wán Gado de èn wán fasi foe anbegi en boen, „nanga geest èn waarheid” (Joh. 4:23, 24). Na ’wán Masra’ na Jezus Kristus, na „ede foe na skin foe na gemeente” (Kol. 1:18). Den wortoe „wán jeje” e sori na tapoe na wroko krakti foe Jehovah di tjari sani kon na wán. Jezus ben taki gi en discipel: „na jepiman, santa jeje, di na Tata sa seni kon na ini mi nen, en dati sa leri oenoe ala sani èn tjari kon na ini oen prakseri ala sani di mi ben taki gi oenoe. Vréde mi e libi gi oenoe, mi vréde mi e gi oenoe” (Joh. 14:26, 27). Den ’sani di ben tjari kon baka na ini den prakseri, ben skrifi poti na ini den kristen Griki skrifi. Den disi makandra nanga den Hebrew Skrifi, de na bijbel, na wan enkri tjariman di de a boekoe gi na troe kristendom.
19. San de na ’wan enkri’ skin, èn soema kisi na aanstelling foe gi jeje njanjan na ala memre?
19 Na ’wán skin’ de na kristen gemeente foe san Jezus de na „ede” (Ef. 1:22, 23). Den aparti salfoe memre foe na wánfasi gemeente disi ben sa kisi alamala na srefi njanjan. Nanga disi ini prakseri a „méstri” foe den ben poti wan collectief ’getrow beheerder’-klasse — na skin foe salfoe kristen — di sensi pinksteren 33 G.T. de na grontapoe. Foe di den wan di tan abra foe na groepoe disi ofoe foe na skin disi ben de bezig foe prati „fanowdoe njanjan” na wan getrow èn konifasi na ini 1919, meki a ben poti den „abra ala en goedoe” (Luk. 12:42-44). Den troe tori e sori dati na „beheerder” disi sensi 1919 ben sorgoe getrow gi den „goedoe” dati.
20. (a) Sortoe kontrari e kon na fesi soleki Jesaja 65:11, 13 e taki mindri Gado pipel èn sma di fadon komoto foe? (b) San ben meki moro foeroe na wánfasi foe Jehovah pipel kon de?
20 Den kerki fesiman foe den lo kerki nanga sekte foe na kristenheid no ben de bezig foe prati joisti jeje „fanowdoe njanjan” gi Kristus „skin foe knegti”. Foe dat’ede meki den kerki fesiman disi nanga den ipi foe den e njan pina foe „angri” na jejefasi (Jes. 65:11, 13). Na „getrow beheerder” na a tra sé e sorgoe dati psa marki boen foeroe fanowdoe njanjan na a reti ten de gi aparti salfoe kristen èn sensi 1935 ooktoe gi wan bigi ipi” „tra skapoe” di e kon dé foe dé moro bigi (Openb. 7:9, 10; Joh. 10:16). Awansi sortoe tongo den sabi taki ofoe pe den de na grontapoe, ala den Kotoigi disi foe Jehovah e waka baka na srefi studieprogramma di de na a heri grontapoe èn di abi en fundamenti na tapoe a Wortoe foe Gado. Disi e meki a wan bigi fasi dati wánfasi ben kon a mindri den èn ben tan a mindri den.
Na toemsi moi wánfasi na mindri Jehovah pipel
21. Fa na wánfasi a mindri Jehovah Kotoigi ini a ten disi e tan kibri, èn fa disi e kroederi nanga den organisatorise regeling ini den dé foe den apostel?
21 Na wánfasi na mindri den moro leki 45.000 gemeente foe Jehovah Kotoigi na ini moro leki toe hondro kondre e tan toe foe di den e hori tranga na a organisatoris methode foe na bijbel. „Den apostel nanga owroe man [ouderling] na ini Jeruzalem” ben de ini na fosi-jarhondro gemeente wan tiri skin (Tori. 15:2). Den nanga den sma di ben teki presi gi den ben poti „opzieners” nanga „diniri ini na diniwroko” na ini den gemeente èn den ben teki ooktoe tra bosroiti tap na kontren foe na hori ai tapoe sani (Fil. 1:1; Tit. 1:5; Tori. 14:23; 16:4). Na a srefi fasi wan groepoe foe salfoe kristen owroeman ini a ten disi de na Tiri Skin foe Jehovah kotoigi. Èn neleki fa den bosroiti foe na fosi-jarhondro tiri skin ben gi abra na den gemeente, na so den gemeente foe Jehovah Kotoigi na ini disi ten e kisi rai foe na tiri skin èn opzieners di e waka lontoe e fisiti den gemeente (Tori. 15:22, 23, 30). Neleki na a ten dati na so den gemeente ooktoe na ini a ten disi e poti boen stéfi ini bribi èn ’den e kon moro foeroe na ini nomroe dé foe dé’. — Tori. 16:5.
22. San fornamkoe Jehovah Kotoigi e warderi, èn san den sa doe makandra?
22 Jehovah Kotoigi kon de fri foe na sektaris pratifasi foe na kristenheid. Na ondro tiri foe na „wán Masra” foe den, Jezus Kristus, èn na „beheerder” di a ben poti den e go na fesi na ini wánfasi foe meki na „boen njoensoe disi foe na Kownoekondre” bekenti (Matt. 24:14). Den sa tan doe moeiti tranga foe ’kibri na wánfasi foe na jeje na ini na banti foe vréde di e tjari sini kon na wan’. Nanga reti wi kan taki tide dati den tanapoe faste „na ini wán geest, wán foe sili (stré sé na sé ini na bribi foe na boen njoensoe.” — Ef. 4:3; Fil. 1:27.
Joe kan memre den punt di e kon now ete?
□ Sortoe fasi foe anbegi ben de na a bigin na ini na Israël foe owroe ten?
□ San ben psa na ini na di foe fo jarhondro bifo G.T. na mindri den djoe di ben fadon komoto na bribi?
□ Sortoe tekst e sori taki noiti a ten de na prakseri dati na kristendom ben sa de sektaris?
□ Fa na bijbel e sori dati na inisé foe na kristen gemeente presi no de gi difrenti denki richting?
□ Sortoe sani e meki wánfasi foe si sani nanga foe wroko doe kon na mindri Johovah Kotoigi?
[Prenki na tapoe bladzijde 9]
Jehovah Kotoigi bondroe kon na wan na ini den anbegi na ini na heri grontapoe