Jehovah Wortoe no e misi

’Mi, Jehovah, e meki a wortoe foe mi knegti kon troe.’ — JESAJA 44:24-26.

1. Sortoe ten di o kon ben taki a fesi na ini 1864?

SAN a dé foe tamara sa tjari kon? Dati na san den sma ben sa wani sabi sote. Ma fa den sani di den e taki na fesi de sani di no e gi satisfaksi! Foe gi wan eksempre: Na ini 1864 na zoöloog Alfred R. Wallace ben taki a fesi foe na ’toekomst di libisma o meki gi na libismafamiri’: „Ibri sma sa wroko na en égi kolokoe nanga na di foe tra sma na ini prakseri . . . ibri sma sa meki den moro boen wet tjari den; nanga wan dipi warderi gi den reti nanga wan volmaakti firi gi den firi foe ala sma di lontoe en.” Ja, Wallace ben taki a fesi taki libisma ben kan kenki grontapoe na ini wan „moi paradijs di no wan enkri loekoeman noso singiman oiti ben prefoeroe foe dren”!

2. Na misi foe san libisma e taki na fesi e meki sortoe aksi kon?

² A man di ben taki a sani disi a fesi, ben dede négi moen bifo libisma ben dompoe go na ini na doengroe foe na fosi grontapoefeti. Pe na ’moi paradijsi’ dati di ben foeroe nanga sma di ben o firi gi makandra ben de dan? Èn fa na situwasi dati de ini disi ten? Degedege no de ini a tori dati ’na lobi foe moro foeroe sma kon kowroe’ — aladi sani ben taki a fesi taki a ben sa de tra fasi (Mattéus 24:12). Ma disi moesoe meki oen degedege na ini ala sani di taki a fesi? Jehovah Gado e meki joe kon sabi en leki a Sma ’di e meki koni sma hari go na bakasé èn di e kenki na sabi foe den go na ini lawfasi, aladi a e meki den wortoe foe en knegti kon troe’ (Jesaja 44:24-26). Ma son sma sa aksi densrefi: ’Wi kan fertrow tapoe bijbel profétitori? Jehovah Wortoe troetroe no e misi?’

Go ini pori èn kon kon boen baka

3. San ben psa nanga Juda nanga Jeruzalem na ini a di foe 7 jarhondro bifo G.T. soleki Leviticus 26:27-35 e taki?

³ Wan lo bewijsi de dati wi kan poti wi bribi troetroe na ini bijbelprofétitori. Profétitori di e go foe na pori èn kon boen baka foe sani foe eksempre ben kon troe na tapoe na pipel foe Gado foe owroeten. Di den ben anbegi Jehovah getrow, dan den ben njan boen foe di sani ben waka boen na ini na ’kondre foe merki nanga oni’ di Gado ben gi den (Leviticus 20:24; 1 Kownoe 4:1, 20). Ma den ben kisi warskow taki na paradijs kondre disi ben sa tron wan légi sabana efoe den ben sa trangajesi (Leviticus 26:27-35). Na ini na jari 607 bifo G.T., sowan 900 jari baka di Mozes ben skrifi Leviticus, den Babylonsma ben wini Juda nanga Jeruzalem. No langa a baka dati den djoe di ben tan a baka na ini na kondre ben lowe go na Egypte èn na pori di ben taki na fesi ben kon doro troetroe en marki. — Jeremia 39:8-10; 40:5; 41:2; 43:1-7.

4. (a) Sortoe pramisi Jehovah ben gi na en pipel langa ten bifo na pori foe Jeruzalem na ini 607 bifo G.T.? (b) Fa na pramisi disi ben kon troe?

⁴ Moro leki wan hondro jari bifo Jeruzalem ben pori Jehovah ben pramisi dati en pipel di ben abi beraw ben sa tjari kon baka na a légi kondre foe den tata èn a ben sa meki na paradijs moifasi kon boen baka (Jesaja 35:1-4). Gado ben taki ooktoe: ’Mi, Jehovah, di e meki a wortoe foe mi knegti kon troe èn a Sma di e meki na rai foe mi égi foetoeboi pasa troetroe, de na sma di e taki foe Jeruzalem: „Sma sa libi baka na ini”, èn foe den foto foe Juda: „Den sa bow kon njoen baka”’ (Jesaja 44:24-26). Na ini 539 bifo G.T. den Meden nanga Perzen sma na ondro na tiri foe Cyrus ben wini Babylon precies soleki Jesaja ben taki a fesi (Jesaja 44:27-45:6). Na bosroiti foe Cyrus di ben gi den djoe pasi foe drai go baka na na kondre foe den tata èn bow den tempel baka ben kisi krakti na ini 537 bifo G.T. èn baka wan pisten na kondre Juda troetroe ben ondrofeni na kenki di ben taki a fesi (Ezra 1:1-4; Jesaja 35:5-10; Ezechiël 36:35). A Wortoe foe Jehovah foe troe ben bewijsi taki a no e misi!

Tyrus no ben kan tjalansi den profétitori

5. San Jehovah ben taki foe Tyrus nanga mofo foe Ezechiël?

⁵ Den profétitori di Gado ben meki skrifi na ondro na krakti foe santa jeje ben kon troe ooktoe tapoe na owroe foto Tyrus di nanga leti den ben kari „na koningin foe se”. Jehovah ben taki foe na Fenisis se haven disi: „Mi de kontrari joe o Tyrus, èn mi wani tjari foeroe naatsi kontrari joe. Loekoe, mi e tjari kon tége Tyrus Nebukadnezar, na kownoe foe Babylon . . . èn a sa broko joe toren poeroe . . . èn den ston nanga oedoewroko foe joe nanga a doti foe joe den sa poti srefi na mindri foe na watra èn wi wani meki joe tron wan brenki, légi presi foe let’opoe stonbergi. Wan presi foe dré srepi joe sa tron.” — Ezechiël 26:3-14.

6. San ben psa nanga Tyrus leki wan kon troe foe den profétitori?

⁶ So wan fadon ben gersi wan sani di no kan. Na lontoe di Babylon ben lontoe Tyrus, soleki na djoe skrifiman Josephus ben taki ben tan dritenti jari langa (Jesephus, Tégen Apion, Boekoe I, kap. 21). Na historia no e ferteri o boen den moeiti foe Nebukadnezar ben de aladi na lasi nanga goedoe foe libismalibi foe na sé foe Tyrus ben moe de toemsi bigi. Na ini wan tra profétitori di bakaten ben taki nanga mofo foe Zacharia ben tjari kon a krin dati Gado ben sa pori na foto krinkrin (Zacharia 9:3, 4). Na profétitori disi ben kon troe pikinmoro 200 jari baka di den ben taki foe en. Den sma di na a ten dati ben e libi na a krosbé eilanti Tyrus ben firi densrefi veilig na baka den boen bigi skotoe foe na foto. Ma na ini 332 bifo G.T. den sroedati foe Alexander na Bigiwan ben trowe na eilanti foto dati na gron; èn den ben meki gebroiki foe den brokobroko ston foe na owroe foto Tyrus, foe meki wan dan go na a eilanti. Foe sensi a ten dati na kunstmatig eilanti disi ben kon moro bigi foe di santi ben go fasi ensrefi a tapoe. Boiti dati sma kan si ini a disiten havenpresi fa fisiman e dré den net foe den — ete wan kontroe foe den profétitori. Jehovah Wortoe no e misi!

Na „foto foe trowe broedoe” e lasi

7, 8. (a) San Jehovah ben taki na fesi foe Ninevé nanga mofo foe en proféti? (b) Foe san-ede a ben gersi wan sani di nokan, dati Ninevé ben sa tron „wan presi foe pori di sma gwe libi”?

⁷ A proféti Wortoe foe Gado ben sori taki a ben de ooktoe troe na ini a tori foe na owroe Ninevé, na mamafoto foe na Assyriakondre di ben kwinsi Jehovah pipel (2 Kownoe 17:1-6; 1 Kronieken 5:6, 26). Nanga mofo foe en proféti Jehovah ben taki foe na foto Ninevé, di a ben de na a hémarki foe en makti: „Foefoeroe na solfroe; foefoeroe na gowtoe; bikasi wan kaba e kon na a poti foe sani foe sma si . . . Légi presi nanga olo presi, èn wan foto di pori! . . . Heloe foe na foto di e trowe broedoe” (Nahum 2:9, 10; 3:1). „A sa meki Ninevé kon tron wan presi foe pori di sma gwe libi . . . èn na ini en mindri séker ipi-ipi meti sa didon a bradi.” — Zefanja 2:13, 14.

⁸ Fa disi oiti ben kan psa? Ninevé ben de „na bigi foto” (Jona 1:2). Leki fa na owroe historia skrifiman Diodorus ben taki dan Ninevé ben abi wan skotoe di ben bradi dritenti meter, so bradi dati dri wagi ben kan rij na sé makandra. Na ini den dé foe na proféti Jona (na a di foe négi jarhondro bifo G.T.), moro leki 120.000 sma ben libi na ini na foto (Jona 4:11). Ala disi ben sa tron wan „presi foe pori di sma gwe libi”.

9. Fa Ninevé ben gi wan bewijsi moro fara, dati Jehovah Wortoe no e misi?

⁹ Ini 632 bifo G.T., moro pikinso zestien jari baka na profétitori foe Zefanja, dan den Babylonsma nanga den Medensma ben lontoe Ninevé. Leki fa Diodorus taki (Boekoe II, kap. 27) dan „hebi alen di ben tan kon doro” ben meki dati na Eufraat liba ben hé psa en sjoro èn nanga disi dan no wawan „wan pisi foe na foto ben kon na ondro watra ma ooktoe den skotoe ben fadon na gron foe wan afstand foe twenti stadiën”. Den ben teki Ninevé abra. „Den ben foeroe sani foe na foto nanga na tempelkontren èn den ben kenki na foto kon na ini wan bergi foe brokobroko stonipi”, dati tanapoe na ini wan owroe boekoe foe Babylon. Foe someni hondrohondro jari langa Ninevé ben sa de now wan foto di „ben sa lasi gwe”. A fadon foe en ben de foe troe „boen njoensoe” gi a pipel foe Gado, di ben kisi na djaranti baka, dati „Jehovah de boen” èn „di sabi den sma di e kon soekoe kibripresi na en” (Nahum 1:7, 15). Wan sma di na ini Irak e tjari wan fisiti go na den brokobroko stonipi foe na foto Ninevé kan si skapoe e njan grasi na ini na birti foe en brokobroko stonipi bergi precies soleki ben taki a fesi. Ala disi e gi wan bewijsi moro dati Jehovah Wortoe no kan misi.

„Wan aparti toetoe” e broko komoto

10. (a) Sortoe proféti visioen tanapoe na ini Daniël 8:1-8? (b) Fa Daniël tjari den difrenti pisi foe na profétitori disi kon na krin?

¹⁰ Ini wan proféti visioen Daniël e si fa wan mankrabita nanga „wan aparti toetoe” ben kiri wan manskapoe nanga toe toetoe. Na toetoe disi ben broko èn fo trawan ben kon na ini na presi foe en (Daniël 8:1-8). San disi ben sa wani taki? Na engel Gabriël e tjari kon na krin: „na manskapoe di joe ben si, di ben abi den toe toetoe, e sori tapoe den kownoe foe Medië nanga Perzië. Èn na bokoboko nanga foeroe wiwiri e sori tapoe na kownoe foe Grikikondre. Èn foe taki foe na bigi di ben de a mindri en ai, dati e sori tapoe na fosi kownoe. Èn dati a disi ben broko komoto, sodati fo trawan ben kon di te foe kaba ben opo kon na ini en presi: fo kownoekondre de foe en naatsi di sa opo kon, ma no nanga en krakti.” — Daniël 8:16, 20-22.

11, 12. Fa Daniël 8:20-22 ben kon troe?

¹¹ Den Meden nanga den Perzen, na manskapoe nanga toe toetoe foe na visioen, ben wini na makti Babylon. Ma na engel foe Gado ben taki (. . .) bokoboko nanga foeroe wiwiwri” Grikikondre, ben sa kiri na manskapoe. Na so a psa precies so, na ini na di foe fo jarhondro bifo G.T., di legre foe Alexander na Bigiwan dl ben e taki Grikitongo, ben trowe na kownoekondre foe Medo-Perzië na gron. Na ini 301 bifo G.T. Alexander ben dede onferwakti tapoe 32 jari sondro dati wan bekwaam man ben kan teki en presi abra. Nanga na dede foe Aiexander na „aparti toetoe” ben broko. Ma fa a ben de nanga na den ’fo toetoe di te foe kaba ben sa opo kon na ini na presi’ soleki ben taki a fesi?

¹² Alexander ben abi wantoe Generaal, ma fo foe den te foe kaba hari na makti kon na den. Na so a ben psa taki na ’aparti toetoe’ ben broko èn te foe kaba ’fo toetoe’ noso ’fo kownoekondre’ ben teki en presi abra. Na ini 301 bifo G.T. dan den generaal di o kari now ben teki a makti abra: Ptolemaeus Lagi (Egypte nanga Palestina), Seleukos Nikator (Mesopotamië èn Syrië), Cassander (Macedonië nanga Grikikondre) èn Lysimachos (Thracië nanga Pikin Azië).a Agen wi e si dati a Wortoe foe Jehovah no e misi.

„Na Messias na Tiriman” e sori ensrefi

13. San Daniël 9:24, 25 e taki foe a kon foe a Messias?

¹³ A boekoe Daniël e gi wi moro bewijsi ete di e kon na fesi dati Jehovah Wortoe no e misi. Hondro hondro jari a fesi Daniël ben kisi Gado jeje foe ferteri soifri na ten di na Messias ben sa sori ensrefi na grontapoe. Na ini na span profétitori disi ben tanapoe: „Sébitenti wiki ben poti na abra joe pipel èn abra joe santa foto foe meki na fowtoe kon na wan kaba èn foe meki na sondoe kon na wan kaba èn foe doe verzoening foe misték èn te ten di no abi marki sa tjari regtvaardikfasi kon èn foe poti wan ségelmarki na tapoe visioen nanga proféti, èn salfoe na santa foe na santa. Èn joe moesoe sabi èn abi na ferstan dati foe sensi na wortoe go na doro foe meki Jeruzalem kon boen baka èn foe bow en baka te nanga na Messias na Tiriman, sébi wiki, èn ooktoe siksitenti na toe wiki de.” — Daniël 9:24, 25.

14. (a) Sortoe tekst de na fundamenti foe na prakseri taki ibri dé na ini den „wiki” foe Daniël 9:24, 25 e teri foe wán jari? (b) Na ini sortoe jari na ’wortoe ben go na doro foe meki Jeruzalem kon boen baka’? (c) O langa den 69 „wiki” ben de, èn oten den ben bigin èn ben kon na wan kaba?

¹⁴ Den „wiki” disi ben de letterlek? Nono, bikasi ala sani di taki dja foe na Messias a fesi, no ben psa na ini na pisten foe sébi wiki ofoe a no kisi srefi wan nanga afoe jari. A ben de „wiki” pe ibri dé ben e teri foe wan jari. (Teki gersi Numeri 14:33, 34.) „A wortoe foe meki Jeruzalem kon boen baka èn moi baka” ben kon troe na ini na di foe twenti jari foe na kownoe foe Perzië, Artaxerxes (Longimanus) (Nehemia 2:1-18). Foe di a ben bigin tiri na 474 bifo G.T. meki a di foe twenti jari ben fadon na 455 bifo G.T. Foe dat’meki den 69 jarwiki di bigin teri foe sensi a momenti di ’a wortoe go foe bow Jeruzalem baka te na a Messias na Tiriman’, ben de 483 (7x69) jari èn den ben kon na wan kaba ini 29 G.T.

15. Sortoe ferwakti ben libi na den djoe na ini 29 G.T.?

¹⁵ Ini a jari dati Johannes na Dopoeman ben wroko tranga nanga na „préki foe na dopoe leki wan marki foe beraw foe kisi pardon foe sondoe”. Èn fa a ben de nanga den djoe? „A pipel ben de foeroe nanga ferwakti èn ala sma ben e prakseri na ini en ati foe Johannes: ’A ben sa de kande na Kristus?’” (Lukas 3:3, 6, 15) Foe taki foe na ferwakti disi dan na djoe leriman Abba Hillel Silver ben taki: „Na fosi jarhondro, spesroetoe na geslagti bifo na pori foe [Jeruzalem], ben de kotoigi foe wan aparti broko kon na doro foe firi gi na Messias. Disi wi no moe skrifi gi na kon moro tranga foe na Romeini ferfolgoe, ma na a bribi di ben de na a ten dati èn di ben doe kon foe na populair chronologie foe a ten dati . . . Na Messias den ben e ferwakti na a tweede kwart foe na fosi jarhondro G.T.” Na „populaire chronologie” dati den abi en fundamenti na ini a boekoe Daniël.

16. (a) Foe san-ede meki na di foe tin na féfi jari foe a tiri foe Tiberius Caesar ben de prenspari? (b) San ben psa di Jezus ben teki dopoe?

¹⁶ Na ini a profétitori foe Daniël ben kon na fesi taki den 69 jarwiki ben sa go doro te 29 G.T. We, na Messias ben sori ensrefi ooktoe precies na a ten ini a jari dati? Ija, foe troe! Johannes na Dopoeman ben bigin nanga en prékiwroko nanga dopoewroko „na ini na di foe féfi jari foe tiri foe Tiberius Caesar” (Lukas 3:1-3). Foe di Tiberius ben tron tapoe 17 augustus G.T. (Gregoriaanse kalender) Romeini keizer, meki Johannes wroko ben bigin na ini na di foe tinnaféfi jari na baka noso na ini na bakajari foe 29 G.T. A ini a bigi dréten foe na jari dati Jezus foe Nazareth ben kisi dopoe foe Johannes èn santa jeje ben saka komoto foe hemel foe salfoe Jezus leki na Kristus noso Messias (Lukas 3:21, 22). Na profétitori foe na Messias ben kon troe.b Agen bewijsi ben gi dati Jehovah Wortoe no e misi.

17. San na wantoe foe den profétitori di e go foe a Messias èn di ben kon troe na ini Jezus Kristus?

¹⁷ Na ini a tori foe Jezus Kristus foeroe moro profétitori na ini den Hebrew boekoe ben kon troe. Foe eksempre Jezus ben gebore foe wan wenke na ini Bethlehem (Jesaja 7:14; Micha 5:2; Mattéus 1:18-23; 2:3-6). Baka en gebortoe den ben kiri pikinnengre (Jeremia 31:15; Mattéus 2:16-19). A ben abi wan sma di ben waka na en fesi (Jesaja 40:3; Mattéus 3:1-3). Jezus ben tjari wi siki (Jesaja 53:4; Mattéus 8:16, 17). A ben rij go na ini Jeruzalem tapoe wan jongoe boeriki (Zacharia 9:9; Johannes 12:12-15). Wan foe den apostel ben tori en foe dritenti solfroe moni (Psalm 41:9; Zacharia 11:12; Mattéus 26:14-16, 46, 56; Johannes 13:18). Baka di den ben spikri Jezus na wan postoe, den sroedati ben prati en krosi a mindri makandra èn ben trowe lot foe en ondrokrosi (Psalm 22:18; Johannes 19:23, 24). Den no ben broko den bonjo foe en, ma den ben soetoe en (Psalm 34:20; Zacharia 12:10; Johannes 19:33-37). Bakadi a ben tan pisi foe dri dé na ini na grebi, a ben kisi wan opobaka foe dede (Jona 1:17; 2:10; Mattéus 12:39, 40; Markus 9:31; Tori. 10:40). Disi na soso wantoe eksempre foe na fasi fa profétitori di e go foe na Messias e kontroe na ini Jezus. Ma ooktoe nanga disi na bewijsi ben gi taki Jehovah Wortoe no e misi.

Na ten di e kon kan de wan sani di wi sabi

18, 19. (a) Foe san-ede no de wan aksi di de wan soso sani, san na dé foe tamara sa tjari kon? (b) Sortoe tra aksi e kon na fesi?

¹⁸ Jezus, na Messias, ensrefi ben taki profétitori toe di e gi howpoe. Foe eksenpre a ben taki a fesi foe a „denoja” foe en ini a ten di e kon (Mattéus 24:3-14). Difrenti bijbelskrifiman te joe loekoe en boen ben skrifi profétitori di e gi dek’ati èn di de toemsi prenspari na ini na di foe twenti jarhondro disi. Na aksi ’San na dé foe tamara sa tjari kon’? de soboen wan sani di no de wan soso sani. Wi kan kon sabi en!

¹⁹ Te so fara wi ben loekoe wantoe bijbel profétitori di ben kon troe na ini na ten di psa. Ma fa a de nanga wi ten? Wi abi moro span bewijsi ete dati Jehovah Wortoe no e misi?

[Foetoewortoe]

Joe kan memre ete?

◻ San ben psa nanga Tyrus, soleki ben taki na fesi?

◻ Fa Ninevé ben gi bewijsi dati Jehovah Wortoe no e misi?

◻ Fa Daniël 8:20-22 ben kon troe?

◻ O langa den 69 wiki ben de, èn oten den ben bigin èn ben kon na wan kaba?

◻ San de wantoe foe den profétitori di e go foe a Messias di ben kon troe na ini Jezus Kristus?