Wi tjari kon makandra ini na préki foe na wortoe foe Jehovah

’Abi na mindri makandra na srefi jejefasi di Kristus Jezus ben abi; sodati nanga wán mofo èn ini wánfasi oenoe kan gi glori na a Gado èn Tata foe wi Masra Jezus Kristus.’ — ROMEINI 15:5, 6.

1. (a) San na a seti foe Jehovah foe tjari en pipel kon na wan? (b) San den Santa Boekoe e sori foe na tori foe a volgorde fa na tjari kon na wan disi ben sa feni presi?

JEHOVAH ben tjari en kotoigi kon makandra na ini wan diri wánfasi na heri grontapoe. Disi de ini akroederi nanga na seti foe Gado leki wan oso, di na apostel Paulus e taki foe en na ini Efesesma 1:10: „Wan tiri na a volledige grens foe den faste ten, foe tjari ala sani kon na wan baka na ini Kristus, den sani di de ini hemel èn den sani di de na ini grontapoe.” Den fosi wan di ben tjari kon makandra de den salfoe kristen di abi wan hemel howpoe, na „pikin ipi”, èn bakadati na tjari kon makandra foe na „bigi ipi foe ala naatsi” e feni presi. A groepoe disi e loekoe a fesi foe psa libilibi a kaba èn foe go na ini na regtvaardiki „njoen grontapoe” di Gado pramisi. — Luk. 12:32; Openb. 7:3, 4, 9, 13-17; 21:1, 5.

2. San e jepi Jehovah Kotoigi foe taki „ini wánfasi nanga wán mofo”?

² „Nanga wán mofo èn ini wánfasi” — dati na a fasi di den kotoigi disi foe Jehovah e préki na Kownoekondreboskopoe. San e meki den kan doe disi? Disi e doe kon foe di na a heri grontapoe den e sori ’na srefi jejefasi di Kristus Jezus ben abi’ di a ben de na grontapoe. A no ben de wan pisi foe a hémemre grontapoe disi. Na presi foe dati a ben saka ensrefi foe doe a wani foe Gado èn foe bow wan waran, lobi-ati wánfasi a mindri en discipel. Disi ben de a bigin foe wan grontapoe wánfasi di ben sa de wan marki gi troe kristensma na ini den jarhondro di ben sa kon a baka. — Fil. 2:5-8; Joh. 13:34, 35; 17:14.

3. (a) Sortoe srapoe kontrari de ini a ten disi ini a grontapoe foe si? (b) Fa den Santa Boekoe e jepi wi foe kon sabi na grontapoe maatschappij foe troe kristensma?

³ Na wánfasi disi foe organisaatsi na ini den „laatste dé” disi ben sori ensrefi na tapoe wan toemsi moi fasi èn de leki wan aparti sani te joe loekoe ala pratifasi na ini Satan seti foe sani, pe ogri-ati nanga kroektoedoe e njanpré srefsrefi (2 Tim. 3:1-5, 13; Matt. 24:3, 12). Noiti ete na ini na historia foe libisma joe ben abi wan organisaatsi na tapoe wi grontapoe na ini 203 kondre, di de ini wánfasi srefsrefi na ini bribi, doelstelling nanga activiteit. Sma e herken na grontapoe maatschappij disi foe Jezus discipel na den froktoe di den e meki. — Joh. 15:8; Hebr. 13:15; Gal. 5:22, 23.

Handri na ini wánfasi

4. (a) Sortoe difrenti ben kon na ini na fosi jarhondro gemeente? (b) Sortoe theokratis stap ben doe soleki e kon na krin na ini Tori foe den Apostel 15:1-6?

⁴ Fa na ini Jehovah organisaatsi sma e handri na ini wánfasi, wi e kisi foe si na ini Tori foe den Apostel kapitel 15. Tjari kon na ini joe prakseri pikinso na prenki foe lepi kotoigi foe Jehovah — den twarfoe apostel, tra owroeman foe na gemeente foe Jerusalem èn Paulus nanga Barnabas, owroeman foe na gemeente Antiochië. Ini Antiochië èn ooktoe ini Jerusalem, son sma foe den djoe di ben teki bribi ben taki nanga krakti sten dati sma foe den naatsi moe besnij èn moe hori densrefi na a wet foe Mozes efoe den wani kisi ferloesoe. Na foe dat’ede meki den apostel nanga owroeman ben kon makandra „foe wegi go wegi kon na afersi disi”. — Tori. 15:16.

5-7. (a) Na sortoe fasi wan lo „tak-go-tak-kon ben kon de”? (b) Sortoe kotoigi ben gi? (c) Fa den ben gebroiki den Santa Boekoe foe tjari na afersi kon na fesi? (d) Sortoe lepi bosroiti Jakobus ben teki, èn disi ben meki sortoe bosroiti kon te foe kaba? (e) San den ben doe bakadati?

⁵ Sondro foe poti wan bosroiti a fesi den e taki foe a problema èn den toegewijde man disi e tjari ala bewijsi kon di de pro èn kontra. Den no meki a fesi wan bepaalde bosroiti. Den ben de klari foe loekoe na afersi foe ala oekoe. Wan heri ipi „tak go tak kon” de, ma a de krin dati ala sani e waka nanga orde èn den e arki nanga respeki a prakseri foe makandra. Na apostel Petrus e kotoigi dati Gado ben gi santa jeje a den sma foe den naatsi di no ben besnij — séker wan krakti kotoigi di e sori dati a no de moro langa wan marki gi den sma di wani kisi ferloesoe foe besnij na ini a skin. Barnabas nanga Paulus e poti na a kotoigi wan sani a tapoe, foe di den e ferteri foe den foeroe wondroe sani di Gado ben meki psa na mindri den naatsi nanga jepi foe na wroko foe den. — Tori 15:7-12.

⁶ Dan Jakobus e sori tapoe wan pisi foe den Santa Boekoe foe hori baka gi den bewijsi di tjari djonsro kon na fesi. A e ferklari dati Amos 9:11, 12 ben sori a fesi tapoe na kon boen baka foe sani na ini a boenati foe Gado na ondro na Moro Bigi David, Jezus Kristus, èn na tapoe na ten di Jehovah no-ferdini boen-atifasi sa sori gi ’ala naatsi di ben sa kari na en nen’. Jakobus no e feni en fanowdoe foe ferferi den sma foe den naatsi, di ben teki bribi, foedi ai tanapoe a tapoe, dati den moe besnij èn hori ala den regel di de a ini a wet foe Mozes. Ma wantoe sani de wel fanowdoe: Den moe hori densrefi farawe foe afkodré, foe broedoe na ini sortoe vorm toe èn foe seks hoeroedoe.

⁷ Na tiri-skin na ini Jerusalem e teki leki wán man wan bosroiti èn e seni boskopoeman go na a gemeente Antiochië nanga wan brifi di e bosroiti nanga den dek’ati wortoe: „Efoe oenoe hori oensrefi soifri na den sani disi, dan ala sani sa waka boen gi oenoe. Wi e winsi oenoe wan boen gesontoe!” — Tori. 15:22-29.

Theokratis fasi foe wroko

8. (a) Na Tiri-Skin na ini disiten e meki sortoe sani tjari den na ini na teki foe bosroiti? (b) San na wantoe afersi di den tjari kon na krin na ini den jari di psa?

⁸ Na ini a ten disi na tiri skin foe Jehovah Kotoigi, di e teki presi gi „na getrow èn koni srafoe” foe a Meester di de na a heri grontapoe, e waka baka na patron foe den apostel (Matt. 24:45-47). Na a fasi disi na groepoe disi foe salfoe kotoigi kan teki theokratis bosroiti ini afersi di de foe bigi belang gi den gemeente, foe di den abi kristen ondrofeni èn foe di den e waka na baka na Wortoe foe Gado leki wan tjariman èn e poti densrefi na ondro na tiri foe Jehovah jeje. Na tiri-skin foe eksempre de waka na ini den jari di psa baka na bijbel fasi foe wroko foe tjari krin kon na ini afersi leki na bijbel loekoe foe na tori foe „bedinari”, na konsensi di Gado gi, na tjari foe wapen di kan kiri sma èn na ofara pe bepaalde pisi foe na profétitori foe Jesaja kan gebroiki ini na paradijs grontapoe di e kon. — Teki gersi Johannes 14:26; 1 Korintesma 2:10.

9. Fa owroeman moe wroko te ini a ten disi den e go behandel problema?

⁹ Na fasi foe wroko di tjari kon na krin ini Tori foe den Apostel kapitel 15, den owroeman ini na gemeente moe waka na en baka te den e behandel problema na ini a ten disi. Meki den loekoe krin fosi san de a problema èn kande den troe tori di abi foe doe nanga dati. Meki moro fara betrouwbaar Kotoigi tjari den materiaal kon makandra foe na afersi. Diki go dipi na ini den Santa Boekoe foe kon sabi na fasi fa Jehovah e loekoe na tori èn meki gebroiki foe na jepi di den boekoe foe na Genootschap e gi kande foe na punt disi. Wroko na ondro begi foe kon na wan loesoe leki wán man èn di e akroederi nanga san di a Wortoe foe Gado e leri èn di sa tjari wini foe na gemeente kon. — Jes. 48:17; 1 Kor. 14:33.

Prisiri — a ten dati èn now

10. (a) Sortoe krakti theoratis bosroiti moe abi tapoe wi, net soleki na ini den fosi jarhondro gemeente? (b) Fa modern ontwikkeling ben meki a kon so fara dati a pipel foe Gado ben kisi tranga èn ben gro ini nomroe?

¹⁰ Di den memre foe na gemeente ini Antiochië ben kisi foe jere fa na bodoi foe na tiri-skin ben de, „den ben prisiri foe na del’ati”. Na so Jehovah Kotoigi na ini a ten disi e prisiri ooktoe te den kon sabi den organisatoris bosroiti èn den kon kisi wan moro krin loekoe na ini leri afersi sodati na jeje gesontoe foe na pipel foe Gado nanga na go na fesi foe Jehovah wroko e kon moro. (Teki gersi nanga Titus 2:1). Ma na Tiri-Skin no a foe skrifi moro soleki na a ten dati nanga den anoe instructie-brifi èn meki boskopoeman tjari den lontoe nanga foetoe. Modern kommunikatie jepisani nanga drukkerij faciliteit ini moro leki 30 Wachttoren bijkantoro na a heri grontapoe e meki a de mogelek foe tjari „na boen njoensoe foe na wroko foe Jehovah” ini wan sjatoe pisi ten go na miljoenmiljoen memre foe na pipel foe Gado. Disi e psa moro foeroe via na tijdschrift Na Wachttoren. Na sofasi den gemeente na a heri grontapoe e ’kon poti stéfi na ini na bribi èn den e gro ini nomroe dé foe dé’. — Tori. 15:30-16:5.

11. Fa Jehovah ben gebroiki Na Wachttoren foe meki Jesaja 30:18-21 kontroe?

¹¹ Den sma di e lési Na Wachttoren someni jari kaba, e bréti ooktoe foe dati na oplage e kon moro bigi dé foe dé. Na ini den 165 jari di a tijdschrift disi e kon na doro na oplage gro foe 6000 doesoen ala moen eksemplaar na ini Ingrisitongo kon tron 11.150.000 eksemplaar ini 102 tongo èn wi moe taki ete dati ala uitgave ini den bigi taalkontren kon de afoe moen. A no de wan sani foe degedege dati Jehovah Gado na Bigi Leriman e gebroiki Na Wachttoren tapoe wan troetroe fasi foe meki na na pramisi kontroe: „Kolokoe ala den sma de di e tan ferwakti en. . . Joe égi jesi sa jere wan wortoe na joe baka, na so fasi: ’Disi na a pasi. Waka a tapoe’, efoe joe ben sa go na let-anoesé ofoe joe ben sa go na kroektoe anoesé.” — Jes. 30:18-21.

12. (a) Foe san-ede wi abi now wan réde moro foe prisiri? (b) Fa na njoen seti disi sa jepi wi foe kisi wini?

¹² Now wi abi wan réde moro foe prisiri. Foe bigin nanga 1985 Na Wachttoren e kon na doro na a srefi ten (simultaan) ini 23 tongo efoe wi taki foe na inhoud foe en.a Ala den uitgave disi abi a srefi fesiséprenki èn abi densrefi bigin artikel nanga den srefi studieartikel. Nanga disi wi e sorgoe ini wan simultaan „gi njanjan”-programma di sa tjari Jehovah pipel kon a wan na ini a jeje gro foe den „teleki wi alamala doro na wánfasi ini na bribi”. Disi séker sa de wan ekstra dekati foe gi ’ini wánfasi èn nanga wán mofo glori na a Gado èn Tata foe wi Masra Jezus Kristus’. — Ef. 4:13; Rom. 15:6.

13. (a) A programma disi de o bigi? (b) Fa wi ben sa kan tjari disi foe dat’ede kon ini akroderi nanga 1 Korintesma 1:10?

¹³ Te joe hori ini joe anoe na tijdschrift disi na na ala wiki Wachttorenstudie ini a gemeente, dan joe no e firi na spirit te joe prakseri dati a moro bigi pisi foe joe brada na a heri grontapoe sa tjari kon makandra na ini a teki ini densrefi foe na srefi jeje njanjan na a srefi dè? Ija, disi sa de so ini heri Noord- nanga Zuid-Amerika, na ini na Moro bigi pisi foe Europa, ini Japan èn na foeroe presi ini na zuidsé foe Afrika! Leki fa a teri de, dan moro leki 90% foe den sma di e go a wan presi ’na grontapoe na a Wachttorenstudi — sowan 2 nanga afoe miljoen ibri wiki abi foe doe nanga simultane „gi njanjan”-regeling. Ala den sma disi e tjari „kon krosbé nanga makandra na ini nasrefi geest èn na ini na srefi fasi foe denki” (1 Kor. 1:10). Efoe den omstandigheden e gi pasi foe dati, dan moro tongo ete sa teki poti na ini na programma disi.

14. Fa disi sa tjari wini kon gi osofamiri?

¹⁴ Te nanga now a ben kan de so, foe den difrenti ini tongo dati na ini na srefi osofamiri na wan famiriman ben studeri bepaalde Wachttoren-artikel a baka leki na tra famiriman. Ma now na ini a pisi tori disi den kan djari kon na wan. Papa nanga mama di de sma di froisi go na wan tra kondre èn di e taki wan tra tongo moro boen, kan sidon now makandra nanga den pikin di e taki wan tra tongo foe sreka densrefi nanga makandra ini den toe tongo na srefi Wachttorenstudie foe a wiki dati. Na ini osofamiri di e taki toe tongo den papa nanga mama sa de srekasreka moro boen foe handri ini akroederi nanga den rai di skifi ini Efesesma 6:4 nanga 2 Timóteüs 3:14, 15.

15. (a) San wi kan doe now ini akroederi nanga Jesaja 52:8, 9 ini wi publiki diniwroko? (b) San prékiman kan doe na ini a bigin foe 1985, èn san ben san kan psa ini a ten di e kon?

¹⁵ Loekoe oenoe publiki diniwroko toe nanga den tijdschrift pikinso. Kownoekondre-prékiman pe den de ooktoe na grontapoe na ini na pisi tori disi ooktoe ’nanga wán mofo kan bari nanga prisiri’, foe di den kan gi den srefi bodoi na a publiki na alape na grontapoe na a srefi ten (Jes 52:8, 9). Te prékiman e teki prati na a tijdschriftwroko na strati ini kontren pe difrenti tongo e taki, dan den kan meki sma si ini toe noso moro tongo tijdschrift di abi na srefi fesisé artikel. Kow prakseri disi pikinso! Na ini na bigin foe 1985 dan kownoekondre-prékiman na ini na heri grontapoe sa tjari kon makandra foe gi wan faja kotoigi di e go foe Armageddon! A kan de taki Jehovah na en faste ten sa tjari en pipel na so wan fasi dati na a heri grontapoe den sa kan gi tra krakti boskopoe ini wánfasi, ’e dini sé na sé ini na bribi foe na boen njoensoe’ (Fil. 1:27). Na kon na ini nasrefi ten na ini foeroe tongo foe Na Wachttoren sa meki a de mogelek foe tjari den sortoe ferklari disi di abi powa kon na doro. — Teki gersi nanga Daniël 11:44.

Trowe wan ai ini na ten di e kon

16. (a) San na uitgave disi foe Na Wachttoren e ferteri wi tapoe bladzijde 7 nanga 8 èn 10 foe na activiteit foe den gemeente? (b) Foe san-ede meki sma ini a ten disi abi wi tijdschrift fanowdoe?

¹⁶ Na ini na jari 1984 Jehovah Kotoigi ben prati den tijdschrift Na Wachttoren nanga Ontwaakt! na ala presi na ini bigi nomroe. Na wroko disi Jehovah ben blesi srefisrefi soleki e kon na fesi na ini den cijfer di de tapoe bladzijde 7, 8 èn 10 foe na tijdschrift disi. Na a eri grontapoe a ben de so na ini 1984 dati na prati foe tijdschrift na ini na veld ben gro nanga 11,1%. Ala nanga ala 287.358.064 loesoe tijdschrift ben prati, aladi na nomroe foe abonnement di ben sroto ben gro nanga 1.812.221 abonnement, wan gro foe 3,2%. Degedege no de kwetkweti dati moro nanga moro sma moe sabi foe san-ede den naatsi de na ini broeja-skreki „èn no sabi wan pasi foe komoto” (Luk. 21:25, 26). Papa nanga mama wani wan kolokoe toekomst gi den pikin — wan moro betre sani leki wan grontapoe di bron krinkrin ini wan kernoorlog. Den tijdschrift foe wi e gi wan libi howpoe! — Matt. 12:18, 21; Rom. 15:4.

17. Fa den tijdschrift disi sa jepi wi foe kakafoetoe gi Didibri?

¹⁷ Fa a de dan nanga 1985? Na boskopoe na ini Na Wachttoren nanga Ontwaakt! e kisi moro nanga moro krakti. Disi de wan sani di wi kan ferwakti, now di den laatste dé foe Satan grontapoe e kon na wan kaba (Openb. 12:12). No vergis joe! Didibri ben sa wani sote foe tapoe wi foe abi geregeld wan prati na Jehovah dienst. Ija, Satan ben sa wani sote foe poti wi aparti foe a pipel foe Gado nanga a wroko di den e doe èn na afasi disi swari wi (1 Petr. 5:8). Ma wi kan kaka-foetoe gi en efoe wi e miti geregeld nanga makandra foe teki soifri sabi èn foe gebroiki na sabi disi di e kon moro foeroe foe dini Jehovah. — Ef 6:11, 14-16; Kol. 1:9-11.

18. (a) O bigi wi frantwortoe moe de leki kownoekondre prékiman? (b) Fa wi kan gebroiki na rai foe Romeini 12:10, 11 èn 15:5, 6?

¹⁸ Joe de wan kownoekondreprékiman? Efoe dati de so dan joe e teki wan sroto-positsi na ini na disiten theocratis maatschappij. A kan de, dati joe leki wan kristen, di gi joesrefi abra abi tra frantwortoe ete ini na gemeente. Tokoe joe moe de wan faja bedinari na ini na veld, foe kan libi akroederi Jehovah nen. Meki wi alamala, ini bradalobi èn ini safoe lobi gi makandra èn ini wánfasi tan de faja ini na geest èn ’dini Jehovah leki srafoe’ (Rom. 12:10, 11). Awinsi sortoe druk Satan nanga en grontapoe e tjari kon na tapoe wi, wi moesoe tan gi glori na Jehovah leki wán skin, ija, „ini wánfasi èn nanga wán mofo”, foe di wi e préki en kownoekondre prakseri.

19. (a) Fa wi kan kakafoetoe na wan boenfasi gi ferfolgoe nanga tra problema? (b) Sortoe rai Zefanja 3:8, 9 e gi wi?

¹⁹ Foeroe foe wi abi foe doe nanga ferfolgoe ofoe moesoe hori doro na ini kontren pe sma no e teki wi préki na wan boen fasi. Ma meki wi tan sori na srefi jejefasi di Kristus Jezus ben abi (Joh. 16:33; 1 Petr. 4:1, 2). Meki wi sori leki wan wánfasi skin troetroe dek’ati — na insé jejekrakti di e tan tanapoe na ondro druk èn di no e broko na pisipisi (Ps. 27:14; Fil. 1:14). No meki wi anoe kon slap noiti ini a tori foe na soekoe foe den sma di gersi skapoe. Meki wi ’tan ferwakti’ Jehovah èn en dé foe aksi frantwortoe èn dini en skowroe na skowroe aladi wi e kari en nen èn wi e taki na „soifri tongo” foe na waarheid. — Zef. 3:8, 9.

20. (a) Fa wi kan feni a troetroe kolokoe? (b) Fa Jesaja 11:6-9 ben kontroe na wan apartifasi?

²⁰ Meki ala sma di e gi Gado grani ’weri na njoen sma di den moesoe de, èn di ben meki na a wani foe Gado na ini troe regtvaardikifasi èn na ini loyaliteit’ (Ef. 4:24). Disi e tjari kolokoe kon. Wi e feni disi na ini wan agersifasi na ini Jesaja 11:6-9, pe den e taki foe na jeje paradijs di de now na mindri Jehovah pipel di kon boen baka. Fa joe e feni drape vréde nanga wánfasi! Fa a de wan toemsi moi sani foe si dati den gridi, nanga ogri égifasi foe libisma no de moro! Na a kaba foe den wortoe di skrifi foe paradijstoestand wi e feni den wortoe disi: „Sma no sa doe no wan ogri moro èn den no sa pori sani na tapoe mi heri santa bergi, bika na grontapoe séker sa kon foeroe nanga na sabi foe Jehovah soleki den watra e tapoe na gron foe se.” Jehovah „santa bergi” foe wánfasi anbegi poti stéfi ini a ten disi na ala pe na grontapoe. Foe san-ede? Foe di Jehovah ben tjari en kotoigi kon so fara foe gi en nen grani „ini wánfasi èn nanga wán mofo”. Na a fasi dati „na grontapoe”, na jeje grondgebied foe en pipel, kon foeroe nanga „na sabi foe Jehovah”.

21. Foe san-ede meki wi moe prati someni leki wi kan den tijdschrift?

²¹ Na ini na krakti, di Jehovah e gi, meki wi prati someni leki wi kan prati foe Na Wachttoren nanga na sisa-tijdschrift Ontwaakt! Èn meki wi doe disi na ini a howpoe, net leki a ben de so dati ini ala oekoe foe a grontapoe èn ala famiri foe den naatsi ’sa memre en èn sa drai kon baka na Jehovah’. — Ps. 22:27; Openb. 15:4.

[Foetoewortoe]

Wan loekoe baka foe na artikel disi

◻ Fa na fosi-jarhondro gemeente ben e wroko?

◻ Sortoe winimarki na simultaan kon na doro foe Na Wachttoren sa abi sondro degedege?

◻ Sortoe toemsi moi bakapisi den ben doro na ini 1984 nanga na tijdschriftwroko?

◻ Fa wi kan abi jeje go na fesi srefi na ini ten foe tesi?