Fa joe kan ondrofeni a vrede foe Gado moro foeroe
„O efoe soso joe ben sa poti troetroe prakseri na mi komando! Dan a vrede foe joe ben sa tron netleki wan liba, èn na regtvaardikifasi foe joe leki den skwala foe na se.” — JESAJA 48:18.
1. San de fanowdoe efoe wi wani ondrofeni vrede someni leki a kan?
DEN sma di e teki prati geregeld na wan studie foe a bijbel foe a gemeente nanga jepi foe a tijdschrift disi, e ferstan o warti a vrede de di Gado e gi, èn den wani foe abi na vrede dati sote. A moro bigi pisi foe den e prisiri kaba na ini disi, sondro degedege. Ma a no ala sma e ondrofeni na vrede dati so foeroe leki a kan. Foe san-ede? Jehovah e taki foe den sma di ben sa njan boen foe a vrede foe Gado: „Mi, Jehovah de oen Gado, di e leri oenoe foe kisi wini gi oensrefi, di e meki oen kon tapoe na pasi di oen moe waka. O efoe soso joe ben sa poti prakseri na mi komando! Dan a vrede foe oenoe ben sa tron netleki wan liba, èn na regtvaardikifasi leki den skwala foe na se. — Jesaja 48:17, 18.
2. (a) San den wortoe ’poti prakseri’ wani taki? (b) Na omeni foe den komando foe Gado wi moe poti prakseri? (1 Johannes 5:3)
2 A e taki foe ensrefi, dati a de wan boen sani gi ibriwan sma foe e fisiti komakandra pe den e taki foe a bijbel. Ma soso den sma di e poti prakseri na Jehovah komando, foedi den e poti den persoonlijk ini den libi èn e saka densrefi na den ondro troetroe e njan boen foe a vrede foe Gado. Kontren de tapoe san joe moe doe disi moro foeroe? (2 Petrus 1:2) A no nofo te wi e doro wan toe foe den sani san Gado e aksi ma e komoto a pasi foe trawan di no e fiti wi ofoe di wi e feni moro moeilijk. Di Didibri ben proeberi foe kisi.Jezus Kristus go sofara foe waka na baka en denki pe a ben prakseri ensrefi nomo, Jezus nanga wan faste bosroiti ben piki: „Boekoe taki: ’Libisma no sa libi wawan foe brede, ma foe ibri taki di e komoto foe Jehovah mofo.’” — Mattéus 4:4.
3. Sortoe pisi foe wi libi moesoe tjari kon akroederi nanga Jehovah pasi efoe wi wani abi vrede psa marki?
3 Den komando foe Gado abi foe doe nanga ibri pisi foe wi libi. Ini na fosi presi den abi foe doe nanga wi matifasi nanga Jehovah. Dan den abi krakti na tapoe joe fasi foe loekoe sani ini a tori foe en organisatie di de foe si èn na kristen diniwroko, na fasi tapoe fa wi e handri osofamiriman èn wi fasi fa wi e handri nanga sma foe na grontapoe. Den sma di e poti serjoesoe prakseri na Jehovah komando ini a tori foe ala den afersi disi e kisi blesi foe vrede psa marki. Meki wi go loekoe pikinso wantoe sani di kan jepi wi foe ondrofeni dati persoonlijk.
Joe moe poti prakseri na wantoe foe den afersi disi?
4. (a) Foe san-ede efoe wan sma e kisi bijbelstudie na oso èn a e go na a kownoekondrezaal, dati no de no wan enkri djaranti dati a de ini vrede nanga Gado? (b) San a sori foe bribi na ini Jezus Kristus wani taki? (Johannes 3:36)
4 No so langa psa kaba, joe ben bigin foe studeri na bijbel nanga Jehovah Kotoigi? Ofoe kande joe moksi srefi kaba wantoe moen ofoe srefi wantoe jari nanga a gemeente ini a presi pe joe e libi? Efoe dati de so, dan sondro degedege a sa gi joe prisiri dati a sabi foe joe foe den prakseri foe Gado ben kon moro foeroe. Ma dati wan szma e prisiri nanga wan bijbelstudie ofoe e feni en wan switi sani foe go na a kownoekondrezaal, no e boewijsi ete taki a de ini vrede nanga Gado. Wi alamala gebore ini sondoe èn wi kan kon soso ini wan boen matifasi foe vrede nanga Gado nanga jepi foe Jezus Kristus (Jesaja 53:5; Tori foe den Apostel 10:36). Soso wan passief bribi ini Jezus no e tjari a vrede dati kon. Wi no moe ferstan wawan dati wi abi na ferloesoe-ofrandi fanowdoe, ma wi moe sori ooktoe bribi ini na waarde foe Jezus ofrandi èn morofara sori na bribi dati foedi wi e gi jesi na en komando (Jakobus 2:26). Wan foe den komando di Jezus ben gi di a ben de na grontapoe, de dati sma di ben wan tron en discipel, ben moe meki den dopoe den ini watra (Mattéus 28:19, 20). Joe ben maki den doekroen joe go ondro watra leki wan symbool dati joe ben gi joesrefi abra na Jehovah, nanga jepi foe Jezus Kristus?
5. Foe san-ede a gi ensrefi abri na Jehovah èn a teki foe dopoe de prenspari stap di wi moe doe foe de ini vrede nanga Gado?
5 Wan sani de ini joe libi sodati den no kan feni joe boen foe na dopoe? Efoe joe sabi dati dati de so, ofoe efoe ini a pisten foe a studie foe joe joe kon sabi dati disi de so, dan meki reti pasi gi joe foetoe wantewante. Ferstan dati ibri pasi ofoe ibri libifasi di e meki dati wan sma no kan dopoe, e tapoe en ooktoe dati a de ini vrede nanga Gado. No draidrai, now di na okasi de ete. Soleki na ini 1 Petrus 3:21 tanapoe, dan sma di wani kisi wan boen konsensi foe Jehovah Gado, moe gi densrefi abra fosi na en tapoe na fundamenti foe na ofrandi foe Jezus Kristus, moesoe meki den dopoe en leki wan symbool foe na gi di a gi ensrefi abra èn foe doe a wani foe Gado. Dan den e kisi a vrede di e kon foedi den abi wan boen konsensi leki wan bakapisi foe wan boen positie afesi foe Gado; a vrede dati na no wan tra fasi wan sma kan kisi en. A no de foe taki dati disi de soso wan bigin.
6. Foe san-ede wi fasi di wi abi gi gemeente kamakandra e bepaal efoe wi kan abi vrede?
6 Loekoe moro fara efoe joe e fisiti den gemeente komakandra geregeld èn e teki prati na den foe so fara joe mogelijkheid e gi pasi. Den komakandra disi e teki sowan bigi presi ini joe libi dati joe no e gi pasi dati na grontapoe ofoe tra persoonlijk activiteit e tjari broeja kon tapoe dati? Joe e sreka joesrefi tapoe den komakandra èn joe e feni en leki wan grani foe teki prati na den? Ooktoe nanga den sani disi e bepaal efoe wan sma sa abi vrede? Foe san-ede? Foedi Gado jeje de na a pipel foe en di kon makandra, èn vrede de wan froktoe foe a jeje dati (Galacia 5:22). Tapoe den konmakandra disi wi e kisi jepi foe ferstan den sani di Jehovah e aksi, èn disi de fanowdoe sodati wi kan doe san e plisi en. Djaso wi e leri ooktoe fa wi moe meki vrede go a fesi ini a gemeente, na oso, na skoro èn na tapoe wi grontapoe wroko. Den komakandra foe wi kan teri leki wan foe den moro prenspari fasi tapoe san na leri foe Jehovah e kon na wi, èn soleki bijbel e meki wi si dan den sma di kisi leri foe Jehovah e prisiri na ini vrede psa marki. — Jesaja 54:13.
7. San wi moe doe foe poti den sani di den e taki foe den na tapoe komakandra na ini wi libi?
7 Wan punt di de krosbé foe disi èn di e aksi wi prakseri, de dati wi moe poti san wi leri go ini wi libi tapoe wan progressieffasi. Wi no wani de leki den Israëlsma foe soema Jehovah ben taki dati den ’e jere alaten baka, ma no ben e ferstan’ (Jesaja 6:9). Èn wi no wani ooktoe foe de soleki den sma di Jehovah ben ferteri Ezechiël foe den — ma di ben gwenti foe arki Jehovah ma no ben e doe san a ben taki foedi den teki foe prisiri den lostoe di no ben krin ofoe di ben de tapoe goedoe! (Ezechiël 33:31, 32) Den sma di na ini a ten disi ben sa hari go na Jehovah oso èn ben sa kisi en boenati, na a tra sè den e skrifi foe den leki sma di e taki: „Meki wi go na a bergi foe Jehovah èn na a oso foe na Gado foe Jakob èn en sa leri wi foe den pasi foe en, èn wi sa waka den pasi foe en” (Micha 4:2). Efoe wi teki troetroe na leri di wi kisi tapoe wi komakandra, efoe foe ibri komakandra moro pikinso wi e poeroe na ini wan punt di wi abi persoonlijk fanowdoe èn e wroko na dati morofara, dan wi sa piki froktoe foe vrede. Soleki Jezus ben taki na ini Lukas 11:28: „Kolokoe den sma de di e jere a wortoe foe Gado èn e ondrow en!”
8. Foe san-ede na teki prati na a velddienst someni leki a kan akroederi wi omstandigheden, sa tjari wini gi wi persoonlijk?
8 Na a joeroeten foe wi komakandra krakti e poti foe eksempre na tapoe o prenspari a de foe abi wan prati dorodoro na a préki foe a Kownoekondre foe Gado èn foe jepi tra sma foe tron discipel (Mattéus 24:14; 28:19). Sortoe presi den activiteit disi e teki ini wi libi? Efoe troetroe wi e poti wi prakseri tapoe san Jehovah e taigi wi nanga jepi foe en Wortoe èn nanga jepi foe en organisatie, dan wi sabi dati disi de a moro prenspari wroko di e doe na ini a ten disi na grontapoe (Openbaring 14:6, 7). Èn a de wan sani di ala sma sabi dati den sma a mindri wi di de ini a foeroetendienst — net soleki den sma di, awinsi den no kan pionier, troetroe de nanga faja ini a diniwroko — de kolokoe na wan aparti-fasi. Na vrede di den abi no de soso wan pikin dropoe watra, ma soleki Jehovah taki a e tron „net leki wan liba” (Jesaja 48:18). Joe e ondrofeni disi na a fasi disi? Gi ibriwan foe wi disi de wan sani di de mogelijk.
9. San kan jepi wi foe hori na vrede di Gado gi, srefi efoe wi de ini serjoesoe moeilijkheid?
9 Ma dati wi e poti prakseri tapoe ala a rai disi no e meki dati na druk foe a libi na ini a disiten seti foe sani no kan kisi wi. Ma awinsi o moeilijk bepaalde situatie mag de ooktoe, Gado e gi a djaranti foe en lobi jepi efoe wi go na en (1 Petrus 5:6, 7). Wi ben leri foe soekoe Jehovah jepi nanga tiri na ala sani san wi a doe, foe go na wan fri fasi ini begi na en, èn baka di wi ben doe san wi kan doe na moeilijk situatie foe trowe na lai foe wi tapoe Jehovah èn libi den ini en anoe nanga ala fertrow? (Odo 3:5, 6; Psalm 55:22) Filippi 4:6, 7 e gi na dekati di e waran na ati: „No broko ede foe noti, ma meki na ini ala sani nanga jepi foe begi èn tranga begi makandra nanga taki tangi den begi foe joe kon de bekenti na Gado, èn a vrede foe Gado di e psa ala prakseri, sa kibri joe ati èn jejekrakti nanga jepi foe Kristus Jezus.” Fa disi de wan toemsi moi seti! Joe ben leri foe njan boen dorodoro foe na vrede foe Gado di na a fasi disi de wan sani di de mogelijk?
Feti alaten doro baka vrede
10. San de foe wi sé fanowdoe baka te wi soekoe vrede?
10 Efoe wi abi na vrede dati kaba, dan wi no kan gi wisrefi primisi foe lolo nanga en tapoe wan mi-no-ke-fasi. A de fanowdoe dati wi doe moeiti fajafaja foe kibri na vrede dati. Foe dat’ede 1 Petrus 3:10, 11 e taki: „A sma di wani lobi a libi èn wani si boen dé, . . . meki a soekoe vrede èn feti a baka dati.” Te wan sma feti baka wan marki di a ben poti na en fesi, èn a ben doro en, dan a ben de wan don sani foe a handri moro fara na en tapoe wan mi-no-kefasi. Baka te wi go soekoe vrede èn ben doro a marki dati, dan wi moe loekoe boen den sani di ben sa kan pori na vrede dati. Moro ete, wi moe feti a baka den sani di kan meki a vrede kon.
11. (a) Sortoe fasi ben sa kan tjari wi matifasi nanga Jehovah kon ini kefar? (b) Tapoe sortoe momenti te joe loekoe en boen wi moe aksi foe a jepi foe Gado efoe wi kon tanapoe a fesi tesi? (Mattéus 6:13)
11 Efoe wi kon na ini vrede nanga Gado nanga jepi foe den sani di a ben sorgoe foe den, dan wi moe loekoe boen no foe pori na matifasi dati foe di wi e go doe sondoe. Foedi wi alamala de onvolmaakti, dan a no de foe taki dati wi alamala e sondoe. Ma a de wan kefarlek sani efoe wan sma e regtvaardiki ini en égi ferstan den jejefasi nanga libifasi di ai sori èn di Gado no e feni boen. Wi no kan gi wisrefi pasi foe hari wi skowroe eenvoudig èn taki: „Na so mi de kaba” (Romeini 6:16, 17). Na presi foe regtvaardiki ogridoe, wi moe abi berow foe en èn begi Gado tranga foe gi wi pardon tapoe na gron foe na bribi foe wi na ini na ofrandi foe Jezus. Wi moe leri ook foe go na Gado bifo wi doe ogri na presi foe proeberi foe feti a feti wi wawan, èn te foe kaba fadon èn dan begi foe kisi pardon. Nanga a jepi foe Gado wi sa man foe weri na njoen persoonlijkheid, di ben meki akroederi a wani foe Gado ini troe regtvaardikifasi èn loyaliteit”. — Efese 4:20-24.
12. (a) Na sortoe tra matifasi wi moe poti prakseri efoe wi wani abi vrede? (b) San den e aksi na ini disi foe wi?
12 Abi vrede de ooktoe wan sani di e anga foe wi matifasi nanga tra sma, èn dati no de foe taki. Troe kristen e dini Gado leki sma di de wan pisi foe wan organisatie; den de wan „gemeenschap foe brada” (1 Petrus 2:17) Soleki Jezus ben taki afesi foe en bakaman, dan den e de sma di tra sma e si wantewante foe na lobi foe den gi makandra (Johannes 13:35). Ma no wan foe den de volmaakti. Foe wi ègi onvolmaaktifasi ede èn di foe trawan meki wi sa moe begi fajafaja ini a tori foe bepaalde situatie kande èn moe wroko tranga foe loesoe-problema. Hebrewsma 12:14 e gi wi dekati: „Feti na baka vrede nanga ala sma.” Èn ini na fasi fa wi de nanga wi brada nanga sisa wan spesroetoe ferplekti de a tapoe wi foe hori doro na ini a feti a baka vrede. Na ini 1 Thessalonika 5:13 den e taki sjatoe: „Hori vrede nanga makandra.” Dati no wani taki wawan dati wi no mag foe teki wraak, ma dati wi moe meki a vrede go afesi foedi wi e doe a fosi stap foe meki vrede kon baka èn de klarklari ini a belang foe na vrede foe fiti oensrefi. — Efese 4:1-3.
13. (a) San wi kan doe foe kan meki na vrede nanga sma di no de ini bribi go na fesi, ma fa wi e sori taki na vrede na Gado e kon tapoe a fosi presi? (b) Fa wi kan abi vrede aladi djoegoedjoegoe de lontoe wi?
13 Ma dorosè foe a gemeente a no ala sma de klari foe lobi vrede. Foe dat’ede meki Romeini 12:18 e gi na rai di abi en gron tapoe a troe foe a tori: „Hori vrede nanga ala sma efoe a kan, foe so fara a e anga foe joe.” Ma foe proeberi foe meki a vrede go a fesi no wani taki dati wi moe skeki wisrefi ini a tori foe Jehovah regtvaardiki wet. Wi kan fiti den pisten tapoe san bepaalde sani moe doe, ma wi sabi dati a ben sa de wan sani di no de wan ferstan sani foe tapoe foe fisiti gemeente komakandra ofoe foe abi wan prati na a velddienst soso foe hori vrede nanga wi trowpatna ofoe famirman. Èn wi sabi dati Jehovah no e feni en boen efoe wi sa teki prati nanga sma na wi wrokope ofoe skoromati na godelowsoe wroko soso foe de boen ini den ai. Wi e si dati troe vrede de soso gi den di na ini na fosi presi e abi vrede nanga Gado, gi den di lobi Jehovah wet èn e waka na ini den pasi foe en. A vrede dati wi e feni moro diri leki ala tra sani (Psalm 119:165). A de troe dati kande lontoe wi djoegoedjoegoe de. Sma di no de ini bribi e meki trobi, stré nanga makandra kande. Den e skempi wi kande foe wi bribi ede. Ma wi sabi fa wi moe tjari wisrefi akroederi san wi ben lerl foe a wortoe foe Gado. Te wi e tan waka na baka wan libifasi di de ini akroederi nanga den regtvaardiki pasi foe Jehovah, dan na vrede di e teri morofoeroe no sa foefoeroe poeroe foe wi anoe. — Teki gersi nanga Psalm 46:1, 2.
14. San e jepi wi foe kibri wi inisé rostoe èn wan prisiri loekoe, awinsi wi e njan pina foe persoonlijk benawtoe?
14 Tapoe a laatste neti bifo en dede Jezus ben taigi den getrow apostel foe en: „Den sani disi mi e taigi oenoe, sodati nanga jepi foe mi oenoe mag abi vrede. Ini grontapoe oen abi benawtoe, ma hori dekati! Mi wini grontapoe” (Johannes 16:33). Ija, wi e njan pina foe troe foe benawtoe. Leki kristensma wi e ondrofeni difrenti sortoe foe ferfolgoe. Wi e njan pina kande foe kroektoedoe, èn foeroe abi foe doe nanga serjoesoe siki. Ma na vrede foe Gado e hori wi tanapoe awinsi ala den sani disi de. Foedi wi kisi leri foe Jehovah meki wi sabi foe san-ede kristen e kisi ferfolgoe. Wi no e aksi wisrefi nanga foeroe degedege foe san-ede foeroe kroektoedoe de èn foe san-ede wi abi foe feti nanga siki. Wi sabi san a ten di e kon e tjari kon nanga en. Wi sabi dati leki wan bakapisi foe Jezus getrow waka nanga libi èn en ofrandi dede fri de wan seker sani. Boiti foe dati, wi sabi dati wi, awinsi sortoe problema e kon now a tapoe wi, kan go ini begi na Gado, na ini na fertrow dati na wan lobifasi a e sorgoe foe wi èn nanga jepi foe en jeje sa hori baka gi wi. — Romeini 8:38, 39.
15. Fa a doe kon dati na vrede di Kristus meki kon de, no de soleki a vrede di a grontapoe e pristeri?
15 Nanga leti Jezus ben taki na ini Johannes 14:27: „Vrede mi e libi gi oenoe, mi vrede mi e gi oenoe. No soleki a grontapoe e gi dati, mi e gi en na oenoe. No meki oenoe ati skreki èn oen no krempi ini wan foe frede ede.” A de seker troe — a grontapoe no abi noti san joe kan teki gersi sref’srefi nanga na vrede di Gado e gi nanga jepi foe Jezus Kristus. Nanga dati wi kan de tranga awinsi situatie de di ben sa meki trawan lasi ala howpoe.
16. (a) San na a ferwakti foe den sma di e gi wan hé waarde na a vrede di Gado e gi? (b) Fa wi kan sori dati wi e warderi troetroe a vrede dati?
16 Fa wan toemsi moi tamara de na fesi foe ala sma di e teki now a vrede di Gado e gi èn e gi en na prenspari presi di a e ferdini na ini den libi! Heri esi na grontapoe di e libi na ini féjantifasi nanga Gado sa poeroe a pasi. Baka wan pisten dan na heri mekisani sa tjari kon na wan ini vrede dorodoro nanga jepi foe den regtvaardiki wet foe na universele Soeverein. Meki na tangi foe wi gi na bigi ferwakti disi boewégi wi now foe doe wi wroko krinkrin ini wanfasi nanga dati. Meki wi alamala arki boen na a leri foe Jehovah èn sorgoe dati en komando spikri krakti go ini wi ati, sodati wi lobi den pasi foe en troetroe èn e doe san a wani. Soleki Odo 3:1, 2 e ferklari: „Mi manpikin, no frigiti mi wet, èn meki joe ati poti ensrefi tapoe mi komando, bika langa foe dé èn jari foe libi èn vrede joe sa kisi.”
Overzichtaksi
◻ Akroederi Jesaja 48:18 dan san de fanowdoe foe abi vrede psa marki?
◻ Te wi doe sortoe sani wi sa ondrofeni a vrede foe Gado moro foeroe?
◻ San den e aksi foe wi ini a tori foe a kibri foe vrede nanga wi brada nanga sisa?
◻ Fa wi kan hori vrede srefi efoe sma di no de ini bribi e lontoe wi?
[Prenki na tapoe bladzijde 6]
Dopoe
[Prenki na tapoe bladzijde 7, 8]
De alaten na komakandra
Doe san wi e leri
[Prenki na tapoe bladzijde 8]
Teki prati dorodoro ini na velddienst
Trowe wi lai tapoe Jehovah