No weri fu du san de bun
„Meki wi no weri fu du san de bun, bika na a reti ten wi sa koti efu wi no weri.” — GALASIA 6:9.
1. Sortu wroko Yesus ben gi en bakaman?
Fa a de wan tumsi moi activiteit di kristensma e du leki wan pisi fu na anbegi fu den! A skrifi poti krin na ini na gebod: „Go fu dat’ede èn meki disipel fu sma fu ala natie, dopu den . . . èn leri den fu hori ala san mi ben komanderi unu. Èn luku! Mi de nanga unu ala den dei te na a bosroiti fu na seti fu sani” (Mattéus 28:19, 20). Yesus srefi ben gi en disipel na komando dati wan leriwroko di ben sa de na a heri gronatpu ben musu du.
2. (a) Fu san-ede wi kan taki dati a meki fu disipel ben de wan prenspari èn wan tumsi bun wroko? (b) Sortu marki wi e dini nanga na wroko di de na ini a meki fu disipel?
2 Na komando fu meki disipel ben de wan fu den lasti ferklari fu Yesus na en fosi disipel bifo a ben opo go na hemel. A no ben sa de wan sani di ben e go fu wan tumsi prenspari wroko? Iya, fudi a du fu en ben sa yepi sma fu kisi libi (1 Timóteus 4:16). Dati e meki a de wan tumsi bun wroko. A e gi bun bijbelleri na den sma di e poti prakseri tapu na Kownukondreboskopu, èn a preikiwroko de wan warskow gi sma di e poti en na wan sei (Lukas 10:10, 11). A du fu na wroko disi e meki sma kon sabi tru kristen fu dat’ede ooktu èn a gi di den e gi jesi na tra leri fu Yesus. — Yohanes 8:31.
3. (a) Fa Yesus disipel ben du tapu Yesus eigi eksempre èn gebod? (b) Sortu yeyefasi Yesus ben bow na ini en disipel?
3 Leki na Bigi Leriman Yesus ben gi en bakaman wan tumsi moi eksempre. A ben gi leri na publiki èn a ben meki disipel fudi a ben preiki ’na bun nyunsu fu na kownukondre’ (Mattéus 9:35). Nyun disipel di ben waka na en baka densrefi ben meki disipel, bika wan tru disipel na „wan sma di e teki den leri fu wan tra sma èn di e yepi fu panya den”. Biginbigin den ben musu tan ini a meki fu disipel na den dyu èn proselietsma. Ma Yesus bakaman ben gi en yesi „sondro fu stop” na en gebod; fu ’go alaten baka’, awinsi na wan feianti fasi sma ben de na a veld dati? Iya futru, den ben go „na den lasi skapu fu na oso fu Israël”, teleki na ini 35 G.T. den fosi heiden den ben tron bribiman (Mattéus 10:5, 6; Tori fu den Apostel 5:42). A tori e taki dati den disipel ’ben furu Yerusalem nanga a leri fu den’ (Tori fu den Apostel 5:28). Den no ben stop nanga a tumsi moi wroko fu den. A presi fu dati den ben du en getrow.
„Na veld na a grontapu”
4. Nanga sortu yeyefasi Yesus bakaman ben du na wroko fu den di ben kon moro bigi?
4 Yesus ben sori dati na veld ben sa de „sma fu ala natie” (Mattéus 28:19). Ini wan agersitori di e go fu na sai fu Kownukondresiri a ben taki: „Na veld na a grontapu” (Mattéus 13:38). Kristensma ben sa de sobun na alasei Kownukondre-„kotoigi” fu en. Agen den ben sa ’go alaten baka’, a tron disi „te na a moro farawe kontren fu na grontapu” (Tori fu den Apostel 1:8). Na apostel Paulus ’ben hori ensrefi intensief nanga na wortu’ èn wi kan de seiker dati disi ben de ooktu so nanga tra kristen. — Tori fu den Apostel 8:5.
5. Fa Yesus ben sori dati a ben fruwakti dati en disipel ben sa de fayafaya bezig nanga na preiki-wroko teleki na disi ten seti ben sa feni en kaba?
5 Yesus ben fruwakti dati na kotoigi activiteit ben sa hori kristensma bezig srefsrefi, teleki a disi ten seti fu sani ben sa feni en kaba. Disi e kon na krin ini san a ben taki na fesi fu na kristen diniwroko èn na gebied di den ben go wroko na ini. Yesus ben taki: „Na bun nyunsu disi fu na Kownukondre sa preiki na a heri grontapu leki wan kotoigi gi ala natie èn dan na kaba sa kon.” — Mattéus 24:14.
6. Olanga na Kownukondrepreiki sa go doro ete, èn fa disi mu abi krakti tapu wi yeyefasi?
6 Di Yesus ben gi na gebod fu preiki na a heri grontapu na Kownukondre, èn fu meki disipel, a ben sabi dati sowan tumsi moi wroko ben sa doro wan dei en heimarki soleki disi ben de ooktu so gi na dyu veld. Ma den ben sa doro na marki di den ben abi a prakseri. „Dan”, soleki a ben taki, „a kaba sa kon.” Fu dat’ede meki Yehovah Kotoigi e go nanga fertrow èn nanga prisiri doro te na a kaba nanga a wroko di den kisi. Na dati e yepi den na ini wi ten fu go doro nanga a wroko teleki a kon klari.
Fa fu du a wroko
7. San ben de a thema fu Yesus diniwroko èn di fu en disipel?
7 Yesus ben leri en disipel fa den ben mu du a publiki diniwroko fu den. Nanga faya den ben gi yesi na en gebod fu „go”. Di Yesus ben gi den leri fu na kotoigiwroko fu den, a ben taigi den: „Preiki tapu yu pasi èn taki: ’A kownukondre fu hemel kon krosbei kaba’” (Mattéus 10:7). Dati ben gi na boskopu fu den na srefi Kownukondrethema di ben marki en diniwroko. A ben sa de bun nyunsu gi opregti sma fu ati. Yesus srefi ben tapu di en bakaman ben bigin kaba na nanga a wroko fu en? Nono, kwetkweti, bika „di Yesus ben kon klari now nanga a gi fu instructie na den twarfu disipel, a ben hari gwe fu drape fu go leri sma èn go preiki na ini den foto fu den”. — Mattéus 11:1.
8. (a) Pe èn fa Kownukondrepreikiman ben mu go na den sma? (b) Fu san-ede a de wan sani di fiti fu go nanga bun nyunsu na wan sma oso? (c) Sortu winimarki a abi te wi taki na ososma odi na a yoisti fasi?
8 Pe èn fa den Kownukondrepreikiman disi ben musu kon miti sma? Yesus ben taigi den: „Te unu e go na ini a oso, taki na osofamiri odi” (Mattéus 10:12). Fu go nanga a bun nyunsu na wan sma oso, e gi na ososma wartifasi, fudi a e gi en na okasi tapu en eigi kontren fu hori ensrefi bezig nanga na Kownukondre boskopu. No wawan yu abi den fasi fu taki odi di sma gwenti, na maniri fasi fu hori sma na prakseri fu bigin wan takmakndra, ma na tapu fu dati a de soso wan winimarki efu wan switi èn bun odi kan meki dati wan fisiti pe sma no kari yu kon tron wan switi pe den e bari yu wan switi kon. (Teki gersi nanga Mattéus 28:9; Lukas 1:28.) A toon fu na stem èn a piki fu na sma na a doro e ferteri yu ooktu furu fu en yeyefasi. Yu musu man fu si sowan sani bifo yu go morofara, fudi a sabi disi o meki en moro makriki gi yu fu fiti san yu o go taki na den fanowdu fu na ososma. — Teki gersi nanga Tori fu den Apostel 22:1, 2; 23:6.
9. San e sori dati a no ala sma ben sa yere na Kownukondre boskopu nanga warderi èn fa wi mu de efu sma no e sori nowan belangstelling?
9 Yesus ben meki en disipel sabi dati a no ala sma ini wan kontren ben sa teki a bun nyunsu na wan bun fasi. A ben taki: „Sortu foto ofu sortu dorpu yu e go na ini ooktu, ondrosuku suma de drape di warti fu en.” Efu ala sma ben sa teki na Kownukondreboskopu, dan a no ben sa abi fu taki fu ’ondrosuku’. San ben musu de a fasi fa sma ben sa du efu sma no ben sori belangstelling gi na boskopu? „Efu wan sma no ben sa teki yu na wan presi ofu no ben sa arki na yu wortu, libi dan na oso ofu na foto dati èn seki na stof puru fu yu futu”, gwe na ini vrede èn libi den bakapisi abra na a krutu fu Yehovah. Mattéus 10:11, 14.
Na situwasi na ini wi ten
10. San Yehovah Kotoigi e taki fu na Kownukondrepreikiwroko?
10 Fudi Yehovah Kotoigi e gi yesi na a kristen komando meki den e doro na a heri grontapu nanga na Kownukondreboskopu. Na so A. P. Wisse, wan koranti skrifiman na ini Nederland ben skrifi: „Den de tra fasi leki tra sma. Wan pisi fu na difrenti dati e kon fu na faya fu den fu preiki na evangelium. Den no e si na kristendom leki wan dini fu Gado nanga kathedraal, (kerki oso), nanga parochianen (kerkisma di ibriwan abi den fasti presi èn di na fasi fu anbegi fu den no e aksi moro furu fu den leki fu arki. Den e taki nanga a fri fu taki fu Paulus sondro frede nanga ibriwan sma di wani arki.” Sowan faya gi na diniwroko seiker Yehovah Gado ben blesi.
11, 12. (a) Sortu bun bakapisi ben kon ini yari di no psa solanga kaba na ini a diniwroko? (b) San e psa nanga gebied di de, omoro den nomru fu wi e kon moro furu? (c) Sortu aksi e kon na fesi?
11 Moro leki 3000.000 Kownukondrepreikiman e wroko now fayafaya na ini 210 kondre. Wi e si wan tumsi moi gro na ini nyun disipel — 1.246.204 ben teki dopu na ini den lasti seibi yari. Na blesi fu Yehovah tapu a wroko pe sma e gi densrefi krinkrin na ini de krin (Yesaya 60:8-10, 22). Iya, no moro mendri leki 40 kondre èn eilanti e teri wán kotoigi tapu ibri 300 ofu moro mendri sma di e libi drape, ofu wán tapu sowan 100 osofamiri! Boiti fu dati na ini son kontren fu kondre leki Canada nanga Guadeloupe a verhouding de wán Kotoigi tapu 45 ofu 50 sma ini a gebied fu wan gemeente — ibri preikiman soso tapu sowan 15 oso ofu moro mendri ete gi na oso-fu-oso prei-kiwroko! Furu fu den kontren disi ibri mun den e wroko na ini. Srefi na ini kondre pe na verhouding de moro hei, bepaalde foto gebied den e wroko m.oro furu nanga a kotoigi fu wi. Na ini Seoel, na ini na republiek Korea, son foto gebied den e wroko ibri feifi dei! Omoro na nomru fu wi e lon gro èn moro kotoigi e teki na pionierwroko èn na yepi-pionierwroko tapu den, dan omoro furutron wi sa de na a doro fu den naaste fu wi. Dati e gi problema?
12 Wi musu piki dat na ini son gebied problema de, gi Yehovah Kotoigi èn gi den sma di wi e kon na den doro. San e meki den problema e kon moro bigi ete, de a gro fu mi-no-ke fasi a mindri den sma ini furu kondre. We, wi sa stop safrisafri fu du wi tumsi moi wroko aladi wi e kon moro furu? Wi e kon na a bosroiti dati pikinmoro a wroko fu wi du kaba èn dati wi ben sabi fu feni ala den sma di ben sa teki a bun nyunsu na wan bun fasi èn tron disipel? Yu persoonlek e bigin kon weri èn kon bruya kande fudi alaten baka yu mu go fisiti densrefi sma di no e teki? San wi kan du fu kan tan hori na tumsi moi nivo fu activiteit fu wi?
Kibri na yoisti yeyefasi
13, 14. (a) Fa wi mu si na situwasi taki moro nanga moro wi e wroko na ini den gebied? (b) Fu san-ede wi no e meki den sma di „de sondro firi” no skreki wi? (c) Fa wi kan waka na baka na eksempre fu den apostel fu kakafutu gi den sma di e naki futu na den fisiti fu wi?
13 Na lusu e go moro furu fu wi yeye fasi leki kotoigi fu Yehovah. Meki na ini a fosi presi wi tan si alaten na positief sei. Dati fu wan hei verhouding fu preikiman tapu den sma di e libi ini wan kondre e meki moro furutron wi e wroko wan gebied, na wan sani di seiker ben sa sori ensrefi na furu presi omoro a wroko fu wi e doro en heimarki. Ma wi no ben begi fu dati? (2 Thessalonika 3:1). San wi e si now, mu meki wi prisiri èn mu overtoigi wi dati wi de na ini den lasti pisi fu na meki fu disipel! Na Kownukondre e preiki soleki Yesus ben taki na fesi. Èn ooktu te sma ’no e arki na wi wortu’, den e kisi warskow nanga yepi fu na faya Kownukondrepreiki fu wi. Go prakseri dati no wawan wi e meki disipel ma ooktu e preiki na bun nyunsu „leki wan kotoigi”. — Mattéus 10:14; 24:14.
14 Boiti fu dati wi kan fruwakti dati omoro na kaba e kon krosbei, omoro sma sa trowe na Kownukondreboskopu. Den sani di ben taki na fesi de krin, èn den ondrofeni fu Yesus èn Paulus e gi wi na garanti dati wi sa miti sma di de „sondro firi”, di na ati fu den „no e teki sani”. Fu dat’ede wi mu luku bun na ini a ten disi dati wi „no de sondro firi dati wi ben kisi wan wroko. Srefi na den sma di de sondro firi, wi mu go „alaten baka” (Yesaya 6:9-11; Mattéus 13:14, 15; Odo 10:21). Meki un taki dati a de so, dan dek’ati de fanowdu fu go alaten baka na den sma di e nakifutu na den fisiti fu wi. Ma nowan enkri gebied-situwasi fu sortu fasi tu no mag fu taigi wi: ’Tapu fu taki.’ Na presi fu dati wi mu begi netleki den apostel fu kisi fri fu „tan taki” sondro frede — awinsi ferferifasi ofu feiantifasi de — teleki a wroko du. — Tori fu den Apostel 4:18-20, 24-31.
15. Sortu dek’ati e gi na ini Galasia 6:9 èn fa dati mu abi krakti tapu a luku fu wi ini na fisiti fu den naaste fu wi?
15 Te yu luku en bun dan soso tu sortu sna de na ini ala wi gebied — den di na a momenti disi abi belangstelling èn den di no abi belangstelling. Fu dat’ede wi mu go doro fu ’ondrosuku suma de warti fu en’. Te wi e du disi, de den furu tumsi moi wroko di wi mu du leki kristen fu sori wi lobi gi Yehovah èn wi loyaliteit gi en.” „Meki fu dat’ede wi no weri fu du san bun, bika na a reti ten wi sa koti efu wi no kon weri” (Galasia 6:9). Fudi wi de now so krosbei na a kaba fu a seti fu sani, dan a no de a ten gi wi fu tapu nanga wroko ofu fu kon weri ma dati wi mu go doro fu go na wi naaste nanga a bun nyunsu fu na Kownukondre. Yehovah no taki ete dati a wroko klari.
Fu san-ede wi mu „tan taki”
16. (a) San na wantu fu den omstandigheden di kan kenki na fasi fa sma ini wan gebied e du? (b) Sortu eksempre fu a presi pe yu de kan gi fu wan fasi di kenki na den sma?
16 A sa yepi wi ooktu fu kibri wan yoisti yeyefasi efu wi go prakseri dati loyaliteit e sori gi Yehovah nanga na faya activiteit ini na preiki fu na bun nyunsu. Boiti fu dati gebied e tan kenki na tapu difrenti fasi. Sma e froisi, ofu den omstandigheden fu den e kenki. Kande na lasti tron di wi ben de na den doro den no ben abi belnstelling, ma na lasi fu wan wroko, na dede fu wan sma di ben de diri gi den, wan kenki ini na strei a mindri den supermakti di wani taki wan sani, wan seryusu siki — den sani disi èn tra kenki ete kan wani taki dati na tra tron di wi e kon, den e opo densrefi gi na boskopu. Tra sma ben kon sabi dati wan mati ofu famirman ben tron wan kotoigi fu Yehovah èn kande wani taki now pikinso nanga wi fu kon sabi san de na ini bribi fu wi di meki na kenki disi du kon.
17. Fa son sma e du now nanga na Kownukondreboskopu? Gi eksempre fu na presi pe yu de.
17 Go prakseri ooktu dati den sma di gro kon bigi na ini den yari di psa, abi now wan osofamiri, e si a libi moro seryusu èn e aksi sani di soso a Wortu fu Gado kan piki. Na so wan yongu mama ben kari tu kotoigi kon na inisei èn ben taki: ’Leki meisye noiti mi ben man frustan fu san-ede mi mama ben seni den kotoigi gwe èn dati en no abi belangstelling, aladi unu soso wani taki fu na bijbel. Mi ben teki na prakseri dati te mi gro kon bigi èn ben trow èn ben abi mi eigi oso, ben sa kari Yehovah Kotoigi kon na inisei èn fu aksi dn fu tyari na bijbel kon na krin gi mi.’
18. Fa na kerki situwasi di kenki abi krakti na tapu na gebied pe wi e preiki èn e leri sma?
18 Yu ben si dati son sma di yari langa no ben wani taki nanga wi èn ben prakseri dati den „ben kisi ferlusu kaba”, e aksi wi opregti aksi now? Fu san-ede? Fudi na ini na kerki denki fu den wan kenki ben kon. Den e ferteri now dati den ben kon bruya fu den sani di kon na krin fu hurudu waka nanga libi, politiek activiteit èn na fermosru fu kerki moni fu na sei fu son prenspari tv-domri di wan dei den ben poti fertrow na ini den. Kande seiker disi sa pasa moro furutron ete omoro den toestand na ini Babylon a Bigiwan e tan kon moro ogri te na ten fu na pori fu en doro. — Openbaring 18:1-8.
19, 20. San e sori dati wi no musu lasi ati fu go alaten baka na sma di e trowe na boskopu?
19 Ini ibri geval wi no mu lasi ati te a moro bigi pisi fu den sma e poti a boskopu fu wi a wansei. Baka te wi gwe fu den, dan kande seiker wi de ete na ini den prakseri. Na ini Canada wan oso-uma ben meki tu kotoigi di ben fisiti en kon frustan dati a no ben abi no wan belangstelling. Bakaten a ben go denki fu san den ben taki èn a ben wani feni den sodati den ben kan gi en piki tapu den aksi di ben kon na ini en prakseri. A ben dyompo go na ini en oto èn ben rij ini den strati fu en birti go-kon e suku den sondro fu a ben kan feni den. A ben stop? Nono, a ben fo na wan mati fu aksi ofu den ben de drape. Dati no ben de so, ma na mati ben taki dati na en wrokope wan Kotoigi ben de èn dati a ben sa tyari na uma dati di ben abi belangstelling kon ini kontakti nanga na Kotoigi disi. Disi ben abi leki bakapisi wan lo fisiti na a sma disi oso di ben abi belangstelling, pe a ben kari mati, birti, famirman èn sma fu en wrokope kon. Sontron 15 sma ben de èn sowan 430 buku nanga bijbel èn 2015 tijdschrift ben prati.
20 Furu sma abi warderi gi den fisiti fu wi. Ini wan brifi na wan bijkantoro fu na Wachttorengenootschap wan uma ben taki: „Mi e taki yu tangi dati yu ben poti wan bigi lobi ini na ati fu den sma fu yu bribi. Grantangi dati yu ben waka psa . . . èn ben prati na lobi fu Masra nanga tra sma. Na eenvoudig du disi e du someni gi tra sma. . . . Aladi kande son sma de tranga, trawan nanga mi-no-ke fasi èn trawan baka no e teki . . . toku a e du bigi bun dati wan sma waka psa fu memre yu na yeye sani. Mi e feni en wan bun afersi, fu taki so nanga makandra fu Masra.” Ini wan tra brifi wan ososma e aksi wi fu ’no meki sma fadon’ awinsi fa den e behandel wi. „Meki fu dat’ede wi no kon weri fu du san bun, bika na a reti ten wi sa koti efu wi no kon weri” (Galasia 6:9). A wroko disi abi a bun ati nanga blesi fu Yehovah, èn dati wi e teki prati na en e bewijsi na lobi fu wi gi en èn gi wi naaste (Mattéus 22:37-39). Meki wi klari a wroko sobun. — Teki gersi nanga Filipi 1:6.
21. (a) Pe na tyalansi didon, kande fu wan pisi fu go baka na gebied di wroko furu? (b) San wi sa go taki fu en na ini a tra artikel?
21 Wi mu si a tru tori disi ondro ai dati a no a fu de alaten den sma di e meki en muilek fu wroko wan gebied furutron. Sonttron na wisrefi. Wi e bigin kaba nanga negatief prakseri, fudi wi e denki dati wi sabi ala sma èn sabi kaba fa den sa du? Dati kan abi krakti na tapu wi yeye fasi èn kande seiker tapu na klank fu wi sten èn wi f esi. Wi gebroiki alaten baka den srefi methode èn wortu di wi ben gebroiki yari kaba? Now di a gebied e kenki, dan san wan dei ben waka bun, kande no sa kon abra tupu tra sma ’di de warti fu en’. Kande wi abi wan bun fasi fu go taki nanga wan sma èn wan nyun luku tapu wi wroko fanowdu. Meki wi go luku morofara san wi kan du sodati ’wi no sa kon weri ma kan koti na a reti ten’.
Yu kan tyari disi kon a krin?
◻ Fu san-ede wi no mu ’kon weri’ fu go nanga a bun nyunsu na wi naaste?
◻ Suma ben taigi wi fu meki disipel tapu a fasi soleki wi e du, èn san na den fondamenti marki fu a methode dati?
◻ Sortu situwasi ben du kon na ini furu gebied, èn san sa yepi wi fu kibri na yoisti yeyfasi na fesi den situwasi dati?
◻ Fu san-ede wi mu „tan taki” sondro fu tapu?