„Wi Wroko a Gebied fu Wi Furu Leisi Kaba!”
1 Oiti yu denki taki yu wroko a gebied fu yu so furu leisi kaba, taki no wan sma no de moro di yu kan teki gersi wan skapu? Kande yu denki so: ’Mi sabi san den sma o du. Fu san ede mi musu go baka na den wan di no wani sabi noti?’ A tru taki furu kontren de di wi e wroko furu leisi. Ma toku wi musu si disi leki wan bun sani, no leki wan ogri sani. Fu san ede? Luku den fo reide di e kari na ondro sei.
2 Gado Piki den Begi fu Wi: Yesus ben taki: „A kotiwroko bigi trutru, ma furu wrokoman no de. Begi a Masra fu a kotiwroko fu dati ede, fu a seni wrokoman go du a kotiwroko fu en” (Luk. 10:2). Someni tenti yari langa wi ben begi Yehovah fu moro wrokoman kon. Na furu presi, wi kisi now den wrokoman di wi abi fanowdu, èn wi e wroko a gebied moro furu. Wi no musu prisiri fu di Yehovah piki den begi fu wi?
3 Te Wi E Horidoro dan Wi Kan Abi Bun Bakapisi: Srefi na ini gebied di wi e wroko furu leisi, sma e arki a Kownukondre boskopu èn den e kon sabi a waarheid. Fu dati ede, wi musu tan go baka fu di wi wani feni moro opregtiwan (Yes. 6:8-11). Go neleki fa den fosi disipel fu Yesus ben du, „ibritron baka” na den sma na ini a gebied di yu kisi fu wroko, ala di yu e meki muiti fu hari a prakseri fu sma gi a Kownukondre fu Gado.—Mat. 10:6, 7.
4 Furu gemeente na ini Potogisikondre e wroko a gebied fu den ibri wiki, ma toku den e feni sma ete di yu kan teki gersi skapu. Wan sisa spesrutu, abi wan bun fasi fu si sani. A e taki: „Bifo mi e go fu du a diniwroko ibri mamanten, dan mi e begi Yehovah fu a yepi mi fu feni wan sma di wani studeri Bijbel.” Wan dei a ben seti sani fu studeri nanga den wrokoman fu wan barbier. Ma baka ten, wán sma nomo ben kon fu studeri. A sma dati ben taki: „Den trawan no wani studeri moro, ma mi wani.” Na ini wán mun a sma dati srefi ben abi tu Bijbelstudie. Syatu baka dati a ben teki dopu, èn baka ten a ben teki a pionier diniwroko!
5 A Preikiwroko E Du: Wi e preiki a bun nyunsu soleki fa Yesus ben taki dati na fesi (Mat. 24:14). Srefi na den presi pe sma „no wani arki wi”, den sabi taki a preikiwroko e du. Wi e fruwakti taki wan tu sma no wani yere noti, noso taki wan tu e gens a waarheid srefi. Ma toku wi musu warskow den wan disi na wan yoisti fasi taki a krutu fu Yehovah e kon.—Esek. 2:4, 5; 3:7, 8, 19.
6 Wi No Kaba Wroko Ete: A no de na wi fu taki o ten a preikiwroko musu tapu. Yehovah sabi soifri o ten a o tapu. A sabi tu efu sma de di kan teki a bun nyunsu ete na ini wi gebied. Na ini a ten disi, son sma e taki dati den no wani sabi a boskopu di wi e tyari. Ma kande den wan arki wan tra leisi te bigi problema miti den na ini den libi — kande den lasi den wroko, noso kande den kon siki hebi, noso kande wan lobiwan fu den dede. Fu di sma e desko trawan, noso fu di sma abi tumusi furu fu du fu kan arki, meki furu sma noiti no yere trutru san wi e preiki. Te wi go baka ala leisi na wan switifasi, dan kande dati o meki taki den o poti prakseri èn arki.
7 Den wan di gro kon bigi na ini den yari di no pasa so langa ete èn di abi den eigi osofamiri now, e teki a libi moro seryusu èn den e poti aksi gi densrefi di Gado Wortu wawan kan piki. Wan yongu mama di ben gi tu Kotoigi wan kari fu kon na ini en oso, ben taki: „Leki wan pikin meisje, mi no ben man frustan noiti fu san ede mi mama ben e yagi den Kotoigi gowe èn fu san ede a ben e taigi den taki a no wan sabi san den e fruteri, ala di den ben wani taki fu Bijbel nomo. Ne mi ben taigi misrefi taki te mi ben kon moro bigi, èn te mi trow èn abi mi eigi oso, dan mi ben o aksi Yehovah Kotoigi fu kon na ini mi oso fu taigi mi san skrifi na ini Bijbel.” Dati a ben du tu di den Kotoigi ben kon na en. Disi ben gi den Kotoigi prisiri trutru.
8 Yu Kan Wroko Moro Bun? A no de ala ten so taki den sma di wi e preiki gi, e meki taki a gersi wan muilek sani fu wroko a gebied ala leisi. Son leisi wisrefi na a problema. Wi e bigin denki taki den sma no wani arki srefisrefi? Dati kan abi krakti tapu a fasi fa wi e du èn kande tapu a fasi fa wi e taki noso tapu a fasi fa wi e luku. Sori taki yu e denki bun fu den sma èn taki yu e prisiri. Pruberi wan nyun fasi fu taki nanga den sma. Kenki a pristeri fu yu, èn meki muiti fu a kon moro betre ibritron baka. Kande yu kan kenki a fosi aksi di yu e poti noso kande yu kan gebroiki wan tra tekst te yu e taki nanga sma. Aksi tra brada nanga sisa sortu sani e wroko heri bun na ini a gebied. Wroko nanga difrenti preikiman nanga pionier te yu e du a diniwroko èn luku san e meki taki den abi bun bakapisi te den e du a diniwroko.
9 Yehovah e feni a Kownukondre preikiwroko bun èn a e blesi en. Te wi e teki prati na dati dan dati e sori taki wi lobi En èn tra sma (Mat. 22:37-39). So bun, meki wi du wi wroko te leki a kaba, ala di wi no e weri fu wroko a gebied ala leisi baka.