Yu abi yu eigi kontren pe yu e du a preikiwroko?
1. San a wani taki fu abi yu eigi kontren?
1 Son leisi wan preikiman kan kisi en eigi kontren pe a kan du a preikiwroko. Efu yu kisi yu eigi kontren di no de fara, dan yu kan preiki yu wawan noso makandra nanga wan tra preikiman. Aladi a e tyari wini kon fu wroko makandra nanga a gemeente na ini a preikiwroko, toku a bun fu abi yu eigi kontren fu di yu kan gi finifini kotoigi, spesrutu na ini gemeente di abi wan bigi kontren fu wroko.—Tori. 10:42.
2. San na wan tu wini te wi abi wi eigi kontren fu wroko?
2 Den wini fu abi yu eigi kontren: Son preikiman feni moro wini fu preiki na ini den eigi kontren di de krosibei fu den grontapuwroko. Den e wroko a kontren disi te brekten, noso wantewante baka wroko. Trawan lobi fu wroko wan yuru na ini a birti fu den, makandra nanga na osofamiri fu den, bifo den e go na a Gemeente Bukustudie. Leki bakapisi fu disi, den nyun gobaka nanga den bijbelstudie no e libi fara, èn disi e meki taki a makriki fu go na den, a no e teki furu ten èn a no e kostu furu moni. Sma kan du moro na ini wan syatu pisi ten. Dati meki te wi abi wi eigi kontren fu wroko, dan dati kan yepi wi fu du a yepi-pionierwroko wanwan leisi, noso fu go dini leki wan gewoon pionier. Moro fara, te wi e wroko wi eigi kontren èn wi e kon sabi den ososma moro bun, dan den o bigin frutrow wi èn disi kan yepi wi fu taki fu sani di e broko den ede. Disi sa meki taki wi sa abi moro bun bakapisi na ini wi preikiwroko.
3. San wan pionier ondrofeni fu di a ben abi en eigi kontren fu wroko?
3 Wan kring-opziener ben gi wan pionier a deki-ati fu aksi wan kontren gi ensrefi. A pionier taki: „Mi teki a rai disi èn heri esi mi ben kon sabi den ososma na ini a kontren fu mi heri bun. Te mi e go baka na den, dan mi e go na wan ten di den feni bun. Leki bakapisi fu dati, a nomru fu mi gobaka gro fu 35 te moro leki 80 wan mun, èn mi abi seibi oso-bijbelstudie.”
4. Fa yu kan kisi yu eigi kontren fu wroko, èn fa yu kan wroko a kontren?
4 Fa yu kan kisi yu eigi kontren: Efu yu wani yu eigi kontren fu wroko, dan yu kan taki nanga a dinari di e luku den kontren fu a gemeente. No frede fu aksi tra preikiman fu wroko makandra nanga yu, èn skrifi den adres fu sma di no de na oso. Yu musu du muiti fu wroko a heri kontren na ini fo mun. Efu yu no man wroko a heri kontren, dan yu kan aksi yu Gemeente Bukustudie-opziener noso tra sma fu yepi yu. Na a kaba fu den fo mun, dan yu kan gi a kontren na a brada di e luku den kontren, noso yu kan aksi fu wroko a kontren baka. Ma yu no musu tan hori a srefi kontren gi ala ten, yu musu gi en baka so taki trawan kan aksi fu wroko drape tu. Efu yu de na ini wan gemeente di no abi furu kontren, èn yu no man kisi yu eigi kontren fu wroko na ini, dan kande yu kan aksi yu Bukustudie-opziener wan pisi fu wan fu den kontren.
5. San de fanowdu so taki wi man du a preikiwroko fu wi?
5 A wroko fu preiki „gi sma na heri grontapu” na wan hebi wroko (Mat. 24:14). Wi musu du furu muiti fu doro a marki disi. Fu dati ede, a bun fu preiki na ini wan grupu, ma a bun tu fu abi yu eigi kontren fu wroko, so taki wi kan miti so furu sma leki wi man nanga a bun nyunsu.