Yu o kisi wini te yu abi yu eigi kontren fu preiki?
1. San yu kan du efu yu gemeente abi furu kontren fu preiki?
1 Efu yu de na ini wan gemeente pe furu kontren de fu preiki, dan yu kan abi wan kontren gi yusrefi fu preiki na ini. Kande a kan de na ini a birti pe yu e libi. A Wi orga-buku e taki na tapu bladzijde 103: „Efu yu abi yu eigi kontren pe yu kan go wroko, dan dati sa opo a pasi gi yu fu gebroiki so furu ten leki yu man fu du a preikiwroko. Yu kan aksi wan tra preikiman sosrefi fu wroko makandra nanga yu na ini a kontren di yu kisi fu wroko.”
2. Aladi yu abi yu eigi kontren, toku fa yu kan horibaka gi a preikiwroko grupu fu a gemeente?
2 Horibaka gi a preikiwroko konmakandra tu: Te yu abi yu eigi kontren krosibei fu yu wrokope, dan yu kan du a preikiwroko te yu abi pauze noso fosi yu go na oso. Kande yu kan preiki makandra nanga wan tra preikiman di e wroko na ini a srefi kontren. Efu yu aksi wan eigi kontren di de krosibei fu yu oso, dan a kan makriki gi yu nanga yu osofamiri fu du a preikiwroko drape bakadina. Ma efu a de so taki yu no go na wan preikiwroko konmakandra, dan a bun fu begi Yehovah fu yepi yu fosi yu bigin nanga a preikiwroko (Fil. 4:6). Boiti dati, yu musu luku bun taki yu no e wroko soso na ini yu eigi kontren, ma taki yu e horibaka gi a preikiwroko grupu fu a gemeente. Spesrutu satra nanga sonde, te furu preikiman e kon na a preikiwroko konmakandra, a ben o moro bun fu horibaka gi a preikiwroko grupu fu yu.
3. Sortu wini wi e kisi te wi abi wi eigi kontren fu wroko na ini?
3 Den wini di yu o kisi: Efu yu abi yu eigi kontren fu wroko, dan yu o man preiki o ten yu wani. Yu kan gebroiki moro ten fu preiki, fu di a no o teki furu ten fu go na a preikiwroko konmakandra. A sani disi e meki en moro makriki gi son preikiman fu tron wan yepipionier noso wan gewoon pionier. Boiti dati, den sma di yu e miti èn di wani sabi moro e tan na ini yu birti. Dati e meki en makriki gi yu fu go baka na den èn fu studeri Bijbel nanga den. Furu sma e feni taki te den e preiki na ini den eigi kontren, dan disi o yepi den fu kon sabi den ososma moro bun. Den ososma o frutrow yu tu. Disi de so spesrutu efu yu kan wroko a kontren moro leki wán leisi, fosi yu gi a brada a kontren baka, so taki trawan kan wroko tu na ini. Yu nanga yu osofamiri man abi un eigi kontren fu wroko na ini, so taki unu kan du un diniwroko finifini?—2 Tim. 4:5.