Geregtigheid de wan marki fu ala den pasi fu gado
„Na stonbergi volmaakti na ini ala en wroko, bika ala en pasi na geregtigheid. Wan Gado fu getrowfasi di kruktudu no de na en; regtvaardiki èn opregti a de.” — DEUTERONOMIUM 32:4.
1. Tapu sortu eygifasi fu Yehovah Moses e poti prakseri fu den manpikin fu Israël na ini en singi bifo a ben dede èn fu san-ede a ben taki so?
YEHOVAH na moro hey Krutuman, Giman wèt èn Kownu, „lobi regtvaardikifasi èn geregtigheid” (Psalm 33:5; Yesaya 33:22). Moses na mindriman foe na Wètfrubontu èn wan profeyti „di ben sabi Yehovah fu fesi nanga fesi”, ben kon sabi Yehovah regtvaardiki pasi bunbun (Deuteronomium 34:10; Yohannes 1:12). Syatu bifo Moses ben dede, a ben poti prakseri na tapoe Yehovah tumsi moi eygifasi geregtigheid. Fu na heri gemeente fu Israël ben kan yere, a ben bari taki den wortu fu na singi di e kon dya now: „Poti yesi ô hemel, èn meki mi taki; èn grontapu yere den wortu fu mi mofo. . . Mi sa bari kari na nen fu Yehovah. Fruteri fu na granfasi fu wi Gado! Na stonbergi, volmaakti na ini en wroko, bika ala en pasi na geregtigheid. Wan Gado fu getrowfasi, di kruktudu no de na en; regtvaardiki nanga opregti a de.” — Deuteronomium 32:1, 3, 4.
2. Fa geregtigheid e de alaten wan marki fu ala den activiteit fu Gado èn fu san-ede disi de prenspari?
2 Geregtigheid na wan marki fu ala den wroko fu Yehovah èn na fasi dati a e sori alaten ini volmaakti wan fasi nanga na koni, lobi nanga makti fu en. Na ini Yob 37:23 Gado dienstknegti Elihu e poti Yob prakseri na tapu san e kon now: „Fu na sey fu na Almaktiwan, wi no ben kon sabi en finifini; a de hey na ini krakti, èn geregtigheid èn regtvaardikifasi psamarki a no sa si leki wan soso sani.” Èn kownu David ben skrifi: „Yehovah lobi geregtigheid, èn a no sa libi en loyaalwan” (Psalm 37:28). Fa disi de wan dyaranti di e gi wi trowstu! Ini ala san Yehovah e du, a no sa libi noiti wan momenti den sma di de loyaal na en. Gado geregtigheid de wan dyaranti fu dati!
Fu san-ede geregtigheid no de
3. San e mankeri na ini a ten disi na mindri libisma, èn fa dati abi krakti na tapu a matifasi fu libisma nanga Gado?
3 Efu Yehovah na wan Gado fu geregtigheid èn „na Mekiman fu den kaba fu grontapu”, fu san-ede dan yu abi na ini a ten disi so pikinso geregtigheid na mindri den sma? (Yesaya 40:28) Moses e gi na ini Deuteronomium 32:5 na piki: „Den ben handri fu den sey na wan pori fasi; den no de en pikin, na mankeri didon na den srefi. Wan kron geslagti” Na pori libifasi fu libisma ben puru en so fara fu en Mekiman taki Buku ben skrifi taki „So leki den hemel de moro hey leki na grontapu” na so Gado prakseri èn pasi de moro hey leki di fu libisma. — Yesaya 55:8, 9.
4. Sortu pasi libisma teki fu waka, èn san disi ben abi leki bakapisi gi den?
4 No frigiti noiti taki na Mekiman no ben meki libisma fu de srefidensi fu en. Yeremiya ben krutu na situwási na wan heri bun fasi gi wi nanga den wortu: „Mi sabi heri bun, o Yehovah, taki a no ddon na a grontapu libisma fu bepaal en pasi. A no de na wan man di e koyri, srefi fu poti en futu srefi a pasi” (Yeremiya 10:23). Fu di libisma trowe den regtvaardiki pasi nanga a tirimakti fu Gado meki a kon de na ondro heri tra èn bun krakti makti di no de fu si, namku Satan Ddibri èn en bakaman, den ogri-yeye. Na apostel Yohannes e fruteri nanga krakti: „Na heri grontapu ddon na ini na makti fu na ogriwan.” Den ogri-yeye krakti disi no abi no wan enkri belang fu hori geregtigheid hey a mindri libisma. — 1 Yohannes 5:19.
5. Gi eksenpre fu na mankeri fu geregtigheid na ini na disi ten grontapu.
5 Na eksenpre fu na mankeri fu geregtigheid ini den lasti dey fu na seti fu sani disi na Amerkan ministri fu Yustisiya, William French Smith ben tyari kon na fesi na ini 1984. Di Smith ben fruteri na ini wan rapport fu wan ondrosuku fu den dungru-oso strafu di sma ben kisi ini twarfu Amerkan distrekt na ini den yari di de a mindri 1977 nanga 1983, a ben taki: „Den sma ala ten ben prakseri taki den moro takru ogriman — kiriman, ròsman fu umasma, drug bisnisman — mu sdon bun langa ini strafu. Na ondrosuku fu na kantoro . . . e sori o makriki a de gi takru ati ogriman fu waka lontu fri baka, so taki den kan du nyun ogri.” A no de wan wondru taki Paul Kamenar fu na Washington Legal Foundation ben taki: „Na krutu fu krutuman de furu tron baka tumsi slap.”
6. (a) Na ini sortu morele sitiwâsi na nâsi Yuda ben de bifo a ben go na ini katibo? (b) Sortu aksi Habakuk ben poti èn wi kan aksi den ooktu na ini a ten disi?
6 Na hori fu krutu ben misi na marki ini na heri nasi Yuda bifo den Babylon legre ben tyari den kon na ini pori na ini 607 bifo G.T. Fu dati-ede meki Gado yeye ben buweygi na profeiti Habakuk fu taki: „Na wèt [e lasi] krakti . . . a leti noyti [e kon na fesi]. Fu na ogriwan e lontu na regtvaardikiwan fu dati-ede na reti e kon a doro na wan kron fasil” (Habakuk 1:4). Na onregtvaardiki sitiwâsi disi ben meki a profeyti aksi Yehovah: „Fu san-ede yu e luku den di e handri feradelek, e tan pî te wan ogriwan e swari wan sma di de moro regtvaardiki leki en?” (Habakuk 1:13) Ooktu na ini a ten disi sma di e ondrofeni den bakapisi fu den kruktu di de tapu ibri kontren fu na libisma activiteit, ben kan aksi den srefi heri bun tu. „Fu san-ede na Gado fu geregtigheid e tan luku na kruktu di e psa na grontapu. Fu san-ede a e gi pasi fu ’na reti kon na doro na wan kron fasi’? Fu san-ede a e tan pî? Disi na prenspari aksi, èn soso na diri Wortu fu Gado, na beybri, e gi den tru piki di e gi satisfaksi.
7. (a) Fu san-ede libisma ben lasi na paradijs di Gado ben gi den? (b) Sortu streypunt ben kon a fesi na ini Eden èn san Gado geregtigheid ben aksi na ini disi?
7 Den wroko fu Gado de volmaakti, so leki Moses ben kotoigi. Disi ben de ooktu gi na volmaakti libismapaar, di Gado ben poti na ini na Paradijs fu Eden (Genesis 1:26, 27; 2:7). Na heri seti ben sorgu tapu wan volmaakti fasi fu na tanbun èn koloku fu libisma. Na tori fu Gado e fruteri wi: „Gado ben si ala san a ben meki èn luku! a ben de heri bun” (Genesis 1:31). Ma na rostu na ini Eden no ben tan langa. Na ondro na krakti fu wan opruru mekisani, dan Eva nanga en man, Adam, ben tyari go so fara fu drai den srefi na publiki teyge Gado fu di den strey taki na fasi fa En ben tiri den no bun. Na yoisti fasi fu den komando di Gado ben poti gi den, e tyari now kon ini tweyfri (Genesis 3:1-6). Na strey disi fu na oprègti fasi fu a tiri fu Gado meki tumsi prenspari moreel streypunt kon a fesi. Na historiya fu na getrow man Yob e sori taki now ooktu na soyfri reti fasi fu ala mekisani fu Gado ben tyari kon ini tweyfri. Na geregtigheid ben aksi taki ten ben mu gi fu sreka den streypunt disi di ben de fu belang gi hemel nanga grontapu. — Yob 1:6-11; 2:1-5; luku ooktu Lukas 22:31.
8. Na ini sortu rampu situwâsi libisma de now? (b) Sortu pikin howpu a singi fu Moses e gi?
8 Na situwâsi fu ranpu pe libisma ben kon na ini fu di a ben drai baka gi Gado regtvaardiki pasi, Paulus e taki fu en syatu na ini Romeini 8:22. Drape na apostel e skrifi taki „na heri mekisani e soktu makandra te now ete èn e nyan pina makandra”. Furu fu na ’soktu’ dati, na ’pina’ dati e kon fu na mankeri fu geregtigheid a mindri libisma, ala di „a wan libisma ben tiri a tapu a tra libisma fu na lasi fu en” (Preykiman 8:9). Ma wi kan de grantangi na a Almakti Gado taki a no sa gi pasi taki so wan takru prenki fu geregtigheid kan go doro te ten di no abi marki! Luku ini a pisi tori disi san Moses ben taki moro ete ini en singi: „So tru leki mi e libi te ten di no abi marki” efu mi [Yehovah] e srapu mi feti-owru di e koti faya èn mi anu e grabu na krutu, dan mi wani teki refensi tapu mi gensman èn pai den di no wani si mi na ai srefisrefi.” — Deuteronomium 32:40, 41.
9. Tyari kon a krin fa Yehovah anu ’ben grabu a krutu’ di libisma ben meki opruru.
9 Na a ten dati na ini Eden, ’Yehovah anu ben grabu na krutu’. Sondro draidrai Gado ben krutu libisma fu mu dede fu di fu espresi a ben psa en komando. A ben taigi Adam: „Stof yu de èn stof yu sa drai go baka” (Genesis 3:19). Furu yarihondro bakaten na apostel Paulus ben taki syatu fu den bakapisi di de leki wan ranpu èn di na sondu libifasi fu Adam ben tyari kon gi na heri libisma-famiri. A ben skrifi: „So leki nanga yepi fu wan libisma na sondu ben kon ini grontapu èn nanga yepi fu na sondu na dede, èn na so fasi na dede ben panya go na ala libisma fu di den alamala ben sondu.” — Romeini 5:1.
10. Sortu opruru ben gro kon fu sensi na opruru fu Adam, èn fa Gado ben du?
10 Baka di na opruru fu libisma ben broko kon na doro dan Gado ben taki fu dati-ede tu: „Mi sa poti feyantifasi na mindri yu èn na uma na mindri yu siri èn en siri. En sa masi yu na ini na ede èn yu sa masi en na ini na bakafutu” (Genesis 3:15, 17-19). Na gro kon fu den tu siri disi e feni presi siksi dusun yari kba èn alaten „feyantifasi” ben de a mindri den siri disi. Ma awinsi ala sani na a grontapu ben kenki toku Yehovah regtvaardiki pasi no kenki. Nanga mofo fu en profeyti Maleachi a ben taki: „Mi na Yehovah. Mi no kenki” (Maleachi 3:6). Disi na wan dyaranti taki na fasi fa Gado ben handri nanga na onvolmaakti èn opruru libisma-famiri, ben abi alaten na marki fu geregtigheid. No wan enkri tron Yehovah ben drifi komoto fu en hey èn regtvaardiki gronprakseri ma a ben meki den wroko makandra na ini wanfasi nanga en tumsi moy eygifasi fu koni, lobi, nanga makti.
Gado e kon yepi libisma
11, 12. Fa Psalm 49 e taki bun fu na situwâsi pe libisma de na ini?
11 Leki den anu fu wan kefarlek bigi enkifisi na so na ogri krakti fu Satan panya en srefi go tapu na heri libisma famiri. O, o kefarlek fanowdu a de taki libisma no kon fri wwan fu na dede strafu di de tapu en ma ooktu fu den onregtvaardiki seti fu onvolmaakti libisma tirimakti!
12 Na takru situwâsi pe libisma de na ini sensi na dede strafu ben leysi gi en, e kon bun a fesi na ini na Psalm fu den manpikin fu Korach di e kon now: „Yere disi, ala un pipri, yere disi, ala un sma fu na seti fu sani, unu libisma pikin èn unu mansma, un guduman èn un pôtiwan makandra. Nowan fu den kan bai srefi ooktu wan brada kon fri tapu wan ofu tra fasi, èn gi Gado wan lusu prijs fu en, (èn a lusu prijs fu den sili de so diri taki dati stop fu de te ten di no abi marki), so taki a ben kan libi fu têgo èn no ben sa si na olo (Psalm 49:1, 2, 7-9). Disi na a situwâsi te yu luku na geregtigheid di Gado ben sori!
13, 14. (a) Suma ben sa kan frulusu libisma, èn fu san-ede na sma di Gado ben teki èn di ben sa man du disi, ben de so wan sani di fiti? (b) Fa ala den pramisi fu Gado nanga yepi fu Yeyses ben kon tron „Iya”?
13 Fu sortu presi yepi kan kon fu dati-ede? Suma ben sa kan yepi libisma fu komoto fu na makti fu dede? Na psalm e piki: „Gado srefi sa frulusu mi puru fu na anu fu Syeool” (Psalm 49:15). Soso a bigi lobi fu Gado di de ini wanfasi nanga en geregtigheid, ben sa kan fri libisma puru fu na anu fu Syeool. Den aksi fu wi ben kisi piki moro fara ini wan takimakandra na neti di ben feni presi a mindri Yeyses nanga na Fariseyman Nikodémes di ben sori konifasi. Yeyses ben taigi en: „Gado ben lobi libisma so te taki a ben gi en wan enkri gebore Manpikin, so taki ibriwan sma di sori bribi na ini en, no sa go pori, ma ben sa abi têgo libi” (Yohannes 3:16). Bifo na Manpikin fu Gado ben kon na grontapu, dan a ben libi na en Tata na ini heymel. Fu a libi fu en bifo a ben tron wan libisma den e taki taki ’a ben lobi den manpikin fu libisma so te’ (Odo 8:31). A de fu dati-ede wan sani di fiti taki Yehovah ben teki yoisti na yeye mekisani disi — en wan enkri gebore Manpikin — fu frulusu na libisma famiri!
14 Fu Yeyses Paulus ben taki: „Awinsi o furu den pramisi fu Gado de, den ben tron Iya nanga yepi fu en” (2 Korintesma 1:20). Wan fu den pramisi disi, di a profeyti Yesaya ben skrifi de fu feni na ini Mattéus 12:18, 21, pe wi e leysi fu Yeyses: „Luku, mi knegti, di mi ben teki puru, mi lobiwan, di mi sili ben feni bun! Mi sa poti mi yeye tapu en, èn en sa meki kon krin gi den nâsi san na geregtgheid. Fu tru, tapu en nen den nâsi sa frutrow.” — Yesaya 42:1-4.
15, 16. Fa Yeyses ben kan tron na „Teygo Tata” fu den bakapikin fu Adam?
15 Ini a ten fu na grontapu diniwroko fu Yeyses a ben meki kon a krin taki libisma fu ala nâsi te fu kaba ben sa kon howpu tapu en nen, èn na so fasi ben sa kan prisiri na ini den blesi fu Gado geregtigheid. Yeyses ben taki: „Na Manpikin fu libisma no ben kon fu sma dini en ma fu dini sma èn fu gi en sili leki wan lusu prijs ini a presi fu furu sma” (Mattéus 20:28). Na ini na volmaakti wet di Gado ben gi na nâsi Israël ben tanapu: „Sili fu sili” (Deuteronomium 19:21). Fu dati-ede Yeyses ben de ini na posisi fu pristeri na waarde fu en volmaakti libisma libi na Yehovah ini a presi fu den reti fu a libi fu Adam, baka di a ben gi en volmaakti libi abra na ini dede èn nanga na krakti fu Gado ben wiki komoto fu dede fu drai go baka na heymel. Na so fasi Yeyses ben tron na „kriboi” [na di fu tu] Adam én a abi na makti now fu du wroko leki na „têgo Tata” fu ala den bribi bakapikin fu Adam. — 1 Korintesma 15:45; Yesaya 9:6.
16 A pasi fu Gado fu kisi frulusu tapu a gron fu en lobi seti fu na frulusu-ofrandi fu en Manpikin, Yeyses Krestes ben ’meki kon a krin na den nâsi’ na a fasi disi. Èn na pasi dati fu tru abi leki marki na geregtigheid fu Gado. Fa wi kan de nanga tangi taki Gado ben sorgu na ini na pasi ofu na wrokosani so taki wi ’sili ben kan frulusu puru fu na anu fu Syeool’!
Hori na frulusu-ofrandi hey
17, 18. Sortu patnafasi C.T. Russell ben go na ini, na ini den yari 70 na yarihondro di psa, ma fa Barbour ben meki a fruwondru na ini 1878?
17 Net leki den fosi yarihondro kresten na so den Yehovah Kotoigi na ini a ten disi e hori na leri fu na frulusu-ofrandi fu Yeyses Krestes alaten hey. A de wan moi sani fu go prakseri taki na fosi presidenti fu na Wachttorengenootschap, Charles Taze Russell, ben de wan dey kompe skrifiman èn ben gi moni yepi na wan kerki tijdschrift nanga na nen The Herald of the Morning. Na tijdschrift dati biginbigin wan adventist sma ben tyari en kon a doro di ben nen N.H. Barbour fu Rochester (New York, VS). Russell ben de ini en twenti yari ma Barbour ben de moro owru.
18 A patnafasi ben gersi taki a e go bun te na yari 1878 di Barbour tapu wan fruwondru fasi ben tyari wan artikel kon na doro pe a ben draibaka gi na frulusu-ofrandi. Ini wan skrifi gi The Herald wan artikel pe a ben drai baka gi na leri fu na ofrandi — ben draibaka taki a dede fu Krestes ben de a frulusu, prijs gi Adam nanga en bakapikin. A ben taki taki a dede fu wi Masra no ben kan de wan puru fu a strafu fu den sondu fu libisma, net so leki yu no kan taki taki te wan grontapu mma ofu ppa sutu wan freyfrey nanga wan pina so taki na freyfrey ben sa ondrofeni pina, èn ben sa dede, dati den ben sa kan si dati leki wan yoisti puru a pasi fu na takru waka nanga libi fu en pikin.”
19. Fa Russell ben du tapu na luku di Barbour ben abi tapu na tori fu na frulusu-ofrandi? (b) Na winsi fu Russell ini a tori fu Na Wachttoren ben kon tru?
19 Russell ben kan meki en moro owru patna ben abi krakti na tapu en, ma dati no ben de so. Wantu mun langa wan strey nanga skrifitiki ben de tapu den papira fu den tijdschrift, pe Barbour ben draibaka gi na frulusu-ofrandi, èn Russell ben skrifi fu horibaka gi dati. Te fu kaba Russell ben broko ala banti nanga Barbour èn en ben tyari na tijdschrift disi kon na doro, di na a ten dati den ben kari Zion’s Watch Tower and Herald of Christ’s Presence. C. T. Russell ben tyari den firi di e kon now ini a tori fu na nyun tijdschrift disi kon na fesi: „Fu sensi na bigin na tijdschrift disi ben de na fesi fu horibaka gi na frulusu-ofrandi, èn nanga na gnade fu Gado wi e howpu taki a sa tan du disi te na a kaba.” Na howpu di skrifiman Russell ben abi ben kon tru? Srefisrefi! Leki wan kon a krin fu sani dan tapu bladzijde 2 fu na Bakratongo uitgave den e taki: „A [tijdschrift] e gi tranga fu abi bribi ini a Kownu Yeyses di e tiri now èn di a brudu fu en di lon gi a libisma famiri e opo na pasi fu kan kisi teygo libi.”
20. Sortu aksi wi mu piki ete?
20 Te nanga a punt disi fu na takimakandia fu wi, wi ben go luku fa Gado ini akruderi nanga en geregtigheid ben handri fu di a ben aksi taki wan wrokosani ben mu kon fu frulusu na libisma famiri fu na krutu di ben de na tapu na libisma famiri leki wan bakapisi fu sondu nanga dede. Lobi ben sorgu taki a wroko sani dati ben kon. Den aksi di e kon now mu kisi wan piki ete: Fa den winimarki fu na frulusu-ofrandi fu Yeyses Krestes de fu piki? Fa yu kan nyanbun fu dati, èn yu mu wakti bun langa na tapu dati? Na tra artikel e gi den piki di seyker sa tyari frutrow taki ala den pasi fu Gado abi geregtigheid leki marki.
Fa yu ben sa piki?
◻ O prenspari Gado e si geregtigheid?
◻ Fu san-ede someni kruktu de a mindri libisma?
◻ Fa Gado ben sorgu fu libisma lon komoto gi dede?
◻ O fara Na Wachttoren ben hori na frulusu-ofrandi hey?
[Prenki na tapu bladzijde 2]
Moses e taki den wortu fu en singi tapu den lagi presi foe Moab
[Prenki na tapu bladzijde 9]
Gado ben lobi grontapu so te a ben gi en wan enkri gebore Manpikin