Yere san na yeye e taygi den gemeente
Den tori na tapu den bladzijde 17-39 ben tyari kon na fesi tapu den „Gado geregtegheid”-distriktkongres fu Yehovah Kotoygi leki den fosi lezing fu na symposium di ben abi leki nen „Na faste ten de krosibey”.
„A sma di abi wan yesi, meki a yere san na yeye e taygi den gemeenten.” — OPENBARING 3:22.
1. Sortu wortu di skrifi na ini Openbaring abi bun nyunsu na ini na ranpu ten disi, èn san den e bedoel nanga „profeyti tori” èn „na faste ten”?
WANTU yari psa kba wan socioloog man ben taki na ini den Verenigde Staten taki den sma na ini na kondre dati ben abi tumsi fri ma tumsi pikinso koloku. A ben taki moro fara taki den sma „e si taki a koloku grati komoto na ini den anu. Na paradijs di den ben pramisi den srefi, tron wan soso sani.” Nanga disi na ini prakseri meki den wortu fu na apostel Yohannes de bun nyunsu, bika a e fruteri wi fa wi kan feni koloku. Yohannes ben skrifi: „Koloku a sma di e leysi tranga den wortu fu na profeyti tori disi èn den sma de di e yere den èn di e ondrow ala san skrifi na ini; bika na faste ten de krosibey.” Na „profeyti tori” pe a e sori na tapu, skrifi na ini na buku Openbaring. Èn na „faste ten” de a ten pe na profeyti tori di skrifi na ini Openbaring musu kon tru. Den wortu fu Yohannes wani taki furu gi wi.
2. San Yohannes ben musu aksi en srefi na a kba fu na fosi yarihondro
2 Moro leki siksitenti yari bifo Yohannes ben skrifi na buku Openbaring, a ben de na a Pinkster fesa di na kresten gemeente ben opo. Now, na ini 96 G.T. na gemeente dati ben gro fu a bigin fu en fu 120 memre kon tron wan bigi internationaal orga. Ma problema ben de. So leki Yeyses, Paulus nanga Petrus ben warskow, dan fadon komoto na bribi nanga sekte ben opo ede kon èn Yohannes ben musu aksi en srefi san na ten di ben o kon ben se tyari kon. — Mateus 13:24-30, 36-43; Tori fu den apostel 20:29, 30; 2 Petrus 2:1-3.
3. Den fisyun di Yohannes ben si èn di skrifi na ini na buku Openbaring de wan dyaranti fu sortu sani?
3 Go prakseri so bun pikinso o koloku a ben de di „a ben kisi wan Openbaring fu Yeyses Krestes di Gado ben gi en fu sori en srafu den sani di musu psa dyonsro” (Openbaring 1:1). Ini wan lo moy fisyun Yohannes ben si taki Yehovah prakseri seyker ben sa kon tru èn taki na hori doro fu kotrow kresten na tumsi moy fasi ben sa kisi pay. Ooktu a ben kisi boskopu fu Yeyses gi seybi gemeente; den abi te yu luku en bun den lasti ray di Yeyses ben gi langalanga na kresten bifo a kon fu en na ini kownukondre glori.
Den seybi gemeente
4. (a) Sortu frantiwortu e rostu tapu gemeente fu kotrow kresten? (b) San e kon na krin fu di den e prenki den salfu owruman leki seybi stari na ini na reti-anu fu Krestes?
4 Den ben agersi den seybi gemeente fu salfu kresten leki seybi kandratiki, èn den salfu owru man ini den mindri leki seybi stari ini na reti anu fu Krestes (Openbaring 1:12, 16). Nanga yepi fu na libilibi prenki disi Yohannes ben si taki gemeente fu kotrow kresten ben musu de tyariman fu leti, leki kandratiki di abi faya na ini wan dungru grontapu (Mateus 5:14-16). Taki Yeyses ben hori den owruman na ini en reti-anu, e sori taki a e komanderi den owruman fu di a e tyari èn e tiri den.
5. Gi suma na ini na ten fu Yohannes den boskopu fu den seybi gemeente ben taki?
5 Yeyses e taygi Yohannes: „Skrifi san yu e si na ini wan bukulolo èn seni dati go na den seybi gemeente: na ini Efese èn na ini Smyrna èn ini Pergamum èn na ini Thyatira èn na ini Sardes èn na ini Filadèlfiya èn na ini Laodicéa” (Openbaring 1:11). Den gemeente disi ben de trutru na ini na ten fu Yohannes, èn wi kan de seyker taki di Yohannes ben kon klari nanga a skrifi fu Openbaring, ibri gemeente ben kisi wan buku fu en. Ma luku pikinso san Hastings Dictionary of the Bible e taki fu a buku Openbaring: „Pikin moro no wan enkri tra buku na ini na [N]yun [T]estamenti abi so bun buwèysi taki a de tru na ini na di fu tu yarihondro”. Disi wani taki taki a no wwan kresten sma na ini den seybi gemeente ben sabi a buku Openbaring èn a no den wwan ben e leysi en ma, so srefi tu furu tra sma di ben wani stuka na wortu fu na profeyti tori. Iya, Yeyses ray ben de gi ala salfu kresten.
6, 7. (a) Nanga sortu ten den wortu fu na buku Openbaring moro furu abi fu du, èn fa wi sabi disi? (b) Suma ini na ten disi den seybi stari e prenki èn san den seybi gemeente e prenki?
6 Ma den boskopu disi na den seybi gemeente abi wan moro bradi kontru. Na ini Openbaring 1:10 Yohannes e taki: „Nanga na yeye fu Gado mi ben kon na ini na dey fu Masra.” Na vers disi e gi wan prenspari sroto fu tyari kon na krin na kon frustan fu Openbaring. A e sori taki na buku Openbaring moro furu abi fu du nanga „na dey fu Masra”, di ben bigin di Yeyses ben tron kownu na ini 1914. Taki disi musu frustan so, den boskopu fu Yeyses di den seybi gemeente e buwèysi disi. Drape wi e feni wortu so leki den wortu disi di ben de gi Pergamum: „Mi [e kon] esi-esi na yu” (Openbaring 2:16; 3:3, 11). Baka 96 G.T. ’Yeyses ben kon’ pas tapu wan fasi di ben wani taki wan sani, di den ben poti en na ini 1914 leki kownu tapu a tron (Tori fu den apostel 1:9-11). Dan a ’ben kon’ leki wan kontru fu Maleachi 3:1 ete wan tron na ini 1918, di a ben kon na Yehovah tènpli fu krutu fosi na osofamiri fu Gado (1 Petrus 4:17). Na ini na krosibey tamara a sa ’kon’ ete wan tron, te a ’e teki refensi tapu den di no sabi Gado èn tapu den di no e gi yesi na a bun nyunsu fu wi Masra Yeyses’. — 2 Tessalonika 1:7, 8; Mateus 24:42-44.
7 Nanga disi na ini prakseri wi e frustan taki den seybi gemeente de wan kresten baka 1914, èn taki den seybi stari e prenki ala salfu owruman ini den gemeente dati. Boyti fu dati te yu bradi a tori go moro dan ooktu den owruman di de fu den ’tra skapu’ de na ini Yeyses reti-anu, dati wani taki na ondro en ay (Yohannes 10:16). Èn na ray gi den seybi gemeente de ini gronprakseri ooktu tapu ala gemeente fu Gado pipli ala pe na grontapu na ini na ten disi, makandra nanga den gemeente di abi kresten sma nanga wan grontapu howpu.
8. Sortu fasi Yeyses ben feni di a ben kon na 1918 fu ondrosuku den sma di ben taki taki den de kresten?
8 Di Yeyses ben kon na ini 1918 fu ondrosuku den sma di ben taki taki den de kresten, a ben miti salfu kresten na grontapu di ben du furu muyti fu ondrow den wortu fu na profeyti tori. Sensi den yari ’70 fu na yarihondro di psa den ben fruteri den sma fu na prenspari fasi fu na yari 1914. Ini na ten fu na fosi grontapu Feti na krestenhèyti ben tyari furu pina kon tapu den, èn na ini 1918 na wroko fu den pikinmoro ben stòp di den tiriman fu na Wachttorengenootschap ben poti na ini strafu-oso tapu na gron fu falsi kragi. Ma san den ben ondrofeni na ini na ten dati, na wan wondrufasi e akruderi soyfri nanga den profeyti tori na ini Openbaring. Èn na faste bosroyti fu den poti prakseri na tapu Yeyses wortu di ben taki gi den seybi gemeente, e meki unu sabi den seyker leki den wan enkri krestensma di e tyari leti na ini na dungru grontapu disi. Na ini na ten disi na fika pisi disi de wan Yohannesklasse di den srefi e ondrofeni na kontru fu furu pisi fu Openbaring èn e abi wan prati na den.
Ray nanga wortu fu prijse
9, 10. Na kontru fu sortu wortu di Yeyses ben taki ben meki den disiten kresten de tumsi koloku? Tyari disi kon na krin.
9 Na ini Openbaring 3:8 Yeyses ben taygi na gemeente na ini Filadelfiya: „Mi sabi yu wroko — luku! Mi abi wan doro di opo gi yu, di no wan sma kan tapu — èn mi sabi taki yu abi wan pikinso krakti, èn yu ben kibri mi wortu èn yu no ben sori taki yu no de kotrow na mi nen.” A de krin taki den kresten na ini Filadèlfiya ben wroko fayafaya, èn now wan doro go opo gi den di ben opo moro bigi okasi gi den.
10 Na disi ten trutru fasi fu na boskopu disi e meki Gado pipli de tumsi koloku. Baka den muylek ondrofeni fu den na ini 1914, dan den ben kon bun baka na yeye fasi, èn na ini 1919 Yeyses ben opo wan doro di ben opo moro bigi okasi gi den. Den ben go na ini na doro dati di den ben teki na wroko fu preyki na bun nyunsu fu na Kownukondre gi ala kondre. Now di Yehovah yeye e rostu tapu den, dan noti ben kan tapu a wroko disi, èn den kotrow kresten disi ben kisi na bigi grani fu meki wan prenspari pisi fu na marki fu Yeyses de noya kon tru (Mateus 24:3, 14). Leki wan baka pisi fu na kotrow preykiwroko meki den wan di ben tan abra fit den 144.000 ben kisi kari èn ben kisi salfu èn na „bigi ipi” ben kari kon makandra ini bigi nomru (Openbaring 7:1-3, 9). Na kotrow dinst disi ben gi Gado pipli prisiri!
11. Fa sektesma ben pruberi fu pori Yehovah orga na ini Yohannes ten, èn fa den ben pruberi dati na ini wi ten?
11 Wan sani kan fufuru na prisiri disi puru fu den? Iya. Den owruman na ini Pergamum fu eksenpre no ben kan hori na leri fu na sekte fu Nikolaüs a dorosey fu na gemeente, awinsi den ben abi wan moy bericht fu hori doro (Openbaring 2.15). Sektarisme ben bigin fu kisi faste futu. Na so na ini na heri pisiten fu den lasti dey disi son aparti sma ben fadon komoto a bribi èn ben pruberi fu pori Yehovah organisâsi. Den owruman alamala ben kaka futu gi den ma a sari taki den ben kori son sma. Meki wi noyti gi pasi taki sma di fadon komoto na bribi puru na prisiri fu wi!
12. (a) San na wan Bileam- èn Izébel-makti? (b) Satan ben pruberi na ini na ten disi fu tyari wan Bileam ofu wan Izébel-makti kon na ini na kresten gemeente?
12 Yeyses ben warskow na gemeente na ini Pergamum ooktu gi den sma ’di e hori tranga na a leri fu Bileam’ (Openbaring 2:14). Sortu leri disi ben de? Wan sma na ini Pergamum ben teki na srefi fasi fu pori krestensma drape leki fa Bileam ben teki sani fu pori den Israëlsma na ini na sabana, fu di a ben gi den deki-ati „fu yan sani di ben tyari gi kruktugado leki srakti-ofrandi èn fu hurudu” (Numeri 25:1-5; 31:8). Yeyses ben warskow na gemeente na ini Thyatira gi „na uma dati, Izébel”. Ooktu na uma disi ben leri krestensma fu du „hurudu èn fu nyan sani di ben tyari go gi kruktugado leki srakti-ofrandi” (Openbaring 2:20). Satan ben pruberi fu tyari wan Bileam- ofu wan Izebel-krakti kon na ini na disiten kresten gemeente? Seyker, èn a ben de na a marki taki ibri yari pikinmoro 40.000 sma ben sluit uit èn moro furu fu den fu hurudu ede. Fa disi de wan ranpu! Man di yu kan teki gersi leki Bileam èn uma di yu kan gersi nanga Izébel ben opo den srefi kontrari den owruman èn ben pruberi fu pori na gemeente. Meki wi kaka futu gi den sortu doti krakti disi nanga ala wi makti! — 1 Korintesma 6:18; 1 Yohannes 5:21.
13. (a) Fruteri fu na tegu di Yeyses e tegu gi brokokowru fasi. (b) Fu san-ede den Laodicéa sma ben de brokokowru, èn fa wi kan tan farawe na ini na ten disi fu na swakifasi disi?
13 Na ini Openbaring 3:15, 16 Yeyses ben taygi na gemeente na ini Laodicéa: „Mi sabi yu wroko, taki yu no kowru èn yu no faya. Efu yu ben kowru noso ben faya. Ma di yu de broko-kowru èn no de faya èn ooktu no de kowru, fu dati-ede mi sa braak yu puru fu mi mofo.” Fa Yeyses e tyari a tegu di a e tegu gi broko-kowru fasi kon moy na fesi! A e go moro fara: „Yu e taki: ’Mi gudu èn ben kisi gudu èn no abi noti kwetikweti fanowdu.’” Iya, na lobi fu gudu ben kori krestensma na ini Laodicéa. Den ben de tevrede nanga den srefi èn no ben ke fu sani. Ma Yeyses ben taygi den: „Yu no sabi taki yu de mofina èn de fu kragi èn pôti èn breni èn nanga soso skin” (Openbaring 3:17). Wi wani de „mofina èn fu kragi èn pôti èn breni èn nanga soso skin” na ini na ay fu Yeyses? Kwetikweti! Meki yu feti so bun kontrari lobi fu gudu ofu de broko-kowru. — 1 Timoteus 6:9-12.
Hori doro te na a kba
14. (a) Sortu muylekhèyti na gemeente na ini Smyrna ben musu si ondro ay? (b) Sortu ondrofeni na ini na ten disi e kruderi nanga den ondrofeni na ini Smyrna?
14 Wan gemeente di no ben abi a marki fu broko-kowru fasi, ben de di fu Smyrna. Gi den kresten disi, Yeyses ben taki: „Mi sabi unu banawtu èn pôti fasi — ma unu gudu — èn na ley fu na. sey fu den di e taki den de dyu sma di no de dati, ma di de wan snoga fu Satan. No frede gi den sani di yu e go nyan pina fu den! Luku! Ddibri sa go doro fu iti son wan fu unu go na ini dungru-oso, so taki yu kisi tesi dorodoro èn so taki yu abi bigi banawtu” (Openbaring 2:8-10). Fa disi e kruderi soyfri nanga na ondrofeni fu krestensma na ini na ten disi! Ooktu disiten kresten, den salfuwan èn den tra skapu, ben ondrofeni hebi gens fu na sey fu na disiten snoga fu Satan, na krestenhèyti. Fu sensi na fosi Grontapu Feti te na a ten disi dan dusundusun man, uma nanga pikin ben kisi fonfon, ben poti na ini strafu-oso, ben kisi pina, den go ddon nanga tranga na den leki umasma ofu ben kiri den fu di den ben weygri fu psa den kresten soyfri retifasi.
15, 16. (a) Fa salfu kresten kontrari na frufolgu di den ben ondrofeni de koloku? (b) Sortu spesrutu payman di de gi den tra skapu e yepi so srefi tu fu den de koloku?
15 Den sortu ondrofeni disi e meki wan sma koloku? Te yu luku en tapu en srefi, nono. Ma net so leki den apostel dan kotrow kresten di e frudrage tesi, e ondrofeni wan dipi inisey prisiri fu di den „e feni den warti fu nyan syen fu Yeyses nen ede” (Tori fu den apostel 5:41). Èn den e tan de koloku kontrari ala sani san den feyanti fu den e du fu di den sabi taki na faste ten pe na soyfri retifasi fu den sa kisi pay de krosibey, èn na payman de trutru bigi. Yeyses ben taygi den kresten na ini Smyrna: „Buwèysi taki yu de kotrow, srefi te na dede èn mi sa gi unu na kron fu libi” (Openbaring 2:10). Èn gi den memre fu na gemeente na ini Sardes a ben taki: „A sma di wini, sa kisi so bun weti tapusey krosi fu weri; èn mi no sa figi kwetikweti en nen puru fu na buku fu libi.” — Openbaring 3:5.
16 Den pramisi disi kande abi spesrutu fu du nanga salfu kresten èn e memre den na a prijs fu heymel libi sondro fu dede di poti gi den fu kisi. Ma den sma di de fu den tra skapu, e kisi tranga ooktu fu den wortu disi. Yehovah ben sreka ooktu gi den wan payman, efu den de nanga faya èn e horidoro. Na tumsi moy fruwakti fu têgo libi e wakti den tapu wan paradijs grontapu na ondro a Kownukondre na ini na anu fu Krestes. Drape den sa feni na paradijs di sma fu na grontapu disi no sa feni.
17. Nanga sortu wortu Yeyses ben tapu en fosi boskopu, èn san den wortu fu en wani taki gi wi na ini disiten?
17 Yeyses ben tapu ibriwan fu en boskopu gi den gemeente nanga den wortu: „A sma di abi wan yesi, meki a yere san na yeye e taygi den gemeente” (Openbaring 3:22), Iya, wi musu yere den wortu fu na Gran Hèrder èn gi yesi na en. Wi musu tan farawe fu doti libi èn a fadon komoto bribi, èn wi musu tan de nanga faya. Fu disi a e anga efu wi e kisi na payman. Èn wan luku fu moro sani ini Openbaring sa meki wi de nanga wan moro faste bosroyti fu du dati.
Den lakstanpu fu na bukulolo
18 (a) San Yeyses e kisi na ini den heymel palèysi? (b) San na rèy fu dri fu den man di e tyari asi fu Openbaring kapitri 6 wani taki gi na libisma famiri di e libi now?
18 Na ini den kapitri 4 nanga 5 Yohannes e si fu eksenpre wan wondru fisyun fu Yehovah heymel palèysi. Na Lam fu Gado, Yeyses Krestes, de drape èn a e kisi wan buku lolo nanga seybi lakstanpu. Na ini kapitri 6 Yeyses e opo siksi fu den seybi lakstanpu, na wan baka na trawan. Te a fosi wan opo, wan asiman tapu wan weti asi e sori en srefi. A e kisi wan kron èn a e rey go a doro, „fu wini sani èn fu tyari a wini fu en kon a wan kba”(Openbaring 6:2). Disi na Yeyses, na kownu di poti nyun tapu a tron. Di Yeyses ben bigin na ini 1914 en victorie leki wan kownu, dan na dey fu Masra ben bigin. Na a opo fu den tra dri lak-stanpu dri asi moro e kon na doro nanga den man di e rèy den. Disi na sani di e gi frede èn di e prenki den feti fu libisma, angriten nanga dede di e kon fu pestsiki nanga tra sani. Den e sori taki Yeyses profeyti tori de tru taki bigi feti, angriten, pestsiki, gronseki nanga tra ranpu na grontapu ben sa marki en heymel de noya na ini kownukondre makti (Mateus 24:3, 7, 8; Lukas 21:10, 11) Te krestensma na ini so wan ten wani hori doro dan den musu poti prakseri trutru tapu Yeyses wortu gi den seybi gemeente.
19. (a) Sortu payman den kotrow salfu kresten di dede kba e kisi ini na ten fu na de noya fu Krestes? (b) Na sortu tegu sani di o psa na opo fu na di fu siksi lakstanpu e sori go nafesi èn sortu aksi disi e tyari kon?
19 Na a opo fu na di fu feyfi lakstanpu wan sani di ben psa na ini na yeye kondre di wi no kan si e kon na krin. Salfu kresten di dede fu den bribi ede, e kisi ibriwan wan langa weti krosi. A de krin taki na heymel opobaka ben bigin now di na de noya fu Krestes de wan trutru tori (1 Tessalonika 4:14-17; Openbaring 3:5). Dan na di fu siksi lakstanpu e kon opo èn wan bigi gronseki e seki „na grontapu”, Satan grontapu seti fu sani (2 Korinte 4:4). „Na heymel” fu libisma tirimakti na ondro Satan tiri e lolo kon na wan leki wan owru bukulolo di de so fara fu den iti en gwe. Sma di frede èn di e opo den srefi, e bari sondro howpu gi den ston bergi: „Fadon tapu wi èn kibri wi gi na fesi fu na sma di sdon tapu na tron èn gi na atibron fu na Lam, bika na bigi dey fu na atibron fu den kon èn suma kan hori doro dan?” Openbaring 6:13, 14, 16, 17
20. Suma kan hori doro ini na ten fu na bigi dey fu na atibron fu Yehovah èn fu na Lam?
20 Iya, suma kan hori doro? Ma Yeyses ben piki na aksi dati kba. Den sma di ’e yere san na yye e taygi den gemeente’, sa hori doro tapu na dey dati fu ati-bron. Èn leki wan buweysi fu disi meki Yohannes e kon sabi moro fara taki den kriboywan fu den 144.000 sa kisi wan lakstanpu èn taki wan bigi ipi fu ala nâasi sa tyari kon makandra èn di sa psa libilibi „na bigi banawtu” (Openbaring 7:1-3, 14) Ma now na ten doro taki a di fu seybi lakstanpu fu na bukulolo sa kon opo èn taki moro fisyun leki wan drama sa sori na Yohannes èn fu en, kon na wi na ini na ten disi. Na tra artikel sa go taki fu wan tu fu den disi.
Yu e memre disi ete?
◻ Na ini sortu matitasi den gemeente owruman de nanga Yeyses?
◻ Sortu problema den owruman ini Pergamum nanga Thyatira ben kon tanapu na fesi fu en, èn fa den sortu problema dati e sori den srefi ini den disiten gemeente?
◻ Sortu seryusu fowtu na gemeente Laodicéa ben meki, èn fa wi kan tan farawe fu dati na ini na ten disi fu meki so wan sortu fowtu?
◻ Fa krestensma ben musu hori doro na ini na di fu twenti yarihondro disi, èn sortu pramisi fu Yeyses ben yepi den na ini disi?
◻ Fa wi kan tan farawe fu na sondro howpu fasi di den nâsi sa ondrofeni na ini Armageddon?
[Prenki na tapu bladzijde 23]
Wantu fu den kotrow kresten di ben nyan pina na ini nâsi concentratiekanpu
[Sma di abi a reti fu a prenki]
DÖW, Vienna, Austria