Babylon — Centrum fu falsi anbegi

„A FADON! Babylon fadon, èn ala popki di koti nanga anu fu den gado fu en a ben masi na doti!” Sortu foto na Babylon ben de di Yesaya ben taki profeyti tori fu en? Disi de wan tumsi prenspari sroto fu frustan san na disiten Babylon na Bigiwan wani taki. — Yesaya 21:9.

Na owru Babylon ben abi wan takru nen fu na anbegi ede fu heyden gado nanga uma gado di sma ben anbegi drape. Na ini en buku Babylonnian and Assyrian Religion professor S.H. Hooke taki: „Babylon ben de a foto pe Marduk ben teki a moro prenspari presi a mindri den tra gado di den ben e anbegi drape . . .. Na a ten fu Nebukadnezar II yu ben abi na ini Babylon no moro mendri leki 58 gado-oso di ben de gi gado di spesrutu ben kari na nen, fu tan pi ete fu den furu tra gado-oso di ben gi abra na gado di no ben kari na nen. Fu disi wi kan si sortu bigi krakti na grupu fu pristri ben musu abi tapu a libi fu wan bigi foto.” Leki fa den taki dan na gado-oso fu Marduk na ini Babylon ben abi 55 seybere gado-oso. Fa disi e memre wi na furu gado-oso, kerki nanga katedraal nanga seybere gado-oso gi pikin gado, santawan nanga madonna.

Babylon ben de wan centrum fu anbegi fu kruktu gado ini na dini fu den gado. Na so wan tori e fruteri taki den pristri nanga den bribiman „ben gwenti fu poti prakseri psa marki na den santa kruktu gadopopki, pe den ben e si den popki leki mindriman ini a kontakti fu den nanga den gado. Den ben weri diri krosi gi den popki èn moy den nanga keti, anubuy, nanga linga; den ben ddon tapu kofarliki moy rostu bedi èn den ben tyari den na ini grupu fu sma nanga futu, na ini wagi èn ini sma boto, abra doti èn tapu watra.”a Fa disi e meki wi denki na a anbegi di gado, santawan nanga madonna e kisi na ini na disiten hindu bribi, buda bribi nanga katoliki bribi, pe sma e tyari den popki fu den so srefi tu na ini grupu sma èn e go na strati, liba èn na se nanga den!

Luku leki wan eksenpre moro fara na kruderi a mindri na owru Babylon èn na disiten relisi san na srefi encyclopedie e taki: „Den kotrow bribiman fu en e gi en den moro moy nen: a no de nomo uma gado èn misi, ma ooktu na sari-ati mma di e arki begi, di e kon a mindri . . . di gi a libi na heymel nanga grontapu èn na a libisma famiri.” Teki disi agersi pikinso nanga na begi di e kon now fu El Santo Rosario (Na santa rowskransi): „Wi e taki yu tangi, Soeverein Umakownu, gi den bun di wi e kisi ala dey fu yu anu di lobi gi sani; de so bun, uma, fu poti unu now èn fu têgo na ondro na kibri èn skotu fu yu.”

Fu suma den e taki dya èn suma na begi disi e go? Furu sma wantewante sa kon denki taki: „Na a wenke Maria.” Na piki dati de afu bun. A begi e seni go na Maria. Ma so leki Las Grandes Religiones Illustrada e fruteri wi, dan den fosi wortu e fruteri fu Isjtar, na „uma fu na lobi”, na Babylon uma gado fu meki froktu kon èn na uma gado fu lobi èn feti. Son tron den ben e prenki en na ini prenki fu kruktu gado „leki wan mma di e gi en manpikin bobi”.b Disi na ete wan eksenpre pe e kon na krin taki na disiten relisi no e kerki so furu fu na owru Babylon!

Wi ben sa kan teki na foto Babylon fu owruten nanga den denki fu en di e go fu na libisma sili nanga en dri wanfasi gado gersi nanga na ini na ten disi den srefi sortu denki fu na sili di no e dede èn den dri wanfasi di na disiten relisi e hori tranga. Na buweysi materiaal e tranga wi denki taki „Babylon a Bigiwan” de wan symbool di fiti fu Satan grontapu makti fu falsi relisi.

Babylon — asranti feyantiman fu na tru anbegi

Na foto Babylon ben de ooktu na asranti feyantiman fu Yehovah pipli fu owruten Israël. Na ini 607 bifo gewoon teri, Babylon ben pori na gado-oso na ini Yerusalem; a ben tyari ala warti sani fu Yehovah anbegi gwe èn ben meki den sani disi lasi den santa fasi na a ten fu wan fesa fu Belsazar — Daniël 5:3, 4.

Babylon na Bigiwan so srefi tu de na ini na ten disi wan sondro sari-ati feyanti fu na tru anbegi. Na ini moro furu tron pe Yehovah Kotoygi e kisi frufolgu, dan disi e psa fu di den kerki leriman e sutu faya, furu tron tapu na gron fu na frubontu fu den nanga politiki tiriman.

Wan moy eksenpre fu frufolgu di den kerkileriman ben sutu faya gi ben de san ben psa langa ten psa kba na ini 1917, èn na sani disi ala ten baka ben du ete wan tron. Na ini na yari dati den Internationaal Bijbelondrosukuman so leki den ben kari Yehovah Kotoygi na a ten dati, ben tyari a buku kon na doro The Finished Mistery. Den kerki leriman fu Canada nanga Amerkan kondre, di den kondre fu den ben de ini na Fosi Grontapu feti, ben feni wantu bladzijde fu na buku disi leki wan sani di e meki sma opo teyge na tiri fu na kondre. Den ben hasti den srefi fu fruteri den politiki freyri fu den fu na buku disi. Na baka pisi? Leki fa professor Martin Marty na ini en buku Modern American Religion — The Irony of It All e taki: „Den kerki leriman ben dray den srefi kontrari den Russell sma [Kotoygi] èn ben prisiri fu sabi taki den tiriman fu Yehovah Kotoygi di den ben gi a kragi [fu meki opruru] ben kisi twenti yari strafu.”

Ma fa den kerki leriman ben du wantu mun a baka di den tiriman dati ben kon fri fu den kragi? „Den orthodox kerkiman no ben prisiri nanga dati.” Den Kotoygi ben de den wan enkri wan di ben opo taki gi den beybri gronprakseri, „srefi na so wan fasi taki na tiri fu na kondre ben fruferi fu na relisi fu den”. Den Kotoygi no ben e wani, èn awansi fa no fa ooktu noyti ben wani fu de den patna fu politiki tiriman, di e saka den srefi psa marki, srefi no na ondro na nâsi tiri na ini Doysri kondre ofu na ondro na fascistis tiri na ini Italiya, nanga Portugal.

Strafu leysi gi Babylon èn a kisi syen

Fa den wortu na ini Openbaring fiti fu dati-ede taki Babylon na Bigi-wan „ben drungu fu a brudu fu den santawan èn fu na brudu fu den kotoygi fu Yeyses” èn taki „den ben feni na ini en na brudu fu profeyti èn fu santawan èn fu ala den sma di den ben srakti na grontapu”. Na marki fu brudu payman di na grontapu relisi libi a baka fu di den ben teki prati fayafaya na feti nanga frufolgu fu tru kresten ofu sondro fu teki prati ma, ben tanapu e luku, de fu si krin ini ala den yarihondro di psa. — Openbaring 17:6: 18:24.

Babylon na Bigiwan, na grontapu makti fu falsi relisi, ben wasi na ini bigi gudu, na a waka psa fu a historiya. Ma wan engel ben warskow Yohannes taki na krutu gi na bigi huru ben sa tyari kon tapu en. Na tori e fruteri: „Èn a ben kari nanga wan krakti sten èn ben taki: ’A fadon! Babylon na Bigiwan fadon, èn a tron wan libi presi fu ogri yeye èn wan kibri presi fu ala doti fowru di sma no wani si na ay!’” — Openbaring 18:2.

O ten Babylon sa fadon? Ofu a fadon kba? Na sortu fasi a ben ondrofeni a fadon disi? Èn sortu krakti disi abi tapu yu? Den aksi disi nanga trawan wi sa piki na ini wi tra uitgave fu Na Wachttoren.

[Futuwortu]

[Prenki na tapu bladzijde 14, 15]

Babylon na Bigiwan abi en rutu na ini na relisi fu owru Babylon