Na huru nanga „den kownu fu grontapu”

NA HISTORIYA abi bun furu eksenpre pe e kon na krin taki na krestenhèyti tapu a kontren fu na politiki makti ben sori en powa. Meki wi go luku wantu eksenpre pikinso. Karel na Bigiwan (742-814 G.T.) ben de wan tiriman di ben si taki a abi winimarki fu kisi na relisi ini en makti èn fu abi na blèsi fu den kerki fesiman fu na Katoliki Kerki.

The New Encyclopaedia Britannica e tyari kon a krin taki Karel na Bigiwan, en ppa nanga en brada ben kisi salfu fu na pawsu, so taki wan nyun lin fu tiriman ben kon baka di na fositen famiri di ben tiri ben puru a pasi. Dan a e taki: „Na politiki frubontu a mindri den Franken (na pipli fu Karel na Bigiwan) èn na pawsu kontrari Lombarden na a srefi okasi ben poti steyfi. . . . Karel [di ben tron Karel na Bigiwan] biten kba ben erken na krosibey koneksi di ben de a mindri na grontapu makti èn kerki.”

Na ini na yari 800 G.T. pawsu Leo III ben „bosroyti fu meki Karel tron keysri” fu na westsey Romen Kownukondre èn ben poti na kron tapu en ede na ini na St.-Pieter kerki na Rome na a ten fu kresneti.

Wan bigi-ay huru

Ma wan huru e wani payman. Sortu payman Karel na Bigiwan ben kan pay na uma di ben teki presi fu Babylon, Rome? „Karel . . . ben pramisi ete wan tron na ini na St.-Pieter kerki san en ppa ben pramisi fu gi bigi pisi fu Italiya abra na a tirimakti fu na pawsu.” Na srefi buku e taki moro fara: „Na ini en politiki di ben moksi nanga relisi dan na keysri kownukondre èn na kerki ben gro kon tron wan lanti èn yeye wanfasi.”

Ete wan eksenpre fu na fasi fa relisi ini na ten di psa ben abi wan bigi krakti tapu na tiri fu na kondre, de di fu kardinaal Wolsey fu Ingrisikondre (1475-1530). Na Britannica e taki taki a ben de wan „kardinaal èn tiriman fu na kondre, di ben basi na tiri fu kownu Hendrik VIII fu Ingrisikondre . . .. Na ini december 1515 Wolsey ben tron lord-kanselier fu Ingrisikondre . . .. Wolsey ben kobroyki en bigi lanti èn kerki makti fu kisi gudu di soso den di fu a kownu ben de moro bigi leki di fu en.” Fu taki en leki fa Openbaring e taki en na agersi fasi: hey-klas hurudu e aksi hey-klas payman.

Ete wan eksenpre fu a krakti fu relisi na ini lanti afersi ben de na kardinaal nanga hertog Richelieu (1585-1642), di ben abi bigi makti na ini Fransi kondre èn ooktu ben tyari gudu konmakandra di ben de „srefi psa marki akruderi den markitiki fu na ten dati”, Britannica e taki.

Wan tra kardinaal baka ben teki na presi fu Richelieu, Jules Mazarin (1602-1661), di na a ten fu a tiri fu Lodewijk XIV ben wroko leki fosi ministri fu Fransi kondre. Ala di a no ben kisi na seygi leki pristri, toku pawsu Urbanus VIII ben meki en tron kardinaal. Ooktu kardinaal Mazarin ben angri fu kisi gudu. Na encyclopedie e fruteri: „Mazarin feyanti ben kosi en fu en bigi-ay fasi. A ben teki furu posisi na lanti nanga kerki èn ben si son tron na moni fu lanti leki di fu en.”

Na ini na ten disi falsi relisi te now ete e tyari gudu kon makandra èn e pruberi fu abi makti tapu den politiki elemènti èn fu basi disi srefi efu a kan. Wan aparti eksenpre de na katoliki orga Opus Dei di de a kibri fasi (Latijn: Wroko fu Gado), di na a momenti disi na pawsu e feni bun èn di leki fa na skrifiman Lawrence Lader e taki, „poti en srefi krinkrin tapu aktiviteit kontrari kommunisme èn langalanga go tapu politiki”. A e waka na baka wan denki pe a e meki na koni tapusey pisi fu katoliki yonguwan klari den middelbare skoro nanga universiteit èn dan a e sorgu taki den sma disi kisi hey èn makti posisi ini na tiri fu na kondre, ini a moni afersi nanga mediya (koranti, radiyo, t.v., nanga so moro fara). Na ini Spanyoro kondre den ben abi na ondro na katoliki fascistis diktator Franco wan bun ten, na ini wàn pisiten, 10 fu den 19 memre fu na tiri fu na kondre ben de wrokoman fu na grupu fu hey sma fu Opus Dei.a

Na ini den Verenigde Staten tv-evangelium preykiman abi barinen ini a prodo di den e prodo nanga den gudu èn gudu libifasi fu den. Son anitri kerki leriman nanga hey borsu ben go na ini politiki èn ben feti srefi fu kisi na presidenti wroko. A no de fu taki taki na bun owru huru, ala di a de na ini wan fasi pe a fadon, tapu wan ofu tra fasi te now ete e prisiri na ini na bigi gudu di e go makandra nanga maki èn a e pruberi fu prey basi. — Openbaring 17:4.

Ma san de fu taki fu na nen fu na huru, Babylon na Bigiwan? Fa dati de wan yepi fu si suma na agersi uma fu Openbaring de?

[Futuwortu]

[Prenki na tapu bladzijde 10]

Den kardinaal Wolsey, Mazarin èn Richelieu ben tyari bun furu gudu konmakandra di den ben e dini lanti.

[Sma di abi a reti fu den prenki]

Photos: Culver Pictures