Na bigi huru e tyari kon a krin

NA DISI TEN grontapu sistema di Satan e basi, de ini dri prenspari pisi di na „gado fu na grontapu disi” e dray poti leki fa a wani, namku na politiki tirimakti, na makti nanga krakti fu na bigi bisnis grontapu, èn na relisi ofu fasi fu anbegi. Na ini ala den dusundusun yari fu na historiya den dri sani disi ben de den pisi di no ben kenki fu ibri tiri sistema. Sortu wan fu den bigi makti disi e prenki „na mma fu den huru”? — 2 Korintesma 4:3, 4, Bigi Nyunsu Beybri; Openbaring 12:9; 17:5.

Leki fa na fisyun fu Yohannes di wi e taki fu en dya e sori dan den tiriman, „den kownu fu grontapu”, ben de klariklari fu go nanga en na en bedi fu hurudu (Openbaring 18:3). (Na historiya buweysi materiaal fu disi sa tyari kon na krin tapu den bladzijde di e kon.) Babylon na Bigiwan fu dati-ede no kan de wan prenki fu na politiki tirimakti leki pisi ini na grontapu sistema.

Fa a de nanga na bisnis grontapu, na pisi di ini na ten disi e prey so wan prenspari ròl ini den afersi fu a libisma famiri? A e abi trutru na ini furu nâsi wan bigi makti èn e teri te yu luku en bun suma sa gudu èn suma sa de pôti. Disi ben sa kan de Babylon na Bigiwan? Wan engel e sori Yohannes wan prenspari marki so taki na aksi disi kan kisi piki. A e fruteri fu wan skreki sani di o psa. — A fadon fu Babylon komoto ini en posisi fu bun-ati! A e lasi en kranti nanga freyri, di feni en wantron so wan tegu sani. Suma moro ete boyti „den kownu fu grontapu” de a mindri den fisitiman di e go ala ten na en? Na engel e taki: „Bika fu na win ede fu na atibron fu en hurudu meki ala nâsi ben kon de so, èn den kownu fu grontapu ben du hurudu nanga en, èn den koopman fu grontapu di e waka lontu ben kon gudu leki wan bakapisi fu na krakti fu en gudu di de sondro syen.” lya, den koopman fu grontapu ben nyanbun fu en fu du bisnis nanga en èn fu lolo nanga en èn fu meki „a gudu fu en sondro syen” gro. A no kan de so bun wan prenki fu na bigi bisnis grontapu di de na a heri grontapu. — Openbaring 18:3.

Te wi e wroko akruderi na metode fu puru a pasi san no bun dan Babylon na Bigiwan no kan de wan prenki fu na politiki tirimakti èn ooktu no fu a makti èn krakti fu na bigi bisnis grontapu. San wi e hori dan abra? A musu de a makti di a kragi „bika nanga en afkodrey wroko meki ala nâsi ben kisi kori” e kon tu tapu en. A musu de na makti elemènti di now e lasi en makti èn di sensi den dey fu na owru Babylon ben abi wan bigi krakti tapu na denki èn du fu den nâsi. A de na sani di „abi wan kownukondre tapu den kownu fu na grontapu” — dati wani taki na falsi relisi! — Openbaring 17:18; 18:23.

Iya, fa a mag de wan sani tu, di kan gersi taki a e seki wantu opregti kerki sma, toku Babylon na Bigiwan, na mma fu den huru, de wan prenki fu Satan grontapu makti fu falsi relisi. A de wan prenki fu den relisi na grontapu di e waka psa na heri historiya tapu a wan ofu tra fasi, ben skeki den srefi na den elemènti di tapu a kontren fu politiki nanga moni e abi tirimakti.

Babylon na sma di e sutu faya fu sma feti

Ini akruderi nanga na profeyti fisyun dan Babylon na Bigiwan de na bigi huru di e waka a fesi nâsi, pipli nanga lo na ini feti pe brudu fadon, kruistochten nanga vendetta (teki refensi fu brudu di fadon) ala di a e aksi Gado blèsi a tapu den sani disi nanga yepi fu towfru, seygi watra èn begi èn a ben gi tranga fu du den sani disi nanga yepi fu taki fu lobi a kondre fu wan sma.a — Openbaring 18:24.

Den kerki leriman fu en, spesrutu den legre preykiman fu en, de wrokosani fu den tiriman di ben de klariklari fu drifi na bigi ipi sma leki meti gi kanu go na a srakti bangi fu tu grontapu feti èn tra bigi feti. Katoliki sma ben kiri katolikisma èn anitri sma ben kiri anitri leki wan plekti pe soso kba na ini den tu grontapu feti 50 te 60 milyun libi ben lasi gwe.

Na ini na di fu twenti yarihondro frulekti ten disi na sani di tan abra fu relisi e go doro fu meki ogri-ati, nanga dede kon — no soso na ini a kontren fu na krestenhèyti pe katoliki tanapu kontrari anitri ma ooktu na ini den relisi fu grontapu di no de kresten pe na islam de kontrari na dyu bribi, na hindu bribi teyge na islam, na buda bribi teyge na hindu bribi, na Sikh-relisi teyge na hindu bribi, èn so moro fara

Boyti fu dati relisi ala ten ben wani fu abi wan bigi krakti tapu „den kownu fu grontapu”, ini wan muyti fu taki san ben sa musu psa nanga den èn suma ben sa tron den tra tiriman. Meki wi go luku syatu wantu eksenpre.

[Futuwortu]

[Prenki na tapu bladzijde 5]

Sortu wan fu den elementi disi — na politiki, na bigi bisnis grontapu ofu relisi — e prenki „Babylon na Bigiwan”?