Kibri yu bribi èn yu yeye gosontu
„Tan hori tranga na a patron fu gosontu wortu di yu ben yere fu mi nanga na bribi èn lobi di abi fu du nanga Krestes.” — 2 TIMOTEYUS 1:13.
1. Fu san-ede wan bun skin gosontu de wan warti sani fu du sani fu hori en bun?
WAN bun gosontu na skinfasi na wan diri gudu. Te wi de gosontu, dan wi kan du furu sani èn e nyanbun moro fu na libi. Ma te wi abi wan siki di no e betre ofu abi wan swaki skin, dan a libi de moro muylek. A no de fu taki, taki wan sma musu kibri wan bun gosontu. Furu sma no e sorgu bun gi na gosontu fu den ofu e du sani di kan meki siki kon. Ma den sma di e luku den srefi bun, moro furu abi wan reydelek marki fu gosontu nanga krakti ini a moro bigi pisi fu den libi.
2. (a) Fu san-ede yeye gosontu de moro warti leki skin gosontu? (b) San de fanowdu fu tan gosontu ini bribi?
2 Yeye gosontu de moro prenspari leki skin gosontu. Na moro bun skin gosontu no kan tyari na presenti fu Gado fu têgo libi kon. Wan bun yeye gosontu e kon fu soyfri anbegi nanga bribi di abi en fondamenti na tapu soyfri sabi (Yohanes 17:3; Hebrew sma 11:6; Yakobus 1:27). Na apostru Paulus ben taki: „Den granman musu du sani nanga marki ini den gwenti, de seryusu, de gosontu ini frustan, de gosontu ini bribi, ini lobi, ini horidoro” (Titus 2:2). Ibriwan sma di wani de gosontu ini bribi musu du muyti fayafaya èn musu de na ay doro nomo. Sani di de leki kofar gi wan bun yeye gosontu, kan kon fu wi srefi ofu fu dorosey. Wi musu sabi den kofar disi fu kan kibri wi libi nanga wi yeye gosontu na ini na siki grontapu disi.
O siki na grontapu disi de?
3, 4. Fa moreel siki de fu si na ini na grontapu disi èn na ini den du fu sma?
3 Sondro fu degedege a de so taki na grontapu e siki hebi na moreel sey. Wi e si wan hebi siki di e tyari dede kon na ini ala den „pisi” fu na grontapu disi — den fasi fu bribi fu en, den politik sistema fu en, den bisnis instelling fu en, en prisiri ten. Soso pikinso sma abi respeki gi Gado èn den weti di a ben gi fu na tanbun fu na libismafamiri. So leki na historiya e meki wi si, dan na fadon na moreel sey e tyari alaten wan gro fu siki nanga problema kon na skin sey. A de leki wan spotu sani, ma moro furu sma no wani du noti fu yepi na moreel siki toestand disi, fu di den lobi den sani di e meki a kon.
4 Fa a grontapu disi siki! Ini na suku fu sensatie ofu fu pruberi fu lon gi fa a libi de trutru meki furu sma ben ruwiner na libi fu den nanga sopi èn drug (takru tabaka, puyri, nanga so moro fara). Ala pe yu abi tranga ogridu, wan libi no de warti furu moro, èn den strafu-oso furu psa marki nanga ogriman. Na ini furu kondre afu fu ala trolibi e kon na wan kba na ini wan brokotrow. Pikin di e misi na yoysi fasi di ppa nanga mma musu hori ay tapu den e gro kon tron ogri pikin. Fu di seks hurudu e nyan faro, meki AIDS (SIDA) nanga tra siki di e kon fu seks e panya esi-esi.
5. Fa Yesaya ben skrifi fu na toestand na ini na Yuda fu owruten?
5 Gado ben sa kan taki fu na siki grontapu disi san a ben meki Yesaya ondro krakti fu en santa yeye taki fu na tranga-ede Yuda: „Helu fu na sondu nâsi, na pipri di lay nanga sondu, wan siri fu ogriman, pori manpikin! Den gwe libi Yehovah, den wisiwasi na Santawan fu Israèl, den dray go na bakasey. Pe yu wani den naki yu moro fu di yu e poti moro opruru kon a tapu? Na heri ede de na ini wan siki kondisi, èn na heri ati de sondro krakti. Komoto fu na plata futu go srefi te na a ede no wan bun presi de.” — Yesaya 1:4-6.
6. Fa sma na ini na Yuda fu owruten èn na ini wi ten ben du tapu na aksi di Yehovah ben aksi fu du san de bun?
6 Na kari di Yehovah ben kari Yuda fu abi berow èn ’fu leri san de bun’, ini algemeen ben poti na wan sey (Yesaya 1:16-20). Disi te fu kba ben tyari na pori fu Yerusalen kon èn na katibo fu den dyu na ini Babilon. Soso wantu kotrow-wan ben ondrofeni a blesi fu Gado èn ben kibri psa ii! na mindri fu na siki nâsi. Na so yu abi tu na ini na ten disi na ini na grontapu disi di siki fu ede te na futu, soso wantu sma di wani leri san de bun. Den kotrow futuboy e du muyti srefisrefi fu kibri now na bribi nanga yeye gosontu nanga na howpu fu kisi volmaakti skin gosontu nanga têgo libi na ini Gado pramisi nyun grontapu. — 2 Petrus 3:13; Openbaring 21:1-4.
Yeye kofar na ini na siki grontapu disi
7. (a) Sortu kofar de gi wi bribi èn wi yeye gosontu? (b) San den Buku e taki fu na mogelijkheid di de fu kaka futu gi den dri mrio prenspari elementi di e tyari wi yeye gosontu kon ini kofar?
7 Fu kibri bribi nanga yeye gosontu de wan tyalensi fu di na moreel siki kondisi fu na grontapu disi na wan sani di e siki sma. Kresten sma musu feti so srefi tu nanga den eygi onvolmaakti fasi di den kisi (Romen 7:21-25). Boyti fu dati, Satan, „na tiriman fu grontapu” sabi den swakifasi fu na skin èn a de wan basi na ini a tesi fu sma (Yohanes 14:30; 1 Yohanes 5:19). Den dri moro prenspari kofar disi du de wan kofar gi na bribi nanga na yeye gosontu — na skin, na grontapu, èn Ddibri — de trutru kofarlek bigi. Ma a de wan sani di kan, fu „no de wan pisi fu na grontapu”, aladi wi e libi na ini. Wi kan ’tan waka nanga yepi fu Gado yeye èn no du lostu fu na skin’. Ma nanga yepi fu Gado wi kan ’tanapu kankan teyge den triki fu Ddibri’ (Yohanes 17:15, 16; Galasiya sma 5:16; Efeysiya sma 6:11; 2 Korente sma 2:11). Ma meki wi luku now fa wi kan kakafutu gi den dri elementi disi di de leki wan kofar gi wi bribi nanga yeye gosontu.
8. Fa Yeyses e fruteri fu den krakti na ini wi di kan trobi wi yeye gosontu?
8 Na ini wi onvolmaakti libisma natuur krakti e wroko di kan abi leki bakapisi taki wi e sondu èn di kan meki wi siki na yeye fasi (Yakobus 1:14, 15). Disi de spesrutu so nanga na agersi ati. Yeyses ben taki: „Komoto fu inisey, fu na ati fu libisma, ogri prakseri e kon: hurudu, fufuru, kiri, sutadu, bigi-ayfasi, ogridu, bidrigi fasi, wan yayo waka nanga libi, wan dyarusu ay, ley, heymemre, onreydelekhèyt. Ala den ogri sani disi e komoto fu inisey èn e doti ibisma.” — Markus 7:21-23.
9. (a) Sortu lostu abi en rutu na ini na agersi ati? (b) Leki fa Odo 4:20-24 e taki dan fa wi kan kibri na ati?
9 Aladi na ati de na fonten fu fowtu lostu, toku yu abi na ini wan sma di gi en srefi na ini na dini fu Gado so srefi tu na sdon presi fu dipi respeki gi Yehovah èn lobi gi san de yoysti (Mateyus 22:37; Efeysiya sma 4:20-24). Efu bun ofu ogri sa teki abra na wi e anga fu san wi e teki na ini wi ati. A ray fu na Wortu fu Gado de: „Manpikin, poti prakseri na den wortu fu mi. Beni yu yesi go na den wortu fu mi. Meki den no komoto fu yu ay. Kibri den na ini na mindri fu yu ati. Bika den de libi gi a sma di feni den èn gosontu gi heri a skin fu den. Kibri yu ati, iya, moro leki ala tra sani di de fu kibri, bika fu drape den fonten fu libi de.” — Odo 4:20-23.
10. Fa den skin swakifasi fu wi abi krakti na tapu wi firi nanga lostu?
10 Den skin swakifasi fu wi abi krakti na tapu wi firi nanga lostu. Suma no e ondrofeni na ten taki a e lasi ati, e lasi pasensi, e naki futu? Efu wantewante wi poti den skin firi disi reti, dan wi kan kibri wi yeye gosontu. Ma wan heymemre nanga anbisi esi-esi kan meki rutu na ini na ati. Bigi-ayfasi nanga wan lostu fu abi prisiri psa marki nanga, nyan èn dringi psa marki kan kisi wi na ini na yokro fu en. Seks lostu — di de natuurlijk lostu fu na fasi fa Gado meki wi — kan meki wi lasi pasi safrisafri. Fu meki taki so wan siki toestand na yeye fasi gro na ini wi, meki wi musu kweki aladey den froktu fu na yeye na ini wi libi, e treyn wi srefi ’fu tegu gi san de ogri’ èn ’fu anga na san de bun’. — Romen 12:9; Galasiya sma 5:22, 23.
Fonten fu yeye siki dorosey fu wi
11. (a) Sortu grontapu yeyefasi nanga du e panya siki srefisrefi? (b) Na sortu fasi wi musu poti prakseri na wi ati so leki fa Yeyses taki?
11 Fu kisi siki na yeye fasi kan kon fu sani dorosey fu wi. Na siki kan kon na wi fu den sma di dede na yeye fasi (Efeysiya sma 2:1-3). Efu wi de tumusi naw nanga den, dan wi kan teki a yeye fasi nanga fasi fu libi fu den abra. Kon a fesi na ini na grontapu, lobi fu moni, fu wani abi de moro bun sani na skinfasi, èn fu abi prisiri na den moro prenspari sani na ini na libi fu den sma na ini na grontapu disi. Ma na lostu fu abi den sortu sani disi e tyari siki kon èn srefi fu opo wi srefi pikinso gi den kan meki wi kon lasi na yeye fasi. Yeyses ben warskow: „Poti prakseri na yu srefi, taki yu ati no kon hebi nanga nyan èn dringi psa marki nanga sorgu fu na libi, èn na dey dati na ini wan momenti e kon na yu tapu leki wan trapu. Bika a sa kon tapu ala sma di e libi tapu a heri fesi fu grontapu.” — Lukas 21:34, 35.
12. Fa fowtu denki nanga leri kan de kofarlek gi wi yeye gosontu?
12 So tu a de taki den fowtu denki nanga leri fu na grontapu disi kan du wi ogri. Paulus ben warskow: „Wan pisiten sa kon te den no sa frudrage na gosontu leri, ma akruderi den eygi lostu den sa tyari wan lo leriman kon makandra, fu tigri den yesi; èn den sa dray den yesi puru fu na waarheid, aladi den sa dray go na falsi tori” (2 Timoteyus 4:3, 5). Falsi leri de leki wakawaka soro (2 Timoteyus 2:16, 17). Te na sani disi e bigin, dan wan pisi fu yu skin e dede, fu di brudu di e gi libi no kan doro na a pisi dati fu na skin.
13. Te yeye siki e panya en srefi leki wakawaka soro san musu du dan?
13 O esi wakawaka soro e panya en srefi! Fu meki dati dede no kon, dan na datra kande musu koti wan pisi fu na skin puru. So bun efu tweyfri, kragi ofu fadon komoto na bribi de leki wan kofar fu doti yu na yeyefasi, dan yu musu koti den esi-esi puru! (Teki gersi nanga Mateyus 5:29, 30.) Kari na yepi fu den gemeente owruman. No de leki den sma di Paulus e fruteri fu den taki den: „Siki na yeye fasi ini na tori fu strey-aksi nanga trobi fu wortu” fu di den ’no e agri nanga gosontu wortu’. — 1 Timoteyus 6:3, 4.
14. San den owruman kande e feni fanowdu fu du fu kibri na yeye gosontu fu na gemeente?
14 Fu kibri na yeye gosontu fu na gemeente dan owruman musu ’frumane nanga na gosontu leri èn piri-ay gi den sma di e taki kontrari sani’ (Titus 1:9, 13, 16; 2:1). Kande den sortu sma disi kan tyari kon baka na ini wan yeye gosontu kondisi (2 Timoteyus 2:23-26). Ma efu den no abi berow now èn e tan meki falsi leri go na fesi? Dan te yu luku en bun den musu poti den na ini quarantaine (dati wani taki poti den aparti fu tra sma). Den musu sluit uit fu na gemeente, èn wi e tan farawe fu den, so taki na yeye siki fu den no sa panya kon na wi. — Romen 16:17, 18; 1 Korente sma 5:9-13; Titus 3:9-11.
15. San na den moro prenspari fasi di Ddibri e kobroyki fu nyan na yeye gosontu fu Gado pipri na ondro?
15 Na di fu dri fonten fu kofar gi na bribi èn na yeye gosontu na Ddibri (Efeysiya sma 6:11, 12). Te na a dey fu tide a e pruberi fu swaki na bribi fu Yehovah pipri nanga yepi fu frufolgu, makandra nanga na opruru fu den gewoon sma, fonfon, strafu-oso nanga tapu skreki gi sma taki den kisi den (Openbaring 2:10). Fu di Satan soso wan tu leysi nanga den taktik disi e man fu broko na soyfri retifasi fu wan fu Gado futuboy, meki a e kobroyki moymoy sani fu na grontapu disi, di a de a gado fu en, ini wan muyti fu meki wantu fu unu fadon. — 2 Korente sma 4:4; 11:3, 14.
16. Sortu fetisani wi abi fu kan kaka futu gi na kon feti di Ddibri e kon feti nanga wi bribi èn wi yeye gosontu?
16 Fa wi kan kakafutu gi den feti di Ddibri e kon feti nanga wi? Te wi teki weri na heri fetisani fu Gado. Spesrutu wi musu teki ’na bigi schild fu bribi, di wi sa kan kiri ala den faya peyri nanga en’ di Satan e fringi kon a tapu wi. Wi musu begi so tu ini akruderi nanga Yeyses wortu: „No tyari wi kon na ini tesi, ma fri wi fu na ogriwan” (Efeysiya sma 6:11-18; Mateyus 6:13). Efu wi e begi na a fasi disi èn e handri ini akruderi nanga den begi fu wi, dan wi kan fruwakti yepi fu wi heymel Tta fu kiri ala den faya peyri fu Satan.
Tan gosontu ini bribi
17. O prenspari a de gi na kibri fu na yeye gosontu taki wi teki ’nnyan na a retl ten’ na ini wi èn alaten baka e teki prati na kresten aktiviteit?
17 Du sani a fesi fu no kisi siki na wan prenspari sani fu kibri wan bun skin gosontu. Nnyan di abi fitamin, buweygi fu skin nanga algemeen sorgu gi na skin èn na yeye de tumusi prenspari. Den natuurlijk sani fu na skin fu feti nanga siki de moro tranga na ini wan gosontu skin. Netso a de tu gi na kibri fu na yeye gosontu tumusi prenspari fu hori na diëet di Gado poti èn fu abi warderi gi na gosontu yeye nnyan ’na a retl ten’ di e kon nanga yepi fu „na kotrow èn koni srafu”. Aladi wi e poti na yeye „junk food”, fu na grontapu disi na wan sey, dan toku wi musu stuka na beybri nanga kresten publikâsi èn kon makandra nanga Gado pipri alaten (Mateyus 24:45-47; Hebrew sma 10:24, 25). Wi musu tan so srefi tu ini kondisi fu di wi ’abi furu fu du na ini na wroko fu Masra’ na ini na diniwroko èn tra kresten aktiviteit. — 1 Korente sma 15:58.
18. San na „na patron fu gosontu wortu”, èn fu san-ede wi musu hori en na lni wi ati nanga yeye?
18 Efu wi wani tan de gosontu na ini bribi, dan wi musu kobroyki dorodoro den yeye sani di Gado,seti, so leki Paulus ben skrifi Timoteyus: „Tan hori tranga na a patron fu gosontu wortu di yu ben yere fu mi nanga a bribi èn lobi di abi fu du nanga Krestes Yeyses. Kibri na tumusi bun panti diti, di gi na yu leki wan frantiwortu nanga yepi fu santa yeye, di libi na ini wi” (2 Timoteyus 1:13, 14). Wan tongo di sma e taki abi wan patron fu wortu. Na so tu na „soyfri tongo” fu na beybri waarheid abi wan patron di moro furu abi en fondamenti tapu na thema fu Yehovah kon kisi reti nanga yepi fu na Kownukondre (Sefanya 3:9). Wi musu hori na patron disi fu gosontu wortu na ini wi ati èn na ini wi yeye efu wi wani kibri wi bribi èn wi yeye gosontu. Noso na patron disi safrisafri sa lasi san a wani taki. Disi seyker ben psa nanga na gemeente ini Korente, pe son sma ben de „swaki èn siki”, fu di den ben misi yeye inzicht. — 1 Korente sma 11:29-32.
19. (a) San musu du efu wan yeye siki gro kon? (b) San owruman kan du efu wan sma e siki na yeye fasi?
19 San musu du efu yu kon de siki na yeye fasi? Seyker yu abi lobi yepi fanowdu èn dati de fu kisi bika Yakobus e taki: „Wan sma e siki na unu mindri? Meki a kari den owruman fu na gemeente kon na en, èn meki den begi tapu en èn wrifi en nanga oli, na ini na nen fu Yehovah” (Yakobus 5:14). Iya, kari den owruman fu yepi yu. Leki yeye datra den kan yepi yu fu doro te na a rutu fu na yeye siki. Den sa wrifi na wan safu èn bun fasi na oli fu Gado wortu di abi krakti fu dresi sma go ini yu. Efu yu du sondu, ma abi berow, de seyker dan taki Yehovah e gi pardon trutru (Psalm 103:8-12). San yu kan fruwakti efu den owruman e begi nanga, yu èn fu a bun fu yu? Yakobus e piki: „Na begi fu bribi sa meki a sma di no e firi bun kon betre, èn Yehovah sa opo en. Èn efu a du sondu, a sa kisi pardon.” — Yakobus 5:15.
Yeye gosontu e tyari têgo libi kon
20. (a) Sortu ray na fosi yarihondro tiriskin ben gi ini na tori fu a kibri fu na yeye gosontu? (b) San sa yepi wi aladi wi e wakti den blesi fu na nyun grontapu?
20 „Wi e winsi yu wan bun gosontu!” Nanga den wortu disi na fosi yarihondro tiriskin fu Yehovah pipri, ben taki fu na brifi pe den ben kari „fanowdu sani” di Gado e aksi fu kresten sma. Den ben musu „tan farawe fu sani di ben tyari leki srakti ofrandl go gi kruktu gado èn fu brudu èn fu ala sani di stek èn no lasi brudu èn fu hurudu” (Tori fu den apostru 5:28, 29). Na recept dati fu wan bun yeye gosontu abi te now ete waarde. Èn aladi wi e wakti tapu den blesi fu na nyun grontapu, dan wi kan kibri wi bribi èn yeye gosontu efu wi e tan preyki nanga faya na bun nyunsu fu na Kownukondre èn e hori Yehovah nen hey ini na siki grontapu disi. Fu tan de druk bezig nanga disi sa kibri wi fu lasi pasensi gi den blesi fu na nyun grontapu di de so krosibey. A tru, „fruwakti di e poti na wan tra ten e meki na ati kon siki , ma a sani di yu e angri fu en de wan bon fu libi te a e kon trutru”. — Odo 13:12.
21. sortu blesi e wakti den sma di na wan bun fasi e kibri den bribi nanga yeye gosontu na ini na siki grontapu disi?
21 No misi na moro bigi blesi di Yehovah abi gi den sma di lobi en. Ala kaka di wan sma e kaka futu gi den grontapu krakti, ala feti nanga yu swakifasi, èn ala na puru fu den faya peyri fu Ddibri no ben sa de fu noti. Na ini Yehovah nyun grontapu yu sa si nanga yu eygi ay taki no „wan sma sa taki: ’Mi siki’” (Yesaya 33:24). Disi sa de so fu na sorgu fu Gado nanga yepi fu na frulusu ofrandi fu Yeyses Krestes, Na Sma di ’teki wi siki tapu en èn tyari wi siki’ (Mateyus 8:17; Yesaya 53:4). Yu sa kan dringi fu den agersi „liba fu watra fu libi” èn nyan fu „bon fu libi” di abi wwiri „fu dresi den nâsi” (Openbaring 22: 1,2). Fu libi sondro kba na ini volmaakti fasi nanga koloku sa de na payman fu yu fu na kibri di yu kibri yu bribi nanga yu yeye gosontu na ini na siki grontapu disi.
Yu e memre disi ete?
◻ Fu san-ede de gosontu na ini bribi de moro prenspari leki fu abi wan bun skin gosontu?
◻ San na den dri moro prenspari kofar gi bribi nanga yeye gosontu?
◻ Sortu relatie de a mindri wan bun yeye gosontu èn na agersi ati?
◻ San musu de efu wan sma e siki na yeye fasi?
[Prenki na tapu bladzijde 26]
Na mindri fu wan siki grontapu a de wan wan sani di kan fu abi wan tranga bribi èn wan bun yeye gosontu
[Prenki na tapu bladzijde 31]
Wan bun yeye gosontu e anga fu kresten aktiviteit di e du fayafaya ini a teki doronomo na ini yu fu yeye nnyan na a reti ten