Den lobiwan foe joe di dede — Pe den de?
ALEC ben broko srefisrefi. Ini wán wiki, a ben lasi toe mati foe en. Wan foe den, Nevil, ben dede foe mankeri di a ben kisi foe wan koegroe di ben komoto na wan gon. A trawan, Toni, ben dede foe di wagi naki en. Aksi di no ben hori en prakseri bifo, ben trobi a Zuid-Afrikan boi di ben abi 14 jari. ’Foe san ede sma moesoe dede? Èn san e pasa baka dede?’, a ben aksi ensrefi.
Di Alec ben de na pasi e go na a beri foe Nevil, a ben howpoe troetroe foe kisi piki tapoe den aksi disi. „Ma”, a e memre taki, „a priester ben leisi soso foe wan boekoe èn ben taki dati Nevil ben go na hemel. Dan, na a grebi, a priester ben taki dati wi e wakti na opobaka. Mi ben broeja. Efoe Nevil ben de ini hemel, dan fa a ben kan wakti wan opobaka?”
Moro lati a srefi dei dati, Alec ben de na a beri foe Toni. A kerki dienst di ben hori akroederi den gwenti nanga gebroiki foe den, ben hori ini wan tongo di Alec no ben man froestan. Tokoe, a fasi fa den sma, di ben sari gi a dedewan, ben tjari densrefi leki sma di no man dwengi densrefi moro, ben overtoigi Alec taki den no ben kisi trowstoe. „A neti dati”, a e froeklari, „mi ben broeja srefisrefi na emotioneel sei. Mi ben firi leki jepi no de èn mi ben broeja. No wan sma ben kan gi piki tapoe den aksi foe mi, di ben o gi mi satisfaksi. Foe a fosi leisi ini mi libi, mi ben aksi misrefi efoe wan Gado de troetroe.”
Ibri jari miljoenmiljoen sma, neleki Alec, e lasi lobiwan na ini dede. „Na heri grontapoe”, na so a 1992 Britannica Book of the Year (a 1992 Britannica boekoe foe a jari) e froeklari, „50.418.000 sma dede ini 1991.” Èn omeni miljoenmiljoen sma moro dede sensi a ten dati? Prakseri pikinso den foeroe watra-ai di ben fadon, foe den sma di tan na libi, èn di lasi wan lobiwan na ini dede! Wan sani di e meki a sari foe den kon moro bigi, na a broeja di e kon foe den fasi fa sma e prakseri foe dede èn di no e kroederi nanga makandra.
So boen, foeroe sma leki Alec, kon lasi a fasi fa den ben e froewakti taki sani ben o waka èn den e tweifri efoe wan fondamenti de, foe howpoe tapoe wan libi ini a ten di e kon, baka dede. So leki fa a skrifi ini na Encyclopedia of Religions, dan „ini ala den jarihondro, man di e denki dipi foe sani, no ben bribi, san moro foeroe foe den sma ben bribi . . . ma den ben tweifri foe a fasi fa a sili noso libi foe wan sma kan de aparti foe a sma en edetonton nanga en skin”.
Na wan moi sani foe si, taki na encyclopedia di kari na tapoesei, e taki moro fara dati bijbel no e hori baka gi a leri foe den relisi, foe wan sili di no kan dede, èn di e libi aparti foe a skin. A troe taki, ini wan toe presi, bijbel e sori tapoe a „sili” foe wan sma leki a e gowe libi wan dede skin èn di srefi e kon baka na en, ma ini den kefal disi, den e gebroiki „sili” gi „libi” di lasi noso di wan sma kisi baka (Genesis 35:16-19; 1 Kownoe 17:17-23). Moro foeroetron, bijbel e gebroiki a wortoe „sili” foe sori tapoe mekisani di wi man si, èn di meki foe meti nanga broedoe, ija, mekisani di de libilibi (Genesis 1:20; 2:7). Foe dati ede, ala leisi baka, bijbel e taki dati den sili e dede (Esekièl 18:4, 20; Tori foe den Apostel 3:23; Openbaring 16:3). A Wortoe foe Gado e taki dati te den sili dede kaba, dan den „no sabi notinoti”. — Preikiman 9:5, 10.
Na a tra sei, bijbel abi tori foe dede sma di kisi libi baka. Ini a kefal foe Lasarus, disi ben pasa baka di a ben dede fo dei kaba (Johanes 11:39, 43, 44). Ma san sa pasa nanga sma di dede hondrohondro noso doesoendoesoen jari kaba? A froewakti di den abi foe libi ini a ten di e kon, sa de wan sani di e aksi taki Gado e opo den nanga a srefi skin baka di den ben abi di den ben dede?
Nôno. So wan denki no de ini akroederi nanga san e pasa nanga den atoom di de ini wan dede skin. Te foe kaba, den prani e gebroiki son wan foe den srefi atoom disi. Foe den sei, tra mekisani e njan den prani disi èn den atoom e tron wan pisi foe a skin foe den mekisani dati.
Disi wani taki, dati howpoe no de gi den sma di dede langa ten kaba? Nôno. A Mekiman foe wi bigi universum abi wan toemoesi boen memre di no abi marki. Na ini a volmaakti memre foe en, a man memre a fasi fa ibri dede sma, di A e froekisi foe memre, ben de nanga den eigifasi di a ben abi, nanga den sani di a sma ben kisi foe papa nanga mama. Boiti dati, Jehovah Gado abi a makti foe meki wan libisma skin baka, nanga den srefi sani ini a skin, di a sma, di ben libi na fesi kaba, ben kisi foe papa nanga mama. A kan poti a memre nanga a fasi fa a sma ben de, na ini a sma di A e memre, so leki Abraham.
Pikinmoro leki toe doesoen jari baka a dede foe Abraham, Jesus Krestes ben gi a djaranti disi: „Taki den dedewan e opo baka, Moses srefi ben tjari kon na krin na ini a tori di a ben skrifi foe a maka boesiboesi, di a ben kari Jehovah ’a Gado foe Abraham èn a Gado foe Isak èn a Gado foe Jakob’. A no de wan Gado foe den dedewan, ma foe den libiwan, bikasi gi en den alamala e libi” (Lukas 20:37, 38). Boiti Abraham, Isak, nanga Jakob, miljoenmiljoen tra dede sma de na libi ini a memre foe Gado èn e wakti na opobaka di o kon. „Wan opobaka sa de foe den regtfardikiwan èn den onregtfardikiwan”, bijbel e taki. — Tori foe den Apostel 24:15.
Wan toe wiki baka di Alec lasi lobiwan foe en na ini dede, a ben kisi piki tapoe den aksi foe en. Wan Jehovah Kotoigi ben kon na en oso èn ben sori en san a Wortoe foe Gado e taki foe dede èn foe na opobaka. Disi ben gi Alec trowstoe èn a ben meki taki a libi foe en ben wani taki wan sani baka.
Joe toe ben sa wani leri moro foe a howpoe foe na opobaka di abi en fondamenti na ini bijbel? Foe eksempre, moro foeroe foe den opobaka o feni presi na hemel noso na grontapoe? Èn san wan sma moesoe doe foe meki Gado feni en boen èn foe ondrofeni a kontroe foe a toemoesi moi pramisi foe En, taki sma kan de makandra baka nanga den lobiwan foe den di dede?