Den lobiwan foe joe di dede — Joe sa si den baka?

JOHANES ben abi neigi jari nomo di en mama dede. Baka ten, a ben memre san ben pasa na a oso pe a dedeskin ben de: „Mi ben teken wan prenki gi en èn ben skrifi wan toe wortoe na tapoe a prenki, foe aksi en foe wakti wi alamala na hemel. Mi ben langa disi gi papa foe a poti en ini a dedekisi pe mama ben de, èn ala di mama ben dede, tokoe mi wani foe denki taki mama kisi a lasti boskopoe dati foe mi.” — How It Feels When a Parent Dies (Fa a e firi te wan papa noso mama dede), foe Jill Krementz.

Tweifri no de taki Johanes ben lobi en mama nanga en heri ati. Baka di a ben taki foe den boen eigifasi foe en mama, a ben taki: „Kande a de so, taki mi no wani memre den takroe sani, ma mi no man denki foe no wan takroe sani foe mama. A ben de a moro moi oema di oiti mi si ini mi heri libi.”

Neleki Johanes, foeroe sma abi switi memre foe den lobiwan foe den di dede, èn den e erken taki den abi a fanowdoe na emotioneel sei foe si den baka. Edith, di en manpikin foe 26 jari dede foe kanker, ben taki: „Mi abi a fanowdoe foe bribi taki mi boi de na wan presi, ma mi no sabi pe. Mi sa si en baka? Mi no sabi, ma mi howpoe taki mi sa si en baka.”

Seiker, a lobi Mekiman foe libisma no de sondro firi gi a normaal winsi disi foe libisma. Foe dati ede a pramisi kaba taki a ten sa kon pe miljoenmiljoen sma o de makandra baka nanga den lobiwan foe den di dede. A Wortoe foe Gado abi foeroe tori di e sori na tapoe a pramisi disi foe wan opobaka di e kon, foe den dedewan. — Jesaja 26:19; Danièl 12:2, 13; Hosea 13:14; Johanes 5:28, 29; Openbaring 20:12, 13.

Soema e kisi wan opobaka foe go na hemel?

Meki wi go loekoe a howpoe foe Johanes taki en lobi mama e wakti en na hemel. Foeroe sma di e go na kerki, abi a howpoe noso a bribi disi. Ini wan moeiti di den e doe foe hori baka gi den sortoe fasi disi foe si sani, tiriman foe krestenhèit èn son sociaal wrokoman no e fiti den tekst foe bijbel na wan joisti fasi.

Foe eksempre, datra Elisabeth Kübler-Ross, wan sabiman ini a tori foe a jepi di sma e jepi trawan di lasi lobiwan na ini dede, ben taki ini a boekoe foe en On Children and Death (Foe pikin nanga dede): „Dede soso wani taki dati wi e poeroe wi skin neleki wi kan poeroe wan owroe krosi di no boen moro, noso fa wi e kon foe a wan kamra go na ini wan tra kamra. Ini Preikiman 12:7, wi e leisi: ’Dan a doti sa go baka na a gron so leki fa a ben de; èn a jeje sa go baka na Gado di ben gi en’. Jesus ben taki: ’Mi e go foe meki wan presi klari gi oenoe; foe oenoe toe kan de pe mi de.’ Èn a ben taigi a foefoeroeman na a kroisi: ’Tide joe sa de nanga mi ini a paradijs.’”

Den tekst di skrifi na tapoesei wani taki troetroe dati den lobiwan foe wi di dede, de na libi now èn e wakti wi na hemel? Meki wi go loekoe den tekst disi moro fini, wi e bigin nanga Preikiman 12:7. A de krin, taki a koni man di ben skrifi den wortoe dati no ben wani taki wan tra sani leki san a ben taki kaba na ini a srefi bijbel boekoe: „Denwan di de na libi, sabi taki den o dede; ma gi den dedewan, den no sabi notinoti” (Preikiman 9:5). A ben taki foe a dede foe a libisma famiri ini algemeen. A de reidelek foe bribi taki ala sma di e taki na poebliki dati Gado no de, èn den tranga-ede ogriman, e go baka na Gado te den dede? A no de reidelek. Te joe loekoe en boen, dan sma no kan taki dati foe no wan foe wi, awinsi wi e denki taki wi boen noso wi ogri. Foe di no wan foe wi ben de kaba na hemel nanga Gado, fa wi kan taki dati wi e go baka na en?

San a bijbel skrifiman ben wani taki dan, di a ben taki dati ’a jeje e go baka na a troe Gado’? Foe di a ben gebroiki a Hebrew wortoe di vertaal nanga „jeje”, meki a no ben e sori tapoe wan spesroetoe sani di e meki a wan libisma e difrenti foe a trawan. Na presi foe dati, dan na Preikiman 3:19, a srefi bijbel skrifiman di skrifi nanga jepi foe santa jeje, e tjari kon na krin, taki libisma nanga meti „alamala abi soso wán jeje”. Leki fa a sori, dan a skrifiman abi na prakseri dati „jeje” na a libi krakti ini den cel di a skin foe libisma nanga meti, meki foe dati. Wi no ben kisi a jeje disi langalanga foe Gado. Wi ben kisi a jeje disi foe wi papa nanga mama, ini a pisiten di wi ben meki ini a mama bere èn baka dati ben gebore. Moro fara, a jeje disi no e rèis troetroe ini loktoe foe go baka na Gado te wi e dede. Den wortoe ’a jeje e go baka na a troe Gado’, na wan agersi fasi foe taki èn a wani taki dati a froewakti di wan sma abi foe libi ini a ten di e kon, de now ini na anoe foe Gado. A de na en foe bosroiti soema a sa memre èn sa gi wan opobaka te foe kaba. Loekoe gi joesrefi o krin bijbel e sori disi na Psalm 104:29, 30.

Jehovah Gado ben abi na prakseri, taki soso wan nomroe di skotoe, foe getrow foetoeboi foe Krestes, wan nomroe foe soso 144.000 sma, sa kisi wan opobaka foe libi na hemel leki jeje manpikin foe Gado (Openbaring 14:1, 3). Den disi sa de wan hemel tiri nanga Krestes gi a blesi foe a libisma famiri na grontapoe.

Den fosiwan di ben kon sabi foe disi, ben de den getrow apostel foe Jesus, di a ben taigi den: „Ini na oso foe mi Tata foeroe tanpresi de. Efoe dati no ben de so, mi ben sa taigi oenoe, foe di mi e go drape foe sreka wan presi gi oenoe. Èn te mi go drape èn sreka wan presi gi oenoe, dan mi e kon baka èn mi sa teki oenoe na oso na mi, so taki oenoe kan de toe pe mi de” (Johanes 14:2, 3). Den apostel dati nanga tra fosi kresten dede èn den ben abi foe wakti na ini dede sondro foe sabi wan sani, te leki Jesus ben o kon foe pai den nanga wan opobaka na ini hemel. Foe dati ede wi e leisi taki a fosi kresten sma di lasi en libi foe en bribi ede, Stefanus, „ben fadon na sribi ini dede”. — Tori foe den Apostel 7:60; 1 Tesalonikasma 4:13.

Opobaka foe libi na grontapoe

Ma fa a de nanga a pramisi di Jesus gi na ogriman di ben dede na en sei? Neleki foeroe djoe ini a ten dati, a man disi ben bribi taki Gado ben sa seni wan Mesias di ben sa seti wan kownoekondre èn di ben sa tjari vrede nanga seikerfasi baka gi a djoe nâsi na grontapoe. (Teki 1 Kownoe 4:20-25 gersi nanga Lukas 19:11; 24:21 èn Tori foe den Apostel 1:6.) Boiti dati, na ogriman ben sori bribi taki Jesus ben de a Sma di Gado ben froekisi foe de a Kownoe. Tokoe, na a momenti dati, a dede di Jesus ben o dede seiker, leki wan man di den ben kroetoe, ben meki disi sori wan sani di no kan. Foe dati ede Jesus ben gi na ogriman ete wantron a djaranti, foe di A ben bigin En pramisi nanga den wortoe disi: „Foe troe mi e taigi joe tide: Joe sa de nanga mi na Paradijs.” — Lukas 23:42, 43.

Den bijbelvertaling di poti wan komma na fesi a wortoe „tide”, e tjari wan problema kon gi sma di wani foe froestan den wortoe foe Jesus. Jesus no ben go na no wan enkri sortoe paradijs a srefi dei dati. Na presi foe dati, a ben sribi dri dei ini dede, èn a no ben sabi notinoti, te leki Gado ben gi en wan opobaka. Srefi baka na opobaka foe Jesus èn a go di a go na hemel, a ben abi foe wakti na a reti anoe foe en Tata, te leki a ten ben kon gi en foe tiri leki Kownoe tapoe a libisma famiri (Hebrewsma 10:12, 13). Heri esi, a tiri foe Jesus Kownoekondre sa tjari froelekti kon gi a libisma famiri èn a sa kenki a heri grontapoe kon tron wan paradijs (Lukas 21:10, 11, 25-31). Dan a sa meki a pramisi foe en kon troe gi na ogriman dati, foe di a sa gi en wan opobaka foe libi na grontapoe. Èn Jesus sa de nanga a man, foe di a sa jepi a man nanga ala den sani di a man abi fanowdoe, di abi na ini toe, taki a man sa moesoe tjari a fasi fa a e libi ini akroederi nanga den regtfardiki wet foe Gado.

Opobaka foe foeroe sma

Neleki fa a sa de nanga na ogriman dati di ben abi berow, na so na opobaka foe moro foeroe foe den libisma sa feni presi djaso na grontapoe. Disi de ini akroederi nanga a prakseri foe Gado di a ben meki libisma. A ben poti a fosi man nanga oema ini wan paradijs djari èn a ben taigi den foe poti a grontapoe na den ondro. Efoe den ben tan gi jesi na Gado, dan noiti den ben sa kon owroe èn ben o dede. Na Gado en joisti ten, Adam nanga den volmaakti bakapikin foe en, ben sa abi a heri grontapoe na den ondro, èn ben sa meki en tron wan paradijs. — Genesis 1:28; 2:8, 9.

Ma, foe di Adam nanga Eva ben sondoe espresi, meki den ben tjari dede kon gi densrefi èn gi den pikin foe den di ben moesoe kon ete (Genesis 2:16, 17; 3:17-19). Foe dati ede bijbel e taki: „Nanga jepi foe wán man [Adam] sondoe kon na ini grontapoe èn nanga jepi foe sondoe dede, èn na so fasi dede panja go na ala sma bikasi den alamala ben sondoe.” — Romesma 5:12.

Na soso wán libisma ben de, di ben gebore sondro a sondoe di wi e kisi foe papa nanga mama. Dati ben de a volmaakti Manpikin foe Gado, Jesus Krestes, di a libi foe en, Gado ben tjari foe hemel go na ini a bere foe wan djoe jongoewenke, Maria. Jesus ben tan sondro sondoe èn a no ben froedini en foe den kiri en. Foe dati ede, a dede foe en abi froeloesoe waarde foe a boen foe „a sondoe foe grontapoe” (Johanes 1:29; Mateus 20:28). Foe dati ede Jesus ben kan taki: „Mi na a opobaka èn a libi. A sma di e tan poti bribi na ini mi, sa kon na libi awinsi a dede.” — Johanes 11:25.

So boen, joe kan prakseri foe a froewakti foe de makandra baka nanga den lobiwan foe joe di dede, ma disi e aksi foe joe taki joe e tan poti bribi ini Jesus leki joe Froeloesoe paiman èn taki joe e arki en leki a Kownoe di Gado ben poti. Heri esi Gado Kownoekondre sa poeroe ala takroedoe foe a grontapoe disi. Ala libisma di e weigri foe saka densrefi na ondro a tiri disi, sa kisi pori. Ma, borgoe foe Gado Kownoekondre sa tan na libi èn den sa wroko tranga foe kenki a grontapoe disi kon tron wan paradijs. — Psalm 37:10, 11; Openbaring 21:3-5.

Dan a span momenti sa doro foe na opobaka bigin. Joe sa de drape foe gi den dedewan wan switi kon baka? A e anga foe san joe e doe now. Toemoesi moi blesi e wakti ala sma di nownow e saka densrefi na ondro a tirimakti foe a Kownoekondre foe Jehovah ini na anoe foe en Manpikin, Jesus Krestes.