San Kresneti wani taki gi joe?

Fa joe sa piki? Kresneti na (1) wan ten foe de nanga joe famiri; (2) wan ten foe hori fesa; (3) wan relisi ten; (4) wan ten di e aksi foeroe foe joe; (5) wan ten di e meki joe prakseri nanga prisiri foe den owroeten; (6) wan ten foe doe bisnis sondro sjen di de krin foe si.

ALA DI a kan sori foe de wan froewondroe sani, tokoe soso 6 procent foe den moro leki 1000 sma di den ben aksi ini Ingrisikondre, ben si Kresneti na a fosi presi leki wan relisi afersi. Na kontrari, 48 procent ben prakseri moro foeroe foe Kresneti leki wan ten foe de nanga den famiri foe den. Foe troe, foeroe sma e froeklari taki a de wan spesroetoe ten gi pikin-nengre. Foe dati ede, di den ben aksi wan pikin meisje di abi 11 jari san a ben lobi moro foeroe foe Kresneti, a ben piki taki: „A span di de na ini, a firi foe de kolokoe, [nanga] a gi foe kado.” The Making of the Modern Christmas e agri taki „den sani tapoe san den e poti moro foeroe krakti foe Kresneti di kresten ’gwenti’, de sondro foe tweifri, na tapoe na oso, na tapoe na famiri èn spesroetoe na tapoe den pikin-nengre”.

Ma a de spesroetoe na ini krestenhèit foe den westsei kondre taki Kresneti na wan okasi gi na famiri, te famiriman e kon makandra foe prati kado gi makandra. Sma e poti moro krakti na tapoe Pasen, na ini den kondre pe na Owstoe Orthodox Kerki abi moro foeroe makti; tokoe, kresnetiten de moro foeroe wan fakansiten.

Wan „sani foe doe bisnis”

Kresneti „kon de wan bisnis afersi di de krin foe si”, na so The New Encyclopædia Britannica e froeklari. Disi de moro foeroe so ini Japan.

„Japansma poeroe ala sani di wani abi foe doe nanga relisi èn den kenki Kresneti kon tron wan sani foe doe bisnis wawan”, na so a Daily Record foe Washington e skrifi. A e skrifi moro fara, taki Kresneti na ini Japan de „wan moro bigi fesa na ini san den e poti moro foeroe krakti na tapoe bisnis na presi na tapoe a relisi sei foe na afersi”.

Sosrefi ini den so-kari kresten kondre, foeroetron a „relisi sei foe na afersi” disi no makriki foe si. Sowan 40 jari pasa, wan pamflet di de teige Kresneti ben kragi taki: „A bisnis sistema e hori baka toemoesi foeroe gi Kresneti. Kresneti na a ten ini a jari pe den e meki foeroe moni moro leki iniwan tra ten ini a jari. Den so-kari kresten bisnisman e loekoe nanga faja go na a ten foe Kresneti, no gi a boen foe Krestes, ma foe den kan meki foeroe moni.” Ini a ten disi den wortoe disi troe srefisrefi! Pikinmoro dri moen bifo wi doro a kaba foe a jari ini foeroe kondre, dan wi e jere kaba taki den e memre wi omeni dei tan abra ete foe bai kado gi a Kresneti di e kon. Omoro a jari e kon na wan kaba, omoro bisnis e kon moro faja, na so wan fasi taki 25 procent foe den sani di den wenkri e seri ini wan jari, den e seri na kresnetiten.

Awinsi san Kresneti wani taki gi joe nownowde, kande joe e aksi joesrefi troetroe fa a doe bigin. Foe taki en leti, bijbel e horibaka gi den kado di sma e gi na Kresneti? Den Kresneti fesa foe a ten disi na troetroe kresten fesa? Kon meki wi si.

[Sma di abi a reti foe a prenki na tapoe a kafti]

Na fesisei: Thomas Nast/Dover Publications, Inc., 1978