Wan bigi rampoe na Rwanda — Soema de frantiwortoe?

„A momenti bifo den ben kapoe na ede opo foe wan monteur di ben abi 23 jari”, na so na U.S.News & World Report ben taki, „dan wan foe den ogriman ben taigi Hitijise: ’Joe moesoe dede, bika joe na wan Toetsi.’”

OMENI leisi so wan sani ben pasa baka ini den moen april nanga mei ini a pikin kondre Rwanda di de ini Centraal Afrika! Na a ten dati 15 gemeente foe Jehovah Kotoigi ben de na ini èn lontoe Kigali, a mamafoto foe Rwanda. Eugène Ntabana, a foto-opziener, ben de wan Toetsi. En, en wefi, en manpikin, nanga Sjami, en oema-pikin di ben abi neigi jari, ben de wan foe den fosi sma di den ben kiri, di den bigin kiri sma na wan ogri-atifasi.

Den ben kiri doesoendoesoen sma foe Rwanda ibri dei — wiki baka wiki. „Ini den lasti siksi wiki”, na so a koranti, di wi ben kari na tapoesei, ben skrifi na mindri foe mei, „so wan 250.000 sma dede ini wan sani di den ben seti foe kiri wan heri ras èn foe teki refensi, san wi kan teki gersi nanga a poeroe di a Khmer Rouge ben poeroe sma na pasi na Kambodja, foe di den ben kiri den na mindri foe den jari 1970.”

A tijdschrift Time ben taki: „Ini wan sani di e meki sma denki baka foe Nazi Doisrikondre, den ben poeroe den pikin-nengre na mindri foe wan groepoe foe 500 sma, soso foe di den pikin-nengre ben gersi wan Toetsi. . . . Wan komsarsi trow nanga wan Toetsi èn Hoetoe pranasisma ben aksi a komsarsi disi foe a zuidsei foto Boetare, foe teki wan [kefalek hati] bosroiti: a ben kan kibri a libi foe en wefi nanga den pikin foe en, efoe a ben drai en baka gi a famiri foe en wefi, — a papa nanga a mama foe a wefi nanga a sisa foe a wefi — so taki den ben kan kiri den. A ben agri nanga a seti disi.”

Siksi sma ben wroko na a Vertaal Afdeling foe Jehovah Kotoigi na Kigali. Fo foe den ben de Hoetoe èn toe ben de Toetsi. Den Toetsi ben de Mbanda Anania nanga Denise Moekagisagara. Di den sroedati makandra nanga foefoeroeman, ben kon na a oso, dan den ati ben kon bron di den ben si taki Hoetoe nanga Toetsi ben e libi sei nanga sei makandra. Den ben wani foe kiri Mbanda nanga Denise.

„Den ben bigin hari den prin poeroe foe den handgranaat foe den”, Emanuèl Ngirente, wan foe den Hoetoe brada, ben taki, „èn den ben e pramisi foe kiri wi, foe di wi ben abi den feanti foe den na wi mindri. . . . Den ben wani foeroe moni. Wi ben gi den ala moni di wi ben abi, ma den no ben de tevrede nanga dati. Den ben teki a bosroiti foe teki leki pai, ala sani di den ben kan gebroiki, so srefi wan laptop computer di wi ben gebroiki gi a vertaal wroko foe wi, a fotokopiëer masjin foe wi, den radio foe wi, den soesoe foe wi, èn go so doro. Wantronso den ben gowe sondro foe kiri wan sma, ma den ben taki dati den ben sa kon baka na wan tra ten.”

Ini den dei di ben kon na baka, den foefoeroeman ben tan kon baka, èn ibri leisi den Hoetoe Kotoigi ben begi den foe meki den Toetsi mati foe den tan na libi. Te foe kaba, di a ben kon toemoesi kefalek gi Mbanda nanga Denise foe tan moro langa, sani ben seti gi den foe meki den go nanga den tra Toetsi di ben lowe go na wan skoro di ben de krosibei. Mbanda nanga Denise ben man lowe, di sma ben fadon go na a skoro. Mbanda nanga Denise ben man lon pasa toe oekoe pe den ben tapoe sma foe pasa, ma na a di foe dri oekoe den ben teki ala den Toetsi na wan sei èn den ben kiri Mbanda nanga Denise.

Di den sroedati ben drai kon baka na a Vertaal Afdeling èn den ben si taki den Toetsi Kotoigi ben gowe, dan den sroedati ben gi den Hoetoe brada wan ogri-ati fonfon. Ne wan mortier ben bòs krosibei foe den, èn den brada ben man lowe èn tan na libi.

Di den ben tan kiri sma ini a heri kondre, a nomroe foe dedesma ben doro kande wan afoe miljoen. Te foe kaba, na mindri toe nanga dri miljoen, noso moro sma, foe den aiti miljoen sma di e libi ini Rwanda, ben gowe libi den tanpe foe den. Foeroe foe den ben lowe go na den krosibei kondre Zaire nanga Tanzania. Den ben kiri moro leki 400 Kotoigi foe Jehovah, èn hondrohondro trawan ben de na mindri den sma di ben lowe go na den kampoe dorosei foe a kondre.

San ben meki taki den kiri sma na so wan fasi leki noiti no pasa ete èn taki someni sma ben gowe libi a kondre foe den? Sma ben kan meki taki a sani disi no ben abi foe pasa? Fa a situwâsi ben de bifo na ogridoe ben bigin?

Den Hoetoe nanga den Toetsi

Den Hoetoe, di moro foeroe na sjatoe, koendoe Bantoe sma, nanga den Toetsi, di moro foeroe na langa, lekti skin sma di sma sabi moro foeroe toe leki Watoesi, e libi na Rwanda èn na a krosibei kondre Boeroendi. Na ini ala toe kondre den Hoetoe e teri wan sani foe 85 procent foe den sma di e libi ini den kondre èn den Toetsi e teri 14 procent. Te na ini a di foe 15 jarihondro, sma skrifi sani foe den feti di ben feni presi na mindri den ras-groepoe disi. Ma tokoe, a moro bigi pisi foe a ten, den ben libi nanga makandra ini vrede.

„Wi ben gwenti foe libi nanga makandra ini vrede”, wan oema di ben abi 29 jari ben taki foe den 3000 Hoetoe nanga Toetsi di ben e libi ini a pikin foto Roeganda, wan toe kilometer owstoesei foe Zaire. Ma ini april, nanga a feti di den oproeroeman foe den Hoetoe ben kon feti, den ben kiri pikinmoro ala Toetsi foe a pikin foto. The New York Times ben tjari kon na krin:

„A situwâsi foe a pikin foto disi na a srefi situwâsi di de na ini heri Rwanda: Hoetoe nanga Toetsi di e libi sei nanga sei makandra èn di e trow nanga makandra, no e broko den ede nanga, noso no sabi srefi soema ben de wan Hoetoe èn soema ben de wan Toetsi.

Ne wan sani ben pasa di kenki ala sani wantronso. Ini april, Hoetoe fetigroepoe ini a heri kondre bigin kiri den Toetsi leki den no ben de boen na den ede, na ala sei pe den ben kan feni den. Di den ben bigin kiri den Toetsi, den Toetsi ben lowe go na den kerki foe kisi kibri. Den fetigroepoe ben hari go na den baka, èn ben meki den kerki di sma ben si leki presi pe den kan kisi kibri, kon tron beripe nanga broedoe di ben panja go na ala sei.”

San ben meki a kiri bigin? A ben de a dede di den presidenti foe Rwanda nanga Boeroendi dede, di na opolani pe den ben sidon na ini, fadon kon na gron na Kigali, tapoe 6 april. Ala toe presidenti ben de Hoetoe. A sani disi di ben pasa, na a wán noso tra fasi ben meki taki sma no wawan bigin kiri den Toetsi na ipi-ipi, ma so srefi ibri Hoetoe di den ben denki taki a ben de wan mati foe den Toetsi.

Na a srefi ten, a feti ben kon moro hebi na mindri a revo legre — a R.P.F. (Patriotis Legre foe Rwanda), pe moro foeroe Toetsi de na ini — nanga den legre foe lanti, pe moro foeroe Hoetoe de na ini. Ini juli, a R.P.F. ben wini den legre foe lanti èn ben teki Kigali abra nanga a moro bigi pisi foe Rwanda. Foe di den Hoetoe ben frede taki trawan ben sa teki refensi, meki na a bigin foe juli, hondrohondro doesoen foe den ben lowe komoto na a kondre.

Soema de frantiwortoe?

Di den ben aksi wan Toetsi gronman foe tjari kon na krin foe san ede na ogridoe ben bigin wantronso, dan a ben taki: „Na foe den takroe tiriman ede.”

Ija, ini ala den jarihondro, den politiek tiriman panja lei foe den feanti foe den. Ondro a tiri foe Satan Didibri „a tiriman foe a grontapoe disi”, grontapoe politiekman overtoigi den eigi sma foe feti nanga den sma foe tra ras, lo noso nâsi èn foe kiri den (Johanes 12:31; 2 Korentesma 4:4; 1 Johanes 5:19). A situwâsi no ben de tra fasi na Rwanda. The New York Times ben taki: „Ibritron baka, politiekman proeberi foe kweki a firi ini sma foe tan loyaal na a wán ras èn kweki a frede gi sma foe wan tra ras — ini a kefal foe den Hoetoe a ben de foe tan abi lanti ini den makti; ini a kefal foe den Toetsi a ben de foe feni sma di ben kan horibaka gi a revo legre.”

Foe di den sma foe Rwanda de a srefi na foeroe fasi, meki wan sma noiti no ben sa froewakti taki den no ben sa wani si makandra na ai èn kiri makandra. „Den Hoetoe nanga den Toetsi e taki a srefi tongo èn moro foeroe den abi den srefi gwenti”, koranti skrifiman, Raymond Bonner ben taki. „Baka foeroe geslakti foe a trow di den ben trow nanga makandra, a difrenti na ini skin — den Toetsi di langa èn mangri, den Hoetoe di moro sjatoe èn moro bradi — no de foe si moro na so wan fasi taki den Rwandasma nofotron no sabi seiker efoe wan sma na wan Hoetoe noso wan Toetsi.”

Tokoe a bigi bariwroko di den ben bariwroko no so langa pasa kaba, ben abi wan kefalek sortoe bakapisi. Alex de Waal, fesiman foe a groepoe African Rights (den reti foe den Afrikasma), di ben froeteri fa a tori de, ben taki: „So leki fa sma e taki, dan den pranasisma ini kontren pe a R.P.F. ben fadon kon ini, e froewondroe taki den Toetsi sroedati no abi toetoe, tere nanga ai di e brenki na ini doengroe — bika disi na san den radio programa di den ben arki, ben taki.”

Ma no wawan den politiek tiriman e kenki a denki foe sma, ma relisi e doe dati toe. San na den moro bigi relisi foe Rwanda? Den ben de frantiwortoe toe foe a bigi rampoe di pasa ini Rwanda?

A ròl foe relisi

The World Book Encyclopedia (1994) e taki foe Rwanda: „Moro foeroe sma na lomsoesma. . . . Lomsoe kerki nanga tra kresten kerki e tiri moro foeroe foe den lagi skoro, mulo skoro nanga middelbaar skoro.” Foe taki en leti, dan a National Catholic Reporter ben kari Rwanda „wan 70% katolik kondre”.

The Observer foe Ingrisikondre, di e froeteri moro foe a situwâsi na Rwanda na relisi sei, e tjari kon na krin: „Ini den jari 1930, di den kerki ben feti foe kisi a makti tapoe a leri sistema, dan den katoliksma ben lobi den Toetsi heihei man moro, ala di den protestantsma ben bondroe densrefi nanga den Hoetoe di ben kisi kwinsi èn di ben de a moro bigi groepoe. Ini 1959 den Hoetoe ben kisi a makti èn esi-esi den katoliksma nanga den protestantsma ben horibaka gi den. Den protestantsma e tan horibaka steifi gi den Hoetoe di ben de a moro bigi groepoe.”

Foe eksempre, a ben de so taki den protestant kerki fesiman ben kroetoe a kiri di den kiri sma na ipi-ipi? The Observer e piki: „Den ben aksi toe kerkiman [anglicaansma] efoe den ben kroetoe den kiriman di ben foeroe den kerki foe Rwanda nanga den skin foe pikin di den kiriman ben kiri èn kapoe den ede foe den poeroe.

Den kerkiman ben weigri foe piki. Den ben wai pasi gi den aksi, den ben mândi, a sten foe den ben kon moro hei, foe di senwe ben naki den, èn na so a moro prenspari reide foe a bigi problema na Rwanda ben tjari kon na krin — den moro prenspari memre foe na Anglicaan kerki, ben de boskopoeman gi den politiek tiriman, di ben preiki a kiri foe sma èn di ben meki wan lo broedoe lon.”

Ija, den kerki foe krestenhèit na Rwanda no de tra fasi foe den kerki na tra presi. Foe eksempre, Frank P. Crozier, wan Ingrisi legre edeman ben taki foe a hori di den kerki ben horibaka gi politiek tiriman ini a Fosi Grontapoe Orlokoe: „Den kresten kerki na den moro boen sani di wi abi foe meki sma kisi na angri foe doe ogri, èn wi ben gebroiki den na wan frifasi gi wi eigi wini.”

Ija, den relisi fesiman abi a frantiwortoe foe san pasa na Rwanda! A National Catholic Reporter foe 3 juni 1994, ben froeteri: „A feti di den e feti ini na Afrikan kondre, abi na ini toe ’wan troetroe kiri foe wan heri ras, èn a de wan sari foe taki, dati srefi katoliksma de frantiwortoe foe disi’, a paus ben taki.”

A de krin, taki den kerki misi foe leri sma a troe krestendom. So leki fa a Fransi koranti Le Monde e taki, dan wan priester ben kragi: „Den e kiri makandra, ala di den e frigiti taki den na brada.” Wan tra priester foe Rwanda ben erken: „Kresten dede foe di tra kresten kiri den, baka wan heri jarihondro foe preek di ben abi foe doe nanga lobi nanga a gi di sma moesoe gi trawan pardon. Den no doro a marki.” Le Monde ben aksi: „Fa wan sma no kan denki taki den Toetsi nanga den Hoetoe di e feti na Boeroendi nanga Rwanda, ben kisi skoro foe den srefi kresten zendeling èn taki den ben go na den srefi kerki?”

Den troe kresten de tra fasi

Den troe bakaman foe Jesus Krestes e hori densrefi na a komando foe en foe „lobi makandra” (Johanes 13:34). Joe kan tjari kon ini joe prakseri taki Jesus noso wan foe den apostel foe en, ben sa teki wan howroe èn kapoe wan sma kiri? So wan kiri di sma e kiri trawan na wan ogrifasi, e meki sma kon tron „den pikin foe Didibri”. — 1 Johanes 3:10-12.

Jehovah Kotoigi no ben kiri sma na Rwanda. Den no e teki prati na ini no wan enkri feti, revo, noso iniwan tra kesekese di den grontapoe politiek tiriman e meki go na fesi, èn di de na ondro a makti foe Satan Didibri (Johanes 17:14, 16; 18:36; Openbaring 12:9). Na presi foe dati, Jehovah Kotoigi e sori troetroe lobi gi makandra. So boen, di sma ben kiri trawan na ipi-ipi, dan den Hoetoe Kotoigi ben de klariklari foe tjari a libi foe den kon ini kefar, foe di den ben doe moeiti foe jepi den Toetsi brada foe den.

Ma tokoe den sortoe sari tori disi no moesoe froewondroe sma. Ini Jesus en profeititori di abi foe doe nanga „a bosroiti foe a seti foe sani”, a ben froeteri na fesi: „Dan sma . . . sa kiri joe” (Mateus 24:3, 9). Kolokoe taki Jesus e pramisi taki a sa memre getrow sma ini na opobaka foe den dedewan. — Johanes 5:28, 29.

Ini a pisi ten disi, Jehovah Kotoigi na Rwanda èn na ibri tra presi, abi a fasti bosroiti foe go doro foe sori taki den na disipel foe Krestes, foe di den e lobi makandra (Johanes 13:35). A lobi foe den na wan kotoigi, srefi te den de leti na mindri den problema foe a ten disi, so leki fa a tori di poti makandra nanga na artikel disi, èn di nen „Kotoigi na ini loweman kampoe”, e sori. Wi alamala moesoe memre san Jesus ben taki ini en profeititori: „A sma di horidoro te na a kaba, en sa kisi froeloesoe.” — Mateus 24:13.

[Faki na tapoe bladzijde 10]

KOTOIGI NA INI LOWEMAN KAMPOE

Sensi juni foe a jari disi, moro leki 1300 Kotoigi nanga den kompe foe den, ben de na ini loweman kampoe. Na Zaire, 128 ben de ini a foto Goma, ini Boekafoe joe ben abi 170, èn ini a foto Oefira joe ben abi 730. Boiti dati, na Rwanda joe ben abi 162 ini a pikin foto Gisenji èn na Tanzania joe ben abi so wan 140 ini a pikin foto Benaco.

Soso foe doro na den presi wawan pe sma ben de di lowe, no ben de wan makriki sani. Wan gemeente foe 60 Kotoigi ben proeberi foe abra a Roesoemo broki, wan prenspari pasi pe sma ben lowe go na den loweman kampoe, na Tanzania. Di den no ben kisi primisi foe pasa, den ben wakawaka wán wiki langa na tapoe a sjoro foe a liba. Baka dati den ben bosroiti foe proeberi foe abra a liba nanga pariboto. Den ben abi boen bakapisi, èn baka wan toe dei den ben doro a kampoe na Tanzania na wan boenfasi.

Jehovah Kotoigi na ini tra kondre ben orga boen foeroe sani foe jepi den sma. Kotoigi na Fransikondre ben tjari moro leki wanhondro ton krosi kon na makandra nanga neigi ton soesoe, èn den sortoe sani disi, makandra nanga njanjan sani nanga dresi, den ben seni go na kontren pe nowtoe de. Ma nofotron a fosi sani di den brada ini den loweman kampoe ben aksi, ben de wan bijbel noso wan Waktitoren noso Ontwaakt!

A ben naki na ati foe foeroe sma di ben si a lobi di den Kotoigi na Zaire nanga Tanzania ben sori, di ben go loekoe èn ben jepi den brada foe den, di ben moesoe gowe libi a tanpe foe den. „Sma foe joe relisi kon loekoe joe”, sma di lowe e taki, „ma no wan priester foe wi no kon loekoe wi.”

Ala sma ini den kampoe ben kon sabi den Kotoigi, moro foeroe foe a wánfasi nanga na ordefasi foe den, èn a lobi di den sori (Johanes 13:35). A de wan moi sani foe taki, dati na Benaco, Tanzania, na mindri foe so wan 250.000 sma ini a kampoe, den Kotoigi ben abi soso 15 miniti fanowdoe foe feni kompe-Kotoigi di ben lowe.