„Erken den sortoe man dati”

SANI NO ben waka boen na ini a gemeente foe Korente. Wan kefalek takroe kefal foe hoeroedoe ben feni presi, èn pratifasi ben de na mindri den brada. Son wan ben abi serjoesoe persoonlijk problema noso ben abi aksi di ben moesoe kisi wan piki. Wan toe brada ben tjari trawan go na kroetoebangi; trawan srefi no ben bribi na ini na opobaka.

Serjoesoe aksi ben opo kon toe. Den sma di e libi na ini wan osofamiri di prati na relisisei, ben moesoe tan nanga a patna foe den di no de na bribi, noso den ben moesoe prati? San ben de a ròl foe den sisa na ini a gemeente? A ben fiti foe njan meti di den òfer na kroektoe gado? Fa den konmakandra — so srefi na Avondmaal foe Masra — ben moesoe hori? — 1 Korentesma 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

Seiker foe di Achaikus, Fortunatus nanga Stefanas ben broko den ede nanga a boen foe den brada foe den di ben de na ini so wan broeja kontren na jejefasi, meki den ben teki waka go na a apostel Paulus na Efeise. Boiti taki den ben tjari den sortoe takroe njoensoe dati gi Paulus, a kan de so toe taki den ben tjari wan brifi foe a gemeente gi Paulus, di ben abi aksi na ini foe den sortoe afersi disi (1 Korentesma 7:1; 16:17). Soleki fa den boeweisi e sori, dan den dri brada disi no ben de den wan-enkriwan di ben broko den ede nanga a situwâsi. Te joe loekoe en boen, dan Paulus ben kisi njoensoe kaba foe „den wan foe na oso foe Kloewe” taki kesekese ben de na mindri den memre foe a gemeente (1 Korentesma 1:11). Sondro tweifri, a njoensoe foe den dri brada disi ben jepi Paulus foe kon froestan moro krin fa a situwâsi ben de, foe man bosroiti sortoe rai a ben sa gi, èn fa a ben moesoe piki den aksi di ben opo kon. A ben sa sori taki a brifi di wi sabi now leki Wán Korentesma, na a piki foe Paulus, di a santa jeje foe Gado ben tiri. Kande Achaikus, Fortunatus, nanga Stefanas ben kan de den wan di ben tjari a brifi na den Korentesma.

Soema ben de Achaikus, Fortunatus, nanga Stefanas? San wi kan leri te wi e studeri san den Boekoe foe bijbel e taki foe den?

Na osofamiri foe Stefanas

Na osofamiri foe Stefanas ben de den „fosi froktoe” foe Paulus en diniwroko na Akaje, a distrikt foe Rome, na a Zuidsei foe Grikikondre, na ini pikinmoro a jari 50 G.T., èn Paulus srefi ben dopoe den. Soleki fa a sori, dan Paulus ben si den leki wan boen eksempre, wan lepi krakti di ben tranga den Korentesma. A ben prèise den na wan switi fasi bikasi foe den sani di den ben doe gi a gemeente: „Now mi e froemane oenoe, brada: Oenoe sabi taki na osofamiri foe Stefanas na a fosi froktoe foe Akaje èn taki den ben gi densrefi foe dini den santawan. Meki oenoe srefi tan saka oensrefi na den sortoe sma dati ondro èn na ibri sma di e wroko makandra èn di e wroko tranga” (1 Korentesma 1:16; 16:15, 16). Den no ben taki krinkrin soema ben de na „osofamiri” foe Stefanas. A wortoe ben kan wani taki nomo den memre foe en osofamiri, ma a ben kan wani taki den srafoe noso wrokoman toe. Foe di Achaikus na wan Latijn nen di de wan nen foe wan srafoe, èn Fortunatas de a nen foe wan man di fri, meki wan toe sma di e gi komentaar e prakseri taki den toe man dati ben kan de memre foe a srefi osofamiri dati.

Awansi fa a ben de, Paulus ben si na osofamiri foe Stéfanas leki wan eksempre. Den memre foe na osofamiri ben „gi densrefi foe dini den santawan”. Na osofamiri foe Stefanas ben moesoe erken taki wroko ben de foe doe gi a boen foe a gemeente èn na wan fri fasi den ben teki a wroko disi leki wan persoonlijk frantiwortoe. Na angri di den ben abi foe doe a sortoe wroko disi gi den santawan, ben meki a de so, taki seiker den moesoe froedini jepi na moreelsei èn taki den ben moesoe erken den.

„Den kowroe mi jeje èn di foe oenoe”

Ala di Paulus ben broko en ede nanga a situwâsi ini Korente, den fisiti foe den dri boskopoeman ben opo en baka. Paulus e taki: „Mi prisiri taki Stefanas nanga Fortunatas nanga Achaikus de djaso, bika den teki presi gi oenoe foe di oenoe no de djaso. Bika den kowroe mi jeje èn di foe oenoe” (1 Korentesma 16:17, 18). Te joe e loekoe a situwâsi na Korente, dan a de di Paulus no ben de drape nanga den Korentesma, ben de kande wan fonten foe broko ede gi en, ma now den boskopoeman di den ben seni, ben teki presi gi a heri gemeente di no ben de drape. A njoensoe foe den ben gi Paulus ala bodoi foe a situwâsi èn den ben poeroe wan toe foe den sani di a ben frede. Kande den sani no ben takroe leki fa a ben prakseri.

Soleki fa Paulus ben taki, a sani di den dri man ben kon doe, no ben kowroe soso en jeje, ma den ben opo so srefi a jeje foe a gemeente foe Korente. A no de foe taki, dati a ben de wan froelekti gi a gemeente foe Korente taki den boskopoeman ben tjari finifini kon na krin gi Paulus ibri afersi foe na situwâsi èn taki den ben sa drai kon baka nanga a rai foe en.

So boen, Stefanas nanga den toe kompe foe en ben kisi waran rikomanderi gi a tranga wroko foe den gi a boen foe den Korentesma. A warderi foe Paulus gi den man disi ben de na so wan fasi taki te den ben sa drai go baka, den ben sa teki fesi ini a gemeente foe Korente di ben abi pratifasi. Na apostel ben gi den brada a deki-ati: „Tan saka oensrefi na ondro den sortoe sma dati èn na ibri sma di e wroko makandra èn e wroko tranga. . . Erken den sortoe man dati” (1 Korentesma 16:16, 18). A krakti fasi fa a ben rikomanderi den man disi, e sori krinkrin taki den man disi ben de loyaal dorodoro ala di druk ben de ini a gemeente. Wi moesoe tan warderi den sortoe man dati. — Filipisma 2:29.

Wroko makandra na wan getrow fasi e tjari heri boen bakapisi

A de troetroe so, taki te wan sma e wroko krosibei makandra nanga Jehovah en organisasi èn nanga den sma di e teki presi gi en, dan dati abi heri boen bakapisi. Di Paulus ben skrifi a brifi di wi sabi now leki Toe Korentesma, sjatoe na baka a fosi brifi gi den Korentesma, dan sani ben go moro boen kaba na ini a gemeente. Den wroko di den brada soleki Achaikus, Fortunatas, nanga Stefanas ben doe doronomo nanga pasensi, èn so srefi a fisiti foe Titus, ben tjari boen bakapisi. — 2 Korentesma 7:8-15; teki gersi Tori foe den Apostel 16:4, 5.

Den memre foe den disiten gemeente foe a pipel foe Jehovah kan abi winimarki te den e prakseri dipi foe a sjatoe sani disi di taki foe den getrow man disi na ini den Boekoe foe bijbel. Foe eksempre, kon meki wi taki dati wan loesoe no man kon wantewante na wan situwâsi di, foe wan noso tra reide, tan langa kaba na ini wan gemeente èn taki a e gi den brada broko ede. San moesoe doe dan? Waka na baka na eksempre foe Stefanas, Fortunatas, nanga Achaikus, di no ben hari gowe foe a frantiwortoe di den ben abi foe froeteri Paulus a situwâsi èn nanga froetrow joe kan libi na afersi na ini na anoe foe Jehovah. A faja di den ben abi gi regtfardikifasi no ben meki den doe sani foe densrefi noso foe kon „atibron tapoe Jehovah”. — Odo 19:3.

A gemeente na foe Jesus Krestes, èn tapoe a joisti ten foe en, neleki na Korente, a sa doe wan sani foe loesoe ibri problema di kan de wan kefar gi a boen nanga a vrede foe den na jejefasi (Efeisesma 1:22; Openbaring 1:12, 13, 20; 2:1-4). Ma bifo dati, efoe wi e waka na baka a moi eksempre foe Stefanas, Fortunatas, nanga Achaikus, èn wi e tan wroko tranga foe dini wi brada, dan wisrefi sa horibaka na wan loyaal fasi toe gi a seti foe a gemeente, foe bow wi brada, èn foe ’gi deki-ati foe sori lobi èn doe boen wroko’. — Hebrewsma 10:24, 25.