Kon sabi soema na a joisti sortoe boskopoeman
„Mi na . . . a Sma di e meki a wortoe foe en foetoeboi kon troe, èn a Sma di e doe a rai foe den eigi boskopoeman foe en dorodoro.” — JESAJA 44:25, 26.
1. Fa Jehovah e meki sma kon sabi soema na den joisti sortoe boskopoeman, èn fa a e poeroe kon na doro soema na den falsiwan?
JEHOVAH GADO na a Gran Sma di e sori soema na den troe boskopoeman foe en. A e meki sma kon sabi soema na den, foe di a e meki den boskopoe kon troe, di a e gi nanga den. Jehovah na a Gran Sma toe di e poeroe kon na doro soema na den falsi boskopoeman. Fa a e poeroe kon na doro soema na den? A e broeja den marki foe den nanga den sani di den taki na fesi. Na a fasi disi a e sori taki den na sma di poti densrefi leki sma di e taki sani na fesi, èn di a boskopoe foe den troetroe e kon foe den eigi falsi denki — ija, a don denki foe den na skinfasi!
2. Sortoe strei di ben de na mindri boskopoeman, ben pasa na ini a ten foe den Israèlsma?
2 Jesaja nanga Esekièl ben taki dati den ben de boskopoeman foe Jehovah Gado. A ben de troetroe so? Meki wi go loekoe. Jesaja ben taki profeititori na Jerusalem wan sani foe 778 b.G.T. te leki wan pisi ten baka 732 b.G.T. Esekièl ben go leki katiboman na Babilon na ini 617 b.G.T. A ben taki profeititori gi den djoe brada foe en drape. Ala toe profeiti ben meki bekènti sondro frede taki Jerusalem ben o kisi pori. Tra profeiti ben taki dati Gado no ben sa meki disi pasa. Soema ben sori foe de den joisti sortoe boskopoeman?
Jehovah e poeroe kon na doro soema na den falsi profeiti
3, 4. (a) Sortoe toe boskopoe di ben de kontrari makandra ben tjari go gi den Israèlsma na Babilon, èn fa Jehovah ben poeroe kon na doro soema na wan falsi boskopoeman? (b) San Jehovah ben taki ben sa pasa nanga falsi profeiti?
3 Ala di Esekièl ben de na Babilon, a ben kisi wan fisjoen foe san ben e pasa na ini a tempel foe Jerusalem. Na a dromofo foe na owstoesei portoe foe a tempel, 25 man ben de. Toe granman ben de na den mindri, Ja-asanja nanga Pelatja. Fa Jehovah ben prakseri foe den? Esekièl 11:2, 3 e piki: „Manpikin foe libisma, disi na den man di e meki plan foe doe ogri sani èn di e gi takroe rai teige a foto disi; di e taki: ’A bow foe oso no de krosibei?’” Den asranti boskopoeman foe vrede disi ben e taki: ’Kefar no de gi Jerusalem. We dan, djonsro wi e go bow moro oso na ini en!’ Dati meki, Gado ben taigi Esekièl foe taki profeititori teige den leimofo profeiti disi. Na ini vers 13 foe kapitel 11, Esekièl e froeteri wi san ben pasa nanga wan foe den: „A ben pasa so, taki so esi leki mi ben taki profeititori, taki Pelatja srefi, a manpikin foe Benaja, dede.” Kande disi ben pasa foe di Pelatja ben de a moro prenspari granman di ben abi krakti tapoe trawan èn a moro prenspari kroektoegado-diniman. A dede di a dede wantronso ben sori taki a ben de wan falsi profeiti!
4 A dedestrafoe di Jehovah ben tjari kon tapoe Pelatja no ben tapoe den tra falsi profeiti foe lei na ini a nen foe Gado. Den sma disi di ben kori trawan ben go doro nanga a fasi foe den di sori taki den ben de sondro froestan, foe taki sani na fesi teige a wani foe Gado. Dati meki Jehovah Gado ben taigi Esekièl: „Heloe foe den profeiti sondro froestan, di e waka baka na eigi jeje foe den, ala di den no si noti!” Neleki Pelatja, den „no [ben sa de] moro” foe si na wan tjalensi fasi „wan fisjoen foe vrede” gi Jerusalem, „ala di vrede no de”. — Esekièl 13:3, 15, 16.
5, 6. Sortoe boeweisi ben gi taki Jesaja ben de wan troe profeiti awansi someni falsi boskopoeman ben de?
5 Foe a sei foe Jesaja, ala den boskopoe di a kisi foe Gado èn di abi foe doe nanga Jerusalem ben kon troe. Na ini a zomer foe 607 b.G.T., den Babilonsma ben pori a foto èn ben tjari wan djoe fikapisi go leki katiboman baka na Babilon (2 Kroniki 36:15-21; Esekièl 22:28; Danièl 9:2). Den rampoe disi ben tapoe den falsi profeiti foe kon na tapoe a pipel foe Gado nanga foeroe takitaki di ben de foe soso? Nôno, den leimofo boskopoeman dati ben go doro!
6 Boiti dati, den Israèlsma di ben de na ini katibo ben kisi foe doe toe nanga loekoeman nanga astroloog di e skepi, foe Babilon. Ma, Jehovah ben sori taki ala den falsi boskopoeman disi ben de donman di ben lasi a strei èn di ben taki profeititori kontrari sani di ben o pasa. Te foe kaba a ben sori taki Esekièl ben de en troe boskopoeman, soleki fa Jesaja ben de dati. Jehovah ben meki ala den wortoe kon troe di a ben taki nanga jepi foe den, soleki fa a ben pramisi: „Mi e broeja den marki foe den takiman di e taki soso sani, èn mi na a Sma di e meki srefi den sma di e doe loekoeman-wroko handri na wan law fasi; a Sma di e meki koniman drai go na baka, èn a Sma di e kenki srefi a sabi foe den kon tron wan don sani; a Sma di e meki a wortoe foe en foetoeboi kon troe, èn a Sma di e doe a rai foe den eigi boskopoeman foe en dorodoro.” — Jesaja 44:25, 26.
Froewondroe boskopoe di abi foe doe nanga Babilon nanga Jerusalem
7, 8. Sortoe boskopoe di ben gi na ondro a krakti foe a santa jeje, Jesaja ben abi gi Babilon, èn san den wortoe foe en ben wani taki?
7 Seibitenti jari langa, Juda nanga Jerusalem ben o de leigi, sondro wan sma di ben o libi na ini. Ma Jehovah ben froeklari nanga jepi foe Jesaja nanga Esekièl taki a foto ben sa bow baka èn taki sma ben sa libi na ini a kondre soifri na a ten di a ben taki foe dati na fesi! Disi ben de wan froewondroe fasi foe taki sani na fesi. Foe san ede? Bika sma ben sabi foe Babilon taki noiti a ben fri den strafoeman foe en (Jesaja 14:4, 15-17). So boen, soema ben sa kan fri den katibosma disi? Soema ben kan meki a makti Babilon fadon, nanga den kefalek bigi skotoe foe en èn wan sistema pe den ben gebroiki wan liba foe kibri den gi feanti? Jehovah, na Almaktiwan, ben kan doe dati! Èn a ben taki dati a ben o doe dati: „Mi na . . . a Sma di e taigi a dipi foe a watra [dati wani taki, a watra di e kibri a foto gi feanti]: ’Tron dampoe; èn ala den liba foe joe mi sa meki kon drei’; a Sma di e taki foe Cirus: ’En na mi skapoeman, èn ala sani di e plisi mi, a sa doe dorodoro’; srefi te mi e taki foe Jerusalem: ’Den sa bow en baka’, èn foe a tempel: ’Den sa poti joe fondamenti.’” — Jesaja 44:25, 27, 28.
8 Prakseri foe dati! Na Eufraat liba, di ben de troetroe leki wan kefalek bigi skotoe di ben tapoe pasi gi libisma, ben de gi Jehovah leki wan dropoe watra na tapoe wan toemoesi faja isri plaat. Wantronso a skotoe di ben tapoe pasi, ben o tron dampoe! Babilon ben o fadon. Ala di a ben de so wan 150 jari ete bifo Cirus, a Persiasma, ben gebore, tokoe Jehovah ben meki Jesaja taki na fesi dati a kownoe disi ben o teki Babilon abra èn ben o fri den djoe katibosma, foe di a ben o gi den primisi foe go baka na Jerusalem èn bow en nanga en tempel baka.
9. Soema Jehovah ben kari leki a sma di a ben gebroiki foe strafoe Babilon?
9 Wi e feni a profeititori disi na ini Jesaja 45:1-3: „Disi na san Jehovah taigi en salfoewan, Cirus, a wan di mi teki en reti-anoe, foe saka den nâsi na en ondro, . . . foe opo gi en den doro di abi toe pisi, so taki srefi den portoe no ben sa tapoe: ’Misrefi sa go na joe fesi, èn den hei presi foe a gron mi sa meki kon plata. Den kopro doro mi sa broko na pisipisi, èn den isri grendi mi sa broko poeroe. Èn mi sa gi joe den goedoe di de na ini a doengroe nanga den goedoe di kibri na ini den kibripresi, so taki joe kan sabi taki mi na Jehovah, a Sma di e kari joe na joe nen.’”
10. Na sortoe fasi Cirus ben „kisi salfoe”, èn fa Jehovah ben kan taki nanga en moro leki wan hondro jari bifo a ben gebore?
10 Loekoe taki Jehovah e taki nanga Cirus neleki a de na libi kaba. Disi e kroederi nanga san Paulus e taki, dati Jehovah „e kari den sani di no de, neleki den ben de” (Romesma 4:17). Gado meki so srefi sma kon sabi Cirus leki „en salfoewan”. Foe san ede a ben doe dati? Te joe loekoe en boen, dan Jehovah en hei-priester noiti no ben kanti santa oli na tapoe na ede foe Cirus foe salfoe en. A troe, ma disi na wan salfoe na profeiti fasi. Disi e sori tapoe a poti di wan sma poti gi wan spesroetoe wroko. Dati meki Gado ben kan taki foe a poti di a ben poti Cirus na wroko na fesi, leki a salfoe di a salfoe en. — Teki gersi 1 Kownoe 19:15-17; 2 Kownoe 8:13.
Gado e meki den wortoe foe den boskopoeman foe en kon troe
11. Foe san ede den sma di ben libi na Babilon no ben frede?
11 Na a ten di Cirus ben hari go feti nanga Babilon, den sma di ben libi drape ben abi a denki taki noti no ben kan pasa nanga den èn den no ben frede. Wan dipi èn bradi kanaal di e gi kibri èn di ben toeka nanga na Eufraat liba, ben lontoe a foto foe den. Pe a liba ben lon pasa na ini a foto, joe ben abi wan ston skotoe di ben pasa langalanga na a owstoesei sjoro foe a liba. Foe prati a liba foe a foto, dan Nebukadnesar ben bow san en ben kari „wan bigi skotoe, di joe no ben kan poeroe na pasi, neleki wan bergi . . . [A] ben opo na ede foe en hei leki wan bergi.”a A skotoe disi ben abi portoe nanga kefalek bigi kopro doro. Efoe wan sma ben wani go na ini, dan a ben moesoe kren na tapoe a skoinsi sei foe a lanki foe a liba. A no de wan froewondroe sani taki den strafoeman foe Babilon ben lasi howpoe taki oiti den ben sa kon fri!
12, 13. Fa den wortoe foe Jehovah di a ben gi nanga jepi foe en boskopoeman Jesaja ben kon troe di Babilon ben kon ini na anoe foe Cirus?
12 Ma dati no ben de so nanga den djoe katibosma di ben abi bribi na ini Jehovah! Den ben abi wan toemoesi moi howpoe. Jehovah ben pramisi nanga jepi foe den profeiti foe en foe meki den kon fri. Fa Gado ben meki a pramisi foe en kon troe? Cirus ben gi den legre foe en a komando foe meki na Eufraat liba lon go na wan tra presi foeroe kilometer noordsei foe Babilon. Na so fasi a prenspari sani foe kibri a foto ben kenki kon tron wan drei liba, te joe teki en gersi nanga fa a ben de fosi. Na a toemoesi prenspari neti dati, droengoe prisiriman na ini Babilon sondro foe denki ben libi den doro opo di ben abi toe pisi èn di ben de na a watrasei foe na Eufraat. Jehovah no ben broko den kopro doro troetroe na pisipisi; èn a no ben broko poeroe den isri grendi di ben sroto den, ma a froewondroe fasi fa a ben meki sani waka foe hori den opo èn meki den de sondro grendi, ben abi a srefi bakapisi. Den skotoe foe Babilon no ben wroko moro. Den legre foe Cirus no ben abi foe kren abra den foe go na inisei. Jehovah ben waka go na fesi èn ben poeroe „den hei presi foe a gron” gi Cirus, ija, ala den sani di de na pasi. A ben kon na krin taki Jesaja ben de a troe boskopoeman foe Gado.
13 Di Cirus ben abi a heri foto na ini en makti, dan ala den goedoe foe a foto ben kon ini en anoe, so srefi den goedoe di kibri na ini doengroe kamra di ben de ini kibripresi. Foe san ede Jehovah Gado ben doe disi gi Cirus? So taki a ben sa sabi taki Jehovah, ’a Sma di e kari en na en nen’, na a Gado foe troe profeititori èn a Soeverein Masra foe na universum. A ben sa sabi taki Gado ben seti sani na so wan fasi, taki a kisi makti foe fri En pipel Israèl.
14, 15. Fa wi doe sabi taki Cirus ben moesoe gi Jehovah a grani taki a ben wini Babilon?
14 Arki den wortoe di Jehovah taigi Cirus: „Foe mi foetoeboi Jakob ede èn foe Israèl ede, a wan di mi froekisi, mi ben bigin kari joe srefi na joe nen; moro fara, mi ben gi joe wan bigi nen, ala di joe no ben sabi mi. Mi na Jehovah, èn no wan trawan no de. Boiti mi, no wan Gado no de. Mi sa tai joe mindri steifi, ala di joe no sabi mi, so taki foe pe son e opo èn foe pe a e dongo, sma kan sabi taki no wan no de boiti mi. Mi na Jehovah, èn no wan trawan no de. A Sma di e meki leti kon èn di e meki doengroe kon, di e meki vrede [dati wani taki, gi en pipel di de ini katibo] èn e meki rampoe kon [gi Babilon], mi, Jehovah, e doe ala den sani disi.” — Jesaja 45:4-7.
15 Cirus ben moesoe gi Jehovah a grani taki a wini Babilon, bika na En ben gi en a krakti foe doe san A ben prisiri foe doe nanga a godelowsoe foto dati èn fri En pipel di ben de ini katibo. Foe di Gado e doe dati, a ben kari den hemel foe en foe meki regtfardiki krakti saka kon. A ben kari a grontapoe foe en foe opo èn meki regtfardiki sani pasa èn foe meki froeloesoe kon gi en pipel di ben de ini katibo. Èn na agersi hemel nanga grontapoe foe en ben gi jesi na a komando disi (Jesaja 45:8). Moro leki wan hondro jari baka di Jesaja dede, a ben kon na krin taki Jesaja ben de a troe boskopoeman foe Jehovah!
A boen njoensoe di a boskopoeman abi gi Sion!
16. Di Babilon ben lasi, dan sortoe boen njoensoe ben kan meki bekènti na a foto Jerusalem di ben de sondro sma na ini?
16 Ma moro de ete. Jesaja 52:7 e taki foe boen njoensoe gi Jerusalem: „O switi na tapoe den bergi den foetoe foe a sma de di e tjari boen njoensoe kon, a sma di e meki vrede bekènti, a sma di e tjari boen njoensoe kon foe wan moro boen sani, a sma di e meki froeloesoe bekènti, a sma di e taigi Sion: ’Joe Gado tron kownoe!’” Prakseri fa a ben sa naki na ati foe sma foe si wan boskopoeman komoto na den bergi e go na Jerusalem! A moesoe abi njoensoe. San na a njoensoe dati? Na span njoensoe gi Sion. Njoensoe foe vrede, ija, njoensoe foe a boen wani foe Gado. Jerusalem nanga en tempel o bow baka! Èn a boskopoeman e meki bekènti nanga bigi prisiri èn nanga faja: „Joe Gado tron kownoe!”
17, 18. Fa a wini di Cirus ben wini Babilon, ben abi krakti tapoe Jehovah en eigi nen?
17 Di Jehovah ben gi den Babilonsma pasi foe trowe en agersi kownoestoeroe poeroe, di na tapoe dati den kownoe na ini a lin foe David ben sidon, dan a ben sa kan gersi taki A no ben de Kownoe moro. Na presi foe dati, a ben gersi taki Mardoek, a moro prenspari gado foe Babilon, ben de kownoe. Ma di a Gado foe Sion ben meki Babilon fadon, dan a ben sori en universeel soevereiniteit — taki en ben de a moro bigi Kownoe. Èn foe poti krakti na tapoe a troetori disi, dan Jerusalem, „a foto foe a bigi Kownoe”, ben moesoe seti baka, makandra nanga en tempel (Mateus 5:35). Na ini na ai foe den sma di ben lobi Sion nanga en Gado, den foetoe foe a boskopoeman di ben tjari so wan boen njoensoe kon, ben loekoe so switi, ala di den foetoe foe en ben doti, no ben krin, èn ben kisi soro foe a waka di a ben waka!
18 Na wan profeiti fasi, a fadon foe Babilon ben wani taki dati a kownoekondre foe Gado ben seti èn taki a sma di ben tjari boen njoensoe kon, ben de wan preikiman foe a troetori dati. Moro fara, a boskopoeman disi foe owroeten, di Jesaja ben taki foe en na fesi, ben prenki wan boskopoeman foe moro prenspari boen njoensoe — moro prenspari foe di a boskopoe di a ben abi, ben de toemoesi moi èn foe en Kownoekondre thema ede, di abi froewondroe bakapisi gi ala sma di abi bribi.
19. Sortoe boskopoe di abi foe doe nanga a kondre Israèl Jehovah ben meki Esekièl tjari kon?
19 So srefi Esekièl ben kisi toemoesi moi profeititori di e taki foe a meki di sani o meki kon boen baka. A ben taki a profeititori disi: „Disi na san a Soeverein Masra Jehovah taki: ’. . . Mi sa meki toe taki sma e go libi na ini den foto, èn den broko presi moesoe bow baka. Èn sma seiker sa taki: „A kondre dati di ben broko, kon tron leki a djari foe Eden.”’” — Esekièl 36:33, 35.
20. Sortoe prisiri froemane Jesaja ben gi Jerusalem nanga jepi foe wan profeititori?
20 Di a pipel foe Gado ben de ini katibo na Babilon, dan den ben sari foe Sion ede (Psalm 137:1). Now den ben kan prisiri. Jesaja ben froemane: „Kon de nanga prisiri, bari wan prisiri babari ini wánfasi, oen broko presi foe Jerusalem, bika Jehovah trowstoe en pipel; a bai Jerusalem baka. Jehovah meki ala den nâsi kon si a santa anoe foe en; èn ala kabapisi foe grontapoe moesoe si a froeloesoe foe wi Gado.” — Jesaja 52:9, 10.
21. Fa den wortoe foe Jesaja 52:9, 10 ben kon troe baka di Babilon ben lasi?
21 Ija, Jehovah en pipel di a froekisi ben abi foeroe reide foe de nanga prisiri. Now den ben o go libi baka na den presi di wan ten no wan sma ben libi na ini èn meki den kon tron leki a djari foe Eden. Jehovah ben „meki [den] kon si a santa anoe foe en”. A ben lolo en mow, foe taki en so, so taki a ben kan doe wan sani foe tjari den go baka na a lobi mamakondre foe den. Disi no ben de wan pikin sani di ben pasa na ini a historia èn di no ben hari a prakseri foe sma. Nôno, ala sma di ben libi na ini a ten dati ben si fa Gado en ’anoe di a meki sma si’ ben abi krakti tapoe libisma afersi, so taki a ben kan tjari a froewondroe froeloesoe kon gi wan nâsi. Den sma ben kisi krin boeweisi, taki Jesaja nanga Esekièl ben de troe boskopoeman foe Jehovah. No wan sma ben kan tweifri taki a Gado foe Sion ben de a wan-enkri libi èn troe Gado na heri grontapoe. Wi e leisi na ini Jesaja 35:2: „Drape den wan sa de di sa si a glori foe Jehovah, a moifasi foe wi Gado.” Den wan di ben teki a boeweisi disi taki Jehovah na Gado, ben go anbegi en.
22. (a) Gi sortoe sani wi kan de nanga tangi na ini a ten disi? (b) Foe san ede wi moesoe de nanga tangi spesroetoe taki Jehovah e poeroe kon na doro soema na den falsi boskopoeman?
22 Ija, wi moesoe de nanga tangi taki Jehovah e meki sma kon sabi soema na den troe boskopoeman foe en! En na troetroe „a Sma di e meki a wortoe foe en foetoeboi kon troe, èn a Sma di e doe a rai foe den eigi boskopoeman foe en dorodoro” (Jesaja 44:26). Den profeititori di e taki foe a meki di sani o meki kon boen baka, di a ben gi Jesaja nanga Esekièl, e gi glori na en bigi lobi, en no-froedini boen-atifasi, nanga a sari-ati di a sori den foetoeboi foe en. Ija, foe a sani disi ede meki Jehovah warti foe kisi ala prèise foe wi! Èn wi na ini a ten disi moesoe de nanga tangi spesroetoe taki a e poeroe kon na doro soema na den falsi boskopoeman. Disi de so foe di foeroe foe den de now na grontapoe. Den kefalek moi boskopoe foe den e meki taki sma no e broko den ede nanga den prakseri foe Jehovah di a meki bekènti. A tra artikel sa jepi wi foe kon sabi soema na den falsi boskopoeman dati.
[Foetoewortoe]
a The Monuments and the Old Testament, foe Ira Maurice Price, 1925.
Joe kan tjari disi kon na krin?
◻ Fa Jehovah e meki sma kon sabi soema na den troe boskopoeman foe en?
◻ Nanga jepi foe Jesaja, soema Jehovah ben kari leki a sma di a ben gebroiki foe wini Babilon?
◻ Fa den profeititori foe Jesaja di ben taki foe a lasi di Babilon ben o lasi, ben kon troe?
◻ Sortoe boen bakapisi a ben abi gi a nen foe Jehovah taki Babilon ben lasi?
[Prenki na tapoe bladzijde 9]
Gi den nâsi na ini a ten foe Esekièl a ben gersi taki den no ben kan wini Babilon