Foeroe sma e taki dati den e bribi

„JESUS boen kefalek! A boen srefisrefi!” wan relisi oema na ini Brasjonkondre ben taki fajafaja. Ija, wi moesoe erken taki a nen foe Jesus abi krakti. Na ini a heri historia, sma ben e de klariklari foe pina èn foe dede gi en.

Den apostel Petrus nanga Johanes ben preiki ’tapoe gron foe a nen foe Jesus’ na ini Jerusalem. Foe di den ben doe dati meki sma ben kisi den èn ben wipi den. Ma tokoe den „ben gowe libi a Sanhedrin, èn den ben prisiri taki den ben feni en warti foe kisi sjen foe en nen ede”. — Tori foe den Apostel 5:28, 41.

Antipas ben de wan tra fosi jarihondro kresten di ben lespeki a nen foe Jesus. Na ini a lasti boekoe foe bijbel, Openbaring, Jesus ben kari en „mi kotoigi, a getrow-wan, di den ben kiri na oen sei, na pe Satan e libi” (Openbaring 2:13). Makandra nanga tra kresten na ini Pergamum, Antipas ben weigri foe gowe libi a bribi foe en na ini Krestes. Antipas ben hori fasti na a nen foe Jesus, srefi efoe dati ben sa wani taki dati a ben o lasi en eigi libi!

Pikinmoro feifitenti jari na baka, na ini 155 G.T., wan man di ben kari ensrefi wan kresten èn di ben nen Polycarpus, ben miti so wan sortoe tesi di den ben komanderi en foe skempi Krestes. En piki ben de: „Aititenti na siksi jari mi dini En, èn A no doe mi no wan ogri. Fa mi ben sa kan kosi mi Kownoe di froeloesoe mi?” Foe di a ben weigri foe trowe Krestes, meki den ben bron Polycarpus na wan postoe.

Den apostel, Antipas, nanga trawan ben de klariklari foe kaba a kotoigi di den ben kotoigi foe Krestes te na a dede foe den! Fa a de nanga den sma na ini a ten disi?

A nen foe Jesus na ini a ten disi

A nen foe Jesus e tan wiki tranga firi ete. Na ini Latino-Amerika, den kerki di e taki dati den e bribi na ini Jesus ben kon moro foeroe na ini den lasti tintenti jari. Srefi den moro pikin dorpoe abi wan Pinkster kerki. Na a srefi ten, a politik krakti foe den sortoe kerki disi e gro. Foe eksempre, na ini a Kongres nanga Senaat foe Brasjonkondre, 31 memre foe den kerki disi de na tapoe den posisi disi.

Jesus na so srefi a moro prenspari sani na ini wan njoen relisi groepoe na ini Amerkankondre. Den bakaman e kari densrefi Promise Keepers (Sma di e hori densrefi na den wortoe). A tijdschrift Time ben froeteri na ini 1997 taki den sma di ben fisiti den konmakandra foe a kerki disi ben gro foe 4200 sma na ini 1991 te go miti 1,1 miljoen sma na ini 1996. Wan foe den singi foe den e taki: „Jesus abi wini, mi Froeloesoeman foe têgo.”

Ma a no ala firi di sma ben abi foe a nen foe Jesus ede, ben boen. A fraga foe orlokoe nofotron ben opo na ini a nen foe Jesus. Sma kiri ipi-ipi djoe, kiri den heiden, sma di ben abi tra denki kisi pina na skinfasi, den meki den kon malengri, èn bron den na wan postoe — èn ala den sani disi ben doe na ini a nen foe Jesus. Èn no so langa pasa, a tron di a preikiwroko kon tron wan bisnis ben de wan sani di kisi wan takroe nen na ala sei. Ala den sani disi na wan pori èn toemoesi fowtoe fasi foe gebroiki a nen foe Jesus èn san a wani taki troetroe!

Boiti dati, wan toe prenspari aksi e opo kon foe dati ede: San a wani taki foe poti bribi na ini a nen foe Jesus? Èn fa Jehovah Kotoigi e prakseri foe a tori disi? A tra artikel di e kon sa piki den aksi disi.