A nen di e gi troetroe bribi

„JOE no e bribi na ini Jesus èn na ini a broedoe foe en di e froeloesoe sma”, wan oema ben taigi wan foe den Kotoigi foe Jehovah. Wan man ben froeklari: „Oenoe e kari oensrefi Jehovah Kotoigi, ma mi na wan kotoigi foe Jesus.”

A prakseri di sma abi taki Jehovah Kotoigi no e bribi na ini Jesus noso taki den no e meki sma kon sabi en nofo, de na ala presi. Ma fa sani de troetroe?

A troe taki Jehovah Kotoigi abi wan tranga firi gi a nen foe Gado, Jehovah.a Itamar, wan Kotoigi na Brasjonkondre e memre: „A prenspari momenti di mi ben kenki mi libi ben de di mi ben leri a nen foe Gado. Di mi ben leisi en a fosi tron, dan a ben de leki mi ben wiki foe wan dipi sribi. A nen Jehovah ben seki mi èn ben naki mi ati; a ben fasi a moro dipi pisi foe mi sili.” Ma tokoe a e taki toe: „Mi ati abi lobi pasa marki gi Jesus toe.”

Ija, Jehovah Kotoigi e froestan taki efoe den wani kisi têgo libi, dan den moesoe bribi „na ini a nen foe a Manpikin foe Gado”, Jesus (1 Johanes 5:13). Ma san den wortoe ’na ini a nen foe Jesus’ wani taki?

San a nen foe Jesus e prenki

„Na ini a nen foe Jesus” èn den srefi sortoe wortoe disi de foe feni na ini den heri kresten Griki Boekoe foe bijbel, noso „Njoen Testamenti”. Foe taki en leti, a wortoe „nen” di gebroiki foe sori go na a ròl foe Jesus, de moro leki 80 tron na ini bijbel, èn so wan 30 tron na ini Tori foe den Apostel wawan. Den fosi jarihondro kresten ben dopoe sma na ini a nen foe Jesus, ben dresi sma na ini en nen, ben leri sma na ini en nen, ben kari en nen, ben pina gi en nen, èn ben gi en nen glori. — Tori foe den Apostel 2:38; 3:16; 5:28; 9:14, 16; 19:17.

Soleki fa wan bijbel wortoeboekoe e sori, dan a Griki wortoe gi „nen” e gebroiki foeroetron na ini bijbel „gi ala sani di wan nen wani taki, gi tirimakti, eigifasi, posisi, glori, krakti, toemoesi boen fasi, èn go so moro fara, gi ala sani di a nen wani taki”. Foe dati ede a nen foe Jesus e prenki a glori nanga kefalek bigi tirimakti di Jehovah Gado ben gi en. Jesus ensrefi ben taki: „Mi kisi ala makti na ini hemel èn na grontapoe” (Mateus 28:18). Baka di Petrus nanga Johanes ben dresi wan malengri man, dan den djoe relisi fesiman ben aksi: „Nanga sortoe krakti noso na ini a nen foe soema oenoe ben doe a sani disi?” Dan nanga deki-ati Petrus ben taki foe a bribi foe en na ini a tirimakti nanga a krakti di a nen foe Jesus e prenki, di a ben taki dati a ben de „na ini a nen foe Jesus Krestes, a Nasarener, . . . nanga jepi foe en ede a man disi e tanapoe djaso gosontoe na oen fesi”. — Tori foe den Apostel 3:1-10; 4:5-10.

Bribi na ini Jesus noso na ini Caesar?

Ma a no ben sa de makriki foe froeklari taki den abi bribi na ini a nen foe Jesus. Soleki fa Jesus ben taki na fesi, dan den disipel foe en ben sa de ’sma di no wan nâsi no sa wani si na ai foe en nen ede’ (Mateus 24:9). Foe san ede? Bika a nen foe Jesus e prenki en posisi leki a Tiriman di Gado poti na wroko, a Kownoe foe den kownoe, di ala nâsi moesoe boigi saka densrefi na en ondro, èn dati na wan sani di den no de klariklari foe doe noso di den no wani foe doe. — Psalm 2:1-7.

Den relisi fesiman na ini den dei foe Jesus no ben wani toe foe boigi saka densrefi na ondro Jesus. Den ben taki: „Wi no abi no wan kownoe boiti caesar”, èn nanga dati den no ben erken a Manpikin foe Gado (Johanes 19:13-15). Na presi foe dati, den ben bribi na ini a nen — a makti nanga a tirimakti — foe Caesar nanga a kèiser tiri foe en. Den ben bosroiti so srefi taki Jesus ben moesoe dede so taki den ben kan hori a posisi foe den. — Johanes 11:47-53.

Na ini den jarihondro na baka a dede foe Jesus, foeroe foe den sma di ben taki dati den na kresten, ben teki wan srefi sortoe denki leki di foe den djoe fesiman. Den sokari kresten disi ben bribi na ini a makti nanga a tirimakti foe lanti èn den ben moksi densrefi na ini den feti di ben e feti. Foe eksempre, na ini a di foe 11 jarihondro, baka di a kerki ben orga sma di no ben abi wroko, foe go na ini a militia Christi, noso deki-ati kresten fetiman, „dan a frantiwortoe foe feti regtfardiki orlokoe ben poeroe foe a skowroe foe den grontapoe makti foe krestenhèit èn poti soleki fa den ben denki, tapoe a skowroe foe a kerki nanga jepi foe na organisâsi foe den deki-ati kresten fetiman” (The Oxford History of Christianity). A verslag e taki toe taki wan toe froeklari foe den paus ben meki moro foeroe foe den kresten fetiman ben e bribi taki foe di den e feti a kresten feti „dan den ben meki wan kroederi nanga Gado èn den ben kan de seiker taki den ben sa feni wan presi na ini paradijs”.

Son sma kan taki dati a kan foe de loyaal na Jesus èn na a srefi ten abi foe doe nanga politik afersi, èn so srefi nanga den orlokoe foe den nâsi. Den kan firi taki a de a plekti foe wan kresten foe feti teige ogri awansi pe a de èn taki disi wani taki toe dati den mag feti orlokoe efoe dati de fanowdoe. Ma den fosi kresten ben abi a prakseri disi toe?

„Den fosi kresten no ben wroko na ini feti legre”, na so wan artikel e taki na ini The Christian Century tijdschrift. A e froeklari taki teleki den jari na mindri 170-180 G.T., no wan boeweisi de taki kresten ben wroko na ini sroedati legre. Na artikel e taki moro fara: „Ma safrisafri den kresten ben gowe libi a fasi fa den ben prakseri foe sroedatiwroko.”

San ben de den bakapisi? „Kande noti ben pori a nen foe krestendom moro leki a gwenti di a abi foe teki wan sei na ini orlokoe, wan sani di no e difrenti srefisrefi foe den sma di no de kresten”, na so The Christian Century artikel e taki. „Taki na a wan sei den kresten e bribi a Froeloesoeman di abi switifasi, ala di na a tra sei den e horibaka fajafaja gi relisi noso nationalistis orlokoe, ben broko a bribi troetroe.”

Waka na baka na eksempre foe den fosi kresten na ini a ten disi

A kan taki kresten na ini a ten disi e waka na baka a toemoesi moi eksempre foe den fosi kresten? Jehovah Kotoigi na ini a jarihondro disi sori taki a kan. Di a skrifiman foe Holocaust Educational Digest ben e froeteri foe den, a ben taki: „Noiti wan Kotoigi foe Jehovah sa go na orlokoe. . . . Efoe ibriwan sma di abi makti na ini grontapoe ben abi a bribi disi dan noiti [a di foe Toe Grontapoefeti] no ben o pasa.”

Wi kan taki a srefi sani toe foe den disiten feti na ini wan pisi kontren, soleki a wan di e feti na ini Noord-Ierland. Wan toe jari pasa, wan Jehovah Kotoigi ben e preiki oso foe oso na ini wan Anitri birti na ini a foto Belfast. Baka di wan ososma ben kon sabi taki a Kotoigi ben de wan katoliksma fositen, a ben aksi: „Di joe ben de wan katoliksma, joe ben horibaka gi a IRA [Iers Republikeins Leger]?” A Kotoigi ben froestan taki a man ben kan doe en ogri foe di den ben sroto a man disi baka di den ben kisi en nanga wan gon di a ben go foe kiri wan katoliksma èn den ben loesoe en no so langa pasa ete. Foe dati ede a Kotoigi ben piki: „Now mi a no wan katoliksma. Mi na wan foe den Kotoigi foe Jehovah. Leki wan troe kresten noiti mi ben sa kiri wan sma gi iniwan tirimakti noso gi iniwan sma.” Di na ososma jere dati dan a ben seki a brada anoe èn ben taki: „Ala kiri takroe. Oenoe e doe wan boen wroko. Tan go so doro.”

San bribi na ini a nen foe Jesus wani taki

Ma foe bribi na ini a nen foe Jesus wani taki moro leki nomo foe no feti orlokoe. A wani taki dati wi moesoe gi jesi na ala den komando foe Krestes. Boiti dati, Jesus ben taki: „Oenoe na mi mati efoe oenoe e doe san mi e komanderi oenoe”, èn wan foe den komando foe en de taki wi moesoe „lobi makandra” (Johanes 15:14, 17). Lobi e proeberi foe doe boen gi tra sma. A e poeroe a kroetoe di sma e kroetoe trawan sondro reide, foe den ras ede, den relisi, èn den posisi na ini a libimakandra. Jesus ben sori fa.

Den djoe na ini den dei foe Jesus no ben lobi den Samariasma srefisrefi. Ma kontrari foe dati, Jesus ben taki nanga wan Samaria oema, èn leki wan bakapisi foe dati, en nanga foeroe trawan ben kon bribi na ini Jesus nen (Johanes 4:39). Jesus ben taki toe dati den disipel foe en ben sa gi kotoigi foe en „na Jerusalem èn na heri Judea nanga Samaria èn te na a moro farawe pisi foe grontapoe” (Tori foe den Apostel 1:8). A boskopoe foe en di e gi libi no ben moesoe gi soso na den djoe. Foe dati ede, Petrus ben kisi a komando foe fisiti Cornelius, wan legre ofsiri foe Rome. Ala di wan djoe no ben mag fisiti wan sma foe wan tra ras, dan tokoe Gado ben sori Petrus taki a „no moesoe kari no wan sma taki a doti noso no krin”. — Tori foe den Apostel 10:28.

Foe di den e waka na baka Jesus eksempre, meki Jehovah Kotoigi de klariklari foe jepi ala sma — awansi sortoe ras, relisi, noso ekonomia background den abi — foe leri foe a froeloesoe di e kon nanga jepi foe a nen foe Jesus. Bribi na ini a nen foe Jesus e boeweigi den ’foe meki bekènti na poebliki taki Jesus na Masra’ (Romesma 10:8, 9). Wi e gi joe a deki-ati foe teki a jepi foe den so taki joe toe kan leri foe bribi na ini a nen foe Jesus.

A nen foe Jesus moesoe wiki firi foe gi grani, foe sori lespeki, èn a moesoe boeweigi wi foe gi jesi troetroe. Na apostel Paulus ben taki: „Na ini a nen foe Jesus ibri kindi ben sa boigi foe den wan di de na hemel èn den wan di de na grontapoe èn den wan di de na ondro gron, èn ibri tongo ben sa erken na poebliki taki Jesus Krestes na Masra gi a glori foe Gado, a Tata” (Filipisma 2:10, 11). Ala di a moro bigi pisi foe den sma di e libi na grontapoe no wani foe saka densrefi na ondro a tiri foe Jesus, tokoe bijbel e sori taki a ten de krosibei te ala sma sa abi foe doe dati, noso den sa dede (2 Tesalonikasma 1:6-9). Foe dati ede, now na a ten foe bribi na ini a nen foe Jesus foe di wi e hori ala den komando foe en.

[Foetoewortoe]

[Prenki na tapoe bladzijde 6]

Foeroe sma ben kiri trawan èn ben dede na ini a nen foe Jesus

[Prenki na tapoe bladzijde 7]

Jesus no ben kroetoe sma sondro reide foe a ras foe den. Joe e doe dati?