Joe e memre disi ete?
Joe warderi en foe leisi den uitgave foe A Waktitoren foe no so langa pasa? We, loekoe efoe joe kan gi wan piki na tapoe den aksi di e kon now:
◻ Foe san ede den wortoe foe Paulus, „sma di e teki presi gi Krestes”, e fiti boen gi den salfoe Kresten? (2 Korentesma 5:20)
Na ini owroeten, sma di ben teki presi gi trawan ben seni go spesroetoe na ini ten foe feantifasi foe loekoe efoe den kan meki taki feti no e feni presi (Lukas 14:31, 32). Foe di a sondoe grontapoe foe libisma famiri de farawe foe Gado, dati meki a seni den salfoewan di e teki presi gi en foe taigi sma fa den kan kon boen baka nanga En, èn foe gi den deki-ati foe soekoe vrede nanga Gado. — 15/12, bladzijde 18.
◻ San na fo sani di ben tranga a bribi foe Abraham?
Na a fosi presi, a ben sori taki a ben bribi na ini Jehovah foe di a ben gi jesi te Gado ben taki (Hebrewsma 11:8); na a di foe toe presi, a bribi foe Abraham ben abi foeroe foe doe nanga a howpoe foe en (Romesma 4:18); na a di foe dri presi, Abraham ben taki foeroetron nanga Jehovah; èn na a di foe fo presi, Jehovah ben jepi Abraham te Abraham ben gebroiki den tirilin foe Gado. Den srefi sani disi kan tranga a bribi foe wi na ini a ten disi. — 1/1, bladzijde 17, 18.
◻ San den wortoe, „no tjari wi go na ini tesi”, wani taki? (Mateus 6:13)
Wi e aksi Gado foe no gi pasi meki wi fadon te wi e kisi tesi foe trangajesi en. Jehovah kan tiri wi so taki wi no e broko kindi èn taki Satan, „a godelowsoe wan” no e basi wi (1 Korentesma 10:13). — 15/1, bladzijde 14.
◻ San wan sma moesoe doe foe kisi pardon foe Gado gi wan ogri di a doe?
Te wi e bekènti wi sondoe na Gado dan wi moesoe abi so srefi berow èn „froktoe di fiti berow” (Lukas 3:8). Efoe wan sma e sori berow èn a e angri foe meki na ogri kon boen baka, dan dati ben sa boeweigi wan sma toe foe soekoe a jepi na jeje fasi foe den Kresten owroeman (Jakobus 5:13-15). — 15/1, bladzijde 19.
◻ Foe san ede wi moesoe doe moeiti foe abi sakafasi?
Wan sma di abi sakafasi, abi pasensi èn langa pasensi, èn a no sa prakseri toemoesi foe ensrefi. Sakafasi e hari troetroe mati di lobi joe. Ma moro prenspari, a e tjari a blesi foe Jehovah kon (Odo 22:4). — 1/2, bladzijde 7.
◻ Sortoe prenspari difrenti de na mindri a dede foe Jesus èn di foe Adam?
Adam ben froedini foe dede, bika a ben trangajesi en Kriaman foe espresi (Genesis 2:16, 17). Kontrari foe dati, Jesus en dede ben de wan sani di a no ben froedini srefisrefi, bika „a no ben doe no wan sondoe” (1 Petrus 2:22). So boen, di Jesus dede, a ben abi wan kefalek warti sani di a sondari Adam no ben abi di a dede — a reti foe abi volmaakti libisma libi. Foe dati ede a dede foe Jesus ben abi waarde leki srakti-ofrandi so taki a libisma famiri ben kan kisi froeloesoe. — 15/2, bladzijde 15, 16.
◻ San a foto na ini a profeiti fisjoen foe Esekièl ben prenki?
Foe di a foto e didon na mindri tegoe kondre (di no santa), meki a moesoe de wan sani djaso na grontapoe. Foe dati ede, a e sori taki a foto e prenki a tiri na grontapoe di sa tjari wini kon gi ala sma di sa de na ini a regtfardiki libimakandra na grontapoe. — 1/3, bladzijde 18.
◻ Foe san ede Jesus ben wasi den foetoe foe en disipel di a ben hori a Paskafesa na ini 33 G.T.?
Jesus no ben e seti wan seremonia foe wasi foetoe. Na presi foe dati, a ben jepi den apostel foe en foe kisi wan njoen denki — wan denki foe sakafasi èn foe de klariklari foe doe a moro lagi wroko gi den brada foe den. — 1/3, bladzijde 30.
◻ Te wi e gi tra sma leri, dan san de moro prenspari leki den bekwaamfasi di wi gebore nanga den?
Na den sortoe eigifasi di wi abi èn den sortoe jeje gwenti di wi kweki, den studenti kan waka na baka (Lukas 6:40; 2 Petrus 3:11). — 15/3, bladzijde 11, 12.
◻ Fa den poebliki takiman kan leri foe leisi den Boekoe foe Bijbel moro boen?
Te den e oefen. Ija, te den e leisi tranga ibri tron baka te leki den kan doe dati grati. — 15/3, bladzijde 20.
◻ Fa ’a jeje e drai go baka na Gado’ te wan sma dede? (Preikiman 12:7)
Foe di a jeje na a libikrakti, dan a „e drai go baka na a troe Gado”, san wani taki dati iniwan howpoe di a sma dati abi foe kisi libi na ini a tamara, na Gado wawan kan gi en now. Na Gado wawan kan gi wan sma en jeje, noso a libikrakti baka, foe di a e meki a sma dati kon na libi baka (Psalm 104:30). — 1/4, bladzijde 17.