Aksi foe leisiman

Wan toe Kotoigi foe Jehovah kisi a kari foe go wroko na kerki oso noso kerki presi. San Bijbel e taki foe den sortoe wroko disi?

A situwâsi disi kan miti Kresten di na wan opregti fasi wani doe san 1 Timoteus 5:8 taki, di e sori taki a de prenspari taki wan sma e sorgoe gi en eigi osofamiri na materia sei. Ala di Kresten seiker moesoe doe san a rai dati taki, tokoe dati no e gi den a reti foe teki iniwan sortoe grontapoe wroko, awansi sortoe wroko a de. Kresten e froestan taki a de fanowdoe foe kon sabi moro sani di e sori den san Gado wani. Foe eksempre, a wani di wan man wani sorgoe gi en osofamiri no ben sa gi en a reti foe handri kontrari san Bijbel e taki foe hoeroedoe noso a kiri di sma e kiri trawan. (Teki gersi Genesis 39:4-9; Jesaja 2:4; Johanes 17:14, 16.) A de prenspari toe taki Kresten e handri akroederi a komando foe komoto na Babilon a Bigiwan, a grontapoe tirimakti foe falsi relisi. — Openbaring 18:4, 5.

Na heri grontapoe, den foetoeboi foe Gado e miti foeroe situwâsi di abi foe doe nanga wroko. A no ben sa de wan koni sani èn wi no abi a reti toe foe proeberi kari ala den wroko di wan sma ben sa kan doe èn foe meki wet gi ibri situwâsi (2 Korentesma 1:24). Ma meki wi kari wan toe penti di Kresten moesoe prakseri te den moesoe bosroiti gi densrefi sortoe wroko den sa doe. Den penti disi ben kari sjatoe kaba na ini De Wachttoren foe 15 oktober 1982, na ini wan artikel di ben taki fa wi kan abi wini foe a konsensi di Gado gi wi. Na ini wan faki joe ben abi toe prenspari aksi èn dan a ben kari tra penti toe di kan jepi wi.

A fosi prenspari aksi na disi: Bijbel e kroetoe a grontapoe wroko dati? De Wachttoren ben piki taki Bijbel e kroetoe a foefoeroe di sma e foefoeroe, a gebroiki di sma e gebroiki broedoe, èn na anbegi foe kroektoe gado. Wan Kresten no moesoe doe den grontapoe wroko di langalanga e horibaka gi sani di Gado no feni boen, soleki den wan di wi kari didjonsro.

A di foe toe aksi na: Efoe wan sma ben sa doe a wroko disi, dan dati ben o wani taki dati a e wroko makandra foe doe wan sani di Bijbel e kroetoe? A de krin, taki wan sma di e wroko na ini wan dòbel-oso, wan kliniek pe sma e poeroe bere, noso wan motjo-oso, ben sa wroko makandra nanga den sma di e doe sani di no de akroederi Bijbel. Srefi te a wroko di a e doe drape ala dei ben de soso foe figi a gron noso foe teki telefon, dan a ben sa horibaka gi wan sani di a Wortoe foe Gado e kroetoe.

Foeroe Kresten di moesoe bosroiti sortoe wroko den moesoe doe, feni taki te den ondrosoekoe soso den aksi disi finifini, dan dati e jepi den kaba foe teki wan persoonlijk bosroiti.

Foe eksempre, den toe aksi disi ben kan sori wan sma foe san ede wan troe anbegiman no ben sa de wan wrokoman troetroe foe wan falsi relisi organisâsi, noso foe wroko gi wan kerki èn na ini wan kerki. Openbaring 18:4 e gi a komando disi: „Komoto na en, mi pipel, efoe oenoe no wani abi wan prati nanga en na ini den sondoe foe en.” Wan sma ben sa abi wan prati na den wroko nanga den sondoe foe Babilon a Bigiwan te a de wan wrokoman di e wroko doronomo gi wan relisi di ben e leri falsi anbegi. Awansi a wrokoman ben de wan man di e krin prasi, wan man di e ondrow a presi, wan man di e meki broko sani baka, noso wan sma di e loekoe monitori, dan en wroko ben sa horibaka gi wan anbegi di de kontrari a troe relisi. Boiti dati, wi kan froestan taki te sma ben e si a wrokoman disi e moi a kerki, e meki sani di broko baka, noso e doe sani gi a kerki, dan den ben sa denki taki a de foe a kerki dati.

Ma fa a de nanga wan sma di no e wroko doronomo gi wan kerki noso wan relisi organisâsi? Kande den kari en nomo foe go meki wan broko watra-peipi na a ondro-oso foe a kerki di moesoe meki esi-esi. Dati no ben sa de wan tra sani leki te a ben gi en nen gi wan wroko di moesoe doe, soleki foe poti wan daki noso foe poti isolatie gi a daki foe a kerki?

Soleki fa wi ben taki kaba, wi kan prakseri foe kefalek foeroe situwâsi. Foe dati ede, meki wi go loekoe ete feifi penti di De Wachttoren ben tjari kon na krin:

1. A wroko de soso foe doe sma wan boen èn a no de kontrari san Bijbel e taki? Loekoe na eksempre foe wan man di e tjari post. Efoe a e tjari post, dan dati no wani taki kwetikweti taki a e horibaka gi wan sani di no boen, te wan gebow na ini a kontren pe a moesoe go ben de wan kerki noso wan kliniek pe sma e poeroe bere. Gado e meki a son e skèin na ini den fensre foe ala gebow, so srefi na ini den fensre foe wan kerki noso foe so wan kliniek (Tori foe den Apostel 14:16, 17). Wan Kresten di de wan man di e tjari post, kan denki taki a e doe sma wan boen ibri dei baka. A ben kan de a srefi nanga wan Kresten di e kisi a kari foe doe wan serjoesoe wroko di moesoe doe esi-esi — wan man di e wroko na watrasistema èn di kisi a kari foe tapoe a watra di e leki nomonomo na ini wan kerki, noso wan man di e wroko na ini wan ambulance di kisi a kari foe jepi wan sma di fadon flaw ala di den ben e hori kerki. A brada ben sa kan denki taki a sani disi de nomo wan fasi foe jepi libisma wan leisi.

2. A sma kan bepaal gi ensrefi san a e doe? Wan Kresten di abi wan wenkri, no ben sa agri kwetikweti foe bai èn seri popki foe kroektoe gado, tapoe di abi foe doe nanga afkodrei, tabaka, noso meti di ben bori nanga broedoe. Leki a sma di abi a wenkri, na en na basi. Sma ben sa kan dwengi en foe seri tabaka nanga popki foe kroektoe gado èn foe meki moni na so fasi, ma a Kresten ben sa handri akroederi den bribi foe en di de akroederi Bijbel. Na a tra sei, wan Kresten wrokoman na ini wan bigi njanjan wenkri, kan kisi a wroko foe wroko na a kas, foe krin a gron, noso foe loekoe monitori. A no en e bepaal sortoe sani moesoe bai èn seri, srefi efoe wan toe foe den sani disi na sani di no boen, soleki tabaka noso sani gi den relisi fesa.a (Teki gersi Lukas 7:8; 17:7, 8.) Disi abi foe doe nanga a penti di e kon now.

3. O foeroe a sma abi foe doe nanga a tori? Meki wi go baka na a eksempre foe wan wenkri. Kande wan wrokoman di e wroko na a kas noso di e lai den kasi, wanwan leisi e wroko nanga tabaka noso relisi sani; dati na wan pikin pisi foe a wroko di a e doe heri dei. Ma a de wan heri tra sani leki wan wrokoman di e wroko na ini a srefi wenkri na a tonbangi pe den e seri tabaka! Ibri dei, a wroko foe en abi foe doe nanga sani di no e kroederi nanga a Kresten bribi (2 Korentesma 7:1). Disi e sori foe san ede wi moesoe loekoe o foeroe wi sa abi foe doe nanga a wroko noso omeni kontakti wi sa abi, te wi e prakseri sortoe wroko wi sa teki.

4. Foe pe a moni di den e pai wi e komoto noso san na a presi pe a wroko e doe? Loekoe toe situwâsi. Wan kliniek e bosroiti foe pai wan man foe krin den strati na ini a birti foe di a kliniek wani meki sma abi wan moro boen denki foe a presi dati pe den e poeroe bere. A kliniek pe sma e poeroe bere e pai en, ma a man no e wroko drape, èn no wan sma e si en na ini a kliniek heri dei. Na presi foe dati, den e si en e doe wan wroko gi a poebliki, di no de kontrari Bijbel, awansi soema e pai en. Now wan heri tra situwâsi. Na ini wan kondre pe motjowroko de akroederi wet, a kantoro foe gosontoe afersi e pai wan zuster foe wroko na ini den motjo-oso, foe ondrosoekoe a gosontoe foe den sma so taki siki di e panja nanga seks, no kon moro foeroe. Ala di a kantoro foe gosontoe afersi e pai en, tokoe a e wroko soso na ini den motjo-oso, èn disi e meki taki hoeroedoe e kon moro veilig, èn moro sma sa kan feni hoeroedoe wan boen sani. Den eksempre disi e sori foe san ede a presi pe a pai foe wan sma komoto èn a presi pe a sma e wroko, na penti di wi moesoe prakseri.

5. San na a bakapisi te wi e doe a wroko; a sa trobi a konsensi foe wi, noso a sa meki tra sma naki foetoe? Wi moesoe prakseri wi eigi konsensi èn di foe tra sma. Srefi te wan wroko (a presi pe a wroko e doe, èn a presi pe a pai komoto) gersi foe de boen gi moro foeroe Kresten, tokoe wan sma kan firi taki a sa trobi en eigi konsensi. Na apostel Paulus, di ben gi wan boen eksempre, ben taki: „Wi abi a froetrow taki wi abi wan eerlijk konsensi, foe di wi wani de eerlijk na ini ala sani” (Hebrewsma 13:18). Wi no moesoe doe wroko di sa meki wi firi froeferi; ma wi no moesoe kroetoe tra sma toe di abi wan tra konsensi. Kontrari foe dati, wan Kresten ben sa kan si taki a no de kontrari Bijbel te a e doe wan wroko, ma a e froestan taki foeroe sma na ini a gemeente èn na ini a libimakandra ben sa feni en wan froeferi sani. Paulus ben sori a joisti denki na ini den wortoe foe en: „Na no wan fasi wi e meki dati sma e naki foetoe fadon, so taki sma no kan feni fowtoe na a diniwroko foe wi, ma na ala fasi wi e rikomanderi wisrefi na Gado leki bedinari.” — 2 Korentesma 6:3, 4.

Meki wi go baka na a prenspari aksi di abi foe doe nanga a wroko di moesoe doe na wan kerki-oso, soleki te wan sma moesoe poti njoen fensre, krin a gron, noso foe meki na onfoe. San den penti di wi ben loekoe na tapoesei, abi foe doe nanga a tori?

Prakseri a penti di abi foe doe nanga a sma di abi a makti. A Kresten na a eiginari noso a driktoro di kan bosroiti efoe a sa teki so wan wroko na wan kerki? Wan Kresten di abi a makti dati ben sa wani abi wan prati na Babilon a Bigiwan, te a e gi en nen foe doe wan wroko noso te a e sroto wan kontrakti di e jepi wan relisi foe falsi anbegi? Dati no ben sa de a srefi leki a bosroiti di wan sma ben sa bosroiti foe seri tabaka noso popki foe kroektoe gado na ini en eigi wenkri? — 2 Korentesma 6:14-16.

Efoe a Kresten na wan wrokoman di no abi a makti foe bosroiti sortoe wroko a sa teki, dan a moesoe prakseri tra penti, soleki a presi pe a wroko e doe èn o foeroe a abi foe doe nanga a wroko. Den aksi a wrokoman nomo foe tjari njoen stoeroe go na wan presi gi wan okasi noso foe seti den stoeroe, noso foe doe sma wan boen, soleki te wan brandweerman moesoe go kiri a faja na ini wan kerki bifo a faja e panja? Foeroe sma ben sa si disi leki wan tra sani leki te wan wrokoman foe wan bisnis e gebroiki foeroe ten foe ferfi a kerki noso foe wroko doronomo na tapoe a kerkiprasi foe meki a kerki moi. So wan kontakti di e go nanga langa ben sa kan meki foeroe sma denki taki a Kresten na foe wan relisi di a e taki dati a no feni boen, èn den ben sa kan naki foetoe fadon. — Mateus 13:41; 18:6, 7.

Wi taki foe difrenti prenspari sani di wi moesoe prakseri èn di abi foe doe nanga wroko. Wi ben taki foe den na ini a kontekst foe wan spesroetoe aksi di abi foe doe nanga falsi relisi. Ma wi kan gebroiki den toe ini a tori foe tra sortoe wroko. Wi moesoe ondrosoekoe ala situwâsi na ondro begi, ala di wi e prakseri den spesroetoe — èn kande aparti — penti foe a situwâsi dati. Den penti di wi kari na tapoesei jepi foeroe opregti Kresten kaba foe teki bosroiti nanga den konsensi di e sori taki den abi na angri foe waka reti èn opregti na fesi Jehovah. — Odo 3:5, 6; Jesaja 2:3; Hebrewsma 12:12-14.

[Foetoewortoe]