Den Collegiant — Bijbelstudie ben meki den de tra fasi

Oiti joe jere foe den Collegiant?

A pikin relisi groepoe disi foe Bakrakondre na ini a di foe 17 jarihondro, ben de tra fasi leki den kerki foe a ten dati di ben de langa ten kaba. Fa so, èn san wi kan leri foe den? Foe kon sabi dati, meki wi go baka na ini a ten di pasa.

NA INI a jari 1587, Jacobus Arminius (noso, Jacob Harmensen) ben doro na ini a foto Amsterdam. A no ben moeilek gi en foe feni wan wroko, bika den papira foe en ben boen kefalek. Di a ben abi 21 jari, a ben kaba na Akademia foe Leiden na ini Bakrakondre. Baka dati, a ben tan siksi jari na ini Switserland èn ben studeri na ondro a tiri foe theoloog Théodore de Béze, a man di ben kon na ini a presi foe a Protestant Hervormsma Johannes Calvijn. Na foe dati ede den Protestantsma na ini Amsterdam ben breiti foe poti Arminius, di ben abi 27 jari, leki wan domri foe den! Ma wan toe jari na baka, foeroe memre foe a kerki ben sari taki den ben poti en. Foe san ede?

A streipenti taki a libi foe sma bepaal na fesi kaba

Sjatoe na baka di Arminius ben tron wan domri foe den, kesekese ben kon na mindri den Protestantsma foe Amsterdam foe a leri taki Gado bepaal a libi foe sma na fesi kaba. A leri disi ben de a prenspari pisi foe a Calvinisme, ma wan toe memre foe a kerki ben feni taki wan Gado di ben bepaal na fesi kaba taki wan toe sma ben o kisi froeloesoe èn taki tra sma ben o kisi strafoe, na wan ogri-ati Gado èn a no de regtfardiki. Den Calvijnsma ben froewakti taki Arminius, di ben kisi leri foe Béze, ben o sori den sma di ben abi wan tra denki taki den no ben abi leti. Ma na presi foe dati, Arminius ben teki a sei foe den sma di ben abi wan tra denki, èn dati ben skreki den Calvijnsma. Na a jari 1593, a kesekese ben kon so faja taki a ben prati den Protestantsma foe a foto na ini toe groepoe — den wan di ben horibaka gi a leri èn den wan di ben weigri foe teki a leri, den wan di abi wan njoen denki.

Baka wan toe jari, a kesekese disi na ini foto ben prati den Protestantsma na a heri kondre. Te foe kaba, na ini november 1618, a situwâsi ben de na so wan fasi taki a trobi ben moesoe koti. Den Calvijnsma di ben abi a jepi foe a legre nanga a poebliki, ben seni kari den sma di ben abi wan tra denki (di ben nen den Remonstrant na a ten datia) foe go na wan bigi kroetoe, a Kerki konmakandra foe den Protestantsma na Dordrecht. Na a kaba foe a konmakandra, ala den Remonstrant bedinari ben kan bosroiti foe doe wan foe den toe sani disi: Skrifi den nen na ondro wan kontrakti taki noiti moro den ben o preiki, noso den ben moesoe gowe libi a kondre. Foeroe foe den ben bosroiti foe gowe libi a kondre. Den Calvijnsma di ben hori densrefi strak na a bribi, ben teki a presi foe den domri foe den Remonstrant di ben gowe. A bribi foe den Calvijnsma ben wini — na dati a kerki konmakandra ben howpoe.

A bigin èn a gro foe den Collegiant

Neleki fa a ben pasa na tra presi, na so a gemeente foe den Remonstrant na ini a dorpoe Warmond, krosibei foe Leiden, ben lasi a domri foe den. Ma tra fasi leki na tra presi, a gemeente no ben erken a sma di a kerki konmakandra ben poti na en presi. Boiti dati, di wan domri foe den Remonstrant ben poti en libi na ini kefar foe drai go baka na Warmond na ini a jari 1620 foe sorgoe gi a gemeente, dan wan toe memre foe a gemeente no ben erken en toe. Den memre disi ben bigin hori den kerki na kibrifasi sondro a jepi foe wan kerki tiriman. Baka ten, den ben kari den konmakandra disi colleges (konmakandra), èn den sma di ben fisiti den colleges den ben kari den Collegiant.

Ala di den Collegiant ben kon moro foeroe foe di den no ben abi domri, èn no foe di den ben e hori densrefi na gronprakseri, tokoe a situwâsi dati ben kenki heri esi. Wan memre foe a gemeente, Gijsbert van der Kodde, ben taki dati foe di a gemeente ben kon makandra sondro a tiri foe wan kerki tiriman, a groepoe ben hori ensrefi moro krosibei na Bijbel èn na a fasi foe den fosi Kresten, moro leki den kerki di ben de langa ten kaba. A groepoe foe den kerki tiriman, na so a ben taki, ben kon de na baka a dede foe den apostel foe feni wroko gi den man di no ben wani leri doe wan wroko.

Na ini a jari 1621, van der Kodde nanga den memre di ben abi a srefi denki ben froisi den konmakandra foe den go na a dorpoe Rijnsburg di ben de ini a birti.b Wan toe jari na baka, di den no ben froefolgoe sma moro foe den relisi ede, ma den ben bigin froedrage den, dan den konmakandra foe den Collegiant ben kon moro pôpi na ini a heri kondre èn den ben hari „sma di abi difrenti sortoe background”, soleki fa a historia skrifiman Siegfried Zilverberg ben taki en. Den Remonstrant, den Mennoniet, den Sociniaan èn srefi theoloog ben de. Wan toe foe den ben de gronman. Trawan ben de poewemaman, sma di ben druk boekoe, datra, nanga anoe-wrokoman. A filosofiaman Spinoza (Benedictus de Spinoza) nanga a pedagoog Johann Amos Comenius (noso, Jan Komenský), èn so srefi a pôpi man Rembrandt van Rijn di ben meki skedrei ben agri nanga a groepoe disi. Den difrenti idea di den frôm sma disi ben tjari kon nanga den, ben abi krakti na tapoe den sani di den Collegiant ben bribi.

Baka a jari 1640, a fajafaja groepoe disi ben gro heri esi. Den colleges ben kon bigi esi-esi na ini Rotterdam, Amsterdam, Leeuwarden, èn na ini tra foto. Profesor tapoe a kontren foe historia, Andrew C. Fix e taki dati na mindri a pisi ten foe den jari 1650 nanga 1700, „den Collegiant . . . ben gro kon tron wan foe den moro prenspari èn makti relisi makti na Bakrakondre na ini a di foe 17 jarihondro”.

Den sani di den Collegiant ben bribi

Foe di rideneri, a froedrage di den ben froedrage tra bribi, nanga a fri foe taki ben de den aparti marki foe a groepoe foe den Collegiant, meki ibri Collegiant ben abi a fri foe bribi difrenti sani. Tokoe wan toe sani di den alamala ben bribi, ben tai den kon na wán. Foe eksempre, ala den Collegiant ben froestan o prenspari a ben de foe doe persoonlijk Bijbelstudie. Ibriwan foe den, na so wan Collegiant ben skrifi, ben moesoe „ondrosoekoe sani gi ensrefi èn a no moesoe kon sabi Gado nanga jepi foe wan tra sma”. Na dati den ben doe. Soleki fa a kerki historia skrifiman foe a di foe 19 jarihondro, Jacobus C. van Slee ben skrifi, den Collegiant ben sabi Bijbel moro iniwan tra relisi groepoe na ini ten dati. Srefi gensman ben prèise den Collegiant bika den ben abi a koni foe gebroiki Bijbel.

Ma o moro den Collegiant ben e studeri Bijbel, o moro den ben kon bribi sani di ben difrenti foe den moro bigi kerki. Boekoe di skrifi foe sensi a di foe 17 te leki a di foe 20 jarihondro e taki foe wan toe foe den sani di den ben bribi:

A fositen kerki. A Collegiant nanga theoloog Adam Boreel ben skrifi na ini a jari 1644 taki di a fosi kerki ben bigin boemoei nanga politiek na a ten foe Kèiser Konstantijn, dan a kerki ben broko a froebontoe di a ben abi nanga Krestes, èn santa jeje no ben wroko moro na den tapoe. A ben taki toe dati a bakapisi foe dati ben de taki den falsi leri ben kon moro foeroe èn ben de ete te na a ten foe en.

A Hervorming. A di foe 16 jarihondro Hervorming di Luther, Calvijn, nanga tra sma ben tiri, no ben doe nofo foe kenki a kerki. Na presi foe dati, soleki fa wan prenspari Collegiant nanga datra Galenus Abrahamsz (1622-1706) ben taki, dan a Hervorming ben meki a situwâsi foe relisi kon moro takroe foe di na foe den ede meki kesekese ben de èn sma no ben wani si makandra na ai. A Hervorming ben moesoe man kenki na ati troetroe, ma a no ben man doe dati.

A kerki nanga den kerki tiriman. Den kerki di ben de langa ten kaba kroeka, den abi grontapoe fasi, èn Gado no gi den makti kwetikweti. A sma di ben de serjoesoe na ini relisi ben kan doe a moro boen sani foe gowe libi a kerki pe a de na ini, so taki a no e tron wan sma di e kibri den sondoe foe a kerki. A wroko foe kerki tiriman, na so den Collegiant ben taki, no de akroederi Bijbel èn „ben takroe gi a jejefasi foe a Kresten gemeente”.

Kownoekondre nanga Paradijs. Wan foe den man di ben bigin a college na ini Amsterdam, Daniel de Breen (1594-1664), ben skrifi taki a Kownoekondre foe Krestes no ben de wan kownoekondre na jeje fasi di ben tan na ini na ati foe wan sma. A leriman Jacob Ostens, wan Collegiant na ini Rotterdam, ben taki dati „den famiri-edeman ben froewakti foe kisi den pramisi na grontapoe”. Na a srefi fasi den Collegiant ben wakti a ten te grontapoe ben sa kenki kon tron wan paradijs.

Dri-wánfasi. Foe di den sani di den Sociniaan ben bribi ben abi krakti na den Collegiant tapoe, meki wan toe prenspari Collegiant no ben bribi na ini a Dri-wánfasi.c Foe eksempre, Daniel Zwicker (1621-1678) ben skrifi taki ibri kerkileri di ben de kontrari a rideneri, soleki a Dri-wánfasi, ben de wan sani „di no kan srefisrefi èn di no troe”. Na ini a jari 1694 den ben tjari wan Bijbel di a Collegiant Reijnier Rooleeuw ben vertaal, kon na doro. A ben vertaal a lasti pisi foe Johanes 1:1: „Èn a wortoe ben de wan gado” na presi foe a vertaling di sma ben gwenti: „Èn a wortoe ben de Gado.”d

Den alawiki konmakandra

Ala di a no ala den Collegiant ben bribi a srefi sani, tokoe den colleges foe den na ini den difrenti foto ben hori pikinmoro na a srefi fasi. A historia skrifiman van Slee e froeteri taki ini a bigin foe a groepoe foe den Collegiant, pikinmoro noiti den ben sreka den konmakandra na fesi. Den Collegiant ben bribi taki foe di den wortoe foe na apostel Paulus ben sori taki a ben de fanowdoe foe taki „profeititori”, meki ala mansma di ben de memre foe a groepoe, ben kan taki na wan frifasi nanga a konmakandra (1 Korentesma 14:1, 3, 26). A bakapisi ben de taki nofotron den konmakandra ben tan boen lati neti èn wan toe foe den fisitiman ben fadon „boen dipi na sribi”.

Baka ten den konmakandra ben orga moro boen. Den Collegiant no ben kon makandra na tapoe sonde wawan, ma so srefi na den mindriwiki neti. So taki a takiman nanga a gemeente ben kan sreka densrefi na fesi gi ala den konmakandra foe a jari dati, dan wan programa di den ben druk ben abi den Bijbeltekst di den ben o ondrosoekoe èn a ben abi so srefi den bigin letter foe a nen foe a takiman. Baka te den ben bigin a konmakandra nanga singi èn nanga begi, dan wan takiman ben froeklari den Bijbeltekst. Te a ben kaba, dan a ben aksi den mansma foe taki san den ben denki foe a tori di den ben taki didjonsro foe en. Dan wan di foe toe takiman ben taki fa den ben kan gebroiki den srefi tekst dati. Den ben tapoe a konmakandra nanga begi èn nanga singi.

Den Collegiant na ini a foto Harlingen, na ini Friesland, ben abi wan kefalek njoen fasi foe sorgoe taki den konmakandra foe den ben de akroederi a schema. Wan takiman di ben taki moro langa leki a ben moesoe taki, ben moesoe pai wan pikin strafoemoni.

Nationaal konmakandra

Den Collegiant ben feni so srefi taki a ben de fanowdoe foe hori moro bigi konmakandra. Foe dati ede, foe bigin nanga a jari 1640, den Collegiant foe a heri kondre ben rèis toe tron wan jari (na ini a lente nanga a zomer) go na Rijnsburg. Den konmakandra disi, na so a historia skrifiman Fix e skrifi, ben gi den na okasi foe kon „sabi den idea, den firi, den bribi, nanga den wroko foe den brada foe den na ala presi”.

Wan toe foe den Collegiant di ben go drape, ben joeroe kamra foe den dorpoesma, ala di trawan ben tan na ini a Groote Huis, noso Bigi Oso, wan tanpresi di abi 30 kamra èn di ben de foe den Collegiant. Drape den ben gi 60 te nanga 70 sma njanjan foe njan dati makandra. Baka a njanjan, dan den fisitiman ben kan koiri na ini a bigi djari foe a tanpresi foe njan boen foe den ’sani di Gado meki, foe kan taki nanga makandra na wan tiri fasi, noso foe prakseri dipi foe sani’.

Ala di a no ala den Collegiant ben denki taki a ben de fanowdoe foe dopoe, tokoe foeroe foe den ben doe dati. Foe dati ede a dopoe ben kon tron wan pisi foe den bigi konmakandra. A historia skrifiman van Slee e taki dati a seremonia ben de moro foeroe na tapoe satra mamanten. Baka a singi nanga begi, dan wan lezing ben hori foe sori taki a de fanowdoe foe dopoe. Baka dati, a takiman ben kari ala den bigisma di ben wani dopoe foe meki den bribi bekènti nanga den wortoe soleki: „Mi e bribi taki Jesus Krestes na a Manpikin foe a libilibi Gado.” Baka te den ben tapoe a lezing nanga begi, dan ala den sma di ben de drape ben waka go na a dopoepresi èn ben si taki mansma nanga oemasma ben e kindi na ini a dopoepresi, so taki a watra ben doro te na den skowroe foe den. Dan a dopoeman safrisafri ben poesoe na ede foe a njoen bribiman go na fesi èn go na ondro a watra. Baka a seremonia, dan ala sma ben go baka na den sidonpresi foe arki wan tra lezing.

Feifi joeroe satra bakadina, dan a troetroe konmakandra ben bigin te den ben e leisi wan sjatoe pisi foe Bijbel, singi, èn begi. Foe sorgoe taki ala ten wan takiman ben de, dan ibriwan foe den college foe Rotterdam, Leiden, Amsterdam, nanga foe Noord-Holland ben sorgoe taki takiman ben de gi ibri konmakandra. Sonde mamanten ben poti aparti foe hori na Avondmaal foe Masra. Baka te den ben hori wan lezing, ben begi èn singi, dan den mansma nanga oemasma ben njan a brede èn ben dringi a win. Moro lezing ben hori na tapoe sonde neti, èn na tapoe moende mamanten ala sma ben kon makandra foe arki a lasti lezing. Moro foeroe foe den lezing di ben hori na tapoe den kongres disi, na so van Slee e taki, ben de praktis lezing, èn den ben tjari kon na krin fa den moesoe gebroiki en, na presi foe froeklari sani finifini.

Den sma foe Rijnsburg ben breiti foe abi den sortoe konmakandra disi na ini a dorpoe foe den. Wan sma na ini a di foe 18 jarihondro di ben si den sani dati, ben skrifi taki wan lo freimdesma di ben kon drape èn di ben bai boen foeroe njanjan nanga dringi, ben tjari foeroe moni kon na ini a dorpoe. Boiti dati, baka ibri kongres, den Collegiant ben gi den pôti sma foe Rijnsburg moni. Seiker a dorpoe ben firi a lasi di den konmakandra dati no ben hori moro na ini a jari 1787. Baka dati, a groepoe foe den Collegiant ben dede gowe safrisafri. Foe san ede?

Foe san ede den dede gowe safrisafri

Na a kaba foe a di foe 17 jarihondro, wan kesekese ben bigin di abi foe doe nanga a ròl di rideneri abi na ini relisi. Wan toe Collegiant ben bribi taki a rideneri foe libisma moesoe kon bifo den sani di Gado e tjari kon na doro, ma trawan no ben agri nanga dati. Te foe kaba, a kesekese ben prati a heri groepoe foe den Collegiant. A ben de baka a dede foe sma di ben horibaka gi den toe sei foe a kesekese, taki den Collegiant ben kon de wán baka. Ma tokoe, baka a prati disi, ’noiti moro a groepoe ben de a srefi baka’, na so a historia skrifiman Fix e taki.

Foe di den Protestant kerki foe a di foe 18 jarihondro ben froedrage tra relisi moro nanga moro, ben meki toe taki den Collegiant ben go na baka. Di den gronprakseri foe den Collegiant di abi foe doe nanga rideneri èn a froedrage di den ben froedrage tra relisi ben kon de sani di a moro bigi pisi foe a libimakandra ben feni boen, dan „a leti foe a bribi foe den Collegiant di ben skèin en wawan, ben dede gowe na ini a brenki leti foe a Verlichting”. Na a kaba foe a di foe 18 jarihondro, den Mennoniet nanga tra relisi groepoe ben teki moro foeroe foe den Collegiant abra.

Foe di den Collegiant no ben abi leki marki foe abi wán denki na ini a groepoe foe den, meki den ben abi foeroe difrenti denki. Den ben froestan disi, èn foe dati ede den no ben froeklari taki den ben de „na ini wánfasi . . . nanga a srefi fasi foe denki”, soleki fa na apostel Paulus ben gi den Kresten a tranga foe de (1 Korentesma 1:10). Ma na a srefi ten den Collegiant ben froewakti a ten te den prenspari Kresten bribi, soleki wán denki, ben sa tron wan troetroe sani.

Te wi e prakseri taki sma no ben abi foeroe troetroe sabi ete na ini den dei foe den Collegiant, dan den de wan eksempre di foeroe relisi na ini a ten disi kan hori na prakseri. (Teki gersi Danièl 12:4.) A tjari di den ben tjari kon na krin taki a de fanowdoe foe studeri Bijbel, ben de akroederi a rai foe na apostel Paulus: „Overtoigi joesrefi foe ala sani” (1 Tesalonikasma 5:21). Persoonlijk Bijbelstudie ben leri Jacobus Arminius nanga tra sma taki wan toe sani di den relisi ben bribi èn ben doe langa ten kaba, no ben de akroederi Bijbel srefisrefi. Di den ben kon froestan disi, dan den ben abi a deki-ati foe de tra fasi leki den relisi di ben de langa ten kaba. Joe ben o doe a srefi sani?

[Foetoewortoe]

[Prenki na tapoe bladzijde 24]

Rembrandt van Rijn

[Prenki na tapoe bladzijde 26]

A dorpoe Warmond pe den Collegiant ben bigin, èn a De Vlietliba pe den ben dopoe sma

[Sma di abi a reti foe a prenki na tapoe bladzijde 23]

Background: Nanga a primisi foe Courtesy of the American Bible Society Library, New York